[لامارا]

رشفة عشق
الـعـبـاديـــه
البارت_24_

حالُـكِ ضَـيَّـعَ أيَّـامِـي
إن ضَـاعَ العُـمرُ فَهـلْ يَرجِـعْ ؟
أنـــا أسـألُ نَـفــسـي أحـيـانــاً
مَنْ فينا ضَـاعَ ، ومَـنْ ضَـيَّــعْ ؟

~~~~~~~~~~~~~~~~~~~~~~~~~~~~~

حـوراء

مرت فتره وعباس ابد لااتصال ولاسؤال وآني هم مطنشه ومغلسه .

نزلت الصبح لگيت أمي بالمطبخ تركب غدا كعدت يمهه سولفنه شويه وگالت (اريد اروح للسوگ)

اني طفرت مباشرةً گتلهه

- اروح وياچ

- يــا وين تروحين؟؟رايحه اتسوك وارجع الترديه وصيني واجيبلچ

- ماما والله ضايجه اريد اروح

- اووف منج گومي بدلي

- اي رايحه

طفرت مكيفه واريد ابدل صاحتني أمي

- لج حـوراء

- هــاا؟

- خابري رجلچ گليله

- ههههـه لو أموت مااگله

- خاف ميقبل

- القبل والماقبل طزز چـا مايخابر هوَ

- بكيفچ بس آني گتلچ مو تگولين ماگالت

- اي اي

رحت بدلت ادري بيه بهيچ وقت بالمحل وأكيد نعبر على المحل مالته لان صاير بنهاية الفرع ..

لبست فستان للركبه وجواه بنطرون كابوي والفستان لون بصلي وبيه تور ابيض .. ولبست شال بصلي وحطيت مكياج كامل من ايلاينر للحمره البصلي ..

شلت جنطتي البصلي ونزلت شافتني امي گالت

- رايحه لعرس؟؟

- اي

-فوتي خففي مكياجج

- يــااا

- فوووتي

- غير متزوجه قابل مثل قبل اطلع بدون مكياج

- وإذا متزوجه المتزوجه تستهتر دفوتي فوتي لاارجعچ

رديت متذمره ورحت خففته

- اهـووو

نزلت گوه اقتنعت بيه وطلعنا أمي ماتفوتهه سالفه گالت لرائد (وصلنا للسوگ) هوَ هم ماعارض ووصلنا ..

اول ماصعدنا ضللت الجامات بالشبك مال السياره وخزرتني عود ادري بيج ليش سويتي هيچ .

درت وجهي عنهه فشلانه ..

وصلنا للسوگ إفترينا اشتريت شغلات هواي جنت محتاجتهه بسببه جان حابسني مايخليني اطلع للباب .. هسه مثل الطير وحرروه ..

اشتريت كل الاحتاجهن ..
وبقيت اگلب بالحاجات بالمحل ..

شويه وسمعت صوت !!
ركزت بيه هـٰذا صوته !!

يحاچي بابو المحل يگله اريد جمله مااريد مفرد !!

عززا !
امي وين؟؟

بقيت اتلفت اريد اشوف امي ماكو !!
التفتت ادور أمي واجت عيني بعينه !!

مباشرةً رجعت درت وجهي ع السريع ووجهي گام ينث عرگ .

شويه وحسيت بإيد على متني !!

گال
- هـاا مدام انتِ هنا؟؟

غمضت عيوني حيل فشلانه درت وجهي عينه وتظاهرت القوه

- شنـوو؟؟

هز راسه بوعيد وأشرلي بإيده كال

- بسيطه بسيطه

بقيت استهزأ واسوي بحواجبي

- خير شـكووو؟؟

سحب إيدي من المعصم وعصرهه حيل همس بغضب مكتوم

- امششي

بقى يدندن وحده (جايه وحدهه بنت الكلب)

سحبت إيدي منه گتله

- أوگف أمي

همس من بين اسنانه وشرايينه بارزه

- امچ عايفتج وحدج؟

- لحظه هسه تجي عووف

بقى يدور عليهه بعيونه شافهه واشرلهه اجتي وبإيديهه دشاديش وزعت نظراتهه بيني وبينه سلم عليهه وگالهه يلا امشوا

اني گتله

- لا بعدنه محتاجه شغلات مماخذتهن

اشرلي بحواجبه وابتسم ابتسامه غاضبه تخفي براكين ثائره ..

- امششي

أمي اشرتلي وكالت - امشي

مشى لسيارته ونمشي وراه التفتلي كال

- فوتي كدامي

سكتت..//

