[لامارا]

\\


روايتي الأولى:"خليك مثل اللي يزرع مكان الجرح ورده
لآ تكون للجرح جرح"
بقلمي/smtalklam7
لا اُحلل نقلها دون ذكر اسمي..
ملاحظه:اي كلام ينتهي بالعلامه(*) منقول
واي كلام ينتهي بالعلامه(#)من كتاباتي..

(..الـبــارت الأول..)

يتعرّض الكثير من الأشخاص إلى مواقف عديدة قد تُصيبهم بالجرح والحزن، وهذه المواقف تؤثّر عليهم وتبقى محفورةً في ذاكرتهم مهما تقدّم بهم الزمن..

من هنـا من العاصمه (الـريـاض)
الساعه11:35م تبتدي اوول فصـول روايـتـي..
ببيت العم خالد على ذاك الكرسي الطويل الموجود بأحد أركان زوايا الحوش جالسه وبيدهاكتابها تدرس فيه
‏
سكرت الكتاب اللي بيدها ورجعت رآسها للخلف غمضت عيونها ورجعت فيها الذاكره
الى ورى قبل سنتين وست شهور



"ببيت الجـد الساعه 4ونص العصر

كان البيت يعم بالفوضى وكل واحد يبي يبدي رآيه بالولد اللي فضحهم ونزل سمعتهم بالأرض
العم احمد بصوت عالي مشحون بالغضب/هذا اخر المعروف ياراكان كذا تسوي فينا عقب ماربيناك وكبرناك ياقليل الخاتمه ويتفل عند رجوله..
العم فهد بعصبيه/اسكت ياااحمد خلنا نسمع من الولد يلف لراكان اللي كان واقف قريب من جده/تكلم يابوك برر لنا وش صار؟وليش القضيه عليك؟
راكان بصوت باين فيه القهر/والله ياعمي انه ماهو انا انهم ظالميني انتم اعرف فيني....
قاطعه جده بكف و بعصبيه/اسكت لابارك الله فيك من ولد قالوا للحرام احلف قال جاني الفرج يعني تبينا نصدقك ونكذب الدوله انقلع حنا بريين منك ليوم الحساب..

راكان يقوم طالع وهو منقهر/مشكور يُبه كذب تربيتك وصدق الغير ويآشر بآصبعه على الحاضرين كلهم ثم نطق بغضب/والله ثم والله لتندمون كلكم وقولوا راكان ماقال..يمشي بخطوات سريعه صوب الحرمه الكبيره بالسن المتلثمه بملفعها باس رآسها ويديها/يمه مزنه لاتصدقين والله لاثبت برائتي بس تكفيين لاتصدقينهم صدقيني انا ولدك راكان..يبتعد مسرع لأمه يبوس رآسها ورجولهاويضم كفوفها بين كفوفه/يمه تكفيين كوني بخير انتي وخواتي انا راجع لكم بإذن الله..لف يبي يودع خواته..
بس كف ضخمه مسكت بيده وجرته معه لبرا البيت /انقلع لابارك الله فيك رفعت ضغط ابوي اذلف لاشوفك توطوط عندنا يالحرامي..
لف لعمه احمد وهو يحاول يبلع كلامه اللي مثل السم على قلبه/مشكور عمي ماقصرت ويلف طالع برا البيت..
سند رآسه على باب سيارته وزفر بضيق ونطق بصوت مغبون/آه.. ماحس الا على صوت عمه فهد/سلامتك يابوك من الآه اناوالكل مصدقينك بس ابوي واحمد اللي ماصدقوا صدقني فتره وراح يفهمون كل شئ..
راكان يبوس رآس عمه/مايخالف عمي بس انا مضطر اروح دام جدي طاردني..
العم فهد/تعال عندي يابوك والا ببيت ابوك..قاطعه الرجل المسن الواقف على عصاته عند الباب/والله ثم والله يافهد لو تخليه عندك والله لاغضب عليك ليوم الدينن..وانت للحين قاعد هنا ليش ماتذلف لابارك الله فيك.
راكان يطلع المفتاح من جيب ثوبه ويحطه بيد عمه فهد/امانه هالمفتاح حطه بيد عمي احمد واشكره بالنيابه عني وتكفى ياعم امي وخواتي برقبتك.
العم فهد يكف يده/خذ المفتاح وامك وخواتك لاتشيل همهن بالحفظ والصون ..
راكان/اقسم بالله مااخذ ولاشئ من حلاله وحلال ابوه..
العم فهد يطلع مفتاح سياره من جيبه/اجل خذ سيارتي وانتبه لنفسك وطمني عليك..
راكان/لا عمي مستحيل والله مااخذه.........
العم فهد قاطعه/والله لوماتأخذها لازعل منك وهذا اقل شئ اسويه لك..
راكان يبوس رآس عمه/بوداعة الله ياعم وامي وخواتي امانه عندك..
العم فهد/الله حافظك يابوي.."

