[فيتامين سي]

311
وديم صعدت للجبل ونزلت للطرف الثاني كان ريان واقف وينتظرها وحاس بخطواتهآ بس مالتفت عليها ، نزلت وقفت وراه ورفعت ايدينها وغمضت عيونه : انا مين !
ريان : شوق !
وديم : غلط
ريان : اذا ماخاب ظني فيصل ؟
وديم : غلط
ريان : والله الصوت مثل صوت سلطان
وديم : قربت
ريان : امي ؟ او ام سعود وحده منهم !
وديم تخيلت ام سعود تسوي هالحركات وضحكت.
مسك ايدينها والتفت عليها وديم باست خده بلهفه : اشتقت لك
ريان : واللي يشتاق لي يطردني اذا جيته ؟
وديم : حبيبي والله كانوا البنات صاحين واستحيت مابي اصير زي جود المسكينه لما راحت لفهد تمصخرت
ريان : ماينلام فهد معرس ، خلاص انتي خليك اسمعي كلام البنات وانا بدور وحده تسمع كلامي انا وبس !
وديم : موجوده
ريان : مين
وديم : وعد ، تعالي وعد ترا شفتك
ريان : وينها ؟
وديم : لحظه
مشت شوي ولفت من ورا الجبل وسحبت وعد بقوه : بسم الله وديم اعصابك ترا ماسمعت شي انتم بعيدين
وديم : وش بتشوفين ؟ تنتظرينه يحضني وتستمعين بالمنظر ؟
وعد ببراءه : ايه من زمان ماشفت حضن
ريان : لا وعد بزر وتحب اخواني كلهم ، انا ابي وحده تحبني لحالي
وديم : حظك مافي الا وعد ، وانت تقدر تخليها تحبك لحالك
وعد : بصراحه مااقدر ياوديم ، قلبي يحبهم كلهم
ريان : اتركيها وخليها تنقلع وتعالي انتي
وديم راحت وهي معصبه وصرخت : اتمنى تلقى اللي تبيها
ريان : وانتي خليك على دلعك لين القآها
وعد : انت ماتستحي على وجهك تقول كذا ؟ مصدق اني بعطيك وجه ؟ تخيل انا بجمالي واناقتي اخذ واحد متزوج وعنده اربع عيال ؟ اعوذبالله بس
ريان طلّع ريال من بوكه وعطاها وعد استغربت : ليش ريال
ريان : هديه مني لك ، اذا كبرتي بعطيك ريالين ، يالله ارجعي لماما قبل تغيب الشمس وتضيعين ترا بيجيك الوحش وياكلك
وعد انقهرت وراحت وضحك ريان : مصدقه نفسها كبيره الأخت
جلس بمكانه على امل وديم ترجـع لكن مرت ربع ساعه ومارجعت وديم وجت بدالها فـرح كانت متضايقه : ريان
ريان : هلا فرح ، تعالي اجلسي
جلست جنبه وابتسمت : وش قايل لوعد جالسه تبكي ووديم تهديها
ريان : ابلشتنا هالبزر ، كل محد ناظر لها قالت يحبني هههه والله مشكله
فرح : كلكم استانستوا الا انا ، نكدت علي شوق
ريان : لاتلومينها صدمتها كبيره ، ومهما صار تراها تحبك ولاترضى عليك ، وانتي تعرفينها قلبها طيب وماتشيل ، ماتحسين الا هي جايه وتراضيك
فرح : انا ادري الي سويته كبير لكن خلاص راح وعدى وانا تبت ، بس الله يهديه مشاري قلب المواجع
ريان : مشاري يحبها ولو توافق عليه بينحل كل شي ، انتي اطلعي من الموضوع ومالك شغل واتركي شوق علينا ، بس بتروحين معاي الحين وتعتذرين منها .



312
فرح بربكه : اخاف تتكلم وتجرحني مره ثانيه
ريان : لا ماتسويها شوق ، وين مكانها
فرح : شفتها راحت ورا الخيام ، تعال نشوفها
رجعوا لمكانهم واول ماوصلوا طلع سلطان ومعاه شوق وكانوا يضحكون وكشرت شوق لما شافت فرح.