ومشيت كدامه بهدوء ونظراتي خايفه بس اتظاهر القوه ..

بقى يمشي ورانه وهوَ بس يستغفر ويأفأف اضافه للسب بهمس ..

بقيت أسحل بروحي سحل واحرك رجليه گوه خاف تبين معالم جسمي من وره وهوَ مبين محترگ گلبه من هالسالفه ..

عاط بعصبيه

- تمششيين على بيضضض؟

نززيت وخفت بقيت امشي سريع طفحت بمشيتي ..

سحبني من إيدي

- اشتعلللوووا ابقي ع البطيءء احسسن

أمي بس تباوع بيه بنظرات عود تستاهلين ..

وصلنا للسياره اول ماصعدنا هد على أمي

- خاله بشرفج من طلعتيهه وياج ماشفتي لبسهه؟؟

- يــا شبيه مستور

عاط بصوت عالي وعصبيه

- وين السترررر وييين؟؟؟؟

- عباس شبيك تره الثوب طويل ولاتصيح اني خالتك

- خالتي على عيني وراسي بس من طلعت ماشفتتيههاا هيَ هاي الاماانه؟؟

- ماتعلمني اشوفهه لو لا ..
شفتهه وشفت لبسهه مابي شي بس انتم الزلم تتعقدون تريدون الا عبايه

اني طفرت من يمي

- والله ولاالبس عبايه بعدني صغيره

التفتلي وخزرني بغضضب وعيونه تريد تطلع

- غصباً عليچ تلبسيهه ورجليج فوك راسج

- مالبس

- والله تلبسييين عاجبج مننظررررج يعني اردافج يصعدن وينزلن

- لا والله وشلون امشي مثلاً ؟؟

- استري على روحچ واسكتي

قلـّبت بعيوني بعدم رضا واستغفرت ماعاجبني

وجـه المرايه عليه ويخزر بيه بنظراته آني تجاهلته وبقيت عيني ع الشارع .

وصلنا للبيت قبل لاننزل گال لاامي

- خاله انزلي اريد احچي وياهه شويه وتجي

امي ماراضيه خزرتني وراحت بقيت يمه بالسياره وهوَ يباوع بيه بالمرايه ويأفأف وكلساع يذب حسره ..

گتله بنتر

- وتاليي؟؟

- وسم ومرض

- لاتغلط

إندار عليه بعصبيه سحبني من ياختي وعاط

-هـٰذا فستااان هـٰذذذاااا؟؟؟؟

حاولت اوخر إيديه عن جسمي وادفع بيه

- وخرررر

- عفتج كم يوم إستهترتي للأخيرر موووو؟؟

- مااستهترت ولاشي قابل اجرمت من لبست فستان وطلعت؟

- لا مااجرمتي لج الجريمه اهون من فعلتج هاي

إستهزأت بيه وضحكت قوست حواجبي وضحكت بصوت عالي

- هههههههههـه بس لتحمه

سكتني براشدي طم إذاناتي

خزرته حيل وداخلي يغلللي وأعصابي فاارت

- لك انتَ منو سمحلك تضررربنيي

سحبني من فكي حيل وقربني عليه

- عود تستهزأين بيه وبكلامي هـٰذا احترامج إليي؟؟

دمعتي صبت ودفعت إيده

- وخخررر عني لتحاسبني عل اي شي ماالك حق فهمت

- رجلچ وبكيفي وإلي حق أذا مو آني احاسبج منو يحاسبج؟؟

- عندي أب وأخ

- بس اخذتج من اهلج لاتنسين وإذا بعد طلعتي اكسر رجليچ واملص إذاناتج

عطت بكل صوتي همزين الجامات مقفولات جان انفضحنا

- اني شنـو طفله عندك وتگول هيچ؟؟؟
بنتك آني حتى تگول املص اذاناتچ ؟؟؟

- والله بنتي يمكن عدهه احترام اكثر منج

- شعلليييككك بيههه

- رجلج

- چـا من احاسبك واكول مرتك اشو تكولي مالج حق وانتَ هسه هم مالك حق تحاسبني حياتي وبكيفي آني حرة نفسي وتصرفاتي اطلع منهه

- آني رجاااال اختلف

فقدت اعصابي وبقيت اعيط واشمر بأيديه

- واذااا رجال شنوو الفررق شنووو

- صووووتج لاتعليينه وعلي تريديني اطلع طول واعلمج الاصول شلون تصير

- الحمد لله مربايه واعرف الاصول شنـو

