السلام عليكم ورحمة الله وبركاته ...اتمنى الجميع بخير ....
**
**
**
بسم الله
**
**
**
يتبع بارت 4
»«
«»
»«
«»
دخلت ام عمار الغرفه وناظرتهم : الحين يسمعكم ابوكم ويرجع يطقكم مره ثانيه
جودي مدت بوزها بزعل : شوفيهم يجاكرون فيني لانه بابا طقني !
ام عمار تكتفت : انا حذرتكم !
وبعدها ناظرت ساره : تعالي انزلي علشان تسلمين على أم عزام
ساره بطاعه : إن شاء الله
ليان مطت شفتها بسخريه : يقال إنها مهمه !!
جودي فكت شعرها الطويل تربطه من جديد : قال
وصرخت بوجع لما عمار شد شعرها : ماما شفيه !!!
أم عمار خزته: متى تترك حركاتك هذي ؟!
عمار بدون مبالاه : كيفي !!
جودي ناظرته بغيض : حيوان
ام عمار طلعت من الغرفه وهي تتكلم :،يلا يا ساره !
ابتسمت ساره وركضت خلفها ...
**
**
**
أم عزام ابتسمت على شكل خلف : نفسي اشوفك مروق ومبسوط !!
خلف وهو ينفث من الدخان : ما في شيء يخليك
مروق !
وهذي العله للي نشبت بحلقي !
أم عزام بعتاب: ما يصير تتكلم كذا ! هذي اختك !!
خلف اعتدل بجلسته : أبوي راح يجدد شبابه
هذا للي استفدنا منه !
وإلا رجال كبير وش يبغى بالزواج !!
وسبحان الله كانت القاضيه ما جلس شهرين إلا فارق الحياه ...
ام عزام ما عجبها كلامه : استحي على وجهك
هذا أبوك !!
خلف بقرف :،يا اختي قولي لي شيء واحد استفدته من زواج ابوي !!
إلا قولي مصروف زايد !
ووريثه تقاسم على الورثه !
غير منظرها للي يسد النفس!
وأشر على ساره وهي داخله
ابتسمت ساره بطفوله للموجودين واعتلت وجنتيها حمره : السلام عليكم
خلف باستهزاء : شرفت الأخت المنتظره !!
أم عزام ناظرت ساره بتأمل بشعر قصير كثير
وجهها نحيف يميل للبياض ملامحها حلوه
اول ما تناظرها تظنها ولد بسبب شعرها
لابسه فستان على طولها ما تعرف لونه الحقيقي
باهت من كثر الغسيل !!
ساره تقدمت منها بابتسامه بريئه ومدت يدها تسلم : كيفك خالتي !
للحين ام عزام مصدومه مدت يدها لها
ساره قربت وقبلت رأسها
وابتسمت لأم عزام : أنا ساره !
خلف وهو حاط يده تحت خده بسخريه : الحمد لله للي عرفتينا على اسمك !!
وحنا طول هالسنين وحنا نحاول نعرف اسمك
ساره ناظرته بابتسامتها البريئه : ليه ما سألتني كان خبرتك انه اسمي ساره !
ضحكت اسيل بصوت عالي على أسلوب خلف وعلى جواب ساره !
أم عزام أعطتها نظره لأنها تعرف أخوها ما يحب الضحك كذا
بلعت اسيل ضحكتها وهي تشوف نظرات خلف الناريه
ساره تقدمت من اسيل ومدت يدها : كيف حالك
سلمت اسيل برؤوس اصابعها قربت ساره تبوسها
بس منعتها يد اسيل : دخيلك كله ولا هالبوسه !
خلاص سلامك وصل !!
ساره ابتسمت لها وتوجهت لخلود وسلمت عليها
وقبلت رأسها
خلود وهي تناظرها بفوقيه كلمت خالها : من وين جبتوها هذي ؟!
خلف بدون نفس : جايه تسأليني كان سألتي ابوي
من اي مزبله لقاهم !
ساره ابتسمت لهم بهدوء وحبت تجلس جنب اسيل
وقبل ما تجلس قاطعتها اسيل : لا لا لا
روحي اجلسي بعيد عني !!
ناظرتها ساره باستغراب : والله قصيت شعري ما فيه قمل شوفي راح !!
اسيل عفست ملامحها بقرف : وقمل كمان !
يا حبيبي !!
يستر على عرضك ابعدي عني !!
خلود اشرت لها : اجلسي هناك
هزت رأسها بطاعه وجلست بهدوء وهي تناظرهم وتوزع ابتسامات
ام عزام تضايقت من تصرف بناتها وناظرت ام عمار : ترى عزام جاي !
ام عمار بابتسامه : البيت بيته يدخل
خلف ماسك جواله يطقطق عليه ومتحمس لشغله
بعد لحظات استأذن عزام ودخل وكله فضول يشوف الكائن للي دخل هالعائله بقوه !
