البارت الثامن
رواية..انا هي جميع نساؤك
بقلمي..سمو العراق
💔💔💔💔💔💔
أيااا أنت
ليكن في علمك أني لا أجيد السياسة ولا افقه فيها...
ما رأيك في ان أحتلك وبعدها نتفاوض...
انت لي💔
................................
يمه يمه هو من گالي تعاي وراي للحديقه احسن كلبي طار من بين ضلوعي
ضليت اطك ماعون بماعون وجهي صار نااار...
خلصت بسرعه لفيت شالي وكرصت خدودي حييل
لزمت خدودي وحاجيت نفسي بعصبيه يلخبله شلعتي خدودج هي هييج
خفت اروحن اله عبن كلهم گاعدين وجدي اذا يشوفنه الوحدنه يكتلني هو موش عصبي لا نااار
وكلشي عنده ولا الشرف يتخبل من هيج سوالف..
انه مرات حتئ اخافن افكر بمنذر اعبن اخاف جدي كاعد بعقلي...
من كثر ما عصبي ويحاسب علئ كل شئ خلانه نشك برواحنه...
بس انه احبن المنذر ولو موش جدي لو ابوي يطلع من الگبور هم اروحن النذري...
چااا غير انه احبه وهو استدعاني للحديقه يمكن راح يكلي احبنج...
رحت باوعت عليهم كاعدين بالاستقبال طلعت بسرعه للحديقه شفته كاعد علئ الكرسي الموجود بالحديقه وكلوب الحديقه عاكس،عليه وزايده جمال...
حاط قمجي الاركيله بس شفايفه ويدخن
يمه گلبي انه شلون راح اگابلنه واكعد يمه بالعباس اموتن...
جيت وكفت مقابيله وهو اشرلي اكعد
كعدت علئ،الكرسي صرت مكابلته بس شنهي ولا رفعت راسي...
هو سحب نفس وونفخ الدخان من شفايفه تمنيت اطيرن ويه الدخان ولا اضلن كاعده گباله...
بلعت ريكي من خوفي،وخجلي...
هو همس بصوت جاد..منارس
انه باوعت عليه حسدت اسمي من نطقه بين شفايفه حسيته موش اسم حسيته اغنيه والكل يعشكها...
هنيال اسمي وانت تنطقه زدته جمال ورونق...
جاوبته ببتسامه خجوله وانه منزله راسي...هاااا
تنهد بضيق وكمل كلامه...شنو رأيج بوثاب
رفعت راسي مصدومه فتحت شفايفي ردت احجي بس غيرت رأيي سكتت..محجيت...
رجع هو كمل كال...وثاب قبل كم يوم حجه ويه جدي ويريد يقرب موعد الخطبه وجدي موافق..
حسيت كلامه مثل الخنجر ويكطع بكلبي انه مااريدن وثاب ليش،يجبروني عليه والله مااريده
مجرد ماينذكر موضوع وثاب احس بخطر واحس عايشه برعب اتمنئ اموتن ولا اتزوجه مااحبه موش كوه والله موش كوه...
هو حس بيه نهبطت ولمعت عيوني بدموعي
عقد حواجبه بااستغراب كال...انتي تردين تزوجين
رجفن شفايفي وختنكت بعبرتي جاوبته..انت شنهي رايك...
هو عض طرف شفته وشتت نظره...اشوف بعدج صغيره علئ الزواج اني من طبعي مااحب البنيه تزوج صغيره لان الزواج تقارب واشياء اخرئ مو مجرد كنس،ومسح الزواج مسؤؤليه من ناحية الزوج ومتطلباته وكذالك العيال ومتطلباتهم...
رديت بعدم فهم...اي،صحيح هو هذا وثاب عنده ديوان ويتعب كل شويه يريد كهوه يمكن اضل كاعده للصبح اسوي كهوه وجاي وصدك يتعبني...
الحمد لله انتم ماعدكم ديوان
نزلت راسي خجلانه احس. روحي مستعجله واخرط خرط بالكلام...
حبيت اصلح الموقف كتله..يعني انه ماله من ديوان جدي تعاي نضفي،وتعاي اغسلي الدله والفناجين والقواري...
هو ضحك كال...هه لج بابا هي الزواج بس كهوه انتي مراح تفهمين
نطيت من مكاني مسويه روحي ذكيه عود...هااا اي صحيح تذكرت جااا وهاي امه جنها السعلوه سمينه وكوه تمشي وبس تغلط علئ،جناينها...
