شبكة روايتي الثقافية - عرض مشاركة واحدة - جبروت الشيخ وقلبي ، للكاتبة/ بنين الطائي "عراقية " (مكتملة)

فيتامين سي · 28-04-19, 04:13 AM

البارت السادس عشر

بنات على اساس البارحه انشر بارت بس صدكوا والله مالحكت .. وسويتها اليوم طويل وخاصه للمتابعين الوردات الي دعموني البارحه هذا خاصه الكم كملت كل احداثه بدون مااقطع بي حتى لاتكولون تشوقنه وتقطع البارت علينه ..
يالله مااستاهل الدعم تصويتكم حتى تشجعوني ولاتنسوا تابعوا حسابي
متابعه طيبه حبايبي
الكاتبة بنين الطائي ❤🦋.....

.........................................

غاليه ..ماااكوا شي ..مااسوي ..
شهاب ..شدخلج هنااا لعد
غاليه ..ااااي ..عادي ..جنه اني ورقيه واقفين ..شبيك هو جهاد واحد غريب ..هذا ابن عمتي ومثل اخوي ..
فجاءه اجانه صوت فااتن فهدني وبتعدت عنه شويه
فاتن..احم ..شنو قاطعتكم ..صايرشي ..واني مادري
استغليت الفرصه وتركتهم وركضت على الدرج ..رحت اشوف رقيه ..

شهاب ..بقيت اباوع وراها ..واني بداخلي افكر ..هواني شبي نفعلت زايد ..مااظن لان شفته واقف يم جهاد ..يعني شنو الغريب بالموضوع ..دائما يكعدون سوا وجهاد مختلط بينه مثل اخواني ..

قاطعت افكاري فاتن بضحكه ..شنوو هاي ..صاير تصفن ماعرفتك ..شهوبي ..

شهاب ..جااا شبيج ..جنج هاي الفزاعه الي يخوفون بيها الطيور ..

فاتن وهي تغمز ..لزم طيرت عصفورتك ..

شهاب ...ااروح اشوف ..امي احسن من حجيج الماسخ ..

شهاب ..من اجيت للعمارة ولسه مادري ليش صايره تصرفاتي مااعرف تفسيرهن ..شجاني هيج اتصرف اول تالي ..احسن شي التهي بالشغل .
رحت كعدت يم امي وحطيت راسي بحظنها ..وكعدت تمسح براسي وهي تسبح
شهاب ..يمه ..شنو رايج نسوي زياره للقرية
امي ..والله يمه ياريت ..بس شوف شوكت تفرغ ..وكلي نتحضر ونروح
شهاب ..انشاء الله ..
بقينه كاعدين اني وامي نسوالف لحد ماصار الغدا ..كمنه لكينه الاكل جاهز على الميز
امي وكفت على درج وصاحت البنات ..حتى ينزلن يتغدا

وكعدنه كلنه ناكل بس شويه ونهضت رقيه
رقيه ..اني شبعت
وراحت تركض فوك
التفت امي على غاليه ..يمه شبيها رقيه
غاليه ..ماااابيها خالتي ..شويه تعبانه
فاتن ..من شنو تعبانه قبل شويه جانت تضحك وفرحانه بالموبايل الجديد
غاليه ..هي مخبله ..تلكيها ضايج على نهاية المسلسل لو فلم حزين شافته ..هسه اني اخذ الاكل واصعد ناكل سويه
امي ..اي يمه ..خطيه مااكلت
غاليه ..لاتشلين هم ..ابقى ازن على راسها لحد متاكل ..
وصعدت بعدها غاليه ..وحسيت امي ارتاحت ورجعت تاكل ..
بعدها صعدت اخذتلي غفوه ..كعدت الساعه تقريبا بالخمس العصر ..انه من ارجع اجازه ابقى اغلب الوكت نايم يحل علي تعب الدوام ..لان هناك ماشبع نوم ابد

نزلت لكيت امي متعارك ويه محمد وايسر جهال فاتن ..مدري شمسويلها ..اول ماشافتني صاحت

ام علي ..ولك يمه شهاب تعالى ..شوف ذواله الملايجه شمسوين بالحديقه ..

شهاب ..عوفيها يمه ..اني عود اخلي واحد يجي يرتبها الج من جديد ..

ام علي ..ولك يمه هاي شجار والورد صارلي عمر ازرع بي من وكت ماجان ابوك موجود ..وكل شتله بالحديقه حطينها اله ذكرى ..لان ويه كل مولود يجينه جان ابوك يزرع شجره ..يكول تبقى باسمه ومن شلنه من ذاك البيت كل الشجر خليتهم يجبوهن ..من هاي عزيزات علي ..
تقربت بسة راسها ..مايعز عليج شي ياغاليه ..بس تعالي لاتتمرضين من وكفتج هنا الجو بدا يبرد ..واني باجر اخليهم يرجعوا كلشي مثل ماجان ..

دخلت امي بغرفته وكعدت يمها اجتي غاليه انطتني الجاي اخذته منها وكعدت اشرب واحجي ..ويه امي
صعدت اسبح ..وصحت على رقيه تحضرلي ملابسي ..
طلعت بدلت وسلمت علي امي وكتله اتاخر عود تعشوا انتم
رحت على علي ..وجان عدنه كم شغله خاصه بالعشيرة خلصتهن ومريت على جهاد وكعدنه ويه جماعتنه على شط جانوا يشوا سمج ..واحنه نسوالف ونضحك
بعدين اخذت جهاد على جهه ..وحجيت ويه
شهاب .. بيك شي .. اليوم اشوفك مو على بعضك ..

جهاد .. لا.. ماابيه ..صدك بس تعب ..اي احجيلي شصار وياك على مرتك

شهاب ..غاليه ..شبيهاااا

جهاد ببتسامة… بوويه من شوكت تعتبر غاليه مرتك ..جنت اقصد بنت التكريتيه

شهاب ..هااا ..لا ..بس لان هي الباقيه على ذمتي.. وطلقت ذيج وخلصت من سالفته فدمره ..

جهاد ....شتريد بعد موزين خلصت سالفه بينكم على هجي ..مااصار بينكم شي

شهاب هو يفرك بوجهه ..تريد صدك ..انه غلطت وياها

جهاد بصوت عالي ..شنوووو ..بوويه شغلطت موكلت مااوصلت يمهااا

شهاب ..اششش ..بوويه فضحتني بنص العربان… الي صار جنت سكران مو بوعي ..وصار الي صارر ..ومشكله من يومها ..وهي مجلبه تكلي احبك واريدك ..وارجعلي ..

