[فيتامين سي]

بيت العنكبوت 8
- الرفيق ..والطريق –


أشرقت الشمس على مدينة (ك)..
منذ زمن طويل لم أسمع زقزقة العصافير في الصباح ، حتى إنني تخيلتها قد غادرت البلد مع الذين غادروا .. النسيم الصباحي البارد يداعب الوجوه ويوقظها .. وحدي أنا لم أنم طوال الليل مع مخاوفي وهلاوسي .. أسعد لم يحاول التحدث معي وتركني لنفسي ، أعرف إنه سيتحدث معي مطولا ويحاول طرد هذه الأفكار من رأسي ولكن الفكرة المرعبة عشعشت بداخلي ورمت بذورها ونبتت وصار لها فروع وأشواك .. سرطان ؟؟ كنت أشك في الأمر منذ مدة ولكني رفضت أن أواجه نفسي .. جاء الشاي باللبن فشربنا والجميع يمازح أسعد وهو بحضوره الطاغي يرد عليهم مداعبا .. شخصية مرحة لا يمكنك مهما حاولت أن تملها أو تغضب منها .. دنا مني حاملا كوبه وجلس جواري قائلا :
- أنا عارف الحاجة القاعدة في راسك من أمس وحمتك تنوم ومخلياك قاطع صوت من الصباح كده
قلت له :
- إنت شايف إنها حاجة عادية لدرجة أنساها وأضحك معاكم عادي يعني ؟
صمت لحظة ثم قال مبتسما :
- أنا ما قلت إنو عندك سرطان يا (س) .. قلت إنو الأعراض بتتشابه مع السرطان لكن تشخيص السرطان حاجة صعبة جدا ، ومحتاجة أخصائي متمرس وفحوصات أنسجة عشان نتأكد منها
قلت له :
- لكن بالنسبة لآلام العظام وال..
- آلام العظام دي في ستين مرض ممكن يعملوها ليك زي الحمى المالطية والحميات النزفية وحاجات تانية كتير ياخي حتى النزلة والملاريا يمكن تعمل آلام عظام
بدأ على وجهي بوضوح عدم الإقتناع بكلامه فأعتدل في جلسته بجدية وعدل نظارته الطبية وهو يقول :
- أسمع يا (س) .. حسب ما حكيت لي إنت كنت محبوس في بيتكم سنة كاملة وأكلك كلو حاجات قيمتها الغذائية ضعيفة وإنت أساسا بنيتك ضعيفة ، أنا ما عارف حصل ليك شنو بالضبط لأنو ممكن عادي تكون نقصت حديد وكالسيوم وفايتمينات وديل فقدانهم حيعمل ليك أنيميا وضعف وآلام عضلات .. طلع فكرة السرطان دي من راسك لأنو من ناحية طبية موضوع آلام العظام المصاحب للسرطان ده ما بيحصل إلا لما تصل لمرحلة إنتقال الخلايا السرطانية من منطقة الورم للعظام ( العملية دي إسمها Metastasis ) ولو كانت عندك ما حتكون قاعد معاي تتونس بالطريقة دي .. أها إقتنعت ؟
حككت رأسي مفكرا في كلامه .. هو طبيب وهو أدرى مني بهذه الأشياء ولكن إن كان يعرف في الطب فأنا أجيد قراءة العيون جيدا .. هناك شئ ما يعرفه عن هذه الأعراض ويخبئه عني .. نهض وأكمل كوبه وهو يقول :
- حأقوم أجهز العربية وأزيد الجاز بتاعها وأشوفها ناقصها شنو عشان نتحرك بعد ده
- بتعرف تصلح عربات ؟
- دي هوايتي من صغير وأبوي الله يرحمو كان مكنيكي
