[لامارا]

Part 4


نوره ( ام سياف ) : ابي اروح اتقضى للبيت البيت فاضي يصفر
عدنان تنهد : اصبري علي شوي ماعندي الحين
نوره ( ام سياف ) : لا اجل ما راح انتظر بخلي واحد من عيالي يوديني واتقضى
عدنان : اقولك ماعندي فلوس
نوره : مايحتاج هم يدفعون
عدنان ناظرها بحده : انا كم مره قلت لك انا الكبير وانا الي اصرف عليكم وعلى البيت !!
نوره : تراهم كبروا خلاص يشتغلون وماشاء الله رواتبهم عاليه مافيها شي لو تقضينا من عندهم وهم حتى ماعندهم زوجه ولا عيال يصرفون عليهم
عدنان : قلت لك اصبري علي شوي على ماينزل الراتب ( راتب التقاعد ) وبعدها اوديك تتقضين ، ولا تفتحين السيره مره ثانيه
قام عدنان ونوره حطت يدها على خدها بهم وتذكرت قبل ٢٥ سنه ( دخلت نوره لعيالها وشافتهم يذاكرون وكانوا لسى صغار سياف كان عمره ٩ ومشعل ٧ ومحمد ٥
نوره جلست على الكنب : تعالوا ماما ابيكم بشي
جوها عيالها وجلسوا جنبها ومستغربين
نوره مسحت على شعر مشعل الي بجنبها
نوره : انتوا تعرفون أن ابوكم الله يرحمه توفى وانتوا لسى صغار ولازم احد يعطينا فلوس ، صح ماما ؟؟
سياف : خالو يعطينا فلوس
نوره مسحت دمعتها وهي تتذكر كلام اخوانها لها الي همهم الفلوس وماهمهم احد غير الفلوس { : اسمعي في واحد متقدم لك رجال مطلق وماعنده عيال وموافق انه ياخذ عيالك ويصرف عليهم ويربيهم وهذا كرم منه و حنا ردينا عليه بالموافقه واسبوع الجاي ملكتكم خبري عيالك وجهزي ملابسكم وبتملكون وبياخذك زوجك لبيته
نوره وهي تبكي : حرام عليكم توي طالعه من العده وماصار للمرحوم شي من توفى ، وبعدين انا مابي اتزوج بجلس اربي عيالي
: انتي عندك ثلاث عيال من وين بنصرف عليهم مو واحد ولا اثنين ثلاثه حنا عيالنا مو قادرين نصرف عليهم نصرف على عيالك بعد ؟؟ واحمدي ربك أن الرجال راضي ياخذك انتي بعيالك
نوره : مابي لا تغصبوني
: حنا عطينا الرجال كلمه وماراح نردها
نوره : حرام عليكم والله حرام ، طيب خافوا الله في هاليتامى
: قلنا لك الرجال مستعد يصرف عليهم وش تبغين اكثر؟؟ }
نوره : بس لازم أحد يربيكم ولازم اب لكم صح ولا لا ؟؟
سياف : انتي تربينا
نوره : بس انا مقدر اربيكم لحالي وعشان كذا ، انا بتزوج وبيجيكم بابا ثاني غير بابا عبدالعزيز ، بابا عدنان
سياف هز راسه برفض : لا لا مانبي ابو غير ابوي عبدالعزيز مانبي
نوره : لا تخافون تراه مره طيب وحنون ويحبكم
مشعل : بس حنا مانحبه
نوره : بتحبوه
محمد حضنها : اذا هو يحبنا حنا بنحبه اكيد وعادي ماما ، عشان يصير عندنا ابو اثنين ، بابا عبدالعزيز وبابا عدنان
سياف صرخ : ياغبي حنا ماعندنا الا ابو واحد وهو عبدالعزيز ماعندنا غيره ولا نبي غيره
محمد : مالك شغل انا احبه بابا عدنان
نوره : خلاص حبايبي ، اذا ماحبيتوه حنا نرجع هنا ومابنروح له بعد ، وعد ، اتفقنا ؟؟
