في المحـــل تروح وتجــي معصبـــه دخلو بنـآت وحاولت تتعامل معاهم بس وجهها محمر وباين العصبيــه بعينـــها ...
خلصــو وخــرجو واول مادخل بــراء جات : هاا ايش سويتلو
براء يعني اكيد اتضارب معاه قال بمزح : قتلتو
تــرف :يستاااهل والله كل الرجال لو يتبادو من المجتمع يكون احسن
براء : هههههههههههه يابنت انتي ايش بك على مجتمع الرجال
ترف ضامه يدها تحت صدرها وتتكلم بقرف : انتو نـآس نجســه
براء فرصع عينو على الكلمــه : ترا في الطيب وفي البطال عادي
ترف مو مقتنعه : في الطيب وفي البطال اكيــد لكن كلكم في مرحله معينه تسيرو واحد _ مشيت من قدآمو وراحت للمكتب وهيا يومها كلو قفل من الصبــآح اساسا متضايقـــه _
براء مو عـآرف ايش بــها .. بس فهــم انها كآنت متزوجه وآحد وســخ وطلع عينها دا اللي استنتجو
براء جا لعندها وهوا بيفتح حوآر : اسمعي
كانت تطلع بالورقه اللي قدامها رفعت راسـها : ايوا
براء طالع في عينـها ورجع شتت نظرو وقعد يحكــي : انا متزوج طيب
تــرف مرا اتفاجئت : ايوا ؟
براء : ومرتــي انا اخترتها بنفســي ولنا تقريبا سنـه متزوجين المهم هيا حاليـآ عند اهلها ماتبا تكمل مع انو انا شاكك انو في احد في حيـآتها بس ماقلت عن مجتمع البنات انهم وسخين وكلكم زي بعض
تــرف مو مقتنعه بكلامو: الحرمه ماتروح تخون الا لو انتا بتسوي شي غلط
براء ابتسم يتكلم باعجاب : صغيره وعندك ولد بطولك ماشاءالله وحكيمه كمان كتير كدا
ترف : صح كلامي يعني
براء : هههههههههههه لا _ سكت شويا _ مدري
ترف : كيف ماتدري
براء : مدري عنها بكيفها
تــرف : مو فاهمه حتطلقها يعني
براء بااقتناع : لا ماحطلقها حخليها كدا معلقه
ترف رجعت تطالع بالورقه : مو بقولك انتو مجتمع وسخ
براء رفع يدو وهوا يرجع شعرو لورا : مو وسـآخه بس ماحطلقها عشان تروح ل
ترف قاطعتو : سؤال انتا متأكد انها تخونك
براء : اسلوبها واضح
ترف بعدت عن المكتب واخدت قاروره المويــآ : الحرمه لما تبا تجنن زوجها وتباه يهتم فيها تحسسو انو هوا ماسار مهم وهنا الرجال عشان تفكيرو وســخ ودنيئ يفكر انها بتخونه على طول مع انو الرجال طول وقتهم يخونو والحرمه مسكينه ماتستوعب الا لما تكفشو
براء : الحرمه المجنونه اللي تسوي كدآ اللي تكون عاقله تحاول تصلح بيتها تحاول تهتم بزوجها
ترف : مو اكيد هيا سوت دي الحاجات ولما شافت انك ماتستاهل سارت ماتهتم
براء ابتسم : انتي ليش مطلعتني الشرير في القصه ترا وربي مظلوم
ترف : مدري احس من يوم ماشوفتك شرير ومو مرتاحتلك
براء : ههههههههههههههههه
ترف تفك القاروره وتقفلها تفكها وتقفلها : المهم لاتعلق البنت دام ماتباك
براء يستفزها : بكيفكم الشغله متى ماتطفشو تبو تمشــو وخلاص
تــرف اشرت على نفسها : والله نفسي اقعد مع كل حرمه واقولها ليشش ليشش تتزوجي ليش تزيدي نسبه الذكوره في المجتمع
براء :هههههههههههههههههههههههه يابنت انتي ايش بي اهلك اليوم طبيعي الحقد دا
ترف : والله طبيعي اللي مو طبيعي انك تعلق مرتك وماتطلقها عشان مزآجك
براء : انا حررر انا رجال ليا السلطه اني اسوي دا الشي
ترف : والله لو انها حرمه من ظهر رجال بجد كآن رفعت عليك خلع _ مشيت وهيا شويا تفعص القاروره اللي بيدها _
دخلـــو بنــآت وبرآء راح قعد على الكرســي اللي وراه المقعــد ...
