[فيتامين سي]

301
جود ماتوقعت توصل فيها الوقاحه الى هنا كانت بترد لكن سبقها فهد اللي صحى على صوت امه : لا يمه كانت نايمه بحضني هنا
ام سعود : يايمه مو زين على ظهرك
فهد : كنا نتابع فلم واخذنا النوم ، يمه تقدرين تطلعين على مانتجهز ونجيك
كشرت وطلعت من الغرفه جود اخذت ملابسها وطلعت للدورة المياه اعزكم الله بدون اي كلمه والقهر لاعب فيها ، كانت تدري من لمياء انها حشريه وتغار على عيالها ، ظنت لإن لمياء ساكنه عندها بس ، ماتوقعت بتوصل لبيتها وتدخل غرفة نومهم وتنتهك خصوصيتها.
عشر دقايق وطلعت لافه المنشفه على شعرها وفهد لازال منسدح وعيونه تترقب صمتها ، حس خشمها احمر وعيونها تلمع عرف انها تضايقت وبكت ، قام اخذ منشفته وحطها على كتفه ، قرب لجود وحضنها من ورا وهمس لها يبيها تتكلم وتطلع قهرها : ليش حبيبي يصيح
جود : لا بس دخل الشامبو بعيني
فهد : صدقتك ، ادري الحركه تنرفز بس ماعليه ان شاءالله انها اول واخر مره
جود تكابر ماتبيه يزعل من امه : لا انا اشوف انه عادي
فهد : عادي ! طيب تخيلي لو داخله علينا وحنا .. ؟
جود انحرجت وكمل فهد : بتكلم معاها وبفهمها ، بس قبل بسألك سؤال وجاوبيني بصراحه
جود : حبيبي مو وقت اسأله امك تنتظر
فهد : خليها تنتظر ليش تجي بوقت غلط ، اسأل ؟
جود : اسأل
فهد : متى ناويه توقفين جمال ، متى ترحمين قلبي ؟
جود ضحكت : يارب مايوقف عشان تحبني اكثر واكثر
فهد : آه ياجود ، اتفاهم معاك اذا راحت امي
جود : اي روح بسرعه قبل تدخل علينا كذا وتهاوشني
طبع بوسه على كتفها وطلع ، جود ظبطت شعرها وطلعت لأم سعود.
ام سعود : تو الناس ، كان ماجيتي
جود : والله انتي مسويه لنا مداهمه ، على الأقل معطيتنا خبر عشنان نقوم بواجبك
ام سعود : بيت ولدي وتبيني اعطيك خبر لاوالله لاصار بيتك اعطيك خبر
جود ابتسمت : تدرين فهد لو سمع كلامك وش بيقول ؟
ام سعود : بيقول بيتي هو بيت جود ، وكل مااملك حلالها ، اعرفه وليدي غسلتي مخه
جود : ياخاله انتي تزوجتي عمي ولا احد تدخل بحياتك وقال لك ليش يحبك وليش وليش ! انا ماراح اسرق فهد منك ولا راح اغيره عليك ، تصدقين لو اقول لك انه يحبك لدرجة لاتوصف ودايماً يسولف عنك و.
قاطعتها ام سعود : ماتبين تقهويني
جود تلاشت ابتسامتها بصدمه وبداخلها تقول هذي ماينفع معاها الأسلوب والتفاهم ، مريضه نفسياً ، الله لايبلانا.
دخلت للمطبخ وهي معصبه ، طلع فهد سلم على امه وجلس جنبها وكانت ساكته وتناظر فيه بتعجّب اشرت على رقبته : وش هذا يافهد
فهد مايدري وش يقول : هذا الله يسلمك ، بوسه
ام سعود : من يوم تزوجت وانت هذي حالتك ، يخرب بيتها ذي ماتورم شفايفها
فهد : اذكري الله ، الا الكـرز !


302
رغد جالسه بالصاله سرحانه بالتلفزيون وتاكل اظافرها بقهر ؛ دخل سعود وناظر فيها : رغد ؟
ماردت وكرر : رغد ؟
بدون ماتناظر : نعم
سعود : عسى ماشر ، وش بلاك
رغد بنبره حزينه : انا شينه ؟
سعود استغرب : بسم الله عليك ، رغد صاير لك شي ؟
رغد : سلطان ، بعد ماشافني رفضني ، ماعجبته ، وش اللي مو حلو فيني
سعود : انا قال لي ابوي على موضوع سلطان ، تراه يمزح وهذا مقلب وهو صامل عليك ، بس مو بالسهوله ذي ، والله لأجلده لين يفرق بين المزح والجد ، ويعرف ان هالأمور مابها مزح
رغد بقهر : وانا ماكله عمري هنا وهو يمزح ، حقير ، خل مقالبه تنفعه الحين ، قول له اني رفضت مابي اتزوجه
سعود : لا مو لهدرجه عاد ، هو شاريك ويحبك وهذي ثالث مره يخطبك ، محد سوا سواته، بتتزوجينه لكن بعد تعب وتأديب.
