[فيتامين سي]

281
فرح جالسه بالصاله عند عيال اخوانها وتلعبهم ودخل سلطان وضحك على اشكالهم وشآل بحضنه انسام وباسها : يازين البنات زيناه
فرح : اسمع انت ، مو اذا تزوجت تجيب وراعينك تحطهم عندي قسم بالله مارحمهم ترا ، انا عنيفه ومتوحشه
سلطان : انا عيالي مااتركهم ، معاي وين مااروح
فرح : وبكره توز براسك زوجتك تبي شهر عسل ونقاهه ومدري ايش ، خلها توديهم لأهلها
سلطان : وليش ماقلتي لوديم وياسمين ، اووه صح ماعندهم اهل
فرح : ايه يتيمات ، اه ياخوفي انت تتزوج يتيمه
سلطان : صح ذكرتيني ، ابي رغد ، اسأليها مره ثانيه
فرح : وععوه ، ياخي في احلى منها
سلطان : لاتتدخلين
طلع وتركها وتأففت : الله يعين رغد اذا اخذتك
طق الباب وقامت تفتح وتوسعت عيونها بصدمه لما شافت لـيـان تبكي وتترجاها : فرح تكفين بس بشوفه واطلع ، بس نظره
فرح مسكتها بقوه قبل تدخل : مااقدر ليان ، اطلعي ، هذا امانه عندي ، لاتقربين اكثر من كذا
ليان دفتها ودخلت بسرعه فرح تمنت ان سلطان موجود صرخت بأعلى صوتها : اتركيــه
ركضت لها ليان كانت واقفه ومحتاره بين ستّ اطفال ماتدري اي واحد فيهم سلمان ، تركت التوأم واضح انهم صغار ومتشابهين وركزت على هتان وسلمان وقربت لهم ووقفت قدامها فرح معصبه : اقسم بالله لو قربتي اكثر ماراح تطلعين من هالبيت بعافيتك !
ليان تشاهق : بتحرميني من ولدي ؟
فرح بقهر : والله محد قال لك اتركيه وامشي ، انتي بنفسك قلتي مابيه
ليان : فرح بس بشوفه ، المسه واشم ريحته ، حرام عليك هذا ضناي
فرح : قلت لك مااقدر ، سلمان امانه ولازم احافظ عليه ، اذا رجع فيصل تفاهمي معاه ، اما تاخذينه بغفله كذا لا اسمحي لي ليان ولاتعقدين الأمور اكثر من كذا !
ليان : اهب يابزر امس طلع لك لسان وصرتي تعرفين تتكلمين
فرح عصبت : والله مالبزر غيرك ، بس مااشره عليك لأن مافي انسانه بعقليه سليمه تبيع ولدها !
ليان هجمت عليها وسحبت شعرها وصرخت فرح : ابعدي عني ياحممممماره ، عساك للكسر ، ليت فيصل طخ رجولك كلها عشن ماتمشين ابد ، ااااااه سلطااااااااان
سلطان كأن الله ارسله لها كان ناسي جواله بمكانه ورجع ياخذه وانصدم من صراخ فرح وانصدم اكثر لما شافها تتضارب مع وحده ثانيه وتناديهِ : ليان يامجنونه اتركيني ، اه يممه
ماحست الا وهي تنسحب بقوه وطاحت ليان على ظهرها شافت سلطان وارتاحت : ماراح تاخذين سلمان لو تبلطين البحر
سلطان معصب : قسم بالله لو ماكنتي بنت لأعلمك الأدب والإحترام ، وش الهمجيه ذي ؟
ليان : ابي ولدي
سلطان : مالك عيال عندنا ، اطلعي قبل لا اطلب الشرطه
لململت نفسها وطلعت وناظرت فيهم بحقد : والله لتندمون كلكم.
سلطان : الخلا بس



282
في بيت ابو سعود ، جالسين البنات بالحديقه ومعاهم جُود وكان الجو بارد وكلهم متدفيّن ، عدا جود كان لبسها خفيف.
