الجـــــــــــــــزء الثــــــــــاني ..
.
.
.
.
يوم الملكـــه
في بيت بو مشاري وبالخصوص غرفة نوف
كانت نوف مرتبكه وترتجف وضيقتها تزيد كل ماقرب موعد الملكه وتحس شي بداخلها يقول لها لا وماتدري وش تسوي
البنات كانو محيوسين حوس والكوافيره كانت تصلح مكياج نوف
الكوافيره :نوف هذي ثالث مره امسح الكحل وارجع اضبطه عينك صارت حمرا من كثر مامسح
نوف مرتبكه : مدري شفيني والله اول مره تدمع عيني وانا احط الميك اب
نور تجلس يمها وتمسك يدها وترص عليها : نوف ذكري ربك وصلي على نبيك ريلاكس عشان يضبط المكياج
نورتتنهد :لااله الله .. اللهم صل على محمد
داليا طلعت من غرفة التبديل وتوقف قبال المرايه
: ها شرايكم فيني
لين : تهبليييين والله بتخبلين عقول الحريم الليله
داليا تضحك : هههههه
لينا تطالعها من فوق لتحت وتتكلم :عادي داليا احس هذا شكلك بكل المناسبات
داليا انحرجت ولفت للمرايه : عادي مو مهم اني اغير اهي شي اني اطلع جميله ومرتبه
نوف تقوم من على الكرسي وتوقف قبال المرايه وتشوف نفسها وتتخيل فيصل وتحس انها ماتبي حست بدوخه واتكت على المرايه
البنات راحو لها بسرعه
ندى : نوف شفيك تعبانه تبين ترتاحين
نوف خانقتها العبره : م م م مابي مخنوقه والله مخنوقه
لينا شهقت : شنو ماتبييييين
نوف تشد على راسها بتعب : احسه مايبيييني احساس كبير يقول انه مايبني
داليا تضم نوف : نوف ذكري ربك وش مايبيني اليوم ملكتك لاتقلبينها نواح قومي استعدي يلا
نوف والدموع متجمعه في عيونها وعيونها على بنات خالتها : داليا شوق ندى جعلكم بالجنه هو يبيني ولامايبيني
ندى ارتبكت وقامت :نوف شفيك شصاير لك ترى فيصل هو كذا بارد منو قال مايبيك
شوق تلفق مع اختها: اي يعني انت يمكن تقدرين تغيرين بروده بعدين بس عاد لاتبكين قطعتي قلبي
نور تجيب المنديل وتمسح اطرف رموشها : بالله هذا حال وحده بعد ساعتين بتوقع على ملكتها
نوف رفعت راسها تمنع دموعها : ستغفر الله ربي العظيم واتوب إليك
لين تمد يدها لها عشان تقومها : يلا يلا قومي البسي فستانك ترى المعازيم اكيد بدو يجون
نوف بهدوء طيب خذت الفستان ودخلت غرفة التبديل
وداليا وشوق وندى يطالعون بعض بخوف وتوتر
__________________
في بيت بو فيصل باقي شوي على اذان العشا وماكان احد موجود في البيت الا فيصل طلع من الحمام وهو لابس فوطته وعيونه على ثوبه والغتره المعلقين وتنهد
مرر يده على شعره ووده يغمض ويفتح ويلقى كل هذا حلم زفر بضيق ولبس ثوبه وغترته والساعه وحط القلم بجيبه وتعطر وحط دهن العود اخذ مفاتيحه وطلع متوجه لبيت خالته ام مشاري ولما وصل لقا سيايير العالم كلها موجوده وقف سيارته ودخل المجلس الكبيير وشاف الكل موجود والكل كان ينتظره دخل وسلم على الجماعه وجلس جنب الشيخ ...
