[princess sara]

صباح الخير ^_^

كنت هنام لاقيت الفصل نزل .. اذن باي باي يا نوم

الفصل استفزني الصراحه .. واقصد الجزء المتعلق ب " ليث وسوار "
اول مرة اقول كده الا اني كارهه وجودهم مع بعض ... وطبعا اقصد في الوقت الحالي اللي هما فيه ده
انا مش شايفه اي تطور بين الاتنين .. بالعكس لحد الان سوار مش متقبله وجود ليث بجوارها .. كزوج .. كحبيب .. كعاشق .. ممكن تكون سوار انانيه شويه في الفتره الاخيره ..رغم انها بترفض حب ليث واي بادره يكون فيها عاطفه كلها عشق وغرام الا انها بتتقبل غزله وكلامه واعترافاته .. مهما كان هي انثى وغرورها بيعلى ويكبر من اقل تصرف بيصدر من ليث تجاهها
الا انها مش بتمنحه اي شــــــــــئ في المقابل .. من البدايه وانا شايفه ان سوار مش بتمنح ليث اي شئ كتعويض حتى على المعامله والحرمان اللي بيعيش فيه معاها .. اه هي منحته دعمها امام عائلته .. خوفها وقلقها لما تعب وكاد ان يسقط من الانفعال والغضب لما الكل هاجمها واتعرض ليها بالسوء .. الا انها حرمته من الحب اللي يستحقه .. حرمته الطفل اللي بيتمنى انه يكون ليه منها هي فقط .. منحته احساس الرضا والاستسلام والتقبل في ان مصيرها بقى معاه
من البدايه خالص وهي بتوصله ان هدفها هو الثأر والوصول للانتقام من اللي قتل سليم الله يرحمه .. حتى بعد رحليهم من البلده ومعرفتها ان مصيرهم في الاخر مع بعض ولبعض .. الا انها مكتفيتش ابدا ورافضه الاستسلام والتنازل
كل ده بيجرح ليث وبيعلم على قلبه ببطء شديد .. الا انها بتحاول تتجاهل وتحمي نفسها من الضعف لرؤيته في الموقف الضعيف اللي بيتألم وتتمسك بهدفه والوصول ليه رغم الكل واولهم ليث
سوار الرافعي قويه وقدره تحملها تفوق قدره تحمل يجيي 30 رجل في منتهى القوه .. الا انها تظل امراه وفي اوقات بتضعف وتتنازل .. حب ليث وقربه ليها بكل الطرق والاشكال بيمنحها فرص كتير انها تستسلم لحبه وتفتح الدائره اللي حوالين قلبها وترجع تعيش وتسمح لنفسها بالتنفس من تاني .. الا انها بتتمسك بكل اللي حصل معاها عشان ترجع تقوى وتقفل الدائره من تاني .. هي لسه متقبلتش رحليهم من البلده بالطريقه دي
بس الدفاع عن نفسها مكنش هيجيب نتيجه خاصه ان مفيش دليل قوي .. والاكتر ان ليث ذات نفسه وقف امام الكل وضرب احد اعمامه لمجرد انه غلط في سوار .. كانت عايزة تقوم مدبحه يعني عشان تفضل موجوده هناك ؟! حتى معرفتها ان ميسره ورا كل اللي حصل الا انها سكتت ومقدرتش تقول ولا تعبر بأي حاجه
سوار شايفه ان راحتها وكل اللي هي عايزاها ومحتاجاه هو انها تنتقم من اللي قتل سليم بأي طريقه واي حاجه تانيه ممكن تتعوض
بس هي متعرفش اذا كانت هتلاقي الراحه لما توصل انها تخسر ليث وتنحرم منه ؟!
متعرفش اذا كانت هتقدر تقاوم وتقف على رجلها بكل قوتها لما تدفع ليث لكرهها وبنفسها تقتل الحب اللي بترفضه ظاهريا وبتتمسك بيه بكل قوتها بس من جواها
هي واثقه ان ليث بيحبها ومش هيسمح انها تبعد عنه بأي طريقه .. بس ياترى هي واثقه من قدره ليث على التحمل اكتر من كده ؟!
ياترى هي واثقه ان افعالها وتفكيرها وصدها لتقرب ليث في معظم الاحيان هتخليه يصمم انه يكون بجوارها حتى ولو على حساب قلبه ؟!