رغد : خوذي جاكيتي
جود : لالا ، انا احب البرد
رغد : لين ماتتجمدين وتموتين
جود : اسم الله علي عسى يومك قبل يومي
رغد : يابنت اللذينا هذا وانا خايفه عليك
جود : تتفاولين علي بالشر ، اعوذ بالله منك
رغد : لاتقلبين الموضوع علي ، وقحه ، بس الشرهه على اخوي اللي يحبك
جود : وانتي وش دخلك تتشرهين عليه ؟ كيفه يحب اللي يبيه
رغد : دخلني انه جايبك لبيتنا ، صراحه ضيفه ثقيلة دم
جود : اصلاً انا قلت له مابي بيتكم بس الله يهديه اصر علي رغم انه يدري اني اكرهك
رغد : ويدري اننا نكرهك ورافضين وجودك لكن مادري شفيه ؟ حتى رافض يخليك تطلعين ، ويبينا دايم حولك ، خايف تهربين ، مسكين اخوي ، وش نوع السحر بالله ؟
جود شهقت : سححححر ؟ معاذ الله من تفكيرك
وعد : لا جد وش نوع السحر
جود رزت نفسها ورجعت شعرها وراء وابتسمت بخجل : والله سحر طبيعي ، شاف فيني شي ماشافه بأحد ، لدرجة انه مصدوم من الجمال اللي يشوفه فيني ، مالومه مسكين عايش حياته كلها معاكم ، وجيهكم تسسسسد النفس.
وعد : ترا انتي فهد معطيك وجه ومخليك تثقين بنفسك زياده ع اللزوم ، بالله شوفي وجهك كأنه ركبة شغالتنا
رغد : هذا من غير ان فهد مايحب البنات ابد ، يمكن عشق اسلوبك او شي ثاني
وعد : وش تقصدين بشي ثاني
رغد : جسمها ، شوفي صراحه جسمها متناسق ، طول وخصر وارداف وصدر وهيبة ، بس الوجه لك عليه ، يعني يشبع فيك يومين ويرميك ويتزوج وحده احلى منك
وعد : المصيبه مو هنا ، مايتركها الا هي حامل ، ومع الحمل والولاده يخرب جسمها اللي كاشخه فيه ويترهل ويطلع لها كرش مكون من اربع طوابق.
جود : ياربي انا حزينه صراحه ، كسرتوا مجاديفي
اماني : الحمدلله والشكر ، وش استفدتوا من الحوار الفارغ هذا ، المهم جود ، ترا بعد شهر ملكتكم وزواجكم بيوم واحد والمهر بيوصلك بكرا ، نبيك تجهزين كل شي
جود رجفت ايدينها : بهالسرعه ؟
اماني : بتتأخرون اكثر من كذا بعد ؟
جود لمعت عيونها : لا مو كذا ، بس ! حرام ، جواهر ؟ مابي اكون زوجه ثانيه
رغد ضحكت : الخبله عايشه بعالم ثاني ، الزبده ليش ماقلتي بدري عن رفضك ، المسكين فهد حجز القاعه وكل شي ، وتكلّف
جود سكتت وصدت عنهم ، فجأه قاموا كلهم واستغربت جود ناظرت وراها وشافت فهد ارتبكت.
وعد : مانبي نزعجكم ، يالله اجلسي بحضنه وامسكي ايدينه ، وانت يافهد اهمس لها بحب وقول لها يااجمل مخاليق الله احبك واحـ،
سحبتها اماني : توك تقولين شينه ومدري كيف ، امشي بس
وعد : فهد ، لاتنسى القُبله
اماني : والله مو مسلسل تركي ياحماره ..



283
.
لو تشرق الدنيا على نور ضحكتك
مااشتكي للصبح من حزني ابد .
.
دخلوا البنات وجلس فهد جنبها وكان لابس فروه ومتلثم بشماغه : ليش مو متدفيه ؟
جود : مااحس بالبرد
فهد مسك ايدها وكانت مثلجه قرب لها ودخلها معاه بالفروه وضحكت جود بإحراج : وش تبي
فهد : ادفيك بس
جود : اكيد وعد جالسه تتأمل الحين
فهد : ماعلينا من وعد ، علينا منك ، متأكده انك ماتبين تصيرين الزوجه الثانيه
جود تغيرت ملامحها وابعدت عنه : انا ماارضى لنفسي زوجي يتزوج علي كيف ارضاها لغيري ؟
فهد : طيب وعلى بالك اني برضاها لك انا ؟
جود عقدت حواجبها : يعني ؟
فهد : جواهر انا طلقتها من زمان ، البنت امداها تزوجت مره ثانيه !
جود دمعت عيونها : حرام
فهد : تفاهمنا وتفارقنا بنفوس راضيه الله يوفقها ويستر عليها ، عمرك لاتحسين ان لك ذنب بطلاقها.
