[فيتامين سي]

البارت2
ساره:::

بقيت ادفع بيه بس هو معافني بقة يشبك بيه ويبوس بحلكي وركبتي ويحاول ينزعني ملابسي بس ما انطي مجال ادفع بيه واصرخ اخير شي شك نفنوفي وجيت عليه اني عضيته حيل من اذنه صرخ وعافني استغليت فرصة هو لازم اذنه انهزمت همزين بسرعة انفتح الباب..ركضت هو ركض وراية :

تعالي وين رايحة بت الكلب..
بس اني اسرع منه ركضت بكل سرعتي فتحت باب البيت..وانهزمت للشارع نفنوفي مشكوك..ودموعي يجرن اركض..اركض..اركض..بكل قوتي..ما اعرف وين اروح اخير شي شفت باب مفتوح ركضت فتت بسرعة..لكيت بنيه كالت منو انتي ..طلعت مرة من البيت..ركضتلها شبكتها:

خالة..خالة فدوة ضميني عدكم..فدوة خالة!!

بسم الله الرحمن الرحيم..منو انتي..وشبيج.وليش تركضين شبيها هدومج..مشككة..منو مسوي بيج هيج..و

بعدها..تحجي جان..اندك بابهم بقوة عرفته هو شافني من دخلت..كتلها:

خاله هذا هو..هو..الله يخليج لتفتحيلة الباب خاله..

ياااا..ولج منو هو وشيريد منج؟؟

خالة هذا عمو نزار زوج امي..خاله هو شكك هدومي مدري ليش؟؟

وامج وين احجي خالة؟

امي بالمستشفى داخلة ويه اخويه؟؟..خالة عليج النبي محمد لتفتحيله الباب؟

لتخافين..بنيتي لتخافين ما افتح الباب..الا تجي امج؟؟

وراحت تحجي من وره..الباب

منو..منو هذا الي كسر الباب

اني جيرانكم..بنتي عدكم انطونياها؟؟

امشي..امشي لك..روح مناترةا اخابر الشرطة..ما انطي البنية الا تجي امها..

بعد مسمعنه صوته راح..دخلتني جوة غسلت وجهي..بس اني ماخذني الرجيف واسناني اطكطك..وكامت تقره على راسي آيات قرآنيه..بعدين سألتني..

بنيتي خو ما اذاج..كولي لتخافين..

خاله شنو أذاني ما اعرف والله

بنيتي يعني هدومج الجوه خوما نزعهن منج؟

لا خالة بس شك نفنوفي اني عضيتة وانهزمت..
عفية عفيةبنيتي الحبابة
والمرة خلتني بحضنها للصبح لان صخنت والرجيف ماخذني وكل شويه افزفز واصيح عوفني عمو..عوفني الله يخليك وهي تكولي:

اسم الله...اسم الله يمه محد يمج لتخافين..

وبقيت ع هالحال للصبح كل شويه افز مثل المخبلة...وهي تهدي علية الى ان صار الصبح..واجتي امي..دكت الباب..فتحتلها.رادت تضربني المرة مخلتها..

ياااا...شبيج تخبلتي تردين تضربيها فوك الهبطة؟؟

يا هبطة..عيني ياهبطة..غير لازمها رجلي وهي تخنك باخوها؟؟

دخلي ياكل خرة هالكلب ابن الكلب..عيني رجلج..الساقط..جان يريد يعتدي على بتج..شوفي ركبتها شوفي اثار العضات والمصات شبيج ماعندج عقل..متفتهمين شلون تخلين بتج يم هذا النكس؟؟

ياااا صدوك تحجن..؟؟

ادنت امي شافت ركبتي كامت..ادوك..وتلطم..وتونون :

هاي تاليها..هاي تاليها نزار واني مأمنه بيك

وبقت ربع ساعة ادوك على صدرها وتبجي بلاوعي..بعدين كالت للمرة:

دادة..خو مكاسرها..دادة ستري عليه لتكولين لاحد اذا بيها شي؟؟

شمدريني بس هي تكول عضيته وانهزمت عيني اخذي بنتج للدكتورة وتأكدي ترة هي زعطوطة كولشي متفتهم؟؟واذا تردين اني اروح وياج..

اي دادة روحي وياي ..

