الهنوف كانت جالسة بغرفتها وتكلم صديقتها حنان بالماسنجر ..
الهنوف (( المرجوجه ))<<< لقبها بالماسنجر : شفيك انتي ؟؟
حنان (( أرق المشاعر )) : آآه يالهنوف متعذبة
الهنوف (( المرجوجه )) : كل هذا علشان عبد الرحمن ؟؟
حنان (( أرق المشاعر )) : عبد الرحمن مو حاس فيني يالهنوف ولا بالشوق الي داخلي أحس كل ماجاه يبتعد عني ..
الهنوف (( المرجوجه )) : انتي متأكده انه يحبك ؟؟
حنان (( أرق المشاعر )) : مدري حيرني بافعاله احيانا" احس اني دنيته وانه مايقدر يستغنى عني واحيانا" احس ... مدري مدري احترت
الهنوف (( المرجوجه )) : تحسين بوشو ؟؟
حنان (( أرق المشاعر )) : مدري يالهنوف
الهنوف (( المرجوجه )) : ياخوفي يكون نصاب يلعب عليك والا يتسلى بمشاعرك هلاشكال ما تنضمن ..
حنان (( أرق المشاعر )) : حرام عليك لا تغلطين عليه تراه طيب وحنون معاي ولا عمره آذاني بشي
الهنوف (( المرجوجه )) : بس أنا خايفه عليك لا تتحطمين للمره الثانية مانسيتي متعب وش سوى فيك ؟؟
حنان (( أرق المشاعر )) غصت بعبرتها : لا مانسيت ولا راح انسى بس عبد الرحمن غير
الهنوف (( المرجوجه )) : وش ضمنك مايكون مثل غيره ؟؟
حنان (( أرق المشاعر )) : ودي ارتاح واعرف اذا كان صادق بحبه لي والا لا
الهنوف (( المرجوجه )) : مافي الا طريقة وحده علشان تتأكدين
حنان (( أرق المشاعر )) : وشي هالطريقه ؟؟
الهنوف (( المرجوجه )) : قولي له اذا يحبك بصدق يطلبك من ابوك اذا وافقك معناه يحبك وشاريك واذا حسيتي انه بدا يتهرب معناها واحد خسيس مثل غيره
حنان (( أرق المشاعر )) : برايك كذا ؟؟
الهنوف (( المرجوجه )) : انا ودي براحتك مايهون علي اشوفك متعذبة سويها وبلغيني بلي يصير اوكي
حنان (( أرق المشاعر )) : اوكي ..
الهنوف (( المرجوجه )) : يالله نشوفك على خير .. سي يو
حنان (( أرق المشاعر )) : سي توو
قفلت الهنوف الماسنجر وانسدحت على سريرها وغرقت بافكارها وخوفها على خويتها حنان .. حنان بنت طيبه وعلى نياتها بس عيبها انها حساسة وبسرعة تصدق وهذا الي خلاها تتعلق بأكثر من واحد وبالاخير يتركونها لكن اعظم صدمه تلقتها من متعب اول حب بحياتها ظلت معاه 3 سنوات كان نظر عيونها والشي الوحيد الي تعيش علشانه لحد ماطلع على حقيقته بيوم لما طلبها تطلع معاه ..
والحين عبد الرحمن المصيبة الثانية الي ما تدري لها او عليها ..
ظلت الهنوف تفكر بحال حنان لحد ما غلبها النوم ونامت ..
&&&&&&&&&&&&&&&&&&&&&&&&& 7
اليوم الي يسبق يوم حفلة مشاعل ..
صحت مشاعل من النوم على الساعة 5 ونص صلت الفجر
ونزلت لتحت .. لقت ابوها وامها جالسين ..
وجلست معاهم ..
مشاعل : السلام عليكم
ام طلال وابو طلال : وعليكم السلام والرحمة
مشاعل : الله يصبحكم بالخير
ام طلال : صباحك خيرات إن شاء الله
أبو طلال : اوه مشاعل صاحية بدري غريبة !!
أم طلال : ايه وانا امك غريبة مو عوايدك ليكون مريضة والا فيك شي ؟؟
مشاعل : لا بس ليش اني نايمة بدري فشبعت نوم !!