وبعد السلام والكلام ... الشيخ وبيده دفتر العقد بـدأ بالعقد وسأل فيصل عن الموافقه
فيصل ينقل نظره من ابوه لتركي لزوج خالته بو مشاري ومشاري وعمه بوسعود وسعود ونواف وسلطان والحضور كلهم نزل راسه ويده ترتجف وجبينه عرق
الشيخ يكرر : ابني فيصل انا ............ هل انت موافق ؟
فيصل رفع عينه وارتكزت بعين ابوه الي لقاه يهز رجله بعصبيه والتفت للشيخ : نعم موافق
الشيخ ابتسم : على بركة الله وعطاه الدفتر يوقع
فيصل بابتسامه مزيفه اخذ الدفتر من يده ووده يشقق الدفتر وقع ووقف حب راس ابوه وبدو يباركون له
_________________
نزلــت نوف على موسيقى هادئه وكانت مرتبكه وخايفه وحابسه دموعها والصاله كانت مليانه حريم بدأو الحريم يزغرطون لما شافوها نزلت وابتسمت ومشت الين وصلت كرسيها وجلست
شوي الاجات داليا : نوف قومي يلا وقعي
نوف رفعت عيونها لداليا بنظرات غريبه : ان شاءالله . وقامت
لحقوها امها وخالتها والبنات مسكت الدفتر بيد مرتجفه وكانت قريبه منها نور : ماابي اتزوجه مو مرتاحه
نور بخوف تمسك يد نوف وتمسك فيها القلم : ذكري ربك ووقعي خلاص عاد يلا
نوف بإصرار :مااابي
ام مشاري سمعت بنتها : نوف كلنا نخاف وقت مانملك يلا حبيبتي وقعي
نوف غمضت عيونها وفتحتها ووقعت والتفتت لاهلها الي بدأو يزغرطون ويحضنونها واشتغلت الاغاني
رجعت نوف لكرسيها وجلست تبتسم لفرحهم لها " مين كان يتوقع اني انا اتزوج واحد الى وقت التوقيع مو مرتاحه لزيجته "
داليا ولين ولينا وندى وشوق يرقصوون
نور : تكفين ريوم ابي يشوف كشختي اليوم على اساس انا مادري
ريم طيرت عيونها : هبله انتي هبله حرااااام
نور : مالي شغل
ريم : مراح اسانعك كل شي ولاغضب ربي ..
نور تقرصها بفخذها : حيوانه وقامت ترقص مع البنات
ام فيصل جات للبنات والفرحه موسايعتها : يابنات فيصل بيدخل يلبس البنت الشبكه
البنات تطايرو يلبسون عباياتهم وتلثمو
شوي ودخل فيصل متوجه لنوف ووجه جامد مافيه اي تعابير لامبتسم ولاحزين
نوف كانت ترجف وواقفه ومنزله راسها وصل لها فيصل ووقف جنبها وامه تأشر له يبوس جبينها سفهها ولاكأنه يشوفها
مسك الدبله وبجفاف : هاتي ايدك
نوف انصدمت من اسلوبه ماقال مبروك حتى مدت له يدها ولبسها الدبله
لبسها العقد والحلق والاسوار وهو ساكت
نزلت لمستوى دبلته ومدت يدها بتاخذها مد يده هو قبلها وخذها لبسها بنفسه
نوف رفعت راسها لخالتها ام فيصل وكانها تقول وش الي جالس يسويه
ام فيصل سوت نفسها مو منتببه لنظرات بنت اختها ولفت عنهم وهي معصبه وراحت لغرفة الضيوف وشغلت الانوار الهادئه
ورجعت لهم : فيصل خذ زوجتك وروحو لغرفة الضيوف
فيصل : انـــ
ام فيصل تقاطعه : توني رحت شغلت الانوار يلا ماله داعي تجلسون هنا كثير
نوف كانت تنتظر يمسك يدها ويمشي فيها قدام الحريم بس انصدمت لما مشا قبلها متوجه للغرفه بلعت غصتها ومشت وراه وهي منزله راسها
دخل الغرفه قبلها وجلس على الكنب دخلت نوف بعده وسكرت الباب وجلست مقابلته ومرت ربع ساعه بصمت ...
نوف تأكدت مليون في الميه انه مايبيها وبهدوء: ماتبيني صح ؟؟
فيصل لف لها مصدوم : يعني كنتي تدرين اني مابيك ووافقتي علي
نوف خنقتها العبره : لو ادري من اول ماخطبتني كاني رفضت بس تصرفاتك اليوم واضحه
