الفصل السابع سفينة الموت
محمد وسعيد (ابو عبدالحميد) عم غياث مسكم مثقال اللى فوق غياث:لا يا ابني مووو هيچ صل على النبي
غياث وقف بمساعدة حميد :مثقال خلينا نتفاهم
فرج اخو ليل :ماراح نتفاهم اليوم راح اشرب من دمها ال####
جابر عم غياث مسك فرج
غياث عصب :حدك عاد مرتي اشرف من الشرف ما اسمحلك تغلط بحرف
فرج :يا ساقط انته تسكت ولا كلمه انته موو زلمه مالنا كلام معك
حميد همس لغياث
عم ليل :أعطينا البنيه وخلينا نتوكل
محمد :يا جماعة الخير الموضوع ما ينحل هيچ خلونا نگعد ونتفهم
عمر اخو ليل :ابو عبدالحميد اعطونا بنتنا بلا فضايح ودم
غياث بعصبية اكبر :ابو محمود(عمر) من الاخر مالكم شئ عندي
ابو محمد :شيخ موو هيچ تعوذوا من الشيطان وخلونا نتفاهم
غياث رفع ايده واشر عليهم :اسمعوني زين طول ما راسي يشم الهوا محد يمس شعره من ليل اني حزام ظهرها
******
فات على الصالون وبضيق :ليل
ليل رفعت راسها :غياث شصار مين جاك
غياث :جماعه
ليل وقفت : جماعة ايش بهل وگت
غياث ظل ساكت
ليل مدت ايدنها :غياث اشبيك
مشت چدام خطوه بتجاه صوته ووقعت غياث مشى بسرعه ومسكها غياث :بسم الله صارلچ شئ
ليل حركت راسها بالنفي:لاء مابيا شئ
غياث وقفها ليل تضم ذراع غياث :وين راحت صبا قامت وما رجعت
غياث يمشيها هو ساكت
ليل : غياث اشحن جوالك راح يطفي
غياث :ليل مشان محمد اسكتي
ليل ابتسمت :ساكته بس لا تعصب علي
صبا طلعت بوجه غياث وبخوف :غياث شصار مين اللي ضربك
ليل تركته و لفت عليه وهي مرعوبه :غياث مين اللى جاك
غياث بصوت عالي :صبا فوتي نامي لا تطلعين من دارچ
سحب ليل بعنف لقرفتهم وقفل الباب بالمفتاح
ليل :افتحلي اريد اطلع
بدون مقدمات :اهلچ هم اللى جوني
ليل شهقت من الصدمه ودموعها صارت تنزل گعدت بالارض :يالله اني انتهيت
غياث وگرز جدامها ومسك راسها وصار يمسح دموعها بابهامه :ليوله والله ما اخليهم ياخذونچ لا تخافين اني معاچ
ليل ترجف بخوف وتحول تبعد ايدينه :بعد عني وافتحي الباب غياث ابعد عني
غياث مسك راسها :لزم اثبتلهم انچ شريفه
ليل تضرب صدر غياث :يا حقير اتركني
غياث: ليل انتهت اللعبه
ليل ترجع لورا بخوف : والله ما اسامحك ابعد
غياث مسكها وسكر اثمها بكفه قرب اكثر منها وهمس :لا تسامحيني
وبالمجلس
مثقال سحبها من غياث :الحز تطلقها انته مالك مره عدنا
غياث مسك ليل ويجرها:يوال سكتلك چثير ابعد ايدك عن مرتي
مثقال يجرها :اختي ما اخليها عندك لو تنزل السما وتطلع الگاع
غياث يسحبها :انته شكلك ما تفهم يوال مرتي ما تطلع من بيتها الا على جثتي
شيخ عشيرة ليل :يا جماعه صلوا على النبي الطلاق موو حل
فرج يسحب ليل مع مثقال :يا ساقط اتركها احسن ما تشوف شئ ما يعجبك
ابو عبد الحميد :يا شباب خلونا نتفاهم والله عيب عليكم
