الجـزء الرابع
لا تحتفظ بالصور , إنّ لم تكُن لديك القدرة على مواجهة الذِكريات
وجّهت الجدة نظرها لـ المطبخ بعد ما سمعت صوت سعود يطلب موية من الخدم
الجدّة : انتظر يا سعود لا تدخل
ليال ناظرت في جدتها
الجدّة بـ اسلوب جاف : اللبس هذا ما يصلح قدام العيال تطلعين بروبك مايصير لا بغيتي تطلعين اطلعي بعبايتك وطرحتك
ليال بلعت ريقها : انا يعني .. ما كنت احسب اني لازم اطلع بعباية ما كنت ادري انه بيقوم الحين
الجدّة : هذاك عرفتي ..
ليال وقّفت : اسفه ..
توجّهت لـ غرفتها , تحس بنوع من الخجل اما بسبب طريقة كلام جدتها او بسبب عدم الألفة اللي بينهم ..
رفعت راسها لـ الدرج , كان سعود نازل من عليه وعلى راسه قبعه جاهز تماماً لـ الروحه بـ لبسه بنطلونه القطني الاسود و تيشيرته الرمادي الفاتح
دخلت غرفتها وسكّرت الباب , يا قباحة احساس الغربه , واحساس انك مثقّل على احد ما يبيك
مسحت على صدرها وهي تقول بطفوله : بيروح بيروح بيبرى عادي انبسطي .. انبسطي
عادة من طفولته تكلّم نفسها وتراضي نفسها في وقت زعلها وتمحي حزنها بشخصيتها الثانية اللي تكلّمها في وقت عز حزنها ..
توجّهت لـ الدولاب
لبست فستان طويل برتقالي غامق علّاقي ومزموم من تحت الصدر , جدلت شعرها بجديلتين هنديه من الجذور , لبست حلق كبير هندي ..
ناظرت في مكياجها اللي على التسريحه : يمه وين مكياجي
طقّت راسها بنسياان , دخّلته الشنطة
طلّعت من شنطتها المكياج
حطّت بلاشر برتقالي خفييف جداً , وايلاينر اسود سخيف و روج مطفي نود قريب لـ الوردي , مشّطت حواجبها ورجعت اغراضها لـ الشنطة لبست صندلها الذهبي .. وساعتها المرصّعه بالالماس هديه من والدها رحمه الله عليه قبل سنتين ..
انطق الباب عليها
دخلت تغريد وهي تبتسم : صباح الخير
ضحت على طول ليال وهي تشوف شكلها هي وتغريد زي بعض
ليال : انا وانتي مسوين جدايل وفساتيننا برتقاليه
ضحت تغريد : ولوراء معنا بعد ..
ليال : كيووت ..والله
تغريد : وش هالتخاطر ..
ليال وهي تضحك : مدري والله
تغريد : الظاهر ان هذا لوك المزرعه في بالنا
ابتسمت ليال ...
تغريد : طيب يلا عشان نروح
ليال : بلبس عباتي ..
اخذت عبايتها وحطّت طرحتها , واخذت شنطتها بعد ما تأكدت ان الشاحن والشاحن المتنقل موجودين
طلّعت شنطتها وسكّرت الباب
اخذت الخادمة الشنطه منها و ودّتها لـ السيارة
دخلت لـيال لـ الصاله وعلى وجهها ابتسامة صغيرة : الـسلام
الجدة : وعليكم الـسلام
تغريد وهي ترفع بنتها لوراء : شوفي شوفي الكاشخ
قرّبت ليال لـ لوراء وهي تشيلها : ياربي .. وش هذا
كانت لابسه فستان نفس فستان امها وليال , برتقالي علاقي ومزموم من تحت الصدر و مربطين شعرها اثنين ومطلعين لها غرّه وحاطين لها بلاشر خفيف وروج وملبسنها حلق وغوايش
وحذاء ذهبي
ليال : لا ما اقاوم انا الاطفال ياربي سلمها
تغريد : مكشخينها مرره
الجدّة وهي تضحك : وين لقيتي لها هالفسيتين
تغريد : طالبينه طلبيه يمه
الجدّة : ياربي تخليها لـ امها
..