اما هيا اتعاملت معاهم ومشـــيت ...
جآت لعندو : هيا خدلك متزوج وشويا وتاكل البنات بعينك
براء انفجع : انتي حتقعدي تراقبيني
ترف : لا بس استغربت ليش جلست هنا وماذخلت
براء : جالس هنا عشـآن لايجي واحد غبي زي اول ويستهبل عليكي دا جزاتي
ترف : اعرف ادافع عن نفسي روح شيل هم مرتك لايكون احد يااذيها
براء نزل عينو على جوالو : غلطان الواحد يحكيكي عن شي
الدوآم لســآتو في البدآيـــه ... الوقت طويـــل .. بدت تتعـــب
براء قاعد مستكن وهيا واقفه وتروح وتجي وتقعد على الطاوله الللي فيها الجنزآت ...
وقف واتمطــع : رايح اجبلي قهوه عشان لاأنــآم
تــرف اتثاوبت : جبلي معاك_ قالتلو طلبها وخرج_
امـآ هيــآ وقفت عند باب المحــل وشايفتو رآيـــح وفجأه وقف ومعاه بنتين
اخــدهم الكلام ...
شافتــو يضحك ... شافتو ياأشرلها على المحل
قالت بنرفزه :وبعدين يقول مرتو تخونـــو
: ايش
طالعت مفجوعه من الصوت اللي جا جمبها قالت :ساامي
سامي : وصلتي لمرحله انك تكلمي نفسك ياماما
ترف ضربتو على كتفو : فجعتني ايش جاابك
دخلت المحل وهوا دخل وراها : جيت اتطمن عليكي اتصلت ماتردي
ترف : اووه والله جوالي في الشنطه
سامي : خلصت خدمه النت صح
ترف : ايوا
سامي : ايوا انتي ماترميه الا لما ماعندك نت
ترف قعدت على الطاوله ومسكت يدو : حبيبي انتا والله كنت بتصل عليك ونسيت
سامي باين الطفش في عينو : والله البيت ممل بدونك لنا يومين مانتضارب
ترف : هههههههههههههههه عادي قاعده اتضارب مع اللي هنا لاتشيل هم
سامي بخوف : ماما بلا بلاهه
ترف بكذب وهيا ترمش بعينها : بلله انا اقدر اتضارب مع احد غيرك
سامي مايصدقها طبعا : كم مرا اسحبك من مضاربه مع رجال
ترف ضحكت : والله هما يبدأو
سامي يشد على يدها : ايوا بس اللله يخليكي ياماما مايسير هنا تتضاربي حاولي تطنشي
ترف : طيب ان شاءالله
فجأه يد تدخل بينهم وهوا ماسك القهوه
ترف اخدت من يدو : شكرا
سامي طالع فيه بااستغراب : هلا
براء دخلو يدو في جيبو ويدو التانيــه ماسك قهوتــو : كيفك
ســآمي : كويس الحمدالله
براء : كيف المدرســه وكيف محمود
سامي :تمام ,, باقيلنا اسبوعين على الاختبارات
براء : اووه الله يعينكم
تــرف تشرب بصوت عالي عشان لاتنحرق وفي النهايه انحرقت : اااح
براء : حطيتلك كراميل
ترف ولساتها مكشره من الحراره : كنت بقولك ونسيت
براء : كويس
ترف طالعت في سـآمي : اقعد معايا حكيني ايش سويت اليوم
سامي : كنت بحكيكي اليوم وطردتيني من غرفتك
ترف : ههههههههههه انا اسفه كنت تعبانه
براء سحب نفسو وراح قعد على المكتب
ســآمي : خلاص راحت عليكي سار شي مهم في حيـآتي
ترف :ككداب
سامي : والله