المرة لبستني دشداشة من بنتها ووعباية طويلة عليه وياها بوشية..واخذني..وطلعن دخلني ع دكتورة..وكامن يسولفن وياها..بعدين امي نيمتي ع جرباية زغيرة واجتي الدكتور تريد ترفع هدومي مخليتها..كالت:

لزمنها اليه لان تخاف..خلي اشوفها
اني ارجف ودموعي يجرن ما اعرف شنو السالفة..امي لزمت رجلية حيل والمره لزمت اديه..والدكتور نزعتي..بقت دقيقة مدري وين تباوع..بعدين..

كالت لامي:

كولشي ما بيها جنها ورده لتخافين اخذي بنتج..ما بيها شي

المرة هلهلت وامي..تبوس بايدين الدكتورة..:

الله يبشرج بالخير دكتورة.رحملله والديج..رحملله والديج...الله يخليج.دكتورة

طلعنا من يم الدكتورة المرة كالت:

راح اروح اني وجني ماشفت شي..بس دادة اشتكي على رجلج.

امي تبجي..تكولها:

شلون اشتكي عليه بس اشتكي يحبسوه واضل بالشارع اني وجهالي

لعد ابعدي البنيه عنه دزيها لاهلج..لو لاي مكان امان..

والله ما ادري شسوي؟؟

المرة عافتنا وراحت..بس امي ..صعدت تكسي مدري وين تريد تاخذني..مشينابالتكسي مسافة طويلة وصلنا لبيت جبير..امي دكت الباب وفاتت استقبلتها مرة..شايفتها قبل بس ناسيتها:

هلا...هلا ام سارة شعجب شعتب؟؟

ام مهمين..ابو مهمين موجود؟؟

خيرج ام سارة شو مو على بعضج صاير شي؟؟

لا مصاير شي..بس ردت ابو مهيمن؟؟

اي هسه اخابرة فوتي..فوتي انتظري بالاستقبال:

دخلنا للاستقبال مالهم ورة عشر دقايق..اجه رجال..عرفته بسرعة صح صار فترة مشايفته بس عرفته لان يشبه ابويه الله يرحمة..

ها..ام سارة..مو كلتي اني ما اعرفكم ولا تعرفوني..شكو جاية؟؟

ابو مهمين..اني صح مو من دمكم ولحمكم ومن تزوجت ورة المرحوم صارت مشاكل وخسرتكم..بس سارة بتكم..ومن دمكم ولحمكم؟؟

ومنو كال غير هالحجي...الف مرة كنالج انريد بت اخونا انتي مجلبة بيها وتكولين يم اخواني احسن

لا ابو مهيمن اني غلطانه البزر ميتحملة غير اهلة..واني جبتلكم بتكم وخلصت ذمتي..

ليش شحدة..مابدة..اهلج بعد ميتحملوها..

اي ميتحملوها نسوان خوالها يردنها خدامة وانت مترضاها..ورجلي غريب..ميتحمل بزر غيرة؟؟

اني ما مقتنع بكلامج..بس منى عيني بنت اخويه تعيش يمي..

جان يصيحني:

تعالي..تعالي بابا سارة..

رحت يمه بس مترددة وخايفةامي كالت:

روحي يوم هذا عمج يعني ابوج الثاني..رحت يمة..جان يعدل عبايتي ويكعدني بصفة:

امي كالت راح اروح..اني بجيت جلبت بعبايتها:

هي هم بجت باستني وشاورتني :

ابقي..هنا يوم عمج حباب ويدللج مثل مجان ابوج مدللج واني اجيج

كل فترة:

وراحت امي بقيت كاعدة يم عمو ابومهيمن..كال..لخالة ام مهمين

ام مهيمن..اخذي سارة يمج خلي تتغدة..والعصر اخذيها للسوك اشتريلها ملابس..امها الغبرة حتى هدوم بيها خير مملبستها....

خلت يمي الغدة ما اكلت شي ما اشتهي الخوفة بكلبي واحس نفسي بردانه..وبقيت ابيتهم اجتي..بنية جبيرة يصيحولها لمياء..كعدت يمي وسألتني اني بياصف سولفت شوية وياها بعدين اجتي بنية بعمري تقريبا من المدرسة وبقينا نلعب اسمها ضمياء..حلوة وهدومها مرتبات.. صار الليل نمت بالغرفة يم ضمياء..بس بردت كولش هم لزمتني الرجفة كوة نمت ورجعت اتحلم وفزيت من الحلم اصرخ..:

عوفني..عوفني..عمو نزار فدوة عوفني اصرخ بكل صوتي ودموعي يجرن والصخونه لازمتني وارجف..محسيت الا ام مهمين يم راسي..حضنتي :

اسم الله..اسم الله يمه شبيج..كعدتني بحضنها اجه عمي..كال شبيها..البنية:

مدري..شبيها فزت من النوم تصرخ عوفني..عوفني عمو نزار..والرجيف ماخذها..اسم الله عليها..اسم الله..