مشعل وسياف هزوا روسهم برضاء : اتفقنا )
وبعد الزواج صار عدنان يعاملهم معامله حلوه ويخاف عليهم ويجيب لهم الي يبون وعوضهم فقد ابوهم وحبوه وحبهم وبعد زواجهم بسنه حملت بجنات
ووعد نفسه عدنان اول ماتزوج أنه يهتم فيهم ويقوم لهم بدور الاب وان حتى إذا كبروا هو الي يصرف عليهم مو هم الي يصرفون عليه وما ياخذ منهم شي لأنه يكون من حقهم ومن تعبهم وولحينه مايرضى ياخذ من عندهم فلوس
جنات : يمه
لفت لها نوره بعد ماكانت ساهيه : نعم
جنات جلست جنبها بإستغراب : وش فيك ؟!
نوره تنهدت : مافيني شي
جنات : المهم يمه ابي اروح السوق تكفين
نوره ناظرتها بتمعن وبعدها سألتها : عندك فلوس ؟؟
جنات : ايوه عندي المكافأه ماخلصت واصلا تو قبل اسبوع مشعل عطاني
نوره : طيب روحي ، بس ابوك يدري ؟؟
جنات وقفت بفرحه : أيوه قلت له قال لي قولي لأمك
نوره : لحظه ، بتروحي مع مين ؟؟
جنات : صاحبتي منى جايتني وبروح معها
نوره : طيب
ركبت جنات بحماس لبست عباتها ونزلت تركض
محمد سحب طرف الشيله الطايره من ركضها : وين رايحه ؟!
جنات وجعتها رقبتها من شد الشيله على رقبتها : آآآآآآآآه وجع
محمد : توجع الشيطان ، اخلصي وين بتروحين ؟؟
جنات عدلت وقفتها وفكت الشيله ورجعت تلفها : بروح السوق مع صاحبتي
محمد : اي صاحبه ؟؟
جنات : تكفى يعني لو قلت لك بتعرفها
محمد : يمكن
جنات : ماعندي الا وحده ، منى
محمد بمجرد ماسمع اسمها تذكر سالفة امس وضحك
جنات : وش فيك تضحك ؟!
محمد ابتسم : ولا شي
جنات : اعترف
محمد : تذكرت شي صار لي امس انا ومشعل وضحكت
جنات : وشهو ؟!
محمد : وش هاللقافه الي عليك انتي !! انقلعي خويتك ناقعه برى
جنات : واكي لا تقول بس بسأل مشعل وهو بيقول لي
محمد وهو ماشي للصاله ورافع صوته لها : ملقوفه
جلس جنب امه وعقد حواجبه : وين ابوي ؟؟
نوره : مدري عنه ، فتحت معه موضوع وعصب وقام
محمد هز راسه وسكت
كأنه تذكر شي وبسرعه لف لأمه
محمد : يمه لاحظتي على سياف امس شي ؟؟
نوره : شي مثل وشو يعني ؟؟
محمد : مدري ، طيب ماقال لك شي !!
نوره : وش فيه اخوك ؟؟
محمد وهو يدق بالكلام : مافيه شي بس انا الظاهر يتهيأ لي أن كل الناس مخبين مواضيع عني
نوره فهمت عليه بس سوت روحها مو فاهمه
محمد : يمه ماودك نطلع ؟؟
نوره : وين نروح يعني !!
محمد : مدري اي مكان
نوره : مانطلع بدون جنات
محمد : يمه الله يهديك هي طالعه عنك مع خويتها ومستانسه وانتي تحرمين نفسك عشانها ؟!
نوره : وش اسوي بعد !! تعودت ما اطلع الا وهي معي
محمد : طيب قومي نروح لخالتي
نوره : ليه وش طرى على بالك نروح لها
محمد : بس كذا عن الطفش ، قومي يمه
نوره : طيب بس بقول لأبوك اول
قامت نوره تلبس ومحمد ركب يركض يبدل خلص ونزل وشاف امه تو نازله ووجها متغير
محمد : وش فيك ؟؟
نوره : مافيني شي ، يلا مشينا
محمد سكت وطلعوا ومشوا رايحين لبيت خالته

