[فيتامين سي]

306
الساعه 9 الصبّح ؛
شوق كانت واقفه قدام الخيمه وتحتري فرح تصحصح عشان تتكلم معاها ، طلعت من الخيمه بعد ماصلت الفجر وقبل تمشي مسكتها شوق بقوه : تعالي ياجزمه
فرح : يالله صباح خير ، ترا ماسويت شي
شوق : قوليلي وش العلاقه بينك وبين مشاري وبيني ؟ اخلصي علي
فرح بربكه : وش علاقته لاتخربطين على راسي
شوق : تكلمي لا اروح واقول لأبوي !
فرح : لالا بقول ، شوفي هو موضوع قديم
شوق : قولي !
فرح قالت لها موضوعها مع مشاري كامل من البدايه الى النهايه ، شوق كل مالها تزيد صدمتها اكثر واكثر ، ماتوقعت لو 1٪‏ ان اختها ممكن يطلع منها كل هذا ، تتقمص شخصيتها عشان تثبت لصديقاتها انها قويه وتقدر تجيب راس مشاري ، بهاللحظه كرهت كل شي واول شي فرح ، كرهتها كأنها عمرها ماكانت اختها.
بدون ماتحس شوق سحبت شعر فرح وطيحتها ع الأرض ورفستها برجولها وفرح تصارخ بألم وشوق تضرب بكل قوتها وتشتم النايم صحى على صراخها وتجمعوا حولها فرح جاهاالموت وشوق اعماها القهر وتضرب بكل قوتها.
ام فيصل تحاول تفك : بس ياقليلة الأدب ، خلاص اتركيها فشلتينا
شوق مو حاسه بشي وتضرب دخل ريان وسحبها بقوه وصرخت عليه : اتركني خلني اربيها ، الوصخه ذي لازم تتربى البزر الحقيره ، تفووه عليك ولا بارك الله باللحظه اللي صرتي فيها اختي يابنـ،
فيصل بحده : خـلاص ، ريان خذها وروحوا بسيارتي شوي وجايكم
شالوا فرح ودخلوها كانت تبكي من قلب ، مشاري من بعيد يناظر بضيق ماتوقع توصل الى هذي الدرجه حس ماله وجه يشوف عيال عمه ركب سيارته وراح ، ريان اخذ شوق وهي منهاره من داخلها رغم انها مابكت ، طبعها هاديه لأبعد حد وكتومه لكن اللي يدوس لها على طرف يندم ومايسلم من شرها ، ركبها السياره بالغصب وكان ماسك ايدينها الثنتين ويهديها بالكلام وهي مسترسله : قسم بالله ماتركها لو كلكم توقفون معاها ، هالخايسه اللي ماتستحي ولا يجي منها خير.
ريان : يابنت الحلال هدي شوي عيب عليك ، تراها اختك ماتسوى عليها كل هالضرب والسب ! وش صاير بينكم ؟
ركب فيصل وكان معصب : وش هالكلام ؟ في وحده تقول لأختها كذا ؟
شوق : انا ! وماشافت شي اصلاً
فيصل كان بيرد لكن ريان اشر له يسكت لين تهدأ وفعلاً سكتوا وشوق ايدينها على راسها وتتنفس بصعوبه وعيونها تلمع ، مرت عشر دقايق ارتخت شوق وانتظمت انفاسها.
ريان بهدوء : يالله فهمينا الموضوع وبدون صياح ونياح ، اللي لها حق بتاخذه
شوق : اخاف اقولكم وتذبحونها
فيصل : اخلصي علينا قولي
شوق : الحيوانه تكلم مشاري ولد عمي بشخصيتي وهو حبني وانا ماادري عن شي ، كذبت على المسكين وخلته يتعذب ، التبن مرتاحه وحنا اللي اكلناها !
فيصل : ترا هالموضوع قديم وحنا قضينا منه ، وش جاب الطاري الحين ؟
شوق بصرخه : قديم ؟ يعني كنتوا تعرفون ؟ وانا ماادري ؟ وتاركيني على عماي ؟ انتم اخوان ؟
ريان : وش كنتي بتستفيدين لو عرفتي ؟
شوق نزلت دموعها : الله ياخذ فرح وياخذكم معاها اخوان على الفاضي
ريان : شوق لحظه خل نفهمك
شوق : لاتفهموني ولا افهمكم ، هذا قدري عندكم جزاكم الله خير
فيصل : لا ياشوق هذا وانتي العاقله ، كل اللي سويناه لمصلحتكم ، انتي ماتدرين من الأساس يعني ماكان له داعي نخبرك وتتضايقين
ريان : وفرح جاها عقابها ووعدتنا انها ماتكررها ، ومشاري فعلاً يبيك انتي وخطبك ، لاتكبرين الموضوع
شوق : خلاص انا بالنسبه لي انتهى الموضوع ، وفرح ماني مسامحتها
ريان : هالبزر فرح تجيب عقلك ؟ هي صغيره وتدري انها غلطانه وندمانه وانتي كبيره وفاهمه ، سامحيها
شوق : قلت مو مسامحتها وخلاص ، عن اذنكم بنام
نزلت وتركتهم متضايقين على حالتها.
ريان : وين نمت البارح
فيصل : بسيارتي
ريان : جيت ابي اشوفك ولقيت المدام بحضنك ، تحركت مشاعري وعكست الطريق ورحت لوديم وطردتني ، ماعطانا ماعطاك
فيصل : وانا اشوفه كان حضن اقشر اثاريك حاسدني
ريان : تخسي