فتحت عيونها على صوت عمها فيصل الجالس جنبها/يارا شفييك تبكين؟؟
مسحت الدمعة بطرف كمها ونطقت/ماكنت ابكي...فيصل/اها علينا طيب وش اللي مجلسك هنا ووراك جامعه بكرا!..
يارا/كنت قاعده ادرس الحين بدخل قامت واقفه قبل يحقق معها على سبب بكآءها ونطقت/تبي شئ عمي؟؟
فيصل/تصبحين على خير..يارا/وانت من أهله..مشت بخطوات سريعة لداخل الفله صعدت دايركت لغرفتها المشتركه مع اختهاالتؤام فتحت الباب وانصدمت من الفوضى الموجودة بالغرفه نطقت بحسره وهي تشوف اختها نايمه / تالاووه قووووووومي رتبي الحوسه هذه..زفت بقهر لما شافت ماحست عليها تعدتها وراحت تنام على سريرها..
_______
بالبيت القريب من بيت العم خالد كان بيت الجد دخل فيصل بهدوء خايف لايزعج أمه وابوه أنصدم بأمه جالسه بالصاله وباين عليها البكى قرب من عندها وبآس رآسها/افا ام فهد شعندها صاحيه هالحزه كمل بابتسامه تحاتيني..
ماحس الا بأمه تبكي نزل عند رجولها نطق بخوف/يمه شصاير ابـوي فيه شئ؟؟حتى بنات خالد بعد اليوم ماش؟؟فيه شئ مخبينه علي!!...نطقت الجـده وهي تمسح دموعها بطرف شيلتها/شفته يافيصل يوصيني على ولده..وحنا ماندري وين ارضه من سماه..
فيصل يحاول يهديها وهو فاهم من تقصد/يمه حبيبتي صدقيني انه بخير وعايش حياته والا كان شفتيه راد لنا..
الجـده/تعلمني براكان والله مايطلب العون من ناس ذالته وطاردته..اخخ بس ياوليدي عسى الله يحفظك وين ماكنت ترجع تمسح دموعها بشيلتها وتكمل/هن وش فيهن بنات خالد؟؟
فيصل يبوس يدينها/ماعليهن شر بس انتي قومي نامي ياعلني فدوه لك..
الجده تمسك بيد ولدها قبل يقوم/حلفتك بالله هن مونسات لون؟؟..
فيصل/لاوالله لاتحاتينهن بس عبير اشوف لها فتره بس تجي عند امها اخاف متهاوشه مع رجلها..
الجده بارتياح/لا ماعليك عبير اضمن لك ان حياتها بخير دامها عند محمد بس المسيكينه اللي ماتدري وين تروح من هالرخمه اللي عندها..
فيصل يقوم ويبوس راسها/الله يكون بعونها ويخليلها بنتها تصبحين على خير يالغاليه..
الجده/وانت من اهله..
...
نروح لبيت العم فهد بالمجلس
ينط سعد ويجلس عند امه/اقول يمه شصار على بيت اهل عمي خالد؟يبون يروحون معنا؟؟
ام محمد بحقد/وانت شتبي فيهم!اهل السروق؟واللي اعوذبالله مابي اسب خلق الله..
محمد/يمه وش هالكلام الله يهديك قدام البزارين الحين يمسكون هالكلمه..
ام محمد تكمل فنجالها/اسكت انت عشان مرتك والا ماقلت هالكلام..
محمد بقله صبر/يمه حبيبتي الحين شدخل مرتي بالسالفه؟
ام محمد بكره/يكفي ان امها يسرى واخوها راكان.واختها استغفرالله مابي اكمل.!
سعد بطفش يقوم/خلاص فكونا من هالسالفه..بعدين يمه الحق حق عمتي يسرى وبناتها مافيه اطيب منهن..
ام محمد ترمي عليه الفنجال بعصبيه/اذلف ياعلك للي مانيب قايلته اذلف..
طلع سعد وهو يضحك صاعد فوق لغرفته ولقى عبير بوجهه نازله من الدرج/اقول بنت عمي اهلك يبون يروحون معنا؟
عبير بضحكه/وليش تسال ياولد عمي مانيب خابره عندنا عيال كبرك..
سعد بورطه/لا بس يعني اقول مشتاق لعمتي و.....
قاطعته عبير بابتسامه/ ماعليك تطمن يبون يروحون..
سعد بفرحه كمل الدرج ونساها..
تنزل عبير وتدخل المجلس وتجلس قريب من عند محمد وتنزل النقاب وباابتسامه/مساءالخير عمتي..
ام محمد بكره/هلا هلا..
دقيقه وتنزل دلال ومعها ولدها فهد تدخل المجلس وتسلم/مساءالخير شخباركم؟
ام محمد بحب/ياهلا والله بام فهد الغاليه تآشر لفهد تعال يبه يمي تعال عندي..هاه دلول يمه شخبارك مع الوحام..
دلال/والله ياعمه انه متعبني هالايام الله يعين..
ام محمد وهي تناظر لعبير/الا اقول دلول انتبهي لاتشيلين شئ ثقيل وابتعدي عن كل شئ يضايقك..
يقوم محمد بضيق/يمه تآمريني بشئ..
ام محمد/لا ياقلبي الله حافظك..
يفز طالع من المجلس بضيق..دلال تنزل النقاب وتلف لعبير/الا عبوره عمتي شلونها مع السكر الحين؟؟ عبير/الحمدلله اشوى اليوم ..
ام محمد بنغزه لعبير/عبير يمه ماحملتي؟شوفي ماشاءالله دلال وهي بعدكم وهذا الثاني الله يحفظهم..
عبير تنزل راسها وترفعه من جديد بابتسامه باهته/يجيب الله خير عمتي..
ام محمد/يعين نصبر ثلاث سنين ثانيه عشان تحملين؟
دلال بقهر/عمتي مالله كتب لهم عاد رزقهم يبي يجي لو بعد سنين انتي بس ادعي لهم..
عبير تقوم بابتسامه/انا بروح اشوف محمد يمكن يبي شئ..تطلع بخطوات سريعه صاعده فوق لجناحهادخلت غرفتها لقت محمد جالس على الابتوب نطقت بهدوء/حمود..
محمد يرفع عيونه لها/هلا حبيبتي شفيك صعدتي وتوك نازله؟..
عبير تجلس قريب من عنده/جيت بقول لك اذا فاضي ابي توديني لأهلي..؟
محمد/عبورتي انا اعرفك عدل فيك شئ امي ضايقتك بشئ؟؟
عبير بابتسامه/ لا شفيك انا اصلا شفت صالح نزل قلت اصعد اكلمك..
محمد يرفع حاجبه/اي كشفتك صالح ماهو موجود؟؟
عبير بارتباك/طيب الحين تبي توديني لأهلي والا؟
محمد يناظر للساعه الموجوده على يده/شايفه الساعه كم 12يمكن نايمين؟؟
عبير/مااتوقع البنات نايمات وبعدين انا معي المفتاح...
محمد بحب/ابشري كم عبوره انا عندي..
عبير/تسلم حبيبي..
__________________
عند فيصل تطمن على امه انها نامت وهي بخير طااار عنه النوم وقرر يطلع للآستراحه مع الشباب اتصل على ولد اخته جـراح وقاله يمرهه يروح معه للآستراحه..