فيصل قام متوجه لها ووقف قبالها ونزل راسه لها : شوفي يابنت خالتي انا كزوج لك تنسين هذا الشي لاتحلمين ولاتفكرين بأي شي ممكن يصير بيننا زواجنا على ورق وبس وكلها كم شهر وبطلقك
نوف رفعت لها راسها وهي مندهشه من كلامه وطفرت دمعه من عينها : لهالدرجه كارهني
فيصل يعدد بأصابعه : متكبره ومتحكمه وشايفه نفسك بالله على ايش ابيك ونزل لها على ركبته : انا مجبور اخذك
نوف شهقت شهقه كانت حابستها من زمان ونزلت راسها وطاحت دموعها بصمت وبدأت ترتجف من البكي وبصوت منقطع: ما بي اش وفك
فيصل ببرود قام وطلع من عندها وتنهد وراح لمجلس الرجال اشر لسعود يجي له وطلع برا
سعود : ها شفيك شصار لك عند الحريم
فيصل : ماصار شي وقلت لها اني مابيها وبطلقها
سعود طير عيونه : حمااار انت حممار حرام عليك وش ذنب البنت
فيصل ابتسم بسخربه : اصلا هي كانت حاسه وهي الي بدت تسأل
سعود كتف يدينه : الله يهديك ويصلحك
___________________
عند الحريم داليا انتبهت لفيصل طلع من الغرفه واستغربت انه طلع بهالسرعه وعلى طول راحت الغرفه وانصدمت لما شافت نوف تبكي وتشاهق بصمت
راحت لها مسرعه : نوف نوف شفيك بسم الله عليك ياقلبي
نوف بصوت باكي : ققال م م مايبيني بيطلقني بعد فتره
داليا حطت يدها على فمها تكتم شهقتها من الصدمه : فيصل قال بيطلقك بعد فتره من جدك انتي
نوف تطالعه بعتب : سألتكم قبل لانملك وماقلتو الصدق قلتو هو بارد ليش كذا طيحتوني في هالبلوه ليييششش
داليا ضمتها وهي تطبطب على ظهرها : هو ماكان مقتنع بالزواج لااكثر ولااقل يعني مو لهالدرجه
نوف ببكا يقطع القلب : آآآآآه مافيني اتحمل ياداليا ماقدر على كذا والله بموت
داليا تبعد عنها وتمسح لها دموعها : طيب نوف حبيبتي انا بروح حق هالثور شوي وارجع لك
نوف تمسك يدها بترجي : خلاص شنو بتقولين له اهو مايبيني كلامك مابيقدم ولابيأخر
داليا بإصرار : حتى لو لازم احد يكلمه
وطلعت من عندها معصبه والشياطين قدام عيونها وطلعت برا وشافته واقف ومانتبهت لسعود الي كان واقف جنب الخيمه
داليا بعصبيه : فيصصصل انت شسويت بتموت البنت بحكيك الي كأنه سم
فيصل لف لها وببرود : داليو بعدي عني تراك تدرين اني مابيها بعد ليش هالحركات
داليا : وبلعنه الي تلعنك اي والله مابيها طيب شذنب البنت تبكي دم بدل دموع بيوم ملكتها شذنبها
فيصل تكتف : والله ذنبها انها تدري اني مابيها وتوافق علي تتحمل نتيجة غلطتها
داليا : كانت شاكه مجرد شك من اسلوبك الزفر واحنا الي نفينا هالشي
فيصل عصصب وسحبها من ذراعها ودفها بقوه لدرجة ظرب راسها في زاوية الجدار
: يعني طلعتي غبيه مثلها وليش ماقلتي الصدق وجا الرفض منها مو مني ومسك زندها بعصبيه ويرص عليه ..: ليش ماساعدتيني انا اخوك ولانوف اختك ؟؟
داليا راسها يألمها ووصوتها مو وواضضح: خفــ ت من امـ .. ماقدرت تكمل كلآمها وهي تحس بالغشاوه تضبب بعيونها وطـاحت بين يدينه
فيصل نزل راسها ووقف منصدم ... سعود الي كان واقف وشاف كل شي راح يركض لهم وفيصل شال راسها وحطه بحضنه وصار يضرب خدها بخفيف : داليا داليا .. صوته اعتلى : دالييااااا داليااا تكفييييين رديي حاول يبعد راسها عشان يقوم وانصدم بكمية الدم الي عبت ثوبه طير عيونه وقام يهلوس : ماتت ماتت ماتت ذبحت اختي
سعود بسرعه نزل الغتره من راسه وحطها عليها وقام مسرع وطلع من البيت وفيصل حملها لحقه وتوجهو للمستشفى ..