نزل سعود مع الدرج وفي يده تيشيرته وكيس مستلزماته
عطاها الخادمه وهو يقول : دخليه في شنطة مدام تغريد
جيسي : اوكي ..
..
دخل سعود لـ الصاله : يلا يمه مشينا ..
وقّفت الجدّة وهي مستنده على عصاها : يلا
ناظر سعود في تغريد و وليال
طلع لـ متوجّهه لـ الباب والجدّه خلفه وتغريد وليال
سعود ناظر في تغريد وهو يقول لها : تغطوا ..
تغريد : نسيت معليش ..
الجدّة ناظرت فيها : وانتي يا ليال تغطي ..
ليال بـ استغراب : انا .. ليه ..
الجدّة : ما سمعتي سعود وش يقول ..
ليال ناظرت في تغريد : عشان حاطين ميكب .. ما يحب نطلع معه وحنا حاطين ميكب ..
ليال حطّت الطرحه على وجهها وفي خاطرها ماحطّتها الا عشان جدتها بس ..
ركبوا الخدّامات الخمس السيارة وركبت الجدّة معهم
ليال لـ تغريد : ليه جده ركبت مع الخدم
تغريد : دايم تركب مع الخدم في سيارة وانا وسعود في سيارة ما تحب تخلي الخدم بلحالهم عشان ما يتكلمون مع السواويق .. جدّه متأزمة من الخدم
ليال : ليه ؟
تغريد بهمس : حظنا في الخدم اقشر .. مره جتنا خدامه قبل يمكن سنتين اثيوبيه تحب سعود تموت عليه لدرجة انها سارقة من تيشيرتاته ولا تنام الا فيه , ولا احد يغسل ملابس سعود الا هي ولا احد يحط له اكله اذا جا متاخر الا هي .. جده قفطتها مره في الليل الساعه يمكن ثلاث تطق على سعود باب غرفته ما تحملت لين يصبح الصبح ورّجعتها المكتب .. ومره وحده من الخدم دخلت سواقنا الجديد لـ البيت يتغازلون هي وياه وجده انهارت ومن عقبها ما تثق فيهم ابد الا حليمه
ليال وهي تضحك : اووه تحب سعود لا لا ..
تغريد : شي شي ..
سعود : يالله يا تغريد ..
تغريد : يلا..
ليال مسكت يد تغريد : تغريد ابي اركب مع جده .. خلي جيسي تركب معكم وانا بركب مع جده
تغريد بـ استغراب : ليه يضايقك في شي سعود
ليال بكذب : لا ابد .. بس ابي اجلس مع جده
تغريد : المشكلة سعود ما يداني خدامة تركب معه حتى جيسي خدامة بنتي ما يحبها تجلس معاها
ليال توجّهت لـ السيارة : خلاص..
تغريد ركبت السيارة وفي حظنها بنتها
سكّرت الباب وهي تقول : ليال براد عندك
ليال وهي تناظر التكيف : ايه براد
تغريد : زين ..
ركب سعود وهو يقول : الحر مرعب ..
تغريد : الجنّة يارب ..
حرّك السيارة وهو يأشر لـ السواق بيدينه ..
تحرّكت السيارات متوجّهه لـ المزرعه ..
وقّف سعود عند الكافيه : بجيب لي قهوة وبجي .. تبين شي ؟
تغريد : أي ابغى كاراميل مكياتو بارد..
سعود : اوكي ..
نزل من السيارة لـ الكوفي
تغريد بـ فشلة : ليال تبين تشربين شي
ليال بهدوء : لا ما ابغى ..
تغريد : لا بقوله يجيب لك مثلي
ليال بسرعه : والله ما تقولين ما ابي شكراً
تغريد عصّبت بكل مافيها من سعود مفروض يسألها حتى ولو ..