ترف بحماس : حكيني
سامي : ماحقولك
ترف حطت القهوه على الطاوله ومسكت بلوزته بترجي : امانه قولي
سامي يرفع حواجبه بالنفي : ماحقولك والله قهرتيني في الظهر حلفت اني ماقولك
ترف وقفت وضربتو على كتفو : تحلف على امك _ باأمر _ يلا قولي
سامي : انا حلفت
ترف وبجد متنرفزه تسحبو من بلوزتو وتفرصع عينها : سااامي قولي ولا والله ياويلك
سامي ضحك : هههههههه ماما ماتبطلي دا الاسلوب
اما في واحد قاعد يطالـــع فيهم ومو مستوعب انه دي أم دا
كأنهآ اختـــو
ســآمي بقله حيــله : طيب خلاص حقولك
ترف وابتسامه على وجهها : ايشش
سامــي : اختاروني الحـآرس وعندنـــآ مباراه بعد 6 ايــآم
ترف بحماس : ماشاءالله مبررروك حبيبي
سـآمي : الخبر التـآني
ترف : اييوا !؟
سامــي : المبـآراه مو هنـآ
ترف : اجل ؟
سامي : في ****** يعني تبعد 4 ساعات ورايحين في بـآص
ترف : معاكم يعني المدرب
سامي : ايوا معانا مدير المدرســه كمـآن وحنقعد يومين
ترف هنا اتفاجئت : تبا تبات برا البيت !!!!!
سـآمي وعلامات الترجي : ماما تعرفي قد ايش احب الكوره
ترف : ايوا بس تروح وترجع بنفس اليوم
سامـــي : ياماما مع العيـآل حكون ووحيحجزولنا بفندق وكل شي عليهم الله يخليكي
دخل رجــآل وحـــرمتو وترف سابت سامي وهيا مكشره وراحتلـــهم ..
سـآمي راح وقف عند براء وهوا برضـو مكشـــر
براء طل فيــه وبعدين رجع يكمل يهرج بالواتس مع ميســآ
براء : ايش تبــي
ميسـآ : بقولك طلقني لين متى وانتا سايبني كدا
براء : انا مو فاهم في يوم ولليله صحيتي تبي الطلاق
ميســآ : شوف انتا ايش سويت
براء : اربعه شهور وانتي عند اهلك لو تبيني كان جيتي صارحتيني
ميسـآ : أهو إنتا قلتها انا مــآباك ماباك يااخي
براء : طيب ماحطلق لين ماعرف ايش اللي غيرك فجأه
ميسـآ : اسلوب الناس البريئه اللي بتتكلم فيه وكأنك ماسويت شي ماحبو
براء : وانتي اسلوب الناس اللي عندها كرآمه وماتبى تتكلم مو داخل مزاجي تبي تمشي الموضوع عبط حمشيه عبط ياميسا
ميســآ قرات كلامو وماردت
براء رمى جوالو على المكـتب : الحريم وظيفتهم ينكدو بس عليك
ســآمي بقهر : ايوا والله _ طالع فيه _ بلله ايش حتخسر لو خلتني اروح فيها شي
براء : لا طبعا
سامي : كنت جاي مبسوط قلبت مزآجي
براء : حاول فيها لما ترجع البيت
سامي : امي كآئن شرير صغير لما تعصب تعصب
براء حس الوصف لايق عليها : ههههههههههههههه
امــآ سامي ودع مــآمتو ورجــع البيـــت ....
ترف مصنقره وقاعده على الطاوله جمب الملابس ...
يطالع فيــها كل شويـــآ ويتذكر تعليق سامي ويضحك بينه وبين نفســو
فجأه جـآت تكلمو ميســآ شاف اسمها من برا وفتح الواتس ..
