[لامارا]

الساعه 7 المسا

نجد كانت بغرفتها وتحط اللمسات الاخيره على مكياجها ولما خلصت ناظرت نفسها بالمرايا الطويله عشان تتاكد من شكلها .. كانت لابسه فستان عسلي ماسك على الجسم باكمام طويله ماسكه ونازل من عند الكتوف مع اكسسوارات ذهبيه وكعب ذهبي ومسويه شعرها ويفي ومرجعته على ورا ومكياجها كان ناعم وبارز ملامحها الانثويه .. ابتسمت على شكلها برضى وتعطرت من عطرها المفضل ولما خلصت اخذت جوالها وقبل ما تطلع انتبهت له يرن رفعته وكان ابوها ردت عليه :هلا بابا ..

سامي : ها بابا خلصتي ولا لسا ترا الضيوف على وصول ..

نجد : الا خلصت الحين بنزل ..الا بسالك بابا نايف جا ؟..

سامي : ايه جا توي شفته بالمجلس والله رجال كفو قالي ياعم روح بدل وتجهز وانا بستقبل الضيوف على ما تخلص ..

نجد سكتت وابتسمت ..

سامي : طيب يا بابا خليني ابدل واجهز قبل ما يوصلون الضيوف وانتي انزلي لا تتاخرين ..

نجد : أي هذا انا بنزل يلا روح لا تتاخر .. وقفلت من ابوها ونزلت لتحت شافت الخدامه تبخر مجلس الحريم قربت لها : سنتيا جهزتو صواني الحلى ؟..

سنتيا الخدامه : هدا روما في جهز الهين .." هذا روما تجهزه الحين "..

نجد : طيب بخرتي مجلس الرجال ؟..

سنتيا الخدامه : لا لسا الهين في روح ..

نجد : وش اللي لسا الضيوف على وصول وانتي للحين ما بخرتيه .. هاتي البخور وروحي جيبي صنيه القهوه والشاي للمجلس بسرعه ..

سنيتيا الخدامه عطت نجد البخور وراحت للمطبخ طيران عشان نجد ما تعصب عليها ..

اما نجد بعد ما اخذت البخور راحت لمجلس الرجال وقبل ما تدخل دقت الباب عشان تتاكد لو فيه حد غير نايف او لا ..

بداخل المجلس

نايف كان جالس يطقطق بجواله ينتظر حد يجي استغرب لما سمع صوت الباب الداخلي يندق قام وراح له وقال وهو ماسك قبضه الباب بيفتحه : مين ..

نجد بصوت واطي تخاف فيه حد غيره : انا نجد عندك حد ؟..

نايف فتح الباب لها واول ما طاحت عينه عليها ابتسم شبه ابتسامه لثواني وبعدها قال : لا مافيه احد ..

نجد قالت وهي تناظر المبخر : جيت ابخر المجلس قبل ما يجون لان الخدم نسو يبخرونه ..

نايف اخذ منها المبخر : هاتيه انا ابخره يمكن يجي حد بالصدفه ..

نجد : طيب انتظرك هنا ..

ودخل نايف للمجلس وترك الباب مفتوح وصار يبخره ..

نجد كانت تناظره كيف كاشخ بالثوب والشماغ .. رفعت عيونها لوجهه وكانها اول مره تناظره كويس السكسوكه محليه وجهه ومعطيته وسامه اكثر غير بشرته اللي كانت مايله للسمار وعيونه برسمتها الخليجيه المعروفه معطيته جاذبيه .. باختصار الرجال وسيم .. انتبهت له يجي لعندها نزلت عيونها على طول ..

نايف ابتسم ابتسامه جانبيه لما لمحها تناظره وباين انها سرحانه فيه قرب لها وانتبه فيها تنزل عيونها : احم خذي ..

نجد رفعت عيونها للمبخر واخذته : شكرا .. وعطته ظهرها بتمشي بس وقفها :

نايف :لاتنسين تقولين للخدم يجيبون الشاي والقهوه ..

نجد وهي تشوف الخدامه جايه وبيدها صينيه الشاي والقهوه : هذي هي جابتها .. ومشت عنه ..

نايف اخذ الصينيه من الخدامه ودخلها للمجلس وجلس ينتظر الضيوف ..

اما نجد راحت للمطبخ حطت المبخر وتاكدت من ان كل شي جاهز وبعدها طلعت لمجلس الحريم تنتظر ..

كلها دقايق ودخلو عليها خالتها وبناتها ..

نجد قامت بابتسامه وسلمت على خالتها اللي حضنتها ..

ام هادي :هلا وغلا ببنتي لك وحشه والله ..

صبا وهي تقرب لنجد : وش دعوه يمه وش هالمبالغه ترا توك شايفتها امس ..

ام هادي تبعد عن نجد : وانتي وش دخلك بنتي واشتقت لها ..

نجد وهي تسلم على صبا : شكلها غيرانه يا خالتي اتركيها ..

صبا تضربها على كتفها بخفه : انا اغار منك انتي ووجهك ..