جود : الله يوفقها يارب
فهد : خلينا منها ، خلينا بالسحر الطبيعي
جود حمر وجهها وصدت عنه وفهد كمل : كان قلتي لهم عن حبي للفواكه ، خصوصاً الكرز ومشتقاته ، والرمان
جود : هم خواتك اكيد يعرفون
فهد : اللي يعرفونه اني احب المباح ، لكن اللي مايعرفونه حبي للمحظور
جود : ممكن اروح انام
فهد : ممكن ليش لأ ، تعالي
قام وايده بيدها وصعدوا جود على نياتها تحسبه بيوديها لغرفة اماني وانصدمت لما فتح باب غرفته ، سحبت ايدها منه : لحظه
فهد سحبها ودخلها وقفل الباب وطفى الأنوار وهمس لها : يالله خافي وترجيني اطلعك
جود : لا مو خايفه بس طلعني
فهد : جميل جداً
جود : ترا السكين معاي لاتقرب
فهد حضنها كلها بقوه وهمس : قربت ، وين السكين ماني حاس فيه
جود : وجع قليل ادب اتركني
فهد تركها : يالله ابعدي ؟ ماتقدرين تبعدين لإنك مستانسه
جود ضحكت وضمته بقوه : احلى شي انك تعرف وش اللي بقلبي ، بس بطلع قبل ينتبهون البنات
باس رقبتها وهمس بإذنها : ماتنامين الليله الا بحضني ، وخليهم ينتبهون
طق الباب ونقزت جود بخوف : يمممه انكشفنا
فهد : احسن ، عشان يعجلون بزواجنا
جود راحت ورا الباب وفهد شغل النور ونزل شماغه وثوبه ودخل اصابعه بشعره وبعثره : واضح اني كنت نايم ؟
جود ضحكت رغم خوفها : بسرعه
فهد فتح الباب وشاف ابوه : هلا يبه
ابوه : كنت ابيك بشغله لكن كمل نومتك
فهد : الله يسامحك اخذتني من احلى حضن
ابوه استغرب : وش حضنه ؟
فهد : المخده
ابوه : ايه تدفى وانا ابوك ، تصبح على خير
فهد : وانت من اهله
قفل الباب وسحب جود وجلسها على السرير.
جود بخجل : انسدح بسوي لك حركه
فهد فهى وانسدح بدون شعور.
جود همست : غمض عيونك
غمض فهد وماسمع الا صوت الباب ينفتح قام وماشاف الا غبرتها ضحك : اوريك يوم الزواج ، بشوف وين تهربين ؟



284
.
انا جريح من الجفى ماني قتيل
محدً يموت من المفارق يابـعـدي
.

لينا كانت واقفه تتزين قدام المرايا ونواف جالس على السرير ويتأملها وهي مو مهتمه ابد ، لبست عقدها وقام وقف جنبها : اسكره لك ؟
لينا : سكرته لحالي ، من قال لك احتاج مساعده ؟ ولاتحسبني بقول اي تعال سكره ، وانت توقف وراي وتسوي حركات مالها داعي وانا اخق ونتبادل النظرات الغراميه وبعدين تبوسني ونصير احلى اثنين ؟
نواف توسعت عيونه : ول عليك لسان ؟ وش ذا سيناريو فيلم ؟
لينا : لا ، اعرف اسوي كل شي لحالي مو محتاجه لأحد ، طول عمري اسكر اكسسواراتي بنفسي ، لاتحسب اني بعجز بدونك !
نواف : لينا شفيك قلبتي ؟ وش هالكلام ؟ وش مسوي لك انا ؟
لينا : مسرحياتك ذي ماتمشي علي ، مو عشان قلت انك تحبني بصير خبله واراكض وراك ، انا صدق اعترفت بحبي لك ، لكن هذا مايعني اني ابيع كرامتي عشانك ، انسى ، اقدر بلحظه اكرهك ولا كأنك انخلقت !
نواف : طيب اكرهيني وارتاحي ، ليش كل هالبربره ؟
لينا : واثق اني مااقدر ؟ بس ترا هالثقه مو في محلها !
اخذت شنطتها بتطلع ومسك ايدها بقوه : وين تبين ؟ ليش هالكشخه كلها ؟
لينا : ياسمين رجعت من السفر وبنجتمع عندها ، بعد شهر زواج جود ، نبي نخطط لزواجها من بدري قبل الزحمه !
نواف : وش المطلوب من ذكر اسم جود
لينا : احب اشوفك تتعذب وعيونك تلمع وانت تسمع اسمها وانها بتنزف لشخص غيـ،
قاطعها بحـده : انخرســـي ، انتي ماتفهمين ؟ كنت احب جود لكن عمر عيوني مالمعت عشانها لإني ادري من اول انها مو لي !
لينا بصوت مهزوز : لكنها الحين تلممممع ، انت تحبها !
