[فيتامين سي]

البارت الثاني
رواية..انا هي جميع نساؤك
بقلمي..سمو العراق
💔💔💔💔💔 +

أحسست أن الكون
كل الكون
يكسوه السكونْ

ونسيت حتى من أنا
ولٍمَ أتيت
ومن أكونْ ؟؟

...........................


وقفه احبتي...الرواية حقيقه حدثت بزمن النظام السابق...ورغم طابع الحزن والرومانسيه الا انها تتخذ مناحي جديده من حيث العشائر والسياسه...ولا تتفاجئون بتصرفات البطله العفويه زمنها يختلف عن زمنه😢

....

رغم خوفي،من الجيش بس،بسرعه صارت عندي جرئه وتقدمت همست بصوت باكي...هذا مرسال رسله جدي صلف الك وانه طالبه العون والمساعده لاهلي،وانت المنقذ بعد ربي...

رفع نظره اليه والتقت عيوني بعيونه....نظراته بيهن لغز وبحر من الاسرار خلاني تلقائيا اسرح بيهن واروح الغير عالم....بعدها

باوع لعيوني بحيره بعد ما قره الرساله رجعها علئ المكتب ورتبهه بيده وهو يباوع عليه...

انتبهت علئ ايده الخشنه مزينها خاتم الفضه والحجر مالته من العقيق علئ شكل احجار رسوبيه..مزين اصبعه بصوره انيقه...

جرر نفس قوووي وزفررره باوعلي بحده...شلوون صار هييج:؟

بللت شفايفي من الخوف والقلق ورديت بتوتر...هي مرة عمي راحت لگرابتهه بالهور وجابته واجت

المنذر رجع ضهره علئ الكرسي من الجلد الاسود...زين والمطلوب شنو؟

بلعت ريقي..جااا ما قريت كلام جدي

رجع باوع للرساله ورد...قريته بس مجاي افهم شنو الصاير لان الرساله مختصره...

رديت عليه بدموع...اقراهه وانه افهمنك

عض علئ شفته وركز بحروف الرساله سحب نفس وصار يردد حروف الرساله...

السلام عليكم

انه شيخ صلف عمري وحياتي ما طلبت حاجه من بشر ولا شكيت همي البشر ..لان انه متيقن الشكوئ لغير لله مذله...

وانه بعمري ما ذال روحي غير لرب العباد

بس اليوم مصيبتي مستعصيه وطالب العون والمساعده منك رغم جنت اخر واحد افكر اطلب منه مساعده ولا انسالك تكبرك عليه وعدم اعترافك بيه بيوم نصبت جادر لابوك وخليتني وراك

بس ياجدي يا المنذر انه كلي امل بيك واعرفنك انت ما تعوف اهلك وناسك وهمه بين الحياة والموت

انت ضابط والكل تهابك والك مكان بالدوله

احنه ناس عرب والصار بينه يا بعد جدك هو اخوتك كلهم طاحو بمرض الجدري...

ياجدك والدوله تفتر عليه لان يعتبرون اهلك وباء خطر علئ الدوله...

ويردون يحرگون اخوتك واولاد عمك..

تستمر القصة أدناه

وانه رجال مااكدر اوكف بوجهه نظام ودوله كامله

وضال افتر بيهم بالهور من مچان لمچان واحفر نگر واختل بيهم وحتئ انه راح انعدي منهم ويعدون لكل ويمتونه

انه خايف لا العسكر يلزمونه ويحرگون اولاد عمك

الاريدنه منك هو المساعده تجيب دوريه واسعاف وتحمينه وتنقل مرضانه لبغداد يتعالجون

تعرف ميسان مابيه طب مثل بغداد

جدك شيخ صلف..لا تفشلني بعد جدك ضلت علئ الله وعليك...

صلف آل...صلف

المنذر...هذا المكتوب

شهكت عدة شهكات وانه اتذكرهم واتذكر صريخهم وجعهم من المرض وحيرة جدي بيهم...