بعد العصر ؛
كانوا الشباب يلعبون كوره ومتحمسين وصلت الكوره لسعود وقبل يشوتها كسره فهد واخذها منه ، سعود عصب : فاول ياحمار انت ، ماتعرف تحكم
فيصل : مو فاول ، قم مابك الا العافيه
قام سعود وحس احد من بعيد يناديه التفت وشاف اماني ، راح لها.
اماني : لمياء تعبانه
سعود بخوف : وش فيها
اماني : ماادري حيل تعبانه وجهها اصفر ومو راضيه تاكل وترجف
سعود : طيب بروح لها ، اسبقيني وطلعي البنات
اماني سبقته وقالت للبنات يطلعون ودخل سعود ، كانت لمياء متغطيه وتعبانه وجايها الموت.
جلس جنبها ومسح على شعرها بهدوء : عسى ماشر ؟ وش تحسين فيه ؟
لمياء : احس اني مشتاقه لك ، لي يومين ماشفتك
سعود : يعني هذي خطه عشان تشوفيني
لمياء : تقدر تقول ، وبنفس الوقت ترا تعبانه صدق
سعود : ماتشوفين شر
لمياء : لا ياشيخ ، اقول لك مشتاقه لك تقول ماتشوفين شر ؟ وش البرود اللي فيك
سعود : وش تبيني اسوي اخذك بحضني مثلاً ؟
لمياء : ايه تاخذني بحضنك وش المانع ؟
سعود دخل جنبها بالفراش وباس راسها وهو مبتسم : ولايهمك ، اموت انا ولا اخلي شي بخاطرك
حضنته ودفنت راسها بصدره وهمست : لاتروح خلك هنا لين اشبع نوم وارتاح
سعود : حاضر ، سحبتيني من عز حماسي عشان تنامين وتتركيني ؟
لمياء : تحملني ، اخاف تدخل علينا خالتي وتمصخرنا ترا والله تعبانه ومافيني حيل
سعود : ماعليك مظبط الوضع
لمياء : طيب ماشتقت لي ؟
سعود : يعني مو كثير