نجد : هههههههههههههه ..ولفت عنها تسلم على ود : باين انك مو غيرانه ..

ود :من جد باين .. الا اخبارك يالعروس ..

نجد : بخير ولله الحمد .. حياكم ..

ام هادي وهي تجلس : حسستيني اننا غريبين ..

نجد : لا ياخالتي وش دعوه بس اقول ..

صبا وهي تجلس بجنب نجد : باين انك توهقتي هههههههههههههه ..

نجد : انطمي بس ..

في هالوقت دخلو ام نايف ورشا .. قامو يسلمون عليهم وبعدهم جاو تاله وامها واخر شي زوجه العم حامد وبناتها الثنتين اللي هم امل وروان ..

صبا تهمس لنجد : نجد مين هذول اللي كانهم جايين زواج مو عزيمه ..

نجد كتمت ضحكتها وهي تناظر امل وروان اللي كانو لابسين فساتين قصار لحد الركبه ومكياج اوفر .. هذول بنات عمي حامد نسيتيهم ..

صبا : مدري ما اذكرهم من زمان ما شفتهم .. بس بالله ايش يحسون فيه ..

نجد : مدري عنهم المهم اسكتي لا يحسون علينا .. وقامت تسلم عليهم ..

زوجه عمها حامد بغرور : مبروك عليك المحقق ..

نجد بابتسامتها المعتاده :الله يبارك فيك وعقبال البنات ..

زوجه عمها من غير نفس : امين .. ومشت تسلم على الباقي ..

امل وهي تسلم على نجد من غير نفس :مبروك ..

نجد : الله يبارك فيك وعقبالك ..

امل وهي تمشي عنها : خليت الزواج لك مابيه ..

نجد رفعت حاجبها باستنكار من كلامها لكن سرعان ما ابتسمت لما شافت روان جايه لها وسلمت عليها بهدوء ..

تاله وهي تجلس بجنب نجد اللي جلست وبهمس : وش فيهم هذول الحين جايين وكل وحده نفسها بخشمها ..

نجد : مدري عنهم ..

صبا اللي كانت بجنبهم وتسمعهم : اللي يشوفهم يقول حد غاصبهم ..

تاله : من جد ..

@@@@

بمجلس الرجال الكل كان موجود حتى عماد اللي اول مره يشوف نايف لانه ماحضر الملكه ولا الزواج ..

عند نايف اللي كان جالس بجنب مهند :الا مهند ابسالك مين هذاك اللي جالس بجنب ريان وثامر ..

مهند : ايه هذا ولد عمي حامد اسمه عماد ..

نايف : غريبه ما شفته بالملكه ولا بالعرس حتى ..

مهند : ايه ما حضر لانه كان مشغول ..

نايف : اها ..

@@@@

نرجع لمجلس الحرين .

كان ازعاج الكل يسولف من جهه ومتحمسين بالسوالف بس سكتو فجاءه لما انتبهو بالحرمه الغريبه اللي دخلت عليهم بأناقتها وكان واضح عليها انها سيده اعمال من لبسها وطريقه مشيتها ..

الحرمه قالت بصوت جهوري : السلام .. وتقدمت لنجد بابتسامه على وجهها ..

الكل كان مستغرب ومو عارفين مين تكون هذي الحرمه ..

نجد وقفت اول ما شافتها تجي لعندها ابتسمت لابتسامتها ..

الحرمه مدت يدها : مبروك الزواج ..

نجد سلمت عليها : الله يبارك فيك ..

الحرمه : اكيد مستغربه وتسالين نفسك مين اكون صح ؟..

نجد بنفس ابتسامتها : ايه بصراحه ماقد شفتك ..

الحرمه بنفس الابتسامه : انا اسمي رانيه واكون زميله ابوك سامي بشغله ولما عرفت ان بنته تزوجت حبيت اجي وابارك لك وله بما اني ماقدرت احضر الزواج ..

نجد : ايه تشرفت حياك تفضلي..

رانيه ابتسمت لها وكملت تسلم على الباقي بعدها جلست بجنب ام نايف ..

زوجه العم حامد بغرور : الا ابسالك يا اخت رانيه وش شغلكم ذا اللي كله سفر ..

رانيه لفت على ام تركي بابتسامه : وليه انتو ما تعرفون سامي ايش يشتغل ..

ام تركي : نعرف انه يشتغل شغل خاص بس ما نعرف ايش طبيعته عاد جاني فضول لما عرفت ان شغله فيه حريم ..

ام هادي لفت على رانيه وابتسمت : صحيح حنا ما نعرف طبيعه شغل ابو نجد ولا نبي نعرف اهم شي هو مرتاح بشغله وبنته مرتاحه كمان ...

رانيه ابتسمت وسكتت .

نجد للحين مستغربه من هذي الي اسمها رانيه وتبي تعرف مين تكون بالضبط ..

تاله تكلم نجد :نجود شوفي ثمور الاهبل مصور الرجال بالمجلس ..

نجد : وانتي فاضيه تشوفين سناباتك الحين ..

