[لامارا]

بارت 18
#حنة_العيد. و #شهكة_النعناع.

كانت هذه واحدة من أعظم و أقسى السنوات التي مرت بي، تعلمت فيها أن لا شيء يبقى، كلّ شيء مؤقت، اللحظات، المشاعر، الأشخاص، الورود. تعلمت أن الحب هو أن تمنح كلَّك، و أن تدعهُ يوجعك. تعلمت أنّ تقبل واقع التعرّض للألم هو أفضل خيار، و أنه من الأسهل أن تبقى هادئاً في عالم يجعل من المستحيل الإحتفاظ بطيبتك.
تعلمت أن الأشياء تأتي على هيئة ثنائيات، على هيئةِ الحياة والموت، الأفراح والأحزان، الملح والسكر، أنا وأنتَ. فهذا سرّ توازن الكون، لقد كانت سنة الألم المُركز ومع هذا كانت لها لذّتها
سمر سمر هاي شصايرة ..
درت وجهي شفتها حنين اخت غيث..
اتقربت عليه بوستني ..
حنين: اووي فدوة للحوامل غير حلوة صايرة بالحمل
سمر: تسلمين عيوني انت الاحلى .بيج قصص عراقيه حقيقيه من واقعنا.روعه الطائي
حنين: شلونج اخبارج تدرين اليوم يلا عرفت اسامة العريس .
سمر: صدك انت شجابج
حنين: غيث جابني.
من كالت اسم غيث گلبي فز من مكانة
سمر: مااقصد اللي جابچ .. اقصد من وين تعرفين بيت ابو علي
حنين: هاا اني صديقة سماح اخت زهراء ..
وهي اللي عزمتني على حنة زهراء ..
سمر : اهاا .
قربت مني حنين وكالت سمر تدرين غيث للان ممتزوج ولايقبل امي تخطبله ..
سمر: اي واني شنو دخلي بهل كلام .
حنين: لا مادخلج بس حبيت اكولچ ترى غيث للان مناسيچ.
سمر : من رخصتج حنين ممجبورة اسمع هل كلام ..
عفتها وطلعت للحمام دموعي وحدها نزلت ..مجرد مذكرت اسمة كدامي .
لزمت بطني اتذكرت وضعي مسحت دموعي وطلعت..
خلصت الحنة رجعنة للبيت ساعة ٨ بالليل ..
تحضيرات العشا .. والاغاني عالية والشباب تارسة الكراج .
صار يوم العرس والهوسة والخبصة التمام ..
امي وخالاتي جهزوا الغدا(( حتى ساعه ٣ ننطلق للقاعة ..))
ساعة ١١ اخواتي يرتبون بالبيت .. ومهند خبصنة بطلباتة ..
ساعه ١٢
خلصنة الغدا والبنات غسلوا المواعين والبنات ساعه ١٢ راحوا للصالون سجى وضحى ودعاء ورغدة ....
اني مبيه اروح وياهم ..
ساعه وحدة ونص صعدت لغرفتي طلعت فستاني زيتوني وبي ذهبي طويل .. لبست حجابي واخذت جنطتي ونزلت ..
خالاتي شافوني يكولون فدووة للبطة شهل جمال.. عكس عماتي من المشكلة اللي صارت لحد الان بس بيناتنا سلام ..
رحت لغرفة امي لكيتها تجهز بنفسها ..
انطلقنا لبيت العروسة اخذناها وطلعنه للقاعه ..
من ساعه ٤ للساعه ٩ اسامة ممبقي احد معازمة .....
خلصت حفلة القاعه زفيناهم للفندق وكل واحد رجع لبيته رجعوا امي وابوية والبنات بسيارة بابا ..
واني ومهند بسيارة مهند ..
مهند بعد منجح من السادس بطلاع الروح
بابا اخذلة سيارة هدية نجاحه...
قدم ع كلية اهلية قسم القانون لان معدلة ٦٢ وهو ادبي وبابا يريدة بهل قسم .. بس هو بالبداية مقبل يكول اني سادس گوة طلعت منه ..
بعد ما طلع من السادس مهند اتغير تغيير جذري صار يلتقي بالبيت ويانة .. ويلبي طلبات اخواتي وطلباتي ..
بالطريق مهند مشغل اغاني والصوت حييل عالي..
وكل شوية اكولة خفف.. الله عليك والله اخاف من تمشي سريع..