نواف : تلمع عشانك ، من حبك ! لكن ماالومك ، الوم قلبي اللي حب وحده ماعندها احساس ، انتظرك بالسياره
طلع وتركها تناطر بمكانه مصدومه ، معقُوله ؟
لبست عباتها وطلعت وراه وركبت جنبه واخذها لبيت ابـو فيصـل ، طول الطريق كانوا ساكتين ووصلوا ونزلت بدون اي كلمـه ونواف راح وهو معصب ، دخلت لينا واستانست بجمعة البنـات كلهم ، سلمت عليهم وجلست تسأل ياسمين عن سفرتهـا ؛
ياسمين : والله روعه شيء لايوصف ، نسيت نفسي ، ونسيت حلويني وابوهم ، شي لايوصف يابنات ، جنة الله في ارضه
رغد : لاوالله جنة الله بسماه الله يعوضنا فيها يارب
ياسمين : امين يارب.
وعد : حزب اللي ماسافروا يحترمون انفسهم ويسكتون
رغد : يابقره وعد ، حنا مو من حزب اللي ماسافروا ، حنا من حزب اللي اخوهم واعدهم بسفره اذا تزوج حبيبته ، وباقي على زواجهم شهر ، يعني بنسافر بعد اسبوع.
كادي : واااعلييييا مسكينه جود ، حتى بشهر عسلها تلقاكم
وعد : محد قال لها تحب اخونا



285
ياسمين همست لجود : مايحتاج تجهزين ، جهازك كله هديه مني ، ارتاحي ، جبت كل شي
جود ابتسمت بأماتنان وحضنتها : عسى الله لايحرمني منك
فرح : يمكن ذوقك مايعجبها
ياسمين وهي حاضنه جود : كيف مايعجبها وذوقنا واحد بكل شي ، حتى مزاجها افهمه ، جبت لها مثل ماتحب واكثر من ما تحب.
جود دمعت عيونها : ياعمري والله ياسمين
لمياء : والمهر وش تسوي فيه ؟
فرح : تعطينا اياه ، ونحن بعون الله سوف نتصدق به على الفقراء والمساكين
كادي : ماصدقت ان ياسمين وجود نفس الذوق الا بعد ماشفت فيصل وفهد ، متشابهين بكل شي ، يعني فعلاً نفس الذوق
وعد : بس اخوي احلى
فرح : يبطي ، اخوي احلى
رغد : ياليل بنات المتوسط
فرح : ترا رايحين لأول ثانوي احترمي نفسك !
رغد : رابع متوسط وانتي الصادقه
فرح : اي صح تذكرت بقول لك سر
جلست جنبها وهمست لها : سلطان صامل عليك ويبي يتزوجك ، يعني ياحبيبتي لاتدقين الثقل ووافقي ، وربي سلطان مايتفوت ، لو ماكان اخوي انا تزوجته ، الوحده وش تبي غير زوج طيب واخلاقه عاليه هذا من غير جمال الشكل والأسلوب ؟ انا اخواني حاقه محصلتش ، امانه ماشفتي وديم كيف مرتاحه وطايره ؟ شوفي ياسمين كيف نفسها تصارخ من حب فيصل وتـ،
رغد قاطعتها بحده : مو موافقه ، واقطعي السيره !
كادي : فرح في جرح بجبهتك ليش ؟
فرح قالت لهم سالفة ليان ، ياسمين تجمعت العبرات فيها ومالقت رد غير انها تحضنهم بكل حبها وحنانها.
➖
لجيـن : بموت قهر ، مسكنها في فيلا ،وحنا ياخواته وامه ضاربنا بعرض الحائط
ام تركي : اخذت ولدي مني ، الله لايسامحها
مريم : يعني وش متوقعه منها بعد ماظلمتيها
ام تركي عصبت : ولا كلمه ، انقلعي وراها كانها عاجبتك
مريم : لو مااستحي واخاف احرجهم رحت لهم ، لكن ابي احترم خصوصيتهم
ام تركي : وليش ان شاءالله هي امك ولا انا ؟
مريم : انتي امي ، لكن هي لها افضال علي !
ام تركي بصراخ : حسبي الله عليك ، وش هالأفضال اللي سوتها ؟ حملت فيك ؟ ربتك ؟ سهرت عليك ؟
مريم : لا ، علمتني ديني ، وصلاتي ، علمتني الراحه والأنس بقرب الله ، علمتني اشياء ماكنت عارفتها ، مرت 25 سنه من عمري وانا ماكنت ادري ايش شهر رمضان ، اسمع عنه بس مادري وش سر عظمته ، الثلاثين يوم من شهر رمضان كانت تمر علي مثل الغمامه ماكنت ادري وش السر ، اسمع بالصوم بس مااصوم مااحد علمني ، ماحد ضربني لمصلحتي ، خمسه وعشرين سنه ضاعت من عمري ، ولااحد حس فيني غير اماني ، محد مسك ايدي واخذني للخير الا اماني ، وتلوميني فيها ؟ وتلومين تركي فيها ؟ يممممه اماني نعمه مرسلها الله لك ، ومن يهمل النعم يُجازى بفقدها ، انتبهوا للباقي من اعماركم !



