[لامارا]

" البارت التاسع والثلاثين "


- الأشياء التي تأتي متأخرة ..
تشبه تماما قبلة اعتذار على جبين ميت !
سـكرت غادة السماعة من أم فراس وهي تجلس بضيق .. الليلة صاحبات أم فراس مسويات حفلة بمناسبة زواج فراس وضروري تحضر , وهي بإختصـار مالها خلق ...
فتحت جوالها بيأس وهي تدق على أحمد ... كبست عيونها وهي توقف لما جاها رد ماتوقعت نهائي !!! : خير ياطير .. هلا بعروسة الموسم
غادة دون تصديق : وينك ماترد ؟! كم لي ادق عليك حاقرني !! تستهبل ؟! وين رنيم ؟ شخبارها ؟ ليش معد ترسل صورها !
أحمد بسخرية : قلت مافيه داعي ازعجك اكيد مشغولة ... بس اللحين فهمت ليش فراس عطاني كم تلميح عشان آخذ بنتي من وقتها ناوي يخطب ومايبيها
غادة بقهر : هالكلام مو صح ! وبعدين ...... رنيم تأخرت عندك كم لي ماشفتها جبها الرياض
أحمد بخشونة : اقولك مافيه ! ولاتزعجيني ! خلاص ارتحتي منها خلك مع اللي خذيتيه... مدري وش محصل فيك عشان ياخذك !
غادة : طيب ابي اسمع صوتها ... وينها ؟
احمد : مع عمتها مو فاضيه لك .... " كلم اللي جمبه " شروق حياتي اذا نامت وديها عند امي خل ناخذ راحتنا
غادة تحطم كلش فيها لحضتها ... نايمة بحضن زوجته وهي جالسة تحترق هنا ! : ..................
احمد : يله تبين شي انا مشغول .؟!
غادة بقهر : جالس تصرفها .... اذا تبي تاخذ راحتك مع البقرة اللي جمبك جب بنتي عندي !
أحمد : احترمي نفسك ! وقت عرضت عليك ترجعين لي وتجلسين جمب بنتك رفضتي وقلتي ما أبي الزواج ! واللحين يوم جا هو رحتي تركضين له ..... اجل تحملي النتيجة !
غادة : وععــــوه والله لو فيها موتي ما ارجع لك انت وأهلك ! وبنتي مو بكيفك ... يحق لك تاخذها اوك بس تحرمني منها والله لو اسحبك بالمحاكم ماهمني !!
أحمد : من قال بحرمك منها .؟! تبغينها تعالي زوريها من مانعك ؟
غادة عضت على شفايفها وصوتها بدا يختنق : احمد طلبتك لاتصعبها ... وش طالبه منك انا .؟! ابي اشوفها بس ..
احمد : والله يا غادة انا بنتي ماتتربى في بيت رجال غريب اعذريني .. تزوجتي ؟! تحملي النتيجة
غادة : وانا ما ارضى بنتي تنام بحضن حرمة مو امها ! يعني وقفت علي ؟
احمد : انا ابوها ويحق لي ... انتي حدك امها اللي ما اهتميتي فيها حتى , يله مو فاضي لك سلام !
سكر السماعة قبل تنطق .... عضت غادة على شفتها وهي تنحني بقهر وتنهمر دموعـها , مافيه حاجة تصير زي ماتبغى وكلش يمشي عكسي .... حسبي الله عليكم ثنينكم ..
***
فــراس دخل البيت وهو هاليومين نفسيته تشرح الصدر .. لؤي صار يكلمه طبيعي وهالشي يطمنه ارتمى بالصالة وهو يشوف الكل مجتمع : مساء الخـــير ... الغداء جاهز ؟!
أم فراس : الغداء .؟! قبل الغداء انا ابيك بموضوع... ولك يومين ماتجلس بالبيت !
فراس عدل جلسته وهو ينتبه للضيق على وجهها : هلا يمـه امري .... فيك شي ؟!
ام فراس وقفت : تعال معـاي !
عقد حواجبه وهو يطالع اخوانه بالصالة ... وقف وهو يتبعها لغرفتها دخل وراها وهو يجلس قدامها وعاقد حواجبه : شصاير يمه رجيتيني ؟!
أم فراس بقهر : كل اللي جالس يصير وتقول وش صاير ؟!
فراس : شقصدك ؟
أم فراس بزعل : صاير ترمي الكلام يا يمه ولا تحسب له .... وش تتوقع حالتي عقب ماتقولي انك تنام بمكان وزوجتك بمكان ؟ مايجوز هذا شرع ربك
فراس تنهد : الله يهداك يمه خوفتيني ع بالي صاير شي ... وبالنسبة لها الله يعديني اثامها بس صدقيني ماراح اقدر لو ايش فلا تحـاولي
ام فراس بعصبية : ليش تزوجتها اجل ؟! كان جلست عزوبي وبس !! متزوجها وجايبها عشان تمرضني وانا اشوفك تظلم صريح كذا !
فراس : عندي سبب مقدر انطقه .. لولا هالسبب مافكرت فيها حتى
ام فراس : ماتبي تقولي السبب بكيفك بس وقتها تعايش مع الوضع واستوعب انك تزوجت وماعدت زي أول ! يا إمـــا طلقها ولا تتركني انحرم من النوم خوف ان عقوبتها تنزل علي
فراس تنهد بضيق : شنو يمه جالسة تحشريني انتي ؟! مقدر اطلقها ولا اقدر اعاملها زي ما أنتي تبين ...
ام فراس : يعــني راح تضل بغرفتك ؟!
فراس باقتضاب : ايه بضل بغرفتي !
ام فراس : وإذا قـــلت لك عشاني .؟!
فراس : يكرم شانك بس مقدر
ام فراس : والله حرام عليك ... اقل شي احترمها قدام العالم ذاك اليوم خالاتك يسألوني وش صاير نافخ عليها قدامهن واخوانك الصغار يحسون يسمعونك تهاوشها قدامهم ! وكثير غيرها .... صارت ماعاد تقابلنا تخاف تفشلها قدامنا
فراس : لو هي تحكي زي العالم والناس ماصار كل هذا ... بس عبث
ام فراس : لما كنا بالسيارة نفخت فيها دون تقول شي ... تكلمت طبيعي !
فراس : بالسيارة ماكنت ابيها تطلع .. وضغطتي علي وهذا اللي صار
ام فراس : المهـم اللحين شلون ؟! انا صدقني ماراح ارتاح بطريقــــتك معها كذا .. " كملت بقهر " انا ماصدقت قلت لي بتزوج حتى اني ما اهتميت بحالة البنت قلت دامه بيتزوج حمدالله وينقلب الحال كذا ؟
فراس : اذا تذكرين أنا واضحت لك كلش من البداية " وقف " هالكلام يمه ما غير يوجعك ولا ينفعك ... بالذات هالبنت لاتتوقعون مني شي ناحيتها ..
وطلع مبــــاشرة وهو يصعد لغرفتـه قاطعه صوت انس : فراس الغداء .؟!
فراس وهو يصعد : عليكم بالعافية .
اسماء صقعت راس انس : يالبثر خله بيتغدا مع مرته فوق وش يبي بك !
ام فراس كانت متأكدة انه متوجه لغرفته ... تنهدت بضيق من تعليق اسماء وهي تجلس ..
اسماء : شفيك يمه صاير شي ؟!
ام فراس بضيق : قولي للخدم يجهزون الغداء .. الله المستعان بس
***
نـايف /
بين طرق الرياض.... رن جواله طالع المتصل " نهى " تنهد وهو يـرد : هلا نهى
نهى : هـاي نانو كيف حالك ؟!
