[لامارا]

البارت الثاني من الجزء الاول
بقلمي جوري⚘⚘



رفعت عيوني اله جان معصب كلش عبالي حيضربني فبرطمت مو بيدي مكدرت ابد
- لج ام الزبل انت شلون تضربيني ها ، اني ما تندك بيه مرة
- بس انت تضحك علي
ركز بشفايفها الوردية و ظل صافن عليهن ، وهدأت اعصابة ابتسم وكاللها.
- لا تبرطمين جنج دادا صغير
وسعت عيونها : نعم ؟
بس من شافت عيونة والتقت بعيونه تنهدت وجانت لغة العيون اقوة من لغة الشفاه
ابتسم الها وعافها
من هل يوم بدت نظرات الإعجاب بيني وبين مرتضى.
جنت كل ما اطلع لمعهد الخياطة الكاه بالباب جنة،ينتظر احد ومن اوصل ليم الباب يمش وراي،
فد مرة سمعتة وراي ويغني
حبينا ضي الكمر والكمر ناسينا واحنا الزرعنا الهوا عمرين بسنينة
ابتسمت واني بيدي وردة اخذتها من احد متسلقات واني امشي
سمعتة يهمس : احبج
رجف جسمي حيل ع انغام لحن حروف هذي الكلمة
- يبنية لج شويبة ام الزبل ليش من ايام اني سالحل روحي وانتي ثكلانة علي اشتاقيت لسطل زبالتج..
كل ما اذكر يكاد يغمى علي اعجابا بعطوبج المامشطة
واني امشي وسعت عيوني هذا شيخرط حجي هذا شنو من صراحة،عندة لا ما اسكت الا ارزلة يكلي احبج وبعدين يصنف علي مزقني شنو شويبة وزبل لا واخر شي ام اعطوب
درت عليه
- اسمع لك انت تمشي بسبيلك شنو شايفني حتى تعلق علي تعاليق رديئة
- والله احبج بس ردتج تحاجيني لج ايام ساحل روحي وانت صايرتلي درويشة و ما معبرتني.
دنكت راسي بين الخجلانة وبين ما اريد اشرد هذا الضابط الحلو طبعا كبل ماكو عبارات صاك وكيوت جنا نكول حلو او زلمة حوك.
استمرت علاقتي بمرتضى وصارت رساىل وطلعات للمنتزه
بيوم احنا كاعدين ونسولف حسيتة تقرب مني
جان يكض ايدي بين ايديه ويكلي
- الهام حبيبتي يمتة،اتقدملج
غمضت عيوني استلذ بلحن نبرة كلمة حبيبيتي بس احتاريت شنو اكلة، اكلة،مكنت صريحة وياك وابن عني خاطبني، اكلة،امس جابو الحلقات واني رفضت البس حلقتة لان ما اريد زواج بنهوة اريد احب واعيش الحب.
نزلت راسي ونزلت دموعي وياها
- شنو السالفة،شبيج يا بعد كلبي وطوايفي كلها ، لج لهانتي
باوعتلة بأستنكار واني بقمة،بواجيي و دموعي بس كلي لهانتي رجفت شفايفي وانفرجت بابتسامة،النوب ضحكة
- مرتضى ملكيت غير هل دلع لك شنو لهانتك هههه
- ما ادري اسمج ميدلع، ملكيت ادلعه الا لهانة
باوعت بيدة محبس مديت ايدي واخذتة
جان يباوعلي باحرتج
- لا ما انطيج ياه ؟
استغربت شنو يعز علي محبس جان اكلة
- لعد شكد بخيل؟
- لج اوكفي وين راح بالج، لا مو بخل بس هذا من والدي الله يرحمة، نزع محبس ثاني وخلاه بيدي
- هج هذا خاتم خطوبتنا
ههههههه
- لا عيني هذا تذكار وبس، اريد حلقة وذهب وحسب الأصول
شاكسها
- كافي عليج ذهب ثمنطعش.