_____________________
في غرفة الضيوف نوف تشوف ساعتها مرت نص ساعه وداليا مارجعت قامت وقفت وتنفست بعمق وعدلت وجهها وطلعت وهي مبتسمه وكأن رجعت لها قوتها " ماهمني يبيني ولايبيني بعمره مو انا الي ابكي عشان هالغبي وانا الف من يتمناني متى افتك منه بس " دورت داليا بعيونها ومالقتها كانت الصاله شبه فضت من المعازيم ومابقى الا القليل راحت جهة اللفت بدون محد ينتبه وراحت غرفتها وتدق على داليا ويرن جوالها بغرفتها التفتت له : يوهه هذي جوالها هنا طيب كيف اعرف شسوت التفتت للمرايه وانفجعت بشكلها : يوووووه وش ذا اشوووه محد انتبه لي كان الحين الكل عرف وحاولت تضبط مكياجها وابتسمت برضا وغرور ولا كأنها الي قبل شوي ميته بكي
نزلت للبنات ولقتهم مشغلين اغاني ويرقصون نزلت لهم وكان باقي بس اهلها وراحت وقفت في النص وبدأت تهز خصرها وتحاول تتناسى الي عاشته قبل شوي وتقول مو انا الي يأثر فيني واحد ماهميته
___________________
في المستشفى سعود نزل حاملها وكان راسها طايح عن يدينه وكانت ابدا مو بوعيها
سعود بصراخ : احححد يساعدني البنت بتمووت ثواني والممرضات جايبين سرير ويركضون باتجاهه وخذو داليا وحطوها على السرير ودخلوها غرفه من الغرف
تلافت حوله يدور فيصل مالقاه رجع السياره لقاه متنح مو حاس باللي حوله ضرب كتفه بقوه بعصبيه : فيصصل انززل
التفت له ووجهه شاحب : ماتت صح
سعود وهو يسحبه : تعوذ من الشيطان قم بسرعه لازم ندخل
نزل وصار يمشي بتوتر يروح ويجي : والله ان صار فيها شي لاذبح نوف واذبح نفسي ان كانت خطبتي خلتني اضرب اختي واشق راسها
سعود يطمنه وهو يتنهد : لاتخاف ان شاءالله بسيطه ومافيها شي يخوف اذكر ربك بس
بعد ربع ساعه طلع الدكتور وفز فيصل
: ها شلونها
الدكتور : لا لاتخاف وييحط الابهام على السبابه وياشر شق بسيط هالقد وخيطناه وبس حطينا لها مغذي بعد ساعه تقدرون تسوون لها خروج
فيصل حط يده على صدره بارتياح : اشوه الحمدلله الله يطمن قلبك يادكتور مثل ماطمنتني
سعود ابتسم : يلا انا اجل اخليك لازم ارجع عشان اغير ثوبي امتلى دم
فيصل : طيب انا بعد ساعه بطلع معها .. سعود طلع وفيصل دخل عند داليا
فيصل مسك يدها : سامحيني والله ماقصدت بس انا اعصابي تعبانه بالحيل وانتي تدرين ليش
داليا ابتسمت بتعب : لاعادي بس كسرت خاطري نوف ماعمري شفتها تبكي بهالطريقه فيصل انت قهرتها باحلى يوم في عمرها
فيصل : مقدر اجبر نفسي على شي انا مو قادر اتقبله من داخلي تعبت اقنع نفسي سنتين بس ماش مو قادر ابلعها والله لو نور تهون بس اهي لا شخصيتها غير
داليا:انا اعرفك طيب وقلبك حنون كيف طاوعك قلبك تجرح البنت طيب صبرت لك فتره يمكن من العشره تتقبلها وتحبها
فيصل : مسستحيل سنتين وانا احاول ماقدرت بقدر في شهور
داليا : سنتين تحاول بدون ماتحتك فيها ولاتكلمها بس الحين الوضع تغير انت ماعطيت نفسك فرصه اصلا
فيصل يتأفف : الله يسامح امي وابوي الي جبروني
__________________
في احد الفنادق الفخمه وفي وحده من الغرف
كان واقف وحاظنها بعمق
تركي يهمس في اذنها : وحشتيني
سمر تهمس له : انت اكثر حبيبي صار لي سبوع مادري عنك
تـركي ابتعد عنها وهو مبتسم طفى الأنوار و
___________________
البنات كلهم بغرفة نور يبدلون ثيابهم
نوف : ماشفتو داليا
شوق : كلمتني قالت انها صدعت بترجع البيت
نوف بشك : كيف كلمتك وجوالها هنا
شوق : دقت علي من جوال فيصل الظاهر هو معها
نوف تبي تعرف شصار : امممم
ندى وريم ولينا ناموو
لينا : صحيح شقال لك فيصل يوم دخلتو الغرفه وتغمز لها
نوف احتارت شنو تقول : اممم اهو كان مستحي اصلا ماعرف يقول كلمه عدله
شوق : اعرفه اخوي ثور مايعرف يتكلم هههههه
نوف تسلك لها: الظاهر انه كذا