ضحك ورجع يدخن...
كملت بفخر..موش مثل امك حبابه جااا وين اكوو مريه تتحمل خطار سنه كامله...
باوعلي بصدمه ورفع حواجبه تكلم بحديه...البيت بيتكم وامي وكل الموجود بالبيت ما الهم كلمه بعد كلمة صلف وصدر البيت الكم والعتبه النه..
فرحت بكلامه حييييل اتمنه اضلن طول العمر يمهم رديت ببتسامه..شكرا الله يخليك
رجع كمل...هسه شنو رأيج؟
رديت بحزن...مالي راي بعد راي جدي بس انه حتئ لو وثاب يشتري الي تلفزيون ابو الطكه وثلاجه ما راح افرح...
هو كال بملل وغضب...لا اله الا الله انتي شبيج جاوبيني بصراحه تلفزيون وثلاجه شنو
رديت عليه وانه خايفه لان تعصب بس لا يكرهني...ياله هيج مااريدن ثلاجه ولا تلفزيون ولا اريدن اتزوج وثاب...
هو ضل مركز عليه جني وحده مسجونه والضابط يحقق وياها وهي لا تكدر تبوح بالحقيقه ولا تكدر تجذب...
كال...يعني ماتردين وثاب..
رديت بخجل..ياله
كال..اهاا زين ليش ما تردينه..
ما عرفت شنهي اردن بس انه دايما اسمع نيران من جدتي دكلها ليش ماتزوجين دكول ياله انه اريدن ادرس...
وجانت جدتي تسكت
جاوبته بكذب...اريدن اكمل دراسه
المنذر بتساؤل...انتي ياصف لعد
منارس..انه موش مسجله
عقد حواجبه وسأل مره ثانيه...ليش؟
جريت نفس وبصدق...انه من النوع الكلش اخافن بحيث جنت مجلبه بذيال امي ليل مع نهار انه وغرام تروح هيج نروح وياهه تجي هيج نروح وياهه
هو هز راسه بمعنئ كملي...
منارس...اي جدي سجله بالكتاب ما يمنه مدارس من رحنه انه وغرام شبعنه بجي وردينه جابنه المعلم...
وكال الجدي هذن بناتكم بس يبجن...
جدي كال خلي يولن ابطلهن
بس امي مارضت وكالت خطيه خلوهن يعرفن ساسهن من راسهن موش مثلنه كلشي مانعرف..
وضلت امي تاخذنه للكتاب وتكعد ويانه بالصف واذا عافتنه وراحت نضل نصرخ انه وغرومه سوده عليه
نخلي حتئ المعلم مايعرف يشرح...
هو ضحك بقوه...هههههههاي علئ شنو تبجن
رديت بخجل...هيج من الله نخاف
كال..كملي
جريت نفس ...اي وبعدين جدي كال لامي بعد اذا طلعتي ورحتي وياهن اچسرچ تچسر
شنهي مره حمره صفره وارمله تطلعين وتطبين بكيفج تردين الناس تاكل وجهي وانه شيخ صلف
امي خطيه بعد ما راحت ويانه بس تاكل بروحها اكل وتحجي علينه
دكول...امداجن الخوافات شوفن الجهال كلها تروح للكتاب بس انتن جبانات...
وانه وغرام نگلها...ياله احنه سبعات حتئ نكدر نكتل ازهار بت عمي وهي جبيره اكبر منه...
امي تضوج حييل وتغمنه وتروح...
واحنه الاحساس شايلينه منه من ناحية الكتاب...
مرت عمي كالت لامي انه اخذهن وصدك ضلت تداوم ويانه وكاعده يمنه...
داومنه يومين والثالث عمها لزمها كطعها تكطع وكلها بس ترحين بعد اچسر چعوبچ« رجلين »
وبعد من ذييج الساعه بطلنه وماداومنه ..
هو رجع ضحك كال..ادري شكوو ليش تخافن موديجن للجبهه
جاوبته ببراءه...جااا هي المدرسه مثل الجبهه
كال..وهسه شنو تردين تكملين
جاوبته ببهدوء وخجل...اي
هز راسه بأي...حلووو قدمي خارجي سادس ابتدائي واخلي نيران تدرسج وان شاء لله تنجحين او ادرسي امي
جاوبته...انه شلون ادرس امك وانه ولا طكه بالقراءه
هو ضحك بصوت عالي. يمكن وصلت لحفيظه...ههههههههههههههههه� �ي لج بابه امي اميه يعني ويه ناس كبار بالعمر يتعلمون القراءه والكتابه تدرسين وياهم..