ياترى ايه الاهم عندها وبالنسبه ليها .. انها تحصل على الثأر سواء بالقتل او بالقتل ... او انها تكون مع ليث وتعيش حياه مع رجل عاشق ليها من زمن الزمان ؟! هي ممكن تتنازل وتخسر هدف الا انها في المقابل هتكسب كتير جدا جدا ... الا انها لو تمسكت بالعناد والتصميم على المضي قدما في طريق هي مش عارفه نهايته يبقى هتخسر وهتخسر كتير جدا جدا .. بس لحظتها مفيش طريق للرجوع ابدا
ليث بشر .. والبشر ليه قدره للتحمل .. وليث لحد الان تحمل كتير جدا جدا جدا .. الا انه راضي بكل ده مادام هو موجود وبجوار الحلم اللي كان اقصى امنياته انه يمتلك فرصه لتحقيقه .. واهو اتحقق وسوار زوجته وملكه ومعاه بعيد عن الكل .. بس للاسف الحلم ناقص لاني لا اعتقد ان ليث حلم حياته انه يمتلك سوار والسلام .. لا انا اعتقد واكاد اجزم ان ليث حلمه ان سوار تبادله الحلم بكل ما فيه من حب وتملك وتمسك وكل شئ
اصل مش حلو ابدا ان ليث يكون هو الطرف اللي بيمنح حب وشوق وغيره وعشق وكل ما يخطر على البال وفي الاخر ميحصلش حتى على مقابل ولا تعويض صغير
الا ان ليث بيمنحها الوقت الكافي لحد ما تعرف ان مصيرها ونهايتها معاه هو فقط .. اي حاجه تانيه مش هيكون ليها اي اهميه مهما كانت
بيصبر نفسه بالتصرفات القليله اللي بتصدر منها وبتكون هي البادئه دائما .. سواء كانت خوف وقلق عليه .. او تأنيب ضمير لاي تصرف يصدر منها ويتطلب منها الذهاب والاعتذار بأي طريقه
بس كل ده بيحصل ياما مرة او عده مرات .. والباقي ياما خلاف او عناد او تراشق كلام بينتهي دايما بجرح طرف منهم ولو ان ليث بيكون دايما هو المتضرر في كل مرة
ياترى ده الحل ليهم ؟!! الجرح بينهم هيستمر لحد امتى ؟! هل من الممكن ان ليث يبعد ويترك سوار لاي سبب ؟! هيقدر ؟؟ وهي هتتقبل ده وتتحمله ولا هتعرف الحقيقه ساعتها وان اهميه ليث معاها اهم من اي شئ اخر ؟!
كنت قولت سابقا ان كل تصرفات ليث بتعجبني وتجننني الا ان المرة دي ليث خنقني يا ناس >_<
رجوله ليث واحترامه لنفسخ ولشخصيته وللوضع اللي هو فيه نرفزني جدا المرة دي
يمكن لانه مش عارف لسه حقيقه الحقيره المشعوذه اللي بيحاول يمنحها حقها حتى ولو ناقص ومش كامل
ليث شايف في ميسره كل حاجه وحشه واستحاله استمرار زواجهم خاصه بعد كل اللي بيشوفه منها .. الا انها تظل زوجته .. يعني ليها حقوق عليه ولازم يراعي منظرها ومكانها امام الناس
بعد الفتره اللي فاتت قولت ده تركها وسابها مع كل اللي سابه وراه في البلده
الا ان وجودها على ذمته منحها حقوقها اللي مازالت مستمره مع استمرار زواجهم
لو مكنش سافر وزارها عده مرات خلال السبع الشهور كان الحق واللوم هيكون عليه وهيطلع رجل حقير وناقص وعليه الغلط من الكل والاهم هيخليها هي المظلومه واللي خسرت زوجها ووجوده معاها
وحتى رغم كل ده .. مش ليث الهلالي اللي يظلم حد ويقصر تجاهه حتى ولو كان فيه كل العبر والبشاعه
بس لامتى هيظل في الوضع ده ؟! انفجار سوار الاخير وتجرأها عن معرفه اللي بيدور بينهم ... هل هيغير في الامر شئ ؟!
تأكده ان حياته مع ميسره انتهت من زمان جدا الا ان رافض الطلاق لانها ابنه عمه في المقام الاول وشايل همها بعد الانفصال عنه ؟؟ طبعا مين العاقل اللي يرضى يتزوج بنت المجانين دي داهيه تاخدها يارب >_<
بس انا ليه حاسه ان زياراتهم للبلد هتكون بدايه مصايب ان شاء الله ؟!
اعتقد بنسبه كبيره انه هيستقبل خبر حمل زوجته واقصد هنا ميسره ؟!!
وطبعا هيكون لعبه جديده منها عشان تقدر ترجعه البلد غصب عنه .. بس ياترى هل ممكن ده يحصل خاصه انه كان قليل جدا الحضور معاها والقرب منها ؟!
بس اقولك على حاجه انا مش متفائل !!

