تغريد : لا وش علي بصرهم
ليال : صوت حريم ..
تغريد بهمس : عمّاتك وبناتهم ..
ليال لفّت اتجاه الباب بفضول : ياربي لتني جالسه مستحية ادخل
دلال : ماعليك طنشيهم ..
توجّهت تغريد وخلفها ليال لـ الصاله
كان الوصول لـ العمّات
العمّه نجلاء وبنتها شموس ..
والعمّة وضحى وبنتها منال..
وسارة ام دلال وافنان ..
دخلت تغريد وهي تبتسم سلّمت عليهم وخلفها ليال والبنات
جلست ليال ملاصقه لـ تغريد
وضحى تناظر في ليال بعد استيعاب : ياربي كم مره من الوقت ؟
نجلاء وهي تناظر في وضحى : العمر يمشي ..
وضحى بكل حنان الدنيا : شلونك يا ليال ؟ طمنيني عنّك
ليال بصوت بالكاد يخرج : بخير الحمدلله طيّبه
نجلاء وهي تبتسم : اذكرك وانتي طفله ماتعديتي شهر من عمرك .. الله يرحم امك وابوك
ليال بصوت هامس : امين
شموس ناظرت فيها وهي تبتسم ..
شموس بصوت هامس لـ منال : وش رايك فيها ؟
منال ناظرت في ليال بتفصح : ممتازة ..
منال ناظرت في تغريد : شلونك تغريد ؟ كيف البنّوته الصغيرونة
تغريد بـ ابتسامة : بخير الحمدلله كلّنا
منال : وكيف سعود ؟
تغريد وهي فاهمة قصدها : الحمدلله طيّب ..
ليال ناظرت في منال , جميلة جداّ
طويلة عنقاء , شعرها بني غامق طويل , عيونها وسيعه ناعسة وانفها طويل سفايفها كبيرة لكن جميلة , سمراء لونها مبيّن فيه لمعه حلوه .. كانت لابسه عدسات رماديه فاتحه مخليه شكل عيونها خطير .. ما كان ينلام سعود لمّا حبها , بنت فيه من الجمال الكثير ..
لاحظت منال نظرات ليال لها .. ابتسمت ليال في وجهها وردّت الابتسامة ليال
دلال بصوت هامس لـ امها : ليه تأخرتوا يمه ؟
سارة : وش اسوي في ابوك راح يخلص شغله ويالله جا
وضحى بصوت عالي : وش هالخبر اللي سمعناه يا تغريد
تغريد ابتسمت وكأناه عارفه : باركي لي تكفين .. تطلّقت
سارة بـ استغراب : واخزياه وش هالكلام يا تغريد
الجدّة لطيفة : ماش عوبه ما ينقدر عليها
نجلاء ناظرت في تغريد : والله ما الومها يازين الطلاق الله يناولني اياه
الجدّة لطيفة : لا اله الا الله اذكري الله ..
تغريد : موب يقولون البنت من فخذ عمّتها انا وعمتي نفس الشي
شموس ناظرت فيها : حرام يمه والله ان ابوي مدلعك
نجلاء : ايه شوفوا يا بنات الدلع طالع من عيوني
ضحكت الجدّة لطيفة : ياعوبك انتي يا نجلا
افنان وقّفت تصب القهوة : مين باقي ماجا ؟
الجدّة لطيفة : عايلة الفاسقين
ضحكت ليال بصوت مسموع , تذكّرت كلام عمّها يسوف صحيح تسميهم الفاسقين ..
ناظرت تغريد وهي تضحك : عرفتيهم
ليال : ايي قال لي عمي يوسف عنهم
..
صبّت القهوة و المجلس ارتفعت اصوات النساء في بالسواليف ..
وليال ما تعودّت بالحيل لكنها تاخذ وتعطي معهم ..
الجدّة لطيفة وبسؤالها السنوي المعتاد في كل مره : يا بنيّات
البنات ماعدا ليال : سمّي ..
الجدّة لطيفة : لحظة وين مشاعل .. خلوها تجي
دخلت مشاعل بفستانها القصير وبكامل انوثتها : انا جيت ..
سلّمت على الموجودين ..
وجلست بالقرب من دلال
لاحظت ليال النظرات المخيفة بينها وبين منال
كأنها فهمت , منال حبيبة سعود القديمة , مشاعل خطيبة سعود اللي لحد الآن ماهو معروف هي خطيبته او لا ..
الجدّة : دام مشاعل جت ... يالله من اللي حفظت جزء جديد من القران ؟
افنان : يمه انا وصلت لـ الجز السابع
الجدّة : اه يا الهيسه .. العام كنتي في نص السابع ..
دلال ناظرت في جدتها : انا توني يمه في الحدعش
الجدّة بزعل : ما حفظتي الا واحد ..
تغريد ناظرت في جدتها : عاد انا يمه واصله لـ الثلطعش
الجدّة : ما اردى منّك الا خويك
تغريد : حرام يمه والله اني شاده حيلي
الجدّة : وانتي يا مشاعل ؟
مشاعل ناظرت في الجدّة وبكذب : وصلت ثلاثطعش نفس تغريد ..
الجدّة : ياويلي منكم .. وانتن يا بنات العمّات ..
شموس : انا مثل افنان ..
منال : وانا مثل افنان بعد
الجدّة : ياحظي والله فيكن .. واني السنة اللي فاتت محذرتكن ..
ليال بصوت هامس : وش السالفه
تغريد : امي تسوي مسابقة قران .. الله تحفظ اكبر جزء لها هدية وحنّا من العام نفس الجزء ... انتي حافظة
ليال بصوت هامس وصادق : ايه ..