ابو طلال : وش مسوية بدراستك ..؟؟ ترى ما اوصيك يابنيتي هالله هالله بالنسبة الزينة
مشاعل : لا تخاف يبه بنتك قدها وبعون الله ثم فضل دعائك انت والوالده اجيبها
أم طلال : الله يوفقك يابنيتي وعقبال ما اشوفك عروس إن شاء الله
مشاعل حمرت خدودها : لا بدري يمه ..
أم طلال : وشو بدري . من بكره لو يجيك الرجال الزين بعناك ..
مشاعل : تبون الفكة مني ..
أبو طلال :ليش ننتظر الرجال الزين ماهو موجود ومنتظرها ..
أم طلال بفرح : صدق يا ابو طلال منهو هالرجال؟؟
أبو طلال : فيصل ولد أخوي راشد
مشاعل وكأن احد صافعها صفعة قوية : فيصل ولد عمي !!!
أم طلال : والله انه رجال وماينعاب ويكفي انه ولد عمها ..
أبو طلال يناظر مشاعل بطرف عينه : ايه ولد عمك .. ليكون ماتبينه بعد
مشاعل مو عارفة شتقول : هاااا .. اوه نسيت انا عندي امتحان دوري اليوم ولازم اراجع قبل لا اروح المدرسة .. عن إذنكم ..
صعدت مشاعل لغرفتها .. وتحس كأن الدنيا تدور فيها .. معقولة فيصل الي اعتبره بمثابة اخوي يكون بيوم من الايام زوج لي .. لا لا لا لا لا
أبو طلال كان خايف لا بنته ترفض فيصل وتحرجه قدام اخوه .. مشاعل كان ترفض كل من يتقدم لها بحجة تبي تكمل دراستهاوماتبي اي شي يشغلها عنها ..
أبو طلال يكلم ام طلال : ياخوفي يجي اليوم الي يتقدم فيه لها وترفضه مثل غيره وتحرجني
أم طلال : ليش ترفضه يكفي انه ولد عمها ..
أبو طلال : حيرتني بنتك وش تبي مدري .. الدراسة مو حجة علشان ترفض كل من يتقدم لها تقدر تكمل دراستها عقب الزواج ..
أم طلال : تتكلم وكأنه تقدم لها .. ماتدري يمكن تغير رايها لذاك الوقت ..
أبو طلال : ويمكن تظل على عنادها وتحرجني قدامهم مثل ماسوت لما تقدم لها ولد ابو سامي ..
أم طلال : عاين خير ياابو طلال لذاك الوقت وهي بعدها صغيرة ..
أبوطلال : الله يكتب الي فيه الخير ..
**************
بعد بضع ساعات بالمدرســــــــــة ..
الهنوف جالسة مع حنــان ..
الهنوف : هاه بشري وش سويتي ؟؟
حنان : سويتي الي قلت لي عليه بس ماعطاني لا حق ولا باطل ..
الهنوف : شلون يعني .. وش كان رده
حنان : ((أجلي الموضوع لوقت ثاني لان في بالي شي اخطط له يخصني ويخصك)) هذا كان رده ..
الهنوف : ماعرفتي وش هالشي ؟؟
حنان : لا مارضى يقولي .. يقول كل شي بوقته حلو ..
الهنوف : ياخوفي يكون شي شين يبي يضرك فيه ..
حنان : لا لا تقولين كذا .. عبدالرحمن غير
الهنوف : هذا انتي بس ذابحتنا بـ(( عبد الرحمن غير ))<<< تقلدها
ما اقول غير الله يستر .. المهم علميني اذا عرفتي وش هالشي ..
حنان : أتمنى يكون شي يخلصني من شكوكي فيه ..
الهوف : وانا اتمنى ..
إلا بطبة نوال عليهم ..
نوال : وينكم انتم صارلي ساعة ادوركم ..الحصة بدت
الهنوف : طيب تقدمي وحنا وراك
نوال : لا قوموا الحين معاي والا ماودكم اسمع شتقولون عادي ترى قولوها
الهنوف : ايه ما نبيك تسمعين عجبك ..
جلست نوال جنب الهنوف وحطت رجل على رجل
نوال : حره ماراح اروح لين تقومون ... قاعده على قلوبكم
الهنوف رافعة حاجبها وتناظر نوال : اقول احلفي بس ..
حنان : هههههههههههه خلينا نقوم احسن قبل لا تتطاققون .. وتفشلونا قدام الله وخلقه ..
*************************************