_


سياف شابك يدينه على الطاوله وهو يفكر في سالفته مع صقر ايام الثانوي ويتذكرها " كان عنده صديق هو الي يقولون عنه الصديق الصدوق من متوسط معه ، وفي ثاني ثانوي وجا يوم في الويكند وقاله تعال المكان الفلاني نسهر سوى وتفاجأ لما راح ، شاف شقه مختلطه شباب وبنات وخمر والعياذ بالله
والصدمه الأعظم لما شاف خويه رايح فيها سكران
انتبه له خويه واشر له واتجه لسياف وكان فرحان وهو يرحب بسياف ويقول له أنه ماكان متوقع يجي ومن هالكلام
وبعد ذاك اليوم صار سياف يحاول يبتعد عنه بالتدريج وبدون مايغير معاملته له عشان لا يحسسه انه مو عاجبه الوضع لكن صقر ماتركه في حاله ويعرف انه جالس يبعد بشويش وكان مصر انه يمشي معه في هالطريق
لما حس سياف انه بيستسلم لشهواته راح قال لزوج امه عدنان
عدنان عصب وقوم الدنيا وصار يهدد صقر انه بيقول لأبوه ولما مانفع هدده بالهيئه ولما مانفع راح عدنان وبلغ الهيئه عن الشقه ، لكن بعدين رجع له صقر وقال له أنه ندمان وأنه تاب لربه ومن ذا الكلام وسياف صدقه
لما رجع وثق فيه صار يمشي في المدرسه ويخرب سمعة سياف وكل شي يسويه صقر يقول للناس ان سياف يسويه وأنه انقطع عنه فتره بسبب الي عرفه يعني قلب السالفه على سياف و قالهم سالفته لكن بأسم سياف مب صقر لدرجة أن وصل الكلام لبعض المدرسين والاداره وكانت بتوصل لفصل سياف لولا ان عدنان راح ودافع عنه وطلب استدعاء ولي امر صقر وقاله كل شي عن ولده
وهدد إدارة المدرسه اذا مافصلوا صقر بيشتكي عليهم عند المندوبيه
بعد مافصلوا صقر نقل عدنان سياف لمدرسه ثانيه لأن اختربت سمعة سياف في المدرسه بباطل وعشان يحافظ على سمعة سياف نقله
وفجأه انقطعت اخبار صقر ولا سمعوا عنه شي بعدها
وكان بذيك الفتره البيت كل متكهرب ومتوتر وكان عدنان كل معصب بسبب كثرة تفكيره في ذي السالفه "
رفع رأسه بتنهد ومشى للمطبخ شرب كأس مويه واخذ مفاتيح السياره وجواله رايح لبيت ابو رهف وهو مقرر قراره ورده لها
وصل لبيت اهلها نزل ودق الجرس وفتح له ولد اخوها ، سلم عليه دخل سلم وجلس
طلعت رهف من غرفة العنود وانصدمت من وجود سياف وصار قلبها يدق بقوه وبسرعه ، تغصبت الابتسامه واتجهت لهم
سلمت على سياف وجلست ولفت له بإرتباك
رهف : غريبه تبيني ارجع اليوم ، حتى ماكلمتني قلت لي ، حنا اتفقنا يومين
قالت كذا عشان مايشكون اهلها انهم متزاعلين
سياف ابتسم من ورى قلبه : اشتقت
رهف تدري انه قالها لنفس سببها بس نزلت راسها استحت قدام اهلها
سياف وقف : يلا ؟؟
أبو رهف : وين ؟؟ ماجلست معنا
سياف : بكرى دوام وعلي جلسه من الصبح
.