باوعتلة
- يا عود صدك تحجي هيج اني رخيصة عندك، وسفة عليج روضي
عكد حواجبة وكللها : لج شنو روضي؟
- يلة مريضي
- شنو هذا مريضي مرض جديد؟ انجبي لج اني الضابط مرتضى.
- لعد تريد تنيشني بذهب ثمن طعش وتريدني ادلعك واكلك ابو الروض مثلا؟
لزم صابيعها وباس اصبع اصبع
- لج شعندي غيرج ، بس خل ينطوج الي شوفي شلون حدللج، لولو ، لج لهومتي
- دتاكل وتلهم وتكول لهومتي ، بس لولو عادي قابلة.
- لولو اريد اتقدم يمتة؟
جريت نفس ورجعت ذبيتة ورجعت جريت،النفس ورجعت ذبيتة،والمختصر شهيق زفير لازم اعترف
- اكول رضاوي، بعد عيني انت ونبض كلبي لا تزعل مني .
كاللها مستغرب : وليش ازعل ؟
- لان ابن عمي ناهي علي واني... .
قاطعها وكام وهو،مصدوم لمعت عيونة،وحست جنه حيخنكها
　
- انت شدكولين شنو ناهي عليج؟ لج ليش ورطتيني وخليتي اسمج ينحفر بنص كلبي ليش لهانة لج كل ما اذكر اول مرقف التقي بيج اتقزز اقصد اتمنى لو،جان بحديقة ورود واثل وجمال طبيعة، اخ الهام اخ هذا حظي مبين لان حبيت وحدة شمرتني بسطل زبالة،ايست من حظي وعرفتة،ملطم .
- لك شدتخرط؟ لك احبك بس شسوي مو،بيدي
- الهام اسف انت جرحتيني كذبتي علي علقتيني بيج ليش الهام ليش.
كام،وباوعلها بحدة وحزم ضابط ومشى بعيد
ظلت كاعدة وهي تبجي ودعي على محمد وعمها...
رجعت للبیت ?لش منهارة وتعبانة حست نفسي دون مرتضى الدنيا متسوى شي.
لكت محمد ابن عمي كاعد وبس ينافخ
- اوفففف كلة منك يابة هسة اني وين،وهاي الهام،وين
باوعتلة،وطلعت حركتي بيه
- هي لك اذا معاجبيك الباب يفوت جمل😑
- علي تحجين
- لا على امي شبيك حبوبي كاعد على اعصابك تتحسر
- اكو وحدة،تجي المغرب، وحدة محترمة طبعًا
- اني، على الأقل احسن من واحد فارض نفسة على ناس ميردوه، جاااو اريد ارتاحلي ساعة عود من تطلع سد الباب وراك
- شنووو تقصديني ؟
- لا اقصد ابوية
دخلت غرفتها ورجعلها كلام مرتضى نزلت دموعها اكيد هسة،ببيتة هم يفكر بيه لو هاي هي اعتبرني خاينة
ظليت ايام وليالي اكل بروحي اكل و كل يوم من اروح للمعهد ما اشوفة .
- معقولة يروح قبل موعد دوامة حتى ميلاكيني لك عيني مرتصة وينك لك اني لهانتك اني لهومة حبيبتك.
ايست من مرتضى وكلت هاي هية،بعد خلاص عافني وميصدك اني احبة مو العب بمشاعرة
اليوم جمعة
و مسوين دولمة ونلف بيها واني اتافف واباوع لامي.
- هذا حماج ماخذ اقامة هو وابنة شنو جابهم.
- عيب بنتي هذا عمج ومحمد خطيبج
- مفكرتو شلون اعيش وي واحد مطايقتة..
اندك الباب وطلع الهم اخوية جويسم
- بالباب جاين ناس من الكوت نسوان وزلم دخلتهم بالديوان.