جهاد ..انت فكرت زين قبل ماتتركها ..يعني مااتحس بناحيتها اي شي ..يخليها تبقى مرتك وماطلكهاا

شهاب ..بوويه شفكر كل عقلك ..كل صار غلطه ..وهي الي ستغلت فقدي لوعي ..انه مااجبرتها على شي ..جنت اقصد بكلامي وياهاا وحدة ثانيه وختلطت السالفه علي

جهاد .. خلص انهي موضوعها كله ..وخلص من هل السالفه ..لاتظل كل يوميا وثالث داك عليك ..وتريدك ترجعها

شهاب ..لا خلص رزلتها بعد اذا دكت تكون وحده بلا كرامة..

جهاد وهو يرفع حاجبه… اي ..مااكتلي منووو هاي الثانيه التقصدهاا جنت

شهاب ..كوم نشوف الجماعه سواا على العشاء ..

جهاد بضحكه .. اي ..افلت ..بس تاليك تعترف

خزرته ورحت ..اشرب اركيله ويه الولد ودك موبايلي ..فتحت هاي فاتن ..رحت مسافه وحجيت ..الوو هلا ام سجاد
فاتن ..شهاب ..امي حرارته مرتفعها ..تجي ناخذها للمستشفى ..شكد حاولنه مانزلت ..
شهاب ..جااايكم ..مسافه الطريق
بسرعه تحركت بالسيارة ..دخلت للبيت بعد خمس دقايق ..ركضت على غرفة امي… جاااا شكوا شببها ..

فاتن ..خوويه من طلعت لسه هي تون ..حاولنه ننطيها علاج ..وسوينالها كمدات ماافاد ..كلت تجي ناخذها للمستشفى ..
شهاب ..صدك جذب ..بوويه ليش ماادكيتي علي من وكت .
رقيه ..هو ردنه ندك ..بس مااقبلت امي كالت ..ماابيه شي على علاج هسه اصير زينه
غاليه ..خلص ..هسه اخذوها للمستشفى ..وبعدين العتاب

كعدت حطيت ايدي علي كصتها مشتغله نااار ..وتون طلعت روحي عليها ..وحجيت هااا حبيبه شلونج ..
ردت بالقوه تحجي ..لاتخاف يمه ..مابيه شي
رديت عليها .. ياامابيج شي وانتي صايره نار يالله كومي ناخدج للمستشفي
كومتها ..وحجيت لبسنها عبايتها ..ومنو تجي وياي بيجن
حجت فاتن ..انه خوويه بس اجيب عبايتي واجي
كتله بسرعه ..كومتها على كيفي ..واجتي غاليه عدلتلها الشيله مالتها ..وحطت العبايه علي راسها ..وكومناها اثنينه منتجيه علينه ..لبستها رقيه شحاطتها ..وكعدتها اني وغاليه للسيارة ..طلعت فاتن تركض وسندتها وكعدت هي وياها ليوراه

طلعنه للمستشفي ..وهناك شافها طبيب كاله هاي حمى صاير عدها ..انطاها علاج ..وضربها ابره ..بس تخربطت من ضربتها ..اني تخبلت عبالي صار بيها شي ..اجه يوكف كلبي ..بس طبيب كال هاي ماماكله زين والابره قويه ..فاااتخربطت ..
عاد فاتن حجت ..اي صح ماقبلت تتعشا كالت مااكدر اكل ودخلت تنام ..

رد الطبيب ..اي وهاي الابره قويه فتخربطت ..بس هسه خلتلها مغذي بس تخلص ترتاح ..وهذا كتبتلكم علي مغذي وابر جيبوهن من برا ..وفد ٤ ساعات من الان هم تضرب وحدها بالمغذي ..
وراه شويه كعدت امي وحجت ..خلي نرجع يمه ..مااظل وكت البنيات وحدهن بالبيت ..
رديت عليها ..يمه لزم تضلين هنااا ..مااسمعتي الطبيب كال عندج بعد ٤ ساعات ابره هم ..

فاتن ..روح انت شهاب يم البنات مايصير يبقن وحدهن ..واني وامي نبقى

شهاب .. شلون اعوفجن وحدجن ..احتاجيتي شي ..صار شي ..خلي اخابر علي علي يروح للبيت ..
ردت امي ..لا يمه ..لاتخابر ولاابد ..اني اريد ارجع للبيت اتخبل من المستشفى مو تدرون بيه ..وعود انتم اضربوني الابره ..

شفت امي ماتقبل تظل ..رحت للطبيب وسوينه خروج وكلي خاف تحتاج سوالها كمادات هم ..

رجعنه للبيت ..وحطيت العلاج يمها ..وحجيت راح ابدل واجي انام هناا يمها ..واذا احتاجيت شي اكلكم ..انتم روحوا ناموا كلكم ..

فاتن صعدت تنام ..بس غاليه ورقيه مااقبلن ..وجابن فراش ونامن بالكاع بالغرفه ..اني سنحت بصفها على سرير ..

لهناك اخذتني الغفوه ..وكعدت وراه تلاث ساعات ..لكيت غاليه كاعده تسوي كمدادت لامي ..ورقيه مبطوحها ونايم على الفراش بالعرض ورجليها رجل على مخدات ورجل بار الفراش ..
نهضت وحجيت ..شلون صارت ..

غاليه ..لسه عدها حراره ..بس جاي احطلها كمدات حتى تنزل ..

شهاب ..انتي ماانمتي ابدا

غاليه هزت راسها ..بلا

اباوعلها جانت اول مره تنزع شالها كدامي ..من وكت مااصار بينه مشكله ..بس جان شعرها وكتها مصبوغ وملعوب بي ..بس هسه راجع نفس لونه ولايك اله كلش ..هي لمته شلون ماجان ..فنازل مخربط عليها ..والظاهر من كثر ماامشدوها ويه امي ..نست تلبس شالها ..اني هم بقيت صافن وهي تتحرك خصل شعرها يطير بكل حركه ..جنت اباوع وحجي ..عاادي مرتي واذا بااوعت ..بعدين هزيت راسي ..هاي شبيه ..جااي افكر اني وشبي هيج صفنت ..
عايف امي وملتهي اصفن بشعرهاا

تقربت من امي لزمتها ..نازله حرارته بس لسه بيها حراره
باوعت على الساعه وحجيت ..غاليه ..امي عدهاا ابره بعد ساعه ..اخااف انسى ذكريني
ردت وهي تسوي كمدات ..اي ..مااشي

بقيت ارقبها وهي تهتم باامي ..مااحست على نفسي من غفيت ..كعدت على ندها الي… شهااب ..اكعد حتى تنطي خاالتي الابره ..

طفرت ..اي ..ااي

شكلت المغذي ..وعلكته بالسرير وضربت الابره بي ..

باوعت جانت كلش تعبانه ومبين عليها النعاس ..
حجيت ..روحي انتي ناامي خلص ..اني اكمل

ردت ..لا ..لا اني ماانعسانه ..من انعس عود اكعد رقيه ..نام انت ..

سحبت من ذرعها وكعدت بدالها ..روحي بوويه راح توكعين عليها ..مواطيب وحدها وتكع الثانيه ..روحي اني شبعت نوم ..