يكولي اي عود انت حامل تخافين ع نفسج ويضحك..
سمر: هاي شبيك مهند والله صدك اخاف مو قصة حمل..
بهل اثناء اتصل بابا ويسأل علينة لان اتأخرنة...
سمر: اي بابا ح نوصل.. سحب مهند التليفون من ايدي وجاوب بابا..
مهند : يابه سمر متقبل اسوق بسرعه تخاف على ابنها هههههه عود هي حامل..
سمر: يوو هاي شبيك مهند شنو انعديت المداهر من اسامة.. دنطي التليفون عاد..
رجعنة للبيت اخواتي مشغلين اغاني ويركصون..
سمر : يوووو متعبتوا من الركص مو كافي.. عفتهم وصعدت لغرفتي مرت الايام عادية جداً..بس اني نفسيتي تعبانة ومااحب الهوسة واغلب وقتي بغرفتي
صارت سبعة اسامة سؤينة حفلة وبعدها بيومين عزمونة بيت ابو علي بس ماما وبابا وزهراء واسامة راحوا احنة عندنا امتحانات ودوام ودوخة من هذه التماام..
وبعدها ب اسبوع صادف يوم جمعة احنه عزمنا بيت ابو علي..
ومرت الايام وصارت عطلة الاربعين يوم.. خلصتها دراسة اني واخواتي...ومبيهه شي مهم يذكر يعني روتين عادي..
نهاية شهر الرابع گعدت الصبح عندي نغزات ببطني.. مگدرت اكمل نومتي.. رحت ركض على امي گعدتها ساعه ستة الصبح بابا فز على صوتي گام يركض.. ها بابا شبيچ..
مگدرت اجاوبه.. امي ركضت لغرفتي نزلت جنطتي وجنطة الطفل جهزتها من شهر السادس اني وخالة ام رأفت..
گلت لامي يوم يوم خابري خالة ام رأفت گالت خلي نوصل هسه ساعه ستة ونص تفززين المراه من الصبح..
وصلنة للمستشفى الدكتورة گالت بعد وقت على ولادتچ..روحي اتمشي من تگول هيچ اريد اموتها عالالم اللي عندي لحظة مهدأت انتهيت..
ابچي واتذكر عماد... وينك عماد لو موجود وتشوف حالي وتشوف اللي ديصير بيه..
للساعه عشرة الصبح على نفس الالم حتى صوتي راح مگدرت حتى احچي..
كل هل مدة امشي شوية والالم يعصرني عصر اگعد..
وارجع امشي..
بعدهه مگدرت اتحرك بقيت ابچي واعيط..
شافتني الطبيبة فحصتني گالت يلا تعالي..
لساعه وحدة ونص اني ولدت غمضت من التعب والممرضات يصلون ع نبي.. وصار گدام عيني غيث.. وتذكرت كلام حنين من تگول بعدة للان ممتزوج.. اوووف ياربي هذا شجابة گدامي... حتى بهل وضع غيث گدامي..
طلعوني لغرفة ثانية اجتي خالة ام رأفت الفرحة بعيونها..
بعد ساعتين جابوا الطفل يمي شبعت بچي من شفتة شنو ذنبة هل طفل انولد بلا اب..
خالة تبچي وتنعى وتذكرت عماد.. واني ابچي وياها..
وامي تبچي وتحاول تسكت خالة وتگولهه ميصير تبچون هذه فرحة... وطفل شنو ذنبه بمولدة تبچون..
صارت ساعه سبعة ونص بالليل طلعت من المستشفى خالة گالت تعالي يمي اريد افرح بيچ امي مقبلت وبابا كذلك..
امي: ام رأفت حبيبة انت ابقي يمنة هذا ابن ابنچ ومن حقچ تفرحين بي وتشوفي..
بقت خالة ام رأفت وياية معافتني ولا لحظة..
ومن يبچي علي هي قبلي تگعدلة وتجيبة يمي ارضعه..
كل يومين والثالث يجي واحد من اعمام علي لو زياد لو رأفت..
حييل فرحانيين بعلي...وبنفس الوقت اللي يشيل علوش ويحضنة يتذكر عماد ويبچي..
خلصت عشرين يوم ورجعت لدراستي وخالة موجودة وياية وعدت الايام وصارت الامتحانات وبديت امتحن راحت خالة لبيتها..