رغد : احس كرهته مابيه خلاص
سعود : مقدر مشاعرك ياقلبي لكن لاتحطين ابوي بوضع محرج بعد ماعشمه بالموافقه
رغد ابتسمت : طيب بس انا اللي بأدبه اتركوه علي
قبل يردّ سعود انفتح الباب ، ودخل عليهم وجه غايب من مـده ، كان مبتسم ومشتاق لهالبيت واهل البيـت.
وقفوا سعود ورغد بصدمه : مشاري ؟
رغد راحت له وهي ترجف من الفرحه وضمته : احلى مفاجئه والله كأنك تدري اني متضايقه وفرحتني بجيتك
مشاري : يابعد عمري ، ماعاش اللي يضايقك
سعود سحبها وسلم عليه بلهفه وكلهم مشتاقين لبعض والفرحه مو سايعتهم.
سعود : الحمدلله على سلامتك ، كان معطينا خبر عشان نستقبلك
مشاري : حبيت افاجئكم ، وين امي
رغد : موجوده ، الله ماعرفناك متغير صاير حلو
مشاري : لأني اخو رغد
سعود : تفضلي هذا رد على سؤالك
رغد ضحكت : كله من سلطانوه حطمني
مشاري : خير مين سلطان
سعود : سلطان ولد عمي خطبها
وراهم كانت امهم تناظر بصدمه وقلبها يرفرف بشوفته ، شهقت بين دموعها وطاحت من ايدها اوراق : مشاري
مشاري ابتسم ولافاتته نظرة الحزن بعيونها راح وضمها بقوه وباس ايدينها وراسها : وحشتيني يايمه
ام سعود تبكي : الحمدلله اللي عطاني عمر وشفتك قبل ماموت
مشاري : اسم الله على عمرك وعسى يومي قبل يومك
ام سعود : الحمدلله اللي حنن قلبك علي
مشاري : وش دعوه انا قاسي قبل ؟ خلاص اذا السفر يضايقك لك علي مااسافر
سعود بصدمه كان ماسك اوراقها : يمه! ليش ماقلتي لنا انك تاخذين كيماوي
سحبت الأوراق منه : مابيكم تتضايقون لإن الموضوع بسيط ومسألة وقت
مشاري تقفل الكون بوجهه : كيماوي يمه ! وبسيط الموضوع ؟
رغد : كل يوم اسأل نفسي ليش امي شكلها متغير ، ماتوقعت انه من الكيماوي
ام سعود : لاتخافون مافي الا الخير ان شاءالله ، وبعدين مو حقن هذا حبوب بس
ماعطتهم مجال يسألون اكثر ودخلت غرفتها.





303
بعد ايـام ؛
أبو سعود عازم العائله بمناسبة رجعة مشاري وبما ان الأجواء حلوه اختاروا البنـات احلى مكان بالنسبه لهم " المخيـم "
كـادي ، كانت جالسه على الجبل وسرحانه ماحست باللي جلست جنبها.
جود : بنت
كادي : بسم الله مانتبهت لك كيف صعدتي
جود : سرحانه مو مع الناس ، وش فيك
كادي تنهدت : افكر بحياتي
جود : متضايقه لأنك تزوجتيه
كادي : لا والله مستانسه ، مع اني مااشوفه زوج ، اشوفه اب لقيت فيه الحنان اللي عشت طول عمري اتمناه
جود بضيق : انا السبب صح ؟
كادي : انتي وجه خير بحياتي ، بسببك كسبت عائله واندرج اسمي مع اسمائهم ، كسبت اهل حقيقيين ، ماكنت بكسبهم لو ماضحيت عشانك وتزوجته ، تأكدي اني ماراح اندم لأني ضحيت عشانك ابد ، جود حنا صديقات كبرنا وتربينا بنفس الظرف ، وش فايدتنا بالحياه اذا ماتكاتفنا
جود : بس ماتوصل انك تضيعين شبابك مع واحد اكبر منك
كادي : انتي ولمياء وياسمين ولينا تزوجتوا من نفس العائله ، وانا لو ماتزوجته ماكملت حياتي معاكم ، وحنا متواعدين نشيب مع بعض ونبقى للرمق الأخير ، وهذا احلى شي صار من زواجي منه
جود : احلفي انك مو زعلانه
كادي : بحلف لآخر يوم بعمري ان زواجي من ابو سعود احلى شي صار ، يكفي اني بكمل حياتي معاكم
جود ضمتها بقوه : احبببببك
وصرخت كادي بضحكه : عورتيني ياحماره ترا انا مو فهد
جود : تبطين ماتوصلين ربعه
كادي : حركات والله
جت ياسمين وشايله هتان ووراها لمياء ولينا صعدوا وجلسوا عندهم.