العنود فتحت الباب بتطلع وانتبهت أن سياف موجود وعلى طول رجعت ودخلت غرفتها
شوي ودخلت عليها رهف
رهف : جا
العنود : ادري شفته ، وش قالك ؟؟
رهف : مدري والله ، ماعرفت اسأله واهلك موجودين
العنود : اجل اكيد انه وافق وعشان كذا جا ياخذك
رهف جلست على السرير : مدري والله ، متردده اقوم اطلع وارجع معه البيت ولا اول شي اخذ رده
العنود : اول شي خذي رده اضمني الموافقه
رهف بحيره : برايك ؟!
العنود : ايوه
طلعت رهف جوالها وارسلت لسياف الي جالس بالسياره ينتظرها
رهف : اول شي وش ردك على الموضوع ؟؟
سياف اول ماشاف رسالتها تنهد ورسل لها : ي بنت الحلال اطلعي الحين ، ونتفاهم في البيت
رهف : قلت لك ما ارجع الا وانت موافق ، ماراح توافق ماراح ارجع ، وانت لسى ما اعطيتني رد
سياف : يعني شفتيني جاي لك وش معناته
رهف طولت بالرد وسياف عرف انها جالسه تفكر وتستوعب كلامه فقفل الجوال وحطه على جنب
.

رهف شافت الرساله مو مستوعبه ، لفت على العنود
رهف : العنود
العنود قربت وهي تنزل راسها للجوال تشوفه : وش قال ؟؟
قرت الرساله العنود ولفت لرهف بفرحه : وافق رهفوه وافقق

رهف ضحكت بفرحه : اخيرا
فزت : بقوم اللبس ، اففف اشتقت له
العنود : تو تقولين ماتجلسين معه ولا تشوفيه والحين تقولين اشتقت له !!
رهف : بس على الاقل اشوفه
العنود : خليك ثقل عاد مو تقولين له بوجهه اشتقت لك ، تغلي عليه شوي
رهف : مو شغلك ، المهم بروح انا بفتك من وجهك اخيرا
العنود : والله انا الي بفتك من وجهك ومن مناشبك لي
ضحكت رهف ولبست بسرعه وطلعت لسياف
مشى سياف بدون مايلف لها ومسوي نفسه زعلان ومابيكلمها
ىهف حست عليه ومسكت يده وهمست : اشتقت لك
سياف من قالت له هالكلمه ماتحمل مايبتسم ولا يلف عليها
سياف : وانا اشتقت لك اكثر ، افتقدتك اليوم الصباح ، وحتى بعد مارجعت ، ماعرفت انام بعد مارجعت من الدوام اليوم وانتي مو فيه ، افتقدتك كثير " مال لها وباس راسها ويده الثانيه على الدركسون " عساني مانحرم منك يارب
رهف فرحت اكثر وابتسمت له : ولا منك " سكتت شوي " بس للحين مصره على الوظيفه ههههههههههه
سياف تنهد بإبتسامه بدون رد
رهف : طيب مافهمت كلامك ، نتفاهم ، الحين انت موافق ولا لا ؟! سياف مارد عليها وعينه على الطريق
رهف : سياف اكلمك
سياف : اذا وصلنا البيت
رهف سكتت ولفت لقدام