بس كل اسبوع تجي تشوفه لعلي..
واهلي طايرين بعلوش ب اعتباره اول طفل بعائلتنا..
انور ورغدة صار ٣ سنوات متزوجين وماكو اطفال..
خلصت امتحانات... علوش بدا يكبر ويناغي وصارت ملامحة تبرز حييل يشبه عماد خصوصاً عيونة ناعسة وبيهم جرة ليجوة..ودورة راسة صار عمرة اربع اشهر،...
استلمت النتيجة ناجحة اني واخواتي..
وبعد شهرين قدمنا عالانسيابية...
معدلي ٦٧ واخواتي معدلاتهم اعلى مني..
طلعت القبولات..
سجى فيزياء وضحى رياضيات بجامعة بغداد..
واني طلع قبولي محافظات..
حييل انقهرت... بابا گال اقدملچ اهلي القسم اللي، تردي..بس، لتنقهرين ولا تهتمي
اني من زمان احلم اصير مدرسة..
قدمت عالتربية الاساسية مسائي،...صار قبولي لغة عربية..
علاوي صار يزحف وطلع اسنان اثنين..
وخالة ام رأفت مگطعت منه ابد..
اليوم نفسة يمر مبي اي احداث جديدة بس من اشوف عيون علاوي مباشرةً ابتسم..
ومن انيمه ويلزم ايدي حييل وعطره اللي ميفارگني..
صار شهر ١٢ وداومنا...وبفترة دوامي امي تنتبه عليه..
انزل الصبح اغيرله ملابسه واحضرله الحليب وانيمة واخلي بغرفة امي واروح..
دائماً رانيا تجيني للدوام معافتني..
هي مرحلة ثانية ادارة واقتصاد..
علاقتي بالبنات والولد محدودة كلش بس بنية شوية قريبة عليه اسمهه موج..هي الوحيدة اللي تعرف قصتي..
خلصت السنة الاولى نفس الروتين..
صار عمر علي سنة بشهر الرابع ٤/٢٦ وسويناله حفلة واجتي خالة ام رأفت..
وبعد انتهاء الحفلة خالة ام رأفت گالت اريد احچي وياچ..
ابد مگدرت احزر، شنو اللي تريدة..
لما رحتلهه للصالة..
گالت سمر انت بمعزة بنتي هندة ومااگدر افرط بيج ابد ولو ماكو علوش يجوز مااتعود عليچ وبسبب علوش وجياتي عليكم عرفتج شنو انت وبصراحة فتحت الموضوع وي زياد وگلتلة مرت اخوك ليش تروح للغريب وابنه يتشتت..
وطلبت منه يتزوجج ويلمچ انت وابنچ...
وهو عندة اثنين بنيات ومرته بعد ما صار عدهه..
وهو وافق...
سمر : شنو خالة شبيچ صدك تحچين...
لا اكيد مااريده لزياد ولاافكر بهل شي
خالة: اذا على اهلچ اني اقنعهم..
لان والله يا بنيتي ليل مع نهار، افكر بعلي ومااريد بعيد عننا..
سمر :لا خالة الله يخليچ شهل كلام وحتى اذا اهلي قبلوا اني مااقبل هو زياد غير اخوية شلون اباوعلة كزوج..
لا الله يخليچ سدي هل موضوع...
خالة : زين عوفي زياد... ليش متجين تگعدين وياية حتى تبقون تحت انضاري.. وهم حقكم ميروح بالبيت وبكل شي..
سمر : خالة لا اريد حقي ولا اريد بيت مااگدر اعيش بهذاك البيت اعذريني..
ورجعت تقنع بيه اعيش وياها وجان ردي ثابت وواحد هو الرفض
......
وامي سألتني شتريد منج ام رأفت.. گلتلهه..تريدني اگعد يمهه
امي : لا عيني شنو هل كلام صح هو ابنهم ومن حقهم بس مو معناها تعيشين وياهم..
لا لا مستحيل..
سمر :اي يوم حتى اني جاوبتها بهل جواب..
ومگلتلهه خالة تريدني اتزوج زياد... معايزة نگ من امي
بعد فترة زهراء، مرت اسامة طلعت حامل وامي طارت من الفرح..
مر على هل خبر الحلو اسبووع بالضبط واجانة خبر حزين وفاة عمو ابو علي..
