بارت 15
#حنة_العيد. و #شهكة_النعناع.
هـوآك أنـته ،
يـذكرني بفـرات ودجـلة يـوميه
مـثل گـلبي ومـثل گـلبك
تـلاگن صـافيه ألـنيه. .
صوت الموسيقى عالي والمعازيم يهنأون والاهل والاقارب يركصون ..
رفعت عيني اجاني صوت " عروستي الحلوة تخبلين طالعة "
سحبت نفس عميق .. امي سحبت ايدي _ حتى تحط الحنة ب ايدي ..
فتحت ايدي امي حطتلي الحنة وشدت ايدي بالوردة الماروني مثل لون بدلتي ....
اصوات الهلاهل ارتفعت ...... عطر الحنة بقى محاوطني ...
اي غيث هذه حنة العرس مو حنة العيد ...
اصوات عالية ممزوجة بين الاغاني والسوالف ...
بهل اثناء دخلت للصالة رسل مرت اكرم اخو غيث هلهلت وسلمت علية وانطتني ظرف باركتلي وطلعت مستعجلة ...
اشرت لدعاء نطيتها الظرف ... وبقت اجواء الحفلة مستمرة للساعه عشرة بالليل ..
خلصت الحفلة صعدت اسبح ..طلعت من الحمام لكيت دعاء ترتب بغرفتي وبهل اثناء سجى صعدت العشا .. كعدنة اتعشينا اني وسجى ودعاء ...
سجى عالكة اغاني وفرحانة وتتمضحك .. ع بالك عرسهه ... وكل شوية سجى تكول لدعاء كرصيهه لسمر حتى يجي نصيبج وتتزوجن بالجملة...
اني اضحك على سوالفها خلصنا العشا اخذت الصينية سجى ونزلت ... دنرتب الغرفة حتى ننام ..
دعاء: لج سمر جنطتي انترست اماناتج ..
سمر: ههههههه اماناتي هههههه والله ضحكتيني بالله انطيني ..
دعاء: ولج الهدايا ترسوا غرفة اسامة وجنطتي انترست ظروف وفلوس ..
سمر: ههههه تعالي خلي نحسب الدخل
دعاء : اي والله خوش دخل اني قررت اتزوج اشو خوش شغلة وانت وكاعدة ينطوج فلوس .
سمر : اوو كعدة السودة
فتحت دعاء الجنطة وبقت تطلع بالفلوس وتحسب ..
واني متمددة ع الجرباية ..
فتحت كل الظروف وبدأت تطلع منهن الفلوس وتجمع الى ان وصلت لواحد من الظروف بس فتحته عاطت ..
فزيت من مكاني واجهل سبب صراخها ..
سمر: شبيج مخبلة فززتيني
دعاء: لج سمر هاااي شنووو
اخذت الظرف وشفت شكو بداخلة ..
ظرف بي طلقة و ورقة ...
لج دعاء يمة شنو هذا لمنو ..
دعاء: مااعرف قلبي ح يوكف تعالي نفتح الورقة نشوف شكو بيهه ..
فتحت الورقة ::::
( احسبي لزفتج من هل لحظة اسؤيهه زفة للنجف لان بحضنج اكتله لزوجج)
يمةةة دعاء لج عزة العزاااني .... الحكيلي شأسؤي لج ح اتخبل فهميني شأسؤي ..
شنو الذنب اللي سؤيتة حتى هيج يصير بيه ؟؟
*****************************************
قبل شهر من زفافي :-
#سمر ...
رجعت للبيت بعد اخر امتحان اليه .. رجعت والحزن ماخذ صفحة كبيرة مني .. خايفة من ردة فعل امي ..
وخايفة من ردة فعل غيث ...
اول موصلت للبيت ..سلمت على امي مردت السلام ..
متوقعه هل شي ..
صعدت لغرفتي غيرت ملابسي ومددت ع سرير .. وبقيت ابجي ..
من التعب صار يومين منايمة ماادري بنفسي نمت ...مكعدت الا ساعه تسعه بالليل ..
كمت فتحت الضوة اباوع لوجهي بالمرايا عيوني وارمة ... نزلت للمطبخ شفت ااسامة دياكل ...وبيدة التليفون ...سلمت عليه ...
حسيته تقيد لوجودي مباشرةً ..صعد لغرفتة ..
فتحت الثلاجة لكيت سلطات وكبة سويت شوربة خضار وجهزت المائدة ... وكعدت اكل .... وافكر شنو اللي ح يصير غمضت عيوووني حيييل .... ياربي تعبت من التفكييررر ...كمت غسلت مواعين ....