_____________________
في بيت بو فيصل
دخل فيصل وهو ماسك يد داليا
داليا وهي تضحك : فيصل ترا مافيني شي شفيك خايف
فيصل بخوف : خايف من هالشاش الي على راسك لو احد شافه شبنهبب شبنقول
داليا بدون مبالاه: عادي اشيله
فيصل طير عيونه : خبله انتي
داليا : اجل بقولهم اني كنت اكلم جوال في الحديقه وطحت على الارض وخذيتني المستشفى بدون لااحد يدري
فيصل : طيب بس عاد مو تخورينها مالي خلق هذرة ابوي
داليا متوجهه للفت : طيب طيب انا بروح الحين انام لان راسي شووي يألمني
فيصل بتأنيب ظمير : آسف يااختي والله ماقصدت
داليا : ابتسمت له ودخلت اللفت
فيصل : هذا اول يوم لك معاي يانوف وهذا الي صار الله يعيننا
___________________________
بعد عنها بهـــدوء وهو مبتسم
سمر قامت بدلع وباست خشمه ودخلت الحمام تاخذ شاور وبعد ربع ساعه
طلعت وهي لافه الفوطه على جسمها ولقت تركي ينشف شعره بالمنشفه راحت له وهي تمشي بمياعه : حبيبييي
تركي يمسكها من خصرها : الى متى واحنا نلتقي هنا ونشبع من بعض متى اخوك بيفكر يتزوج وتجي تخطبني
تركي كان مأملهاان اذا تزوج اخوه بيجي يخطبها وبكذب:اخوي مايبي يتزوج الحين وانا متوهق فيه لما ارجع بحن على راس امي عشان تخطبك لي
سمر تحط راسها على صدره : والله اني احبك ومابي اعيش حياتي بدونك
تركي يكذب : وانا احبك واموت فيك .. وبعد عنها ..: متر بترجعين بيتكم
سمر بوزت : مليت منيي
تركي طفش منها : مامليت بس صارت الساعه 3 عادي يعني عندك تتأخرين لهالوقت
سمر زعلت منه : عادي انا مع خطيبي
تركي يتهرب: طيب انا لازم ارجع البيت ياقلبي وباس جبينها وطلع وسكر الباب والتفت على الباب وكش عليه وهو يضحك ومشى وطلع من الفندق وتوجه للبيت فيه النووم
_________________________
اليوم الي بعده في بيت ابو فيصل كانو كلهم في غرفة داليا
داليا : كنت طالعه ادور فيصل ولقيت معه سعود ورجعت اركض وزلقت على الارض وبعدين قمت امشي شوي حسيت راسي يوجعني وبعدين طحت مره ثانيه
ام فيصل حاطه راس بنتها في حجرها : ماتشوفين شر يابنتي
شوق تضرب رجل داليا بخفيف : هذا رجتك تركضين وماتنتبهين
داليا تضحك : عاااادي وتطلع لها لسانها
ام فيصل : طيب الحين يوجعك راسك
داليا : لااا والله مايوجعني ويلا عاد قومو ننزل حسستوني مكسره متجمعين كلكم
ام فيصل تضحك : يلا اجل قومي ننزل شوي ويجهز الغدا
داليا : الا وين ابوي ؟؟
ام فيصل تتنهد : ابوك بعد تعبان من امس ماجا الا معصب وواصل حده من اخوك وطول الليل يسب فيه ويتوعد فيه
ندى : طيب في الاخير ملك وصار الي يبيه
ام فيصل : بس يقول تأخر على ماجا ولما جا طول على ماقال موافق للشيخ يعني كان على طريف انه يرفض ويفضحنا
شوق : والله انا اشوف انه ماله داعي تراه رجال يعني وش هالحركات البايخه بعد نوف البارح قلنا نمشيها لها بس هو عاد مصخها
داليا : وش الي مصخها الولد مايبي البنت وهي تقريبا ماتبيه
ام فيصل رفعت راس بنتها : وش دراك انها ماتبيه
داليا : يمه امس نوف بكت وقالت اهو يبيني ولا وحسيت اهي متردده عليه
ام فيصل : كله من اخوك اهو هذا الي يبيه .. يبيها تحس انه مايبيها بس لو على جثتي ماياخذ الا نوف
البنات اكتفو بالصمت ومابيدهم اي شي يسوونه
__________________
في الليل وفي بيت بو فيصل كانو بيت بو مشاري موجودين ونوف تبي تنفرد في داليا تسألها بس مو قادره
شوي ووصلو بيت بو سعود
داليا من شافتهم دخلو فزت وفي نفسها " يارب يكون جا معهم لازم اتشكره انه خذاني المستشفى "
سلمت على البنات بسرعه وطلعت وهي تركض لبرا ماشافته واقف ضربت رجلها في الارض ورجعت داخل وكانت بوجهها نوف متكتفه
داليا بروعه : بسم الله شفيك لاحقتني
نوف بشك : شعندك طالعه تركضين من تدورين ولاتبين تطيحين مره ثانيه
