Part 7
سامي مد لعبدالله ٥٠ ريال
سامي : خذ
عبدالله : الرحله بس بثلاثين
سامي : خل الباقي لك
عبدالله انحرج من اخوه : طيب شكرا
طلع عبدالله وضحك سامي عليه من احراجه
ريناد : متى بتجي ؟؟
سامي : ليه ؟؟
ريناد : اليوم موعد ابوي عند دكتور المخ والاعصاب
سامي عقد حجاجه : يوووووه كنت ناسي والله ، متى الموعد ؟؟
ريناد : الساعه ١٠ الصبح
سامي : خلاص استأذن من الدوام واجيكم ، ودقي علي ذكريني لأني انسى
ريناد : طيب
_
سياف دخل المكتب بإبتسامه وهو حاط يدينه على رهف من اكتافها من وراها : استاذه فداء هذي زوجتي رهف ، رهف ذي سكرتيرتي فداء
فداء مدت يدها لرهف بإبتسامه : تشرفت
رهف ابتسمت وفرحت انها محتشمه ومحترمه ولا كان قلبت المكتب على راس سياف
سلمت عليها : الشرف لي
سياف : طبعا خلاص الحين بتستلمك فداء وبتعلمك طبيعة الشغل لمدة أسبوع واذا حسيتك تعودتي بتباشري فيه
رهف اخذت نفس بإبتسامه : طيب
سياف ابتسم لها : يلا بالتوفيق
دخل سياف المكتب ولفت فداء لرهف
فداء : تفضلي ، اول شي بعلمك المتطلبات من المخزن حسب نوع كل مشروع وبعدها بعلمك كيف تتعاملين مع اصحاب المشاريع الي تعاملهم وذوقهم وافكارهم صعبه ، لان بيمرون عليك كثير
رهف هزت راسها : اوكي
راحوا للمخازن الي في المبنى الي جنب مبنى مؤسستهم وصارت فداء تعلمها ورهف كانت متحمسه كثير للشغل ولمعرفة طبيعته فصارت تتعلم بسرعه
.
اخر الدوام
طلع سياف وشاف فداء ورهف يسولفون
سياف : احححححمم
لفوا له ووقفوا
سياف ابتسم : ماشاء الله اندمجتوا مع بعض
فداء : ماشاء الله استاذه رهف عسل واسلوبها حلو
سياف طالع رهف بإبتسامه وثقه : عارف
رهف ضحكت بخجل وصدت
فداء ابتسمت : الله يسعدكم يارب
سياف : امين ، ها كيف شفتي رهف ؟؟
فداء : لا بسرعه تعلمت وطلعت عارفه لبعض الشغلات
سياف : كويس ، يلا يعطيك العافيه
فداء : الله يعافيك
مشوا سياف ورهف بعد ماودعوا فداء
رهف لفت لسياف : وجع احرجتني قدام البنت
سياف مسك يدها : زوجتي ومن حقي امدحها
رهف سحبت يدها : ماتنحرج تسوي كذا لزوجتك قدام موظفينك ؟؟
سياف : مو عيب
رهف : بس انت مديرهم يعني خلك هيبه قدامهم
سياف رجع مسك يدها : يصير خير ونزلي شيلتك على عيونك ، عيونك تبين
نزلت رهف شيلتها اكثر على عيونها وهي تلف لسياف : لا تدقق عاد الحين
سياف : المهم بكرى بروح معك اخذ لك عباية كتف اريح لشغل مابتعرفين تشتغلين بعباية الراس ، وبعدين بنروح بيت جدي للعزا ، لازم تروحين امس مارحتي
رهف : طيب
راحوا للبيت وبدلوا واتجهوا بعدها لبيت جده
بعد اسبوع
صار سامي كل بين يومين يطلب من جنات فلوس وهي تضطر تحول له خوف من انه ينشر الصور وكل ماتقول بتعلم اخوها محمد تتردد وتهون او منى تقولها انه راح يعصب ويحط الغلط عليها
.
عدنان وجنات ونوره كل يوم يروحون العزا عزا العصر وعزا الليل
.
رهف وسياف صاروا يطلعون بنص الدوام العصر عشان يروحون العزا لانه جد سياف مو واحد غريب او واحد حي الله قريب
.
مشعل ومحمد ناموا ذا الاسبوع كله في بيت جدهم وكان عدنان ونوره وجنات مره مفتقدينهم بقوه ويتمنون انهم يرجعون يسكنون معهم
.