➖


لو تحسّ شوي بإحساس المريض
ماتـتـمـنـى شـي غـيـر العافيــه


جود : كيف يعني بالعزل ؟
الدكتور : البنت مصابه بلوكيميا الدم
رغد بشهقه : دم ؟ يعني مرض بدمها ؟
جود : طيب دكتور يعني ايش لوكيميا ؟
الدكتور : سرطان دم حاد ، ينمو ويتفاقم بسرعه كبيره جداً، يهدد الحياه لدرجه كبيره ، زيادةً على ان البنت ماعندها مناعه.
جود بحزن : طيب ممكن نشوفها
الدكتور : يابنتي افهميني ، بالعزل ! يعني حتى الأطباء ممنوع يدخلون عليها
رغد تمسح دموعها : دكتور طيب بنناظر فيها من برا
الدكتور : طيب لكن ابي هدوء تام ، تعالوا معي
مشى ومشوا وراه ودخلوا الإصنصير للدور الثاني وطلعوا مشوا مسافه طويله شوي ودخلوا من بوابه كبيره لسيب فاضي طويل.
وصلهم لغرفه كبيره ومغلقه وقفوا عند الباب وناظروا فيها ، كانت ضايعه بين الأجهزه ولاشافوها ابد ..
جود بضيق : الله يشفيك ياجواهر
رغد وهي تبكي : هي اصلاً من انولدت مريضه ، عمر الحظ ماوقف معاها ، يارب انك تشفيها وتفرحها بعافيتها وتعوضها.
الدكتور : اتركوا ارقامكم واذا استجد شي راح نبلغكم
رغد : يعطيك العافيه دكتور
طلعوا من المستشفى وهم متضايقين على حالتها ويدعُون لها.



لمياء كانت تتروش وطفت الكهرباء رقع قلبها خوف صارت تمشي بحذر وتتلمس الجدار لين مسكت الروب لبسته بسرعه وطلعت وهي ترجف وتدور جوالها تبي تشغل الفلاش لكن نست مكانه وصرخت : سعود اذا ماتركت حركاتك السخيفه وطلعت بتندم !
سمعت صوت مفتاح يدخل بالباب وطلعت من الغرفه بسرعه وهي تتلمس الجدران وتحس انها عمياء من قوة الظلام وقلبها زادت نبضاته انفتح الباب بالوقت اللي وصلت له وسمعت صوت سعود : بسم الله الرحمن الـ،
ماحس الا وهي بحضنه وتبكي وتضربه وتصارخ : ليش تطفيه ليش ليش كنت بالحمام وقلبي بغى يوقف
سعود مسكها بقوه : لحظه يابنت الحلال توني راجع قسم بالله مالي شغل كل الحاره طافي عليها
لمياء : كله منك سببت لي عقده من الظلام
سعود : آسف ياعمري ، لو ماسببت لك عقده ماكنتي بحضني الحين
لمياء : ولا كلمه
سعود : طلعتي وانتي متبلله وبللتيني معاك ، بس آه ياريحة الشامبو
لمياء : بموت من البرد والشامبو باقي ماغسلته من شعري تصرف سعود
سعود : العطل من الشركه وبياخذ وقت ، بدخل معاك وكملي
لمياء : لا مستحيل ادخل للحمام بالظلمه اخاف يطلع لي شي واجهض من الخوف
سعود سكت شوي يستوعب وابتسم : قولي قسم بالله العظيم انك حامل !
لمياء : قسم بالله العظيم اني حامل
سعود استانس وباس خدها : احلى بشاره
اشتغل الكهرب وارتاحت لمياء وسعود سرح فيها وابتسمت : بروح اكمل بسرعه قبل يطفي بعد
سعود رجعها لحضنه : تكملين فيما بعد ..



287
الـيـوم المـنـتـظـر ؛
زواج ابطالنـا " فهـد وجـود "
تحقق حلم طال انتظاره ، حلم اثبت ان الأحلام لاتُسجن ، تحققت اُمنيه اتعبت من تمنّاها ، اثبتت ان الأماني ليست مستحيله لو طال مداها ، تحقق امـل واثبت ان الآمال لاتخيب مادامت معلقه بربّ السماء ، رغم كل صعوبات الحيـاه ادركـنـا ان ليس بالأرض من يُحدد مصير خطواتنا، وليس فيها من يوقفها عن التقدم ، ليس فيها من يستطيع تحويل طموحاتنا الجميله لأشلاء ، ربـنـا الله ، وهذا يكفي لنعيش اقوياء حتى النهايــــه ..