راحت ونامت بصف رقيه ..وبقيت اني كاعد اسوي كمادات لحد ماصارت الساعه خمسة ..طبعا انه متعلم علي الخفارات واصلا بالدوام ماانام هواي لو ساعه لوساعتين ..بس سبحان الله من اجي للبيت يجيني كل نوم واصير اطفي لحالي ..يمكن لان الدماغ يبدي ينطي ايعازات وكت راحة ونوم ..
المهم كعدت رقيه ..واجتي شافتني جاي اغفي بالقوه مسيطر ..حجت ..يااا انت بقيت سهران كل ليل ويه امي
رديت ..لا بويه غاليه واني تشاركنه بالسهر
رقيه وهي تسحبني ..روح نااام يالله اني راح اكمل عنكم لان نمت وماتعبانه ..
رقيه سنحت بصف امي وكعدت تسويلها كمدات
شهاب ..جااا وين اناام كوومي منااا ..كعدي بالجهه الثاني

رقيه ..دنام بفرشي موهذا يمك فارغ ..واني هيج مرتاحه مااتعب ..
جنت منعس كلش ..ومااشوف كدامي ..رحت شمرت نفسي بفراشهااا ..
حسيت تقريبا الساعه بالعشره ..بااوعت جنت ناايم وبصفي غاليه ..رفعت راسي لكيت رقيه غافيه على نفس مكانها ..كمت ..لزمت امي لكيتها بارده ..لزمت كصتها هم بارده ..
الحمدالله رجعت حرارته طبيعيه ..وادينها لزمتها باردات وكتها اطمن كلبي ..ورتاحيت
دخلت فاتن وحجت ..هااا خوويه شلونها امي شلون صارت
رديت عليها ..لا الحمدالله صارت احسن
دارت بعيونها وهي تباوع على رقيه وغاليه شامرات نفسهن ونايمات بعمق
فاتن ..ياا خطيه ..مبينين بقيتوا سهرانين الليل كله
رديت واني انهض من مكاني بثقل بعدني نعسان ..اي والله ..تناوبنه عليها لان جانت حرارته عاليه مانزلت للصبح ..
فاتن ..ياااسوده عليه ..ماكعدتونه وياكم ..كل ضني نزلت حرارته وكلت بس تضربها الابره تصير زينه ..بس الظاهر جانت حمى قويه ..
رجعت تمددت بمكاني ..جااا مو احنه تلاثتنه موجودين ..وانتي هم عندج جهالج ..مومال تسهرين الليل كله ..والحمدالله هل صارت زينه ..بس تركيهم نايمات خطيه تعبن البارحه

فاتن ..اي خوويه ابقوا نايمين ..واني راح اسد الباب واطلع اريك الجهال ..واخذهم فوك حتى مايسوا هوس خطيه امي تعبانه خلي تبقى مرتاحه ..
هزيت راسي ..وطلعت فاتن وسدت الباب وراها
جنت نايم علي ظهري ..التفت على جهة اليسرى ..جانت غاليه نايمه ومتلفلفه تلفلف بالغطا ماطالع بس وجهه ..وايد الي حاطتها كدامها على مخده
صفنت اباوع عليها ..وضحكت علي منظرها شعرها مهوس بكل مكان ..ودينها مشموره متر عنها ..وملفلفه بالغطا تكول دولمه ..شكله بحد ذاته طفولي وتصرف بطبيعته مااتتصنع وهل شي يخليها طفوليه اكثر
بعدين انتبهت علي نفسي مركز زايد وياها ليش ..رجعت قلبت نفسي على ظهري وحطيت اديني على عيوني
واني افكر ..ماالزم اكعد احلل وافكر زايد شدخلني اني بتصرفاتها وكاعد احلل بيهن ..
مااحسيت بنفسي من غفيت ..كعدت بالقوه اتحرك ..كمت اباوعت مااكوا احد بصفي فراشها فارغ

رفعت راسي لكيت امي كاعده ومنتجيه على سرير
وكاعده غاليه بصفها وتشربها شوربه ..
كمت من مكاني ..ورحت يمها ..هااا يالغاليه شلون صرتي هسه ..
باوعتلي بضحكه ..اذا تسال عن غاليه هلا كدامك وسالها ..بس اذا تسال عني ..اني الحمدالله بالف خير
ضحكت وكعدت بصف غاليه الي صارت بيني وبين امي وحجيت ..لا وصايريه تحششين حجيه ..جااخوش حمى هااي ..يرادلي وحدها مثلها
امي بسرعه انتفضت ..لايمه اسم الله… الله لايشوفك تكسر العظام وتنحل الجسم ..
رديت عليها ..والله البارحه هبطيتنه عليج ..غير كل الوكت فاقده ومااحسيتي بشي بس جسمج مشتعل بنار
امي ..اي والله سوده عليها ..تعبت وياكم ..والليل كل سهرانين تسوان كمدات
اجيت احجي بس سبقتني غاليه الي ابتسمت من ردها ..وهو احنه شفاتيتلنه نكدر ..ننطيج ولو نقطه من بحر الي انطيتي النه ..هو احنه لو نسهر الج عمر مانوفيج نص تعبج علينه ..وسهرج بمرضنه وقلقج على حالنه
امي ردت وهي مبتسمه بمحبه ..الله يحفظج بنيتي وحبيبتي ..
باوعت علي امي مبتسم ..جااا شنوو احس دعوتج صايره خاصه ..موعامه ..نسيتينه بس غاليه صارت بنتج لوشنو
امي وهي تضحك ..لا شلون انساكم ..ربي يحفظكم كلكم الي
رديت واني رافع حاجبي ..اي هيج من البدايه حجيه ..
ردت عليها غاليه ..يالله خالتي اكلي ليش وكفتي ..ترى جسمج تعبان ويحتاج تغذيه ..وانت ماماكله من البارحه
امي ..والله يمه شبعت ..بعد مابيه اكل ..
اخذت غاليه الخوشه من ايد امي وكعدت توكلها وتكلها ..يالله بس هاي الخاطري ..
وامي اكلت ..وردت بس لان الخطرج اكلته ..
وماقبلت تحط بعد لكمه بحلكه ..
تقربت من غاليه ..ومديت ايدي من بصفها ..هي نزت بس ماتحركت لان صينيه جان على رجليها ..
اخذت الخشوكه من الماعون ..وحجيت ويه امي ..يالله وانه ماعندي خاطر ..وتاكلين من ايدي
امي بقت مصدومه تباوعلي ..واعرف ليش ..لان تقريبا حركتي خلت غاليه تصير بحضني ..لان ظهرها صار بصدري ..وهي ارتبكت وخجلت
بس ماتكدر تتحرك ..لان ايدي الثاني متجيها على حافه ساد عليها طريق الخروج ..
امي ابتسمت وهي تباوعلي ..واخذت تشرب من ايدي وتحجي ..والله يمه من ايدك اكل الماعون كله ..
ضحكت على سالفه امي ..وصرت اعبرلها لكمات وهي تشرب ومتونسى ..
وعايفين غاليه الي صارت طمامة من حركتي هاي
مااجان قصدي شي ..بس اضحك من احس بيها تنحرج مني وتصير حمره ..هذا الخجل ماادري ليش احب شوفه
يمكن من كثر ماافاقده بالبنات ..صرت احب احرجها بس حتى اتونس بخجلها ..
بعد لكمتين والثالثه ..ماتحملت ..وطفرت واقفه ..وحجت اروح شوف الغدا ..وخلت الصينيه بحظني وفلتت ..
ضحكت من فلتت ..التفت لكيت امي تباوعلي بنظرات تسال ..تقربت عليها ..وكتله يالله اخذي دواه
وكعدت انطيها العلاج واحجي بي ..وضيعت السالفه