"ميسـآ : اسمع تعال نتكلم "
براء : نتكلم في ايش ؟ "
ميسـآ : في وضعنا مستعده ارجع بس على شروطي
براء من غير مايضحك ارسل ضحكه طويله : ههههههههههههههههههههههههه تستهبلي صح
ميسـآ " ايش بك ؟ "
براء " خشخيشه انا عندك على بالك لما تقوليلي تعالي حجيكي جري "
ميسـآ " مو فاهمه لاتبا تطلق ولا تبانا نتفاهم "
براء بعناد " اييييوا انا اباكي كدا معلقه لا في الارض ولا في السمـآ "
ميسـآ اتصلت عليــه وهوا رد ودخل المخزن ..
ميسا :وبعدين معااك
براء بااستفزاز : اهلين بزوجتي اهلين بمرتي الحبيبه
ميسا : انتا تبا تستفزني صح
براء باستهتار : والله مو قصدي استفزك
ميسـآ بنرفزه : برااء انتا ايش تبا بزبط مني
براء : انتي عبيطه صح ؟! دوبك قبل نص ساعه ماتبي تتكلمي وطالبه الطلاق وليا اربعه شهور احاول اتكلم معاكي خاصرتني ذحين سبحححححان الله نزل عليكي الوحي وتبي تتفاهمي وانا المفروض الكلب حقك اجيكي جري صح ؟
ميسآ : انتا ماتعرف شي اصلا ولو قلتلك اللي اعرفو حتعذرني على اللي سويته معاك
براء : دوبك جيه تهرجي ! مو فاهم ايش سار معاكي عشان غيرتي رايك !
ميسـآ : هديت وفكرت بالموضوع لأنو من حقك تعرف
براء ماقدر يمسك نفسو وضحك من قلبببو وهوا محروق من جوآ : ههههههههههههههه الله يديكي العافيه ياقلبي بعد اربعه شهور هديتي دا يدل على إنك مرا تحبيني ياعمري
ميسآ عارفه انو يستهزا فيها : انتا لو سمعتني حتعذرني
براء يهرج بقهر : لو جيتيني بعدها بشهر كآن سمعتلك بس دحين استني لين انا ماأصفى واحتمال وقتها اباكي واحتمال لا
ميسآ : كمآن انتا الغلطان وتقلب الموضوع عليا !
براء : انتي مجنونه ! _ بدا مرا يتنرفز وعارفه انها تبا تتكلم فايبا يقهرها زي ماكانت تقهرو ومايسمعلها _ اقولك يلا انا في الدوام سلام
وقفـــل من غيـــر مايسمع اي رد منـــها
جاتو على الواتس ترسل ورا بعض عارف انها عصبت
بس مافتـــح دحين حيردلها حركتها ...
