[فيتامين سي]

البارت الثالث عشر
رواية..انا هي جميع نساؤك
بقلمي...سمو العراق..

💔💔💔💔💔💔💔
و

َ وشـرد اگـلگ،،!☺

بيـمن احـلف،،

آي وحـگ اتـراب رجـلگ،،

انـه? اعشـگگ،،

........................

وكفت ببدلتي كتله..ياله المنذر عيييب

كال بااستهزاء...لا والله

باوعتله بحيره وخوف اتمنئ اشرد من الغرفه...اي والله عيب انه راح اروح ابدل واجي وانت اذا تريد نام لو اروحن اسويلك عشاء...

هو وكف وانه رجعت ليوره ..يمه شبي هذا...

ثواني ومانسمع اله صوت الرمي رجانه رج....

هو فز بسرعه وانه تخبلت شنهي الصار ليش هذا الرمي...

المنذر فتح الباب وطلع وانه ضليت بالغرفه عبن كلش استحي اطلع مدلعه جدام اهلي...

اسمع الخبصه والهووسه بالبيت كلش خفت بس مااعرف شنهي الصار...

ليش الرمي...

ردت انزع البدله ماكدرت...

خفت علئ نذري حييل يممه فدوه اروحله لا تجي طلقه والله بعدني ما تهنيت بي

كعدت علئ الجربايه ...وانه الووب ياهو اليفرحني وينزعني البدله...

عليه ابو فاضل اصير احزام ضهر وكف للمنذر...

اهدن وراه جااا شنهي الي يرشه بماي ارشه بنار...

احسن كلبي صار نار ورجليه خييوط

الدمعه لمعت بعيني،شهل فال المصخم بيوم عرسي تكوم القيامه...

يربي شمسويه چاتله سيد...

تنهدت وانه ابجي والوضع ما يطمن بخيير...

شفت الباب انفتح وانه فرحت حيييل...

دخلت هاله ملهوفه ووجها مخطوف من شفتها وكفت بسرعه وانه روحي ذايبه عبن كلهم بخطر...

كلتلها بنهيار ونحيب...هاله شنهي الصاير شنهي هذا الرمي...

تنهدت وهي متعصبه وخايفه ...وثاب النذل هد علينه وخرطنه خرط يكول اريد منارس انتم اخذتو حرمتي

انه تعصبت وفار دمي احترك كلبي جاوبتها بعصبيه...انعل ابوو يا ابو حتئ الخلفه شنهي فصلية الخلفوو مااريدنه لزك...

كالت...تعاي بسرعه انزعج البدله خطيه راحت علئ المنذر وما نزعج...

يممممماي من كالت هيييج سحت بالبدله من الخجل المنذر ينزعني يممااااي والله عيب...

انه جدام امي ماابدل استحي انوب جدام المنذر

لا وحگ علي انجلط من الخجل...

غلست ما حاجيتها...

راحت طلعتلي كلبيه حلوه لونها كريمي وربطه نفس الشئ...

وفتحت السحاب انه خجلت منها كلتلها...عليج بروح ابوج لا تعاينين عبن استحي

ضحكت بااستهزاء كالت...لعد شلون من يهجم المنذر

استغربت جاوبتها...عليمن يهجم

كالت بسخريه...علئ ابووي هه

خلت وطلعت وانه ضليت مستغربه من كلامها جاا عمي الله يرحمه شعليه والمنذر يهجم عليه

قابل هو منطيني لوثاب لو هو جدي اطاني اله...

بدلت بسرعه وحطيت البدله بالكنتور ...

وفتحت التسريحه جانت بسيطه ما تعبتني...

لبست الربطه وطلعت وانه كلش خجلانه ومستحيه

شفت المنذر واكف بالطارمه وهو بعده بقاطه بس نازع الستره وفاتح الرباط واول دكم من قميصه..

بس شنهي احلئ من بطل مسلسل مسكيكي...

شكد حلووو ماادري انه من كثر مااحبنه اشوفنه حلوو ماادري هو حلوو

جدي تعصب كاله..ولك منذر ارجع لا تطلع لا تخليني اتخبل عليك

المنذر بعصبيه...والله شاربي مو عليه اذا مااندمه لهذا النعال جااي بيوم عرسي يدكني ويرمي بيتي واسكتله

لا والله مو رجال ولا اخوو اخيتي اذا مااخذت حقي

صلف...ولك جدي هو صاحب حگ لا تنسه انه ضحكت عليه واطيتك منارس وكتله ذيج ماتت...