مثقال بعصبيه :والله يا عمي العيب منكم وبيكم وابن اخوك الصرمايه ما يعرف العيب
غياث يسحب ليل وبصياح :ابعد ايدك انته وياه عن مرتي
عمار ابن عم ليل برحمها وهو يشوف ليل بس دموعها تنزل والكل يجرجر بيها :خلاص عيفوها تركم ذبحتم المره ملختوها تملخ
شيخ عشيرة ليل :يا ويلادي اتركم المره ببيت رجلها مستوره وعفا الله عما سلف
عمر مسك گتف مثقال وبهمس:مثقال يا اخوي خليها مستوره عندهم موو ناقصه فضايح شتسولنا ترجع معنا مطلگه خلاص السافل خذا كل شئ
لحضة صفنت مثقال
غياث سحب ليل منهم وخلها ورا وبصوت عالي :عمي فوتها جوا
جابر مسك ذراع ليل وجرها معاه فرج :هااي جابر اتركها
وبنفس الوگت مثقال حول يلحق جابر بس غياث مسكه من قميصه :من اليوم ليل احسبها ميته
مثقال ضرب غياث لكمه گويه
غياث وگف وبانفعال :ليل ماتت تفهم ماتت بهذيچ الليله السودا
تعثرت ليل ووگعت على ركبها
مثقال بعصبيه وهو يدحق عليها :طلگها ليل مالها گعده هين ترجع معاي على بيت ابوها
جابريقوم ليل وبرحمه:ترها عميه بقمة العجز والضعف ياخي ارحموها واحسبوها ماتت
ابو محمد مسك كتف مثقال :يا ابن اختي الطلاق موو حل الزلمه يريد مرتوا غياث لوا اشهور محافظ عليها ويداريها واصلا عيب عليكم تحچون بالطلاق العالم شتگول اذا اختكم رجعت معاكم بعد اشهور مطلگه
مثقال نزل راسه وبانكسار:عمي العالم حچت علينا أشكال الوان صار اخر همي شتگول العالم نحن بنتنا العميه موو متوذين منها نريدها
غياث :تونكم يا مثقال صحى ضميرك بعد ما طلعتها تركض مثل المجنونه من بيتكم بنصاص الليالي تدور على الموت توف عليك يا عديم الشرف
مثقال حط عينه بيعين غياث : لو بيك ذرة شرف وتعرف شنو الشرف يا ابن الشريفه چنت ما سويت اللى سويته چنت چيت مثل الزلم وخذيتها من أهلها
غياث :بس انتم تصيرون زلم وتحفظون على عرضكم اني اصير زلمه
مثقال مسك غياث وجنون الأرض تنط فوگ راسه :يوال اغلطي بالماضي ما تبرر ولا تشفعلك اللى سويته بأختي ترضها على اختك ها ترضها
غياث بانفعال :اني موو غلطان تجوزتها على سنة الله ورسوله وبي شهود اني صرت لاختك سند وحزام ظهر حفظت عليها مثل ما احفظ على اختي
مثقال دفش غياث صفق بسخريه :يعطيك العافية يا بطل ما گصرت سويت خير بينا سبع
عمر :مابي شئ يشفعلك المفروض مرجع البنية لينا بدال ماتلعب لعبتك القذره
مثقال اخذ نفس عميق وبهدوء :ليل اذا تريدين تضلين عند هذا الوصخه انسي ان عندچ اهل وراح اتبرا منچ ليوم الدين
ليل تشهق من اعماقها:طلگني
غياث مسكها سحبها يريد يطلعها من القرفة :هوص ولا كلمه
مثقال جر ليل من غياث :طلگها احسنلك
ابو محمد :أبغض الحلال عن الله الطلاگ ابوي تعرفين شنو يعني مطلگه وضعچ ما يسمح بطلاقگم ابدا
ليل جسم ينتفض من البچي:ماريد اضل هين خذني معاك