حچى بنبره لاتخلو من السخريه

- هـه مبينه تنگطين اصول

- لك انتَ شبيكككك؟؟؟ اكيد لو تخبلت لو تخبلت

- تحترمين نفسج لاوالله صدگ هسه اجنزچ

- افتح الباب خل انزل

- مو بكيفج

- افتحه اريد انززززززل

- من آني أسمحلچ تنزلين تنزلين مو هسه مفهوووم

- لا مو مفهوم خل انززززل

- اسمعي قبل لاتنزلين خليهه ببالج طلعه خارج البيت ماكوووو وهسه تنزلين مباشرةً تنزعين الفستان هـٰذا وتجيبينه إلي

- ليـش

- حتى اشگگه على راسچ

- لا والله ؟؟

- انزللي انزعي الفستان وجيبي بسررررعه

زفرت نفس بنفاذ صبر

- استغفر الله

نزلت من السياره ..
لگيت اهلي يتغدون سلمت وصعدت مباشرةً بدلت ع السريع وحطيت الفستان بعلاگه وانطيته لرائد

- رائد عباس بالباب اخذله هاي العلاگه

- خدام عندچ

- لا مو خدام بس اخذه

- چـؤؤ

اخذه وراح ..
غسلت وكعدت ع السفره بقيت أتغده وبابا لاحظ خدي گال

- حـوراء شـنو شبيه خدچ؟

حطيت إيدي على خدي اتلمسه

- هــاا؟؟ شبيه؟؟

- أحمر

- ماادري شبيه

- هـاا

بقى يخزر بيه طول ماگاعدين وآني مدنگه اسي وحطيت شعري على خدي بلكي يغطيه .

كمت بسرعه عن الاكل من نظرات بابا استحيت حيل وتفشلت كله من وراه ..

شويه خابرت إيڤان تبچي حالة صفاء متأزمه حيل وواصل مرحله هيَ يوميه امي تخابرهه تنطيهه نصائح وتصبرهه واني هم اخابرهه بس ماتگدر تجينه تخاف تعوف صفاء ..

ركضت لاامي گتلهه على إيڤان كالت اليوم نروحلهه ..

رحت خابرته گلت انطيه علم خاف هم يسويلي سالفه ..

اتصل هواي دكيت مرة اللخ يلا جاوب بصوت نعسان مبين نايم گال

- الـووو..

- راح اروح ويه اهلي لبيت إيڤان صفاء مريض (بنتر)

- وعليكم السلام

- اممم قبل شويه اكلتلي راشدي حلو من إيدك شوكت لحگت اسلم

- من إيدچ

- يلا باي بس حبيت اگلك

- ماتروحين

- شـنوووووو؟؟؟؟

جاوب ببرود

- روحه ماكو

- عباس داگول صفااء مريضضض شلون مااروح اختي محتاجتني

- بكيفي والله

- لا والله اروح ونص وهسه باي

- روحي وشوفي

غلقه بوجهي !!

بقيت أتصل عليه مايجاوب !!

راح اتخبل اتصلت بالعشرين مكالمه يلا جاوب ببرود اعصاب گال

- شكو شتردين

- عباس لتطفر اعصابي

- غير تريدين تروحين؟ لو بيج روحي

- عباس كااافيييي اختتي محتاجتتتنيي

- امم اذا خليتج تروحين شتنطيني

- نعل (حطيت ايدي على حلكي ومتت ضحك)
آآآءءءء أقصد ورده

- سمعتهه ولو تموتين مااخليج تروحين

- عباسس والله طلعت لااراديه يعني هـٰذا سؤال مال شتنطيني

- توسلي بيه بعد

- والله لو تموت بعد مااتوسل وهسه اكول لبابا واروح يلا باي

- اوگفي اوگفي لاتسدينه

نترت
- شتريددد

- يلا روحي خطيه كسرتي خاطري

- لا والله؟؟

- اي والله

- تهي بهي

غلقته منه ورحت نمت واهلي هم ناموا العصر گعدنا كلنا بدلنا ورحنا لاإيڤان إستقبلتنا وقدمتلنا الضيافه بس شنـو شصاير بيهه منتهيه الوجه صاير عظام وعظام المحيطه بعيونهه مبينه وجوه عينها كله سواد ..

أما صفاء بحثاً آخر بلعومه منفوخ ونايم فاقد !!

وإيڤان مكابلته وتبجي وإحنه وياهه حتى بابا دمع حضنهه وضلت تبچي بحضنه

