[لامارا]

~ البارت الثاني ~
~
~
~
~
~
~
~
~
~

نجد مشت مع رانيه عشان توصلها للباب ولما وصلت لباب الفله الداخلي سلمت عليها وودعتها ووقفت تراقبها لما طلعت ولفت عشان تدخل بس وقفها صوت اول مره تسمعه يطلب منها توقف عقدت حاجبينها وهي تحاول تستوعب الصوت وتوها بتمشي لما تاكدت انه شخص غريب عنها لكن صاحب الصوت كان اسرع منها ومسك ذراعها ولفها له ..

عماد وهو يلفها : روان و.... سكت اول ما شاف وجه البنت اللي مسكها الصدمه شلت لسانه وجمدت حركته لدرجه انه ماقدر ينزل يده من عليها ..

نجد اول ما طاحت عينها عليه وعرفته بسرعه بعدت يده من على ذراعها وركضت لداخل وهي تحس انها شوي وتموت من الاحراج والخوف .. حست انها صدمت بشي ولما رفعت عيونها شافتها تاله زفرت براحه ..

تاله مسكتها عشان تمنعها تطيح من اثر صدمتها فيها : بسم الله عليك نجد وش فيك تركضين وليه وجهك مخطوف كذا ايش صاير ..

نجد بنفس متقطع : خ...خذي...ني للص...صاله ..

تاله مسكت يدها واخذتها معها للصاله وجلستها على وحده من الكنبات : اصبري بروح اجيب لك مويه " وراحت مسرعه للمطبخ اخذت مويه وجابتها لها " خذي اشربي وهدي نفسك " وجلست بجنبها "..

نجد بعد ما شربت المويه وحست انها افضل تنهدت ..

تاله : بسم الله عليك وش فيك ..

نجد لما تذكرت نظرات عماد المصدومه لها غطت وجهها بيدينها : يممممممه فشيله يا تاله شافني ..

تاله مستغربه : ومين هذا اللي شافك ؟..

نجد نزلت يدينها من على وجهها : عماد ولد عمي مدري وش فيه يمكن كان يفكرني اخته روان ..

تاله وللحين مو فاهمه شي : نجد قولي وش صار بالضبط ..

نجد اخذت نفس ولفت عليها وقالت لها ايش اللي صار ..

تاله : ههههههههههههههههههههههههه ههههه .. الله ياخذ بليسه لهذي الدرجه مايعرف اخته كيف يفكرك هي ..

نجد : مدري بس يمكن لان جسمي يشبه جسمها وحتى لون شعري وطوله ..

تاله : حتى ولو يعني هو مايدري اخته ايش كانت لابسه اليوم ..

نجد وهي توقف : يمكن .. المهم ياويلك تقولين السالفه لصبوي اعرفها ماتسكت وراح تمسكها علي ..

تاله رجعت تضحك لما تخيلت شكل عماد اللي وصفته نجد : هههههههههههههه : والله انه يضحك ولد العم ..

نجد اللي كانت واقفه تضبط شكلها عند مرايا بالصاله : اقول بسك ضحك ويلا قومي ندخل ..

تاله : يارب اني اقدر امسك نفسي ولا اقول السالفه لصبا .. هههههههه ..

نجد لفت عليها : ياويلك ترا بتتسطرين ..

تاله ترفع يدينها علامه الاستسلام : خلاص خلاص بسكت ..يلا ندخل ..

طلعو من الصاله وقبل ما يدخلون انتبهو بروان تطلع من المجلس تاله اول ما شافتها مسكت ضحكتها قبل ما تطلع وتفضحها ..

اما نجد ابتسمت بوجه روان ودخلت للمجلس ..

تاله دخلت وراها وراحت تجلس عند صبا وود ..

نجد راحت تجلس عند الحريم ..

ام تركي : اقول نجد مين تطلع هذي رانيه انا ماصدقت انه تشتغل مع ابوك ليكون متزوجها وحنا ما ندري ..

ام هادي سبقت نجد اللي انصدمت من كلام زوجه عمها : وش هالكلام يا ام تركي كلنا نعرف ان سامي مستحيل يسويها وحتى لو قرر انه يتزوج فهذا من حقه وماراح يخبيه علينا فا اتمنى انك تبعدين هذي الافكار من بالك ..

ام تركي : عاد انا وش قلت .. قلت يمكن ..

ام مهند : حتى ولو لا تشككين بالرجال قدام بنته ..

نجد ابتسمت : انا واثقه من ابوي وعارفه لو كان يبي يتزوج انا اول وحده راح اعرف ..

ام تركي ماعجبها رد نجد الواثقه من كلامها فسكتت ..