بعدها تغدينه وانطيت علاج لامي مال الظهر ..
وراها جنت كاعد يمها بالغرفه دخلت فاتن
فاتن ..يمه ..اني راح اروح ..باجر الصبح امير عنده دوام
حجيت .. وين ..ماتشوفين امي بعدها مريضه وتحتاج مداره
ردت امي ..لايمه ..خطيه خلها تروح ..رجلها خطيه عنده دوام ..وهم اني الحمدالله صرت احسن ..وانت والبنات موجودين يمي ..
فاتن ..يمه اذا تحتاجيني ابقى ..راح اخابر امير ..وكله يروح وعود خلي اشهاب من يلتحق ياخذني ويه
ردت امي ..لا حبيبه روحي ويه رجلج ..لايظل بالج ..هنا يمي بناتي اثنينهن وشهوبي ماايحتاج ..جاي نحجي
وسمعت صوت علي ..يحجي ويه غاليه ..
وساله على امي ..صحت اني ..تعال ابو حسين ..هناا
دخل وسلم ..وتقرب على امي باس راسها وحجه ..جااا يكولون مريضه وتعبانه ..اشوفج صاير جنج كيكه ..حتى خدود حمر ومضويات ..جااا اني اشوف لوتكومين وتخليني اني اكعد بالج دشوفي وجهي تكول بيه ابوصفير ..

ضحكت وحجيت .. هاي الخدود الحمر من اثر السخونه مال البارحه ..
ردت امي علي ..يااايمه ..منو كلك ..مو كتلهم لايكولك هو انتي حاير بنفسك نوب يظل بالك يمي ..

علي ..بويه شلون ترضيه انتي ..مريضه وانه ماادري ..غير جان لويت اذناتهم كلهم
بهاي سالفه ودخلت غاليه شايله الجاي ..انطتنه كلنه
وكمل علي وهو يضحك ..اول واحد اشلع اذاناته شهاب ..شتكولين غاليه
رفعت راسها تباوع علي وردت التفت علئ علي وجاوبته ..والله ابو حسين ..بقت بكيفك
رديت واني رافع حاجبي .. لزم عجبتج السالفه ..وبكيفك

ضحك علي وحجه ..والله بس اشري ..غلوي اني املصلج اذاناته

بااوعت عليها انتضر شترد ..
بس ابتسمت وسكتت
شويه وعلي حجه ..اكول لزم نعوف امي ترتاح شويه ونطلع بالصاله احنه ..
باوعت امي خطيه من اثر الدواه غفيانه ..اشرت براسي وطلعت ..
لكيت فاتن مبدله هي وجهاله ..صحتلهم انطيتهم كل واحد خمسه ..وكتلهم لاتصوفوهن كلهن مره وحده ..
وشفت بطه ركضت كعدت بحظن غاليه ..وهي تحجي تعالي ويااانه ..عفيه
ضحكت وكرصت خدها وكلتله ..وعد عن قريب بس تصير بيبي زينه ..نجي كلنه مااشي
شبقتها وكعدت تكله لا اا هسه
بهل الاثناء دخل امير ..وسلم وردينه علي ..حجه لعد عمتي شبيها سلاماتها ..وينها اكدر اشوفها
رديت علي ..والله غفت من اثر الدواء يخليها نعسانه كل الوكت ..بس الحمدالله زينه هسه
امير ..الحمدالله ..حرامات عبالي اسلم عليها قبل مارواح
رد علي ..وانتم شجاكم مستعجلين مااصارلكم يوميا من اجيتوا
امير ..والله شيخنا صارلنه ٤ ايام هناااا واني اجازتي خلصت من البارحه المفروض اليوم التحق ..بس اجلتها على باجر ..
شهاب ... بويه لو وصلتوا بالسلامه دك علي
امير وهو ينهض ياخذ الجنطه من ايد فاتن ..اي انشاء الله ..يالله مع سلامه ..سلمولي على عمتي ..
طلعنه اني وعلي وراهم ..الله وياكم ..توصلون بالسلامة
قبل ماتطلع التفت فاتن على علي وبوسته ..ورجعت علي تبوستني وحجت بااذني ..انشاء الله كلبك رف على العصفوره ..

باوعتلها بخزر ..جوزي من سوالفج فاتن ..
ضحكت وراحت حظنت غاليه وبوسته ورجعت على رقيه
ودعتنه وراحت ..

طلعت وراهم للباب ..ودعتهم الباقين رجعوا جواا
دخلت للصاله جان علي كاعد يشرب مي ..وكاعده غاليه بصفه ..ويحجيلها عن المشاكل التصير بالعشيرة ..وشلون حلها ..وحتى مشكله بينه وبين ناس بصفنه كاعهم على المي من يحجي الغاليه ..وهي تكله انشاء الله كلهن محلولات لاتشيل هم ..
بقيت صافن ...هو احنه لامي ماحجينه هاي المشكله ..وبعدين علي ليش يحجي ويه هل الزعطوطه هاي سوالف العشيره ومشاكلنه ..
اول ماكعدت خزرتها وهي باوعتلي ودنكت ..بس علي حجه ..روحي بوويه احميلي الجاي ..راسي اليوم كلش مااذيني والصداع من الصبح لزمني
انتبهت عليها فزت وحجت بسرعه ..شنوو ليش ..اخاف الضغط عندك صعد..هم قسته

علي ..لا والله ..بس اخذت الدواه مالي
كمزت تركض وجابت جهاز الضغط ..واجتي كعدت بصفه تريد تقيسه اله .. تقربت اخذت الجهاز من ايدها .. وكومته وكعدت بدالها ..جيب خوويه خلي اني اقيسلك احسن