تاله : عاد فتحته .. شوفي شوفي مين هذا " وكانت تاشر على ريان "..

نجد : هذا ولد خالتي ريان شكلك ماقد شفتيه ..

تاله : ايه عرفته الا قد شفته بس من زمان شكله مره قريب من ثامر ..

نجد : ايه دايم مع بعض حتى تخصصهم واحد ..

تاله : جد ماكنت ادري ..

نجد : لحظه لحظه عيدي اخر سنابه ..

تاله صارت تعيد تشغيل السنابات ووصلت لاخر سنابه : وش ..

نجد تاشر على عماد : مين هذا مشبهه عليه بس مدري مين يكون ..

تاله ابتسمت : الله يسلمك هذا عماد ولد عمي حامد نسيتيه ..

نجد ابتسمت : اوه ماشاء الله كبر وتغير نحف كثير كان سمين وهو صغير ..

تاله : ايه نحف وصار اوسم بعد ..

نجد : استحي على وجهك تتغزلين بالولد ..

تاله : بسم الله علي وش قلت انا ..

نجد : ولا شي بس بجد تغير من زمان عنه ..

تاله : ما يجي الا بالمناسبات يقول مهند ..

نجد : اها ..

شوي جا وقت العشا وقامو الكل يتعشون ..

@@@@

بعد العشى

في مجلس الحريم

رانيه تكلم نجد : الف الف مبروك مره ثانيه ..

نجد بابتسامتها المعتاده : الله يبارك فيك ..

رانيه : نجد ممكن تنادين لي ابوك اسلم عليه وابارك له لان ما حصلت لي الفرصه ابارك له في الدوام وغير كذا ماعندي رقمه ..

نجد : ايه اكيد .. حياك معي ..وطلعو من مجلس الحريم ودخلو للصاله .. تفضلي هنا على ما اكلمه ..

رانيه وهي تجلس : ان شاء الله ..

نجد ابتسمت لها وطلعت من الصاله واتصلت على ابوها ثواني وجاها صوته : هلا يبه ممكن تجي شوي ابيك .. طيب انتظرك .. قفلت منه وراحت قريب الباب الداخلي لمجلس الرجال تنتظر ابوها انتبهت بالباب ينفتح بس استغربت لما شافت نايف هو اللي طلع لها مو ابوها ابتسمت باحراج وهي تنزل عيونها للارض : وين ابوي ..

نايف : عمي قالي اطلع لك تبين شي منه ؟..

نجد : ايه ابي اكلمه ضروري ممكن تناديه ..

نايف وهوو يشوفها تناظر الارض ابتسم : طيب " ودخل للمجلس دقايق وسامي يطلع "..

ابو نجد : هلا بابا وش فيك ؟..

نجد رفعت عيونها لابوها وهي مبتسمه : فيه وحده تبي تسلم عليك ؟..

ابو نجد عقد حاجبينه باستغراب : وحده ومين تكون ؟..

نجد : مدري تقول انها زميلتك بالشغل واسمها رانيه ..

ابو نجد انصدم اول ما سمع الاسم بس حاول ما يبين لبنته صدمته وابتسم : ايه عرفتها طيب هي وينها الحين ..

نجد : بالصاله ..

ومشت نجد وابوها وراها لين ما وصلول لصاله ..

رانيه اللي كانت لابسه عبايتها ومتحجبه وقفت بابتسامه اول ما شافت ابو نجد ..

ابو نجد ابتسم لها : ياهلا بالانسه رانيه شرفتينا ..

رانيه : الشرف لي استاذ سامي حبيت ابارك لك زواج بنتك ربي يتمم عليها ويوفقها ..

ابو نجد : الله يبارك فيك مالها داعي عنيتي نفسك يكفي لو باركتي بالتلفون ..

رانيه : قلت اجي بنفسي افضل ..

ابو نجد : يعطيك العافيه ماقصرتي وعقبالك ..

رانيه ابتسمت : شكرا .. عن اذنكم الحين انا لازم اطلع ..

ابو نجد : اذنك معك وحياك الله ..

رانيه ابتسمت له ولفت على نجد :: مبروك لك مره ثانيه ..

نجد : الله يبارك فيك ..

ابو نجد استاذن منهم ورجع للمجلس وهو يفكر بجيه رانيه لبيته ..

اما نجد مشت مع رانيه عشان توصلها للباب ولما وصلت لباب الفله الداخلي سلمت عليها وودعتها ووقفت تراقبها لما طلعت ولفت عشان تدخل بس وقفها صوت اول مره تسمعه يطلب منها توقف عقدت حاجبينها وهي تحاول تستوعب الصوت وتوها بتمشي لما تاكدت انه شخص غريب عنها لكن صاحب الصوت كان اسرع منها ومسك ذراعها ولفها له ..

عماد وهو يلفها : روان و.... سكت اول ما شاف وجه البنت اللي مسكها الصدمه شلت لسانه وجمدت حركته لدرجه انه ماقدر ينزل يده من عليها ..

@@
~
~
~
~
~
~
~
~
~ انتهى البارت الاول ~