➖

الساعه 9 الليل ؛ الكل كان نايم وغرقان بنومه الا جود وفهد كانوا متواعدين يطلعون مع بعض ، جود سوت نفسها نايمه لين ناموا البنات عشان ماينشبون لها ، وظلت بفراشها لين سمعت صوته قدام الخيمه يدندن ، قامت وطلعت له كان مقرب سيارته لخيمتها وجالس عليها ولابس ثوب وعمامه ومن شافها سرح فيها ، وقفت تناظر فيه وبينهم مسافه.
قرب لها وهو مبتسم ويحرك السبحه بيده : شيقنعه الطفل لو قال اريدنّ هاي ؟ انا شايل طبع جاهل هسّه اريدنـك
جود : اول مره احب اللهجه العراقيه
فهد : صرت شاعر واكتب ابيات فيك
جود : سمعني
مد ايده لها ومسكتها وراحو يتمشون.
فهد بصوت فخم : استنسخ اشباهك ولوّ مالك اشبـاه
جود ابتسمت : ايوه ؟
فهد : واتأملك في نـاس مايشـبهـونـك.
جود : طيب انا ماعرف اكتب بس اعرف احفظ ، حفظت شي وبقوله لك
فهد : اسمع
جود : والله اني لو دريت إنّك اللي ينتظرني خلف أبواب الزمان ، كنت شلت سنيني اللي عشتها قبلك وجيت.
فهد : وش ذا الشعر اللي اطول مني ، اختيار غير موفق
جود : مالت عليك ماتستاهل
فهد : اسمعي ، يقول الشاعر فهد بن عبدالعزيز
جود : لحظه قبل تقول ، وش سر فخامة اسمك
فهد : انولدت ايام غزو الكويت ، كانت للملك فهد الله يرحمه هذاك الوقت بطولات ومواقف مع الشعب الكويتي ، والوالد طق فيه عرق الفزعه وحب الوطن وسماني فهد عليه ، اقول شعري ؟
جود : احبك موت ، قول
فهد : ضاع الكلام ، قوليها مره ثانيه
جود : احبك ، يالله قول
فهد : يااجمل ايامي والذ اسراري العلانيه
عاهدت قلبك والعهد يبقى موثق ماحييت
جود باست خده : ماادري وش اقول بس تكفي البوسه تعبر
فهد : وصل شعورك ، غني لي
جود : عندي التهاب بالحنجره و.
قاطعها : غني لي
جود اخذت نفس وغنت بكل احساسها :
أبتـدي من منتهـاك حتـى لـو هو انخـتـم
ليـن اصبح مُبتـداك واصبح فـ لائك نعـم
فهد كمل : والعمر وشّو بلاك ؟ والهوى ماله طعم
جود بربكه : انا اول مره اعرف انك تكتب شعر وسبب اسمك ، وانت اول مره تسمع صوتي وانا اغني ، تحمست اعرف اشياء ماكنت اعرفها ؟
فهد : طيب خليني انا ابدأ ، في شي انا ماعرفه بحياتك
جود : لا
فهد : قولي الصراحه ، ماراح ازعل
جود : لا ، كل شي انت تعرفه
فهد : في شي انا متأكد منه ، بس ابيك انتي تتكلمين عنه !
جود بخوف : موضوع ام علي و.
فهد : ليش خبيتي عني ؟
دمعت عيونها وصدت عنه.
فهد : ترا انا عرفت بنفس الوقت من علي بس ماقسيت عليك لإني ادري ان مالك ذنب وعلي جاه اللي يستحقه
لف وجهها له وابتسم : لكن تمنيت انك قلتيلي عشان مااندم لإني تركتك لحالك عند ناس غريبه ، الى اليوم وهاللحظه وانا ندمان ، بس يكفيني انك معي وبخير وسعاده.


➖

309
الجو كان رهيب والبنات كانوا يفطرون ومستانسين وكلهم عيونهم على جود.
وديم : صحيت البارح واتفقد جود ، واتفقدها ، واتفقدها ، مالقيتها
جان اقوم واطلع ، جان اسمع قصايد غزل ونظرات حب جان ارجع وانام
جود : بعد ماسمعتي كل شي رجعتي نمتي
لينا : والله حتى انا كنت طالعه وجان القاكم بويهي ، جان ارد وانام لكن ماسمعت شي ، لا حشا
جود : ماشاءالله ، بعد من سمع
ياسمين : كنا نايمين ، بس صراحه اعجبني بيت الغزل العراقي
جود : اها هذا وانتي نايمه اعجبك ، اجل لوصاحيه وش بيعجبك
لمياء : انا كنت نايمه وارتفعت حرارتي جان اقوم وجان اطلع مجرد ماشفتكم رجعت ولاسمعت شي حرام التجسس
كادي : بصراحه انا كنت صاحيه مانمت ، وجان اقوم ، وجان اسمع كل شي ، جان ارد بس مانمت ، اتصلت على عزوز قلت تعال دلعني زي جود وفهد ونسهر الليل ونتبادل الحب ، جان يجيني ، جان نسهر ونتبادل الحب ونصير النسخه الثانيه من جود وفهد
وديم : انتم النسخه التعبانه من جود وفهد
كادي : لايغرك انه شايب قسم بالله كأنه شباب اخ ياقلبي بس
رغد : لاتغازلين ابوي قدامي
جود : اصلاً خبل اللي ينام عندكم
لمياء : خبل ؟ ولاتبينها من الله تنامين بأحضان فهد
جود : مالك شغل
لمياء : كلها يومين ونرجع ، لاتستعجلين على رزقك
رغد : من زمان الرقبه ماتطبعت وتكرزت
وديم : لا بلاك ماتشوفين ، تعالي بمكاني وتشوفين
رغد : لا مابي اشوف مابي احرجها ، شوفي كيف مغطيه رقبتها
ياسمين : خليها هي رقبتها تتكرز عادي عندنا حنا ستر وغطا ، البلا والله اذا تكرزت رقبة فهد ، جالس بينهم ومرجله وعلوم رجال ودق خشوم والأخ رقبته مزورقه ، بتطيح هيبته ترا
وديم : منجد ترا فشله ، يعني امسكي نفسك هاليومين ولاتحطين رجالك بمواقف بايخه
جود : يارب يارب انك تحط كل وحده فيهم بموقف ماتنساه لين تموت من قوة الإحراج وطيحة الوجه
ياسمين : والله حنا ناس نمسك نفوسنا
جود : واضح ماسكه نفسك لدرجة انك نايمه بسيارة فيصل
ياسمين : بس يعني ماصار شي ، ماخذني ورحنا مكان بعيد اخر الليل
لمياء : جود تحسب كل الناس مثلها ، ترا مافي غير النسخه التعبانه كادي وعمي ابو سعود
جود : اي اشوفك يالمياء سحبتي سعود من بين الشباب وعز اللعب ونمتي بحضنه ، ماتشوفون انفسكم بس تشوفون جود
طلعت وعد وهي تبكي تعدتهم وراحت بعيد وقامت وراها جود : والله اذا جلست عندكم بتعب من نغزاتكم ، بروح اشوف وعد ابرك لي
وديم : وبالمره خلي وعد تنادي لك فهد واضح انك محتاجته حالياً الأجواء رومنسيه وشاعريه
جود : لا بخليها تنادي لك ريان وتفكيني من شرك ، اصبري
وديم : ياليت والله مشتاقه له
جود : ابشري باللي يجيبه لك.