الهنوف ابد مو متقبله أن عيال عمها يعيشون معهم ومو مصبرها الا انهم بس ذا الاسبوع وبيرجعون بيت امهم الا اذا غيروا رايهم
ولما اعترضت هزئوها عمامها وابوها وقالوا لها أن هذا بيت جدهم وبيتهم ، وهي معترضه اكثر لان هي وخواتها مو ماخذين راحتهم لان غرفهم قريبه من الغرف الي ينامون فيها محمد ومشعل
ومحمد ومشعل كذا مره سمعوا حلطمتها واعتراضها على سكنهم هنا بس مطنشينها
.
ناديه وخواتها واخوانها مره فرحانين لان احتمال محمد ومشعل يعيشون في بيت جدهم وما حسوا بندم تجاههم وانهم هدولا عيال المرحوم ويشوفون اخوهم فيه ويتذكرونه كل ماشافوهم الا لما توفى ابوهم ( جد محمد واخوانه )
_
محمد ومشعل وسياف كانوا جالسين بالصاله الي فيها عماتهم وعمومهم والشباب كلهم
العم محمد : ها ي محمد ومشعل وش قررتوا ؟؟
مشعل ناظر محمد ومحمد هز راسه له ولف مشعل لعمه
مشعل : والله ياعمي حنا مانبي نعيد غلطتنا لجدنا ابتعدنا عنه ولما توفى ندمنا وتمنينا لو عشنا معه
بس بنفس الوقت امي متعوده علينا وماتقدر الام تعيش بعيده عن عيالها وخصوصا إن كانوا عزاب ومافي مبرر أنهم يطلعون من البيت
وزوج امي اعتبرناه اب لنا وولا يوم حسسنا أننا عيال زوجته موب عياله ووالله أنه يتمنى نرجع البيت معه وحنا متعودين عليه ومشتاقين له
وعندنا اخت مالها اخوان غيرنا وتحتاجنا ومتعلقه فينا كثير مانقدر نتركهها وتحس بفراغ خصوصا انها ماعندها لا اخوان ولا خوات يونسونها في غيابنا
عمامهم وعماتهم من مقدمتهم ذي يأسوا انهم يعيشون معهم وعرفوا انهم بيرجعون بيت زوج امهم
محمد : عشان كذا حنا قررنا أننا نعيش في البيتين
الكل علامة استفهام كبيره على وجوههم كيف يعني يعيشون في البيتين
ناديه : مافهمنا !!
محمد : يعني اننا نجلس هنا اسبوع ونجلس في بيت ابوي الي هو زوج امي اسبوع
مشعل : هو صح بيكون في البدايه صعب كيف أننا كل اسبوع نتنقل بس حنا خلاص ، بنجيب اغراضنا هنا بننقلهم ، نص هنا ونص هناك وولا نشيل ولا نحط بعدين لا جينا بنجي هنا او بنروح هناك
محمد : وطبعا معروف أن الي يجمع العائله هو الكبير والكبير راح ، وبعد ماكانت جيتنا لجدنا الحين جيتنا ماعاد لها لازم ، وحنا مانبي تنقطع علاقتنا فيكم بالعكس نبي نقويها ، مانبي الغلطه الي سويناها في حياة جدنا نعيدها
العم محمد ابتسم : زين ما سويتوا
لف لسياف : وانت ياسياف لاتقطع ، كل اسبوع يوم الجمعه جمعتنا هنا في بيت جدك تعال و واصلنا ، وانتم يامشعل ومحمد حتى في الاسبوع الي تروحون فيه لبيت امكم تجون يوم الجمعه
سياف هز راسه : أن شاء الله
ناديه : يعني الحين بترجعون بيت امكم ؟؟
مشعل : ايوه ، أن شاء الله اسبوع الجاي نلتقي
ناديه بحزن : والله تعودت عليكم وبفقدكم ذا الاسبوع
محمد ابتسم لها : أن شاء الله كل يوم نمرك
ناديه ابتسمت له : ي قلب عمتك
.