مين دليله دي كمان ؟!
عفوا الا اني كرهتها من البدايه .. لا انا احتقرتها على فكرة
انها توقف حياتها على هدف واحد وشخص واحد يبقى ده اسمه جنان .. انها تقبل على نفسها تكون زوجه تانيه المهم انها تحصل على رجل مناسب ليها ولكونها مهندسه ومتهمه بنفسها وبأناقتها وبجمالها .. انها تقبل على انها تكون زوجه تانيه او حتى زوجه تالته المهم انها تتزوج فده قمه الجنان والضعف والحقاره كمان
مش معنى انها وصلت لمنتصف الثلاثينات ان حياتها تقف وترضى وتبحث عن اي بديل مهما كان وضعه
لو هي فعلا شايفه نفسها مهندسه ومهتمه بكل حاجه فيها يبقى من الافضل انها تتزوج رجل يكون ليها هو فقط مش تبحث خلف رجل عارفه انه متزوج بدل المرة اتنين
احب اصححلك معلوماتك .. ليث يعرف سوار قبل ما يعرفك انتي شخصيا .. ليث حب سوار ولم ولن يحب بعدها ابدا .. ليث تزوج سوار وهي بالنسبه ليه الزوجه الوحيده اللي اختارها وحصل عليها في الاخر انه يستحقها
انتي شايفه ان سوار مجرد شئ في ملابس سوداء من بلده قديمه وبعيده .. مسكينه حضرتك متعرفيش اللي فيها ابدا
مش هقولك غير انك هتاخدي خيبه امل كبيره لما تعرفي ان خططك وطموحاتك اخرها سراب فقط

