البارت الخامس
لكل ١٠٠٠ تصويت بارت
مرت ايام مابين العلاج الطبيعي وكعده البيت مر ع التحاق انمار ١٠ اسبوعين
والعصريه كاعدين اني ورفل وام رفل سوتلنا عصرونيه عصير وكيك ودا ناكل واندك الباب بصوت قوي واسمع الحارس ابو علي يتعارك ويه ناس
مااكدر ادخلكم للبيت
شنو هوة بكيفك ما تدخلنا اجينا ع بنت اختي اذا ما تفتح الباب اخلي طلقه براسه (ويوجه المسدس ع الحارس)
الحارس من الخوف اضطر يفتحلهم الباب
دخلوا للبيت رجال كبير بالعمر الشعر الابيض تارس راسه ولحيته ووياه ٢ شباب بعمر انمار تقريبا او اصغر منه
والرجال المشيب حجا ويه ام رفل
السلام عليكم
حجيه اجينا ناخذ بنت اختي صيحيها خل تجي
منو حضرتك ومنو اختك
اني حسين اخو سازان
نعم اني بنت سازان
ويباوعون ع رند كاعده ع كرسي متحرك
شلونج خالو
اني خالج حسين وذوله ويأشر ع ولده محمد وهاكان ولدي
اهلا اتفضل وأشر ع كراسي الي بالحديقه وكعدوا (سلمت علي بدون نفس احسه غريب عني حاله حال اي رجل غريب )
احترك دمي من سمعت بيج كاعدة يم ابن خال ابوج واجيت اخذج
خالو اني عايشه بهذا البيت ومرتاحه ودا يعالجني وما مقصر ويايه بشي
بنتر شنو مرتاحه لازم ترجعين ويانه لسليمانيه
ماارجع شنو هيه كوة
بنتر انتي مثل امج وكحه ولسانج طويل شنو عاجبتج الكعدة يم رجال عزابي ماعنده مرة
خالو ليش هيج تحجي ع ماما مو هيه ماتت ومايجوز عليها الا رحمه وبعدين انمار رجال والنعم منه ومعتبرني مثل بنته واصلا اني مااشوفه دائما ملتحق ويجي كم يوم ويروح
غصبا ما عليج تروحين ويانه شنو تكسرين كلام ابويه
ما اروح وياكم منين اعرفكم حتى اروح وياكم اول مرة اشوفكم جوز انتوا مو خوالي
بنتر شنو مو خالج لعد منو اني يله لج يله كومي ويانه
ودا احجي وياهم اقصد اتعارك واتصل بيه انمار
الوو انمار الحكني
ادري بيهم بنوتي دير بالج تروحين وياهم انتظريني فد ساعتين واجيج
انمار خايفه
ولج منو هذا التحجين وياه واخذ الموبايل مني واحنا واكفين يمج ماعندج ذرة مستحى
دا احجي ويه انمار ابن خال ابويه صاحب هذا البيت الاخذني وعالجني وخاف عليه احسن منكم
انجبي وبلا كلام زايد انوب علينا المكرمين(المعاقين) يله روحي حضري ملابس حتى تروحين ويانا
كل هذا وانمار ع خط
انطيني الموبايل حتى اروح اغير ملابسي واجيكم
انطاني الموبايل وطبيت للبيت
الوو انمار
اوك رند بنوتي روحي وياهم ماتكدرين تبقين وهما هيج يحجون وياج واني باجر من الفجر يمج لا تخافين مااتركج لو ع كص ركبتي
ماشي بس لا تعوفني
لا بنوتي انطيتج كلمه مو اني الاتراجع عن كلامي
بعد ما انمار كلي روحي وياهم اخذتني رفل لغرفتي وخلت ملابسي وعلاجي بجنطه كبيرة مال سفر اعتقد مال انمار هالجنطه ولبست فستان لان جنت لابسه تراك ودا اطلع من غرفتي واتصل بيه انمار
بنوتي الحجاب مينزل من راسج واي شي يكلولج غلسي ولا تراددين خليهم يحجون بكيفهم انطيهم الاذن الطرشه بنوتي