ريان : سبحان الله فرح كانت جايه لشوق وتبي تراضيها
سلطان : حتى شوق بتعتذر من فرح ، اللي صار صار وانتم خوات وقلوبكم على بعضكم
فرح بهمس : ريان شوف نظراتها اخاف تضربني
ريان : لاتخافين روحي بسرعه
فرح تقدمت بهدوء وباست راسها : انا اسفه واوعدك انها ماتتكرر ، وترا انا احبك وماقصدت شي ، وانتي مو بس اختي ، انتي امي الثانيه وكل شي حلو بحياتي ، كل ماتغيب امي القاك بدالها بس لي يومين مالقيتك ، لو مهما تجرحيني راح اظل احبك ياشوق
شوق كانت تخزها ونظراتها تحرق ، فرح خافت ، شوق ضحكت وضمتها بقوه : وربي من يومك حماره وشيطانه بس احبك
سلطان وريان راحوا وتركوهم يتفاهمون براحتهم ، وفعلاً جلسوا شوق وفرح وتفاهموا وحلوا الموضوع بينهم وفرح اقنعت شوق توافق على مشاري.
رغد كانت تناظر فيهم وهي مرتبكه ومتردده لكن اخر شي ثبتت على قرارها راحت لهـم وهي مبتسمه : ممكن خدمه بنات ؟
شوق : امري
رغد : طبعاً اكيد عندكم خبر بالحركه اللي سواها سلطان ؟
فرح : اي عندنا خبر انه مصخرك
رغد : المهم انا ابي ارد له الحركه ابيه يندم ، ولازم مساعدتكم
شوق : رغم انه اخوي بس يستاهل ، مو سهل اللي سواه
فرح : قولي لنا الخطـه ؟
رغد جلست وقالت لهم خطتها وقاموا ثلاثتهم عشان ينفذونها.
سلطان كان واقف عند سيارته ويحوس داخلها جت عنده فرح : مشكور ياحلى اخ ، تراضينا
سلطان : مبروك
فرح : وش مشغول فيه ؟
سلطان : ادور نظارتي حاطها هنا بس مدري وينها ؟
فرح : اخذتها رغد كنا نتمشى وعيونها تألمها من الشمس وسيارتك قريبه وعطيناها نظارتك
سلطان ابتسم : عليها بالعافيه
فرح : ياعمري اللي يحبها ، ودك تجلس معاها ؟
سلطان : لاعيب ماملكنا ، اذا ملكنا يصير خير
فرح : انا سامعه ابوي يقول من نرجع يملك سلطان على رغد ومشاري على شوق ، يعني لاتشيل هم ، اجلس معاها خمس دقايق بس
سلطان : شورك وهداية الله ، وينها ؟
فرح : بخيمة البنات ، تعال مافي احد كلهم يتعشون
راح سلطان وتركته فرح ، اول ماوصل خيمة البنات طلعت منها شوق : وش تسوي هنا
سلطان : ابي اجلس مع رغد شوي
شوق : اي رغد راحت ورا الخيمه ، روح لها
سلطان : عاد لاوصيك غطي علينا
شوق : لاتوصي حريص
مشى سلطان وقبل يلف ورا الخيمه سمع صوتها تكلم وارتفع ظغطه من الكلام : حبيبي انا ماوافقت على سلطان بس اخواني اجبروني ، انا ابيك انت وانتظرك من سنين ، يخسسسي سلطان يوصل نصف مواصيلك !
سلطان سحب منها الجوال وبنبره حاده : والله مايخسي الا وجهك يـ،
شاف الجوال طافي شحن وهي مو قاعده تكلم اصلاً ناظر فيها بإستغراب
خافت رغد من عصبيته : بسم الله اعصابك
سلطان : مااشره عليك ، اشره على اللي علمك التمثيل
رغد : ماحسبتك بتاخذ الجوال وتشوف
سلطان : لاتقارنين نفسك فيني ، هذا مو مزح ! هذي صياعه وقلة ادب ، الحمدلله انه مقلب ، ولا كان دفنتك هنا ومشيت !
رغد : ياربي انا وش سويت بحياتي عشان تبلاني بواحد مجنون
سلطان بهدوء : كلها يومين وتشوفين مين المجنون !


البنات كانوا جالسين ينتظرون العشاء وصرخت وعد : خالي اخلص بنموت جوع
نواف : يعني اجيبه لك وهو مااستوى ؟
وعد : ايه عادي اخلصوا تراني معصبه وحزينه
نواف : حاضر
قرب للنار وغمض عيونه حيل و الحراره براسه ماحس الا صياحهم وسحبوه بقوه ورشوا عليه مويا وانواع الضرب والرفس على راسه.