في هذا الوقت دخلت روان للمجلس قربت لامها : يمه يقول عماد انه بيمشي تبون تمشون ولا ؟..

ام تركي وهي توقف : الا بنمشي شكلنا مب مرحب فينا في هالبيت ..

نجد وقفت : افا يا زوجه عمي مين قال ان مو مرحب فيك ببيتنا انتي على اراس وفي العين ..

ام تركي وهي تلبس عبايتها : أي باين ما كانك من شوي كنتي راح تاكليني بكلامك ..

نجد : انا ماقل تشي بس كنت ادافع عن ابوي واذا هذا الشي زعلك فانا اسفه ..

البنات وخالتها وام مهند لفو على نجد باستغراب من كلامها ..

ام تركي وكانها بهذا الشي رجعت كبريائها : خلاص قبلت اسفك والحين يلا مع السلامه ..طلعت وبناتها وراها بعد ما سلمو على الكل ..

ام هادي : نجد وش سويتي .. ليه اعتذرتي لها ..

نجد وهي تجلس بين خالتها وزوجه عمها ام مهند : لاني اعرفها اول ما تطلع من هنا راح تحشي راس عمي بكلام ماصار وعمي راح يجي ويتهاوش مع ابوي وطبعا ابوي ماراح يرفع صوته او يتناقش معه لان هذا اخوه الكبير فعشان ابعد ابوي عن المشاكل انا اعتذرت لها ..

صبا : وانتي ايش عرفك انها ماراح تحشي راس عمك بعد اعتذارك .. هذي يتوقع منها أي شي صراحه ..

نجد : اعرف انها يتوقع منها أي شي بس بحكم تعاملي معها من بعد وفاه امي الله يرحمها قدرت اعرف شخصيتها وكيف اقدر اتعامل معها عشان كذا انا متاكده انها ماراح تسوي شي بعد اعتذاري لها ..

ام مهند : ما شاء الله عليك يا نجد قدرتي تتحكمين باعصابك قدامها شوفي انا على قد عشرتي معها الا انها للحين تعرف كيف تعصبني ..

نجد ابتسمت : ماعليك انا اعطيك كورسات كيفيه التعامل مع زوجه عمي حامد ..

البنات : هههههههههههههههههههههههه ..

تاله : خفي علينا ماكانك شفتي نفسك على امي ..

نجد تلف يدها على كتوف زوجه عمها : ولو هذي امي كيف يكبر راسي عليها ..

ام مهند تحضن نجد : فديتك يا احلى بنت ..

تاله توقف قدامهم وهي متخصره : بالله هي الحين احلى بنت وانا وين رحت ان شاء الله ..

نجد : ياربي وش هالغيره تراها عندك بالبيت انا ما اشوفها كل يوم ..

صبا : اقول تاله تعالي تعالي اجلسي بس ترا جا الدور على خالتي الحين كان على امي وكانت نجدوه تسوي كذا لين ما تعودنا ..

تاله لفت على صبا وهي تنزل يدينها : جد يعني ماراح استفيد شي من اللي اسويه ..

صبا : بالضبط ..

تاله تمشي وتجلس بجنب صبا وتكتف يدينها : مالت ..

نجد تبعد عن زوجه عمها وتناظر تاله بابتسامه : ايه خللك كذا تسمعين الكلام ..

رشا كانت تناظر نجد وتعاملها مع خالتها وزوجه عمها ما تحس ان هذي الانسانه فاقده امها من كم سنه وبنفسها : ما شاء الله عليها "..

ام نايف : ربي يخليهم لك وترا بدال الامين الحين صارو لك 3 امهات اتمنى تقبليني ام لك يا نجد ..

نجد استحت لما سمعت كلام ام نايف وهي اخذت راحتها من شوي ونست وجودهم .. وقفت وراحت لها وباستها على راسها : من غير ما تقولين يايمه انتي ام زوجي يعني امي ..

ام نايف وقفت وحضنتها : ربي يخليك وحفظك يايمه ..

نجد بعدت عن ام نايف باحراج : امين .. عن اذنكم بخليهم يجيبون الكيك .. طلعت وهي تحاول تمسك دموعها اللي اوشكت انها تنزل .. دخلت للمطبخ وصارت تهوي على وجهها بيدينها عشان دموعها ما تنزل وعيونها كانت للسقف وقالت بصوت مسموع : ياربي مو وقتها الدموع الحين ..