غياث استوعب كلام ليل تركها وگعد على المركية وبخبه دنق راسه :ما دامچ تريدين اهلچ روحي الله معاچ بس طلاگ ما اطلگچ لو الدنيا كلها تصير ضدي
ليل ما اطلگ ومردچ ترجعين ليا
مثقال جر ليل وهو متوجه للباب :لا تطلگ
طلعم اهل ليل
غياث لف على شيخ عشرة ليل :الشيخ أدهم مرتي اذا يصيرلها شئ اوصل الدم للركب
اخو الشيخ أدهم :يا ابن اختي لا تخاف عليها ليل وحيدة جاسم و جاسم كلمتوا ما تصير اثنين عند مثقال
محمد لمس خده وبالم :هذا الزلمه نار وشرار وغضب الجبار اريد افهم اشلون خليتها تروح معه اليوم يگصبها ويشرب من دمها ويدفنها وهي حيه
حميد قرص محمد وبحده:محمد اكرمنا بسكوتك
محمد :هذي الحقيقة والشيخ أدهم اكيد تعرفون مثقال شنو من شئ
الشيخ أدهم :يا جماعه لا تشغلون بالكم البنيه متربيه على ايد اخوها مثقال ما يسويها شئ
غياث حط ايده على وجهه :لا حول ولا قوة الا بالله
ابو عبدالحميد :ابو حيان (الشيخ أدهم) أريدك بكلمة راس
الشيخ أدهم طلع مع ابو محمد وابو عبد الحميد وجابر عم غياث وياسين اخو أدهم
حميد گعد بلط غياث :غياث شلون عرفم ان بنتهم عندك
محمد :غياث والله العظيم اني مالي علاقه حتى لخالي حسن ما جبت سيرة
حميد دحق على محمد :حتين انته تعرف
غياث بضيق :شلون صار هيچ الشهود علاء وابو وائل مستحيل يكونون گالم لحدا مابي حدا يعرف مين ليل الا انته
محمد وگرز :غياث انته تعرفني زين اني مستحيل أضرك واضر عميتك المسكينه
غياث دفش محمد :يوال انته ما بيك ناموس ياربي احفظها من كل شر
حميد :هذا عديم احساس
محمد وقف:والله زين صبرت لليوم الحمدلله طلعت العميه شريفة
غياث وقف وهو يدحق على الأرض :ما تمنيت يصير اللى صار اليوم اني جرحتها
اندق الباب حميد :صبا فوتي
صبا فاتت ووجهها احمر دحقت عليهم بعيونها تدور على ليل بينهم ودموعها رجعت تنزل :شصار وين ليل
غياث حرك راسه باسف:راحت مع أهلها
صبا بعصبيه :شلون ياخذونها ليل المفروض تظل هين اشلون تخليت عنها
غياث قرب من صبا :صبا ليل راح ترجع
صبا بانفعال: شلون تثق بيهم وتعطيهم ليل تخليت عنها تخليت عن العميه شيصير بيها اليوم المصخمه شيصير بيها
غياث ضم صبا لصدره :صبا لا تزيدينها عليا
محمد همس لحميد :ما ادري شلون غياث أعطى گلبو وخلها تروح الله لا يوفقهم المسكينه شراح يصير بيها
حميد :الله يستر
فات ابو عبد الحميد :غياث شتصرف الناقص
غياث :عمي لا تزيدها علي اللى بيا مكفيني
جابر :غياث شماگلت انته الغلطان ما چان لزم تجوزها المفروض مسلمها لأهله ومريح راسك
غياث :انتم ما شفتم ليل لمُن دحمتها البنية چانت تركض بنص الليل مثل المجنونه تدور الموت بدون حجاب وجسمها كلو رضوض ومعلم من الضرب
صبا بعدت عن غياث :غياث الله يخليك رجعها لا تخليها عدهم والله اموت هذول ما يخافون الله