بآخر المجلس
رعد ( ولد عمهم صالح ) رافع حاجب وببقرف : شوف شوف ي كرهي لهم ، مابلعتهم ابد ، شايفين نفسهم مدري على وش ، بالذات ذا الي اسمه مشعل
خالد بضحكه : انت من سمعت عن شغلة كل واحد منهم كرهتهم ، مدري ليه غاير ، لو اجتهدت بدراستك كان صرت بنفس مرتبتهم
رعد بغرور : ليه وش قالوا لك بنت اغار عشان شغلتهم ؟؟ عساهم لو كانوا وزراء شدخلني فيهم ؟؟
الشباب كلهم ضحكوا لانهم يعرفون رعد هو المغرور والي شايف نفسه ويغار كثير من الي اعلى منه مستوى كل يحس ان الناس اقل منه ومحد قده
وكلهم الشباب حسوا أن عيال عمهم عبدالعزيز الله يرحمه حبوبين وخفيفين دم ومو شايفين نفسهم زي ماقال رعد
عبدالعزيز سمي خاله ( ولد عمتهم عبير ) : ي عيال قوموا نجلس مع عيال خالي
كلهم قاموا وراحوا جلسوا مع سياف وأخوانه وبداوا يسولفون واندمجوا مع بعض بسرعه
_
سامي : ماعندك صور لها غير ؟؟ زهقت من الصور الي عندي
ريم : لحظه برسل لك صوره وهي في زواج
سامي ضحك : ي لبى ، متأكده صورة جنات !!
ريم : ايوه متأكده دقيقه بس وتوصلك ، بس للحين ما اعطيتني المقابل
سامي : وانا من وين لي ؟؟ اصبري اليوم بخليها تحول لي وبعطيك
ريم : ابي النص
سامي بإنفعال : لا ما اتفقنا على كذا
ريم : يا حبيبي انا اجيب لك البنات وارقامهم وحساباتها وصورهم وكل شي عنهم كني مخابرات بمبلغ بسيط بالمره ، وترى غيري ياخذون عليك الضعف ، عجبك عجبك ماعجبك في واحد بيبني اتعامل معه ، اذا ما اعطيتني النص بروح له
سامي بقهر : طيب بعطيك بس تحول لي بالاول
ريم برضى : ايوه الحين توصلك الصوره
سامي سكر وهو منقهر منها بس لما شاف الصوره نسى القهر كله وجلس يدعي لريم
سامي : ي لبيييييييه ، اي والله لو مليون بنت تكشخت مابتتكشخ مثلك ، عساها لو تاخذ الفلوس كلها تستاهل على الصور الي تعطيني اياها ، خلني ازيد المعيار هالمره هذي الصوره مو عاديه مثل كل صوره فتناسب شي ثقيل
كانت صورة جنات بزواج ولد خالها وكانت لابسه فستان لنص الفخذ وكان ضاغط عليها ولونه كحلي ويبرق من بعيد ولابسه كعب اسود وكانت مخليه شعرها ويڤي وهو طويل يوصل لنص الظهر وكانت حاطه لها مكياج ثقيل
كانت مصوره شكلها كامل من المرايا وارسلته للسته الي عندها وكاتبه عالصوره ( ماتقدرون تكشخون زيي 😉 )
سامي ارسل لها : شرايك نتقابل في****** يوم الجمعه ؟؟
.
جنات شافت الرساله ورفعت حجاجها بقهر وارسلت له
{ : خير ان شاء الله كأنك مصختها
سامي ارسل لها الصوره : طيب شرايك بذي الصوره ؟؟ اكيد الكل يبغاها ويتمناها 😉
جنات فتحتها ومن شافتها انقهرت وجلست تبكي : ياحقير امسحها
سامي : لا لا مايصير امسحها لان قلبي بيوجعني عليها
جنات : بعطيك الي تبغى بس احذفهم والله سمعتي بتروح فيها
سامي : لا تستعجلين على الي أبغاه جايك في الكلام ، الحين ابغى نتقابل يوم الجمعه في***** ، اما الحين ابي منك ٤٠٠٠ الاف
جنات طلعت عيونها من المبلغ ومن الطلب لانها اكيد بتروح مجبوره
جنات كتبت له بذل : طيب }
سكرت جنات المحادثه وهي تسبه وتدعي عليه ، دقت على محمد وتحس نفسها بتموت من القهر
.
محمد كان جالس مع عيال عمومه وعماته ودق جواله ، طلعه ( جناتيي ❤ يتصل بك )
انسحب منهم وطلع يكلمها
محمد : هلا جنون
جنات حاولت تعدل صوتها : احححم اهلين
محمد عقد حجاجه : فيك شي ؟؟
جنات : لا بس " سكتت بخجل "
محمد : تبين فلوس ؟!
جنات : ايوه
محمد بإستغراب : وش صاير لك هالاسبوع كل تطلبين فلوس ، مو عادتك ، طيب كم تبين ؟؟
جنات عضت على شفايفها بفشله وتحس نفسها بتبكي : خلاص ولا شي انسى
محمد : اقول مسويه تستحين ، كل الخلق تستحي الا انتي ، كم تبين ؟؟
جنات : شقصدك ؟!