بعد عشر دقايق رجع وفي يده المشاريب
حطّ قهوته في مكانها وعطا تغريد قهوتها
قال بصوت مسموع : هذي قهوة ليال
تغريد ابتسمت : ليال قهوتك
أخذت القهوة ليال بدون ممانعه ..
كمّلوا الطريق وصوت الاغاني بس هو اللي يسليهم
نزّلت طرحتها من على وجهها ..
طلّعت جوالها تتفرج فيه , رجعت لـ شنطتها بعد ما ملّت
ليال بصوت هادي : تغريد الشمس بوجهه بنتك .. جيبيها ورا عندي حرام ما تتحمّل
تغريد : أي والله ما انتبهت .. حبيبتي وانا اشوفها من اليوم تتحرك ..
اخذت ليال لوراء من تغريد وهي تبتسم : اهلين .. اهلين يابطه ..اهلين ..
ضمّتها لـ صدرها وهي تقول : وجهها حار من الشمس
تغريد : ياويلي من امي لطيفة لو شافتني
ليال وهي تبتسم : هي خلقه كل شوي تهاوش فيك
تغريد ابتسمت : الله لا يحرمني اياها
ليال بصدق : امين يارب .. ولا انا يحرمني اياها
رفع نظره عن طريق المراية يناظر فيها
قال بصوته اخيراً : تعلقتي فيها بسرعه ؟
ناظرت فيه عن طريق المراية : حسيت انها بتحبني
سعود ويده على الدراكسون : تحب كل اليتامى وتعطف عليهم وكل اليتامى يحسون انها تحبهم
ليال بنظرات مطوّله وكأنها فهمت قصده: الله يطوّل في عمرها
ناظرت لوراء وهي تمسح على شعرها , كأنه قاصد يوصل لها شي بس ما وصلها صح
تغريد ناظرت في سعود بنظرات لوم واضحه : ممكن تغير الاغنية النايمة هذي ..
سعود بـ ابتسامة جانبية : تامرين ..
شغّل اغنية ثانية وكمّلوا الطريق بهدوء
ليال : تغريد هو كم المدة للمزرعه
تغريد : من ساعتين الى ساعه ونص على حسب
ليال : اف سفر ..
تغريد : ايه .. عشان كذا نطلع مبكرين يادوب نوصل على الظهر ..
ليال : الله يوصّلنا بالسلامة
شغّل سعود اغنية لوراء وهو يبتسم : تذكرين تغريد ..
تغريد وهي تبتسم : يوه ذكريات كيف ما اذكر .. ليال تخيلي كيف سميت بنتي لوراء ..
ليال ابتسمت مع ابتسامة تغريد : كيف
تغريد : يمكن الفين وثمانيه لمّا كنت في ثالث متوسط وكان سعود يمكن في الجامعة كنّا لمّا نروح لـ المزرعه ما نروح الظهر مثل اهلي لا كنّا نجلس لين الليل واذا جت الساعه ثمان نمشي نمسك خط لـ المزرعه ونشغّل اغنية لوراء ونغني معاها وقتها كان يقول لي سعود تغريد اول من يجيه بنت منّا يسميها لوراء وانا اقوله اوكي اجل انت بتسمي قبلي .. وفي كل مره كنا نأكد على بعض لازم اسم لورا ينسمى يا بنت سعود يا بنتي .. سبحان الله كنت اتوقع سعود يتزوج قبلي لكن تزوجت وجبت بيبي وتطلقت وهو ما تزوج
ليال وهي تبتسم : في بالك لين سميتي لوراء
تغريد : مره .. عاد سعود لازم تتزوج عشان تسمي لوراء
ليال ناظرت المراية وهي تقول تتصنّع المزاح : يقولون اللي يطوّل عن الزواج يا أنه كان يحب وحده ولا قدر ينساها .. او عنده مسلك ثاني ..
ابتسمت تغريد : يمه وش مسلك ثاني