نايف : بخيـر ... انتي شلونك ويزيد شلونه ؟
نهى : حمدالله بخير .... كلمت أبقولك انوه يزيد حاب يشارك في كشافة قبل تبدا الدوامات وابي فلوسها
نايف : وش له داعي هالكشافة .؟ خلاص الدوامات قربت بس بتعطله على الفاضي
نهى : واااااي نانو عن العيارة .. مافيها شي الولد بخاطره
نايف : ما اشوف لها داعي
نهى : شفيك نانو صاير بخيل .؟! ولدك ترا
نايف : مو بخيل بس ما احب احط فلوسي على شي ماله معنى .. تبغين انتي ادفعي , ولا فكيني وبعدين كشافات هنا مافيها مسؤولية وانتي كيفك
نهى : معـلوم ماراح تدفع يزيد مو ولد ست الحسن والدلال عشان تدفع له !
نايف : وش جاب اللحين .؟
نهى : وش جاب ! جاب انه ماصرت تشوفنا زي أول من تزوجت ... انعميت ي ساتر
نايف : بتجاهل تعليقك السخيف هذا
نهى : لعبة الجحدان ممتعة ي نايف بس وقت تمس قلب طفل وقتها قل سلام عليه ماراح يحبك عقبها
نايف : لا بالله .؟! لعبة الجحدان ؟! وش وضع هاللعبة وش قوانينها ....
نهى : تتريق حضرتك ؟
نايف : طبعا اتريق مو شايفه كلامك يضحك ... عموما نهى انتي سوي اللي يريحك بفلوسك بس بفلوسي ماتقدرين تجبريني على شي مابيه وقولي بخيل او غيره ما أهتم ! يله سلام
سكـر السماعة وهو يوقف سيارته قدام البيت وينـزل دخل وهو يصفر برواقة ويغني : ياعســل من اللي ذاقك ياعسل .؟! " حصل البيت التحتي بحالة ركود .. استغرب ماطلعت له " بسمــــتي .. عمري
صعـد وهو يدخل الغرفة حصلهـا غاطة بنومه .. إبتسم وهو يتـأملها يدها تحت اذنها وواضح غاطة بقـوة وقف وهو يسحب كاميرته من طاولته ويضبط الدقة أول مالقط الصورة فتحت عيـونها .. ابتسمت بكسل : انت هنـا ؟!
نايف انحنى وهو يبوس خدها ويبعد شعرها عن وجهها : تو جيت ... صاير نومك كثير هذا وانتي ماعندك دوام
إبتسام بضيق : والله ما أطيق حالي وانا صاحية .. لوعة كبد مو طبيعية ما ارتاح لحد ما انام
نايف : دامك ماتتوحمين علي زي باقي الحريم اجل عوافي !
إبتسام رفعت حواجبها : لااا .. يعني عادي اهم شي انت ؟!
نايف : من جـدك .. تخيلي انتي تتوحمين فيني وش بسوي بحالي ؟! وين اضيع عمري ؟
إبتسام بنظرة لها معنى : وقتها بيكون دوري اخذ نقاهتي .. مو ؟
نايف رفع عيونه وزفر : مانسيتي انتي للحين
إبتسام : تو مامر عليها حتى شهر انسى .. وحده غيري ماراح تعطيك وجه اساسا يادلوع !
نايف ابتسم بجاذبية : وانا وش لي بغيرك .؟! خليني فيك انتي ... قومي خلينا نطلع نتغدى بمكان
إبتسام ابتسمت : ثواني وبجهـز
معط نايف خدها بنعومة قبل يقوم : يله بنتظرك تحت
***
ســارا نفخت بعصبية وهي ترمي مايا بسريرها : افففففففففففف !!
التفتت لها صوفي بقلق : مابك .؟!
سارا : لا أعلم ماذا افعل معها ! الى متى ستستمر بالبكــاء !
وقفت صوفي عند سرير مايا وهي تطبطب على ظهرها بنعومة ... حتى هدت مايا تلقائي ورمت صوفي سارا بنظرة : انتي لاتريدين ان تتعاملي معها كما يجب ! هي تحتاج القليل من الاهتمام فقط
سارا جلست دون نفس : لا أملك وقت لها ! يجب ان ابحث هم وظيفة ايضا اين سيحصل لي ان ادللها !
صوفي شالت مايا من سريرها : دعيها تنام معي الليلة ... وسترين انها لن تبالغ بالبكاء !
سارا سكتت بقهر وهي جالسة على سريرها ... حضنت راسها بين يديها وهي كلها حقد للؤي .. ماكان فيه داعي يرجع يلخبطني ثم يغيب ! كان ماظهر من البداية ... خلك وفي لغيابك ولا ترجع تظهر قدامي عشان اقدر اكون مخلصه لنساينك ..
***
ميهـاف لها كم يوم مستغربة وضع امها .. ماترد عليها الا عقب الشين واذا ردت صوتها مره مايعجبها: .......
كانت جالسة تشرب كافيها بالصالة بينما بدر مشغول باللاب .. رفعت راسها له : بدر ؟
بدر رفع راسه لها : لبيك
ميهاف : متى آخر مرة شفت بابا ؟!
بدر حاس بفمه : ما أذكر والله ... ظني آخر ماشفته يوم زواج فراس
ميهاف عقدت حواجبها بضيق : وليش ماتشوفه على طول ؟!
بدر : ماعندي سبب اقابله !
ميهاف وقفت : انا بروح اجهـز وبروح ازور اهلي ..
بدر : هيه وين وين .؟! فجأة كذا قمتي وبروح اهلي !
ميهاف وقفت : شنـو ؟ اهلي زمان عنهم بروح ازورهم ... فيها شي ؟
بدر نطق بحده : ميهاف ! طبع بيت اهلك هذا بطليه ... مو متى مابغيتي تطلعين تقومين وتروحين ع طول ! استأذني قبل ... وانا اوافق او ما أوافق عاد
ميهاف ما اعجبها كلامه .. تخصرت بقهر : اوك انا قلت لك من شوي ... مو كأني مخبيه عنك !
بدر : لا تعطيني خبر كأن امرك بيدك ما شاء الله !
ميهاف رمته بنظرة استخفاف وكملت طريقها : والله ياعمري بيت اهلي ما احتاج استاذن احد عشان اروح له .. متى مابغيت اروح باروح
بدر بعصبية : لو متكلمة زي الناس كان درب السلامة ! بس على هالأسلوب انثبري مافيه
ميهاف بعناد : راح اروح يعني أروح .. مو بكيفك هذا بيت أهلي اللي عشت معاهم عمري كله وانت مالك بحياتي الا كم شهر !
بدر استرخى على الكنبة : اوك روحي ... بس لاترجعين اجلسي وراك
ميهاف فتحت عيونها : كل هذا عشان بروح ؟!
بدر : والله اللي ماتقدر كلمتي ... فرقاها عندي ماتبغى لها صلاة استخارة
ميهاف عضت على شفتها بقهر .. ثم دخلت الغرفة وهي تسكر باب الغرفة باقوى ماعندها , صرخ بدر بعصبية : اكسري الباب احسن !
رجع يكمل شغله بقهر وهو ما اعجبه اسلوب حياتها الاستقلالي .. بنظرة هو اللي له الكلمة ! تافف وهو يسكر اللاب ويحدق بالباب ... قرب منه سمع صوتها وهي تكلم بالجوال : لا ماما مقدر اجي اليوم معليش .. بشوفك بعزيمة فراس بكرة ان شاء الله
تراجع انه يدخل وسحب مفاتيحه من الطاولة وهو يطلع ويتركها دامها خضعت ارتاح
***
كافتريا المستشفى /
اثناء جلوسه مع مجموعة دكاتره ببريك يفطرون ... كان صامت بالاجتماعات كالعادة , مراد التفت له : اقول هيثم لو يقولون لك أقتل صنف بهالعالم .. من بتقتل ؟!