لمياء : وش عندكم
جود : نتناقش
ياسمين : وليش حاضنين بعض كذا ؟ حبايبي ترا حنا بالبر
كادي : خلوها تعتقني ياخي من يوم جينا وهي تضمضمني وتبوسني تحسبني فهد
جود قرصتها : لاتنطقين اسمه المره الجايه مااعدي لك
كادي : فهد فهد فهد وش بتسوين ؟
جود شدت شعرها بقوه وصرخت كادي : ياحقيرره صدق ماتنعطين وجه ، امزح معاك انا ندمانه لإني ضحيت عشانك وانتي مو كفو
جود : وانا بعد قلتلك احبك تراني اكذب
كادي : ادري انك تكذبين لإني مو فهد
جود شمرت اكمامها : لا عاد انتي زودتيها
كادي : يابنات انا سويت شي غلط
ياسمين : لا والله بس قلتي اسمه وانا مااشوف هذا دافع للغيره
لينا : بس قلتي اسم فهد بمياعه مايصير كذا ياكادي تخيلي اقول عبدالعزيز ؟ عبدالعزيز عبدالعزيز
كادي : عادي قولي للسنه الجايه مااحبه
جود : عاد انا اغار على اسمه ، عندكم اي اعتراض لا سمح الله
لمياء : لا والله ابد خوذي راحتك
ياسمين : جود خوذي هتان شوي
جود : مالي خلق له
ياسمين : يانذله بس شوي
جود اخذته وباست خده ورفعته فوق تنقزه وتلاعبه فجأه رجع عليها وصرخت ورمته على ياسمين : حسبي الله ونعم الوكيل عليك وعلى امك


304
ياسمين وهي تضحك : اسم الله على ولدي
لينا : ترا كانت قاصده الحركه
جود رفست ياسمين برجلها : والله من النذاله
ياسمين : لو سمحتي لاتطيحيني من الجبل ثم اموت وراي عيال بربيهم
لمياء : ياربي اشتقت لسعود ، حسبي الله على ابوه
كادي : لاتدعين عليه وجع
لمياء : تقولين مااحبه
كادي : في فرق بين الحب والخوف ، يعني الحين انا ماحب جود ولا اطيقها بعيشة الله بس ماادعي عليها لإني اخاف عليها واحب وجودها و.
لمياء : انطمي لاتتفلسفين خليني اكمل ، تخيلوا رحت للخيمه ومافيها الا سعود لما دخلت عليه واسترسلنا بالكلام دخل ابوه وطردني قال اتركي التحضن بالبيت مو هنا ، قهرني نذل
كادي : اف يقهر ، تبيني انتقم منه ؟ اروح له واخرفنه وانسيه اننا بالبر
لمياء : حلوه الفكره ، وادخل عليكم واقول ها عمي اترك التحضن بالبيت ، ياويلي على الإحراج
ياسمين : حرام عليكم مايستاهل
لينا : جود وش تسوين
جود : امسح الزفت اللي رجعه علي ، توني عروس ماتهنيت ياكلب
ياسمين : والله محد تهنى بالحياه كثر ماتهنيتي انتي ، اخذتي حظ البنات كلهم
جود : اذكري الله حاسدتني بعد
ياسمين : عندي وعندك خير
لمياء : مشتهيه كفته محروقه
كادي : متى يرتفع وحامك ترا غثيتينا
لمياء : ليه ياخيه متوحمه عليك وانا ماادري
كادي : المسكين سعود خلصت فلوسه على طلباتك ، وفوق هذا مجوعته ماتطبخين ، كل ماصحيت وهو بوجهي يدور اكل
لمياء : حنا متفاهمين لاتتدخلين لا امرغ وجهك بالتراب ، عايشه دور صاحبة البيت
كادي : اصبروا علي قريب بخليكم تنادوني عمه
لمياء : انا زين متحمله عمه وحده ، تطلع لي عمه ثانيه
جود : قلتي اللي بقلبي
لمياء : وش مسويتلك انتي بعد
جود قالت لها سالفة ام سعود معاها وكشرت لمياء : احمدي ربك على الأقل انتي بعيده ، انا ناشبه لي مثل الشوكه بالبلعوم
كادي : عاد خابرتك قويه لمياء ماتسكتين عن حقك
لمياء سرحت وتنهدت : كله من سعود ، من يقول لي عشاني انسى كل شي
لينا : الحمدلله والشكر بس ، المهم حتى انا طردتني ام سعود من بيتها وبكل بجاحه جت لبيتي ، وطردها نواف
لمياء : والله انه كفو ، تستاهل ، رغم انه اخوها بس والله الحق ينقال ، ماتستاهل الإحترام
ياسمين : الحمدلله لإن ام فيصل هي امه مو وحده ثانيه
جود : فرق بين ام فيصل وام سعود
لمياء : وش جاب الثرى للثريا بس
لينا : خلاص قفلوا ع الموضوع لايسمعنا احد ونتطلق كلنا.
