[لامارا]

[align=center]

السلام عليكم ورحمة الله وبركاته.....اتمنى الجميع بخير : )



بسم الله

**
**
**
يتبع بارت 3
**
**
**


دخل البيت وهو يضحك بصوت عالي
ناظرته ام سعود وهي رافعه حاجب : اشوفك مبسوط ؟!!
ابو سعود وهو يحاول يوقف الضحك رمى نفسه
على الكنبه ودخل بنوبة ضحك ثانيه وهو ضاغط
على بطنه : مو ههههه قادر ههههه
ابتسمت ام سعود على ضحكة زوجها وأصابها الفضول تعرف سبب الضحك
بعد دقائق أخذ نفس والإبتسامة مرسومة على محياه : اسكتي عملت بساره مقلب من الآخر
أم سعود بإستغراب :،ساره حفيده ام سعيد ؟!
ابو سعود : ايه في غيرها ؟!
ام سعود : لا ما في المهم وش المقلب ؟!
ابو سعود ابتسم : كنت مع ربعي بالسياره
وشفتها تلف على السيارات تبيع ورد
ام سعود بدهشه :،ام سعيد اكيد ما تدري !
أبو سعود : اكيد ما تدري
علشان كذا قلت لمحمد وخالد يجيبوها للسياره
اخخخخ لو شفتي وجهها
ورجع ضحك من جديد
ام سعود باستغراب : ما عرفتك ساره ؟!
ابو سعود :،تلثمت بالشماغ ما عرفتني !
واستلمها خالد بصوته الثخين يهدد فيها
اذا رجعت تبيع مره ثانيه
وقعد يقول لها يبغى يذبحها ويقطعها ويرميها للكلاب
تصدقين ما نزلت من السياره الا عملتها على نفسها
أم سعود ناظرته بقهر :حرام عليكم تعملون فيها كذا !
هذي طفله !
ابو سعود بتبرير : والله موقصدنا شيء بس علشان ما تكرر الفعل
هذي طفله لو سمح الله حد خطفها طلوعها غلط
ام سعود بغضب: مو بالطريقه هذي !،
ما لقيت غير خالد؟!!
انا الكبيره لو يقول لي مرحبا ارتعب من صوته
كيف طفله ؟!
قطعت كلامها لما شافتها دخلت البيت
**
**
دخلت البيت وجهها أصفر لو تعصرها ما تلاقي
فيها نقطه دم
أبو سعود استغرب حالها : وش فيك ؟!
عائشه وكأنه أبوها ضغط على الزر بدأت تبكي بصوت عالي
أم سعود وقفت على حيلها : وش فيه ؟!
ابو سعود اقترب منها وجلس ركبه ونص : وش صار ؟!
حد ضربك ؟!
عائشه تكلمت بس ما أحد فهم عليها من البكاء
أم سعود جلست جنب ابو سعود ومسكت يدها بحنيه : وش فيك يا ماما ؟!
عائشه بصوت متقطع : خ ط فو ها
ابو سعود رفع حاجب بعدم استيعاب : وش تقولين ؟!
عائشه ناظرت أمها وأبوها : ساره خطفوها
ام سعود حست قلبها وقع وصار يدق طبول : مين للي خطفها ؟!
عائشه : سياره وقفت وأخذتها
انا ما لي دخل ؟!
ابو سعود خاف انه بعد ما نزلها حد خطفها ناظر زوجته : جيبي لها كأس مويه خلينا نفهم السالفه !
ام سعود ناظرته مو وقته يتأمر عليها
راحت وبسرعه رجعت جابت كأس المويه
ابو سعود غسل وجه عائشه بعد ما شربها
وناظرها بعد لحظات : مسحي دموعك وقولي لي وش صار بالضبط ؟ !
عائشه وصوتها يهتز : تركت ساره عند الاشاره
قاطعها : وش تقولين ؟!
الاشاره ؟!
ام سعود : وش تعملين عند الاشاره ؟!
عائشه رجعت تبكي من اول وجديد وهي تتذكر ساره
ابو سعود بنرفزه : رجعنا للبكاء ؟!
عائشه : انا
ودفنت وجهها بكفيها بطفوله وهي تبكي بصوت عالي
ونهى واسماء واقفات يناظرن بهدوء
ام سعود بنفاذ صبر : تكلمي
تراك حرقتي قلبي !
ابو سعود وكأنه فهم الموضوع : إنت كنت مع ساره عند الاشاره ؟!
عائشه هزت راسها بطفوله وهي تمسح دموعها : تركتها ورحت عند البقاله اشتري
ام سعود : من وين الفلوس ؟!
عائشه بصوتها الباكي : من الورد للي بعته مع ساره !،
ام سعود حطت يدها على صدرها بشهقه : كنت مع ساره تبيعين ورد ؟!
أبو سعود ناظر زوجته: شفتي قليله الحياء ؟!
وبغضب : وفكرة مين هذي ؟!
عائشه مدت بوزها بطفوله وهي تشوف نظرات ابوها وبطفش: انا الحين اقول لك ساره انخطفت
وانت تقول فكره مين ؟!
ناظرها بحده : جاوبي ؟!
عائشه زفرت بضيق : انا للي فكرت علشان يصير معنا فلوس كثير
فتحت عيونها ام سعود من هالبنت : من وين جبت الورد ؟!
عائشه بلامبالاه : باقة الورد للي اشترتيها البارحه
ام سعود بغضب قاطعتها : وش تقولين ؟!
حسبي الله البارحه اشتريتها
ابو سعود بشماته : تستاهلين دفعتيني مبلغ علشان هالباقه !!
ام سعود بغضب تناظر عائشة : انا لو اطحنك تحت اسناني ما احد يلومني
عائشه مدت بوزها : كل هذا علشان الباقه ؟!!
ضحك ابو سعود بصوت عالي على شكل زوجته
وبعدها بلحظات تذكر الموضوع الرئيسي
وناظر عائشه يبغى يربيها :،هذي ساره انخطفت وانت السبب
والحين رح تيجي الشرطه ورح نقول لهم انت السبب
وخلهم يحطونك بالسجن !
والحين رح اتصل فيهم !
مسك الجوال وبسرعه مسكت عائشه يده وهي تبكي بخوف : والله ما اعيدها !
لا تتصل بالشرطه والله والله ما اعيدها
ابو سعود يلعب بأعصابها : الحين رح تيجي ام سعيد وتسأل عن ساره
رح نقول لها انت ضيعتيها
قاطعتها بصوت مبحوح من البكاء : توبه توبه
والله ما اعيدها
ام سعود وللحين مقهوره من عائشه وقفت ومعها الجوال : الحين رح اتصل فيهم علشان مره ثانيه
تمدين يدك على الاغراض
قاطعتها عائشه وهي تبوس يدينها : توبه والله ما اعيدها
ابو سعود وهو ماسك الجوال: انا للي رح اتصل فيهم
ركضت باتجاه ابوها تترجاه
ام سعود : انا للي رح اتصل
عائشه ودموعها تنزل بغزاره توجهت لامها برجاء .....
**
**
**
بعد ما نزلوها من السياره باب بيتها
وجهها اصفر من الخوف
دخلت البيت ترجف قفلت الباب خلفها
ناظرت نفسها كيف تدخل وهي مبلله نفسها
وش رح تقول لها جدتها لما تشوفها عملتها على نفسها
رجعت دموعها تنزل من جديد مشت بخطوات بطيئه حذره وتوجهت للغرفة بسرعه حتى ما تشوفها جدتها