ركضت عليه لزمت ايده وابوس بيهه بس هو سحبهه بسرعه..

لزمت بقميصه وانه ارجف وابجي وتوسل بي..فدوه اغديلك امي راح تموت اخوي زاهد واخوي عابد يوجعهم المرض ولد عمي همين فدوه اروحلك ابوس رجلك ساعدهم انقذهم والله راح اموت عليهم

هو لزم اديه بثنين اديه ونزلهم ابتسم بهدوء..افااا اني بنت عمي تطلبني واكعد واسكت لا والله شاربي مو عليه ولا اني حفيد الشيخ صلف اذا ما نكتتهم من الموت وطلعت

باوعتله برجاء ودموعي علئ خدي.. فدوه اروحلك استعجل الله يخلي ابوووك

ضحك بصوت مسموع وهمس بهدوء..الله يسامح جدج فرقنه وخلاج نسيتي ابووي مات من زمان همست بخجل...الله يرحمه +

مرت عمي تقربت منه وحجت بصوت حزين..شلونك يعمه يمنذر

هو رجع انتبه عليهه كلها..اهلا وسهلا ام جاسم والله اول ماشفتج شبهت بيج بس الوقت اله حووبه بصراحه كلكم نسيتكم

سحبهه لحضنه وباس راسهه

وهي باسته بخده كلتله..يعمه يالمنذر اولادي وبتي. وعمك مرضئ بالجدري وانه اموتن اذا صار عليهم شئ فدووه اغديلك انقذهم

هو هز راسه بثقه ورجع المكتبه لبس مسدسه واخذ سماعة التليفون وفر الارقام شوويه واتصل

المنذر...الووو ملازم اول احمد بسرعه اريد تجهز دوريه عسكريه واسعاف علئ الخط السريع..وتتصل بالجهات العليا بوجود حاله مرضيه واني توليت قيامها

سكت شويه وكمل ...نص ساعه اريد كوولشي جاهز تمام

رجع السماعه للتليفون واخذ سويج سيارته ورتب قميصه وطلع واحنه طلعنه وراه

جان يمشي داخل المركز بثقه وبدون ما يلتفت لاحد والكل ياخذ اله تحيه عسكريه

مااعرفن ليش انه ضليت ملبمه « صافنه » عليه

همست بداخل نفسي...يمممه موش رجال عاصفه اسد بالقران اسد

جان طويل وضخم ولابس الزي العسكري زيتوني ولازم بيريته بيده ومسدسه بخصره

انه شكد اخافن من الشرطه مااعرف شصار بيه ضليت مركزه عليه

من وصلنه لباب المركز هو بسرعه دار وجهه علينه وانه من الخجل نزلت راسي..

كال ..يالله تعالو اصعدو

صعدنه وراه وهو ساق بسرعه وطول الطريق ما فتح ويانه موضوع

بس سأل مرة عمي عن مرض مالت اهلي وهي تجاوب

وصلنه لمنطقه ببغداد حلوه ومرتبه وهو صف سيارته گبال بيت جديد وحلوو وبدايته حديقه طالعه الاشجار من السياج

هو نزل وفتح باب الحديقه وكال..تفضلو تفضلو

دخلنه للبيت جنت اباوع علئ حديقتهم تخبل ومقلمه الاشجار مالتهه وكلها ورود ملونه تجنن

وبعدها دخلنه للبيت

جان بيتهم حلووووو مو مثلنه

ضليت مذهوله ورافعه وجهي وانه اباوع علئ الاثاث واركان البيت...