الساعه 3 العصر ؛ دخلت اماني بيت اهلها مستانسه ، اجواء العرس والفرحه ماليه المكان تحس البيت يضحك والدنيا ترقص لفرحتهم ؛ طلعت وعد من غرفتها جاهزه وتصور نفسها.
اماني شهقت : يخرب بيتك لابسه من الحين ؟
وعد : اي ، احسن خلصت اول وحده
اماني : ياخبله ، بتظلين كذا لليل ؟ بدري مره ! بيتعبك الكعب
وعد : لاتكثرين كلام وروحي تجهزي
اماني : مالومك من الحماس ، وين عروستنا ؟
وعد : تستهبلين يعني وين بتكون ؟ بالمشغل ، شرايك بفستاني ؟
اماني : مايبيلك ، قمر اربع طعش
وعد : وش ذا المدح النايم ، بقى احد يمدح كذا ؟
اماني : احمدي ربك ، وعريسنا وينه؟
وعد : نايم
اماني بصدمه : تمزحين ؟
وعد : وربي ماامزح ، له يومين صاحي ، مستانس
اماني دمعت عيونها : ياعمري بروح اشوفه
صعدت له اماني ودخلت غرفته وطفت المكيف وقربت له بصوت هادي : فهد قوم ، خوش عريس والله !
فهد : كم الساعه
اماني : بيأذن العصر ، الغريب انهم تاركينك على راحتك
فهد : انا قايل لهم ، قلت ارتاح وراي تعب
اماني : الله يتمم عليكم يارب
➖
بالمشغل ؛
جود : ياخي ماابي مو غصب
كادي : من صحيتي مااكلتي شي مو زين كذا
جود : مو جوعانه
ياسمين : كولي لاتدوخين علينا ماصدقنا على الله يجي هاليوم
لينا : هي بسيطه انها تدوخ علينا ، لكن المصيبه اذا داخت على المسكين فهد
كادي : ياقلبي كم له منتظر يتقفل عليهم باب واحد ، ويوم يتقفل عليهم تدوخ جود وتنعفس الدنيا ، وتصير دخلتها بالمستشفى
جود بصراخ : لاتوتروني اكثر مابي اكل
الكوافيرا : لاحول ولا قوة الا بالله ، جود اثبتي لخبطتيني
لمياء عصبت : بتاكلين بكرامتك ولا اجي اوكلك غصب
جود اخذت الفطيره من كادي وجلست تاكل نتفه نتفه.
لمياء : بتاكلين كل شي موجود
جود : طيب
ياسمين : كادي ردي على جوالك ازعجنا
كادي : مالي خلق له الشايب
لمياء : ردي عليه
كادي ردت : هلا عزوز
ابو سعود : ليش ماتردين
كادي : معليش يابيبي كنت مشغوله
ابو سعود : قاصر عليك شي ياروحي ؟
كادي : لا ، يالله باي
قفلت وماسمعت رده : ينرفز ، مسوي نفسه صغير
ياسمين : مالومه ، كلامك يخلي الواحد ينسى عمره .



288
فرح كانت جالسه وتبكي وتصارخ : حسبي الله ونعم الوكيل
امها : خلاص ماخربت الدنيا
فرح : بس خرب فستاني ، الله لايسامحه الحقير ، مو هذا المقاس اللي عطيته ،
سلطان : تستاهلين ، في وحده تطلع فستانها من الخياط نهار العرس ؟
امه : عليه زحمه
فرح : هذا مو مبرر عشان يخرب فستاني ، والله لا ارفع عليه قضيه
سلطان : بتروحين للمحكمه وتقولين والله ياشيخ انا برفع قضيه على خياط خرب فستاني ؟
فرح : ايه ، ومضيع بين مقاسي ومقاس وحده دبه
سلطان : عطيني الفستان والمقاس ، ومالك الا اللي يجيبه لك بالشكل المطلوب قبل المغرب
فرح : كيف ؟
سلطان : عطيني وخلاص
➖
الساعه 5:30 بالمسجد :
فهد كان جالس ويقرأ قرآن وخاشع اتصلّ جواله ، انتظر لين ماختم السوره وسكر المصحف وردّ : هلا فيصل
فيصل : فهد وينك بيأذن المغرب وانت باقي ماسويت شي
فهد : بالمسجد ، جاي الحين
فيصل : استعجل ياخي ، ضيعت الوقت بالنوم وتبي تضيعه بالمسجد
فهد ضحك : يارجال خلني اشكر ربي على هاليوم اللي طالما انتظرته
فيصل : الحمدلله على كل حال ، ولا تتأخر
فهد : مسافة الطريق
قفل منه وقام صلّى ، صلاة شكر للمره الثانيه وبين كل سجده وركعه كان يردد : الحمدُلله الذي بنعمته تتم الصالحات..
