[لامارا]

Part 62



بعد ما خلص سامي لفت له جنات : سامي تكفى ابي اوصل للحجر الاسود
سامي : ما يمدي عند الحجر زحمة الموت ، تبين يدهسونك وتموتين !!
جنات : تكفى تكفى ابي اوصل لو مره وحده بس
سامي تنهد بإستسلام اول مره تطلبه طلب لازم ما يردها : طيب بس اذا حسيت ان مو قادرين بطلعك على طول
جنات ابتسمت بحماس : طيب موافقه
ابتسم لحماسها ووقف وقربوا من الكعبه وحط ذراعينه حولها وهو وراها بس مو لاصقهم على جسمها لا بعيد بس عشان يحميها من التدافع ومن ملامسة الرجال
لما قربوا من الحجر الاسود حسوا بالزحمه بس لا اله الا الله كأنها تسهلت لهم وما شافوا نفسهم الا وهم قدام الحجر الاسود
طالعوا بعض مبتسمين أنهم قدروا يوصلون أرخت جنات راسها وباست الحجر ومسحت يدينها فيه وبعدها على وجهها وبعدها سامي باسه ، لكن لما جوا بيطلعون حسوا أن الزحمه اشتدت
سامي قرب من اذنها وهو يهمس لها : تمسكي فيني وانتبهي من ملامسة الرجال لك ، وانتبهي لا تدفين أحد
بعد صعوبه طلعوا
جنات بعد ما طلعوا اخذت نفس عميق وبعدها زفرته بإبتسامه : مشكور
سامي : ولو ، يلا الحمدلله انها جت سهالات وقدرنا نوصل له
جنات : الحمدلله
سامي : يلا خل نرجع السكن ، احس طولنا
جنات : ولو طولنا وش ورانا يعني !! ما ورانا شي عادي
سامي : طبعا من تاريخ ٨ الي هو بعد بكرى خلاص ما بقدر اشوفك ، لان بتبدأ مناسك الحج بس ابيك تهتمين في نفسك وتاكلين زين ولا بتتعبين ومابتقدرين تقومين من فراشك ، اسمع في بنات كثير طول ما هم في المشاعر مايقدرون يقومون من التعب وحتى ما يقدرون يرمون الجمار لأنهم ما اهتموا بنفسهم ، ابيك تنتبهين لك ، طيب !!
جنات : طيب ، لا تشيل هم اصلا انا متحمسه
سامي : اي بس اقولك انبهك عشان لا تنسين
سكت شوي وبعدها تكلم : افكر اني انضم مع الحمله السنه الجايه من الكوادر
جنات لفت له وابتسمت : كويس ، الله يكتب لك الاجر
سامي : اللهم امين

.

تاريخ ٩ من ذو الحجه في عرفه

مرت الايام وهم في مكه وعايشين احلى وانقى واطهر ايام وجنات مره مرتاحه واخر مره شافت فيها سامي اول امس بما انهم ينقلون الحريم لحالهم والرجال لحالهم للمشاعر
كانت جالسه وهي تدعي وتستغفر ودموعها تهل وهي تبكي تذكرت كلام محمد لها يوم ثاني زواجهم ولما جوا لهم البيت قبل لا يجون لمكه
وصارت تبكي اكثر



_



انتهى