**
**
**
**
باليوم الثاني
تناست ساره السالفه ورجعت لابتسامتها
وركضت للباب لما سمعت طرقات عليه
ابتسمت لابو عزام
ابو عزام بنبره هاديه : قولي لام سعيد ابغى الطلبيه
ساره بابتسامة وهي تناظر الولد للي معه :ان شاء الله
ابو عزام ناظر ولده للي يكلمه : هذا ولد ؟!
قبل ما يرد ابو عزام تكلمت ساره بابتسامة : انا بنت !
ناظرها وهو عافس ملامحه :،شعرها مثل الأولاد!
ساره حكت رأسها بابتسامة غبيه : انا قصيته بنفسي !
حلو صح ؟!
رد بجعرفه:،يقرف مثل القرده
ابو عزام ناظرها وهي تبتسم لهم توقع عقلها ضارب يشتمها وتبتسم له : خلاص يا سلمان عيب
تتكلم مع البنت كذا
وبعدها ناظر ساره للي تناظرهم وتبتسم متأكد بقرار نفسه انها خبله : عجلي بالطلبيه
هزت رأسها بطاعه وتوجهت للداخل
سلمان ناظر ابوه : شوف بيتهم !
ابو عزام : اسكت يا سلمان عيب !
حاس سلمان بوزه وتوجه للسيارة ينتظر ابوه فيه
طلعت ام سعيد بخطوات بطيئه وتعب : السلام عليكم
ابو عزام : وعليكم السلام ...ابغى الطلبيه
ام سعيد بجديه : من البارحه تركنا هالشغله
ابو عزام عقد حواجبه : يعني ما في عندك جبنه
ام سعيد وهي تستدير للداخل : ما عندنا
ابو عزام : طيب متى تجهزين
ام سعيد بنفاذ صبر : قلت لك ما نبيع خلاص توكل
ينقهر من اسلوبها الجاف بالكلام
ساره منحرجه من اسلوب جدتها تكلمت مع ابو عزام : اذا تبغى في عند ام
سكتت لما شافته تركها وتوجه لسيارته
حست بضيق كيف طلع زعلان
ما تحب تشوف احد زعلان
ركضت للسياره حتى تعتذر منه بس حرك السياره وغادر
ما تحركت وهي تناظر للبعيد
نقزت لما حست ضربه على كتفها: يا دبه وين كنت ؟!
لفت ساره وتفاجأت بعائشه تحضنها بقوه وتبكي: وينك ؟!
ساره ابتسمت لما تركتها عائشه : انت وين رحتي ؟!
عائشه وهي تمسح دموعها : ظنيت انك انخطفتي؟!!
ساره عفست ملامحها لما تذكرت البارحه : طلعوني بالسياره ورجعوني للبيت
وهددوني اذا رجعت ابيع الا يقتلوني
عائشه عقدت حواجبها : الله يأخذهم
احسن شيء إنك رجعت
ساره ردت بابتسامة بدون اي كلمه
عائشه بتساؤل :وش تعملين هنا ؟!
ساره عفست ملامحها بطفوله : ابو عزام الظاهر زعل وراح
لانه جدتي تكلمت معه بإسلوب مو حلو !!
عائشه : وليه كلمته كذا ؟!
ساره هزت كتوفها : يبغى جبنه وجدتي قالت له ما نبيع
عائشه باستغراب : ليه تركتم البيع ؟!
ساره مدت بوزها : جدتي تقول مرزوق الخبيث
اتفق مع حرمه ثانيه بسعر اقل
عائشه تأثرت : لئيم !
من وين تجيبون الفلوس ؟!!
ساره بحزن : جدتي من البارحه تعبانه
ما ادري كيف نجيب فلوس ؟!!
**
**
**
**
طالعت جدتها وسألتها بخوف : تعبانه ؟!
ام سعيد يا دوب تتكلم : شوي الحين يروح التعب