عمو ابو مهمين شالني واخذني لغرفتهم شربني مي..وكال لام مهيمن:

سدي باب الغرفة وتعالي:

كعدو يمي اثنينهم يهدون بيه عمي سألني:

شبيج بابا احجيلي شبي عمو نزار وياج..ضاربج؟

ها...لا..لا مبي..شي؟؟

احجيلي بابا..لتخافين..اني..ابوج!!

عمو..اخاف اكولك..وتضربني..بس اني والله ممسوية شي!!

لا بابا..لتخافين انتي مثل ضمياء بنتي شلون اضربج احجيلي كولشي؟؟

عمو..نزار جان من يشوف امي نايمة يجي يبوس بيه..يعني هيج بوسات مدري شلون تلعب النفس..كلت لامي كالت هو مثل ابوج..ويحبج..والبارحة بالليل امي بالمستشفى...هو هم اجه بقة يبوس بيه..

وطلعت ركبتي شوفتها لعمو ابو مهمين:

شوف عمو هيج سوة بيه يبوسني حيل اني اصرخ وادفع بيه بس ميقبل يوخر عني حتى نفنوفي شككة بس اني عضيته وانهزمت عند الجوارين..

اشو عمو ابو مهيمن صار وجهه احمر ودموعه نزلت بسرعةكتله:

عمو..والله اني ممسويه شي!!

جان ام مهيمن تكول:

اي كملي سارة امج جابتج لهنا بعدين مو؟؟

لا..لا بالاول اخذتني للدكتورة....باوعتلي كالت..مبيها شي البنية..وبعدين جابتني لهنا..

عمو ابو مهيمن فتح الكنتور مدري شنو طلع منه وطلع يركض..خالة ام مهيمن تركض وراه
مهيمن:::

كعدت..نص الليل على عياط امي..اسمعه تصيح::

ابو مهين..وين رايح بهالليل جيب المسدس ..يبووو...يبووو..وينك مهيمن الحك على ابوك..
نزلت ركض لحكت علية يريد يصعد السيارة:

يابة شصاير وين رايح..وشتسوي بالمسدس:

وخر عن طريقي لك..اليوم اشرب من دمه هالعار..ابن العار

يابة بس فهمني:

لك زلمة شكبرة يتحرش بطفلة الله..اكبر..الله اكبر..اليوم اكتله يعني اكتله عبالة عرضنا تايه..

دفعني وصعد جلبت بالسيارة صعدت وياه..طول الطريق عيونه يجرن دمع..اول مرة اشوف ابويه بهالحالة..وصل لبيت اول مرة اشوفه دك الباب حيل..طلع واحد بالفالينه والشورت اول مشافة كله :

انت نزار

كله اي

طلع المسدس..ردت الزمة ملحت رأسا رما طلقة طاحت بصدرة تكوم بالباب..

راد يرمي بعد..كتله:

يابه عوفه..الطلقة بصدرة اكيد مات خلي نروح قبل لتجي الشرطة..

اخذت ابوية ورحت للبيت للصبح منمنه بس اهدي بابوية امي سولفتلي كل القصة ..ومن الصبح جانت الشرطة اباب بيتنا ابويه طلع عادي سلم نفسه..واني هم اخذوني..بس ابويه كل للضابط :
ابني ما اله علاقة اني الرميته..

واشتغل التحقيق ابويه مكلهم شنو السبب لان ميريدها تصير قضية شرف وفضيحة كلهم اطلبة فلوس..اني طلعت بكفالة ورة اسبوع وعرفت..ذاك النذل بعده عايش ويتعالج بالمستشفى بقيت اتابع القضية..وخليت محامي..لابوية..وجيب العشاير ودني العشاير وبقت المشيات ادوك شهرين..الى ان صار زين وطلع

وابويه باقي بالسجن.سويت المستحيل حتى انهي قضية ابويه وما اخلي ينحكم وسحبت فلوس من المصرف سديت حلك نزار بعشر ملايين الى ان تنازل..وطلع ابويه بعد ما بقة بالسجن 4اشهر ..وانزاح الهم عن صدري..من شفت ابويه رجع للبيت

انتظروا بارت3♥♥♥♥