هنا زهراء انتهت واغمى عليهه المسكينة شعندهم بهل دنيا غير، ابوهم... فتحوا عينهم على ابوهم..
مقصرنة ابد اتجاههم..وگفنه بالفاتحة وفعلاً انكسرت عليه لان چان حريص حييل علينة وحاسبنة بناتة حتى اتذكر، اخر مرة وصلني بيهه ب امتحانات السادس...
بالكلية من داومت هو اتمرض وصار طريح الفراش،..
يا مسكينة يا زهراء فرحتچ ما دامت الله يرحم ابو علي، ويصبركم...
بيتهم ايجار وفاطمة وشهد وزهراء متزوجات وباقي اربع بنات
وحدة منهن موضفة والباقي طالبات...
يعني عيشتهم صعبة ... بيت اعمامهم بالناصرية..
هم الوحيدين هنا ببغداد....
بعد عشر ايام من وفاة ابو علي اجتي ام علي تطلب المساعدة من بابا حتى تاخذ حق زوجها وبناتها من اخوان ابو علي..
تگول عندهم املاك ب اسم جدهم المرحوم..
يعني ورثة ولحد الان ممنطين حصتهم..
اللي فهمته منها عمو ابو علي مچان يقبل يطالب بحقة يگول اخوتي واعرفهم مينطوني حقي.. والظاهر هم چانوا مستضعفي...بين قوسين ماكلين حقة....
بابا اتصل ب اصدقائه وانطى القضية لاحسن محامي بهل خصوص..
واتكفل مصاريف المحامي وكلشي اسامة...
بعدها راحوا للناصرية اسامة وبابا وام علي واثنين من بناتها
راحوا اكثر من مرة
...لمدة ستة اشهر يلا گدروا ياخذون حقهم....
بعد ماقسموا الاملاك حولوهن الهم فلوس... مبلغ زين يگدرون يشترون بي بيت ع گدهم..
اسامة ابد معافهم ولا بابا..
گدروا يلكولهم بيت صغير، بناء حديث..
زهراء طلعت حامل بتوأم...
حملهه چان كلش صعب...الى ان وصلت اول اسبوع بشهر التاسع سوولها عملية قيصرية..
وولدت ولد وبنية يخبلون..
حسن على اسم عمو ابو علي الله يرحمة هي زهراء طلبت هل اسم...
والبنية سموها فرح..
وصلنة لامتحانات نصف السنة بالمرحلة الثانية..
دعاء مرحلة ثالثة هندسة چانت تتصل بية دائماً... وتگول دراستي، صعبة كل شهرين او اكثر يلا اشوفها... بس اتصالاتها مگطعتها مني..
بعد فترة احتفلنة بالسنة الثانية من ميلاد علوش، وبيتنا صار بي روح من ورا علاوي، وحسوني وفروحه..
خصوصاً علاوي خابص البيت خبص..
... چنت نايمة فزيت على صوت علاوي وهو يبچي..حضنته وضحكت شلته سكت فتحت الضوة شفتها ساعه ستة الصبح..
سمر: لك اليوم شعندك گاعد من الصبح.
علاوي: ماما عم
ههههههه حبيبي جوعان ح اسؤيلك حليب شلته ونزلت توجهت للمطبخ سؤيتلة حليب شربة گعدت عالكرسي وعلي عالميز..
واني صافنه بوجهه واتأمل ملامحة..بيج قصص عراقيه حقيقيه من واقعنا.روعه الطائي
شلتة وصعدت لغرفتي حضنته ورا دقايق نام...
عطشت باوعت عالميز مالتي ماكو مي نسيت ممصعدة وياية..
فتحت باب غرفتي داانزل اشرب مي، اسمع صوت احد يبچي،....
ع بالي وحدة من اخواتي وگع گلبي رحت ركض لغرفتهم شفتهم نايمين ابتسمت وحمدت الله ومشيت..
اتقربت من الدرج واسمع صوت مواضح وبچي بغرفة اسامة غرفته قريبة كلش عالدرج..
اووو هذه زهراء تبچي شبيهه..
يا ستار ياربي... خاف خالة ام علي بيهه شي،..
ادگ الباب؟ قربت ايدي دادگ الباب..
واسمع اسامة يگولهه لچ والله معندي شي وياها..