نايف كان داخل المطبخ عشان يجيب صواني الحلى اللي خلصت وقبل ما يطلع انتبه فيها تدخل المطبخ ولما عرف انها ما انتبهت بوجوده صار يناظرها وعقد حواجبه لما شاف حركتها وسمع كلامها .. قرب لها وتوه بيتكلم بس شافها انها انتبهت له ونزلت عيونها عنه اول ما ناظرته سكت وابتسم على حركتها للحين تستحي منه ..

نجد وهي تناظر الشغاله : جيبي الكيك بسرعه : احم جيت اخذ الكيك ما انتبهت بوجودك ..

نايف مشى بيطلع من المطبخ :توي داخل اجيب صواني الحلى ..

نجد لفت عليه لكن من غير ما تناظره امم باقي حد بالمجلس غير عمي وعياله وعيال خالتي ..

نايف : لا مابقى حد عن اذنك " وطلع من المطبخ "..

نجد :اوووه وش هالاحراج اكيد شافني وانا امنع دموعي تنزل بس كويس ما تكلم " ولفت على الشغاله " يلا سنتيا عجلي ..

@@@@

بمجلس الرجال

نايف لما دخل جلس بجنب مهند

مهند بهمس : وش عندك تاخرت اللي اعرفه انك رحت تودي الصواني والمطبخ مو من بعده اعترف ايش سويت اكيد شفت بنت العم ونسيت نفسك " وغمز له " صح ..

نايف حاول يخفي ابتسامته وبعد عيونه عن مهند : احم واذا شفتها عادي زوجتي ..

مهند ماقدر يمسك ضحكته من شكل نايف اللي كانه صدق مسوي شي عيب : هههههههههههه ..

ابو مهند : خير ان شاء الله مهند ضحكنا معك ..

مهند لف على ابوه منحرج : احم اسف يبه بس نايف قال شي يضحك ..

نايف قرصه على يده من غير محد ينتبه وبهمس : اجل انا قلت شي يضحك اصبر بس نطلع اوريك ..

مهند حاول يكتم ضحكته لانه عصب بنايف ..

نايف : مهند انكتم خلاص ولا ترا بخلي عمي يهاوشك ويفشلك ..

مهند ويعرف ان نايف يسويها : احم .. خلاص سكتت ياربي محد يمزح معك انت ..

نايف ابتسم :لا محد يمزح معي ..

مهند : ما اقول الا الله يعين بنت العم عليك ..

نايف لف عليه وهو رافع حاجبه : وليه الله يعينها علي وش فيني انا ؟..

مهند وهو يناظر قدام : سلامتك بس ثقيل طينه ..

نايف بصدمه : انا الحين ثقيل طينه .. طيب يامهند ..

مهند لف عليه : وش طيب ذي بعد تهدد كانك ..

نايف من غير ما يلف عليه : زين مادامك فهمت " ومسك ابتسامته اللي كانت بتطلع "..

مهند توه بيتكلم بس انتبه بابوه يوقف وهو يستاذن عشان يروحون ..

@@@@

بعد نص ساعه طلع الكل

نجد طلعت من المطبخ بعد ما عطت الخدامات التعليمات وانتبهت بابوها جاي من جهه المجلس

ابو نجد : يعطيك العافيه ..

نجد بابتسامه : يعافيك بابا .. مابقى حد ..

ابو نجد : الا باقي نايف ..

نجد : اعرف اقصد غيره ..

ابو نجد : لا وهو ينتظرك يقول رحلتكم بكره على الساعه 10 الصباح ولازم تروحون ترتبون ملابسكم ..

نجد اللي تفاجأت من موضوع السفره اللي مادرت عنه بس ماحبت تبين لابوها : ايه صح ..

ابو نجد : والمفاجأة اني انا بعد رايح فرنسا معكم ..

نجد انصدمت اكثر من الدوله اللي بيروحون لها بس فرحتها بابوها انه بيروح معهم اكبر : جد بابا وعلى نفس رحلتنا كمان ؟..

ابو نجد ابتسم : لا انا رحلتي الساعه 6 الصباح قبلكم يعني ان شاء الله راح نتقابل هناك ..

نجد : وناسه يعني ماراح افقدك ..

ابو نجد : ان شاء الله والحين يلا روحي زوجك ينتظرك ..

نجد باست راس ابوها : ان شاء الله " وطلعت لغرفتها عشان تاخذ عبايتها وشنطتها ولما نزلت شافت نايف وابوها بالصاله " انا خلصت ..

نايف وقف وهو يناظر ابو نجد : اجل نستاذن يا عمي وتوصل بالسلامه ان شاء الله ..

ابو نجد وقف معهم : الله يسلمك " ولف على بنته وحضنها " توصلون بالسلامه ..

نجد : الله يسلمك بابا " بعدت عنه " لا تنسى تكلمني اول ما توصل ..