ببيت العم احمد

العم احمد يلف لهيا/اقول هيا امك شخبارها.!؟
هيا/طيبه مافيها الا العافيه..
العم احمد/ماعندهم نيه يردون لسعوديه؟
هيا/الا خالي ابوي يبي يشتغل بشركته اللي هنا ويترك سامي هناك..
العم احمد/زين يسوي..
فجأءه اصوات صراخ بزر يدرعم عليها
ويضحك يتخبى ورى امه/ماما..فافش جت جت ويضحك..
سعاد ام راشد/هذا شفيه؟
هيا تضحك/اكيد هذا فارس ..
يدخل فارس ويشيل احمد ويرميه فوق ويمسكه/كم مرا اقولك قل فارس مو فافش..هاه كم مرا؟؟
يضحك احمد/ههههههههههه فافش فافش..
فارس يعضه بقوه/اكلك انا هاه..؟
قعد يصيح احمد ويفلت نفسه من عمه/ماما فوشي فافش(شوفي فارس)..
ام راشد/حسبي الله على بليسك من ولد هذا لعب تلاعبه بزر؟
فارس يضحك/يمه والله عضيته خفيف بس هو دلوع ماش..يلا باي؟
العم احمد/تعال تعال وين تبي تروح؟
فارس/لشباب بالاستراحه متجمعين..
العم احمد/اي رح للاستراحات واترك دراستك على جنب كفو ولدي..
فارس بطفش/يبه والله خلاص حفظت هالموال..فيصل ينتظرني برا..باي..
_________________