داليا تمد رجلها : لا مولابسه كعب عالي عشان ازلق
نوف : ليش ضربك فيصل امس
داليا فتحت عيونها وبارتباك : ومنو قال ان فيصل ضربني امس اصلا مامداني اكلمه امس
نوف تفتح الباب شوي وتطل على البنات شافتهم مو حولها سكرت الباب زين ونزلت الدرج رايحه لداليا : يعني تتوقعين مشت علي انك زلقتي وانشق راسك وانتي كنتي رايحه لفيصل واهو كا متضايق ومعصب البارح
داليا تتنهد : نوف انا اقولك اني مامداني اروح لفيصل شفيك انتي مو مصدقتني
نوف تضرب صبعها براس داليا : لان كلامك وبالذات انا مايدخل عقلي
داليا ماتبي تقول الي صار : نوف لو صـــ
قاطعها : الي صار اني ضربتها في الجدار لما قالت لك اني موافق عليع وابلشتني بدال ماتريحني
لفو لفيصل بصدمه
داليا بقهر : فيصل ترى مالك داعي فيصل وعيونه على داليا وصبعه يأشر فيه على نوف : هي تبي تسمع شصاير ريحيها وعلى فكره هي تدري وش الي صاير بس تبي تسمعه بأذنها تبي تغث نفسها
نوف قامت بقهر وتوجهت لفيصل : عمري ماشفت ولاراحح اشوف احقر منك
فيصل ضحك يقهرها : هههههــــ .. ماكمل ضحكته لانه سكته كف قوي جا له من نوف
داليا وقفت وهي تكتم شهقتها :نوووف
فيصل والشرار يتطاير من عيونه ومسك زندها : انتتي تضربيني
وف وهي تحاول تفك يده : عشان اربيك
فيصل وصلت معاه سحبها معاه لمجلس الرجال وسكر الباب وقفله
داليا راحت وراه وهي تركض وتضرب الباب : فيصصل فيصصل عشاني ياخوي افتح الباب لاتسوي بالبنت شي الله يخليك
فيصل من داخل يصاارخ : داليا روحي دام النفس عليك طيبه
داليا بخوف : فيصل خالتي هنا والله لو يدرون بتصير مشكله
فيصل يصرخ : روحـــــــي
نوف كانت واقفه في زاوية المجلس ومن داخلها ميته خوف بس تتظاهر انه ماهمها ومتكتفه : خير شنو تبي
فيصل متوجه لها ومايشوف قدامه من العصبيه : انا تضربيني كف ها ؟؟ انا تضربيني كف عشان اتربى
نوف تحاول انها ماتبين الخوف : ايــه لأن مانولد من بطن امه الي يهيني
شد شعرها وهو يهزها : الظاهر ان يبي لك كسر راس لانك مانتي شايفه قدامك
نوف بألم : آآآه وعمى وكسر يكسر يدينك
فيصل مسك بيده الثانيه وجها ويضغط عليه بقوه : الظاهر ماعرفتيني زين ويترك شعرها وعطاها كف من قوته طاحت في الارض
نوف تحط يدها على خدها بصدمه اول مره احد يضربها ومنو فيصل الي تكرهه قامت ورفعت يدها بتضربه كف ثانيه بس فيصل صد يدها وعطاها كف طيحها ورفعها وعطاها كف ثالث ورابع
داليا سمعتهم ونشف دمها من الخوف وصارت تضرب الباب بقوه : فيصل فيصل لاتضربها لاتضربها الله يخليك لاتضربها
دخل من الباب لما حس ان فيصل تأخر عليه وسمعها تصارخ بأسم فيصل استغرب وتوجه لمصدر الصوت وانصدم انها تضرب الباب بقوه وترفسه برجلها وهي تبكي وتصارخ راح يركض يبعدها
: شفيييك تضربين الباب كذا ووينه فيصل
داليا تشاهق وهي تضرب الباب وحاقرته: فيصل يامجنون لاتضربها والله بتموت بين ايدينك خالتي هنا فيصل حرام عليك
سعود طير عيونه بصدمه لما فهم ان فيصل يضرب نوف داخل المجلس وكان بيكسر الباب بس ماحب الي داخل يسمعون راح من جهة النافذه وهو يركض وفتحها من برا وانصدم بالمنظر نوف طايحه بالارض وفيصل جالس وشاد شعرها رافع راسها له وعصصب نط ودخل سحب فيصل عنها
فيصل يتنفس بسرعه ويحاول يروح لها بس سعود صاده ويسمع داليا تضرب الباب مسك فيصل من كتفه وراح فتح الباب
داليا شافت نوف على الارض شهقت وراحت ركض لها وشافت اطرف شفتها مجروح ويطلع منه دم وعلى خدودها معلمه اصابع نتيجة الضرب
نوف تتكلم بصوت متقطع :د الــ يــا بمو ت
داليا تلتفت لفيصل وسعود الي طلعو برا وتصارخ : البنننت بتموووت
سعود بسرعه رجع ورمى فيصل داخل امسك حرمتك .. داليا روحي جيبي ثلج بسسرعه وجيبي موييه
