البريوش
صباحكم / مساكم فل وخير
دى اول مشاركة لي معاكم في المطبخ هنا
حبيت اشارككم معايا البريوش عمايل ايدى ومن مطبخي
وفيه اللي بيقول عليه فطيرة شم النسيم
واللي بيسموه شريك
مش مهم الاسم
المهم انه سهل ورائع
نبتدى علي بركة الله
المقادير
كيلو دقيق وممكن نزود شوية او نقلل شوية حسب العجينة هنا كان كيلو الا كوب
ا كوب سكر بودرة
1 كوب لبن دافئ
نص كوب زبدة
نص كوب زيت
وممكن نحط كوب كامل زبدة بدون زيت
3 بيضات فانيليا
2 ملعقة كبيرة خميرة جافة مع ربع كوب ماء ومعلقة سكر ونقلبها ونسيبها تخمر في مكان دافئ
في العجان نضع نص مقدار الدقيق مع اللبن والسكر والزبدة والزيت ونعجنهم
ثم نضيف البيض والفانيليا ونكمل عجن
ثم نضيف الخميرة
ثم نكمل العجين ونضيف الدقيق شوية بشوية ونتابع العجينة
نضرب في العجان حتي تمتزج العجينة تماماً ونلاقيها مش بتلزق في الجوانب
نقلبها علي الرخامة ونلتها 5 دقائق
نقسمها كور وندهنها بالزبدة ونغطيها ونسيبها ساعة تخمر في مكان دافئ
نبدأ نشكلها
ممكن رول ونلفه
ممكن كور جنب بعض ونسيبها ولما تخمر هتلزق في بغض
ممكن ضفيره وبعدين نقفلها
ممكن وردة زى ما تحبي
خليط دهن الوجه
بيضة
معلقتين لبن
كيس نسكافية
ويدوبوا خالص
وندهن بهم الوجه بالراحة علشان متهبطش
ثم نرش سكر وقرفة
وتوضع في فرن متوسط الحرارة سبق تسخينة
يا رب تعجبكم هى سهلة جداً وطعمها روووعة