وسكتت ام سعيد وبالها مشغول على هالطفله
ساره بطفوله : باكر عيشه رح تروح بيت عمها
! قالت لي اروح معها !
بس قلت لها لا !
وناظرت جدتها بتوجس : عادي لو رحت معهم ؟!
ام سعيد وهي تأخذ النفس بصعوبه : عيب
وكملت حديثها :،باكر رح نروح
قاطعتها ساره بفرح وهي تقفز : باكر طالعين
يا سلااام
وين رح نروح ؟!
ام سعيد وهي تمسح وجهها بتعب : باكر تعرفين !
حاست بوزها وكلها شغف تعرف المكان
لانها ما تعودت تطلع من البيت الا للمدرسه او تلعب مع عائشه
ما رح تعرف تنام اليوم وهي تفكر بمكان الطلعه !!
**
**
**
**
عائشه جلست بالسياره وعفست ملامحها : ابغى اشوف ساره قبل ما اروح !!
ابو سعود وهو يحرك السياره : اقول انطقي مكانك
للي يسمعك يقول مسافرين ؟!
عائشه شوي وتبكي : اكيد قاعده تستنى علشان اودعها !
ام سعود ضحكت : تودعك ؟!
ليه وين رايحه ؟!
عائشه مدت بوزها وناظرت الشباك : رايحه على الزفته
نهى بفتنه : مين قصدك بالزفته ؟!
اسماء : اكيد قصدها عمي
عائشه ناظرتهن وهي مولعه اشرت على اخواتها : انت زفته واختك الثاني زفته
ابو سعود بضحكه قصيره : الحجه عائشه تشتم الناس ؟!
غريبه والله ؟!!!
وقلدها بسخريه «بابا حرام تشتم الناس »
ام سعود بابتسامة : جننتوها هالبنت خلاص اتركوها
أسماء بغيره : ماما انت تحبين عائشة اكثر وحده
نهى بتأييد : ايه صادقه أسماء تحبيها اكثر
ام سعود بابتسامة : كلكم واحد
بس لأنها صغيره
عائشه باعتراض : انا مو صغيره
اكبر منك ومن بابا !!
ضحك ابو سعود : كيف اكبر مني ومن أمك ؟!
عائشه بكشره تكتفت : انا لقيتكم بالطريق وكنتم صغار
وتبكون
واخذتكم للبيت لأنكم كسرتم خاطري
ضحك ابو سعود بضحكه عاليه
ام سعود : الحمد لله كسرنا خاطرك ؟!
عائشه ناظرت نهى : إسألي ماما انا حضرت عرسهم وجلست على الكوشه
ضربتها نهى على راسها : غبيه
عائشه عصبت وردت لها الضربه : ماما ضربتني
ورجعت نهى ضربتها وتشابكن بالأيدي
تركن بعض بعد صرخة ابو سعود : خلاص
**
**
**


يتبع يوم الأحد بإذن الله...دمتم بخير: )

**
**
**
**