زاهر الحقير
يعني اتزوجت .. وزوجتك حامل .. وعايش حياه كامله من كل حاجه
الا انك جاي تعرض الزواج على مسك مرة اخرى ؟!!
ده لو دل على شئ فهو يدل على انك رجل لا مش رجل ابدا .. انتي شئ حقير جبان طماع عايز ياخد كل شئ مرة واحده
انت لا حبيت مسك ولا نيله على دماغ ابوك ... انت حبيت انك تمتلك مسك الرافعي .. فاكر انك بتمتلك كل شئ يخليها توافق خاصه انها ناقصه من وجهه نظرك العقيمه وهتضطر توافق وتمسك في اول فرصه تقابلها
الا انك غبي .. غبي عشان مشوفتش ان مسك الرافعي تستحق انك تضحي بأهم شئ عندك الا انك تفوز بيها وبحبها
انت من البدايه وانت غبي واديك وصلت للنهايه واتعرضت للرفض مرة اخرى بس المرة دي اتعرضت للتهزيق ولو فضلت شويه كنت اتعرضت للضرب
وبما انك غبي فتخلي العائله كلها تثور على مسك ووالدها .. بس على مين .. الزاوج تم غصب عن عينك وعين ابوك وعين العائله كلها
مسك وامجد اتزوجوا يا بشر ... الحمدلله اليوم ده جه اخيرا قبل ما اطلع على المعاش
امجد كان لازم يحط حد لمسك ولترددها في اتمام الزواج .. اعتقد انها كانت بتأجل المحتوم مش اكتر
مجرد عقد القران اللي بينهم كان محسسها بالامان في انها مازالت بعيد عن متناول امجد وعن الحاله اللي بتكون فيها وهو معاها بكلامه وباعترافاته .. هي مش عايز تضعف وتسلم وترجع تفكر وتنظر لكل شئ بعاطفيه وضعف .. مش عايزة تدخل قلبها في الموضوع لانها عارفه هتكون ساعتها خاسره
الا ان امجد مش اشرف .. ومسك دلوقتي مش هي مسك بتاعت زمان ابدا
يعني مش هيحصل بلاوي وكوارث لو مسك منحت قلبها فرصه للظهور مرة اخرى
فرصه للعيش والاستمتاع باللي حصلت عليها لانها مسك الرافعي مش لغرض تاني مهما كان
مقدرتش تعترض ولا ترفض ان الزواج يحصل بالسرعه دي .. مقدرتش تقف وترفض امجد مرة اخرى
بالعكس دي استغلت الفرصه وسمحت لنفسها انها تحس بالسعاده وتكون انانيه وتعيش اللحظه لاخر رمق فيها
سمحت لنفسها اخيرا انها تحس وتتذوق قرار امجد بالتمسك بيها رغم اعتراض الكل بمعنى الكلمه .. هي ببساطه سمحت لنفسها انها تكون سعيده وتاخد حقها من السعاده والحب
امجد يستحق اللحظه دي .. هو فعلا يستحق مسك الرافعي
اعتقد ان الفتره القادمه كلها صعوبات ومواجهات حاميه من عائله مسك اللي مبيتكلموش غير بضرب النار
اعتقد ان سالم الرافعي سمح ووافق على زواجهم بالسرعه دي لان بكده مش هيكون في فرصه او سبيل ان العائله تطلب فسخه او الانفصال عن بعض .. ودي حركه كويسه من سالم الصراحه والاهم عجبت امجد لدرجه انه كان هياخده بالاحضان

تيماء ومازال الوجع مستمر
حرام والله المشهد كان صعب وقاسي جدا ... مش بسهوله جدا انها تتقبل انها رجعت وحيده مرة اخرى .. انها اتحرمت من وجود طفلها بداخلها بالسرعه
هتعاني وتتعب كتير جدا الا انها مازالت متماسكه وقادره على الوقوف والمواجهه مع اي حد
بس ايه اللي حصل في الاخر ده ؟!