ابو نجد باسها على راسها : ان شاء الله ..

بعدها طلعو نايف ونجد بعد ماودعو ابو نجد واتجهو لبيت اهل نايف ..

بالسياره كان الوضع هدوء ونجد ودها تتكلم وتفتح معه موضوع ماودها يسافرون وهم علاقتهم كذا قالت بصوت هادي : احم قالي ابوي اننا بنروح فرنسا صدق ؟..

نايف وعيونه على الطريق : ايه صدق .. ليه ما تبينها ؟..

نجد : لا عادي بس استغربت لان فرنسا في هذا الوقت تكون بارده وثلوج يعني ماتنفع للسياحه ..

نايف : اعرف بس انا عندي شغل في السفاره هناك فقلت نضرب عصفورين بحجر ..

نجد : اهاا .. طيب كم المده اللي راح نجلسها هناك ؟..

نايف : شهر بس يمكن نمدد لو شغلي ماخلص هناك ..

نجد بنفسها :" ليكون بيوديني هناك ويسحب علي .. الله يستر من نواياه ": طيب ..

نايف يدخل سيارته في قراج بيتهم : رحلتنا بتكون الساعه 10 ولازم نروح قبل بساعه على الاقل ف رتبي شنطتك من الحين ..

نجد : ان شاء الله " وفتحت الباب اول ما شافته ينزل من السياره ونزلت وراه ودخلو للبيت وماحصلو حد وطلعو لجناحهم على طول ..

نايف اول مادخل الجناح شال شماغه وعقاله ورماهم على الكنبه وارتمى وراهم وانتبه بنجد تدخل للغرفه بعد ما فتحت شيلتها : جهزي شنطتي معك لا هنتي ..

نجد لفت عليه وابتسمت : ان شاء الله بس ما اعرف ايش الملابس اللي تحب تلبسها بالسفر ..

نايف وقف : صح نسيت خلاص بجي ارتبها انا " وتعدها ودخل للغرفه ..

نجد دخلت وراه وشالت عبايتها وعلقتها وراحت لغرفه الملابس اللي كان نايف فيها واخذت لها بجامه ودخلت للحمام * الله يكرمكم * بدلت وطلعت وبيدها فستانها وشعرها كان مفرود على ظهرها واكتافها حطته على السرير ورجعت لغرفه الملابس وشافت نايف جالس على الارض وشنطته بجنبه ويرتب فيها الملابس : احم تحب اساعدك ..

نايف اللي ماحس فيها وهي تدخل لان باله مشغول بالسفره واللي ينتظره هناك لف عليها اول ما سمع صوتها ولا ارادي ارتسمت ابتسامه على شفايفه لما شاف شكلها وكانها طفله توها صاحيه من النوم اختفت ابتسامته اول ما سمع صوتها ونزل عيونه على شنطته ..

نجد استحت من نظراته وشتتت نظراتها في الغرفه وهي تقول له مره ثانيه : تحتاج مساعده ..

نايف من غير ما يناظرها : تقريبا خلصت بس باقي الجزم ..

نجد وهي تمشي للدولاب اللي فيه الجزم وكان مكشوف : ايش تبي اجيب لك ؟..

نايف وهو يناظر الجزم : خلاص انا اجيبهم انتي جهزي ملابسك عشان يمديك تنامين شوي ..

نجد : لا عادي مو مشكله انا ما اطول في تجهيز ملابسي انت قول لي ايش الجزم اللي تبيها وقوم ارتاح ..

نايف وقف واتجه لها وقال وهو يسحب له كم جزمه من الدولاب : ماعليك ما يبي لهم وقت انتي جهزي ملابسك ..

نجد بنفسها : اوف هذا ما يدري ان وجوده معي بنفس المكان وانا لابسه كذا يوترني " لفت عنه واخذت شنطه وصارت ترتب ملابسها فيها وتحاول تكون طبيعيه "..

نايف لما خلص من الجزم لف عليها وشافها كيف جالسه على الارض وترتب ملابسها بكل هدوء عطاها ظهره بيطلع وهو يقول : انا بدخل اتروش اذا خلصتي طلعي الشنط للصاله ..

نجد من غير ما تلف عليه : ان شاء الله ..