اوك انمار بس خايفه
لتخافين بنوتي اني يمج من الفجر
مااتركج لو اعرف احركهم حرك واخذج من حلك السبع ومااتركج
شكرا انمار مااعرف شكلك
بعدني مامسوي شي حتى تشكريني علي واخذج علاجج وياج مو تنسينه
اخذتهن باي انمار
الله وياج بنوتي
لبست حجابي وبهل فترة العشت بيها يم انمار اتعلمت الف الشال زين
طلعت ولكيتهم كاعدين بالحديقه ينتظروني والحارس ابو علي واكف اباب البيت ومخنزر عليهم
رفل كومتني من الكرسي المتحرك ورحت لسيارتهم وكعدتني بالسيارة وكعدة ليورة وكعد يمي ابن خالي اسمه هاكان وليكدام محمد وخالي
وكضينه الطريق ع صامت ماحجوا ويايه ولا كلمه ومن وصلنا لسليمانيه تقريبا ب١ بليل وكفوا السيارة وخالي كال
شنو اسمج ويأشر عليه بنرفزة
اسمي رند (الله واكبر اسم بنت اختك ماتعرفه احجي بكلبي)
شوفي رند راح تدخلين لبيتنا مالج علاقه بأي احد تكعدين بغرفتج وتسكتين باجر اجهزلج غرفه وتكعدين بيها
ومااريد سوالف عوجه مثل سوالف امج لحد مااشوفلج رجال وازوجج اله
خالو شنو هالكلام صح امي خطأت وكان خطأها كبير بس مو معناها تحاسبني ع اخطائها وهيه من شردت من بيتكم اتزوجت بابا ع سنه الله ورسوله مااتزوجته بالحرام
اسكتي مااسمعلج حس ولسانج طويل ع امج ومبين سوالفج عوجه مثلها وراح اتعبيني وياج
ماحجيت شي غلط اني
اسكتي لج احترمي ابويه لا اكطم راسج
عوفها هاكان عوفها دواها عندي
يابه هاي رادلها كتله الصبح وكتله بليل حتى تستعدل
هااااي هاااي شنو اكطم راسج شنو كتله الصبح وكتله العصر شنو كاعده بمجزرة لو وين
وهاكان لزمني من حجابي ويصك ع سنونه ويحجي احترمي الاكبر منج لا اخلي طلقه براسج واخلص الناس من لسانج
اااااي شعري حجابي انزع من هالكد ما جريت بي هاي شبيك
بصياح عوفها هاكان عوفها
هاي رادلها واحد يربيها من جديد
لا بقيت بس انته ال تربيني وتعلمني الصح من الغلط عوف شعري يا حقير
انجبي لج شو تتجاوزين بنت سازان
عوفوها كافي بابا هاكان كافي يمعودين البنيه اول مرة تلتقون بيها وهيج تسوون بيها
كافي هاكان عوفها يله ننزل
بعد هالمحاورة والعرك والسووه بيه اتمنيت ميته ويه امي وخواني ولا هالكلام السمعته منهم وكل شوي ويذكروني بأمي
عدلت شعري ولبست حجابي وغطيت شعري بي ونزلت جابولي الكرسي المتحرك ورفضت احد منهم يساعدني لو يبقون اخر بشر بالكون مااخليهم يساعدوني كوة نزلت من السيارة وكعدت بالكرسي رغم اتوجعت من ضغطت ع رجلي ودموعي بطرف مدمعي بس ماخليتها تنزل واباوع بيتهم كله اشجار داير مداير بيتهم الخضار وحديقه كولش كبيرة وكلها اضويه عبالك نهار مو ليل وبيت طابق ارضي فقط مابي طابق ثاني بس مبين كبير ودخلت بي رغم كبر مساحه البيت بس اثاثه بسيط ومرتب ونظيف وخالي كال لمحمد وديها لعمتي خل تسلم عليها