هيثم انقلبت ملامحه للبغض : ام وجهين !
ضحك دكتور : هههههههههههههههههه ليش ام وجهين مو أبو وجهين ! من ملعوزتك ؟
ابتسم هيثم بانحراج ما انتبه لنفسه : محد .. اساسا اعتقد كل الناس كذا مسألة الوجه الثاني متى تقابله مسألة عاجلا أم اجلا بس
مراد : عللللي ؟! انا عرفتها خلاص !
هيثم رماه بنظرة : خلك ساكت انت !
مراد حط يديه على فمه : هذاي ساكت ... بس انت اهم شي لاتنكر !
هيثم ارتشف قهوته : بالعكس مايهمني من زعل ولا من غيرته الأيام المهم انا باكل وبنام وداهيه تاخذهم كلهم .
الدكتور : ههههههههه شتقولون انتو والله مو فاهم
هيثم : ولا يهمك مراد هذا صار يهلوس .." طالع ساعته .. ثم ارتشف قهوته مره وحده " انا تاخرت لازم امشي
وقف وهو يكمل طريقه ... معد بقى الا هي تهمني ! الاسبوع اللي احتريتها تجي فيه ماجت .. اجل قلعه تقلعها بعد !! قال ايش قال صادقة ...؟!!!
***
اسمـــــاء :-
دخلت البيت ويدينها كلها أكياس ...جلست بتعب بالصالة عند امها : السوق خياس !
ام فراس : واضح خامه كل السوق وتقولين خياس ؟!
اسماء كشرت : فراس معطيني بطاقته مقدر ارجع قبل اصرف كل مافيها
ام فراس تنهدت بضيق : معطيك بطاقته ولا قال لغادة تطلع معك اقل شي تتوسع .. " التفتت لاسماء بلوم " وانتي بعد ليش ماقلتي لها تروح معك ؟!
اسماء فتحت عيونها : اماا اقولها ! ثم اكتشف انه مايبيها تروح ويحطها براسي اني طلعتها ... لا اسفه خليني سالمة بس
ام فراس : هو خليه علي ... بس انتي لعاد تطلعين الا هي معاك !
تنهدت اسماء بضيق : شفيك انتي عليهم ... من امس ومنتي راضيه عنهم
ام فراس بضيق : اكتشفت امس ان فراس ينام بغرفته من اول ما اعرسوا
شهقت اسماء : امااااا عاد !
ام فراس بضيق : ايه والله
اسماء : يؤ يؤ ماتوقعت لهالدرجــة عاد .. مسكينه ياغادة
ام فراس : شايفة .. يعني لاتجلسين تحقرينها كل مانزلت وتطلعين وتسفهينها حاولي تكونين معها , اليوم كلمتها صبح اقولها عن العزيمة حقت ربوعي وشكلها مكتئبة ومالها خلق
اسماء : طيب هي ليش ماتروح لاختها !؟ احسها ماتروح لها نهائي حتى زيارات
ام فراس صفقت يدينها بقلة حيله : الله يستر مايكون بعد معيي عليها
اسماء وقفت : خلاص لاتشيلين هم بصعد اغراضي اللحين ثم باروح اشوفها
صعـدت اسماء وهي تحط اغراضها وعبايتها وتتنهد بقلة حيله .. هي نفسها محتاجه احد يسمعها ويوقف معها تروح تساند غيرهـا .. فتحت صورته وهو بعرس نايف وهي تمسح على وجهه عضت على شفايفها وهي تتأمله .. وجهه اللي كانت تحبه من قلبها رغم لؤمه .. خذلها اللحين ..
معد صارت تحس برفرفه ترفرف بقلبها لاشافته زي أول .. صارت تحس بهم وغم وطعنه بصدرها
تنهدت وهي ترجع صورته لمكانها وتبدل لبسها لحاجه مناسبة البيت .. وبعدها صعدت وهي تحوس بفمها , اصلن ماتخيلت فراس يتزوج ويعيش ببيت له مع وحده يعني ما استغربت مرة ... بستغرب اكثر لو احصله بشقته !
ضربت الجرس .. بعد فترة جاها الرد : ميــــــن ؟!
اسماء : انا اسمـاء .. مشغولة ؟!
فتحت غادة مباشرة : هلا اسوم .. لا مو مشغولة حياك
اسماء دخلت : شجالسة تسويــن ؟!
جلست اسماء بالصالة اللي كانت مرتبة جدا .. مافيها ذرة فوضى وهذي النتيجة عقب اخر مره صعد : قررتي ايش راح تلبسي بكرة ؟!
غادة بضيق : تقريبا .. استريحي بروح اسوي حاجه نشربها وش مشتهيه ؟
اسماء : لا لا لا .. اذا بنشرب خل ننزل تحت مع ماما جالسة لحالها
غادة : لا انا مافيني والله ... عندي كم شغلة لازم اخلصها
اسماء : من شوي تقولي فاضيه ! فجاة جا الشغل ؟! عن الدلع يله ننزل
غادة : لا اسوم يعطيك العـافية بس بجد بجد ما ابغى انزل
اسماء : ليش تضايقك الجلسة معنا ؟
غادة انحرجت : مو سالفة ... بس احسني متوعكة شوي ولايعة كبدي فارتاح احسن
اسماء تنهدت : اوك ماراح اضغط عليك ارتاحي ..
طلعت اسماء بينما غادة رجعت تجلس على الكنبة وهي تسحب ألبوم الصور من ورا الوسادة .. وتكمل حالة كئابتها وهي تتأمل صور رنيـــم بكل حالاتها .. عضت على شفتها وهي تحس بشوق مو طبيعي لها ..
رن جوالها " إبتسام " صمتت جوالها وهي تضم الألبوم لصدرها وتستلقي تتامله
***
اثنـاء ما أبو نايف جالس بمكتـــبه وهموم الدنيا راكبه راسه من عرف أن لؤي عنده بنت .. واللي قاهره ماحصلها للحين : ...................
رن تلفون مكتبه رد : طال عمرك عندك ضيفه حابه تقابلك
عقد ابو نايف حواجبه : ماني اتوقع ضيف .. ماعرفت مين ؟
الموظف : تقول ام يزيد
ابو نايف : حياها حياها ... قول لها تتفضل
بعـد فترة دخلت نهـى ... استقبلها ابو نايف وهو مستغرب زيارتها : هلا والله بأم يزيد حياك .. الله يهداك وينه يزيد ليش ماجبتيه معك ؟!
تنهدت نهى وهي تصطنع الضيق والدموع : ابي اكلمك بموضوع . . ما ابي يزيد يسمع عنه
ابو نايف عقد حواجبه : عسى ماشر ... فيكم شي صاير شي ؟!
نهى : والله ماحبيت أقولك هالحكي ... بس انا جايه اشكي لك نايف
أبو نايف انعـاد قدامه هالمنظر ... لما جته قبل طلاقهم بفترة تشكي نايف وسوء معاملته : شفيه نايف شصاير بعد .؟
نهى : انا مالي حق اتكلم ... بس غصبن عني من القهر نايف من تزوج وهو متغير على ولده يصاحبه يوم ويهجره شهر يقربه ثم يبعده ويقوله كلام دون فعل .. حنا تعبنا يا يكون قريب يا يبعد نهائي وينسى ان عنده ولد اسمه يزيد !
ابو نايف فتح عيونه : ليش تقولين هالحكي ؟! نايف يموت على يزيد هذا بكره كيف تبعدينه عنه ؟
نهى نزلت راسها : خل يجلس دون أبو اقل شي محد يتمنن علينا ونكون غصب ممتنين له
ابو نايف : نايف يمن عليكم ؟!