نايف طلع بعد ما اخذ له ملابس ونجد زفرت براحه لما طلع وصارت ترتب ملابسها بسرعه قبل ما يطلع ويوترها من جديد .. خلصت واخذت شنطته وشنطتها ولما طلعت من غرفه الملابس انتبهت فيه واقف عند التسريحه يمشط شعره شالت عينها من عليه وكملت طريقها للصاله حطت الشنط على جنب ورجعت للغرفه وشافته جالس على طرف السرير وبيده جواله اتجهت للتسريحه وصارت تمشط شعرها سمعت جوالها يرن عقدت حواجبها باستغراب وهي تناظر الساعه اللي كانت معلقه على الجدار وكانت 1 ونص اخر الليل .. اتجهت لشنطتها اللي كانت على الكنبه اللي بطرف الغرفه وفتحتها وطلعت جوالها وابتسمت اول ماشافت المتصل تاله ردت عليها :هلا بالمزعجه ..

نايف الي كان يكلم وحد من ربعه على الواتساب رفع عيونه باستغراب لها اول ما سمع صوت جوالها وعيونه تعلقت فيها وهو يبي يعرف مين اللي يتصل عليها في هذا الوقت ..

نجد وبانت بنبره صوتها الخوف والقلق : بسم الله عليك تاله وش فيك ؟..

تاله بصوت باكي : اسفه اني اتصلت عليك بهذا الوقت بس ماعندي غيرك ..

نجد : طيب تكلمي خوفتيني ..

تاله اخذت نفس بعدها قالت :مهند بالمستشفى مسوي حادث وامي وابوي وثامر راحو له ومارضو ياخذوني معهم وانا خايفه عليه اخاف صار فيه شي وهم مايبون يقولون لي " وشهقت في البكاء "..

نجد عورها قلبها على ولد عمها وقالت وهي تحاول تهدي تاله وما تبين لها خوفها : اهدي حبيبتي مادام اهلك راحو له ان شاء الله بيكون بخير بس انتي لا تبكين ..

تاله : نجد انتي تعرفين يعني ايش مهند بالنسبه لي تخيلي يروح ويتركني انا اموت ..

نجد : بسم الله عليك لا تقولين كذا تاله وان شاء الله بيكون بخير .. طيب انتي بالبيت لحالك ؟..

تاله : لا معي عبدالله وكل ما اقوله اتصل عليهم يقول مايحتاج هم راح يطمنونا لما يوصلون ..

نجد ما تحب تشوف بنت عمها كذا قالت وهي مو داريه عن نفسها :خلاص حبيبتي انا الحين اخلي نايف يروح للمستشفى ويتطمن عليه ..

تاله : جد .. طيب تكفين نجد روحي معه عشان تطمنيني بنفسك تكفين نجد ..

نجد ماقدرت تردها وقالت بعد سكوت دام ثواني : ابشري الحين نروح للمستشفى واطمنك عليه بس انتي هدي لا تبكين وادعي له يقوم بالسلامه ..

تاله : طيب بس تكفين لا تتاخرين علي ..

نجد : ان شاء الله بس انتي اوعديني انك تهدين ..

تاله : اوعدك ..

نجد : طيب اخليك الحين يلا مع السلامه .. وقفلت منها وهي تفكر باللي قالته لها كيف راح تقول لنايف الحين وهي كل قصدها انها تهدي تاله ..

نايف اللي سمع المكالمه وفهم ان واحد من عيال عمها بالمستشفى وقف واتجه لها : وش فيك صاير شي ؟..

نجد وعيونها على جوالها وبنبره حزينه : هذي بنت عمي تقول ان مهند مسوي حادث وهو الحين بالمستشفى وخايفه عليه وتبيني اطمنها عليه بعد ماقلت لها انك بتروح له " ورفعت عيونها عليه " اسفه بس مدري كيف قلت لها انك راح تروح وتطمننا عليه ..

نايف : قومي البسي عبايتك ." وبعد عنها وراح لغرفه الملابس يبدل "..

قامت نجد واخذت عبايتها وهي تفكر بولد عمها اللي بحسبه اخوها وتدعي انه يكون بخير ..

طلع نايف من غرفه الملابس وكان لابس بنطلون وتيشيرت وعليه جاكيت لان الجو بارد اخذ مفاتيحه وطلع من الغرفه ونجد طلعت وراه نزلو وركبو السياره وقبل ما يحرك السياره لف عليها : أي مستشفى هم ..

نجد مسكت جوالها بسرعه : مدري بسال تاله " ودقت على تاله اللي ردت عليها بسرعه وسالتها عن اسم المستشفى وقفلت بعد ما قالت لها الاسم ": مستشفى ال ..

نايف تحرك من غير ما يتكلم وبعد ربع ساعه وصلو للمستشفى ونزلو وتوجه نايف لللاستقبال وسالهم عن مهند وقال له انه بالطوارئ .. مشو للطوارئ ونجد انتبهت بعمها وزوجته وثامر بالسيب راحت لهم بسرعه ..