خرج قعـــد مع تـرف لين ماخــلص الدوآم ...قفل المحــل وراح لمواقــف السيــآرات
شغل سيارتـــه وحررك شافها تمشــي على الرصيـــف شاف كدا سياره توقفلها
عارف انها بتتعاكس ... مارضي يدخـــل وراح لبيـــت اهـــله
فتحلو بــآب الفلـــه اخوه محمود : سلاام انتا لسى صاحــي
محمود : دحين داخل انـآم
: فين امي وابويـآ
: في الصــآله الحقهم قبل لاينامو كمان
: طيب
دخــل على اموو وابــوه وسلم عليهم وقــعد
وطبــعا اول موضوع حيتناقشو فيــه ميســآ
امو : ايش ســآر معاك ؟
براء :والله ماسرت عارف اباها ولا لا
امو : انتا تبا تكسفني بس مع النـآس
براء : انا عارف اصلا متصلين عليا عشان اهلها
امو : شهرين وحيكملها البنت نص سنه قاعده عندد اهلها
براء : مو مشكلتي هيا اللي كانت تبا تقعد وكنت ابا اطلقها من داك الوقت انتو ماخليتوني اهو دحين تبا ترجع وانا ماليا نفس اتكلم حتى معاها
ابـوه : ياأخي خليك رجال وسوي شي واحد صح في حيـآتك لا دراسه ولا تشتغل اجي المحل مالقاك اصلا وحتى الزواج مو قادر تمسك حرمتك
براء بيحاول مايتمشكل مع ابــوه : لو أمي سوت فيك ربع حركات ميسا كآن طلقتها من زمان ,, راجع بيتي مالقى حرمتي ولا القى عفشها فجأه قاعده في بيت صحبتها وتقولي مخنوقه طيب ايش سويتلك ايش ســآر حتى عمي اكلمو ايش بها خليني اكلمها يقول البنت مضغوطه مو متعوده على الحيــاه الزوجيه والضغط اللي عايشه فيه لا ياااااشيخ ! شغاله وجايبلها واكلنا كل يوم من برا مو فاهم ايت ضغط اللي عايشته يعني حتى اهلها مابيقوموها في النهايه تجي تقولي خليك رجججال مو انا لو مو رجال ارجعلها
الام تحاول تهديــه : ياولدي انتا عارف بنت عمك دلوعه ومو متعوده تسوي شي
براء : اوك انا عارف وكنت متفهم دا الشي وحطيتها في عيوني بس مو لدرجه تسويلي حركات افلام هنديه وتبوني اسكت واتحمل
أهو قلتوها بنفسكم حتكمل تقعد عند اهلها نص سـنه واهلها راضين مو فارقه معاهم احنا اصلا لو رجعنا لبعض صدقني ياأبويا مشاكلك مع عمي حتزيد بسبب بنتـــه
الاب : لاحول ولا قوه الا بلله ايش اللي خلاني اشجعك على دي الزواجه اصلا
براء سند جسمو على الكنبــه :وربي كرهت حيــآتي مخليتني زي الكلب الشهور اللي فاتت وهيا تتدلع
الام حزنت على ولدهــآ : انا بس منحرجه من اهلها انتا عارف كيف علاقتنا قويــه والفتره الاخيره مو عارفين نتصرف مع بعض
براء : والله اني صبرت عليها عشانكم بس خلاص كمان حسو فيــآ
الاب وقف : انا داخل انــآم
وسابهم ومشـــي صرف نفســـو مخنوق حيتحط في موقف مرا غبــي مع اخوه والسبب زواج اولادهم ...
الام طالعت فيه : معليشش موقفه صعب كمــآن
براء : عارف
الام : انتا استخير ياولدي قبل لاتطلق وتتسرع
براء : ياأمي فين التسرع بالموضوع لنا اربعه شهور كل واحد عايش لوحده
الام عندها امل لسى يرجعو : برضو استخير
براء : ان شاءالله ..
الام : المهم كيف العمل
براء : كويس ماشي الحــآل
الام سكتت شويا وبعدها قالت بااهتمام : هيا ام سامي تشتغل معاك
براء ماستوعب وطالع فيها بااستغراب بعدين فهم : ايووا
الام باأسف : بلله ابوك ايش يبا بوحده زيها
براء مرا استغرب : ليش ايش بها !
الام : خريجه سجون لها مسجونه اكتر من 7 سنوات الله واعلم ايش مصيبتها
براء مرا انفجع : من جدك !!!!!!!