نهى : الظاهر ياعمي انت ماتدري وش جالس يصير .. من عقب زواجه تغير تماما , تخيل دخل بيتي وامي موجوده ما احترمها وجلس يمن علي قدام يزيد بالبيت والفلوس وكل شي ! هذا غير يزيد اللي كل ماراح بيته ياخذه غصب ويتركه ويروح مع زوجته ..
ابو نايف نطق بعصبية : وانتي ليش ماتكلمتي من أول !!
نهى : لا تلومني من اشكي له ... قلت يمكن تو متزوج وباش ! بس لما عرفت انه ينتظر مولود مستحيل اسكت ! واترك ولده يجي وعقبها ينهضم حق ولدي كله .. يزيد صار يكره نايف عقب ماكان يموت فيه اخر مره طلب منه فلوس عشان المخيم رفض !
ابو نايف هز راسه : لا حول ولا قوة الا بالله ... خلاص يابنتي انتي توكلي وانا بشوف وش بيطلع معي
نهى وقفت : جزاك الله خير ياعمي مانطلع من جزاك
أبو نايف : تعالي " طلع من بوكه مبلغ هائل وحطه بيدها " هذا ليـزيد من جده وخليه يزورنا قريب يلعب مع فهود
نهى ابتسمت وهي تشوف المبلغ الي راح يعيشها بعز شهرين قدام .. هزت راسها : ان شاء الله
مجرد ماطلعت ... طلع مباشرة وهو يتوجه للبيت وطول الطريق يدق على نايف لكن دون اجابة " كالعادة ؟! "
أول مادخل نادى بعصبية : مــــــــــــــــزنة !!! مزنة !!
طلعت ام نايف بخوف : هلا شفيك يارجال خرعتني ؟!
أبو نايف : لؤي مازال بغرفته .؟!
ام نايف تنهدت : لا طلع للمجلس شوي مغرب جلس مع فراس .. ولماراح رجع غرفته
أبو نايف : أحسن ! يموت هناك بعد عشان تكمل فرحتي
شهقت ام نايف : هاو ليش تقول هالحكي .؟!
أبو نايف جلس وهو يمسك راسه : حضرته نايف زوجناه والظاهر معد صارت تعجبه مسؤولياته القديمه !
ام نايف : شصاير ؟!
أبو نايف : اللي صار ان حركات الحريم اللي ماتعجبني صارت تشتغل ! ونايف مو عارف يحكم الوضع .... إبتسام ماهي يم يزيد
ام نايف : بالعكس ! حرام والله دايم تاخذه عندهـا وكل ماشافته جلست معه
ابو نايف : حركات النص كم هذي ماتخدعني !! البنت خذت عقل الولد معد التفت لولـده
أم نايف تنهدت بضيق : ماظنيت هذا غلط ابتسام .. نايف من يومه ماهو يم مسؤولياته
أبو نايف : بكلمه ان شاء الله بس انتي شوفي مرته خليها تستوعب ان عنده ولد هو مسؤول عنه ! وتخلي غيرة الحريم والهبال
تنهدت ام نايف : لاتضايق عمرك ان شاء الله بتهـــون
***
اليــــوم التالي /
غــــادة وقت قاربت الساعة 8 ونص .. انتهت من آخر لمسات المكياج /
كـان شكلها العرايسي بفستانها الروماني الأبيض معطيهـا شكل ثاني .. شعرها الغزالي طلبت من الكوافيرا اللي طلبتها اسماء لها فجأة ترفعه بتسريحة .. رفعته بتسريحة واضح فيها طبيعة شعرها الكيرلي .. مع خصل نزلتها على وجهها بطريقة أنيقة .. مكياجها قررت تلجأ للناعم .. واللون الوردي المخملي غالبا دعمت طلتها بخاتم مرصع بالألماس هديـة " ام فراس " لها وسـوارة ناعمة على اليد الثانية هدية إبتسام .. تنهدت وهي تطـالع نفسها بالمراية .. من نظرتـه لها صارت تصدق انها عادية .. وأقل بينما المراية كانت تنطق أنها فائقة الجمال ..دق جـوالها فتحت عيونها وهي تشوف المتصل .. ردت مباشرة : ألو !
احمد : لا جت حاجتك عند الكلب قول له ياسيدي هاه ؟! والله شي غريب أول مرة تردين علي بسرعة كذا
غادة : كويس انـك عارف انك كلب
أحمد : هيــه انتبهي ! مو تحسبين صرتي حرم فراس ترفعين خشمك ..انا احمد الوحيد اللي تتكلمين معي دون طوالة اللسان ولا منتي عارفة وش ممكن اسوي ؟
طق جرس الشقة ... راحت والسماعة باذنها وهي تنطق : من ؟
ياسمين : أنا ياسمين ... تقولك ماما يله بنروح
غادة : يله حبيبتي ثواني بس البس
جاها صوت احمد : عندك مشـــوار اجل ؟!
غادة صعبية : مايخصك ! بنتي وينـها بكلمها ؟
احمد : وش قلنا عن طوالة اللسان ؟!!!
غادة عضت على شفتها : احمد وش تبغى اللحين ؟! اذا قصدك تحرني بس .. رجاء سكر
احمد : لا جاي اسوي معك صفقة ... تبغين بنتك ؟! من عيوني والله بس لكل شي مقابل
غادة انقبض قلبها .. احمد حيوان طول عمره تفكيره مادي : ........................
احمد : السكوت علامة الرضا .. اجل دام بنتك غالية وتبين تشوفينها ماعندي مشكله لو تخلينها طول العمر عندك بس ابي تسيرين لي راتب شهري على هالخدمة 100 الف .. واي شهر يتأخر هالمبلغ بسحب البنت من يدك
غادة لو بيدها عطته ... بس اللي مايعرفه انها على الحديدة مهما صارت اختها مليونيرة وزوجها هامور : تتاجر بنتك ؟! صدق انك زبالة !
تحـــت :
زفر فراس بعصبية : وينهــــا ذي .؟!!!!
ياسمين : تقول بلبس وبجي
فراس : كل هذا لبس !
ام فراس غمزت لاسمها يعني " قومي " ... وقفت اسماء : بروح اناديها !
فراس وقف : خلك محلك !
وتركهم طالع لفوق ... ام فراس ضربت على خدها بالخفيف : الله يسسستر ... " التفتت لياسمين بعصبية " قلتي لها ان فراس تحت ؟!
ياسمين بخوف : لا ماقلت ...
ام فراس نفخت فيها : شاطرة ! ماتتوصين انتي
دخل فراس مفتاحه وهو يدخل .. عقد حواجبه وهو يحدد مكان همسها بغرفة النوم " غرقانة مكالمات حضرتها ؟! " دخل غرفة النوم وهو يشوفها معطيته ظهرها بقامتها الطويلة وشكلها الجذاب بالفستان وتمشي والسماعة باذنها : نتفاهم بعدين انا لازم اسكر !
وقفت من حركتها وهي تنتبه لانعكاس المراية يعكس لها الشخص الواقف عند الباب وواضح من نظرته " عدم الرضا" لاشعوريا سكرت السماعة مباشرة بربكة ورمته على الكرسي جمبها
رفع فراس حواجبه من حركتها : من كنتي تكلمين .؟!
غادة بلعت ريقها وقشعريرة سرت بجسمها : مو حــاجة ضرورية...
رن جـوالها مرة ثانية .. عضت على شفتها وهي تشوف المتصل " احمد " تو بتلتقط جوالها نطق فراس بهدوء : اتركيه مكانه
مشى بخطـوات كانت مثل الجحيم على غادة ... لحد ماوصل وهو يشوف المتصل التقط جوالها وطالعه لفترة ثم جلس على الكرسي ورجل على رجل وعطاها الجوال : ردي
غادة طالعت الجوال بيده : ارد ؟!