نواف : لحظه شباب ،ياشباب
لينا مسكت ايدينه بخوف : فيك شي نواف
رفع راسه وانصدم لما شافهم كلهم حوله : وش صار ؟
ام سعود بخوف : شب شعرك احترق ، اسم الله عليك تحس بشي
نواف : لا انقذتوني قبل احس ، عز الله انكم مطانيخ
وعد : ماعاد ابي عشاء اهم شي سلامتك
نواف : والله الا تتعشين
فيصل : قم خلاص انا اكمل
سعود : انتبه لشعرك انت بعد لايتشلوط
ام سعود : قم يانواف ادخل للخيمه ريح ، لينا خوذيه بسرعه
لينا : يالله نواف
قام معاها ودخلوا للخيمه ، ياسمين شافتهم كلهم مشغولين بشي وفيصل يراقب الشوي وقفت جنبه وهمست : انتبه لنفسك لايحترق شعرك
مايمديه يرد الا راحت وابتسم : حاضريـن.
عند نواف دخل للخيمه ولينا كاتمه الضحكه على شعره.
نواف : لاتكتمين اضحكي
لينا : شوف ترا هو ماحترق كله بس صار يضحك يعني شي طويل وشي قصير
نواف : عادي اصلاً كنت بحلقه كله صفر
لينا : لاتحلقه ابد كذا عاجبني
نواف : عاجبك ؟
لينا : والله كل شي فيك احبه
نواف : خلينا من شعري وشعرك ، تدرين اني مشتاق لك
دخلت ام سعود مستعجله : فيك شي
نواف : لا الحمدلله
ام سعود : خلك بتتعشى هنا ، لينا جيبي له العشا
نواف : خلاص ياام سعود ترا كله شعرتين احترقت وخلاص
لينا : انا قلت للبنات يجيبون لنا هنا وبنجلس نتعشى مع بعض
ام سعود كشرت وطلعت وشافت اماني تتمشى وجوالها بيدها نادتها : وش فيك
اماني : لازم ارجع تركي تعبان
ام سعود :عساه مايقوم ، نخرب طلعتنا عشانك
اماني دمعت عيونها : لاتدعين عليه يمه ، اكثر شي يقهرني اني قدرت اغيّر عائله كامله بسنه وحده ، وانتي عشرين سنه ماقدرت اغيّرك وانتي وحده !



214
بعد يـومـين ؛
في بيت ابو سعود ؛
وعد : الله اماني وش هالجمال ، تهبلين
اماني : فستاني حلو ؟ شعري حلو كذا ولا اجيبه على جنب ؟
وعد : لا كذا كيوت ، كل هالكشخه عشان تركي
اماني : لي اسبوع ماشفته
وعد : بشتاق لك كثير
بعد عشر دقايق طلعت اماني ودخل نواف معاه لينا ، سلمت عليهم وراحت مع تركي ، دخل نواف واستقبلته ام سعود : وعد خلي لمياء تصلح حلويات وتجهز القهوه
نواف : لاتتكلفون ماله داعي بس ابيك بموضوع
وعد : يمه لمياء حامل ومو زين كل شوي طالعه نازله حرام
امها عصبت : سوي اللي قلت لك ، وانتي لينا روحي مع وعد
لينا انقهرت من تعاملها مع لمياء : مافيني حيل اقوم يمكن حامل انا بعد
ام سعود : وخير ياطير حامل ، لمياء ابوها كان موجود ومدلعها بس انتي من عندك يعلمك الدلع
لينا مسكت ايده : عندي نواف حبيبي
ام سعود بغيره : يالله لاتبلانا
نواف : انا بعت بيت ابو فارس وناقص حضورك بالمحكمه
ام سعود عصبت تدري ان البيت بيجيب مبلغ كبير وحقدت على لينا بكم شهر صارت تلعب بالفلوس ، ولينا عرفت تفكيرها وابتسمت لها تقهرها اكثر.
دخلت كادي وكانت بحجاب الصلاة العريض جلست جنب لينا.