الام : ايوا ابوك لما اخد اوراقها الرسميه اتكلم مع ولدها عشان كدا ماكانت تشتغل في اي مكان محد يقبلها وابوك سوا فيها خير استغفرالله لاتجبلنا بس مصآيب
براء مرا مصدووم : والله صدمتيني
الام : ابوك مايفكر والله .. سامي طيب واحبو بس امو من فين نعرفها عشان نسوي فيها خيــر المشكله حتى مانعرف ايش سوت عشان تنسجن ومحمود يقولي سامي ماعندو اهل لاخيلان ولا اعمام مقطوعين من شجره الله يستر بس علينا
براء بيدافع بس لسى برضو مصدوم من الكلام : مو باين عليها تراها محترمه وف حالها
الام : تحت السواهي دواهي الله يستر منها بس
براء دحين سار يفســـر كل حركــآتها بس برضو ماستنتج شــي
لكن امو صدمتـــو بالموضوع
جــلس شــويــآ معاها ووقف : يلا انا رايح
امو : الوقت اتاخر اطلع نــآم في غرفتك
براء : لا خلاص اروح بيتي و
امو قاطعتو : يلا الله يرضى عليك لاتشغل بالي بدا الوقت
براء فيه اصـــلا نوم ومكسل يمسك الطريق : طيب
طــلع لغرفتو واخد ريموت المكيف وشغلو ورمى نفسو على السرير من غير مايفسخ شي
واول شي جا ببالو : متى كآنت مسجونه ! ومتى جابت سامي ! ومتى لحقت تتزوج !
الفضول قاتـــله
سار حاسس انو وراها قصـــه مرا كبيــــره
__________________________________________________ _________________
امــآ في مكـــآن تــآني واجواء بعيده كل البـــعد عن الرآحـــه النفسيــه
شخصيــه تصـــف معاناه فتــآة لـــيس لها سنـــد ليـــس لها ملجأ
والظلم هوآ من جعلها تمـــر بهذه الظروف ...
خلصــت من عملها وخرجت تمشي في الشـــوارع بدون هـــدف
مو عارفــه ترجع لهديـــل ! طيب لو لقت هديــل شغل هنــآك بدا البيت المريح هيا ايش حتســوي!
وقفت في شــآرع هادي مافيــه احـــد طالعت بيدها المجرحه من كتر الشغل
ضمت اياديها لبعض وهيا تحس كأنو امواس من كتر مايوجعها
شالت الكــآب من على رآســها وفكت شعرها
وكمــلت طريقــها لين ماوقفو اتنين قدآمــها : ايش تسوي ياحلوه هنــآ ..
روان دخلت يدها بجيبها : ايش تبو
الرجال قدم خطوه وقرب وهيا رجعت خطوه لورى : بعدد عني
الرجال التـآني يطالع فيها : ليش خـآيفه
جا يقرب
خرجت السكينه الصغيره اللي بجيبها : والله اللي يقرب
قاطعو كلامها بصوت ضحكتهم اللي فجعتها
رافعه يدها وهيا من جوتها بتموت من الخوف لكن صوتها مايدل على خوفها
: ايش حتسوي بيدك الصغيره دي
كآن بيقرب الا هيا حركت السكين بكل قووتها
وفجأه صررخ دفتهم وجــــريت
تجـــري وتحس قلبها حيوقف من الخووف
طالعت وراها الا الاتنين يجرووو
خلاص تحس رجلها مو شايلتها
طريـــق طويل مو عارفه ايش نهايته
ومافي احد غيرها هيا وهمـــآ
: والله لاتندمممي يا"""
بيهددوها وهما لسى مامسكوها ايش قمه الرعــــب الللي هيا عايشـــته
طالعت وراها تتمنى انهم بعيد بس فجاه طــآحت بالارض والسكين فلتت من يدها ...
__________________________________________________ ______
روقــــآن عائلــه بسيـــطه ملمومين كلهم حول طاولــه الطعـــآم
والطاوله ممجهزه باألز الاكـــل من سلطات لمقبلات واطبــآق ريئيسيــه
نقــآش ... ضحك ... يتذكرو مواقف زمــآن
ببسآطه عائله مترابطه ..