فراس ببرود : ايه ردي .. ليش خايفة كذا ؟
غادة : مو ضروري ... بس كنت اسال عن رنيم وخلاص .." التفتت لشنطتها تبي تخلص من هالموقف "
قاطعها صوته بحده : غاااااااااادة !!!
التفتت غادة برعب .. بينما نطق بتشديد على حروفة : ردي على جوالك
قطع الخط هنـا .. تنهدت غادة بارتياح : قطع الخط ..
فراس باصرار : مو مشكلة فيه خيار اسمه إعادة اتصال
غادة شدت على قبضتها ونطقت بقهر وهي تاخذ جوالها من يده وتدخله شنطتها : مكالماتي مالك علاقة فيها ! واذا ما ابغى اكلم ماراح اكلم
فراس : لو انا منك اعتذرت عشان ما أروح للزيارة مشوهه
غادة التفتت له ونطقت بقهر : ايش تبغاني اكلم احمد له ؟! عشان احر نفسي وانا اسمعه يحرمني من بنتي !!
فراس : بالضبط
غادة عضت على شفتها وهي تقاوم دموعها : انا اسفة .. خلاص رضيت ؟ نقدر نروح تاخرنا
فراس مد يده : هاتي جوالك
غادة : ايش تبغى به ؟!
فراس رفع حاجبه : صايره ردودك واجد .. " احتدت نظرته " هاتي جوالك !
غادة طلعت جوالها وعطته اياه .. انتبهت له يطالع خلفية جوالها ويبتسم بسخرية على المقولة المكتوبة كخلفية
مجنونة حين أحب , وطفلة حين أبكي ,
وكبيرة عندما يتحدثون معي
وضعيفة حين أفقد احدهم !
فراس : لايكون تحكين عن نفسك بس ؟!
غادة : وإذا .؟
فراس رماها بنظرة : كبيرة وقت يحاكونك .؟! وونات البزارين كل يوم والثاني وش وضعها .؟!
غادة عضت على شفتها : وقت تجرب شعور تشتاق لإنسان غالي عليك .. تعال قولي ونات البزران
فراس رماها بنظرة باردة : تو فقستي من البيضة .. لاتتكلمين عن الدنيا كأنك مجربة ! اوك ي نانه ؟
نطقت غادة بهمس مقهورة : ماني نانه !
رن جوالها بمسج ... طالع المرسل " احمد " ( الظاهر انتي حتى لو تزوجتي المليونير براسه بتضلين بنت فقر ) ... بلعت غادة ريقها وهي تشوف نظراته لجوالها ... لما انتبهت لنظراته المتشائمة نطقت بربكة تبرر نفسها خصوصا ان تأمله للجوالها طول : احمد واحد مجنون ... وانا بس كلمته عشان رنيـــم .. وهو رافض يتركني حتى اشوف صورها وتاركها عند زوجته عشان كذا كنت احاول .............
قاطعها صوته : والله فاضية جالسة تشكي لي همومك .؟ بس تدرين شلون ماراح الومك محد في عيشته راضي .. " رمى جوالها عليها " اخلصي انزلي يكفيك تأخير !
غادة بلعت ريقـها وهي ماصدقت الموضوع مر كذا بسلام ... سحبت عبايتها ولبست وهي تـــنزل مباشرة طول الطريق كان صمت ... حتى انها اضطرت تعلق كذا مره لأن اسماء وام فراس يخصونها بالكلام بس كان ساكت ... رغم انها توقعته يعصب كالعادة ..
فور وصولهم كانت طريق الإستقبال راقية بقاعة الأفراح ... وطبقة كاملة من نساء المجتمع الراقي ماعرفتهم ..
همست لها ام فراس لما جلسوا : غادة يمه تعوذتي .؟!
غادة ابتسمت : ايه تعوذت ..
ام فراس : اشوى ... الله يحفظك طالعة ملاك اليوم , وين اسماء .؟
غادة : راحت تتضبط وبتجي
جتهم مباشرة بعد ماخلصت وهي تجلس : ياويل قلبي وانا امشي بس اسمع حكي حساد عن مرة اخونا الله يحفظها
غادة : ههههههه على شنو عاد .؟!
شهقت اسماء : لاتقولين كذا ! والله بحقهم ينقهرون
غادة ماكانت تبالغ كانت فعلا تشوف نفسها اقل من العادية .. كانت تشوف نفسها ملكة جمال قبل تتزوج فراس .. بس فراس حسسها انها شي اقل من العادي : ...............
ام فراس : إلا وين ابتسام ؟ مو شايفتها
غادة بضيق : ماراح تجي .. حملها متعبها مرة وماتقدر
ام فراس : الله يعينها ويسهل عليها يارب
شاركهم بالطاولة أم عبدالمجيد وبناتها ... نطقت ام فراس بحنان : شخبارك ياسجى .؟ زمان عنك وينك ياحافظ ماتنشافين .؟
سجى : موجودة خالتي .. بس انشغلت فترة
: هـــــــــالو !
التفتوا لميهاف وام نايف .. ام نايف خذت ام فراس وام عبدالمجيد مباشرة وراحو يسلمون على الضيوف جلست ميهاف بعد ماسلمت على الكل : وااو غدو ماشاء الله وش هذا تجلطين .؟
اسماء : بالله ميهاف وش رايك بشعرها ؟! ترا انا اللي وصيتها تعمل كذا كنت متاكدة انه بيطلع عليها خبال
ميهاف : اييييييه صح .. ع طاري شعرك صديقتي اخر مرة تسأل عن صبغتك تقول بخاطرها هالتخصيل
غادة ومدحهم يعطيها ثقة دمرها فراس : بجـد .؟! سر حبيبتي اتركينا نتميز
سجى : شدعوه ؟ انا محصله مثلها بالمشغل اللي جمب بيتنا اخر مرة ! حتى رخيصه مب ذيك الغالية
عقدت غادة حواجبها وهي تتأكد ان سجى تكرها .. من نظراتها لها اخر مرة وهي مو مرتاحة واللحين تأكدت .. لكن الدفاع كان موجود .. اسماء بصوتها الحاد : والله حصلتيه بالمشغل اللي جمب بيتكم .؟! ورا ماصبغتيه عشان تعرفين ان اللبس من لبيسه !
سجى : شدعوه اقلدها مو بس هي اللي تعرف تتميز حتى حنا !
اسماء : والله ماعمري شفتك متميزة بشي ... يا صابغه شعرك زي ميهاف ياشارية نفس قلادة هيوف لا والتقليد بعد ! وتبين تتميزين ؟! ضحكتيني والله
غادة اطلقت ضحكة خفيفة دون شعور .. التفتت لها سجى : وش يضحك ؟!
غادة طالعتها باحتقار : اذا الكلام اللي قالته اسماء صدق اجل اعذريني الموضوع يضحك
ميهاف : هاو غدو وانت تشبينها بعد ... عاد اسماء وسجى نعرفهم من زمان مهبل !
اسماء قالت بطريقة تعمدت تقهر فيها سجى : لاااااا انا مكبره عقلي من زمان بس كلش ولا زوجة اخوي هااه .. بعد زوجة بدر حلال عليك بس زوجة فراس حدك ! " كملت بمبالغة " وااااي لو يدري عنك فراس انك زعلتيها سوا لك سالفة .. اخوي قلبه ضعيف مايرضى عليها
غادة ( والله لو يدري بيعزز لها قال مايرضى قال ) : .................
ميهاف : هييييييييييه اسوم وش قصدك زوجة بدر حلال عليها !!