هو صاح بصوت عالي..يمممه شنوو وينكم

امه صاحت من المطبخ...يااا المنذر اجيت اي حقك تجي شلون تعوف التليفون وروجينا كلساع تخابر شوكت تفكني منها

شفته مسح علئ،وجهه بعصبية وعبالك الموضوع زعجه صاح علئ امه...تعاي رحمه الوالديج هسه اني بحال روجين

اجت من المطبخ وهي شايلة جفجير بيدها كالت..اه انت مو بحااااا

ما كملت كلامها من شافتنه كالت بااستغراب...المنذر ذوله منوو لا دكوول متزوج بسر وهاي مرتك وهايه ام مرتك وروح ابووك انجلط

انه انصدمت من كلامها وهو هز ايده گلها...شسالفه حجيه منو شفتيها وياي وكلتي متزوج بسر هاي بنت عمي ومرة عمي جايين من العماره جدي صلف دزهم صارت وياهم مشكله ولازم اروح احلها...وتركهه وراح دخل جووه

المره باوعت عليه مصدومه واجت سلمت علينه ببرود وهدوء...اهلا وسهلا تفضلوو

كعدنه احنه بالگاع كالت...يااا ليش گومو اكعدو علئ القنفات

مرة عمي ردت...لا له احنه متعلمين نگعد بالگاع موش مثلكم اهل بغداد...

ضحكت المره ردت عليه...گومي حبيبتي اكعدي علئ القنفه علئ تگعدين علئ الارضيه بارده

رديت بخجل بعد ماراح المنذر...ياله هنا احسن

كالت..بكيفكم

وراحت جابت مي،واجت وانه عيوني تدور علئ كل جزء ببيتهم

عود همه عايشين واحنه عايشين احنه مدفونين قبل لا يدفنونه...

بيتهم شكد حلوو ومريح وبي كل وسائل الراحه

عكسنه من جدي ينام انضل نهفي عليه منا لمن يكعد تطيح ادينه انه وغرومه ويا ويلها الما تهفي يعاقبها يخليها تحلب الهوايش...

تستمر القصة أدناه

جريت نفس قووي وبعدها المنذر اجه وهو يحسب بفلووس..وانه صافنه عليه...

كال بدون مايرفع نظره...اني رايح ديري بالج يمه علئ،ضيوفج وعتبريهم من اهل البيت

هي جاوبته...صدر البيت الهم والعتبه النه اهلا وسهلا بيهم..

هو خله وطلع بسرررعه وانه تبعته بنظراتي احسن هذا الرجال شايل خرزه بحيث مااكدر انزل عيني منه وانه بطبيعتي خجوله ومااهتم

يمكن هذا المحبس الشايله بي محبه مال نسوان

اي والله جااا شبيه فاكه حلكي عليه جني ما شايفه زلم

جريت نفس بس والله هو حلوو بس مبين چبير عليه بس حتئ لو عمره خمسين سنه هم اريده

انتبهت النفسي...يااااا شبيه تخبلت مصار دقايق من شفته وكتلت روحي عليه وانه شيخ وثاب كاتل روحه عليه ومحيسن ابن البدوي من يشوفني،يضل بس يتغزل وما مهتمه الهم

شلون ورطه وجدي عنيد وصلف مايغير رايه ومنطيني لشيخ وثاب وانه مااريده

هسه خلي يطيبون اهلي ولكل حادث حديث

انتبهت علئ صوت مرة عمي كالت...منارس من نرتاح ونتغده نروح البيت اهل الشيخ وثاب خاف يزعلون اذا مارحنالهم

لفيت شفايفي..اهوو اكلج عمه شنهي السالفه ترئ هو كله شيخ وثاب ابن عم ابووي يعني مو ابن عمي ..حتئ نروح الهم بيت عمي ابو منذر اوله بينه

كالت...بس هذا شيخ ولازم راس العشيره ببغداد لازم نقدره ونحترمه ونروح عليهم

جاوبتهه بعناد..تردين روحي انتي انه مااروح

اجت ام المنذر كعدت يمنه...