مد ايده وقسته ..طلع 13على ثمانيه
حجت غاليه ..ياااا صاعد شفت ..غير تنتبه زين على نفسك .. لحظه اسويلك نوم بصري ..واجي
حجه علي الي لاحظت وجهه فعلا صاير اصفر ..اي والله بعد ابوج ..مااكاعد اشوف زين من الصداع ..فوقها عندي روحه على قريه
رديت علي .. عندك طلعه..وانت هيج تعبان
علي ..خوويه غير منطي موعد للعالم ..اليوم الكعد مالتهم بالخمسه ..
شهاب ..خوويه روح انت بالبيت ارتاح ..انه اروح بدالك
علي ..جااا اذا رحت انت ..اخذ جهاد وابن عم ابوي ابو احمد وياكم ..
باوعت الساعه بعد كدامي ساعه ..اي لاتشيل هم بس روح ارتاح انت
اجتي غاليه وانطت الحامض ..وشرب وكالي راح اروح انام شويه بغرفت امي ..غلوي عود ساعه هيج وكعديني
غاليه ..اي تاامر

راحت للمطبخ بسرعه بدون ماتباوع علي ..باوعت جانت واقف علي كاونتر ومنطيتني ظهرها ..
تقربت منها
حجيت بعصبيه .. غاااليه
التفت باوعتلي ورجعت ..نعم
ولاجن بشر يحاجيها منطيتني ظهرها اخذت نفسي ..وحجيت ..بوويه اثقلي شويه لا تظلين تكمزين ..
غاليه .. ليش شسويت اني .. وبعدين لا تظل تنتقد تصرفاتي وانتـ...
صدك فار دمي هي بلعت السالفه ..ماكملتها ..واني
اجيت سحبتها علي من ذراعها ..بس بيدها سراحيت مي ندارت كله على دشداشتي عطت بيها ..ولج ثوله ..شسويتي بيه ..لج تبقين طول عمرج فاهيه ..مايفيد الحجي وياج ..اشتعلت صفحت اهلج ..المي مثلج
ردت وهي تبجي.. اسفه مو قصدي ..ماادري راح تسحبني هيج
اباوعلها الدموع عشره عشره ..وعيونها مغوركه وخدوده صارن حمر ..على شنوو تبجين غاايبه ..شمالج هيج دموعج رخيصات بكلمتين نزلن ..

دنكت وهي تحاول تمسح دموعها تكول طفله صغيره ..بوويه كاافي ..عمي ديري السراحيه كلها فوكي ..مااحجي ..انه واحد حيوان.. وغبي ومااعرف احجي عدل من اعصب ...بس كاافي خلصتي دموعج كلهن ..
باوعت عليها رفعت راسها وهي مبتسمه وشكلها يموت تكول طفله عيونها كله دموع وهي مبتسمه ..خلص روح بدل ملابسك مااابجي
رديت واني احط ايدي على خدها ..هاا هسه بطلتي بجي من حجيت على روحي ..
بلا ماحس لكيت ايدي تمشي على خدودها وهي صافن تباوع علي متفاجى بتصرفي ..انتبهت على نفسي ..وسحبت ايدي بسرعه ..وحجيت اروووح اسبح وبدل تااخرت

صعدت لكيت رقيه ..كتله حضري ملابسي ..علما اخذ حمام ..
ردت علي بصوت ..عوود ليش يوميا متعبني ..ومخليني اطلعلك ملابس ..وبلاخير تلبس غيرهن وتطلع
باوعت عليها شبيها هاي ..كتله شارب شي انتي ..يوميا البس الي طلعيهن انتي ..
عفتها ورحت اسبح ..من طلعت لاف خاولي على خصري وشعري ينكط مي ..دخلت للغرفه ..باوعت لكيت رقيه مطلعه قميص وبنطرون ..وماكوا لا ساعه لامناظر على ميز ..بقيت صافن هااي شبيها
بعدين باوعت اتذكرت موبايلي بقى بالرف بالحمام
عفت الملابس ورحت ..
من رجعت وقفت بالباب مال غرفه واني عيني على غاليه الي رجعت ملابس رقيه الي مطلعتهن ..وطلعت دشداشه نيلي ..وغتره بلونها ..وطلعت ساعه والمناظر ..وهي تتحرك ..تعرف كل شبر بالغرفه ..وكل غرض وين مكانه
مبين اني هي طول الوكت الي مهتمه بالغراضي وغرفتي

من التفت نزت ..من شافتني منتجي على باب وارقبها
دنكت وهي تعض شفته من التوتر والخجل ..واجتي تطلع وحجت ..موو قصدي ادخل غرفتك ....بس لان ...بسس خليت ملابسك
قبل ماا تعبرني لزمت ايدها ورجعتها للغرفه ودفعتها على كنتور من الجانب ..وسديت الباب برجلي
نزت وتباوعلي بخوف كل ظنها راح اذيها ..تقربت منها
هي رجعت على كنتور ولزك بظهرها ..
حجت وهي تتنفس سريع وحط اديها كدامها ..اسفه ..والله ماااعيدهاا ..مااراح ادخل لهنا مره ثانيه… والله اخر مره
كتمت ضحكتي على منظرها تكول طفله وخايفه من العقاب ..حطيت اديني من جهتين حصرته بالنص ..وحجيت بصوت نااصي… هيج انه اخووف وماادري..

جانت تحاول بكل قوته حتى تبقى بعيده عني وكامت ترجف كلها تكول راح اعدمها ..من غير الخدود الصارن حمر دم ..وحجت بخووف ..والله ماااعيدها … مااراح ادخل هنااا اخررر مره
تقربت منها وحجيت بااذنها اليسرى ..يعني ..كل الوكت ..جنتي تلبسيني على ذووقج ..وانه الاغبر ..البس واطلع ..بلا مااادري

حسيت بصوت انفاسها يصعد وينزل بصعوبه ..واديها ترجف ..وجاوبتني بصوت بالقوه يطلع ..اسفه ..مااادخل بعد بلبسك… اخر مره والله..
حجيت واني اباوع عليها من فوق ليجوا ..مااطلع من جسمها غير ادينها وبس ..وحتى شعرها لابس شال
حجيت ..ااسامحج بس بشرط
ردت بسرعه ..شنوو
دنكت على اذنها وايدي الثاني فتحت بيها الشال مالتها وسحبت من راسها ..وحجيت ..نوب مااتلبسين كدامي شال ..وتتصرفين طبيعي بالبس ..لان انه زوجج مو حرام اذا اخذتي راحتج وياي ..جنت احجي واسحب بالشال ..لحد مااوكعدت بالكاع ..ونزلت خصل شعرها متناثر بكل مكان جانت رافعتها كبه والباقي نازل بشكل عشوائي ..جان لونه اسود كلش ..ويه ركبتها الي برزته بياضها ..مااعرف وكتها صار بس كل الي حسيت
ان دنكت على ركبتها ..وشميت ريحة عطرها بهدواء بدون ماا طخها ..ورفعت راسي اشتم عطر شعرها واني اسرق هاي الشمات بدون مااتحس بي ..سرحت وغمضت عيوني ..وانه اول مره يجذبني عطر وحدها
بس بسرعه تدركت نفسي وبعدت عنها من سمعت صوته حجت ..بس ماامتعوده عليك… اقصد ..ماااكدر اخذ راحتي بوجودك ..احسك غريب عني ..يعني ابن عمي وبس