نجد : عمي عسى ماشر وش فيه مهند ؟..

ابو مهند استغرب وجود نجد بس مافكر كثير وقال لها : مسوي حادث والدكتور طمننا قال انه بخير بس رجله انكسرت ويده جاتها رضوض وهم الحين داخل يعالجونه ..

نجد تنهدت براحه : الحمد الله انه بخير تاله متصله علي وهي تبكي خايفه عليه ومحد منكم طمنها ..

ابو مهند : الله يهديه عبدالله انا قايل له ما يخبرها خلاص الحين اكلمها واطمنها ..

نجد : لا انت ارتاح ياعمي انا بكلمها : وابتعدت عنه وراحت بجنب زوجه عمها ..

اما نايف راح عند ثامر وفهم منه كل السالفه بعدها لف على ابو مهند وشاف نجد تبتعد من عنده وراح له يتحمد له بسلامه مهند ..

في هالوقت جا لهم عماد اللي عرف السالفه من ثامر : السلام عليكم ..

الكل : وعليكم السلام ..

عماد : ما يشوف شر يا عمي بس هذا ولدك ما يتوب عن السرعه دايم مخوفكم عليه ..

ابو مهند : الله يهديه هذا طبعه ...

عماد استغرب وجود نايف ولف عليه يسلم عليه وبما ان نايف كان واقف قدام ابو مهند كانت ام مهند ونجد وراه واقفين عند الجدار فعماد انتبه لنجد اللي كانت متلثمه وعرفها من عيونها وابد ما توقع انها نجد توقع انها تاله لانه من زمان ما شافهم ولا يذكرهم ابتسم ولف يناظر نايف ..

في هالوقت طلع الدكتور وسمح لهم يدخلون عليه ...دخلو كلهم وشافو مهند كيف رجله اليمنى ملفوفه ويده اليسرى للكتف ..

مهند طاحت عينه على نايف ومستغرب وجوده :ها نايف هنا ليكون جاي تتشمت بس ..

ابو نايف يقرب من ولده : اسكت بس كفايه اللي مسويه وتتكلم بعد ..

مهند لف على ابوه اللي باين انه معصب عليه : يبه هد وش فيك معصب علي انا مادريت ان السياره بتطلع قدامي ..

ابو مهند : لو انك تارك عنك هالسرعه كان ماصار اللي صار ..

ثامر يقرب من مهند من الجهه الثانيه ويضربه على كتفه السليم بخفه :اجل مسوي فيها قدام ربعك وتسابق بعد ..

مهند : انت اسكت محد حاشي راس ابوي وخلاه يعصب علي الا انت ..

نايف قرب لمهند من جهه ثامر : بالله تبي تثبت لنا انك عاقل يعني ..

مهند ناظره وهو رافع حاجبه : انت وش اللي جابك اصلا ..

نايف وثامر ضحكو على تعابير وجهه : ههههههههههه ..

عماد قرب لهم : سلامات ياولد العم ما تشوف شر ..

مهند ابتسم : الله يسلمك كفو ليه ما تعلم هذول الكلام السنع ..

ثامر : تراه يجاملك لا تفرح كثير ..

مهند طنشه ولف جهه امه وعقد حواجبه وهو يناظر اللي بجنبها وعرف انها نجد ..

ام مهند قربت له من جهه ابو مهند : كذا تخوفني عليك يا يمه ..

مهند ابتسم لامه : كنت ابي اشوف غلاتي عندك يمه ..

ام مهند : غالي ما يحتاج بس لا تعيدها مره ثانيه ..

ابو مهند : ماعليك منه خليه يستاهل ما جاه ..

مهند : افا يالوالد ليه تقول كذا تراني ولدك ..

ابو مهند : الولد اللي ما يسمع كلامي مايعتبر ولدي ..

ثامر وهو ماسك ضحكته على شكل مهند المصدوم من كلام ابوه: لا يا يبه خف عليه شوف شكله شوي ويبكي ..

مهند يرفع يده السليمه ويدف فيها ثامر : اقول انقلع بس ..

الكل ماعدى نجد اللي ابتسمت : هههههههههههههههههه ..

مهند ارتفع ضغطه منهم ولف عيونها على نجد اللي كانت واقفه بعيد عنهم مستحيه من عماد اللي موم تعوده عليه..

عماد انتبه بنظرات مهند ولف لجهه نجد وشافها منزله راسها وبنفسه : شكلها مستحيه مني ومن نايف عشان كذا ما قربت تسلم على اخوها " ابتسم ولف على نايف : نايف وش رايك نطلع نتظرهم برا عشان ياخذون راحتهم ..