دخل بابتسامه وسلم على خاله خلف
وقفت ساره بسعاده وهي تشوف عزام
تقدمت منه : كيف حالك ؟!
ناظرها وكأنه مو مستوعب فرك عيونه
ورجع ناظرها : انت ؟!
ابتسمت له : ايه انا ساره !
نسيتني ؟!
عزام بقرف : من وين انسى هالقمر المخسوف !
ابتسمت على كلامه بدون فهم المغزى : جدتي دوم كانت تقول لي اني احلى من القمر !
ام عزام باستغراب : من وين تعرفها ؟!
عزام وهو عافس ملامحه : تتذكرين لما كان ابوي يرسلني اشتري جبنه و لبن !
جدتها كانت تبيع
ام عزام عفست ملامحها بقرف : حسبي الله
وابو عزام يقول لي انهم ناس نظيفين !!
عزام ابتسم بشماته : كنت ابغى اقول لك بس خفت ابوي يزعل !
اسيل عفست ملامحها بقرف : حسبي الله عليك
ما لقيت الا ذول تشترون منهم !
كان قلت لي بالسر وانا مثل المشفوحه نازله اكل فيها
خوله ابتسمت : الحمد لله ما أكلت
خلف بشماته : خلي ابو عزام ينفعك !
حضرته مو عاجبه شغلنا !
ويروح يشتري من هالزباله
واشر بعيونه على ساره
ناظرتهم بهدوء وهم يتكلمون: جدتي الكل يحب شغلها كثير
وابتسمت بتذكر ما سلمت على عزام مدت يدها : نسيت أسلم عليك
دفها من طريقه وجلس : ترى مو ناقصني قرف
حلي عني
ام عزام ما عجبها تصرف عزام : تعالي يا ساره اجلسي عندي !!
ساره بفرح انها عبرتها وجلست جنبها
دخل سلمان وهو يركض : ماما ماما
ام عزام ابتسمت له : وش فيك ؟!
سلمان قبل ما يتكلم وقع نظره على ساره عفس ملامحه بغيره وهو يشوفها جالسه جنب امه : انت هنا ؟!
ام عزام : وش بغيت ؟!
سلمان رجع ناظر امه : ابغى اروح مع صديقي لل
قاطعه عزام بحزم : اذا عدت رجلك البوابه اكسرها !
اقعد وانطق مكانك احسن لك !!
سلمان بتمرد : كيفي !
وقف عزام على حيله وهو ناوي عليه
سرعان ما هرب سلمان للخارج وهو يتذمر ....
ام عزام ناظرت ساره : روحي إلعبي مع البنات
ساره بطاعه : ان شاء الله خالتي
طلعت ساره وهي تركض وتشعر بالسعاده
ام عزام : أمي بعدها معصبه ؟!
خلف بأسلوبه الجاف : وش دخلني انا ؟!
تزعل على ابوي الله يرحمه !
عزام : بعين الله
ام عمار : هذي اختك ولازم تتحملها !
خلف بضجر : حسستوني وكأني اخوها الوحيد !
لو انها اختك كان تغير كلامك !
ام عزام : الحمد لله انها مو اختي كان رميتها علي !! وبعدين ما في احد موجود هنا غيرك !
خلف بتفكير : افكر ارسلها لاميره!
ام عمار : اميره زوجت عيالها علشان تصفي راسها
مو ناقصها بزران !
خلف ابتسم بمكر : ما عليك انا أرتب الامور
وما رح اسكت مو اختي لوحدي !
اسيل باقتراح: طيب سفرها عند خالي محمد !
خلف بقهر: محمد تارك كل شيء فوق رأسي ومريح رأسه !
وقف عزام بخيبه كان متشوق يشوف البنت الجديده بس خاب ظنه لما شاف ساره: انا استأذن !
ام عمار : اجلس
عزام : عندي دراسه لفوق رأسي مره ثانيه
استأذن وطلع ...
**
**
**
**
ساره بفرح :نلعب مدرسه ؟!
سلمان اشر على نفسه : انا المدير !
عمار : انا السكرتير!
جودي :انا المعلمه!
ليان ابتسمت : انا المرشده !
ساره ابتسمت : انا
قاطعها سلمان بفوقيه : انت الفراشه تنظفين المدرسه !
ساره باعتراض : بس
عمار : مو عاجبك انقلعي
ساره ابتسمت حتى ما يطردوها : خلاص موافقه
سلمان وهو يجلس على الكرسي : غصب عنك
ويلا بسرعه اعملي شاهي للمعلمين !
ساره هزت رأسها : ان شاء الله
واقف بعيد شوي يناظرهم وهم يلعبون
وكيف يلعبون معها بفوقيه
وهي غبيه تلعب وتضحك معهم ومبسوطه !
عفس ملامحه بقرف وتوجه للبيت يكمل دراسه !!
**
**
**
في اليوم الثاني عائشه عامله اضراب: مو رايحه !