~~~~~~~~~~~~~~~~~~~~~~~~~~~

إيڤان

تأخر الوقت وآني غفيت بعد مادريت بشي !!

حسيت صوت طگطگه يمي وشخص گاعد يمي آني نومي خفيف لان نايمه قلقانه ..

فتحت عيوني اشوف منو هـٰذا ؟؟

باوعت لاإيده شايل بيهه گصيبتي على طولهه ويضحك !!!

گعدت مرعوبه شفته صفاء لازم گصيبتي بإيده ويضحك بوجهي بنظرات مرعبه .!!

عطت بصوت عالي وإبتعدت عنه مكرفصه يصيح وبضحك كال

- كصيتهه كصيتهه هههههـه

يمه متت رعب بقيت ابچي واباوع على شعري إنفتح لان الگصيبه إنكصت وصل لحد اسفل إذني ..

بقيت اصيح بهمس

- اكيد كابووسسس اكيدد جذب هسه اكعد

بقى يقيس بيهه ويضحك .!!

ركضت شغلت الگلوب اريد اتاكد هـٰذا واقع !!

وللاسف طلع واقع !!

بقى يباوع بيهه ويضحك !!
تخبلت آني بقيت ابچي واضرب على وجهي ماهمني اي شي غير صفاء تخبل اكيد !!

ركضت طلعت قرآن وبقيت اردد وياه
بقى يعيط ويصرب على راسه ..وآني ركضت عليه اهدأ بيه ..

دفعني ححيل وإبتعدت عنه خليتهي هدأ يلا تقربت منه ..

خلى راسه على رجليه وضل يبچي وينحب على حالته !!

ركضت حطيت راسه بحضني وبقيت ابجي وياه ..حضني حيل ويهمس

- تعبت إيڤان تعبت سوي كلشي بس خلصيني من هاي الحاله داحس نفسي فاقد وتصرفاتي مو بوعيي

- خل السيد يقره عليك

- كلشي سوي بس خلصيني

بقيت ابچي وهوَ يبچي ..

مسح دموعه ورفع راسه من حضني .. شاف شعري إنصدم !!

فتح عيونه على وسعهن وتلمس شعري گال

- إيڤان وين شعرج؟؟؟

بقيت صافنه بوجهه مستغربه !!
عرفته مايدري بنفسه ماردت ازيدهه عليه كلتله بتوتر ومرتبكه

- هـاا؟؟ گصيته

وگف على طوله اخذ گصيبتي وبقى يشم بيهه ويبچي

- آني كصيته مووو؟؟؟؟

- لا صفاء آني گصيته ضوجني يتعب بالتمشيط

- لج ايڤان لاتغشميني اني الهوى التتنفسينه حافظه ولو يعدمونج ماتكصينه لان معتنيه بيه بس آني الكلب كصيته اي والله ادري بس راح اخلصج مني واني اخلص من نفسي بعد مااتحمل !!!

ركض ع المطبخ سحب من جوه الطباخ دبة النفط وبقى يرش على نفسه !!