ووداني لغرفتها مرة كبيرة بالعمر وجهه مثل المكرمش من الكبر وتجاعيد وجهه تبين عمرها بس رغم تجاعيدها حلوة عيونها زرك ولابس زيهم الكردي احمر وبي ورد اخضر وكاعده ع سرير وفراشه مطرز
باجي هاي بنت عمتي سازان
شافتني وابتسمت ومدتلي ايدها كالت تعاي عبالك سازان دخلت عليه تشبهيها هوايه
واتقربتلها وبست ايدها لان شفتها وحسيتها تستحق الاحترام بوستني من راسي ومسدت ع راسي وحسيتها اختنكت وحابسه دموعها وتخاف تخونها دموعها وتنزل
شلونج وشنو اخبارج من بعد امج
مثل ما تشوفين بيبي اسميج بيبي لو شنو
مثل ما تحبين
اسميج بيبي وابتسمتلها
يي سولفيلي شصار بحالج
بيبي من بعد امي وخواني وشفتهم بعد الانفجار انشليت شلل سفلي ودا اتعالج وعلاج طبيعي وعايشه ابيت ابن خال بابا انسان محترم ويخاف عليه وماخلاني اعيش ابيت اهلي وحدي
محمد شعندك واكف يمنا روح صيح امك والبنات خل يسلمن ع بت عمتك ويحضرن العشا
باجي هسه كلها نايمه حروح اجيبلها اكل من المطعم واجي
لا لا مايحتاج مو جوعانه بس تعبانه واريد انام
هسه افرشلج يمي بالغرفه وتبقين يمي تنامين افضل الج
تمام بيبي مثل ماتردين (ارتاحيتلها حسيتها تحبني عكس الباقيين رغم بعدني ما شايفه الباقيين )
فرشتلي ودا انزل من كرسي وحاول محمد يساعدني بس اني رفضت وكوة نزلت بس وكعت طبعا وما حسستهم بوجعي زحفت ع فراش الفرشته بيبي عمه ماما ورحت اتمددت علي
يله محمد اطلع خل البنيه تاخذ راحتها
تصبحون ع خير
وانته من اهل الخير ماما سد وراك الباب
نسيت اسألج ع اسمج
احجي بأبتسامه اسمج رند
عاشت الاسامي ماما اتعودي عليه احجي ويه الشباب والشابات ماما واتعودي ع هذا الشي لان كلهم اني ربيتهم من صغرهم
تعيش ايامج بيبي
يله كومي بدلي شنو تنامين بفستانج
ودا احجي واندك الباب
اتفضل
باجي هاي جنطه رند بقت بسيارتي وجبتها
اجت بوقتها جيبها وسد الباب
جابلي محمد الجنطه وراح وبييي قربتها الي وفتحتها ورجعت كعدت ع سريرها
طلعت تراك اسود وكوة بدلت وساعدتني بيبي بالتبدلين وبقت تسأل ع امي وشلون اتزوجت وشلون جانت علاقتها ابابا وشلون انشلت سوت ويايه تحقيق من هذا التمام وبقينا نسولف لحد مااذن الفجر وكامت بيبي تصلي واني نمت استوني نمت واتصل بيه انمار
بنوتي صباح الخير
منعسه مطفيه وكوة احجي صباح الخير
البارحه مكدرت اتصل بيج جان عدنا هجوم وهسه يله خلص راح اطلع واتوجه لسليمانيه لا تخافين مااعوفج
تماااام
روحي بنوتي انته مطفيه كوة تحجين من اوصل اتصل بيج
كبل نمت حتى ماادري سديت الخط لو لا
وكعدوني ب١١ ع اصواتهم الجهوريه وكلامهم اليسم البدن
يي الخاتون نايمه للضهاري
عوفيها ام هاكان خلي البنيه نايمه شعليج بيها
شحاجيه اني بس ردت اتعرف عليها
من تكعود اتعرفي عليها هسه خل نطلع ونعوفها تنام هالمسكينه
وشبيها مسكينه لتخافين عليها هسه تشوفلها واحد وتشرد بي مثل امها
بصياح وصوت عالي ااااام هاكان احترمي نفسج ولتحجين ع بنيه هيج كلام مو انتي هم عندج بنات وخافي الله بيهن