ابو محمد حط ايده على كتف غياث :غياث البنيه مسكينه صارت مرتك ظل متمسك بيها ولا تتخلى عنها انته صرت مستقبلها
محمد :يابه انته مؤيد للموضوع
ابو محمد :انته ولا كلمه لا تجيبلي سيرة ربيعتك الفلتانه
حميد بحقد على محمد:اي صح شجاب ليل لنوران مابي وجه مقارنه
غياث شال الشرشف من الگاع :صبا سوي لعمامچ چاي
ابو عبدالحميد :حبيبتي لا تسوين شئ الوگت تأخر
صبا تمسح وجهها :غياث اذا ما رجعت ليل لاني اختك ولا اعرفك
غياث :صبا
صبا طلعت بدون ما ترد على غياث جابر لحق صبا :صبا صبا وگفي
صبا گعدت بالصالون وغطت وجهها
جابر گعد بلط صبا :صبا والله ترجع غصبن عنهم غياث يحبها
صبا انحنت :غياث چذاب ما يحبها خلاص من راحت ما ترجع ليل راحت بلا رجعه آه يا قلبي ليوله راحت
جابر مسكها :صبا اهدي يا بنتي
صبا :ياويل قلبي ياويله آه يا ليل
جابر ضمها لصدره
****
ليل طول الطريق تسمع اخوتها يحچون عليها وعلى غياث وأنواع السب والشتم مثقال حس برأس ليل صار على كتفه بعدها ولف عليها طبطب على وجه ليل :ليل ليل تسمعيني ليل
عمر لف :اشبيها
فرج بسخريه :مسكينه من الخوف غط على قلبها
مثقال يمسح على وجه ليل وينفخ
فرج :شراح نسوي بيها برأيكم
مثقال ظل يتاملها
عمر :اني مالي علاقه مثقال هو المسؤول الأول والأخير عنها
فرج :لونك مووو مدلله چنا من زمان جوزنها وما صار اللى صار
مثقال بندم:اني السبب ما چان لزم اضربها بهديچ الليله ياريت ايدي مكسوره قبل ما امدها عليها
فرج :يوال الندم ما يفيد فات الفوت ما عاد ينفع الصوت
مثقال:الله لا يوفقو ابن الحرام استغلها ودمرها
عمر :مثقال ترى ليل صارت عله وعار برأي نرجعها ليهم ونرتاح الناس تحچي فتره وتنسى
فرج :صح عميه ما تستاهل توصخ ايدك بيها
مثقال :لاحد يتدخل بالموضوع اني المسؤول
مثقال شاف ليل حركت راسها طبطب على وجهها:ولي تسمعيني
ليل ظلت ساكته ودموعها رجعت تنزل بصمت
مثقال نزل ونزلها معه بعنف :توكلم على بيتكم
فات وفوتها معاه للغرفه ودفشها على الأرض بعنف ظل يدحق عليها بصمت وهي جدامه على الگاع وأنواع الأفكار تدور براسه كسر الصمت فات رمى مسك معصمها وسحبها لعند الزوية أعطاها چف بكل گوة:خايفه مني
ليل نزلت راسها ودموعها تسيل
مثقال وقفها بعنف دمعته وقعت من عينه :ياريتچ متت وما كسرتي ظهري ليش ها ليش ذبحتني
مثقال مسك كتوفها وهزها بعنف:يولي لا تسكتين گلولي لو كلمه وحده لا تسكتين بشنو قصرت حتى ما تريدني چنت من أولويات اللى يزعل ليل اگلب الدنيا علي دللتچ وحبيتچ اني شفتچ بنتي قطعه من روحي ولي مشان ايش كل هذا ليا اشهور ما انام الليل عيشتني بعذاب كسرتيني وذليتيني وحرقتي گلبي (ترگها وضرب صدره بكل قوة) حرقتي
ليل نزلت عند رجلنه تشهق من اعماقها مثقال ضل واقف يبچي بعمره ما بچى بس اليوم بچى من حرقت گلبه ليل بانفعال : اذبحني وارفع راسك اني استاهل الموت اذبحني موتني واخلص من عاري والله استاهل اني