لينا : ليش طالعه كذا
كادي : مالي خلق اسوي شي
لينا : يمكن حامل بعد
كادي فهمت قصدها ورفعت ايديها : الله يسمع منك
لينا بهمس : وربي بموت من القهر تخيلي عندها خدامه ومخليه لمياء تشتغل وهي تعبانه
كادي : حسبي الله عليها
دخلت وعد شايله القهوه وجلست جنب نواف : ابيك تخلص قهوتنا اليوم وحلوياتنا كلها
نواف : والله معزوم بس جيت عشان شغله ، مره ثانيه ان شاءالله ، الا وين رغد ماشفتها
وعد : من رجعنا وهي ناقعه بحمام الساونا وتسوي مقشرات ومدري ايش لجسمها تقول احترقت من الشمس ، قلت لها جيبي خالي نواف حطي شعره ههههه
نواف : حلقته على الصفر
وعد : قهر كان حلو
لينا حست ام سعود بتطلع شياطينها وراسها يبخر من القهر ومااكتفت ابد : نواف متى بتشتري لي العقد الألماس اللي وعدتني فيه
نواف : اليوم
لينا : وابي الساعة الرولكس اللي لونها ذهبي وردي ، وجيب منها اثنين عشان بهدي وحده عزيزه على قلبي
نواف : حاضر
كادي ضحكت على وجه ام سعود ، وكملت لينا : وابي فستان اشواريا راي اللي لونه سمائي تراه مو غالي مره ، بعشر الاف ريال بس ، انا سايمته عند مصممه ، بلبسه بزواج صديقتي
ام سعود : عشر الاف على فستان ؟ ياربي لاتسخط علينا
لينا : اي تخبرين انا حديثة نعمه لازم اهايط عند صديقاتي شوي ، وش قلت نواف ؟
نواف : على هالخشم
لينا : يسلم لي الخشم وصاحبه ، الله يخليك لي
ام سعود : قصدك الله يخليلك فلوسه
لينا : هو وفلوسه ..



215
طلعت وركبت مع تركي و باست خده : وين محمد ؟
تركي : كذا قدرتي تتركيني اسبوع كامل ؟
اماني : لو علي مابعدت عنك ولادقيقه ، كيف صرت الحين
تركي : احسن ، نزلة برد وراحت ، استانستي ؟
اماني : اي والله ماكان ناقص غير وجودك معانا
تركي : الجايات اكثر ، اليوم بترتاح مني مخدتك
اماني ضحكت : ليش ؟
تركي : من كثر مااحضنها ، ريحتك فيها ، مااقدر انام وهي مو بحضني
اماني : لو ادري انك بتشتاق لي هالكثر مارحت
تركي : اهم شي انبسطتي ، وين تحبين اوديك
اماني : مادري براحتك
تركي : امي وخواتي مسوين لك عشاء ، بس خلينا نتمشى ونسولف ، مشتاق لسواليفك
اماني : على هواك ، بقولك وش صار ، رغد اختي انخطبت ، والخبله وعد تقول وش معنى انا مانخطبت اكيد عنست
تركي ضحك : مستعجله ، تحسب الزواج لعب اطفال
اماني : ياربي مره متأثره بالمسلسلات ، حاولنا نمنعها بس ماقدرنا
تركي : خليها تعيش حياتها مصيرها تكبر وتعرف
اماني : وسعود منتظر اول ولد له ، مستانس مره ويعد الأيام
تركي : وفهد ؟
اماني : ياعمري فهد مستانس طاير من الفرحه ، احس انه فوق الغيوم ولاهو مع الناس ابد
تركي : الله يسعده يستاهل ، ومن باقي من اخوانك ؟ مشاري وساره ؟
اماني : ساره ياعمري من يوم تزوج سيف عليها وهي متغيره ومشاري خطب شوق بنت عمي وزواجهم مع زواج سلطان ورغد ، الحمدلله
تركي : خلصتي اخبار اخوانك ؟
اماني : ايوه
تركي : انا وش دخلني بأخوانك ؟ سولفي عنك مشتاق لك !
اماني : انا ماعندي شي جديد ، انت وش عندك ؟
تركي وقف عد مسجد كبير وشكله من برا جميل لأبعد حد .