_


نوره لفت لراكان : وانت ليه ماتسدد ماخلفاتك ؟؟ ي المخالف !! راكان لف لها بإستغراب : انا ؟؟
محمد ضرب جبهته وهمس : هذا الي بيفضحنا
نوره : ايوه انت
ام راكان : وش تقولين ؟؟
راكان : افاااا !! انا نظامي اصلا
نوره : وتكذب بعد !! اجل عيال خالتك مطلعين مين امس من الحجز ؟؟ ها ؟؟ تكذب بعد
راكان لف لمحمد وهمس له : متى طلعتوني ي الكذابين
محمد بنفس الهمس : سلك لها الله يلعنك سلك ، بعدين بقولك السالفه
راكان رفع حواجبه : لا !! انتوا تسوون بلاوي وتكذبون وتطيحونها على راسي
محمد : سلك لها ي حيوان
راكان انقهر ورجع لف لخالته : خاله ليه تفضحيني قدام زوجتي وامي ي خالتي
منال ( زوجته ) لفت له بإستغراب : اصلا انت ماطلعت من البيت امس
راكان غمز لها وهي فهمت وهزت راسها
منال : ايوه تذكرت ، ليه ماتقول
ام راكان : وانت ، بايع عمرك !! تبي تموت ؟؟ ولا تبي تجيب الفقر لنفسك بسبب المخالفات !!
راكان همس : الله يكنبك انت واخوانك ، تكذبون وانا الي ابلش
محمد ضحك : مانخلى منك يارب
راكان : ايوه عشان تسوون البلاوي وتكذبون وتطيح علي ، اقسم بالله شكلي يوم بفضحكم انت واخوانك ، كل مره وجايه امك تهاوشني وانا اسلك لها ويقومون معها امي وزوجتي
محمد ابتسم : لاننا نحبك مانشوفك الا انت تجي على بالنا سبحان الله ، نحبك
.

وصلوا البيت واستغربوا أن في رجال واقف مع عدنان وعدنان منفعل وباين من وجهه انه متضايق

قربوا منهم ونوره على طول دخلت
محمد وقف جنب عدنان وهو عاقد حواجبه
عدنان ارتبك : مثل ماقلت لك مو الحين يومين بالكثير وانا جايك واجيبهم لك
: بنشوف يومين لو شهرين !!
مشى الرجال ومحمد لف لعدنان
محمد : من ذا يبه ؟!
عدنان : رجال
محمد : وش السالفه وشو الا يومين ؟؟
عدنان لف له ورفع حواجبه : شدخلك
محمد ضحك بإحراج : جبهتي يبه
عدنان هز راسه ودخل
محمد شك وجلس يناظر الطريق وهو يفكر ودخل وراه
شاف امه حاطه يدها على خدها ومتضايقه وابوه جالس جنبها وسرحان يفكر وباين الهم فوجهه
محمد على طول ركب وراح لغرفة مشعل
محمد : مشعل
مشعل : هلا
محمد : تعرف ذا الي جا لأبوي ؟؟
مشعل : مين ؟؟
محمد : في رجال كان واقف مع ابوي وابوي ارتبك لما شافني جيت عندهم وقال له يومين وبيوديهم له والرجال باين انه يطالبه بشي
مشعل : قصدك فلوس ؟؟
محمد : ايوه لان ابوي بعد يومين بيستلم
مشعل : مدري والله
محمد : والي خلاني اشك اكثر أني ما دخلت الا امي وابوي متضايقين ، امي ماكانت متضايقه كذا رجعتنا
مشعل : نسأل امي
محمد : تعرف أمك ماراح تقول
مشعل : نجرب
محمد : المهم جنات جت ؟؟
مشعل : لا
محمد : متأكد ؟؟
مشعل : ايوه
محمد عصب وقام : وانت كيف مادقيت عليها
مشعل : مدري شدراني عاد انا سهيت بقضيه ونسيت سالفتها
محمد طلع جواله بسرعه ودق على جنات
جنات : الو
محمد : حضرتك ليه للحين ماجيتي ؟؟
جنات : جايه قربنا من البيت
محمد : طيب لا تتأخرين
جنات : طيب
سكر محمد وجلس
مشعل لف له : متأكد أن السالفه سالفة فلوس
محمد : اتوقع
مشعل : روح ناد امي
محمد نزل وشاف ابوه مو موجود فركب وناد مشعل
نزلوا محمد ومشعل وجلس مشعل جنبها وحضنها على جنب
مشعل : وش عندها الغاليه متضايقه !!
نوره ابتسمت : ماعندي شي
محمد : يمه محتاجه فلوس ؟؟
نوره ابتسمت : لا حبيبي مو محتاجه
مشعل : طيب وش فيه ابوي ضايق ؟؟ محتاج ؟؟
نوره : لا ماعليكم لا تشغلون بالكم ، يومين وهو مستلم الراتب
محمد : يعني محتاج ، يمه ليه ماتقولون لنا اذا محتاجين ؟؟
مشعل : يمه والله عيب حنا عندنا فلوس تكفينا وزياده وجيوبنا مليانه ويطلع الشهر وللحينه الراتب ماخلص وانتم ماعندكم
نوره : ابوكم مو مقصر علينا بشي الحمدلله بس هذا الشهر شوي مضغوطين
محمد : يمه كل شهر هذا كلامك
مشعل طلع محفظته واعطى امه ٥٠٠٠
مشعل : خذي يمه
نوره : مابي
مشعل : يمه خذيها تراها من ولدك مو احد غريب
محمد : يمه لا تعاندين وخذيها
نوره : مايحتاج خلها عندك
محمد : يمه مو عيب علينا عندنا ولا نعطيك ؟؟
نوره : تو عاطيني سياف بداية الشهر