مثقال بعد عنها
ليل ظلت على حالها تبكي
مثقال گعد اخر القرفه يدحق عليها بصمت ويدخن
انفتح الباب وقبل اذان الفجر :مثقال ايمت جيت
مثقال :جبتلك بنتك
لف عليها وبهمس:بنتي
ظلت على حالها :ليل تعاليلي
مثقال بصياح :ولي گومي
ليل قامت بصعوبه صارت تمشي وهي تتميل تعثرت قبل ما توصل وگعدت قرب مسكها :الله وين چنت يا ابوي حرقتي گليبي عليج منو ليا من بعدچ يا بنيتي اني اعرفچ مستحيل تسوين الغلط
ليل بس دموعها تنزل شتگوله ابوها واثق بيها ضمها وهو يبچي معاها
صار الشايب يعاتب بنته بألم
*****
غياث ركب مع محمد بالسيارة قرر محمد كسر الصمت :غياث روحتنا لحالنا موو منطقيه
غياث :منطقية ولا لا موو مهم ليل راح ترجع معاي
محمد لف على غياث :شلون بالله
غياث :موو سهله تتغير حياتها بيوم وليله
محمد ركز بالطريق :بالبيت ما عدهم حدا يخدمها
غياث فتح الشباك :لا مابي حدا مثقال صار كرهني أكيد الحز مزرقها
محمد باستغراب :الا مثقال يعرفك من قبل
غياث وهو يفكر باللى راح يصير :من صارت ليل عندي كل فترة اروح على مكتبته وصار بينا تواصل
محمد :ايمت خالي وخالتي يوصلون
غياث :ان شاء الله الخميس الجاي
محمد :اني اشوف نأجل الروحه الأحسن خالي حسن يروح معنا
غياث :خالك يريد يذبحني
محمد صار يضحك : خالتي سارة بصفك وخايف من خالي
غياث ظل ساكت محمد وگف السيارة چدام باب بيت اهل ليل :وصلنا
غياث فتح الباب :بسم الله
****
اما جوا البيت مثقال فات على القرفه ينشف شعره بعد ما غسل شاف ليل بالزويه لونها ازرق ومسكه سلة الزباله وتبچي بشكل هستري وترجف وورها علبة أدوية ابوها منثوره مسكها بخوف : اشبيچ
ليل تركت الزباله وبتوتر تمسح وجهها : مابي شئ
مثقال دحق بالزباله بيها ظروف حب فارغه طلعهن أعطاها كف ومسكها من قميصها: يا مجنونه شبلعتي الله لا يوفقچ
ليل ضمته:مثقال اهئ اهئ اني وحده حقيرة
مثقال يحول يبعدها :ليل ابعدي عني
ليل تتمسك بي اكثر :ما أبعد من ماتت امي وانته تنومني بحضنك من كبرت گلتلي عيب امانه خليني لاخر مره انام على صدرك اريد اموت بحضنك
مثقال بعصبية:استغفرالله
ليل :لا تشفق علي اني حقيره وغبيه والله استاهل اللى يصير بيا
وهو يسمع نبض قلبها السريع ويحس برجفتها : خلاص ابعدي تاخذچ على المستشفى
ليل تتمسك بي اكثر: بس ضمني اريد انسى اللى صار
مثقال يحول يبعدها:مشان الله ابعدي
ليل مچلبه بي وتشهق :لهذي الدرجه تكرهني ما طلبت تسامحني لاني اعرف اني ما استاهل تسامحني بس أريدك تضمني لاخر مره
مثقال بعدها بالقوة ومسك وجهها :ولي عمري ما كرهتچ يا ريتچ بس تشوفين حالي ليل اني انذليت ببعدچ
ليل مسكت ايدينه : يا ريت يرجع الزمان يا ريتني ميته بهذاك الحادث ترجيته يتركني اموت بمكاني بس ما تركني