داليا طلعت من المجلس وهي تركض ودخلت المطبخ من الباب الخارجي اخذت كاس مويه وخذت كيس وعبته ثلج ورجعت بسرعه شافت سعود واقف عند باب المجلس دخلت ولقت فيصل جالس جنب نوف وحاط راسها بحجره ومنزل راسه لها راحت وهي معصبه وبعدته عنها بقوه وصبت في يدها شوي ماي ومسحت على وجه نوف وخذت ثلج حطته على طرف شفتها
نوف كانت حابسه دموعها ماتبي تبكي قدامه وتبين له انها ضعيفه وبكت كانت عيونها متنفخه من كثر ماحبست دموعها ووجها محقون وصاير احمر
داليا وهي تمسح وجها بالماي طاحت دموعها وبهمس : جعل الكسر الي يكسر يدك يافصيل التبن
فيصل سمعها ومارد عليها وقام طلع من المجلس
سعود انتبه لفيصل ومشى وراه و طلعو من البيت : فيصل فيصل وقف لاتسوق وانت معصب
فيصل بصوت مخنوق: امي وابوي اهم السبب خلوني امد يدي امس على اختي واليوم عليها سعود ماعاد فيني عقل
سعود : انت الظاهر تبي تجيب اخرتك بنفسك وبتودي نفسك في ستين الف داهيه
فيصل حس انه مخنووق ورفع راسه للسما وبهدوء : سعود حط نفسك مكاني تاخذ وحده ماتبيها وهي متكبره عليك ولاا تمد يدها عليك
سعود مايبي يتكلم في هالموضوع واجد : تتعود عليها ويمكن تحبها وتعشقها .. الحين خلك من هالموضوع ترا الشباب ينتظرونا في الاستراحه وتاخرنا عليهم يلا قم
فيصل من غير نفس : وانا وين لي نفس اروح واقابل احد
سعود : وانا عن قصد ابيك تروح الحين عشان تغير من نفسيتك شوي
فيصل تنهد : ماشي
_________________
بالمجلس كانت نوف تبكي بانهيار : كنت بموت بيت ايدينه وهو مو حاس ياداليا يكرهني
داليا وقلبها متوجع عليها ضمتها بقوه : الله يكسر يده ان شاءالله
نوف تدفن راسها بشعر داليا تكتم شهقاتها : كيف بكمل حياتي معاه انا خلاص معاد ابيه هذا بيعيشني بجحيم بيصبحني بكف وبيمسيني بكف
داليا بتأييد : طيب نوف بس حاولي تتحملينه هالشهر وبعدين طلبي الطلاق
نوف نزلت راسها بأسف على حالها : ماتوقعت ولامره بحياتي اني بعيش هاليوم هذا
داليا تمسح على شعرها: محد مننا يعرف وش مكتوب له ولا وش بيصر له بكره
نوف تتنهد : طيب يلا قومي عشان محد يحس وقامو متوجهين للباب وانصدمو بوجود بو فيصل الي كان واضح عليه انه سمع كل شي
قامو داليا ونوف وسلمو عليه وحبو راسه
بو فيصل بحده : فيصل ليش ضاربك يانوف وانتو في ثاني يوم ملكه لكم ؟؟
داليا بارتباك : يببه هو فيصل متوتر شكله متضايق من شي بس
بو فيصل متجاهل بنته : نووف انا اكلمك فيصل ليش ماد يده عليك ؟
نوف ماترد ومنزله راسها
بوفيصل رفع راسه وانصدم بشفته ا المجروحه ووجها المعلم نتيجة الضرب : هييين يافيصل انا اعلمك
وسكت لدقايق بعدين رفع جواله واتصل وهو يمشي باتجاه الباب :الو السلام عليكم يابو محمد شالاخبار .. ايه كنت داق عليك بخصوص القاعه الي حجزتها لعرس ولدي بعد شهرين .. اي .. داق عليك اقولك اني بقدم الحجز واخليه بعد سبوعين صارت لنا ظروف واضطرينا نقدم الزواج .. الله يعطيك العافيه
نوف انصدمت وحطت يدها على راسها : دالياااااا ابوك شجالس يسوي بدل مايطلقنا يقدم زواجناا وتجلس على الارض وهي تضرب خدودها ..: مقدر على كذا انا والله مقدرر
بو فيصل مشى متجاهلهم وراح للصاله فتح الباب بشويش وتنحنح وبصوت عالي : ياام فيصل تراني قدمت زواج فيصل وخليته بعد سبوعين صارت لخبطه في الحجوزات واضطريت اني اقدمه
ام مشاري وام فيصل صارو يزغرطوووون بفرح
ام سعود بابتسامه : ياعساه مبارك وسعيد والله يتمم لهم على خير ان شاءالله
سكر الباب وشاف البنات واقفين قريب منه
نوف بترجي : عمي الله يخليك الواضح ان فيصل مو هاويني للزواج ومايحبني
بو فيصل وهو يمشي باتجاه المجلس : يابنتي الحب مايجي الا بعد الزواج والا كلام الخرابيط هذا ماعليك منه يلا عن اذنكم واستعدي زين لعرسك يابنتي وسكر باب المجلس