المنذر بعصبية...ويطبه مرض شنو ورث من الخلفوو ويريد ياخذها...

وبعدين هي صارت مرتي ولو تقوم الحرب العالميه الثالثه مااخلي يطول رمش من رموشها...

هو يحجي وفدوه لله انه بكلبي اكوول...

شنهي. انه متزوجه اسسسسد اتمنه اروحن وابوسن جدي لان خلف عمي وعمي خلف نذري...

ميلت راسي وانه مندمجه بكلامه وجماله..

جدي رجع جاوبه بحنيه...بعد جدك ارحم شيباتي وخليني انه اتصرف انت فاير وهو يفور واذا تقابلتو تكومونها ما تكعدونها...

خليني انه اتصرف بالحكمه واحلنها...

المنذر بعناد وغضب...والله اني ماارتاح اذا مااطيح حضه

اني محد يتعده عليه والله اخلي يعفن بالسجن شنوو تايهه

يصخم يوم عرسي عليه

صلف..درجع المرتك وانه احله ولا تعبني بعد جدك لا تعاند انت ماتثق بيه

انه اركب الحق عليه واخلي ياخذ عطوه ويعتذر منك....

المنذر ...اله عطوه منا لباجر اذا ما اجه اعتذر وحق الله اكلب عاليها واطيها...

صلف ...اي تامر بس انت ارجع الغرفتك عبن يكولون فال موش حلوو وتنكطع خلفتك

المنذر...هههههههههاي هذا الاغم يكطع خلفتي شنوو ما متعلم علئ الرصاص لا تنسه كم حرب اني داخل
من الكويت لايران...

صلف..اي اعرفنك ابن ابووك بس هله هله بمنارس عبنها نعجه ثوله كلشي ماتفهم...

المنذر...ههههاي لا معدله تعرف تهلس باجه

انه تخبلت شبيهم ذوله يقلدون عليه وهذا نذري انه اعلمنه شلون يضحك عليه...

طلعت نعجه ثوله والله انه معدله بس همه يغارون..

خليتهم ورجعت لأمي

كعدت يمهن وهنه يسولفن

جدتي كالت...دهر الصابها حليمه رايحه كايله لابنها منارس هي مريتك موش الماتت عبن مرسوم برجلها هلال ونجمه...

امي كالت..هي شنهي مانريدهم لزكوو البت ماتريده

عمتي كالت...اي والله شنو لزكه بعدين المنذر اوله بيها هو ابن عمها واقرب من وثاب الها

الله لا يوفقه كسر فرحة ابني بعرسه...

حتئ ملحك يشوف عروسته ببدلتها

انه جاوبتها...ياله شافني كال حلوه

امي ندستني بعكسها وانه سكتت بسرعه...

جدتي كالت..دهر صابج منيرس جاا انتي اله تدكين فضحتينه بدكج

والله بيومها جدها كتلها كتله خلاها اسبوع تون ونايمه بالفراش

عبن خبزها خبز بعصه...

انه حييل خجلت من جدتي ذكرت الكتله همست بخجل...ياله ما توجع بس انه زعلت...

ام المنذر كالت...لعد هي ام وثاب وين شافت وشم منارس...

امي جاوبتها..دكول من وكفت انرفعت بدلتها وشافت الدكاك...

ام المنذر...هاااا

امي...اي وسأله ام جاسم كايلتلها بس منارس داكه برجلها لو غرام همين...

ام جاسم مجاوبتها..ياله بس منارس وجدها كتلها بيومها...

وهي تخبلت وراحت كلت الثورها وهد علينه...

انه همست هد عليه ابليس وولده ان شاء لله شيريد انعل خيييره...

ضلينه تقريبا ل 12 ناس رايحه وناس راده وجايات ومدري شنهي...

واجت دوريه مال شرطه والمنذر سدها من يمه وماكبر الموضوع...

المنذر جان كاعد بالاستقبال هو وصديقه عمر واخووي عابد وجاسم ابن عمي...

وانه اباوع عليه من الشباك شويه البرده مسحوبه

يمه فديته يدخن بالجكاره وضايج يحرك بروحه حرك والولد يسولفون هو موش يمهم...

انه كلهم الكاعدين ما معتبرتهم زلم بس نذري زلمه

احبببنه بس هو ما يستحي مادري عيونه موش راحه يعاين عليه
...

اخذوو وثاب يم بيت عمي ابو جاسم وراحوو...