بعدت عنها وانطيته ظهري واني امسح وجهي ..احاول اركز شجاني اول مره بحياتي اتدوهن هيج
ضيعت كل قوتي وصرت ضعيف بقربها ..حتي تفكيري انشل وماكمت افكر زين ..اخذت نفسي ورجعت لنفسي
وريت بعصبيه ..خلص اطلعي منااا ..خليني ابدل مااظلي وكت
وريت بعصبيه ..خلص اطلعي منااا
سمعته طلعت وسدت الباب وراها من غير ماتحجي حرف
باوعت للملابس ..ولزمتهن وشمرتهن بالكنتور
وطلعت غير دشداشه ..وبدلت وطلعت بسرعه ..
بليل رجعت متاخر ..بعد مااخذت جهاد وابواحمد ورحنه للقريه ..كملنه الكعده ورجعنه ..
اول مادخلت للبيت توجهت على غرفة امي لكيتها نايمه
قربت لزمته بيدي زينه بارده ..بست راسها وطلعت
صعدت بدلت ..وصحت رقيه نزلي سويلي عشاء
ونزلت كعدت بالصاله وشغلت التلفزيون ..درت اباوع الاخبار ..بس شد نظري فلم طالع عفته علي
شويه ودخلت غاليه وبيدها صينية العشا وخلتها كدامي
باوعت عليها مالبسه شالها وشعرها علي نفس شكله ..تذكرت السويته وحجيت بعصبيه ..ليش انتي جبتي العشا ..لعد وين رقيه

ردت علي وهي تطلع ..عادي اذا مااتحب تاكل من ايدي ..خليها تنزل وهي تسويلك مره ثانيه ..
فار دمي وكمزت عليها سحبت من ذرعها واني اضغط على ايدها ..جااا اشوف صايرلج السان ..وترددين

ردت علي وهي تلزم ايدي الضغط بيها على ايدها ..مووقصدي ..والله ..اسفه ..بس حجيت لان اني اصلا جنت محضرتلك العشا قبل ماتطلب من رقيه
رخيت عليها وبتعدت عنها ..روحي نااامي ..مااريد شي بعد
هزت راسها وصعدت ..كعدت اكل ..يربي حتى الاكل من ايدها بي طعم يشبهه اكل امي نفس الطعم ..مومثل رقيه دومها لو حاركته نصه لو ماامستوي زين

جريت حصره وكملت اكل ..ودخلت الصينيه للمطبخ ..مااجان الي نفس حتي بالجاي ..طفيت الغراض وصعدت حتى نام ..اول ماحطيت راسي على مخده ..غمضت عيوني ..واجه بالي ريحتها وتذكرت شلون جانت بيدي خايفه وخجلانه ..واديها ترجف وخدودها حمر ..تذكرت من تقربت من رقبتها وشميت ريحته ..الي احلف لسه مجلبه بخشمي ماراحت ..
كمزت من مكاني واني افتح عيوني ..شنو شبيه صرت مراهق ..لو يمكن اول مره اوقف كدام مره ..لوتسودنت تالي عمري ..

اخذت موبايلي .. اقلب بي بلكي اتعب وانام .. بس دماغي يشتغل وحده ..خاصه من غمض عيني ..استغفر الله ..جاي يصير وياي ..لزم الكلي حل لهاي السالفه
كعدت الصبح ..باوعت غافي على موبايلي بلا ماحس
اني ..نزلت صبحت على امي ..لكيت كايمه من الفراش
كتله تكعد ترتاح ..بعدها تعبانه ..صعدت بدلت ونزلت
لكيت بالمطبخ كاعده تتريق هي وغاليه ورقيه ..بعدهن مامتريقين بس حاطين السفره
امي باوعتلي وحجت ..وين رايح يمه من الصبح ..تريك وروح ..

رحت يمها بست راسها وكتله ..يمه عندي شغل مهم مالحك ..وطلعت بسرعه ..

بقيت كل نهار ملتهي ويه علي ومريت على قريه شفت شكوا ماكوا ومريت على الكيعان جان موسم زرع ..شفت زارعين هواي مخضرات وركي وبطيخ
سلمت عليهم ودرت شفت الكيعان مال جدي كلهن
تلوكني كل الفلاليح ..بترحيب وهلا
ومنور شيخ ..والي يطلب شغله ..والي يريد يعزمني
بس كتلهم مستعجل غير مره
كاموا حملوا الي بصندوق السيارة ..خيار وركي وبطيخ وباتنجان ..وباميا وطماطه ..وخضروات
خلوهن بصندوق السيارة ..وبطريقي مريت على بيت جدي سلمت على عمتي واخواتي اثنين
هم حطلي روبه وتمر ولبن ..وحليب ..
طلعت من عدهم بعد ماجلبوا بي على غدا اجوي ولد عمتي الجبيره والماخذين خواتي من غير ام
سلموا علي ..وجلبولي بيه على غدا بعد ماكدرت اطلع من عدهم ..
رجعت للبيت العصر ..لكيت مهند جاي
رحت علي للصاله ..هلا شلونك ..مو على اساس تلحكنه بس نجي ..جااا ستوك يالله اجيت
كام سلم علي ..والله التهيت عندي كم شغله بالعياده خلصتهن واجيت
جاي نحجي ودخلت رقيه ..انطته الجاي وحجت ..ترى اطلبك هديه ..موغلست ..دكتور مهند

مهند ..اي تدللين انتي وغاليه ..الكم احلى هديه

رقيه ..شوف اني مااريد شي مادي ..اريد من نروح لبغداد تعزمنه على احلى اطلعه..تونسنه ..هااا شكلت

مهند ..اذا على هاي سهله بعيني

رقيه ..تسلم احلى دكتور بالدنيا

باوعت على مهند شكله تعبان ..حتى يرد بالقوه حسيت بي شي ..
بعدها رحنه كعدنه يم امي ..ومهند قاس ضغطها كاله كل زين ..
كعدنه كلنه بالصاله ..وجنه نحجي بس مهند شكله ضايج من شي فعلا ..لان لو يرد بالكلمة لو يسكت
حجيت بيني وبينه ..جااا شنوو شبيك ضايج

رد ..لا مابيه ..مااضايج بس شويه تعب من ضغط الشغل

رديت رغم ماقتنعت بحجيه ..خلص اخذلك راحه ..الشغل ماايطير

باوعلي وهز راسه ..يصير خير انشاء الله

صبوا عشاء وكعدنه نتعشا ..بس مهند مو من عوايده مااكل لكمتين وكام راح كعد بالصاله
التفت امي علي ..يمه ااخوك شبي ..شو من اجه لسه مو على بعضه ..شصاير ويه
رديت ..والله ماادري يمه ..يكول تعب من شغل
باوعتلي وخذت نفس ..لايمه اخوك مو خالي ..مهند من جان يطب لحد ماايروح هو بس يضحك ويشاقه ..