بأحد الشقق بالرياض الساعه وحده بالليل

جالسه سميه تتابع التلفزيون وجنبها بنتها..
شهد/ماما انا جوعانه ابي اكل..
سميه تمسك خدودها/حاضر كم شهوده انا عندي بس شنو تبين اسوي لك؟
شهد تضحك/وحده بث..ابي بردر(برغر)وابي بطاط وتتشب(كاتشب)وعصير..
تقوم سميه للمطبخ/وزين البنات ياناس طيب انتي خليك تابعي التلفزيون وانا اسوي لك مو تنامين؟
شهد/لا ماما مانام..
راحت للمطبخ دقايق ينفتح باب الشقه ويدخل ياسر وهو يتمايل بمشيته شاف بنته جالسه على التلفزيون قرب من عندها قومها بعنف يناظر لها بنظرات تخوف/شنو قاعده تتابعين هاه..يعطيها كف قولي ليش تتابعينه..؟؟
تناظره بنظرات بريئه مليئه بالخوف والكرهه نطقت بأول اسم تعلمته وأول اسم يحميها/ماما ماما..تشاهق وتكمل/ماما تعالي..
سمعت صوت بنتها تركت اللي بيدها وطيران لصاله انقبض قلبها لما شافته جاي سكران ويطق بنتها حزنت بقهر على حالها وبقهر على البريئه اللي بين يدين هالوحش..تشوف العقال ينزل من على رآسه ويستقر بيده كان ناوي يضرب هالبريئه بلاسبب وبلاوعي..رمت الملاس اللي بيدها ركضت تدفه بعيد عن بنتهاوتضمها لصدرها وهي تتآلم من صياح بنتها وشهاقها/حسبي الله عليك اذلف وش جايبك هالحزه..ماتلقى تتقوى على بنتك يالوصخ بزر هذي بزر..
ياسر ينطق بثقل وبكلمات متقطعه/لقيتها تتابع فلم وصخ وانا ماعندي بنات كذا..
سميه تضم بنتها/الله لايوفقك تحسب كل الناس نفسك..رح اذلف لربعك كمل سهرتك؟
قرب من عندها ومسك شعرهاوجره بين يديه ومسك العقال رفعه فوق ونزله على ظهرها ثلاث مرات وهي تضم بنتها وتصرخ داخليا وهي مازالت متمسكه البرود من الظاهر استمر بالضرب بس مايهمها دام الضرب فيها مو ببنتها..حست بدت تخف الضربات ويبتعد عنها ساقط على الارض كعادته..فزت وزفت بضيق ركلته برجلها ونطقت من قلب/جعلها نومه بلا قومه ..تناظر بنتها اللي عيونها ممتليه دموع وتشاهق نطقت شهد/ماما تعورت؟
لمت شعرها فوق وهي تقاوم الالم عشان بنتها تمسح الدمعه اللي مازالت عالقه بعينها مو راضيه تنزل/ يلا يمه اوكلك عشان ننام زين..
شهد تضم امها/ماابي ابي الوح عند مامايسرى هنا بابا مابي مابي وتكمل صياح..
مسكتها سميه ونطقت بحسره/اوك ماما الحين اتصل على عمو فيصل يجي يأخذنا..
شهد تمسح دموعها بعشوائيه/بثرعه عثان مايثحى بابا..
خذت بنتها للغرفه وسكرت عليها راح للمطبخ سكرت النار وطلعت لزوجها قومته بالحسره يروح ينام بغرفته رجعت لغرفة بنتها وبدت تحط كم ملابس لبنتها بشكل عشوائي داخل الشنطه تأخذ جوالها تتصل على عمها فيصل..
_________________________


الى هنـا وانهي اول فصل من فصول روايتي واتمنى القى ناس اعجبها البارت وكذا : )