ام سعود وهي ماسكه نفسها : اقولك بسرعه ما بقى وقت الحين تتأخرين على المدرسه!
عائشه برفض : ما ابغى
كيف اروح للمدرسه وما اشوف ساره هناك !
ام سعود : كل يوم تطلعين حجه علشان تعطلين واليوم طالعه بسالفه ساره !
عائشه : ما رح اروح اذا ما داومت ساره
ام سعود عصبت ومسكتها من شعرها : خلصيني ترى الحين بالعصا !
عائشه وهي تبعد امها : خلاص خلاص توبه
تركتها ام سعود وهي تناظرها بعصبيه: بسرعه اشوف!
عائشه بضجر : خلاص رح انقلع للزفته !
الله يقطع الدوام والمعلمات والمعلمين كلهم !
ام سعود ابتسمت بداخلها : تدعين على ابوك !
عائشه بعصبية: ماما !!
**
**
**
**
ام عمار وهي تفكر : اخوك خلف طلع للبر من الفجر
وما رح يرجع من اسبوع !
ساره بهدوء : كيف اروح للمدرسه !!
ام عمار عقدت حواجبها : وش اسم مدرستك قلتي لي ؟!
ساره : مدرسه .....
ام عمار هزت راسها : خلاص تعالي افطري
وانا ادبرك !
نزلت ساره معها وشافت عيال اخوها متجمعين عند الطاوله تقدمت منهم بابتسامه وسحبت كرسي
ووقفت لما سمعت صرخة عمار : لا انقلعي اقعدي بعيد عني !
جود وليان بصوت واحد : اقعدي هناك
ناظرتهم بهدوء وابتسمت لهم بالرغم انها حزت بخاطرها
جلست بالجهة المقابله
دخلت ام عمار وجلست بهدوء تتناول الفطور
ساره ناظرت الفطور بفرح : اول مره اجلس على
فطور كذا
ام عمار رفعت حاجب : وش تفطرين؟!
ساره بضحكه قصيره : دائما جبنه او لبنه !
جودي رفعت حاجب : مو عاجبك جبنه ؟!!
ليان ناظرتها بإستصغار : غبيه يا ليت كل يوم
افطر جبنه
وغمضت عيونها : اموت عليها الجبنة
ساره بابتسامة بارده : لو كل يوم رح تكرهينه
عمار بصوت مرتفع يثبت وجوده : اقول انطمي انت وإياها بلا قرقره !
جودي : وش دخلك ؟!
ام عمار بتهديد : وقسم بالله الحين اتصل بأبوكم وخله يتفاهم معكم !
ومسكت الجوال بتهديد
جودي مطت شفتها : خلاص
نزلت نظرها للاكل وبدأت تأكل مثل المشفوحه
وكأنها من سنين ما أكلت !
كالعاده تخاف يطير الاكل او يختفي وهي ما شبعت منه !
ناظروها بانتقاد بس ام عمار اشرت بعيونها يطنشوها .....
**
**
**
**
واقف ينتظر ويهز رجله بعصبيه هذا للي ينقصه تركب ساره بسيارته!
لولا عمته ام عمار والا لو تموت ما ركبت سيارته
زفر بعصبيه مستعجل وينها ما طلعت للحين !!
صار يضرب هرن بشكل متواصل حتى تطلع بسرعه
شافها تركض له مستعجله فتحت الباب الامامي : اسف
قاطعها بصرخه : انقلعي للخلفي واركبي!
ابتسمت باحراج وقفلت الباب بهدوء
ورجعت ركبت من الخلفي بهدوء اخذت نفس وابتسمت وهي تناظره : اسفه على التأخير !
حرك السياره : ترى رأسي مصدع انكتمي !
ساره بابتسامة : ان شاء الله
ناظرته معصب والتفتت تناظر من الشباك
وتلوم نفسها تأخرت عليه وزعل
ما كان قصدها تتأخر !!
كيف تنزل وهو وزعلان عليها رجعت ناظرته بندم وأسف : والله ما كان قصدي أتأخر عليك !
عزام بقرف : بالله تسكتين ترى واصله هنا
واشر على انفه
وقف السياره والتفت عليها : هذي مدرستك !
ناظرت من الشباك وابتسمت بغباء : ايه
وبسرعه فتحت الباب وهي تنادي لما شافت عائشه عند باب المدرسه: عيشه عيشه
وتوجهت للمدرسه بدون ما تقفل الباب
ولع من حركتها ونزل من السياره : وقسم بالله لتندمين يا زفته
**
**
**
عائشة وهي ماسكه بيد ساره وتتكلم بطفوله : ماما غصب عني ارسلتني من المدرسه
قلت لها كيف اروح للمدرسه وساره مو موجوده
بس ماما ما تفهم !!
ساره بابتسامة : عيب تقولين عنها كذا ؟!،
عائشة فتحت عيونها بفرح للفكره للي خطرت ببالها !!
**
**
**
**
يتبع يوم الجمعه بإذن الله...دمتم بخير: )