شحجيت اني وانتي كبيتي عليه
رند من سمعت صيحه بيبي بأم هاكان كبل فتحت عيوني بالرغم اني كعدت من بديت الكلام بس سويت نفسي نايمه شافتني ام هاكان فتحت عيوني
صباح الخير بت سازان
وراحت حتى ماانتظرتني اجاوبها
كومي ماما كومي ماالج دخل بيهم اي احد بهذا البيت يسمعج كلام سوي نفسج ماسمعتي شي
بيبي من البارحه لليوم سمعت انواع المغثه والكلام الجارح
اني وياج لتخافين منهم بس دير بالج منهم وفكري بتصرفاتج قبل ما تسوينها
انشاء الله بيبي
يله خل اكومج حتى تروحين للحمام
لا لا تعبين نفسج وانتي مرة كبيرة بالعمر اني اكوم
لا تخافين عليه اني مثل الحصان اصحى منج ومن كل هذوله العايشين بهذا البيت
كومتني وكعدتني بالكرسي ودتني للحمام ورجعت بدلت لبست دشداشه طويله وحجاب مااريد اسمع حجايه منهم مااريد يسجلون عليه نقطه غلط
وواجت بنيه يطلع عمرها تقريبا ١٥ او١٦ سلمت عليه وجابتلي ريوك وراحت
اتريكت اكلت شويه وعفت الاكل واجني ٣ بنات بعمري واكبر مني سلمن عليه وعرفني عليهن مبينات حبابات ويسولفن ويضحكن ويايه احسن من اهلهن
وصارت ب١٢ راحن هاي كالت تصلي وهاي تسبح وهاي تسوي غدا واجت بيبي للغرفه
ها ماما شلونهن البنات وياج خاف سمعنج حجايه
لا بيبي بالعكس حبابات احسن من اهلهن
ههههه ولج انتي لسان وصريحه ع امج
بيأس الله يرحمها برحمته الواسعه
يله حبيبتي كومي صلي شو ماشفتج الفجر تصلين
يي بيبي مااصلي
ليش ماما مو الصلاه عامود الدين اتوكلي ع ربج وصلي لعد شلون تطلبين حاجتج من رب العالمين وانتي ماتصلين
بيبي اتعاجز من الصلاه مرات اريد واكول بعد مااتركها واتحمس واصلي كم يوم واتركها
شيطانج قوي يالملعونه وضربتني ع راسي بخفه وتضحك
لازم تبدي تصلين واتعوذي من الشيطان من يصير الاذان ابقي اتعوذي من الشيطان واتوضي وصلي وشوفي اذا تركتيها بعد
بس ابقي اتعوذي من الشيطان وانعلي الشيطان قبل كل فرض وانشاء الله خير شوفي شلون راح تحسين براحه نفسيه عظيمه
ماشي بييي راح احاول اسويها
ماما ماكو شي احاول لازم تسوينها انتي مو صغيرة
انطتني بيبي سبحه وبقيت اتعوذ من الشيطان واجني البنات وساعدني من كعدت بالكرسي واتوضيت ورحت كعدني ع الكرسي مال الصلاه مال كبار السن وصليت وسبحت وصح كلام بيبي حسيت براحه نفسيه عظيمه ع كولتها ههههه
وجابولي الغدا دا اتغده واتصل انمار
شلونج بنوتي
الحمدلله وانته
الحمدلله والشكر لله بنوتي اني اباب بيت خالج راح اطبلهم
هلا بيك
عفت الغدا وبقيت كاعده ع نار وكلت لبيبي اجا انمار
شنو انتي تريدين ترجعين وياه
يي بيبي اريد ارجع
ولج شلون تعيشين وياه وانتي البارحه كتيلي عايش وحده منفصل عن زوجته
بيبي هوة يسميني بنوتي ويعتبرني مثل بنته ودائما يكلي انتي طفله يخاف عليه هوايه
تحجي وتضحك يي هاي هيه يسميج بنوتي
شبيج تضحكين بيبي
ماما تبقين هنا وماتروحين الا....