سجى : اللحين فراس صار مايرضى عليها .. وش عدى مابدى ! اللي سمعناه انه ماخذها غصيبة ! حتى زواج زي العالم ماسوا
اسماء : وش قصدك !!! ما اعجبك الزواج ؟! نسوي لك مليون واحد غيره ولا يهمك
وداد : خلاص بنات بزارين انتو .. " التفتت لسجى " سجى قومي عند امي اشغلتينا
غادة نطقت : لا مافيه داعي تاخذ راحتها .. انا خالتي تناديني بروح لها
حاوطتها اسماء من ذراعها : وانا معك !
راحن سوا ونطقت اسماء مباشرة : غدو لايزعلك كلامها .. ع فكرة ترا سجى تحب فراس
فتحت غادة عيونها بدهشه : بجد ؟!
اسماء : ايه وكل العائلة تعرف هالشي عشان كذا هي ترميك بهالتعاليق
لما فكرت غادة استوعبت .. انها من قبل سمعت تعليق من سجى انها تحبه ..ياترى لو متزوج سجى كان عاملها كيف ؟ : ...........................
وصلت عند ام فراس اللي جلست تقدمها للموجودين بفخر والكل ماقاوم ينبهر بجمالها رغم انهم مازالوا يستحقرون فكرة انها مطلقة ..
***
فراس _ بمكتبه /
كان جالس ويقــــلب الورقة بيده ومتسند على يده ... قاطع صفونه جواله رد مباشرة : هلا لؤي
لؤي : ليش حولك هدوء ؟! مو اليوم عزيمتك عند أبو عزام ؟
فراس : ايوه عارف .. بس مارحت
لؤي ماصدق : مارحت ! تستهبل معي ؟ عزيمتك والله تنقد نفسك انت ! الرجال متعني يعزمك
فراس : تدري انا أي عزيمة اسمها .. مبروك فراس العرس وعشاك الليلة عندي .. ما احبها ولا ابي اروح لها
لؤي : مهبول انت .؟!!
فراس : لا ماني مهبول .. لوني اساير هالعزايم وقتها اكون مهبول
لؤي : بس والله عيب !
فراس : تبغاني اروح .؟!
لؤي : ايه طبعا ابغاك تروح
فراس : قوم اجل ادحر الشيطان واحلق والبس امرك قبل اروح
لؤي تنهد بضيق : ماعندي مانع .. بس ابوي ماراح يعجبه وجودي
فراس : براحتك اساسا خل نجلس انا وانت بالهدوء احسن
لؤي : .............................................. بروح اتجهز
فراس : ايه هذا لؤي اللي اعرفه .. اعجل يله انا مسافة الطريق واكون عندك
سكر فراس السمـــاعة ... وسحب جواله يجري مكالمة ثانية بعد صراع : ....................
***
أبو نايف : بـــدر !
التفت له بدر اللي كان يسولف مع مجموعة شباب : هلا عمــي
ابو نايف : وين نايف .؟!
بدر : طلع برا يكلم
هز ابو نايف راسه وهو يطـــلع ... كان نايف متسند على الجدار بمكان هادي بعيد عن ازعاج العزومة ويتكلم بهمس وعلى ثغره ابتسامه توحي بعشقه للطرف الثاني بالمكالمه : ههههههه وهو فيه شي احلى منك .؟! " تنهد " مافيه ولا فيه احد اسعد مني وانتي معي ........... ايوه ماقلتي لي وش صار على موعدك ؟ ......... شفتي مو قلت لك .... ارتاحي انتي وانا ماراح اطول بطلع قبل العشاء
ابو نايف كان يراقبه ونايف بعالم ثاني ما انتبه له نهائي .....: نايف !
التفت له نايف .. ورفع له يده باشارة " لحظة " : راح اجيبه معاي وانا راجع ... تامرين على شي ثاني ؟ " أبتسم " اوكيه
سكر السماعة : هلا يبه ههههههههههه شفيك الله يهداك تشوفني متخشش عشان تلحقني !
ابو نايف باغته مباشرة : متى آخر مرة شفت يزيد ؟!
نايف عقد حواجبه : شالطاري فجأة ؟!
ابو نايف : جااااااااوب انا اسالك !!
نايف بعد تفكير : هممممممم ... قبل اسبوع يمكن ما أذكر بالضبط
أبو نايف : قول الصدق ! انت تحب ولدك ولا نسيت انك تحبه ؟!!!!
نايف : يبه شفيك خرعتني .. ايه طبيعي احبه مو ولدي ؟!
أبو نايف صرخ فيه : وش فايدة حبك له وهو كل ماشاف ولد مع ابوه حسدهم !!
نايف : تكـــلم بوضوع عشان افهم .. انت جالس توجع حلقك اللحين مع واحد واقف مو فاهم شي !
ابو نايف : نهى جتني مكتبي امس ... وتقول انك مقصر على الولد ماتشوفه ولا تصرف عليه !! انتبه ياولدي من كيد الحريم لاتغيرك على ولدك وتخسره
نايف : وش دخــــــــــل ابتسام اللحين ؟!
أبو نايف :شفت ! مادافعت عن اللي قالته نهى بحقك ... تدافع عنها هي اتركها بداهية وشف الولد اللي انجرح من طريقتك معه
نايف : في كل الأحوال ماكان يحق لها تجيك تقولك هالحكي عني ! انا موجود تجي تكلمني ... ولا عشان رفضت رحلة الكشافة البايخة زعلت
ابو نايف : الكشافة انا عطيته فلوسها ومشى امرها خلاص !
نايف بعصبية : تحسبني رافض بخل مني ولا مامعي فلوسها .؟! انا مو مقتنع فيها !! ولا عشان اسم امه مطلقه لازم ينحط بفمه ملعقة ذهب
ابو نايف : كذا تتكلم عن ولدك ! انخرس ولا كلمة ...." رفع اصبعه له بتهديد " والله والله يانايف لو يستمر الوضع كذا بيكون لي ردة فعل ثانية
نايف : تدري شلون ماراح احاول افهمك موقفي .. لأن محد بيفهمك إلا ثنين واحد مر بحالتك ولا احد يحبك .. وانت لا هذا ولا هذا , لاتفوتك نهى رح دافع عنها ..
وطـلع مباشرة وهو يركب سيارته ... ويحركها من المكان , اما ابو نايف رجع للمجلس وقف مصدوم وهو يشوف فراس جالس وبجنبه لؤي اللي كان بكامل أناقته ويسولف ويضحك ... مثل عادته أول , لكزه فراس وهو ياشر لابوه ... وقف لؤي مباشرة وهو يسلم على ابوه ويبوس راسه وخشمه : مساك بالخير يبه
ابو نايف : جيت ؟!
لؤي ابتسم : ضايقك اني جيت .؟!
تنهد ابو نايف بضيق : نتكلم بعدين
وراح يجلس ... رجع لؤي لمكانه جمب فراس وهو يهمس له : تدري انا حاس ان ابوي بيستضعفني عقب هالموقف
فراس : طبعا وقت تجلس مع الرجاجيل ضعيف ماوراك سالفة .. بس وقت تجلس بغرفتك تندب حظك زي الحريم كذا تصير قوي هاه ؟!
لؤي طالعه بنص عين : مو كذا قصدي ... بس هو بيحس اني صرت بخير واقدر استغني
فراس : لؤي ! هالموضوع خله ع جمب ... اللحين خلنا باللي حنا فيه ماتبغى ابوك يغضب عليك !
صوت صاحب المجلس للكل : هلا بالمعرس هلا بأبو فهاد اناشهد انك نورت المجلس والله ... وعقبال كل العزابية ان شاء الله
بدر التفت لفراس : ع طاري فراس ... وش رايك نطلع للمزارع هالأسبوع ؟!
فراس : شالطاري .؟!