➖
سلطان وصل الخياط وقبله كان في بنت تصارخ وصوتها واصل اخر الدنيا ومدخله راسها كله من الشباك : انت ثور ماتفهم ؟ عشرين مره اجيب لك الفستان وتخربه لي ، بعد شوي الزواج ياحمار باقي ساعتين ، خرب شعري بسببك
سطان : ترا ماله ذنب للمعلوميه !
ناظرت فيه بحقد : انت وراي وراي وين مااروح
سلطان يتذكر وين سامع صوتها وابتسم : رغد ،طلعي راسك ترا عيب !
رغد بقهر : دافعه الف ريال عليه ياكلب اللللف ريااال ، والله اذا ماظبطته خلال ساعه بجيب الشرطه ياخذون فلوسي منك
سلطان : الف ريال على فستان ؟ لاحول ولاقوة الا بالله
رغد : مو شغلـ،
سحبها وطلعها وهو معصب : اقصري صوتك ، وانقلعي للبيت انا اجيبه لك
رغد : ماباقي شي على العرس
سلطان دخل عند الخياط وفهمه على فستان فرح ورغد والخياط لأول مره يتمنى انه ماصار خياط.
طلع وشافها تمشي بترجع للبيت وناداها : ترا الطريق طويل وبيخرب شعرك على قولتك ، تعالي اوصلك
رغد ماصدقت وركبت وراه على طول : مافي غير سعود ومايرد على اتصالاتي
سلطان : المره الجايه اذا بتفصلين فصلي بدري
رغد : خلاص مافي زواجات عائلتنا خلصت ، ختمناها مع فهد
سلطان : وانا مو مالي عينك ؟
رغد : اي صح نسيت انك ماتزوجت
سلطان ناظر فيها بالمرايا وغمز لها : نسيتي ؟ ولا بتكونين انتي عروستي ؟
ارتبكت و صار قلبها طبول وصدت عنه.
سلطان : انتظريني على صلاة المغرب اجيب فستانك



289
الساعه 11 الليـل بالقاعه وتحديداً بغرفة العروس ؛
جود مرتبكه ودمعتها بطرف عينها تدعي انها ماتبكي ، والبنات عندها مسوين جو وحماس ورقص وشايلين الدنيا شيييل يحاولون يخففون عليها قبل الزفه ، تضحك ومستاسه لكن طاغي عليها الخجل والإرتباك.
ياسمين وهي ترقص اتصل جوالها وردت : هلا وديم
وديم : هلا ياقلبي
ياسمين : زين ذكرتينا
وديم : والله على البال دايماً ، تمنيت لو حاضره زواج جود بس يالله
ياسمين : والله يجنن ماشاءالله مو ناقص الا انتي
وديم : مالي شغل اذا جيت تسوون عرس مره ثانيه
ياسمين : لا عاد ماحنا فاضين لك ، تعوضين بعرس معيض هههههه
وديم ضحكت : امين الله يبلغني هاليوم ، وينهم ؟
ياسمين : كلهم في امان عند خالتي ، مقفله عليهم بالغرفه وجايبه مربيات مخصوص لهم
وديم : الحمدلله ، وعيالك معاهم ؟
ياسمين : اكيد
وديم : انتبهي لاتدخل ليان وتسوي شي ، ترا ينخاف منها بعد سالفتها مع فرح
ياسمين نغزها قلبها : بروح اشوفهم
وديم : اذا جود قريبه منك ابي اكلمها
ياسمين : طيب
مدت الجال لجود : وديم ، تبي تكلمك
جود اخذته برجفه وردت : الو
وديم : احلى الو ، مبروك والله يوفقك وفالك السعاده ، واعذريني قصرت معاك
جود : الله يبارك فيك ، يكفي وجودك بالقلب ، وبس لاتحرجيني اكثر
وديم ضحكت وسولفوا شوي وقفلوا ، ياسمين طلعت للغرفه اللي فيها عيالها وعيال وديم وارتاحت لما شافتهم كلهم موجودين والمربيات وجيههم تجيب الراحه ابتسمت : عرفت تختار خالتي ، لو سمحتوا لاتسمحون لأحد يقرب لهم نهائياً ، اي احد يدخل الغرفه اتصلوا فيني بسرعه ..
وقـت الزفـه :
جود ماسكه ايد ياسمين بقوه وترجف : لاتتركيني اخاف اطيح واتفشل ولا ينشب كعبي
ياسمين : يابنت الحلال مو صاير لك شي ، قولي لا إله الا الله
جود : ابي مويا بسرعه
ياسمين عطتها وشربت جود واخذت نفس ودخلت للقاعه وكانت كلها ظلام وفي انوار خفيفه ومسلطه عليها ، كانت دخلتها على موسيقى هاديه وطلتها جميله لأبعد حد والمصوره قدامها تصور وياسمين وراها تعدل فستانها وباقي البنات ينتظرونها على المنصه.