صلف لزم وثاب من ياخة دشداشته...انت شنهي زحت المستحه تكبرت علئ اسيادك

عبن خليتك شيخ تشيخ عليه وحگ روح ابووي اذا ما تمشي عدل اخنكك بعكالك وكول صلف ما كال

وثاب بعصبية...انه ينضحك عليه انه وقاب اتقشمر ومنيذر ياخذ مريتي

صلف..شووف ولك لا دكول مريتي لا اترس حلكك تبن لا مريتك ولا شئ البت صارت عد رجلها...

واريدن واحد يحجي اوكله نعل وحگ. علي...

وثاب...بس هاي مو من شيم الزلم تكسر بكلمتها انت انطيتني كلمه وكسرتها...

صلف بحده...اكسر كلمتي ولا اكسر بت ابني انه منيرس اعرفنها من يجيبون طاريك اتخبل عبنها موش راضيه...

والرسول يكول الجبر حرام...وانه مااريدن اجبرها...

وثاب بغضب...من شوكت زعطوطه مثل هاي تمشيك علئ رايها والله احنه ضلينه نمشي براي النسوان...

صلف بعصبية...شوف ولك الحجي وياك ضايع من باجر تجي تاخذ عطوه من المنذر لا وحك روحك خلف اتصرف وياك غير تصرف وانه صلف...

وثاب...مااخذ عطوه

صلف...لا تاخذ

وثاب..احنه اولاد عم مابينه عطوه ولا بينه ثأر

صلف..هذا كلامك اقنع بي نفسك ترد اعتبار منذر عبن انت اعتديت علئ حرمة بيته وزرفت بابه

تجي تعتذر وتاخذ من خاطره وتبارك اله وما تعيد الموضوع

والعباس ابو راس الحار اذا مااجيت واعتذرت انه انكلب موش صلف لا انكلب طنطل...

وثاب بتنهيده...خوووش انه اريدن عطوه منكم وباجر اعتذر....

صلف هز راسه...اي هسه الحجي عجبني ودخل مزاجي...

ويالله روح ولا تحتك بالمنذر عبنه مخبل وكوه لازمه منك...

وثاب اخذ عكاله وجفيته واخذ ولد اخته اسعد وفاروق وطلع وهو يغلي من عصبيته...

وصلف رجع البيت المنذر...

دخل للاستقبال وكال...جدي المنذر انطيت عطوه لوثاب وباجر يجي ياخذ من خاطرك

المنذر بجمود...الله كريم...

راحو الولد وضل المنذر هو وجده...

صلف..يالله روح العروستك عبنها تنظرك

المنذر ابتسم بهدوء ....يالله تصبح علئ خير

جنت كاعده ويه امي وهاله نيران راحت نامت وجدتي ومرة عمي وهنه يكركن بسالفه وثاب...

اجه دخل المنذر وكف بباب الغرفه

وجدتي ضحكت من شافته كالت...يممه هله هله نذر منوره

يالله اخذ مريتك وروح الغرفتك وهااا اريدنك سبع كوون تكطع راس القط من اول ليله...

هو ضحك كلها...ادللي حجيه اكطع راسه وراس الخلفه..

انه جاوبته...يالله خطيه البزونه

جااا انت شنهي مجرم وتكطع راسها...

همه كلهم ضحكوو...

انه استغربت شنهي يكطع راس القط...

جدتي وكفت سحبتني من ايدي وحطته بيد المنذر انه ماادري شصار بيه ارجف ارجف

كلتله جدتي وهي تضحك...اخذ مريتك وهااا اريدنك تتزحلگ بالطماطه وتصير معجون...

هو رفع راسه وضحك اباوع عليه شحلات تفاحة ادم برقبته موش مثل وثاب جنها سلعوم مال صخل...

بس همين مافتهمت شنهي طماطه ومعجون وشنهي تزحلك

جاا قصدها اني،عوبه واذبن الطماطه بالكاع وهو يتزحلك شنهي السالفة...

هو سحبني طلعنه من الغرفه سحب ايده من ايدي وخلاها علئ جتفي...

احسها موش اييد لا جبل

ضليت اتنفس بصعوبه واتمنئ انام بحضن جدتي

كلش مستحيه من المنذر وهو. هم ما يستحي ليش يخلي ايده علئ جتفي والله انه اخجل...

اذا هو جريئ انه اخجل...

دخلنه للغرفه...

سحبني كعدني علئ الجربايه ...

وراح اخذ ملابس ودخل للحمام...

انه وكفت بباب الحمام عبن اريد ابين اله انه معدله واقوم بواجبه

من يطلع اخذ قاطه واعلكنه واسفطه

هو طلع لابس بس البجامه وصدره عاري...