رديت عليه بفشله...هااا افتهمت عذرني انه مااعرف بهاي السوالف
كال...لا عادي معذوره وهم اذا تردين اني ادرسج واعلمج علئ الاحرف...
يمه فرحت فرحت من كال هيييج صدك المنذر يقريني واكعد يمه موش مصدكه من الفرحه اطكن واموت...
نزلت راسي بخجل...ان شاء لله
كال...يعني هسه انتي،متقبلين بوثاب
رفعت راسي وانه افرك باديه...ياله لا احبنه ولا اريدنه
رد عليه بجمود...احسن واحد نذل وجشع هو سبب مشكلتي اني وجدي وادري بي هو الترس راس صلف عليه...
استغربت كلامه...شنهي شگايل الجدي عليك شيخ ميتاب عشتوو
ضحك كال...خلي مو وكته...بس هذا وثاب يريد هو يصير الجبير بعد صلف ويريد يدوس علئ الكل اني أعرفه اخبث من ابليس وجاي يجمع ناس ضد عمي ابو جاسم خاف يصير الجبير بعد جدي
جاوبته..ياله عمر جدي طويل ويعيش بكد تراب ابو وثاب ان شاء لله
وكملت..صدك منذر ليش ماتصير انت الشيخ والله يلوكلك
ضحك بهدوء وكمل يدخن بالاركيله نفخ الدخان ليفوك وهمس...بصراحه ما احب الشيوخ ولا احب اختلط بيهم
همست بكلبي...اي تحب النسوان
سألته...ياااا ليش؟
رد بثقه...لان اليسوه والمايسوه عينوه شيخ هسه وثاب شنو واخلي شيخ وهو بخمس صخلات مااسرحه...
ضحكت حطيت ايدي علئ شفايفي وكملت ضحكتي...بس يسرح بصخلات يعوفنه ويشردن..عبن غثيث
بس انه شسوي وجدي ربطني بي...
هو كال..ان شاء لله خير لتخافين
منارس...اي سمعت من اخوي عابد انت متعارك ويه وثاب شنهي شبي وياك
رد عليه بهدوء...لا تهتمين مجرد سوء فهم وان شاء لله محلوله...
رديت بهدوء...ان شاء لله..
ضلينه كاعدين شويه صامتين لا هو يحجي ولا انه بس جان يتاملني بنظرات زلزلتني تزلزل...
يمممه موش رجال اسسسسد.
فزيت علئ صوت نيران وواكفه يمها هاله جايه خطار
كالت..المنذر جدي يريدك
هو باوع عليها ونزل القمجي من ايده وراح وانه ضليت بمكاني ارجف ومستحيه...
باوع عليها وهي تباوعله بنظرات مو حلوه...
وكأن دكله...هااا شنهي حتئ علئ منيرس حطيت عينك...
هو باوع عليها بغرور وكلها...روحي دخلي الاكيله وطفيها وديري بالج تغثين الي بالي بكلمه...
هي هزت راسها بأي واجت...
جان كالت لاختها...يمه من البنات صدك ما يستحن
اختها كلتلها...اي ادبسزيات...
انه حسيت مثل الي انشمر عليه ماي بارد
وكفت بعصبيه...انتن تقصدني لان كاعده ويه المنذر اذا تقصدني ترئ هو صاحني لان حاجاني علئ موضوع خطبتي من وثاب...
كالت نيران...لا منقصدج شبيج يوول صدك جذب انتي بنت عمنه حتئ اذا كعدتي يمه هو مثل اخووج
جاوبتها...ياله هو ابن عمي موش اخووي
خليت ورحت طبيت جوه وانه افورن دكول اخوج خوه الخواج وموت الخذاج...
انه احبنه وهنه يكولن اخووج...
رحت لكيتهم كلهم كاعدين بالاستقبال يسولفون رحت كعدت بنصهم...
جدي كال...جدي المنذر احنه حيييل نتشكر منكم ومن امك طلعت اصيله وبت شيوخ محد يتحمل الفيلق الكامل ويكعده سنه
وانتم ماقصرتو وضيفتونه وهسه عرفت الاضفر مايطلع من لحم ولا الدم يصير مي صدك الخلف مامات ومحمد خلف حيود تشهد الهم سلوم العرب..