تهسترت بقيت ادگ وألطم وابچي واتوسل بيه

- لك صفاااااء امووووت وعلي اموت وراك لتسوي هيچ

- مااتحمللللل عوففينننييييييي

- صفااااء فككككررر بربببككك وبيييههه لتسوي هيچ

ركض يدور على جداحه وآني مچلبه بقميصه وابچي قميصه نشگ بإيدي وأظافيري نبتت بصدره ..
دفعني حيل

وكعت بالگاع وچلبت برجليه وابچي تهسترت ماادري بنفسي ادك والطم وهوَ حالته ازيد مني !!

آخر موقف اتذكره هوَ يفلت برجله من إيديه وجسمي كله على رجله يريد يروح يجيب الجداحه ..!!

بعد ماحسيت على نفسي ..

..

كعدت هلكانه وابجي وهوَ يم راسي يرش عليه مـي ..

اول ماشفته إرتميت بحضنه وبقيت اعاتب بيه

- لـيش هيچ لـيش مو وعدتني نبقى سويه لما نموت ونحارب إثنينه تريدني اموت وراك؟؟

- مليت وآنتِ مليتي مني

- ماامل منك ماامل إنتَ النفس الاتنفسه اكو واخد يعيش بدون نفس

دنك راسه ويبجي

- صفاء روحك مو ملكك ولاملكي هاي الروح امانة ربك انطاهه الك وانتَ صغير وگالك راعيها وإنتَ المفروض تخافظ ع الامانه وترجعهه سالمه لربك بكيفه هوَ يحدد شوكت ياخذهه مو إنتَ تحدد !!

- آني إلمن عايش حياتي صارت عباره عن فلم رعب حتى هسه من اسولفهه لواحد مايصدگهه

- آني اصدگهه وإنتَ ومو ضروري احد يصدگها لان محد عايش المرينا بيه فهمت

تكى راسه يم راسي بتعب وزفر بانفاسه بثقل سحبني لحضنه وبقى يمسد على راسي بهدوء لما حسيت انفاسه ثقلت وغفى ..

خليته ينام شويه وكعدته يسبح ملابسه كلهه ريحة نفط ..

گمت نظفت الشقه وكل نفط وبانزين فرغته بالسنگ بس شـنو الريحه گبت بالبيت كله بقيت اعطر واسوي بخورات اليوم كله كضيته بس تنظيم وتعطير ..

قررنا نروح للسيد يقره عليه بلكي يصير زين ..

خابر صديقه عنده سياره وسئله على إسم سيد كاله على سيد اسمه فارس بسوگ الشيوخ .. اخذ رقمه واتصل بيه اخذله خيره اول شي كالله( مشرب سحر وعندك دوسه واثنينهن گايمات عليك ناهياتك !! )

باوعتله ونصى لان كتله وماسمع كلامي .

إتفقوا يرحون ويعالجه بعزيمه ردت اروح وياه ماقبل كال شعندج بين الزلم ..

ثاني يوم گعدته بالـ5 الفجر بدل ملابسه وتعطر وباسني براسي ونظراته كلهه يأس بس آني بادلته بإبتسامه ونظرة أمل لان ثقتي برب العالمين كلش قويه ..

إجاه صديقه وطلع ..

قفلت الباب عليه ورجعت نمت بس عيني مااخذت نوم منتظره شوكت يجي ..

الساعه بالـ10 دخل
ركضت عليه جان كله ريحة دخان وبخورات !

تعبان ووجهه مُرهق سألته گال

- اول ماقره عليه حسيت بسمار وطلع من اصبع رجلي الچبير وبعدين بقيت اتقيأ گال تقيئت السحر والدوسه عالجهه وچواني بين اصابيع رجليه حسيت نفسي مرتاح

بجيت وضليت اتشكر رحت توضيت وصليت صلاة الشكر الف الحمد لله ربي ..

مرت فتره وصار زين ورجع لطبيعته الحمد لله يوميه اتشكر من رب العالمين ودزينه للسيد ذبيحه لسلامته ..

ورجعت حياتنه طبيعيه

...

اشو فتره وكام بس يكح وصوته مبحوح ومن يبلع اللگمه گوه ويشرب وراهه مـي !!

الشغل بطل من عنده ومن سألته على تقديمي طلع مامقدم !!