بدر : مافيه طاري ... الدراسة بتبدا خل العالم يوسعون صدورهم قبلها " ابتسم " وبعدين خل المدام تشوفها ماتعرفها ترا ... الا اذا ودكم تروحون لحالكم
فراس : قول لأمي .. اذا وافقت فتوكل على الله
بدر : امي سهله من اللحين موافقة !
***
دق نـايف على نهى .. جاه ردها : هــلا
نايف : لا هلا ولا غلا ! وش نظام المبزرة هذي رايحة تشكين لأبوي ؟!
نهى : أيـوه انت ماتركت لي خيار ... مو شايف ان كلامي صح
نايف : وسويتي اللي براسك وراح يزيد ؟!
نهى : أيـــه
نايف : اجل خذيها من الآخر نهى ... لاتكلميني عقب اليوم تقولين يزيد يبغى ولا يزيد سوا ! روحي كلمي أبوي
نهى : وش رايك تتبرا منه احسن ؟!
نايف : ولدي يا أهتم فيه بطريقتي يا انسحب وسوو اللي تبون ! والبيت ياهانم ادفعيه بالتقسيط ولا ضفي عفشك وخلي ابوي يشوف لك مكان ثاني
نهى : شـــنو !؟
نايف : اتوقع انا حذرتك قبل كذا .... مو مسؤوليتي !
نهى : راح نشوف وش راي ابوك بالموضوع ؟!
نايف : الخير واجد بيعطيك بيت من عنده ... بيتي ماعاد ابي اشوفك فيه !
نهى : ماشي ماشي ! راح اوريك يانايف
نايف : يدك وماتعطيك . . . اللي مثلك مايبين بوجههم معروف ولا زفت
سكر السماعة مباشرة .. وهو يوقف عند البيت ويدخل استقبلته ابتسام : هلا حياتي ... جيت بدري , مو ؟!
نايف بقرف : سـدو نفسي ماتعشيت !
ابتسام وهي تستلم غترته منه : سلامات شصاير ؟!
نايف : نهـى داقة على ابوي تشكيني له .. تخيلي جالسة تكذب بنت ابليس تقول مايصرف علينا ولا يشوفنا ! ولا ادهى من هذا كله الا ابوي واقف معها ضدي ؟!
ابتسام : يـــؤ ... يؤ .. كل هذا صاير ؟!
نايف وهو يرمي جسمه على الكنبة بقرف : قفلت معي انا خلاص ! بس انا اوريها بنت الكلب بخليها تذوق الذل كل مرة تحتاج شي
إبتسام : معليش حياتي روق .. وقت تصدمك قلة ذوق شخص هذا دليل على اخلاقك لو انك بمستواها كان صار عادي عندك
نايف : مالي حظ انا ! لا منها ولا من ابوي ولا من امي حتى .. مكلمه تقول ابوك معه حق !
ابتسام : عيب تقول مالك حظ ! انا في حياتك احمد ربك غيرك يدورني دوارة ترا
نايف تنـهد وهو يحاول يتخلص من الطاقة السلبية : ليش مانمتي مو ع اساس تقولين بنام ؟
إبتسام : جاني احساس ان حبيبي بيرجع متضايق قلت اجلس صاحية عشانه
نايف : بالله !؟ كيف عرفتي
إبتسام : قالت لي العصفورة
نايف : تكلمين العصافير وتقولين لي اني اتعاطى منك لله !
إبتسام لكزته : ههههههههههههه وربي انت تتعاطى بس انتظر اكبشك
نايف : من القهر طلعت ماتعشيت .. وبحلت اللحين جويع
إبتسام وقفت : ماتبحل وانا موجودة .. ثواني ويكون العشاء جاهز
لحقها نايف المطبخ : مشتهي روزيتـو .. عاد من يدك شي مجنون
***
وقفت غادة بعد ماخلصت العشاء .. : وين ياعروسة امداك تشبعين .؟!
ام فالح : هههههه اكل عصافير
غادة : هههههههههههه لا شدعـوة والله شبعت اكرمكم الله ماقصرتوا
ام فراس همس لغادة : غدو حبيبتي دام خلصتي .. كلمي فراس قولي حنا خالصين
ميهاف : خالتي تبين نوصلكم معنا .؟! بدر بيجي بيجي
ام فراس : لا شدعوة تقطعون مشوارين .. وفراس اصلن طالع مو بالبيت بيمرنا اكيد
غادة اكربها الطلب .. راحت تغسل انتبهت لسجى جت تغسل : على فكرة .. مابيك تاخذين مقلب ويجي ببالك اني حاسدتك انا من البداية ماطحنتك
غادة سحبت مناديل تمسح يدها : شي راجع لك .
سجى : طبعـا !
غادة : أنك ماتحبيني راجع لك .. بس انك تحترميني لا يعمري هذا واجب عليك ! ماني ملطشه قدامك
سجى : انتي حطيتي نفسك ملطشة .. مو انك تزوجتي فراس تنسين تصرفاتك قبل الزواج !
غادة بقلة صبر : ماراح اتعب نفسي معك .. اخر همي انتي عموما ! بس راقبي كلامك معاي .. اوكيشا ؟!
رن جـوالها .... رمت سجى بنظره وهي ترد وتنطق بدلع : هلا حبيبي ......
ابتسام : غادة ؟!
غادة وهي تضحك بغجر : هههههه وانا ولهانة اكثر ... حنا خلصنا تقدر تجينا ؟!
إبتسام : ياساتر استر .. البنت انهبلت !
سجى تركت المكان لها ... نطقت غادة : ههههههههه اسفة ! بس سالفة طويلة
ابتسام : شتحسين به وش تقولين !
غادة : هههههههههه انسي يابنت ! بعدين اقولك ... الا بغيت اسالك ام زوجك وش عندها ! سالتني عنك وواضح كارهه نفسها وهي تسأل ... حتى يوم قلت لها انك ماراح تجين قالت وليش ماكلفت نفسها تقولي ؟ ولا مو قد المقام ! انصدمت شصاير ؟!
إبتسام تنهدت : سالفة طويلة كمان ... المهم ع بالي رجعتي اكلمك بعدين
غادة : اوكيه حبيبتي باي
بعـد ماخلصت غادة .. طلعت لمكان فاضي وهي تستنشق الهواء ومو عارفة كيف تكلمه بالضبط .. فتحت جـوالها وهنا استوعبت ! رقمه مب عـــندها .... الإحراج كله بهاللحــظة .. لا ومصدقة قدام سجى انها جالسة تغازله بعد .؟!
طلعت وهي تنتبه لأسماء ..: اسوم !
اسماء : هلا
غادة همست لها : تقدرين تدقين على فراس .." حولت نظرتها للرجاء " تكفين ؟!
اسماء احترمت رغبتها : اوك من عيوني
بينما طـلعت ميهاف بهاللحـظة وهي تركب السيارة : السلام !
بدر وهو يحرك السيارة : وعليكم السلام
ميهاف طلعت جـوالها تشتغل عليه .... بدر : كيف العزومة ؟!
ميهاف : ماعليها .
بدر : شفتي امك ؟!
ميهاف : ايه شفتها ولله الحمد
بدر : حمدالله اجل
ميهاف : .............................
بدر : ناقص البيت شي قبل نرجع ؟!
ميهاف : شعرفني ؟! اسأل الطباخ
بدر : ردي زين طيب ليش تزفرين !
ميهاف : كيفي مالي خلق .. ولا ماتدري ان مالي خلق يعني ؟!
بدر : لايكون عشان امس .؟! ماتسوى ترا .. انا اللي مفروض ازعل مو انتي
ميهاف : كمان ؟!
بدر : اندري عنك !
ميهاف : ازعل طيب وش تنتظر ؟!
بدر رفع حواجبه : ميهاف احكي زي العالم ... ماني كومار جمبك !