نوف بقهرر : الحين هذا العاقل اذا الابو كذا مالوم فيصل على سواته داليا انا بروح غرفتك مالي خلق اشوف احد ولايسالني احد انتي دخلي ولاكان صاير شي
داليا تتمصخر : هههه بدخل بقول لهم طلعتي مع زوج الغفله
نوف : فالك ماقبلناه اموت ولااطلع مع هالتيس وراحت عنها
اما داليا دخلت ولما سالوها قالت طلعت مع فيصل وسوت نفسها ماتدري عن موضوع تقديم الزواج ولما قالو لها فرحت
___________________
يوم الاحد وفي وحده من الشركات ومكتب فخخم
سعود : خالد ابيك تحصر لي جميع المعلومات عن بو ماجد نفسه وهو قبل فتره مقدم على طلب شراكه جيب الملف خليني القي عليه نظره مره ثانيه
خالد : حاضر طال عمرك شي ثاني ؟؟
سعود يرفع صبعه وكأنه تذكر شي :المهندس الي ماسك شركات الافراح الجديده الي في حي ...... حدد لي موعد معاه ابغى اقابله
خالد : حاضر طال عمرك شي ثانيه
سعود :لاسلامتك تفضل على شغلك
ورفع السماعه طلب له قهوه يريح فيها راسه
_____________________
وفي الجامعه كانت لين وداليا ونوف ونور جالسين مع بعض في وقت البريك
لين : لازم في هالاسبوعين كل يوم نطلع نقضي الوقت حيل ضيق ويادوبنا نخلص
نوف بتحكم : انا مابي احد يطلع معاي يقضي وانتو خلصو فساتينكم وانا خلوني لحالي
نور : كييف يعني مابيمديك لحالك
نوف : انا مابشتري كل شي بشتري لي بس كم فستان وكم بجامه
داليا فاهمه عليها : نوف انتي بتتزوجين يعني حياه جديده ملابس جديده لازـــــ
نوف تقاطعها : يوووه عاد داليا خلاص فكينا
نور تفكر في شي : داليا عطييني جوالك
داليا بدون اهتمام فتحت الجوال وعطتها اياه
نور خذت رقم تركي وحفظته في جوالها وسكرت الجوال ورجعته له وهي مبتسمه ..
___________________
وفي وحده من المدارس الاهليه
كانت لينا جالسه مثل الطاووس والبنات حولها
لينا مدت 50 ريال لوحده من البنات : ناديه قومي جيبي ليه مويه عطشانه
ناديه فزت : من عيووني وراحت جابت مويه ومدت لها الباقي
لينا بغرور : خذيهم لك بالعافيه عليك
ناديه بفرح دخلتهم في جيبها
فجر تهمس لصديقتها رغد : والله اني مااطيقها ماتمر ماتمـــر
رغد تهمس : يابنت مالك شغل فيها وبعدين ترا كلنا مستفيدين منها فلووس وحلول واجبات مضمونه
فجر : بس بظل اكرهها شوفي كيف تعاملنا تقول عبيد عندها
رغد : مانتي مجبوره تجلسين تحت رجولها
فجر تطالع لينا بحقد وابتسمت بخبث : فجوور تساعديني
رغد مسكت يدها وقامو
لينا : وييين قمتوو
فجر: بنروح نتمشى شوي ملينا من الجلسه
لينا بغرور : لاتنسين قبل ماتنتهي الفسحه حلي واجب الرياضيات مني ادري انك ماحليتيه هههههههههههه
فجر تهز راسها بأي : اي اكييييد باخذ الحل وابتسمت بخبث ومشت
رغد : فجر اهي البنت غنيه وشاطره شي اكيد بتصير مغروره
فجر : مو كل وحده غنيه وشاطره لازم تصير مغروره بكيفك سويتي هالقانون لا ياامي غرورها ذا لازم تاخذ قرصة إذن عليه
______________________
في الليل وفي احد المجمعات كانو نوف ونور يمشون وكل وحده شارده بتفكيرها
نور" طيب رقمه واخذته الحين شنو بسوي اكيد مراح اقوله انا نور واحبك واموت فيك"
نوف دخلت نيو لوك وخذت لها فستان عنابي نص الفخذ ووقصـة الصدر واسعه وابتسمت بدهاء وراحت محل ثاني خذت فستان اسود قصير والكموم نازل شوي وكانت تحاول تشتري اشيا تفضح اكثر مماتستر وفي باله بتجيب راس فيصل بعدها بتقول مابيك وطلقني
وبتعب تكلم نور : خلينا نجلس بكافيه نرتاح ونحلي تعبت اليوم
نور بتأييد : اوكي يلا
وراحو وجلسو على طاوله وطلبو لهم موكا بارد مع حلا
ونور بعدم صبر فتحت جوالها ورسلت له في الواتساب" مسساء الخير"
ثواني وجاه رد" يامسااء النور .. من معي "
نور ابتسمت برضا وقفلت الجوال
_______________________