طلعت من المطبخ واني ادور على اهلي فتحت غرفة امي وابوية شفت امي نايمة .... بابا ماكو رحت لغرفة بابا او المكتب ... شفت بابا يقرأ سلمت علية وبقيت بالمكتب اكثر من ساعه اسولف وياه .. بعدها طلعت ..صعدت لاخواتي لكيتهم يتفرجون تلفزيون بالصالة اللي بالطابق الثاني .. اريد احجي وياهم واسولف احس غصة بكلبي ... تعبااانة حيييل لدرجة اي شي يبجيني ... عفتهم ورجعت لغرفتي ... ماادري ليش اجاني احساس اليوم اخر يوم بعمري ... فتحت شباك غرفتي وبقيت واكفة مدة طويلة واستذكرت كلشي مر عليه اني وغيث ... والدمع ما توقف .....
سديت الشباك ورجعت كعدت عالكرسي ... والافكار معافتني للحظة ..
بقيت على هل روتين لمدة اسبوع ....
ساعه ١٢ الظهر جنت اغسل بالكراج واندكت الباب ما اليه واهس اشوف العالم ... صحت على ضحى لان جانت بالمطبخ ..
كلتلهه الباب دتندك ..
راحت صحى تفتح الباب ..
اني بقيت بالمطبخ اشوف منو من الشباك ...
رجعت للمطبخ تركض .. وتصيح بصوت خافت
سمر سمر ..
سمر اهل غيث بالباب ..
راحت ركض لغرفة امي تكول لامي ...
اني طلعت سلمت عليهم ...
ام غيث ورسل مرت اكرم ونور اخت غيث ..
دخلتهم للصالة قدمتلهم كهوة ..
امي اجتي سلمت عليهم اني طلعت
اللي فهمته منهم غيث يريد يتقدملي مرة لخ ..
الابتسامة مفترقتني واني احضر المواعين واقطع الفاكهه حتى اقدملهم ..
جهزت الصينية وصحت على ضحى اخذتها قدمتها ..
واني رجلية انشلت على كد مرحت ورجعت بالمطبخ ...بعد ربع ساعه هم طلعوا ..
رحت داارتب المكان شلت الفناجين ومواعين الفاكهه دااوديها للمطبخ .. ما حسيت الا امي سحبتني اخذتني لغرفتها ..
قفلت الباب ... وتقدمت يمي وكالت ....
لج سمر تعبتيني لو ادري هيج خلفة البنات اتعب لا احبل بيج ولا اشيلج ببطني لج سمر كرهتيني بالبنات ...لج افهميني عوفي لغيث انسي لج سمرر هل غيث مو قسمتج افهمي انت ليش مو على مرامي ..
سمر : يوم ما انساه واحبه ... وشتسوون سوا ..
ضربتني امي ..
امي/ سمر اقسم بذات الله لو جبتي طاري غيث على لسانج لو فكرتي بي اسلمج لابوج واكولة من المدرسة تروح تشوف غيث وهو لا خطيبها ولا شي وهو رجال محرم عليها واسولفلة ع الرسائل والكلام الفارغ ومن بعد ابوج اسلمج ل اسامة والله ميرحم بحالج ...
اتأدبي لا وحق الحق اسؤي اللي لحد الان ممسؤيتة ....
طلعت امي من الغرفة ... ماعندي كلام بس الدموع تنزل من عيوني ....
بعد يومين نزلت صادف يوم جمعة بابا صاح سمر تعالي رحت لغرفتة ...
فتح موضوع الزواج ... اتوقعت زواجي من غيث ..
بس طلع الموضوع بعيد كل البعد عن غيث ...
وخيرني بين اثنين ...
الاول علي ابن عمتي اللي اكبر مني بعشر سنوات ولا عندة شهادة ولا شغل عمتي للان تصرف عليه ..
والثاني عماد ابن اخت جيرانة ام ايهاب ...
هنا شعور الصدمة رافقني ... موقف ابد ما احسد عليه ..
وبابا مبين جدي بالموضوع ونطاني اسبوع افكر بي ..
سمر : بابا مااريد اتزوج انت مو ضد زواج البنية قبل لتكمل دراستها .. واني للان مكملت دراستي ...
صح بصوت .. مااريد اكرر كلامي ولقائاتج وي غيث اعرفها امج كالتلي عنها واني رأفت بحالج ودااخيرج المفروض مني اللي يناسبني ويناسب متطلباتي اوافق عليه ولا اخيرج ....
بس مااريد اكسرج وتكولين اهلي ظلموني .. الج اسبوع تفكرين وبعدهه اذا ما اختاريتي اني اختار ..
صعدت لغرفتي قفلت الباب واني اصرخ وابجي ليش يمة ليش هيج كسرتيني والله مااتحمل اللي ديصير ويايه .. ولا داتخيل نفسي زوجة لغير غيث ..
مَر الاسبوع ... اسرع من البرق .. مااختاريت ولا فكرت بواحد منهم .. كل تفكيري بغيث وشلون وضعه ..
وخلصتها بغرفتي والبجي مفاركني ...
اندكت باب غرفتي اخوية مهند .. كال نزلي بابا يريدج ..
نزلت صادف يوم خميس ..