انه شفته وانه تخبلت صرخت وحطيت اديه علئ عيونه همست بخوف..ياله ياله رووح بدل عيب اشوفنك هييج

ماحسيت بي غير حضني وصدره العاري يلامس ضهري ينه حسيت رجليه ماتت ودموعي عشره عشره...

بطني ضلت تلويني الموت دخل برجليه...

وهو يضحك كال..شبيج ليش عيب لعد الهسه انسوي اقوئ من هييج

انه نطيت من البجي وارجف

دفعته ووخرت بعيد عنه واني مغمضه عيوني لزكت بالحايط

هو تفاجئ عقد حواجبه وسحب المنشفه من الزوايه خلاها علئ صدره كال..شبييج ليش هيج تخبلتي..

جاوبته بشهكات..شنهي انت ليش ما تلبس،قميص انه انه ما شايفه واحد مثلك هيج بدون قميص انه استحي

كال..ادري اني شنازع بابا حبيبتي اني زوجج لازم يكون بينه تقارب اني ستر الج تنكشفين عليه وانكشف عليج

تنامين بحضني واكعد علئ أنفاسج يصير عدنه اطفال ونبني عائله هييج شئ حلوو لعد المن تزوجنه

غير حتئ نستقر..

باعي شلون اني جبتلج كولشي تردينه ثلاجه وتلفزيون وراديو وحتى فيديو وتليفون...

معناها اني احبج وادور راحتج ...

انتي هم لازم تدورين راحتي ومتخلين واحد يتشمت بيه

ويكولون المنذر مو زلمه ما كدر ياخذ مرته...

رديت عليه بخووف..وين ما تاخذني اخذني

انه هم احبنك وشتريد اسويلك انضف واطبخ اغسل ملابسك...

رد عليه بقهر...ليش هو الزواج بس هييج ؟

جاوبته..جااا شنهي

كال..الزواج تقارب حب استقرار وذريه انتي ما تردين تصيرين ام هذا الشئ من حقج مو صح

جاوبته...اي صح عبن انه اريد بسرعه اصيرن حامل..

كال..وشلون تصيرين حامل وانتي متقبلين حتئ قميصي انزعه...

جاوبته بخجل..جاا اله تنزع قميصك يالله اصير حامل

تنهد همس بنهيار..بس فهميني انتي محد فهمج علئ الزواج محد علمج ليلة الدخله شنوو

جاوبته بعد مانزلت راسي بحزن...اعرف كلشي اعرف انه لازم من تجي من الشغل اصبلك غده وكعد يمك ذا طافيه الكهرباء اهفيلك...

اغسل ملابسك وانام يمك

كال بفرحه..اي يالله

رجعت جاوبته..بس انه انام بالكاع احسن عبن ما متعلمه علئ القريوله...

هو تنهد راح طلع قميص ولبسه...

وراح تمدد علئ الجربايه...

انه اخذت قاطه وعلكته...بالكنتور...

ضليت كاعده علئ القنفه مصدومه هو شنهي ليش هيج يتصرف...

انه ما متعلمه علئ هييج...

بس هو ضاج وانه ضجت عبن مااحب اضوجه..

رحت كعدت يمه باوعتله بحزن...انت ضجت مني والله انه حيل استحي

هو سكتت محجاني...

جاوبته..اذا تريد انزع قميصك بعد ماابجي

هم سكت...

تنهدت خنكتني العبره زعلان مني..حطيت ايدي علئ دكم القميص ردت افتحه

هو لزم ايدي بسرعه سحبني الحضنه ولف ذراعه عليه وضحك كال...هههه ولج بابا قميصي شنوو انتي ينرادلج واحد يدرسج ويعلمج

يالله اني ما مستعجل لان كلشي يجي بالرضا طعمه غيير واني اريدج راضيه...

جاوبته..ياله اني راضيه انزع قميصك

ضحك..وشنو الفايده خليني هييج احسن..

سكتت بعده زعلان يربي شسوي والله حيره...

هو رجع ضمني لصدره وباسني بكصتي وضل يمسح علئ شعري...

ضليت تقريبا نص ساعه احوس بحضنه وارجف وتالي هو نام

كمت من مكاني ورحت سبحت وبدلت واجيت فرشت بالكاع ونمت عبن انه احووس من انام..

واخاف اصعد فوكاه...

يمااي اذا اصعد فوكاه انتحر...