تغريد : قولي لـ امي
ليال بخجل : لا موب لازم
تغريد ناظرت في جدتها : يمه ليال حافظة
الجدّة ناظرت في ليال وبصوت عكس صوتها مع باقي البنات : وش حافظة
ليال بصدق : القراءن ..
سارة : أي جزء ؟
ليال بـ ابتسامة : الحمدلله .. كلّه
البنات كلّهم : كلّهم ..
ليال بخجل : ايه ... ايش
الجدّة ناظرت فيها : ماشاءلله حافظة القراءن كلّه
ليال هزّت راسها : ايه كلّه .. ابوي الله يرحمه من يوم اني في الابتدائي مدخلني تحفيظ ... حفظته كله وانا عمري يمكن خمسطعش .. وكل فترة اراجعه عشان ما انساه
الجدّة هزّت راسها : كان حافظ القراءن ..
سارة بصوت هادي : وليته نفع فيه الله يرحمه
ناظرت ليال في سارة بنظرات تبغى تفهم قصدها
لكن سارة صدّت بوجهها تسولف مع العمّات
عمّ الهدوء على المكان ..
بدأت تطلع الاصوات , بين البنات وبعضهم يسولفون ..
وقّفت وهي تقول : عادي اطلع اتمشى برا امي لطيفة ؟
الجدّة لطيفة : اطلعي ..
طلعت من الفيلا توجّهت لـ البحيرة اللي تقول عنها دلال , وقّفت تناظر فيها
تحس بضيقة , يمكن بعد ما حسّت بفرق المعاملة القوي بينها وبين البنات الثانيات , تغريد كانت تعاملها كويس لكن كانت دايم تهاوشها تحس ان هذا الشي مخفف عليها , لكن الآن .. ما تعرف تحس بشي يعوّر ..
ناظرت بعيونها في المكان قد ايش جميل
الانوار الملونه تحت كل نخلة
والبحرية اللي كان حلوها كشّافات ملونه
جلست على الطرف تناظر قدامه ..
جالس بعيد عن العيال
وفي يدّه كتابه , يقراه
رفع نظره على صوت خطوات
نزّل كتابه وعدّل نظراته يناظر قدّامه
اول مره يشوف هذا الوجهه
عقد حواجبه , ليال يمكن بنت عمّه اللي كانت ساكنه
..
ماشال نظره من عليها , جميلة جداً في نظره ..
وشكلها انثوي جداً
ناظر فيها من بعيد لـ دقايق طويلة , يناظر في حركاتها .. وطريقة نظراتها وكأنها متضايقة ..
وقفت تمشي
..
ما كانت تعرف وين بتروح لكن تبغى تكتشف المكان على الاقل ..
رجعت لـ الفيلا اخذت عبايتها و طرحتها ورجعت لـ المكان نفسه تمشي
حمد طلع في وجهها وهو يقول : اول مره اشوفك .. من انتي
ليال بخوف : بسم الله .. انت اللي مين
حمد أبتسم ابتسامة جميلة جداً : حمد .. ولد متعب .. اذا تعرفين متعب
ليال هزّت راسها بـ نظرات متأسفه على معرفتها فيه : اعرفه .. ليال ..
حمد : يعني توقعي صح ..
ليال ناظرت فيه : متى توقعت
حمد : قبل شوي ..
ليال هزّت راسها ومشت بعيد عنّه
حمد بصوت عالي : تبين اجي امشي معك اعرفك على المزرعة
ليال ناظرت فيه و بـ استغراب بان على وجهها : طبعاً لا .. ايش هالكلام
ابتسم حمد : سوري ..
عطته ظهرها وتوجّهت لـ جهة الاسطبل , لكن ما تنكر انه وسيم و نظراته تجنن ..
ناظرت قدّامها , واقف عند وحده من الخيول وماسكها بالرسن حقّها ويمسح على شعرها الطويل ..
لكن انصدمت أول ما شافت منال واقفه قريب منّه
وتكلّمه
قرّبت بشويش تسمع ايش اللي يدور
منال ببكاء : خلاص اتعبتني والله العظيييم بس حرام عليك
سعود بصوت غاضب : ادخلي .. انا وانتي مابيننا شي عشان تلاحقينني
منال : وش هالجفا يا سعود ..
سعود ناظر فيها وهو يقول بـ انفجار : أي جفا ؟ أي جفا اللي تقولينه .. تركتك تزوجت وحده ثانية وتركتك معلقه .. وش الجفا اللي تقولينه .. اسمعي يا منال .. انتي الحين ماتعنين لي شي .. حتى واحد بالمية ما تعنين لي .. اللي اعرفه بس انت بنت عمتي وزي اختي .. وانك متزوجه واللي تسوينه موب زين ابد موب زين
منال ناظرت فيه وبحزن : وبتتزوج مشاعل
سعود بصوت عالي : اتزوج مشاعل افجّر في نفسي مالك دخل .. تفهمين مالك دخل ..
منال ناظرت فيه وبحزن : طيب .. ان شاءلله مالي دخل ..
عطّته ظهرها وتوجّهت لـ الجهة الثانية
رفعت حواجبها ليال , اف .. وش اللي يصير
رجعت على ورا بسرعه أول ما شافته لمحها
سعود بصوت عالي : من
ركض بـ اتجاهها
وقّف وهو يقول : وش تسوين هنا
ليال بسرعه : كنت ادور و .. وجيت هنا
سعود ناظر فيها بنظرات مطوّله .......
ليال ناظرت فيه : ايش ..
سعود قرّب منها وهو يقول : لو تكلمتي باللي شفته موب صاير لك طيّب
ليال رفعت حاجبها و بـ استغباء : اللي شفته ؟! ايش شفت
سعود بعصبيّه : استغباء ؟