سلمت على بابا .. وكعدت عالكرسي ..
بابا:ها سمر شقررتي
سمر: مقررت ولا اريد اي واحد منهم ..
اللي اريدة انتو تعرفوا ومااتزوج غيرة ..
دفع الميز بابا وتقدم عليه .. ضربني ولاول مرة يضربني .. رفعت نظري عيونة صار دم .. كال حقها امج من تشكيلي تشكي من قباحتج ولسانج الطويل ...
متحملت ابقى بالغرفة واني اسمع هل كلام ..
كمت دااطلع من الغرفة ... صاح بابا وينة هذا اللي ذابحة نفسج عليه اشو ما بين ...
عفته وطلعت رحت لغرفة امي ...
سمر : يوم ادري بكل الخطط الدتسؤيهه واعرف انت مكايلة لبابا على جيت اهل غيث لان انت تكرهيهم .. انت متحبيهم اني شنو ذنبي تخليني تحت مخططاتج ..
شوفي يمة اني ح اوافق على ازبل واحد يتقدملي بس حتى اخلص منكم ..
لان لو اعدائي هم ميتصرفون هيج وياية ...
على هل كلام امي ضربتني ...
امي: شنو انت تخبلتي علينة بسبب هل غيث هو خلك واحد همجي ومتخلف ...
سمر: واللي دتسووا انتو مو همجية وتخلف ؟
اوك يوم سووا اللي يعجبكم واني موافقة على كل شي يبدر منكم ..
مر اسبوعين // امي كعدتني ساعه ٩ الصبح كالت جهزي نفسج اليوم اهل عماد ح يجون يشوفوج ..
كلتلهه وليش عماد مو علي ابن عمتي ..
كالت وهو شنو هل علي لا شغلة ولا عملة ومخلصها سوالف مكسرة وتعبانة ...مو مال بيت ومرأه ..
سمر : ممممم والله زين دتفكرون بمصلحتي
امي : انجبي وكومي بلا لغوة طبعاً نفكر بمصلحتج ..
نزلت تريكت ونظفت البيت اخواتي جانوا بالمحاضرة ..
صعدت سبحت الجو حااار
لبست دشداشة نيلي وبيها ورد ابيض كبار ..
سشورت شعري صارت ساعه ١١ ونص ..بيج قصص عراقيه حقيقيه من واقعنا.روعه الطائي
وصلوا اهل عماااد .....
امي رحبت بيهم اني حظرت الكهوة ودخلت سلمت عليهم ...
اللي عرفته من ام العريس هم ٣ ولد وبنية .. بنتهم متزوجة وعايشة بالسويد ومتجي لاهلها الا كل خمس سنوات .. وبهذه جيتها متفقة وي اخوها لازم يتزوج حتى تكون موجودة بعرسة ... وهي تسولف ..
هند : والله خالة اني متفقة وي عماد كلتله بهل جية لازم تتزوج ..
سمر: اي وبراسي هل زواج
هند :ها حبيبي سمر شنو كلتي
سمر : لا مكلت شي بس داكول الله يحفظكم
هند : فدوة لعينج حياتي ..
اباوعلهه صفح شهل هند العايشة اللحظة المتعرف شكو بكلبي بطرانة ودتسولف ...
اتفقوا .. واني بس جسد يمهم ....اتظاهرت بالقوة و فعلاً جانت اكو قوة بداخلي مااعرف شنو سببها ...
وبعدها بيومين اجه عماد وشافني ..حسيته خوش ولد ..
وحددوا يوم الخطوبة ...
لبست بالخطوبة الفستان اللي لبستة بعرس انور و مكيجت اني .. ولا اليه خلكهم اصلا ردتهم يطفشون ...
دعاء جانت وياية بكل خطوة .. الساعه ١١ بالليل كالت سمر غيث يومية يتصل عليه ويسأل عليج يكول ما منها اي اخبار ...
سمر : انطيني التليفون خلي اخابره ..
خابرتة .. سلمت عليه وحجيت وياه ..
وكلتلة غيث اني بعد ماافيدك انساني اني اليوم خطوبتي الله يوفقك ويوفقني حتى انساك ..
ما سمعت اي جواب منه بس اسمع طوط طوط طوط
سد الخط بوجهي ..
ما حسبت حساب للي ح يصير بس حسيت اللي سؤيته شي الصح لان فعلاً تعبت منه ومن اهلي وماكو شي بعد ينضم وليش اضم عليه اكثر ..
خلي نستسلم للامر الواقع وكافي يتأملني وينتظرني ..
يمكن بعد المكالمة بعشر دقايق .. مسمعت الا الباب تندك بصورة غريبة .. دعاء فزت كالت شكو بس لا اجونة الامريكان ..
سمر: لج يا امريكان دكولي زلزال .. ركضت للشباك رفعت البردة شفت غيث واكف بالباب مالتنه .....
يتبع......