: والله وحشتني ياعدي
عدي : انتي الصلاه ع النبي ماتخلي الواحد لحظه يحس انو اشتاقلك سناب ورا سناب
علا : ههههههههههه لو سمحت انا انسانه مشهوره والنــآس تتمنى تشوف سناباتي
عزام : ولل ياشيخه تخيل مسويه اعلان
علا صرخت تخاف من عيون اخوانها : اسكتتتتتتو _ رفعت الشوكه اللي بيدها _ قولو ماشاءالله والله أدخلها ف عينكم
امها : ههههههههههه
ابوها : طلعتي احسن من اخوانك
عزام : اخص عليك يابو عزام ماتعرفني كيف ف عملي
علا بفخر : مهما كرفت ماحتجيب ربع اللي اجيبه
عزام : ههههههههههههه انتي حاجه مشهوره مؤقته فجأه حتختفي دي الظاهره وحتكتئبي اما انا قاعد ابني نفسي طوبه طوبه
عدي :مو امس قلتلي تبا وظيفه ومو مرتاح ههههههههههه
عزام دوبو بيحط الملعقه ف فمو الا طالع فيــه : خليك في نفسك
الاب هوا شاكك اصلا بس جات لعندو : مو قلتلي امس ماعندك شبكه وماقدرنا نوصلك متى كلمك
عزام طل في عدي ونفسو يقولو تستاهل خلي فلتك تنفعك
عدي مايعرف يكذب مرررا : مو امس امس ماتذكر متى اتوقع قبل قبل قبل امس شي زي كدا يعني
عزام ساكت مايبى يرقعلو يعرف اخوه انو حيفضح نفســـو شويــآ
الاب : لا ياشيخ
عُلا ماسابتلهم مجــآل يكملو لما قالت : ماما ماشاءالله البيت اليوم يفتح النفس وغرفتي من زمان ماشوفها كدا نانا من فلها دي الطاقه
الام : لسى كنت بكلم ابوكي على الموضوع
: خير ؟
عدي : حتروح نانا !!!!!!
الام طالعت فيه مفجوعه : تف من فمك تروح انتا ولا هيــآ
عدي انفجع : اعوذ بلله ياماما
عزام يهمسلو : قلتلك الوالده الكريمه فيها شي ههههههه
الام كملت كلامــها : فيه وحده جـات الصباح تبا شغل وهيا اللي نظفت البيــت نانا تبا احد يساعدها وانتا عارف حقون الاستقدم لسى يبالهم وقت ... وبنفس الوقت خايفــه مهما كآن من الشارع الحرمه
الاب : شوفيها وخليها كم يوم عجبك شغلها وارتحتيلها خليها ماعجبك خرجيها
الام : والله مرا خايفــه من الموضوع بس نانا محزنتني
عزآم : صراحه ليا فتره ماشوف غرفتي كدا نظيفه والبيت
الام : ايوا انا رجعت من دوامي دوبي قلبي انشرح من النظافه بس لسى ماشوفتها
علا : خليها ياماما ونانا هيا عارفه شغل البيت لو مارتاحتلها تقولنا نخرجها
الام وقفت : الحمدالله _ شويا اشوف الحرمه واتفاهم معاها _
خلصــو اكـــل واتوجههو للصــآله كملو جلستهم
لهم شهـــرين مايشوفو عـــدي ..
: نااانااا
نانا خرجت من المطبـــخ : ايوا مدآم ..