ميهاف : شوف بدر يا أنا يا أنت ... انا اسلوبك مايعجبني ! وتشدديداتك ع بعض الأمور ماتعجبني ! ولازم نلقى حل ..
بدر : الحل عندك .. خلك مره سنعه زي باقي الحريم ! مو لازم المنافخ والمراد..
ميهاف : وانا شنـــو اللحين ؟!
بدر : خلاص ميهاف اسكتي احسن لي واحسن لك ! لان لو نضل نتعابط للصبح محد فينا راح يقتنع براي الثاني
ميهاف بقهر : يكون احسن ..
***
كانت غادة ساكتة بالسيارة كالعـادة .. وفور وصولهم كان الوقت متأخر فقررت تصعد مباشرة لكن استوقفها صوت اسماء : غااادة ! تعالي لحظة بوريك الفلم اللي قلت لك
غادة : يؤ اللحين .. خلاص وقت نوم
اسماء سحبتها : عن السخـافة خل نسهر خربانة خربانة
ام فراس : ايه اسهري ثم الصبح كدي نوم !
اسماء سحبت غادة من يدها معها : مو مشكلة ماعليه ... يله غدو بسرعة
ام فراس هزت راسها .. التفتت لفراس : بتنام اللحين يمه ؟!
فراس وواضح عليه الإرهاق : مافيه وقت للنوم بيأذن الفجر ... بكمل لي كم شغلة بمكتبي لحد الأذان
عـــند غادة واسماء /
غادة كانت جالسة على الكرسي الفرادي بغرفة اسماء .. بينما اسماء في مهمة بحث عن شريط الفلم ..
غادة : اقول اسماء انتبهتي لنظرات ام جاسم لك ؟!
اسماء : لا مانتبهت !
غادة : هههههههه من جدك وربي تخزك خز .. لا وسألت ميهاف عنك بعد ! ظنك ناوية تخطب ؟!
اسماء ببرود : مدري عنهم اخر همي
غادة : كيف اخر همك من جدك ؟! يعني ماحتوافقين
اسماء عضت على شفاتها ... تنهدت وهي تتذكر اللي قلبها عنده : والله مالي مزاج افكر حتى اللحين
تو غادة بتتكلم رن جوالها ... طلعت جوالها وهي تشوف المتصل " أحمد " استغربت متصل بهالسـاعة ! وقفت : معليش اسوم ثواني بس اكلم وراجعة
طلعت من غرفة اسماء وهي ترد : نعـــم ؟!
احمد : هلا ... شخبارك ام رنيم ؟! بخير ؟!
غادة استغربت مصطلح " ام رنيم " .. استغربت انه يسأل عن احوالها اساسا : وش تبي احمد الوقت متأخر ! ودامك معند على قرارك ما اتوقع بينا حاجة نتكلم فيها
احمد : اا ..... غــاد .. عفوا ام رنيم قصدي انا داق اعتذر لك عن كلامي لك .. مايحق لي اقولك بنت فقر ولا غيره اعذريني اني طلبتك فلوس بعد .... انا بجد آسف سامحيني
غادة فتحت عيونها مب مستوعبة اللي تسمعه : ...................................
احمد : الـو ؟!
غادة : تبغاني اسامحك ؟! هات رنيم ..
احمد : مو بيدي والله .. بس تكفين قولي انك سامحتيني
غادة : انت وراك شي ! من متى تعتذر انت ..؟! قبلها جروحك أكبر ولا اعتذرت !
احمد : عموما انا آسف مرة ثانية واوعدك ما أقلل احترامك بعد كذا ورنيم راح اجيبها بعد بكرة زيارة لك ! يله في امان الله
تو غادة بتتكلم سكــر ... طالعت جوالها بصدمة وهي مو مستوعبة ! احمد يعتذر ؟! ولها !! وبيجيب لها رنيم !!! انشرحت وابتسمت حتى برزت اسنــــانها !! بس كيف كل هالإنقـلاب ؟!! جمعت يدينها لفمها وهي تنطط بحمـاس أول .. طلع فراس من غرفته يستعد للصلاة وانتبه للي تنطط قدام غرفة اسماء والجوال بيدها بفستانها الأبيض وطولها الفارع : .............
رن جواله بمسج .. فتحه وهو يقراه من " احمد المرزوق " ( ايه اعتذرت لها ... رضيت ؟! ) رجع جواله لجيبه وهو يطق باب غرفة انس : أيــوه !
فراس : قـم الصلاة انتظرك تحت !
نـزل لتحت استقبلته امه : صحيت ؟! تو بصعد اصحـيك ؟!
فراس : لا صحيت خلاص .. إلا يمه غتري معد حصلتها ! وش سالفة ملابسي هالأيام ماعاد احصلها !
ام فراس : ملابسك وصيتها لشقتك !
فراس عقد حواجبه : وانا مو قايل توصل لغرفتي ؟!
ام فراس : إلا قلت .. مثل ما انت تتصرف من راسك انا بتصرف من راسي ! ملابسك بوصيها لشقتك تبيها اصعد فوق ... واي شي يخصك بتحصله فوق
فراس : غصب اصعد يعـني ؟!
ام فراس ببرود : والله كيفك ... انا حتى لو يوصلني طرد لك بصعده لفوق
فراس رفع حواجبه : عنـاد فيني يعني ؟!
ام فراس : هذا لمصلحتك .. وبتعرف بعدين
فراس كشر وهو يوقف : سوو اللي تبون ! بكل الأحوال انا بكرة مسافر
ام فراس شهقت : لـــــــــيش !
فراس : عندي شغل ... " نادى بصوت هز البيت " انسسسس وتبــــــــــن !
نقز انس المسكين واالخمس درجات ينزلها بدرجة : سسم جيتك
فراس : كان رقــــــدت وراك احسن !
أنس وهو يركض ويلبس جزمته وهو ينزل يلحق : هذااااني جيت
طـلع مباشرة وهو يرمي عليه كم كلمة يكمل التهزيء ..
عـــند غادة فوق .. تثاوبت : يله اسوم اذن خل نصلي وننام
اسماء : استني بس دقيقة بروح اجيب لك حاجه من غرفة ياسمين بتعجبك !!
ركضت اسماء تجيبها .. ابتسمت غادة وهي تشوفها معنوياتها مرتفع رنيم بتجي .. غير كذا اسماء روقت بها وقفت تتامل تسريحة اسماء بصورها الكثيرة لمراحل اسماء ..
استطرف انتباهها بين الصور صورة لاسماء وهي طفلة بالابتدائي تقريبا وشاب نسخـة من أنس ناعم الملامح .. وسيم كأنه شامي .. ابتسمت غادة : هذا اكيد ابوهم ؟! ... ههههه مايشبه فراس نهائي
عقدت حواجبها وهي تنتبه لصورة ورا الكومدينة ... لما سحبتها تأكدت ظنونا وهي تشوفه ... هذا هيثم ماغيره أكيد !!! على ظهر الصورة مكتـوب خاطرة قصيرة
هجرت بعض احبتي طوعا لأنني !
رأيت قلوبهم تهوى فراقي ..
نعم اشتاق , ولكن وضعت كرامتي فوق اشتياقي
ارغب في وصلهم دوما ولكن !
طريق الذل لا تهوآه ساقي
كبست عيونها مو مستوعبة ! لا الصورة ولا الخاطرة ولا غيـــــــــــــره ... معقولة اللي جالسة افكر فيه صح .؟!
: غادة حصلته هذا هو شو ..... " سكتت وهي تنتبه لغادة مركزة بالصورة اللي بيدها "
بلعت اسماء ريقها وهـي تنتبه لغادة ترفع عيونها لها والصورة بيدهـا : اسماء .... معقولة ؟