محمد ضحك : ولا شي كم تبين الحين ؟؟
جنات نطقتها بصعوبه وبعد خمس ثواني : الفين
محمد طارت عيونه وهو خايف ذي ثالث مره ذا الاسبوع تطلب فلوس وبالآف بعد هي كانت اذا تطلب مره يعطيها ٥٠٠ وتكفيها لشهر ونص والحين ذي ثالث مره وكل تطلب بالآلاف : جنات فيك شي ؟! محتاجه شي ؟؟
جنات نزلت دموعها بقهر وهي تحس انها منذله ، تعرف ان اخوها لو تطلب عيونه عطاها بس هو مستحيل يعطيها مبلغ كبير بدون مايسألها تبيه لأيش فما بالك ثلاث مرات تطلبه مبلغ كبير : لا ، بس ابي اشتري هديه لصاحبتي وماعندي فلوس كفايه
محمد شك بكلامها بس سكت مايبي يحرجها : طيب بعد شوي بحول لك
جنات بسرعه : لا الحين " حست لنفسها وتكلمت بهدوء " يعني أقصد أن ضروري لان بعد ساعه بنسوي لها العيد ميلاد
محمد : طيب اوكي الحين اروح احول لك
جنات بإحراج : مشكور والله يغنيك ، تعبتك معي
محمد ضحك : ماعرفتك والله ، اقول بلا هالكلام الفاضي بس مسويه تنحرج
دخل لهم
محمد : استأذن
ناصر : وين ؟ تو الناس
محمد : معليش بس اختي تبيني بشغله ضروريه ، يلا اشوفكم على خير
مشعل عقد حجاجه وقام له وقرب منه : وش فيها جنات ؟؟ سياف جالس من بعيد يراقبهم بس مايدري وش يقولون
محمد : مافيها شي ، ليه ؟؟
مشعل : انت تقول تبيك بشغله ضروريه
محمد : تبيني احول لها فلوس بس
مشعل ارتاح : اها ، تمام
رجع جلس مشعل جنب سياف ولف له سياف
سياف : وش فيها جنات ؟؟
مشعل : مافيها شي بس يقول تبيه يحول لها فلوس
سياف هز راسه وصد
رعد لعبدالعزيز : شوف كيف خايفين على اختهم ، مدري هي بتطير ولا بتطير !!
عبدالعزيز لف له بمفاجأة : شدخلك طيب ، اختهم وخايفين عليها ، تفكر كل الناس زيك خواتك ولا كأن عندهم اخو !!
رعد جلس يتلفت للشباب الي لفوا لهم يطالعوهم من انفعال عبدالعزيز وصوته العالي له
رعد لف له بقهر وهمس : طيب قصر صوتك لا يسمعون
عبدالعزيز بنرفزه وبطرف عينه : تراك تقهر
صد عبدالعزيز وهو يحرك راسه بعدم حيله لولد خاله الي مستحيل يتغير طبعه
.
راح محمد للبنك وحول الفين لجنات ورجع بيت جده يجلس ولما مشى الكل سلموا على عمهم سعيد وعمتهم ناديه وراحوا ثلاثتهم لبيت امهم
_
في السياره
سياف لف لرهف : كيف شفتي بنات عماتي وعمومي ؟؟
رهف هزت راسها : امممممم كويسين بس بعضهم فيهم غرور ، كنت متمنية تكون جنات معي
سياف : ان شاء الله الاسبوع الجاي اخلي مشعل ومحمد يجيبوها معهم ، طيب عماتي كيف معاملتهم لك ؟؟
رهف : مره طيبين صراحه واستقبلوني احلى استقبال ، احس معاملتهم لي احسن من لما كننا نروح لهم ايام العزا
سياف تنهد : اكيد لان كانت نفسياتهم تعبانه اما الحين تحسين أن الجمره خفت وصغرت المصيبه
رهف همست : الله يرحمه ويغفر له ويصبرهم
سياف بنفس الهمس : آمين
وصلوا البيت مع بعض ودخلوا سوا
محمد فتح باب الصاله بقوه وصرخ
محمد : هاااااااااااااي ي اهل البيت
محمد لف لاخوانه : بسم الله شفيه البيت كأنه مهجور
تو خاتم كلامه على نزلة امهم السريعه
سلموا على امهم وجلسوا
محمد : يوووووووه ي المغبره كح كح كح صار لي اسبوع ماشفتك ، بعدي شوي " دف امه بخفه بيده وحط يده على فمه " كح كح
نوره ضربت كتفه وهي تضحك : اعقل
مشعل وهو يحرك حجاجه بإبتسامه : عاد ذا الاسبوع بننام معكم
نوره تغير وجهها : وش قصدك بكلمة ذا الاسبوع ؟!