مثقال : هوص اسكتي مشان الله اسكتي
باست ايده :انته كل شي بحياتي مثقال انته ابوي وانته امي
مثقال ضمها لصدره وباس كتفها
غياث دق الباب طلع بوجهه مثقال شايل ليل بخوف :ليل
ليل تمسكت بمثقال
مثقال :ابعد من طريقي
غياث قرب يحول ياخذها:ما أبعد مرتي الحز أخذها شسويت بيها
مثقال بعصبيه :يوال بعد ابن خالك احسن ما اسوي شي ما يعجبكم
محمد قرب ومسك زند غياث :موو وگت الكون اشبها المره
مثقال :شبيها يعني انتحرت
غياث بخوف خذها من مثقال :محمد شغل السيارة بساع
ليل :مث..قال لا ت.عيفني
مثقال بعصبية قرب يريد ياخذ ليل :غياث يوال احترم حالك احسن ما ادوس ببطنك
غياث بعد وهو مطنش مثقال ركب مع ليل ورا وليل بس تنطق اسم مثقال ركب من الجهه الثانيه وسحب ليل من غياث لحضنه محمد حرك السيارة
غياث يتأمل الوضع :اشلون انتحرت ما تعرف تنتبه عليها منته قد الامانه
مثقال مارد على غياث: تنفس بعمق
ليل ضامه مثقال بقوة وبهمس ونفسه موو منتظم:لا تتر..كني
مثقال مسح على ظهرها وباس راسها
محمد :مثقال حاول بيها تراجع (تستفرغ)
مثقال :من اشوي راجعت
غياث شافها اشلون تتعرق سحب علبة المايه من عند محمد وفتحها :بعد اشوي خليني اغسل وجهها بلچي تصحصح
مثقال مد ايده بمعنى صب
صب غياث على ايد مثقال غسل وجهها
ليل تشهق وترجف
مثقال ضمها وسند راسه على رأسها
غياث شلح جاكيته وغطى ليل مسك ايها يشوف النبض
مثقال سحب ايدها من غياث :لا تلمسها
غياث بحده :المسها بكيفي مرتي حلالي
مثقال :مالك مره عندي
غياث :يوم عرسك يصير مالي مره عندك
مثقال طنش
وبالمستشفى
مثقال گاعد يدخن ومحمد على يمينه وغياث واقف على يساره غياث يدحق على الساعه :لا حول ولا قوة الا بالله
محمد وقف :تشربون چاي ولا گهوة
غياث :جيبلي باكه
محمد بصدمه :تريد تدخن
غياث گعد مكان محمد :لا تنسى الجداحه
محمد راح مثقال بعد سكوت مد الباكه والجداحه لغياث
غياث خذاهن :شكرا
شغل وحده وحط الباكه والجداحه بينهم غياث بضيق :كأنهم طولم
مثقال يدحق على ساعته
غياث لف على مثقال :شلون اعرفت ليل عندي
مثقال شغل وحده ثانيه :وصلني شريط سي دي
غياث بصدمه :سي دي شلون
مثقال :ليلة الحادث بالمستشفى بنفس التاريخ
ضلو ساكتين
طلع الدكتور مع الممرضه وقفم بسرعه غياث :دكتور بشر اشلون ليل
الدكتور :لو متأخرين دئيق كنا اخسرنا المريضه
مثقال :هي بخير اقدر اشوفها
الدكتور :وضعها حرج ئلبها وئف وسونلها صدمات كهربائيه وهلاء نقلتها على العناية المركزه
غياث :يعني شلونها
الدكتور نزل راسه :ادعولها لان وضعها اكتير حرج
غياث حط ايده على راسه من الصدمه ولف
مثقال مرر ايده على شعره :لا حول ولا قوة الا بالله
الدكتور :شوو صلت القرابه
مثقال :اني اخوها
الدكتور :والأخ
مثقال يدحق على غياث بحقد
انتهى الفصل توقعتكم
|