تركته ليمارس هوايته ونهضت أنا حاملا كوبي لأتجول بين أحواض الخضروات وأشجار الليمون .. عم إسماعيل كان يصلي الضحى على مقعده المتحرك ، مجاهد الإبن الأوسط لعم إسماعيل يحمل بندقيته ويشرف على فتح الجدول ليسقى المزروعات .. عبدالله والزين كانا عند زريبة الأبقار الصغيرة ، وخضر أصغر الأبناء والذي كان مصابا بالملاريا يطعم الدجاج .. حياة هادئة وجميلة ولكنها أشبه بالحياة على واحة وأنت تدرك أن كل ما يحيط بك هو صحراء جرداء ، قاحلة قاسية يهددك تمددها في كل ثانية ..لن يكون أي منهم في أمان لو تجاوز تلك الأسوار .. سمعت صوت المحرك فتحركت نحو السيارة .. أنهى عم إسماعيل صلاته وجاء أبناءه ليودعونا .. أمهم الطيبة الحنون أعدت لنا سلة مليئة بالطعام وأوصت أسعد بحرارة أن يأخذ حذره ويعود سالما لو إستطاع مع عروسه ، إبتسم أسعد وهو يشد على يدها :
- إن شاءالله يا خالة
صافحتهم واحدا واحدا وعانقهم أسعد مودعا ، ومد يده ليتناول البندقية الكلاشنكوف من عم إسماعيل ولكني بسرعة أمسكت يده وأنا أقول :
- خليها البندقية دي ما تشيلها
قال لي بدهشة :
- ليه ؟ لازم يكون في سلاح في يدنا
قلت له الشئ الذي لم يفطن إليه بذكائه :
- صدقني سلاحنا الوحيد الحيوصلنا أحياء هو إنو نحن عزل وما عندنا سلاح .. أنا جيت من مدينة (أ) وصادفت في طريقي ناس الحركات وقوات ال(ج) وكلهم وقفوني لو كنت مسلح أو شمو رايحة بندقية معاي ما كنت وصلت لحدي هنا حي
قال أسعد بعدم إقتناع وهو يرجع البندقية :
- فهم برضو .. لكن على الأقل نشيل معانا مسدس صغير .. كويس ؟
أخذ المسدس من عبد الله ودسه أسفل قميصه ، وركب في مقعد السائق فركبت جواره حاملا السلة ، فلوح للجميع ثم أنطلقنا خارج المزرعة في رحلتنا الطويلة نحو المجهول .. نعود للطريق الترابي ثم للطريق الأسفلتي المتجه للخرطوم .. قلت لأسعد :
- ناس طيبين شديد الجماعة ديل
هز رأسه مؤيدا :
- شديد .. وطالما زي ديل موجودين لسه البلد دي فيها أمل
لا أطيق الجمل الإنشائية المتفائلة مثل الجملة أعلاه لذلك آثرت الصمت ونحن نعبر الكوبري الذي يفصل مدينة (ك) عن تؤامها مدينة (ب) ، ثم سألته :
- إنت جيت من الخرطوم كيف ؟
قال لي وهو يراقب الطريق مترقبا :
- كنت بتجول في السوق العربي وبفتش في بقايا الصيدليات المنهوبة والمدمرة ، فجأة قوات ال(ج) إقتحمت السوق وقبضوني جوة صيدلية .. طبعا إنت عارف الجماعة ديل شعارهم : أقتل أول حاجة وبعدين نتفاهم وفعلا كانوا عايزين يقتلوني لكن في واحد منهم شغل مخو وأكتشف إنو الزول البيكون لابس نظارة طبية وقاعد جوة صيدلية معناها : دكتور عشان كده عفو عني وساقوني معاهم
- ساقوك وين ؟
- كان عندهم أربعة أفراد مجرحين وعايزين زول يسعفهم ، ياخي كانت أسوأ لحظات عمري وأنا بخيط في الجروح بدون بنج وبنضف في فتحت الرصاص .. المهم بعد أسعفتهم كأفأوني بإنو حيعينوني الطبيب بتاع القوة بتاعتهم مدى الحياة .. شفت الشرف ده ؟
قلت له مستغربا :
- أها وطلعت منهم كيف ؟
- عادي ركبوني معاهم وغادرنا العاصمة وقريب من مدينة (ك) هاجمتهم قوات الحركات فماتوا معظمهم وهربو البقية ووقعت أنا في يد الحركات
كان يحكي الموضوع كأنه يحكي عن نزهة قام بها لشارع النيل ، وواصل :
- وقبل نطلع من المدينة أشتبكو مع جماعة الرباطة وهربت أنا في نص المعمعة ديك .. أها دي كل القصة
- تقريبا نفس قصتي .. بس سؤال خارج الموضوع كنت بتفتش الصيدليات لشنو ؟