310
راحت جود لوعد وجلست جنبها على الجبل ، مستغربه منها تبكي وتشاهق.
جود : وعد ، فيك شي
وعد : بموت ياجود قلبي يحترق ، محد يحس فيني ، من يوم انخلقت وانا اتخبط بالدنيا ماعمر احد قال يابنتي وش فيك ، اخواني عمرهم ماجلسوا معاي وسألوني عن اللي يضايقني ويجرحني ، عمري ماحسيت اني شي مهم ، انا القعده واخر العنقود ولاحسيت بهالشي ، تعبت نفسيتي ياجود
جود ضمتها وقلبها رق عليها : تعوذي من ابليس ، اللي اشوفه انا عكس كلامك ، كل البيت يحبك وانتي اهم شي بحياتهم.
وعد : لالا ساره عمرهاماجابت لي هديه ، وسعود عمره ماطلعني معاه ، وفهد معتمد على سعود ، واماني صارت ماتجينا ، ورغد ثقيله وشخصيتها مو زي شخصيتي ، ومشاري متغير من زمان ، تلوميني اذا تضايقت
جود : انا مادري عن باقي اخوانك لكن فهد خوذي الكلام مني ، انتي اقرب وحده لقلبه وانتي تدرين بهالشيء ، وهو اكثر واحد يحبك بينهم ، تنكرين ؟
وعد : لا ، صح كلامك
جود : وليش كل هالضيق والكلام ؟ قوليلي ؟
وعد : كنت خاقه على مشهور من سنتين ، وكنت اكابر ومابي اضيفه عشان مااحبه اكثر وانامو ناقصه ، وامس ضفته ، اول ماضفته نزل خبر يقول تم عقد قراني ، وش هالحظ ياربي انا وين الله بلاني بمجتمع قاسي
جود قامت : افلقيني اذا جيت اواسيك مره ثانيه ، انا احسب احد مضايقك ولا حاسه بشي ، طلعتي متضايقه عشان مشهورك تزوج ؟ على اساس بيتزوجك لو ماتزوج غيرك ؟
وعد : لا بس ماعرف احب واحد متزوج ، اه ياقلبي ، المشكله اني ماقدر انساه لإني بنيت احلامي معاه
جود : والله تراب عليك وعلى احلامك
وعد : ياعزيزتي انتي حبيتي فهد وتزوج وبعدين طلق وبعدين تزوجك يعني يوجد امل بالحياه
جود : حبيبتي لا تقارنين نفسك ولا اي احد بالدنيا فيني انا وفهد ، انا وفهد غيييييير قصتنا مختلفه
وعد : لا انا عندي امل
جود : يالله قلبك رهيف
وعد : خليني اوريك صورته عشان لاتلوميني
فتحت جوالها وشافت جود صوره : تعرفينه
جود : يوووه ياقدمك ، ماتوا اللي يخقون عليه
وعد : انا كنت من اوائل معجبينه لكن مطنشته قلت لين يطيح سوقه شوي وبحبه ، ويوم طاح سوقه وضفته تزوج ابن الكلب ، المشكله زوجته شينه وتلوع الكبد
جود : مادرى عن هوى دارك وريحي راسك ، وروحي نادي ريان وقوليله وديم تبغاك ورا الجبل ، وانا بروح اقول لوديم ونجمعهم
وعد : الله ياحظهم ، بيجلسون يسولفون ويمسك ايدها ويتغزل فيها ويبوسها ، ويمسح على شعرها ، وتضحك معاه وتنام بحضنه وتحس بـ،
جود راحت وتركتها وعد كملت تسولف على نفسها : وانا هنا اندب حظي واقلب راسي ، لي سنتين ماحبيت ويوم حبيت تزوج ، يارب انك تعوضني بواحد يحبني ويحميني من غدر الحياه والناس ..