اول ماتزوجه قدموا الاسماء الي يطلعن بالتعيين وبوقتهه كال قدمت إسمج هسه من سألته كال اريد بس اخلص من لسانج وماقدمت !!

بوقتهه تخبلت ليش هيج صديقاتي كلهن تعينن !!

عايشين على الحصاله مالته ولابد بيوم تخلص ..

اليوم لحيت عليه وكتله اطلع لشغلك رفض

- صفاء اطلع للشغل شلون نعيش؟

- إيڤان تعباان

- چـؤؤ استغفر الله

- بس ارتاح فتره واطلع

- هوَ من تطلع تريح عن نفسك وترتاح

- لا ماارتاح

- صفاء لخاطري روح للشغل

صفن بيه وإبتسم .. رغم كل هـٰذا بس اگله لخاطري يصفن بيه وبعدهه يبتسم ويحقق الاريده وهـٰذا اكثر شي يريحني ..

- اووف رايح تعرفين نقطة ضعفي شنـو

إبتسمتله ورحت حضرت ملابسه علما سبح وكمل إجه بدل وضفت لمساتي إله حتى شعره آني مشطته اله وطلع للشغل ..

بقيت انظف وطبخت الاكل وخابرت أمي لان مشتاقتلهم حيييل صح تخابرني وعلى تواصل مستمر ويومي بس يبقى اللقاء احسن ..

..

رجع صفاء من الشغل رحت حضرتله ملابس بيت وحضرت الاكل وشغلة المـي الحار بطلتهه النوب هم يلطشه بوجهي صح هسه تعافى بس صارت عندي كسره ..

كعدت كدامه وبقيت اكل وهوَ ياكل ويبتسملي شويه وسعل وبقى يكح غاص بالاكل ..

ركضت جبتله كلاص مـي وطبطبت على ظهره

- شبيك صفاء

- ماگدر ابلع اللگمه

- يــاا شبيك

- ماادري

بقيت اضرب على ظهره بخفه لما شويه اندفع الاكل. .

إستمرت هاي الحاله يوميه يسعل. مايكدر يبلع !!

شرب كبسول التهابات بس مافاد !!

اليوم كعدت الصبح وهوَ نايم يمي اول ماكعدت صفنت بوجهه وضحكت فز هوَ ضحك وكرصني بخدي

- شبيج تضحكين

- وجهك يخليني افرح وابتسم واطير واخلق بالسما

عضني بخدي وبقى يداعبني

- صفاء شلعته

- اويليي خل اشلعه مو خد ولكم قمر يلالي

- اووي لاتحسدني

- لج مااتحمل دلعج

- هههههـه

لاحظت بلعومه مورم !!
حطيت إيدي على بلعومه وسألته

- شبيه بلعومك؟؟

حط إيده على بلعومه وتلمسه لكاه مورم عكد حواجبه مستغرب وكال

- ماادري

- يـاا صفاء روح للمستشفى خاف اكو شي

- اي هوَ مقرر اليوم اروح اشوف شنـو صار فتره هيج لاابلع ولااتنفس براحه وبس اسعل

- هسه احضرلك ريوك وروح

- يلا

حضرتله ريوگ وحضرت ملابسه ودعته وراح للمستفى ..

بقى تقريباً 4 ساعات والقلق ياكل بيه !!

اول مارجع ركضت عليه سألته وجهه مايتفسر وبس معصب وينتر

- شبيك

- سم ومرض اليمرضني واليسمني

- يـاا !!
صفاء شبيك الصراحه ؟؟

- إيڤان وخري عني تره روحي طافره وعلي

- صفاء شبيك بس طمني بكلمتين

- شبيه يعني شبيه هوَ من مرض لمرص من سم لسم

- هسه غير تكول شكو؟

- تضخم بالغده الدرقيه

- عزززززاااا

يتبع ..

عـبـرات الـعـبـادي🌻🌼

اليوم تاخرت لان طولتلكم البارت وضفت 100 كلمه 😘💜

ضيفو ضيفو ضيفو 😁

اختي ايوته 😹😹
Aya_Alabadi

بس يصعد حسابهه تنشرلكم قصصها