نايف لف وهو مستغرب من طلبه وطاحت عينه على نجد اللي كانت واقفه بعيد عنهم ومنزله عيونها للارض تذكر وجود ام مهند وقال وهو يحول نظره لعماد : اوك يلا .. وطلعو بعدها من الغرفه ..

نجد اول ما شافتهم يطلعو تقدمت للسرير ووقفت بجنب زوجه عمها : الحمد الله على السلامه مهند ..

مهند ابتسم : الله يسلمك بنت العم الا وين تالوه غريبه مو معكم ..

ام مهند : ياعمري عليها بالبيت توي مكلمتها كانت تبكي وخايفه عليك ..

مهند : فديتها اختي ليه ما جات معكم ..

ابو مهند كانت نايمه ولا حبينا نخوفها بس شكل عبدالله الله يهديه قال لها عشان كذا هي خايفه ..

مهند : عطوني اكلمها اطمنها علي لا يصير فيها شي من البكى ..

ثامر وهو يمد جواله لمهند : تراك ماخذ بنفسك مقلب وترا هي اختك مو زوجتك عشان تخاف عليك مره ..

نجد ابتسمت من تحت اللثمه : كانك غيران يا ثامر ..

ثامر لف عليه : بالله واغار من الاخ ماعندك سالفه .. انا بطلع للشباب برا ازين لي .. وطلع ..

مهند : باين مو غيران .. هههههههه " ورفع الجوال يكلم تاله "..

نجد استاذنت منهم وطلعت ما تبي تاخر نايف اكثر انتبهت فيهم واقفين على جنب وعشان عماد معهم استحت تروح ووقفت تنتظر نايف يحس بوجودها ويجيها ..

عماد انتبه فيها تطلع من الغرفه لانه هو الوحيد اللي وجهه للغرفه اما نايف وثامر كانو معطين الغرفه ظهورهم ابتسم لما شافها وبعد عيونه واستاذن منهم ومشى وهو يحس بفرحه داخله مايعرف مصدرها ..

نجد اللي كانت تناظر الارض وكل شوي ترفع عيونها على نايف عشان ينتبه لها وتنزلهم ونايف مو حولها ارتاحت لما شافت عماد يمشي قربت منهم بهدوء : احم ..

نايف لما انتبه لها لف على ثامر : اجل حنا نستاذن والحمدالله على سلامه اخوك ..

ثامر ابتسم : الله يسلمك ..

مشو نايف ونجد وطلعو من المستشفى راجعين للبيت ..
بالسياره ..

نايف : كلمتي بنت عمك طمنتيها على اخوها ؟..

نجد : ايه حتى مهند كلمها ..

نايف : اها كويس ..

شوي وصلو للبيت ونايف اول مادخل الجناح بدل ورمى نفسه على السرير يحس نفسه تعبان ودايخ نوم ..

نجد وهي تعلق عبايتها انتبهت عليه " وبنفسها :شكله كان تعبان وانا تعبته زياده في سالفه المستشفى ..

نايف وهو يتغطى باللحاف :اذا خلصتي طفي النور ..

نجد وهي متجهه للللانوار عشان تطفيها : خلصت " وطفتها ومشت بهدوء للسرير عشان ما تصدم بشي ..

نايف بعد اللحاف وهو يحس فيها تمشي بهدوء مد يده وفتح الابجوره اللي عنده : المفروض تفتحين الابجوره قبل ما تطفي الانوار عشان تعرفين طريقك ..

نجد اللي وصلت لطرف السرير قالت بحيا : مايحتاج انا عارفه الطريق ..

نايف وهو يعطيها ظهره ويرجع يتغطى باللحاف : الاحتياط واجب ..

نجد رفعت اللحاف من الطرف الثاني للسرير وانسدحت ولما حست بتنفس نايف المنتظم وتاكدت انه نايم نامت براحه لان قربه يوترها ..

@@@@

صباح اليوم الثاني

الساعه 6

كان جالس ويكلم واحد من اصحابه في الشغل ..

..: انت متاكد انك تقدر على هذي المهمه لحالك ؟..

..: ايه تطمن لو ماكنت اقدر كان ما طلبتها ..

..: بس انت عارف ان هذي العمليه قد ايش هي مهمه لنا ..

..: اعرف والله اعرف وعشان كذا انا طلبت اكون فيها لحالي لان لو صار فيه ضرر لا سمح الله مابي حد يتضرر معي ..

..: تخاف على غيرك اكثر من نفسك بالله وش هالتفكير ..

..: خلاص الحين مافيه مجال للتغيير انتهينا وسكر الموضوع ..

..: صدقني لو تبي تغيير انا بسوي كل شي عشان يصير بس انت قول ايه ..