كادي بعبره : يمه تجنن الله يحفظها
ساره كانت جالسه وصديقتها معاها : ماتستاهل فهد
صديقتها : لا بالعكس انا درستها ، شطاره واخلاق وادب وجمال ، وش يبي فهد اكثر من كذا
ساره : فهد مات لو ماتزوجها ، بس يالله بكيفهم
صديقتها : يعني ماخذها عن حب ؟ صراحه ماينلام انا كنت حاطه عيني عليها لولدي ، الله يهنيهم
ساره : عادي تاخذين لولدك لقيطه ؟
صديقتها : اي عادي وش فيهم اللقيطات ؟
وعد كانت بنفس الطاوله وسمعت كل شي وهمست لساره : مصره تفضحين غبائك ، لكن هي تفكيرها راقي وعطتك بالجبهه ! احترمي جود عيب صارت الحين زوجة اخوك
ساره : لو ماكنا بعرس عرفت ارد عليك يالبزر وبـ..
انصدمت لما شافتها تبكي وتمسح دموعها : وعد ! ليش تبكين ؟
وعد : توني استوعب ان فهد خلاص تزوج ، وبيصير بعيد عننا وله بيت مستقل وزوجه يحبها وبيجيه عيال ، بيعيش حياه ثانيه غير عن حياته معانا.
ساره : ليه ماقلتي كذا بزواجه الأول ؟
وعد : كنت ادري ان جواهر ماراح تغيره لإنه مجبور عليها ، بس جود يحبها
ساره : اسكتي ضايقتيني ، تهقين جود بتغيره علينا وتاخذه مننا ؟
وعد : مستحيل ، لأن تفكيرها ارقى من تفكيرك
ساره عصبت ومامداها ترد لإن وعد راحت ترقص.
بعد خمس دقايق اعلنوا دخول العريـس ، وتغطوا الحريم ، وجود زادت رجفتها : لايدخل
كادي : تغارين عليه ؟
جود : انا وين وانتي وين ، مابيه يدخل بموت من الخوف مستحيل احط عيني بعينه
لمياء : خلاص هدي نفسك كلها دقيقتين وينتهي كل شي.
اشتغلت اغنيه حلوه وتوجهت الأنظار للبوابه ودخل فهد ومعاه امه وخواته وخالاته كلهم يرقصون حوله ووعد تبكي وماسكه ايده بقوه ، وفهد مبتسم لهم وعقله كله باللي لابسه فستان ابيض وواقفه تنتظره مشى لها بدون شعور وكأن مافي بالمكان الا هو وياها من شاف لمعة فستانها نسى الدنيا باللي فيها كانت مثل القمر بنصف الشهر مكتمله وطالعه حوريه تمنى انه ماصار عرس ولاحد شافها الا هو خاف عليها من العين وصلها وهو مبتسم وجود صار عكس كلامها من شافته نست الخوف وابتسمت والخجل سيد ملامحها ، وصلها وباس راسها وارتفعت الزغاريد ، حضنها بكل شوقـه وانتظـار السنين ، ودعوا كل احزانهم هاللحظه غطاها ببشته وباس كتفها بكل حُـب وابعد عنها كانت منتهيه وذايبه والبنات مستانسين ومالين الدنيا بصراخهم وضحكهم ودموع الفـرح ، فهد وقف جنبها ومسك ايدها بقوه وناظر لخواته : يالله ارقصوا قدامي خلصوني بسرعه ابي امشي
اماني ضحكت : لاتستعجل كل الوقت لكم
وعد راحت سلمت على فهد وبكت ضحكوا على شكلها وباسها فهد : لو ادري انك تحبيني هالكثر ماتزوجت
وعد تشاهق : اهم شي القُبله لاتنساها ، مع ان كان خاطري اشوفها بس يالله مو مشكله
فهد : لاتوصين حريص ، مو قبله وبس ، احضان وتفجير للصبح ، والله لأطلع حرمان الشهور كلها
وعد : كفووو اخوي ، لاتتركها ابد ولاتعطيها فرصه تتنفس ، حيلك فيها
ياسمين سحبتها : واضح انه ماسك نفسه بالموت لاتخلينه ينفجر قدامنا، تعالي مو ناقصك
فهد رجع مسك ايدها وهمس لها : اتركي ايدي ترا ماراح اطير !
جود : انت اللي ماسكني مو انا ، شكلك خايف اهرب
فهد : مافي مهرب ، اليوم كلك لي
جود : لاتختبر قدراتي
فهد : نشوف ، ياجماعه خلاص نبي نطلع
رغد : يالله توكلوا على الله.