يمه من جدي حجه هييج حسيت مي بارد ونزل علئ كلبي فرحت اكثر منهم...المهم مدح الحيد نذري...
مرت عمي كالت...لا ياابو محمد البيت بيتكم والعتبه النه صدك جذب هذا كله من خيرك علينه...
والمنذر كال...افاا شيخنا عتبت عليك والله انت التدخل واحنه النطلع اصلا احنه ضيوفك وانت رب البيت...
صلف بثقه...ونعم منكم بس الضيف يوم يومين موش سنه...لذالك انه قررت
عابد وامه ومنارس وانه نرجع للعماره
وجاسم وابو جاسم ومرته وازهار يضلون ببغداد عبن جاسم لگاله شغل هنا...هو ابو جاسم هم اشتغل
انه من جدي كال احنه نرجع احسن صوبني بسهام شلون بعد اشوفن المنذر وادرس واقره...
بس ماكو اي اعتراض من بعد كلمه صلف...كلت بكلبي جااا شمالك يخوي يعابد جااا شتغلت وخليتنه نضل يم العاصفه..
المنذر باوعلي اول مره يسويها وينتبه اليه كال...ليش ضلو كلكم هنا اشتريلكم بيت وتستقرون بي ليش تنقسمون...
صلف...لا انه مااتحمل جو بغداد متعلم علئ ديرتي واهلي وناسي مااعرف شلون تحملت سنه كامله واني بعيد عن ديواني...
سكتنه محجينه....
بعدها اتصل التليفون الارضي وكفت نيران رادت ترد
صاح بيها منذر كلها بعصبيه...نيران كم مره كتلج اذا رفعتي السماعه افلشها علئ راسج
هي خطيه فشلت خلت وكعدت هو كطع الواير وشال التليفون بدون ميرد...
كلها ...تعاي اخذي الغرفتي...
راد يروح وانه افورن خابرت ام سيقان جريه شلون يعوفها ليش هيج ملهوف عليها جااا عبالي،يحبني من حجه وياي طلع جذاب...
جدي كله...بووويه يالمنذر اريدن منك طلب
المنذر وكف ....امر جدي عد عيناك..
صلف...مايامر عليك عدووو بس انه اريدن انقل راتبي باسم منارس مالت ابوها...بس شوكت اجي وشلون اسويها...
المنذر...هااي مو يمي جدي احنه مركز لازم تروح للتقاعد العامه والنفوس شويه متعبه لان نفوسكم مو هنا لازم تروح للعماره
بس ميخالف تعال باجر الصبح انت ومنارس واروح وياكم وان شاء لله احلها...
جدي...بس انه عندي شغل الصبح ولازم اكضي مايصير باليل
انه نطيت من مكاني...ياله جدي يصير ذيج المره سوه الوحده...هم باليل
هو تخبل حط اصبعه علئ شفايفه بمعنئ اسكتي..
انه سكتت وضليت امتمت...ياله يمكن مايصير...
هو ضحك كال..لا ماكو هيج شئ
الحمد لله محد سألني عبالهم امسلت مايدرون انه شفت مصيبه بيتهم...
بعدها هو كال...جدي تعال الصبح وحل مشاكلك العصر وان شاء لله خيير
جدي هز راسه باي...
المنذر..يالله تصبحون على خير
احنه ردينه...تصبح علئ خيير
وانه رديت بكلبي...تصبح على الف خير بعد كلبي
رحنه نمنه وانه متخبله عليه مسودنه...
اجت ازهار كالت...ولج منوره هذا المنذر يخابر بوحده ويكلها حبي وكلبي اني سمعته
انه فحمت من القهر والغيره كلتلها...خلي يولي ابو النسوان بعد مااريدنه اذا تردينه اخذي بعد مااحبنه
كالت بااستهزاء...لا عفيه منارس شلون هسه من يخابر اكله بعد متحجي وياك ومتريدك فدوه هيج تحرجيني...
كلتلها...ليش تستهزئين بيه انه صدك بعد مااريده
كالت بسخريه...جاي تحسسيني كاتل روحه عليج وتارك شغله ويثغب ويسمع داخل حسن وتارك شغله شبيج بابا اكعدي راحه...هو بيريته مايخليج تشيلينها
منارس بعصبيه...خايبه شمالج تخبلتي ماتردينه اطي الحفيظه
ازهار حيل تكره حفيظه كالت...لا لفي بكارتونه وشمري بزباله ولا تطينه الحفيظه انتحر بعلي
ضحكت عفته ورحت نمت...وانه متخبله اكيد يتغزل بجريه ام سيقان شكد اكرهه كون يعوفها....