ردت رقيه ..اي والله عجبني كل ماجان يجي يبقى بس يتناكر وياي ..بس هل جيه ..ابد مااحجه ولانصب علي مثل عادته ..

رديت واني انهض ..خلص عوفوا هو لو يريد يحجي ..جان حجه من البدايه
صعدت لغرفتي ..كعدت اخابر على جماعتي وشوف شكوا ماكوا بالدوام ..وين صاروا وشسووا وراي ..
ورديت خابرت على جهاد ..وبقيت احجي ويه علمود يشوف شصار على كاع الي بجهه الثانيه مالحكت امر اشوفهم شمسوين بيها ماامسوين

كملت ونزلت ..جانت رقيه كاعده على تلفزيون ومطلعه مسلسل هندي باوعتله ..جااا انتي خلصتي من تركي نوب كعدتي تابعين هندي

حجت وهي مركزه على المسلسل ..لعد وين اروح ..خلي اكضي وكتي ..وطلعت المسلسلات الهنديه احلى بعد من التركيا
هزيت راسي مااكوا فايده بالحجي ..كتله لعد امي ومهند وين
كالت ..امي راحت تناام ..
ومهند كاعد باره بالحديقه على مرجوحه ..كال ادخن واجي
صفنت مهند مايدخن الا من كلش يضوج
طلعت اريد شوف وين ..بس سمعت صوت حجي
تقربت وسمعته يحجي ويه غاليه ..ويكله الله كريم ..بلكي مثل ماتكولين وتخلص لهنا ..لان بزعت روحي ..
ردت علي ..لا تظل تفكر ..كلشي راح يصير تمام
تقربت منهم وحجيت ..الله يثخن لبنكم ..من شوكت عدكم اسرار وكاعدين تحجوا وحدكم

رد مهند ..هو لبنه من زمان ثخين بس لا تجفص انت بنصه ..

غاليه بضحكه ..قصدك لبنه لو مصايبنه ..
ضحك مهند ومبين علي تغيرت نفسيه ١٨٠ درجه ..وعلي لسه اتذكر ..الله لا يرجعها من ايام
كعدت علي كرسي مقابيلهم هم اثنينهم كاعدين بالمرجوحه ..جااا شنهي من اياام هاي
رد مهند وهو يضحك ..انت غير يخووي جنت مااتختلط بينه من صغرك ..وانت تفتر ويه علي بالديونات والمضايف
اما احنه فجن شكوا مصيبه بالمنطقه مسوينها
التفت علئ غاليه وحجه ..تذكرين شعوانه ..وعلي لسه اتذكر انعالها وحسه لسه مطبوع بركبتي ..
غاليه ضحكت ..اي اتذكر ..من طبتوا انت وزيدون تقطعوا عنب من طرمه مالته ..ولزمتكم وانطت كل واحد نعال ..

مهند بضحكه ..خررب واالله ايااام ..والله شعوانه لوتدري انطت نعالين واحد اكل دكتور والثاني مدرس جامعي

بقيت صافن عليهم وهم يضحكوا ويتذكروا سوالفهم من جانوا صغار ..اتذكر مهند وزيدون جانوا كبار بس سوالفهم مال مزعطه ..وهذني الاثنين جانن جهال ويفترن وراهم مثل ضلهم وين مايرحوا ..
بس اني جنت بوكتها ملتهي ويه علي ..جانت سوالف العشاير وكعدت الشيوخ تجذبني اكثر من هاي سوالف مال مراهقين ..
بس من يحجوا ويضحكوا ..ضجت ..وحس النار صارت بداخلي ..مادري لان ماعندي ذكرى وياهم ..لولان مهند جان يفضفض ويه غاليه ..مااعرف بس الضوجه اكلتني
وحجيت بعصببه قاطع كلامهم ..بوويه مهند شكد ناوي تبقى ..

رد وهو مدنك راسه ..ماادري..بعدني ماامقرر
تعجبت هو كل عمره ماايبقى اكثر من يوم لو اثنين ..
كام وكال ..اني اروح انام ..لان تعبان كاعد من صبح ..باوع علي غاليه وحجه ..غلووي اذا ماتصير زحمه ..الحجي الحجينه خلي بينه ..
ردت علي وهي مبتسمه ..ادلل ..لاتشيل هم
دخل جوو ..واني بقيت اغلي من القهر ..كامت تريد تروح ..لزمت ايدها ورجعت لمكانها
باوعت على مصدومه ..شنوو ..شبيك
باوعت عليها بخزره ..جنتي تحجين انتي ومهند
ردت ..اتصور شي خاص بي ..وماايحب احب يعرفه

صكيت سنوني ..ولج شنووو انتي الصبح كاعده
تلغين ويه علي ..وبليل ويه مهند ..شنو صايره بير اسرار مال العائله ..لو مخزن مال معلومات

باوعتلي بخزره ..شنوو المضوجك انت

عضيت شفتي بقهر ..ولزمت ايدها وسحبت علي ..احجي عدل ..لو علمج شلون تردين

بلعت ريقها وردت بصوت ناصي ..مووقصدي ..بس علي متعود يحجي كلشي كدامنه ويسوالف الخالتي ..واني جنت دائما ارد علي وساله من يصير ويه مشكله ..فشفته مهموم سالت شبي ..جااوبني وبس
ومهند نفس الحاله جان طول الوكت مهموم ويريد يحجي ..بس لان ماايريد احد يعتب علي لو يلومه ..مااحب يحجي كدام خالتي وكدامك ..لان دائما
تلومونه وتبقوا تحجوا علي ..من سالت راسن حجالي ..لان يدري ماارح اعوف مشكله واكعد الوام بي وعاتبه ..هااي كل القصه ..
باوعت عليها جانت تحجي وترد بطلاقه بلاماترتبك وتوتر ..يمكن لان بالحديقه وحديقه تنطي ضوه قليل ..فماا تشوفني زين ..فماارتبكت مني ..
تقربت منها وحجيت ..جااا الظاهر مو بس جسمج كبر وبرز ..عقلج هم ..