محمد بعتب : وشو يمه يعني تاخذين من عند سياف وحنا ماتخذين ، ماتبي من عندنا شي يعني ؟؟
نوره : مو كذا بس سياف عطاني قبلكم ومايحتاج اخذ من عندكم المبلغ الي اعطاني ياه سياف يكفي
مشعل : حتى لو ، مننا ورايح اذا اعطيناك فلوس ماتقولين لا
محمد بجديه : يمه ابوي مايرضى تاخذين من عندنا صح ؟؟ نوره تفاجأت وانربط لسانها : لا عادي ، وش هالتفكير ؟! مشعل : يمه ترانا من زمان ملاحظين ، من اول ماتوظفنا كنا ملاحظين انك ماترضين تاخذين من عندنا ، لو جنات تعطيك عادي بس حنا لا ، ليه ؟؟
محمد : صح كلامه يمه ، ماتوقع منك اتوقع من ابوي هو الي رافض تاخذين منا
نوره سكتت ماعندها رد على كلامهم
مشعل : يعني يمه كلامنا صحيح ، ابوي مايرضى
نوره : هو مو سالفة أن مايبيني اخذ من عندكم بس مدري ليه ، حتى لو سألته مايجاوب علي
محمد : انا بكلمه
نوره : لا لا تكلمه
مشعل : لا بنكلمه ، يمه شوفي والله عيب علينا عندنا ولا نعطيكم وحنا ندري انكم محتاجين ، وندري أن الي جا اليوم جاي يطالب ابوي بفلوس ، من تقاعد وابوي هذي حالته
نوره : لا تكلموه مايحتاج قلت لكم بعد يومين بيستلم
محمد : حنا مابنتكلم معه عشان اليوم حنا بنتكلم عموما كل ذي السنوات الي طافت وهو يحتاج ولا يرضى نعطيه ولا نعطيك
مشعل : يمه ابوي ما يدري اننا نعطي جنات بعد صح ؟؟
نوره سكتت
محمد صد وهو متضايق مايدري ليش زوج امه يتصرف كذا مع أنه يحبهم ويعاملهم زين ويخاف عليهم بس اذا جت على الفلوس يرفض
مشعل : بكرى بنكلمه بعد مانرجع من الدوام
نوره : لا تتكلمون له لا تسوون مشاكل
مشعل : لا حنا لازم نواجهه عشان نعرف ليه اذا كانت السالفه فيها فلوس يرفض ، حنا ننحرج اذا شفناكم بهذا الوضع ولا ترضون تأخذون من عندنا شي
نوره : لا تنحرجون ولا شي ، خلاص سكروا الموضوع ولا تفتحونه
ما اعطتهم مجال يردون وبسرعه قامت وركبت مع زوجها
محمد لف لمشعل : انا بكلمه بكرى ، متى ترجع انت ؟؟
مشعل : ٤ او ٥ العصر
محمد : زين يعني اكون موجود
شوي ووصلت جنات وركبوا ينامون


_


انتهى
▶