الا شنو
بعدين تعرفين خل اروح اكعد يمهم واشوف انمار ع شنو جاي
________________________________
حجي حسين عفت دوامي واجيت علمود اخذ رند وتكلي مااخليها تروح وياك
شلون تريدها تروح وياك وانته رجال عزابي وعايشين بالبيت وحدكم
اتفهم موقفك بس البنيه ادري بيها ما ترتاح هنا يمكم هناك عايشه ابيتي ومرتاحه وعدها علاج طبيعي ودا تروح للنادي تتعالج بالاسبوع مرتين
ع شنو مرتاحه ع وجودك يمها وانتوا وحدكم شتكول الناس عليه ذاب لحمي عد الغريب
اني مااتواجد بالبيت التحق اسبوعين وارجع للبيت كم يوم ويتصلون بيه وارجع التحق وحتى من ارجع للبيت اكعد كم ساعه واطلع وشفت اكو حارس اباب البيت وكامرات وخدامه ومساعده تساعد رند بكومتها وطلعتها
حجي يفيدك رند ماترجع وياك
السلام عليكم
وعليكم السلام حجيه اعرفج بنفسي الضابط انمار حسين علي
اهلا وسهلا بيك
وبيج اكثر حجيه
حجيه اجيت اخذ رند ويايه والحجي حسين مايقبل تروح ويايه
يي طبعا ما يقبل شلون اتعيش وياك ابيت واحد وما بيناتكم شي يربطكم
فهمت قصدج حجيه واني مفكر بهذا الشي بس كلت يعدي كم شهر وافاتحها بالموضوع ما ردت افاتحها وهيه ماصار لموت اهلها كم شهر رند تتحسس هوايه
احجي وياها بالموضوع واني احجي وياها وانشاء الله تصير من نصيبك
دا نحجي وطب هاكان للصاله
منو هاي التصير من نصيبه
هذا انمار ابن خالها لرند ويريد يخطبها
وليش يعيني ننطيها اله ماعدنا شباب لو خلصوا الشباب حتى ننطيها لرجال منفصل وعنده طفل وبكد ابوها
احترم نفسك لك ترى كاعد ابيتكم مااريد اتجاوز
يي اني اريدك تتجاوز حتى اشكه لحلكك
اذا انته رجال تعال ونشوفك الامهات شتجيب
كافي ماما استهدوا بالرحمن شنو هالكلام احجي شي حجي حسين
كافي هاكان شنو هالكلام وانته انمار كافي شنو كاعدين بميدان العركات لو وين كاعدين
حجي حسين ابنك اتجاوز حدوده وخلوا شي ابالكم رند الي ومتصير لغيري ان قبلتوا او رفضتوا وبنهايه هذا الاسبوع هيه ابيتي وغصبا ما عليكم
طلعت من غرفه بيبي ودا امشي بالممر وسمعت صوت صياح انمار ووكفت يم باب الصاله وسمعت كل الي دار بينهم وكمت ابجي صرت مثل اللعابه ويتعاركون عليها ليش هيج يصير بيه ودا ابجي وطلع انمار من الصاله اباوع عليه بزيه العسكري ومبين علي التعب
رند تعاي خل نطلع برة اريدج بموضوع
وطلعني وكف كرسيي اباب بيت خالي
رند بنوتي ادري بيج سمعتي العركه والكلام الدار بيناتنا كل الي سويته علمودج علمود احميج ويمسح بدموعي بنوتي لا تبجين
مااتوقعت هيج يصير بيه
لتخافين انتي بحمايتي واني انطيتج كلمه مااعوفج لو ع كص ركبتي واسوي المستحيل حتى احميج وهذا الحل الوحيد حتى تكونين يمي وبحمايتي وصدكي وثقي بالله مراح اقصر وياج بأي شي وطلباتج اوامر بس اذا طلبات تضرج ماانفذها
اممممم اوك بس بشرط
ها تتشرطين بنوتي اوك كولي
اذا اتزوجنا ............
تصويت
نشرت هذا البارت لعيون المتابعين الصوتوا للبارت السابق للأسف ما شفت التصويت الاريده
اعتذر لان ماكدرت اوصللكم لهجه الاكراد من يحجون بلهجتنا وكتبت كلامهم بلهجتنا وللعلم هذا البارت اخذت احداثه من رند وكتبته من راسلتني البارحه
مو كلتلكم راسلتني لو ما كتلكم ؟
ادري راح تكولون البارت قصير بس اتمنى تتفهمون موقفي ايدي دا تخدر من كثر الكتابه ودا انشر روايتين بوقت واحد
يُتبع...