فتحت تيماء فمها و قالت دون مقدمات بصوتٍ هامس
( أريد طفلا ............... )
تسمرت أصابع قاصي فوق وجنتها , ليسحبها بسرعة وكأنها لسعته .... ثم قال عاقدا حاجبيه بشدة
( ماذا ...... ماذا قلتِ للتو ؟!!! ....... )
ردت تيماء بنفس النبرة الخافتة , التي تكاد أن تكون همسا
( أريد طفلا ........ لأنني أتألم بشدة , و لا أظنني قادرة على التحمل اكثر ..... )
ارتجفت شفتي قاصي بشدة و غارت عيناه .... فابتلع نفس الغصة و انقبضت كفه بشدة , حتى ابيضت مفاصل أصابعه ....
ثم قال بصوتٍ غريب
( لما ..... لما لا أحررك مني ..... لعلكِ تحصلين على الطفل الذي تريدين من رجلٍ يستحقك ؟! .... )
للحظات شعرت أن هذا ليس صوته .... فعقدت حاجبيها و هي تنظر اليه مدققة النظر به ....
فرأت ملامحه مختلفة كنبرة صوته .... و كأنه يعاني من ألمٍ مبرح ....
لذا قالت بصوتٍ مندهش و كأنها تخاطب طفلا
( لا ...... أنا اريد طفلك أنت ..... لا أحد غيرك ...... )
ازدادت ملامح قاصي ألما و تشنجا ... ثم قال بصوتٍ مختنق
( و ماذا عني ؟!! ......... هل أنا موجود في هذه الصفقة ؟!! ........أم سأكون مطرودا بعدها ؟!! ..... )

ياترى تيماء في وعيها وعارفه هي بتطلب ايه ؟!! ولا ده يعتبر صدمه ولسه بتعاني منها ؟!
اصل هي فقدت ابنها في خلال يومين .. وبتطالب بطفل اخر بمنتهى البساطه كده ؟! هو ده الحل في رأيها ؟! انا لا اعتقد ذلك ابدا
لانها مازالت معتقده ان قاصي مشترك مع الحقير عمران وماله مال حرام .. لانها مازالت شايفه ان قاصي بيدمر حياته وبيجرحها كل مرة
لانها كانت قررت الرحيل والابتعاد عنه
يبقى ليه بتطالب بطفل اخر ؟!! هتاخد الطفل مثلا وتكمل حياتها بعيد عن قاصي ؟!
ولا يمكن هي بتحاول تعوض قاصي عن الطفل اللي فقده وتمنحه طفل اخر يشيل اسمه وتحاول تخفف من وجعه اللي هي الوحيده اللي عارفه قوته وتأثيره عليه
الا اني حبيت تيماء وهي مازالت بتدافع عنه وبتخلي الكل يتلمسلوا العذر وبتعرفهم صوره وجهه الحقيقي خلف الشخصيه الغاضبه المثيره للمشاكل والخوف
الا اني حزنت جدا ان قاصي كان لوحده وهو بيشاهد دفن ابنه الصغير ..
لا عائله .. لا اسره .. لا اخوه .. لا اصدقاء .. مكنش يمتلك القوه انه يكون بجوار زوجته يساندها ويكون معاها وهما بيدفنوا طفلهم
ياترى هيقبل على طلب تيماء ؟! هيقدر يرفض طلبها ويتركها ترحل بعد ما جات بنفسها لحد عنده ؟!

سالم الرافعي .. ياريت دي بدايه انتفاضه من كل اللي انت فيه ده
الالم اللي بتشعر بيه بدايه قربك من بنتك واحساسك بالامها وبوجعها والاهم احساسك انك عايز تشاركها وتشيل عنها الهم والحزن
مازالت بتقرب منها ببطء رغم ان كل تصرفات جافه وبعيده غير مباشره الا انها بتقرب وبتطالب بيها وبوجودها معاك وفي منزلك .. الا ان كل ده يجيي فجأه كده .. عفوا تيماء مش هتقبل بيه ابدا
ليه ؟! لانها مازالت بتشوف منك محاولات لا تعد ولا تحصى في التفريق بيها وبين قاصي ومحاوله اذيته بأي طريقه
لامتى هتفضل مش عارف ان اي اذيه لقاصي هتكون الضعف لبنتك
لامتى هتحاول تقتلها عن طريقه ... انت كده بتضيع بنتك من ايده .. والمرة دي هتكون الاخيره يا ابن سليمان

الفصل هادي .. الا اني متأكده انه الهدوء قبل العاصفه .. وتعالي قولي ساره قالت
بس ده ميمنعش ان الفصل دسم ويجنن جدا جدا
في انتظار القادم على نااااااار ... تسلمي يا تيمو يا جامده انتي