عبرت سحابة كئيبة وجهه المرح وهو يرد :
- كنت بفتش عن أي نوع بتاع دواء يا (س) .. أدوية ضغط .. حبوب سكري .. مسكنات .. أي حاجة .. ما تتصور حجم الكارثة الحصلت ي على المرضى .. بقى مافي مستشفيات ولا صيدليات ولا أي خدمة صحية من أي نوع .. كنت بعمل على قدرتي وبعالج الناس البلقاهم في طريقي .. شنطتي دي مليانة حبوب وفيها جهاز ضغط وجهاز فحص دم متطور جاني هدية زمان من دبي .. بس اليد الواحدة ما بتصفق وأنا ما تامي يد .. أنا مجرد خلية صغيرة
تأثرت بشدة لكلامه وهو يواصل :
- أكتر حاجة بتألم الواحد يا (س) هي إحساس العجز وإحساس إنو نحن الشباب بتاعين الجيل ده حيحكم علينا التاريخ بإننا سمحنا للحصل ده يحصل ونحن قاعدين
ساد الصمت بعد الجملة الأخيرة .. كان على حق .. سيحكم علينا التاريخ بأننا كنا السبب .. نحن من صمتنا وتركنا السفينة تغرق بنا .. نحن من إستسلمنا للفساد وللحروب وأخيرا للمخدرات التي أجتاحت أوساط الشباب بلا رحمة بعد سقوط الحكومة .. فجأة غيّر أسعد محور الحديث وهو يسألني بإهتمام :
- سماعات العربية دي شغالة ؟
قلت له متفاجئا :
- ما متأكد والله
أخرج من حقيبته جهاز (إم بي ثري ) عتيق من النوع المنقرض الذي يوصل بقداحة السيارة ، وأوصله ثم أدخل ذاكرة فلاش صغرة في فجوة الإم بي ثري وهو يغمغم :
- يارب يشتغل .. يارب يشتغل
أصدرت السماعات هسيسا عاليا فصاح فرحا كأنه لم يكن ذلك المكتئب قبل قليل :
- الحمد لله .. أسمع بتسمع لمحمود
- وفي زول ما بيسمع ليهو ؟ لكن لي سنة كاملة ما سمعت أغنية
ضغط زر الجهاز لينبعث الصوت الحبيب ، رفيق الشباب والمحبين الذي رحل قبل عشرة أعوام .. محمود .. لم يخرج عبر السماعات لأذاننا بل خرج ليدخل في قلوبنا وهو يغني لنا عن إنه :
من أجل تحقيق الوصول ..
بركب مراكب المستحيل
مهما ما المشوار يطول
بمشي عى الدرب الطويل
عشان أحقق يازمن
أملي والحلم الجميل
مهما أمتدت السنوات لن يصدأ ذلك الصوت ولن تموت تلك الأغنيات ، قلت لأسعد :
- شكلك حواتي قديم
- حواتي وبس ؟ أنا كنت مجنون بالزول ده وما مات كنت في المطار مع الشباب الإستقبلو جثمانو من الأردن .. عارف أنا كان عندي أورغن وكنت حافظ أغانيهو كلها وبعزفها لأصحابي
- إنت بتعزف عود وأورغن ؟
- أيوا
- وجبت في الشهادة 99% وطبعا كنت أول دفعتك في كلية الطب
- في الستة سنوات وحياتك
- وبتصلح عربات كمان ؟
- عربات ومولدات كهرباء كهواية وعندي دبلوم في برمجة الكومبيوتر
- بتتكلم إنجليزي ؟
- جبت 9 في إمتحان أيلتس وبتكلم فرنسي برضو وبهبش في اللغة الأسبانية
- ................................
- هههههههه وكنت بكتب شعر أيام الجامعة وبعدها بديت أكتب قصص
- ؟؟؟؟؟؟؟؟؟؟؟؟
- ده غير الحزام الأسود في الكاراتيه طبعا هههههههه مالك فاتح خشمك كده يا (س)
هززت رأسي غير مصدق ما أسمعه ثم سألته بتلقائية :
- طيب المقعدك شنو في البلد دي ؟
صمت لحظات بلع فيها ريقه ونحن نجتاز مدينة (ب) ثم أجابني بتجهم :
- ده السؤال الضيع البلد دي يا (س) ..
(يتبع )