نمت وانه افكر بكلامه استقرار وتقارب ومااعرف شنهي يريد مني والله حييره...

كعدت الصبح من الفجر لكيت روحي علئ الجربايه

يمه تخبلت فتشت هدومي لا الحمد لله بعدهن عليه

ونذري نايم وحاط ايده علئ خصري

يمه ولا يستحي منومني يمه....

ضليت اباوع عليه اتمنئ ابوسنه عبن حلووو

بس شنهي،اخجل منه وعيب...

رحت توضيت وصليت...

اجيت كعدته للصلاه هو طلع ما يصلي...

ضجت حييل عبن مااحب واحد ما يصلي..

بس شنهي كلت مثل ماهو كال اعلمج علئ الدراسه

انه اعلمنه علئ الصلاه واخلي يصوم...

وكل خميس اخلي،يقره قران حتئ الله يبارك بي...

جاا شنهي شيطان مخلين بالبيت شكبره شكده عاصفه ومايصلي...

عفته ورحت لان رجع نام...

لكيتها كلها نايمه...

دخلت للمطبخ سويت جااي

اتذكرت اغنيه قبل اغني بيها ...

اسمها سدو عليه الباب يمه يمه...

بردوني اعوفه شلون يايمه اسمعني..سدوو

جنت اغني بيها وانه اذكر المنذر من دخل وسد الباب

والحسن احسن حاصرني ملج الموت موش نذري...

كملت ريوك

وكعدت انتظرهم...

شويه وكعدوو نيران تريد تروح للمدرسه ..

وجدتي كعدت شويه واجه المنذر ملهوف..

كال..منارس تعاي بسرعه

رحت وراه بسرعه جاوبته...هااا شكوو

لزمني من اكتافي كال...اي واحد يسالج يكلج المنذر اخذج كليلهم اي مفهوم

جاوبته ..قصدك تاخذني للامام ازور جاا شلون اجذب انت شوكت اخذتني بالحلم

كال..اشش كولي اخذني وبعد ولا حرف تحجين مفهوم

جاوبته...اي مفهووم

طلعت وهي صارت عليه زنابير اخذج مااخذج وانه اكلهم اي

جدتي تهلهل وتركص وام المنذر همين

وانه اطرش بالزفه....

تريكنه وكملنه...

واجه جدي صاح علئ المنذر وكعد وياه ضلو يسولفون وصوت المنذر يلعلع...

شكد يصيح ما يحترم جدي

بس همين احبنه....

.......................

نيران...رحت للمدرسه صادف يوم سبت شكد كرهته لفاروق لان هد عليه اخوويه...

بس سمعت جدي يكول

فاروق هو الي يسكت بخاله ومقبل علئ تصرفه...

شويه فرحت...

ضليت منظرته يجي يجيب الكتاب بس هو مااجه...

انتظرت انتظرت ماكوو

همست بداخلي..يطبك مرض لا تجي عمرك لا تجي

دخلت للمدرسه واني بالي عنده احتمال غير رأيه بيه

وشنو واذا غير رأيه قابل هو منو

اصلا مابيني وبينه شء مجرد اريد كتابي....

...... .......................

منارس

اليوم رادو ياخذون عطوه بس اجلوها ..

وناس تروح وتجي تبارك النه والمنذر كل شويه يجون اصدقائه...

وانه اركض هيج وهيج...

ومكيفه انضف واجلف عبن انه معدله

وعمتي دكول روحي اكعدي وروحي يم رجلج

وانه مااقبل انضف...

هاله كالت..اكص ايدي اذا المنذر ماخذها

شوو جنها حصان تركض هيج وهيج...

بس مو كدام واحد كالت بس النيران....

خلصنه شغل وانه رحت نمت وانتظرت المنذر يجي

انتظرته انتظرته ماكوو...

نمت شووويه...

بعدها كعدت طلعت بره نذري ماكووو

طلعت بره ادور عليه رحت للاستقبال للهول ماكوو مدري وين راح

رحت للحديقه مالكيته

رجعت الجوو اضلم ويخووف ماحسيت غير بايد كتمت نفسي...

مااكدرت اصرررخ بس نرعبت رعب خفت حييل وارعش...

سحبني للسياره ركبني بيها وقفلها ورشها بانزين وشغل عود الشخاط وشمره علئ السياره...

نهاية البارت...يتبع

كونوا انتم كونوا بخير...احبكم

نور سمو العراق

واعتذر عن التاخير لكن والله ضروفي حالة بيني وبينكم...وامتحاناتي صعبت...

احبكم...😭