: سوي 3 كاسات شاهي اخضر .. ايش اسم حرمه اللي يجي في الصباح ؟
نانا : هديل
الكـــل استغـــرب من الاسم
الام : خلاص لما يخلص الشاهي خليه هيا تجيبها
نانا : طيب مدام
عدي : ههههههههههه ايش هديل
عزام : لايغرك الاسم دحين تجيك وحده تصرع وجهك
عدي : هههههههههههههههه فاكر ياسمين
الام اتذكرت الشغاله ياسمين : هههههههههههه استغفرالله سيبو خلق الله في حالو
علا : انتو نـآس سطحيــه وهمكم المظآهر
عدي يتريق عليها : مين امس تبا وحده عندها هالات وحبوب عشان تسوي _ يقلدها _ تتوريال
علا : ايش دخل دا دحين في كلامي انا طلبت وحده بدي المواصفات عشان اعلم البنات
عدي : بلله ماتطفشي وانتي كدا تتصنعي انك حبوبه وتجاملي الكل
علا فرصعت عينها : انا حبوبه ومبسوطه انوالناس يحبوني ليش بجاملهم
عدي : مدري ياخي لما اتفرج عليكي اسوي سكيب سكيب سكيب
علا طالعت في ابوها : باااابااا شوف عدي
عدي : حتى معتز والله حتى ماما كم مرا اشوفها ماتتفرج سناباتك
علا انصدمت : بجد انتو ماتتفرجو
عزآم مفجوع منو : انتا ليش كدا تسوي تحديد على الكل اتكلم عن نفسك ياخي - طالع في علا وهوا باين انو يكذب ويشد على كلامه _ انا مررررا احبك واتفرج سنابه سنابه واعيدها قبل لاأنام عشان لاأنسى كلامك المهم عن المكيـآج اخصريكي من عدي
علا حطت يدها على قلبها : شكرا جرحتوني والله
عدي : شوفي احنا اخوانك في النهايه مانبى نتفرج على مكيـآج _ اشر على امه _ بس امككك ليش تسوي سكيب وتتفرج على صحباتك وتضحك
الام : هههههههههههه حسبيه الله عليك ياكذاب
علا كآنت دوبــها بتتكلم الا دخـــلت هديــل
نانا مديــتها للبس من عندها
بلوزه لفوق الركبــه بيضا ومخططه بوردي وبنطلون وسيــع نفس الشي مقلم
وربطه مغطيه شعرها
شايله الشاهي وهيا تتنافض من جوآ
وزاد خوفها لما شافتهم كلهم يطالعو فيها
حاولت تسوي زي نانا ماقالتلها لاتطالع وتحط التبسي على الطاوله وتنزل عينها
عزآم !!!!!!!!!!!!!!!!!!!!!!!!!!!!!!
عدي !!!!!!!!!!!!!!!!!!!!!!!!!!!!!!!!!!!!!
الاب !!!!!!!!!!!!!!!!!!!!!!!!!!!!!!!!!!!!!!!!
الام : انتي هديــل !
هديل وهيا راخيه راسها : ايوا
الام سـآرت مو عارفه كيف تتكلم معاها ولا ايش تقولها !تطالع في زوجها مفجوعـــه
عزام بقمه السعاده حط يدو على فمو وقال : اووه شيت
عدي ماسك نفسو لايضحك مو مستوعب انو دي شغاله رفع جوالو بدون لحد ينتبه وصورها
وارسل للؤي وكتب " شغالتنا مزززززززه "
امــآ هديـــل مع فجعتهم ســآرت مو عارفـــه ايش مصيرها بينهم ....
__________________________________________________ ______________
فــي مكــآن تــآني على سريرها ولابســه بجامتها الحـــرير
وفارده شعرها على المخده وتطالع في السقف وتفــكر بقرارها
توافق ولا مـــآتوافق
عندها استعداد انو ســآمي يسيبها يومين
تحس انها حتتجنن
وشويا تبا تفكر بسعادته كمان
تباه ينبسط
غطت وجهها بيدها بقهر : اااه
انانيـــه بحبها لســآمي راسها مصــدع كتـــر التفكيـــر ...
فجأه دقت الباب وفتحتو
ترف طالعت بااستغراب : ايوا ؟
خلود في يدها جوالها ووجهها مصفر مو عارفه ايش تقـــولها !
تــرف حست انو فيـــه شي جلســـت : ايش في !!... اهرجي
خلود جات لعند السرير ومدت يدها وقالت بهدوء : كلمي اخوكي
كلمـــه شلتها .. صعقتها الاسم لوحدو خلى قلبها يغووووص جوت بطنها ..
نظرة الخوف كســـت وجهها ....
حركت هديل يدها مرا تانيه وكأنها تفوقها : خدي
اخدت الجوال بنفس الملامح والصدمه وحطت على اذنها
قالت بصوت يادوب يطلــع : الو
نهايه الفصل الثاني
توقعاتكم ورايكم بالفصل ....
|