جود : تسويها هي تقدر تطلقنا كلنا ، الله يهديها
لينا بشهقه : بنات هذاك مو مشاري
لمياء : الا مشاري ، من اللي معاه ؟
دققوا وشهقوا كلهم بصوت واحد : شــوق ؟
ياسمين : ليش لحالهم
كادي : شوق خايفه وهو مستعجل واضح عندهم شي مهم ؟


305
شوق : وش تبي خير من متى الميانه ؟
مشاري : ابي ادخل بالموضوع بدون مقدمات ، انا سمعت انك انخطبتي ورجعت بسرعه ماتحملت الخبر و.
شوق : عفواً وش دخلك بخطبتي
مشاري : دخلني اني احبك وابيك من زمان
شوق بصدمه : تستهبل ؟ متى عرفتني انت
مشاري : عرفت كل شي فيك ، عشت مع شخصيتك ، عشقتها بكل تفاصيلها ، ميلادك بشهر خمسه ، وتحبين الرسم والكيمياء ، ولونك المفضل اسود ، وعندك صديقه وحده بس اسمها ابتهاج ، تحبين المعكرونه ، وتحبين الفراوله وتكرهين البرتقال وعندك حساسيه منه ، والسلسال اللي برقبتك هديه من ابتهاج من ايام الثانوي و.
شوق بصدمه وعيونها تلمع : صبر صبر مشاري وش قاعد تقول ؟ من وين تعرفني كذا وانا بحياتي ماشفتك !
مشاري : اسألي فرح وهي تقول لك
شوق : لاتجنني وش دخل فرح بعد ؟ انا اسألك انت جاوب
مشاري : هي اختك وتهون الصدمه لاجت منها ، كل اللي حبيت اوصله لك اني ابيك زوجتي
شوق مسحت دموعها وراحت عنه ، دخلت الخيمه تبي فرح ولكن فرح كانت بسابع نومه ، جلست الليل كله ماجاها النوم من الصدمه.
➖
الساعـه 2 الليل :
صحت ياسمين على صياح هتان قامت بكسل بتسوي له حليب ، وكان حليبه مخلص تأففت وطلعت بسرعه ومشت لين وصلت مكان السيارات فتحت سيارة فيصل وكان نايم فيها وصحى على صوت الباب : ياسمين ! بغيتي شي ؟
ياسمين : لا
اخذت الحليب ومشت وقفها صوته : ارجعي لي بكلمك بموضوع
ياسمين رجعت للخيمه وسوت الحليب ورضعت هتان لين نام وغطته ورجعت لسيارة فيصل كان فاتح الباب وجالس ينتظرها : نمتي ؟
ياسمين : اي نمت وقمت على صياح هتان
حوط خصرها وسحبها لحضنه : اهنيك قدرتي تنامين بعيد عني
ياسمين تكتفت وصدت عنه.
فيصل : طيب انا ماقدرت انام ، متعود انتي تنوميني وش الحل الحين ؟
ياسمين : وقح ! حتى اعتذار ماتنازلت واعتذرت !
فيصل : اذا يرضيك الإعتذار اعتذر للسنه الجايه ، سامحيني طلعت من طوري غلطت وعصبت عليك ، وانتي تعرفين اللي بالقلب ، واذا تبيني ارجع واشرح لك غلاك من جديد ارجع ترا ماعندي مانع
ياسمين : ونجلس الليل كله تشرح لي واشرح لك ؟ وش المطلوب الحين
فيصل تنهد : قاسيه وماتلين ، تعالي نوميني وبكرا اشوف لك حل ارضيك بأي شي مع ان مافي غير التراب
ياسمين عصبت : كفوك التراب
فيصل بحده : لاترفعين ظغطي ترا نعسان مو فاضي لك
مسك ايدها وبهمس وعيونه بعيونها : يالله ياسمينتي والله تعبان اهون عليك ؟
ياسمين : شوف ! انا بنومك بس لاتستانس لإني ماراح اسامحك
فيصل : ليش حارمتني من حنانك
ياسمين : لإني تاركه حناني لنفسي مثل ماتبي انت
فيصل : مو من قلبي
ياسمين : اجل وش اللي من قلبك
فيصل : اللي من قلبي اني احبك ..