موضفه حالهه حال الموضفات بس معندهه خط هل ايام دااوصلهه
سمر : اووو مشاكل بيناتهم خوفوني ع بالي ماادري، شكو..
نزلت شربت مي گعدت عالميز صارت عيني على سلة الفاكهه اكلت برتقالة وتذكرت علي من يسمي البرتقالة گوول..
ههههه ابتسمت گمت غسلت ايدي وصعدت..
رفعت اللحاف حضنت علوش ونمت..............
غيث ////
من بعد ما اتصلت بية سمرة وگالت اليوم خطوبتي مصدگتها بس من رحت لبيتهم وشفت ابوها وگال ماالك قسمة عندنا..
اهنا اتحولت من السلمية الى الوحش الكاسر وقررت اسؤي شي يكسر فرحتهه وفرحة اللي، باعتني لأجلة وگلت وقررت لو اكتلهه لو اكتل زوجها..
لازم اخرب عليهم لان اهلها قافلين وميرجعون عن قرارهم لو شيصير،...
وفترة قليلة وعرفت زواجها بعد يومين..
دزيت رسل مرت اكرم وگلتلهه روحي لسمر باركيلهه هي موصديقتج وانطيهه هل ظرف مقبلت بالبداية خافت من امي ع بالهه صدگ دادزهه تأدي الواجب ومتعرف شكو بالظرف هي،..
اخذتها لبيت اهل سمر.. وگلتلهه خمس دقايق هوااي بس تسلمين وتجين..
هي طبقت كل اللي گلتة..
بنفس اليوم بالليل اتصلت بيه سمر وحييل جنت مشتاقلهه الحقيرة وحسيت هذه اول خطوة لاخذ بثاري منها..
من سمعت صوتها حسيت نفسي مو گد اللي داسؤي،..
بعد ما سمعتني كلام اول مرة اسمعه منهه وگالت شنو انت ماعندك كرامة انت مو رجال هنا قررت ان انسحب كلياً من حياتها لان مو حلوة بحقي والظاهر هي اللي، باعتني...
بعد سمر متزوجت وشفتها من طلعت بالزفة بس ما حسيتها فرحانة ابد...
مـن جرها لعريس ذيچ المسيه
حسيتـه وحشي وگام شچ رمحه بيه..
چنت واگف بعيد ومنزلت من سيارتي.. حتى مشفت هواي معازيم..
والظاهر اهلها اللي غاصبيهه على هل زواج
لان اني سمره واعرفهه هل تصرف سوته حتى تسكت اهلها..
لفني امدوهنات البال هـين
عله الغصبوه جنون الراس هين
رمح وحشي ابدليلي ايفوت هين
ولا ولفي اويه غيري ايمر عليه...
بعد زواج سمره.. سكنت رسمي يم مصطفى بس اروح اسلم ع اهلي واطلع اهلي مااطيق اعيش وياهم وامي متجوز مني ولا تعوفني بحالي يومية خاطبتلي وحدة..
واني ارفض اكلت گلبي...
بيوم اتصلت بيه حنين حتى اوصلهه لبيت صديقتها عندها حنه..
رحت واني مستعجل اخذتها...
لما نزلت يم باب بيت صديقتها..
رفعت عيني شفت سمره بس مو هي شكلهه متغير بس نفس مشيتها وحاامل ومحجبة شهل تغييرات يا سمر شكد صار مشايفچ ماردتها تشوفني شغلت الاشارة والضوة عالعالي حسيتها انزعجت ورفعت ايدهه على عيونها ومشت لبيت العروسة..
شفتها وياريت ماشفتها...
لابسة وردي ووجها متفح مبينة نستني وعايشة حياتها...
واني باقي ادگ بروحي...
شخطت سيارتي ورحت لسنان هذا اتفه واحد يداوم ويانة وحياتة بس شرب گلتلة سنان شعندك نزلي كلش كاره روحي شربت لحد ماادري شلون وصلت لبيت مصطفى گعدت الصبح راسي يريد ينفجر...
غيرت ملابسي وطلعت لأهلي واني اريد اصرخ اريد ابچي اول مرة هيچ احس،.. اول مشفت امي سلمت عليهه وگلتلهه خطبيلي،...
امي انصدمت وگالت تحجي صدك لو تتشاقى..
گلتلهه موضوع مبي شقة خلص قررت اتزووج..
.....
🌹🌹🌹🌹🌹🌹🌹🌹

يتبع......