ضلت تسولف ويانه وكدرت تاخذ استجابه منه مبينه انسانه حبابه
كالت عائلتها اربع نفرات +

المنذر هو الجبير عمره 33 سنه
ومؤيد عمره 29 سنه
واثنين بنات
وحده متزوجه اسمها هاله ووحده مامتزوجه اسمها نيران وهي بالمدرسه ما شفناهه

حجيت بيني وبين نفسي ياا جبير اكبر من وثاب بسنتين

جاا جدي اذا المنذر هو اكبر من وثاب ليش ما عينه جبير عشيره ببغداد

اي يمكن لان موش لوگي لجدي ومامعترف بي هل خله وثاب.شيخ عشيره علئ اهلنه ببغداد..

بس هم ثنينهم كبار وانه صغيره عليهم...كله عمري 16

مااريدنهم شياب

بالله وثاب منتظرني اكبر ويتزوجني

جاا المنذر ليش ما متزوج معقوله يحب وحده

ضلينه كاعدين وبعدها اجت نيران اخت المنذر لابسه تنوره گصيره رصاصي وتنوره بيضه وشعرها مسويته ضفيره وشاله جنطتها...

سلمت علينه وعمه ام منذر صبت غده وتغدينه وبالي كله عند اهلي ياربي يلحك عليهم المنذر...

........................

بعد طويل طريق متعب وشاق وصل المنذر للعماره

اما العجوز الكبيره جانت كاعده بباب الديوان من گصب البردي

تحسفت علئ حالهم وين جانوا وين صاروا

جان ديوانهم مليان ويتركزه ويتركوه شيخ صلف

همست الحجيه حسنه..« حسناء» .ّ..اااااخ يااا صلف ااخ لا من غرام ولا من الأولاد...

هييج صار ديونك معتم ومحد بي بعد ما جان ماكوو مچان لضيوفك...

حط ايده علئ جبينهه وهي تشوف سيارات الجيش والاسعاف متجه ناحية بيتهم...

وكفت بصعوبه ولطمت صدرها ...يمممه يمممه يمه انهبنه اجوونه الجيش هسه ياخذوني وانه مابيه حيل فلقه وحده اعترف حتئ علئ ابوي

وكفت بنص الشارع والسيارات طوقتها

نزلوو منها العسكرين...

ونزل منها شاااب يشبهه صلف من حيث الضخامه وحدة المعاني

ركزت بنظرهه عليه وهي ترجف بس ما عرفته همست بخووف...وروح ابووي يا سيدي مااعرف وينهم

وكف مقابيله وهو يرسم ابتسامه جانبيه مستهزئه علئ محياه...

المنذر اتقدم منها وهو يبوس ايدها

خلاها مصدومه بمكانها

سحبت ايدها..يااا سيدي العفوو منك انه الابوس ايدك

المنذر.. اهااا واني اسمح الجدتي،تبوس ايدي لا والله عاد هاي مو من شيم احفاد صلف

عقدت حواجبهه المدكوكه بدكاك اخضر..انت ياهووو المنذر ؟

ابتسم وهز راسه بأي...

شمرت روحهه بحضنه وهي تبجي وتتنحب وتشكي اله حال جده واولاد عمه...

مسح علئ راس جدته بحنيه...وينهم جايب اسعاف وراح ننقلهم لبغداد وان شاء لله يتعالجون ومحد يمر بعرضتهم

باوعتله بشك وهمست برجاء...بعد جدتك لا تغدر بجدك وتخلي الدوله تموتهم

باوع عليها مصدوم من كلامها...افااااا جده هذا كلام دكولينه لهل درجه جدي واصفني الج نذل وتشكين بااخلاقي

خطيه تلعثمت بالكلام وماعرفت ترد

الجده.. يا له بس انت ضابط وهم الدوله رايدتهم

المنذر..وهمه بحمايتي محد يتعرض الهم وهسه وينهم الوقت مو بصالحنه

الجده ...هسه بس اجيب عباتي،اروح وياك ودليك بمكانهم

انتظرهه منا لمن اجت وركبو بالسياره. .