تركي : هذا اللي عندي
اماني : مسجد ؟
تركي : بنيته بأسمك ، وبصير الإمام فيه
اماني دمعت عيونها : الله يكتب اجرك
تركي : انا لولاك ماازهرت حياتي
اماني استحت : تأخرنا على العشاء
تركي ضحك وعكس طريقه ورجع لبيت اهله ، وصلوا ودخلوا ، ام تركي وبناتها استقبلوا اماني احلى استقبال ، تغيروا معاها ومع انفسهم لدرجة انها حست انهم الأشخاص الغلط ، حمدت ربها الف مره على النعمه اللي هي فيها.
لجين : صراحه ماادري كيف كنتي متحمله محمد ، غثيث ، مزاجه صعب
محمد : انتي الغثيثه
اماني : صعب بس لو تتعودين له بيصير سهل ، تعرفين كان عايش بمكان ثاني وعنده تفكير ثاني ونظره ثانيه ، فلازم نتحمله
تركي : لجين ، تعرفين فارس الـ ؟
لجين بربكه : اخو صديقتي
تركي : كلمني اليوم وقال انه بيتقدم لك رسمي هاليومين ، فكري بالموضوع
لجين : ان شاءالله
ام تركي : مبروك ، الله يوفقكم ويكتب لكم الخير وعقبال مريم
اماني : وعقبال محمد بعد ..



216
بعـد سـنـه وسـت شـهـور :
لمياء جالسه على سريرها وتذاكر وجنبها ولدها " عزيـز " عمره ثمانية اشهر وكان يبكي شوي ويسكت شوي ، اذا بكى تبكي معاه وتتوتر وتنسى كل المعلومات.
اخذته وطلعت للصالـه كان سعود جالس ويتابع برنامج وقفت قدامه وهي معصبه : باقي ساعات على الإختبار ، خذ ولدك ابي اركز شوي
سعود : نوميه
لمياء : مايبي ينام ، الله كاتب لي الرسوب ، انا اساساً غبيه كيف كملت الجامعه وانا عندي ولد وحامل بالثاني
سعود اخذه منها : يالله لاتضيعين وقت
لمياء دخلت غرفتها وسعود نزل وحصل امه وابوه داخلين ، ابوه تعداه ودخل للغرفه ، وامه ملامحها باهته اول ماشافته ابتسمت واخذت منه عزيز وباست خده : هلا عزوزي
سعود : يمه فيك شي
امه : لا ياغناتي
سعود : متأكـ..
الجمته الصدمه لما عزيز سحب حجابها وطاح وبان راسها ، كان مافيه ولا شعره براسها.
سعود رجفت ايده من الصدمه والخوف : يمه وين شعرك ؟ فيك شي ردي علي ؟
ام سعود دمعت عيونها : من الكيماوي يايمه ، حتى حواجبي طاحت لكني غطيتها بكحل
سعود حس ظهره ينقسم نصين : لاحول ولا قوة الا بالله
ام سعود : لاتضايق يايمه ولاتقول لأخوانك ، اللي كاتبه الله بيصير
سعود باس راسها وقلبه يحترق : الله يشفيك ويطول بعمرك ويخليك لنا
امه : ويحفظك ربي لوليدك ولايوريني فيك مكروه.
اخذ عزيز منها ودخلت تنام ، دخل غرفة وعد وشافها جالسه وفاتحه كتابها واضح نور الجوال منه ابتسم : وش تسوين ؟
وعد : اذاكر
سعود : سبحان الله ، وليش تبكين
وعد : لإني ماختمت
سعود : والله انك ماتذاكرين وانك تبكين عشان بطل مسلسلك مدري وش صار له ، صح ؟
وعد زادت دموعها : صح بس مو البطل ، صديقه ، تخيل كلهم يحبون نفس البنت وهي تضحك عليهم عشان تسرق فلوسهم ، وتحب واحد يضحك عليها ويحب وحده تضحك عليه وتحب البطل.
سعود : مافهمت ؟ ابي اللي تبكين عليه الحين مين ؟
وعد : صديق البطل ، مات من حبه لها ، معقوله في احد يموت عشان حبه ؟ ياربي وينهم ذولاء ؟ ليش محد يموت عشاني ؟ طيب مابيه يموت عشاني على الأقل يحبني ! مافي اعوذ بالله ، يالله الجنه
سعود سحب جوالها وطفاه وحطه بجيبه : ادرسي عز الله مو نافعك الا شهادتك ودرجاتك
وعد : الدرجات وش تفيدني بالقبر
سعود : والمسلسل وش يفيدك بالقبر ؟ وعد شدي حيلك واتركي حركات المتوسط الحين انتي بالثانوي مرحله مهمه ! ادرسي ياوعد ، شوفي لمياء بطنها قدامها حامل وعزوز مجننها ومع ذلك تدرس ، انتي وش عندك من الأشغال اقنعيني ؟
وعد : من الآخر ، انا وحده ماعندي طموح بالحياه
سعود عصب : اكبر طموحك الحب والزواج ؟ ساعتين واجي اسمّع لك واذا مالقيتك حافظه لأضربك ضرب عمرك ماتنسينه !