مشعل تنهد وجلسوا يناظرون بعض هو وأخوانه
رهف تنحنت لما شافت الموضوع شكله خاص : عمه وين جنات ؟؟
نوره : بغرفتها
ركبت رهف لجنات ومحمد اخذ نفس وقال لأمه بالقرار الي قرروه هو واخوه
نوره تضايقت وقامت على طول
محمد مسك يدها : يمه اجلسي
نوره سحبت يدها وبتمشي بس قام سياف ومسكها وجلسها
مشعل : يمه اسمعينا بالاول ، ترى حتى هم اهلنا ، وحنا مانبي نستمر بالقطاعه هذي صلة رحم ، وترى عمتي ناديه شالتنا على راسها الاسبوع الي طاف وعمامي وعماتي مره كانوا فرحانين بالقرار الي اتخذناه
نوره بحده : اكيد لأن جدكم كتب اسمكم ضمن الورثه وعشان كذا يبونكم تقربون منهم
سياف : يمه وش هالتفكير !! هو لو صحيح كلامك كان تكلموا عمامي لكن محد منهم تكلم
محمد : بعدين ولو كان كلامك صحيح ، حنا مو مراهقين عشان يتقربون مننا عشان ياخذون ورثنا اذا كان حاطنا جدي ضمن الورثه
مشعل : يمه دائما بكلامك تحسسينا انا صغار والكل بيلعب علينا ومانعرف نتخذ قرارات واي واحد يقدر يتحكم فينا ، ترى يمه خلاص كبرنا ، كل واحد مننا عدا الثلاثين
نوره بدمعه عالقه ع طرف عينها : لاني اشوفكم بعيوني لسى صغار ، لو كبرتوا مليون سنه وصرتوا جدود بتظلون في عيني عيالي الصغار الي مايكبرون
سياف حضنها : الله يخليك لنا يمه ولا يحرمنا منك
نوره باسته : ولا يحرمني منكم
محمد : يمه حنا اخذنا قرارنا وخلاص قررنا
نوره تنهدت بضيق : بكفيكم ، هدولا اهلكم بعد ماقدر اقول شي لكم
مشعل جلس جنبها ومسك يدها وباسها : يمه لا تخافين كل يوم بنزورك في الاسبوع الي نكون فيه في بيت جدي
محمد : اي صح تخيلي يمه طلع عمي سعيد عنده عيال كبار بنت وولد متزوجين ووحده مبتعثه
مشعل بتكشيره : بنته المبتعثه ي انها غثيثه
محمد بتأييد : اي والله ، ووقحه
نوره ضحكت : اي الهنوف ، ليه ؟؟
مشعل مايبي يقول لأمه ليش حكموا عليها ذا الحكم عشان لا تمسك النقطه لصالحها وتقول مايبونكم لا تروحون او مايصير تسكنون مع بنات ومن ذا الكلام
مشعل : مدري اسلوبها
نوره : لا والله ، والله ان البنت عسل
محمد : الا صح يمه ، ليه لما كانت تكلمك عمتي ناديه ماتعطيها ارقامنا ؟؟
نوره تغير وجهها وسكتت وانتبهت أن عيالها كلهم يترقبون الاجابه
نوره نزلت عينها ليدها : لاني كنت خايفه ذا اليوم يجي ، لاني كنت اعرف ان عمتكم ناديه تحبكم كثير وتموت عليكم من لما كنتوا صغار هي الوحيده من اهل ابوكم الي كانت كل تتواصل معي وتسأل عنكم وبعد وفاة ابوكم بشهر صاروا عمامكم وعماتكم كل يجونكم وبعدين قطعوا الا هي بس بعد زواجي ماصارت تجي واكتفت انها تتصل كل يوم تسأل عنكم ولما كبرتوا خفت اعطيها ارقامكم وتطلب منكم ذا الطلب وكنتوا كل ماقلتوا بتروحون لجدكم ينغزني قلبي اخاف تروحون وماترجعون الا وانتوا جايبين لي خبر سكنكم في بيت جدكم وكنت عارفه أن ناديه مابتسكت عن ذي السيره كثير ، وصحيح جا ذا اليوم الي كنت خايفه منه
محمد قرب منها وحضنها وحب راسها : لا تخافين ماراح نترككم ولانترك البيت ، حنا سويناها كذا عشان لا نترك ذا ولا نترك ذا ، في الاسبوع الي في بيت جدي كل يوم نجيكم ، وفي الاسبوع الي هنا كل يوم نمر بيت جدي نشوفهم
_
انتهى
⏮