..: لا انا ان شاء الله بكون قادر عليها ومايكمل اسبوعين الا وانا منتهي من الموضوع ..

..: طيب انتبه لنفسك واول ما توصل عطني خبر ..

..: ان شاء الله وتطمن هناك راح يستقبلوني احسن استقبال لا تنسى انا مين ..

..: ههههههههههههه .. تعجبني ثقتك بنفسك .. يلا بالتوفيق ..

..: يلا مع السلامه ..

..: مع السلامه ..

@@@@

ركبوا لطياره وكانت نجد عند الشباك ونايف بجنبها كان الوضع هادي بينهم وماكان بينهم أي حوار الا من الاشياء الضروريه مثل تبين اكل او بردانه ومن هذا القبيل .. وبعد كم ساعه وصلول اراضي فرنساوكان التوقيت بفرنسا الساعه 12 اخر الليل ولا واحد فيهم عرف ينام في الطياره ونزلو وهم ميتين من التعب خلصو اجراءاتهم في المطار واخذو تاكسي ووصلهم للفندق اللي كانو حاجزين فيه اول ما دخلو للسويت حقهم وبعد ما دخل العامل الشنط نايف اخذ له بجامه وبدل بالحمام بعدها رمى نفسه على السرير ..

اما نجد لما شافت نايف يدخل للحمام اخذت الشنط ودخلتهم للغرفه وفتحت شنطتها وطلعت لها بجامه مريحه وبنفس الوقت ثقيله لان الجو كان بارد مره هناك .. انتبهت بنايف يطلع من الحمام قامت ودخلت بعده وبدلت ملابسها ولما طلعت شافت الغرفه مظلمه الا من نور الابجوره اللي بجنب نايف مشت بهدوء عشان ما تصحيه وراحت لجهه شنطتها اخذت جوالها وفتحته وكانت تبي تكلم ابوها لكن شافت الوقت وقالت اكيد انه نايم رجعت جوالها مكانه وقامت متجهه للسرير وهي تحس البرد يدخل بعظامها رفعت طرف الللحاف اللي كان ثقيل وانسدحت على السرير وغطت نفسها بالكامل تحاول تدفي نفسها ..

نايف حس فيها وهي تدخل للسرير فتح عيونه ولف عليها واستغرب لما شافها كيف متغطيه وعرف انها بردانه لف ونزل من السرير بهدوء وعلى على التدفئة في الغرفه ورجع مكانه وقبل ما يتغطى باللحاف طفى الابجوره ووتغطى وهو معطيها ظهره ..

نجد اللي كانت تحاول تنام ارتبكت لما حست بنايف يقوم من السرير على بالها انه نايم فتحت عيونها شوي وشافته يعلي على التدفئة ابتسمت وبنفسها : صدق اني غبيه ليه ما فكرت اسويها " غمضت عيونها بسرعه لما شافته يلف جهه السرير وزاد الارتباك عندها لما دخل للسرير وتغطى وبشكل لا ارادي صارت ترتجف ماتدري من البرد ولا من الارتباك وبنفسها : نجد وش فيك ترتجفين انتي مو اول مره تنامين بجنبه .. شكلي للحين بردانه .. يارب ادفى بسرعه وتخف هذي الرجفه قبل ما يحس فيني " وضمت نفسها بقوه تحاول توقف رجفتها ..

نايف اللي كان تعبان ووده ينام ما قدر من رجفه نجد اللي حس فيها اخذ نفس وكم مره يحاول يغمض عيونه ويتجاهلها لكنه ما قدر وبحركه سريعه مافكر فيها لف جهه نجد وحط يدينه على خصرها وسحبها له وحضنها ظهرها على صدره قرب من اذنها وهمس : ماراح اقدر انام وانتي ترتجفين كذا اشششش نامي ..

نجد شهقت شهقه خفيفه اول ما حست بيدين نايف على خصرها وزادت رجفتها لما لامس ظهرها صدره وضمها له ..

نايف يزيد بضمه لها عشان تخف رجفتها : خلاص نجد نامي ماراح اسوي لك شي والله بس ادفيك ..

نجد بعد كلامه والدفى اللي حسته بدت تهدى شوي شوي لما سكنت رجفتها واخذت نفس وزفرته بهدوء وغمضت عيونها وهي مبتسمه ماتدري ايش هو هذا الاحساس اللي حسته بقربه على كثر ماكانت خايفه من قربه الا انها مبسوطه الحين ومرتاحه خصوصا لما قال لها انه ماراح يسوي شي لها ..

اما نايف نام على طول بعد ما حس انها هدت ..

@@@@