317
الساعه 2 الظهر ؛
دخل سلطان لبيته ومخبي شي ورا ظهره ونادى رغد لين طلعت له كاشخه ع الأخير كأنها امس ليلة زواجها ابتسمت : هلا حياتي ، وش مخبي وراك
سلطان : هديه ، توقعي ايش
رغد بفرحه : ياعمري انت الله لايحرمني منك حتى وانت راجع من دوامك تعبان مانسيتني ، اتوقع ذهب ؟
سلطان : لا
رغد : جوال ومعاه حركات ورد وكذا ؟
سلطان : لا
رغد : لابتوب عشان الجامعه لأني قايلتلك لابتوبي خرب
سلطان : لا
رغد : ممكن فستان عشان العيد قرب ؟
سلطان : لا
رغد : سلطان تحمست يالله طلعها
سلطان مد بوجهها كيس : غداء ، قلت اكيد مالك خلق تطبخين وجبت غدا من المطعم ، بخاري يحبه قلبك ، يالله روحي جهزيه ميت جوع وتعبان ، مصدقه اني بفرفر الأسواق بعز القايله ، وبعدين ليش كل هالكشخه على هالظهر !
رغد ارتفع ظغطها من تحطيمه : حسبي الله عليك كانك بارد وجلف وماتحس وغبي ، انت كفو احد يتكشخ لك؟ انت ماينفع فيك غير وحده لاناديتها تجيك من المطبخ كلها ريحة بصل وزفر ، يالخايس يالأشهب
سلطان : اعوذ بالله من لسانك ، وانتي متوقعتني بجي هلكان واخذك بحضني ؟ تخسين والله ، دلعتك سنه تركتك على راحتك قلت عروسه ، لكن من اليوم لا راحت الأيام الحلوه ، من بكرا بتصيرين راعية بيت وتطبخين وتنفخين الى متى وانتي عايشه برفاهيه ؟ يالله اذلفي حطي الغدا لا اتغدا عليك
دخلت للمطبخ بكامل كشختها وهي تسبه وتتلحطم : حسبي الله عليك ، وحسبي الله على وعد كانها تبي العرس ، غثا مو عرس ، هذي دعوة امي علي ، يارب تصبرني.
طلعت وحطت الغدا وجلست تنتظره ، طلع وكان مبدل ملابسه جاس جنبها وبدا ياكل ، وهي تهز رجولها بقهر : عساه مايحدر
سلطان : كولي !
رغد : انسدت نفسي
سلطان : احسن
اكل شوي وقام غسل ورجع اخذ الصحون وداهم للمطبخ ورجع جلس جنبها وباس خدها : اسف يادنيتي
رغد قامت وهي معصبه : من زين دنيتك عاد
➖
ياسمين كانت تصلـي ولما خلصت قامت وجلست على السرير وقربت لفيصل كان غرقان بالنوم وبصوت عالي : فيصل ، فيصل ، فيصل ، فيصل ، فيصل ، فيصل ، فيصل فيصـ..
قاطعها بملل : خييير ياسمين خييير ازعاج نعم ؟
ياسمين : ترا تأخرت ، اذن العصر قوم يالله
فيصل : اول مره انام للوقت هذا ، وين عيالك
ياسمين : اخذهم ريان عند عياله فكنا منهم ، كنت بعطيه يارا بس قلت تطفشهم محد بيتحملها غيري
فيصل : على انهم مزعجيني لكن ماحب اصحى من النوم على غير ازعاجهم ، جيبي لي يارا خليها تزعجني شوي لين اصحصح
رجع وغفى ماحس الا بإيدين صغيره على وجهه وصوت بنته يـارا ابتسم وباس ايدها ورجع نام وصحاه صوت ياسمين : فيصل فيصل فيصـ،
فيصل : خلاص قمت
ضحكت ياسمين : شاطر .