زين شماله مايباوع عليه شبيه لو يحب الغريبه ام تنوره شبر ونص...
يمكن قسمه ونصيب بس لا موش قسمتي وعلي اطك واموتن من القهر...
ياله هو قسمتي انه احبنه...بس شلون وهو يحب روجينه....
الصوج يمكن بلعشكته
موشرط #قسمه ونصيب
#هواي وادم نطربلها
وهيه تطرب على #الغريب
نمت وانه اصارع باافكاري وتعبت حيييل....
كعدنه الصبح صلينه انه لبست ملابس وغسلت لبست عباتي...
وجدي حظر نفسه...
المنذر طلع من غرفته لابس زي العسكري ولابس نطلق وحاط المسدس بخصره ولابس البيريه
عمي الله يرحمك وينور كبرك علئ هل خلفه لتفتح النفس من الصبح...
كال ..صباح الخير
جاوبنه ..صباح النور
هو ضل يسرفن بااردانه...
كال ...منارس جيبي ساعتي بغرفتي...
انه عبالك موش امري عبالك عيني وزيره...
رحت اركض فرحانه خلت الغرفته تخبل وهادئه ونازكه حاط ساعته علئ ميز ابو تواليت ...
رحت بسرعه شلتها بستها وحطيتها علئ كلبي شفت هيج علبه بيضه
فتحتها حلاوه يمكن هي بيضه جنها كيمر لو جبن ماعرفتها
ما منعت نفسي اخذت شويه بااصبعي وضكتها ...
يييييييع تلعب النفس ركضت للسله وضليت اتقيئ واتفل
شويه وانفتح الباب هو شافني هيج ركض عليه ملهوف حط ايده علئ ضهري خلاني ارتعش
كال بخوف...شبيج منارس شنو يوجعج؟
باوعت لعيونه بهيام كتله...ياله بس لعبت نفسي مابيه شئ
هو وكفني ولزمني من ايدي انه مااكلكم شعوري سحت معت وارجف
شاف العلبه مفتوحه...
كال ...حطيتي نيفيه لاديج
باوعت علئ العلبه ...هي هاي شنهي
كال...مرطب مال ادين
يبوو علئ الفشله وانه اكلت المرطب عبالي حلاوه لو جبن امداني...
بعدها رحنه للمركز هو جان ويانه اول باول سوينه المعامله ونقصت بعد بيها اوراق...
رجعنه للبيت رجعنه المنذر ورجع الشغله حبيته بالزايد...
صار دنيا ليل...
تعشينه وكملنه وندك الباب فتحه مؤيد
كال..كومن كومن اجانه خطار طلعنه نركض..
انه كلبي نقفص...
ضلوو كاعدين همه والمنذر وياهم انه اروح واجي
وخايفه حييل
سمعت جدي كله...ابشر يوثاب ان شاء لله البت الك وقبل لا نرجع للعماره تعقد عليها...
انه تخبلت رحت اركض لغرفتي انحب وابجي والطم وامي وجدتي يصبرن عليه
ومابيدهن شئ بعد جدي انطه چلمه...
اجت ازهار كالت راح وثاب يكولون راح يستعجلون بالخطبه...
كلتلها اريد احجي ويه جدي..
كالت..كاعد هو والمنذر وقافلين الباب
ضليت الووب من القهر وعيوني ورمن امي كالت لا ترحين الصلف مايقبل انه قبل فتره حجيت وياه ومارضئ...
انكطع عندي الامل...
ضليت كاعده ليل كله ابجي وانحب...
نزلت جووه شفت الكل مخمود ونايم رحت للاستقبال شفت جدي نايم ومتغطي
تنهدت وانه ابجي شكد ضالم ليش هيج سوه بيه...
طلعت من الغرفه شفت الضوه مال غرفة المنذر مفتوح بعده منايم جان الشباك منور...
رجليه قادني الغرفته رحت متردده دكيت الباب بجرائه وعيوني تجري...
شووويه وانفتح الباب
هو باوعلي مصدوووم وركز بعيوني انفجع من شكلي ودموعي همست بقهر وحزن...انقذني المنذر مااريدن وثاااب انه احبنك....
هو جان مسدسه ينضف بي رأسا وكع من يده وباوعلي بصدممممممه...
نهاية البارت...يتبع...
|