وصلو لاهوار العماره ونزلوو

تستمر القصة أدناه

جانت تمشي وتركض ملهووفه والعسكر وراها

والكل لابس كمامات وحتئ المنذر

كعدت علئ الارض ووخرت الحديده وفوگاه زرع صاحت بصوت خافت...صلف ياابو محمد اجه المنذر

طلع الشيخ من الحفره وساعده واحد من افراد الشرطه

باوع علئ،المنذر وثبت بنظراته عليه والمنذر تقدم من جده وهو يقبل ايده بهدوء

الشيخ صلف مسح علئ،جتفه وهمس...الخلف مامات الله يرحمك يا بويه يا محمد ما متت من خلفت حيييد مثل المنذر اليوم واكف وگفة سبع الجده

المنذر بلهفه...عد عيناك ياابو محمد وان شاء لله المواقف تبين الك انه واحد من زلامك وينربط حبل الود بينه

هز راسه باي وهو يبتسم

المنذر ...وينهم اولاد عمي

صلف...انه كل واحد منهم مخلي بحفره لان بيهم حالته مستعصيه وبيهم هسه بادي المرض بيهم

دلاهم علئ اماكنهم والشرطه اسعفتهم

ونقلوهم بالاسعاف وعالجوهم بالاسعافات الاوليه مع اخذ الحيطه. والخوف من انتشار العدوئ

كان زاهد اخوو منارس حالته محرجه هو وابن عمه كامل ابن ام جاسم...حالتهم حييل تعبانه

وام منارس وازهار بنت عمها وعابد وجاسم حالتهم تعبانه بس احسن من زاهد وكامل...

انطلقوو بسياراتهم واخذو وياهم الشيخ صلف ومرته مسافات طريق سيطرات كدرو يتجاوزوها بوجود المنذر كونه ضابط كبير بالدوله....

وصلووا البغداد واخذهم للمستشفئ،دخلوهم بالعزل الصحي،وحطولهم بعض المراهم جانت وجوهم مشوهه من مرض الجدري المفتي بيهم...
كعدنه من الصبح اجه جدي والمنذر واخوو والتمت العالم من درو جدي اجه +

هو من البارحه اجه بس،ضلو بالمستشفئ ومارجعوو للبيت

جنت حييل مشتاقه الجدي

من سمعت بي جااي لبيت عمي فرحت وضليت كل شويه اطلن اريد اشوفنه ميته علئ شوفته...

بعدها شفته طلع يغسل اديه رحت ملهووفه عليه

وهو جان يغسل من دار وجهه ضحك وفتح اديه وانه شمرت روحي بحضنه احبنه حييل جدي

ضليت ابجي وابوسن بي وهو يضحك ويمسح علئ راسي

كال...هاا يبعد جدج شلوون والله طلعتي ذيبه ووصلتي لابن عمج

جاوبته وانه امسح دموعي...تربيتك جدي

شفت المنذر اجه باوع علينه

انه عدلت حجابي خجلانه منه

جدي ضحك..المنذر ياجدك هاي منارس بت الشهييد عمك

هو بلل شفايفه وابتسم...الله يرحمه ويحفظها

ضحكت ودفنت وجهي بصدر جدي..

وجدي حضني وضحك

سالته عن امي واخوتي وولد عمي

كال زينين الحمد لله

شوويه واجه مؤيد صاح علئ المنذر

وراح وياه

رجع المنذر وجهه ما يتفسر

المنذر بتوتر...جدي شوويه اريدك علئ انفراد

جدي بعدني عني بااستغراب والتساؤلات ملت وجهه

راح وياه

وانه ضليت مصطكه بمكاني...

شوويه وسمعت صوت جدي وهو يكوول...يااابوويه ياااا بوووويه لا اله الا الله انا لله وانا اليه راجعون

نهاية البارت...يتبع

لا تنسو التصويت والمشاركه احبتي

كونوا انتم كونوا بخير..احبكم 💔

نور سمو العراق