كام ابوية وعمي للديوان
- وين دخلت النسوان وي الزلم لك جويسم شو انت ولا جنك مزوج ومخلف ؟يارب استر منو ذولي؟
راح ابوه
- يابة عذرونا هذا ابني ميفهم بالاصول خواتي تفضلن بجلوس النسوان مناك.
مطلعت اني و مرت اخوي كملنا لف الدولمة،وطبخناها وجانت امي تجالسهن بالاستقبال.
ورا فترة راحوا ومفهمت شي بس عمي معصب
- لازم اكاومهم ناهين وحاجزين الهام ويخطبوها
امي : اي ادري خوية هي البنية حرثة يا هو يجي يدك،بابها شمدريهم العالم حاط بيها ختم.
- لج ام جويسم انت تستهزئي بية مو بنتج لأبني و ما تصير ثنين.
اجت امي وهي تدرم على عمي
- خوش ناس لو ما عمج كلهم محجوزة يمة هذا ضابط من الكوت خاطبج يكول شايفج وشايف اخلاقج وسائل ويريد يستقر بالموصل ويزوج لان دوامة هنا.
دنكت وابتسمت
- موافقة
- ياا شموافقة اكلج عمج طردهم ويكللهم محجوزة
حسيت بحزن والم وقهر هل مرة اكيد خسرت مرتضى يارب مصدكت هل اسمراني الحلو يرجع عبالي ميريدني بعد.
شغلت المسجل وخليت كاسيت عبد الحليم واني الدموع اربع اربع
- اسمر يسمراني ايه قساك علية... .
ضليت ادور بالاغاني بالتسريع
- توبة توبة ان كنت احب تاني توبة... .،
رحت للمراية وباوعت لشعري الطويل، وجان مودة الكصير جاية مدري شيسموها بذاك الوقت تسريحة الاسد مدري ايش.
رحت للشباج شفت مرتضى لابس مدني بنطلون جارلس وقميص مقلم وشعرة الخنافس يماااه يكتول.
(كبل بالسبعينات البنات يتخبلن ببو خنافس هسة ببو مارلنز ومدري ايش والكذلة،صفح )
تقرب من الشباك وسبسبلي عيونة نزلت دموعي
- مرتضى يعني هاي هي حتعوفني
- لا يا حبيبة الروح حبج دوا وبلسم جروح.
مد ايدة ومسح عيونها
طبعا استمر حبيبي ابو الروض يدز ناس ع اهلي بس عمي عظمة بقى بالزردوم
بيوم سمعت دكة عالشباك وهمسة
فتحت الشباك
- رض رض هذا انت
- رض رض الله عظام عمج وابنة لا دلعيني هيج كولي مرتضى
- راضي رضوان رضاوي حبيب اني.
- لهانتي مبقة حل اجيب سادة وكبار بالحكومة
- يا ناوي تحبس ابوي لا والله،ما تنقبل منك
- لج ثولة اجيب اعيان الناس وكبارية اطلعج من فجوج عمج مو اقتل ابوج هذا الي لا يحل ويربط
- شنو قصدك
- ترى دون زعل ابوج حضينة بيد اخوه وين ميجي يمسح بيه
- مرتضى لا تجيب طاري ابوي رجائا
محسوا الا مرتضى ينجر جان محمد و جويسم وصار مضارب وبوكسيات
ركض جاسم داخل البيت وللغرفة،وسحل اختة الهام وتم الفصل
يتبع...

حبايب اسفة على التاخير موبيدي جويسم مال اني مو اخو لهانة 😄

مديخليني اكتب كلما شاف النقال تعارك وكال عينج رح تعمة هسة اليوم قشمرتة كتلة دااقرة ادعية بالنت مال نص رجب هههه شسوي بس حتة اكتبلكم وارضيكم بس ترة صدك رح اكوم اقرة ادعية واصلي صلاة ليلة النص.