غاليه ..هااا ..شقصدك
ابتسمت على غبائها ..
وصار وجهي مقابل وجهه وحجيت .. اي الي افتهمتي
نهضت بسرعه وهي تسحب ايدها ..وحجت ..اني اروح اناام احسن
ركضت جوا قبل حتى ماارد عليهاا ..
ثاني يوم الصبح طلعت من غبشه جانت عندي شغل
وناس متواعدين وياهم لزم نروحلهم وبمكان بعيد عنه
طلعت بلا مااحجي ويه احد لكيت امي كاعده تصلي ..تقربت بست ايدها وراسها ..وكالتلي وين من الصبح يمه
كتله ..مستعجل عندي شغل يمه
ردت وهي تكوم ..على الاقل تريق وطلع
حجيت واني اطلع ..ماالحك يمه ..ادعيلي وياج يمه
ردت وهي تطلع وراي للباب ..ربي ينور طريق ويوفق ويوقفلك ولد الحلال ويبعد عنك كل شر ..
رديت واني اطلع من باب المطبخ ..تسلميلي ياغاليه
عود اني اتاخر لاتنظروني على غدا
طلعت ..وقبل رحت على علي ..ومنه تجهنه لوجهتنه
بقينه مشغولين ويه ناس ..وخلصنه الشغل وتغدينه يمهم
ورجعت جانت الساعه تقريبا ب٢ الظهر ورغم مشغل المكيف ..بس حرر يكتل الجو صاير يوم حار يوم بارد مخربط المهم ..
ذبيت علي بيته ورجعت لبيتنه ..جانت الدنيا حار نار
دخلت لكيت امي كاعده تباوع تلفزيون ..سلمت عليها وبست راسها
شافتني تعبان وعرقان ..حجت ..هاا يمه سوده عليه صاير بيك من الحر ..روح سبح وارتاح
رديت ..اي كايم ..بس لعد شو البيت صنته ..وين مهند والبنات
ردت ..مهند طلع يم جهاد ..وراحوا على بيت عمتك كال ابات هناك يم الولد ..والبنات بغرفتهن راحنه قبل شويه

صعدت سبحت ولبست تشيرت نص خفيف ابيض وبجامه خفيفه اسود ..وقبل بالفراش نمت على وجهي ..كعدت دنيا غروب ..كمت. واني احس بنفسي متكسر
نزلت لكيت امي كاعده وتقرا قران ..قربت منه وبست راسها ..وردت لزمت راسي وباستها
كملت وكالت صدق الله العضيم
كتله ..يمه جوعان ..وين ذني لعد خلي وحده منهن تسوي اكل
ردت امي ..يمه فدوه اروحلك ..شوفهن عود راحن يسقن الحديقه ..صارلهن ساعه باره ..اكيد كعدن يلعبن هناك
رديت واني صافن ..يلعبن هن صغار
طلعت وصلت المطبخ ..واجاني صوت ضحكن وكهكهتن ..بالحديقه ..
باوعت يمنى ويسرى ..لكيت عوده مال ماسحه ..ملصت القاعده ..واخذت العوده وطلعت

لكيتهن وحده ترش على ثاني مي ..وحده لزمه الصونده
والثانيه تغرف من التانك مال المبرده
ومنكعات هن وملابسهن وشعرهن ..وضحك وصل لاسابع جار
اني شفتهن ودمي فار ونوب دنيا غروب وهدواء والصوت مسموع ..
صحت بصوت كله غضب ..جااااا ..تسودنتن بهل المغربيه ..جهاااااال انتن… مااتستحن… وحدتنجن جهاااله بطولهاااااا هسه ..
هن شافني ..وكامن يطكطن ..ومااطلع حرف منهن ..دنكن روسهن وحجت رقيه ..اسفين ماانتبهنه ..بس جنه نرش الحديقه ..وبالغلط وحده كامت تذب على ثانيه ..بس ماصار شي
عطت بيها ..اااامشي ..كدامي ..وصوتج مااسمعه ..لااااكسر راااسج
ركضت كدامي ..وضربت على رجلها بالعوده ..صاحت اي اي ..
كتله وووجع
غاليه جانت بيدها سراحية مي ..ذبته بنص بالتانك ..وهي مدنكه راسها.. بااوع ملابسها لزكه على جسمها وتحاول مااتتحرك هواي حتى مااتلزك اكثر ..وشعرها مرفوع بس خصر نازله ولزكه من اثر المي بكتفه وركبتها
اجتي تمشي تريد تعبرني بس صرت كدامه قطعت عليها الممر الي صاير من جهة شباك الصاله ..والحديقه
حركت ايدي باتجاه الشايل بيها العوده اريد احجي ..بس هي شهقت وصاحت ..لااااعفيه .. عباله اريد اضربها تحركت بسرعه ليوراه والكاع الجواها كله مي فزلكت رجلها
ورادت توكع ..ركضت عليه لزمتها واني حط ايدي
على خصرها وسحبتها ..صارت بحضني ..وكتها مادري صار بيه ..خاصه من حطت ايدها على صدري وجلبت بالتشيرت حتى مااتوكع ..رفعتها وهي بعدها مجلبه بيه ..وجسمها صار كله بين اديه ..لااول مره بحياتي
احس بكلبي ينتفض ويدك قوي ..وانفاسي تسارعت وصارت تطلع بالقوه ..جسمي كله تصلب وتشنج ..وبقيت واقف واحاول اسيطر على نفسي الي اول مره بحياتي اتيهه وماادري وين غابت ..والاكثر من هذا مااحاولت ابعدها مثل كل مره ..بقيت متجمد بمكاني واني اصارع ويه نفسي ابعد ودفعها عني ..بس لكيت نفسي اتقرب واشم عطرها ..
هي ارتبكت بيدي وكامت ترجف وخدوده صارن حمر نار وهذا زاد من رجفت كلبي وخل نار تشتعل بجسمي
من حست بيه.. هدت التشرت مالي ونزلت ايدها بسرعه
وحجت بتوتر وهي تعض شفته ..تكدر تهدني ..
حجيت بنبره متخدره وصوت هامس..بعد لاااا تسويها
بااوعتلي مستغربه ..شنوو
اشرتلها على شفته بعيني ..لاتعظيها كدامي ..
باوعتلي وهي تسال بغباء ..هاااا ..ليش
غمضت عيني واني اتعجب من غابائها ..دفعته عني ..وكتلها دخلي ..جو لا تكفريني بهل المغربيه

ركضت جوا ..واني بقت ادخن بالحديقه واحاول استرجع نفسي الي لسه ماهدئت ..واني احجي ويه نفسي
بسك عاد ..شيخ شهاب الي يهاب منه الكل ويحسبله الف حساب ..الي يركضن على نسوانه يتمنن منه بس اشاره ..
تجي وحده زعطوطه مثل هاي ..تخليني متبهذل ماندل راسي من رجليني ..
جااا مو صارلها قرن كدامك مااجنت تهتم شجاك وصرت جنك مراهق وتضيع كل علومك ..من تكف قريبه منك
لااا خلص مواني شيخ شهاب الي مراه تهزني ..والله وتالله لخليها اخر مايجي بالي

..................يتبع
🦋🦋...................................🦋🦋