"""كبرت وفات ويوم وراح يوم وصار عمري ١٨ وهنا لازم اقرر ويه منو اروح وابقى عايشه عد اهل بابا لو ابقى
عد ماما اني اصلا جنت بدون حجي ماما
لان مجانت تقبل تكول الي على سوالفهم تكول
انتي صغيره ميصير تتعلمين الحقد بس اني
من جنت اروح الهم وماما تروح وياي متقبل اروح وحدي جنت اشوف تعاملهم ويه ماما شلون جان يختلف وشلون جانو يكرهوها
ويحتقرونها وجانت تتحمل علمودي لحد منرجع للبيت لبغداد
فأكيد وبارادتي اختاريت ماما بوكتها تخبلو
وضاجو ومقبلو وكالو للقاضي انو أمها جابرتها
تحجي هيج واحنه منخلي بتنة تتربى عد الغريب
احنه شيوخ ومنقبل بهذا الشي وخاف
أمها تروح تقصر عليها بشي وبعد اووووو كومة حجي حجي كالو
عاد اني كلت للقاضي انو اني وافقت بكامل إرادتي وبدون غصب او جبر احد وبكامل قناعتي واني بلغت السن القانوني محد يكدر يجبرني على شي تخبلو همة شلون هيج تحجين وبالإضافة الا اني جنت ممحجبه
حتى ماما جانت بس من تروح ويايه لبيت جدو تذب الشال على راسها
بس تخلي على راسها
كالوله شوف شوف تربيتها شلونها حتى معلمتها الانحراف
ما معلمتها عالدين ماكو حجاب
رد القاضي كال الحجاب ما اله دخل بالانحراف اولا هو قناعه للمراه
وثانيا شي حضاري وثقافي فيبقى بكيف البنيه هذا الشي
ضلو يجادلون والقاضي انزعج كاللهم
تره انهي القضية وارفع بيكم للسجن
على هذا تعاملكم شلون تريدون البنيه تعيش عدكم لعد
كتله سيدي بالإضافة تره اني اكمل دراستي لا همة
عدهم هذا الشي ميصير وميقبلون بي
فاني عادي تره اكمل واخذ شهادتي
كال من حقج هذا الشي
اباوع عليهم كلهم يخوزرون بيه وضايجين من عندي
عاد انتهت الجلسه واني موافقه على انو أعيش ويه ماما
ولازم أضل على شرطهم انو
كل فتره لازم اروح عدهم وازورهم
من طلعنه جدو ابو بابا مرضى عليه وكام يغلط وكام يحجي عليه
كال عود هاي انتي بت العزيز مرديت عليه
ولا حاجيته خلينه وطلعنه
رغم هذا ماما كالتله تفضل عمو غداكم يمي
كللها ما اريدج ولا اريد غداج خفيتي وبليتي
مجاوبته خلينه وصعدنة بالسياره
ماما الي تسوق وعدها سياره
اني كمت أتدرب بالجديد
وصلنه للبيت وماما فرحانه كلش
وبيت جدو كيفو وبوسوني
ماما جان عدها خوان اثنين واخت وحده يعني همة اربعه
جدو كال على هاي المناسبه نطلع نتعشى بالمطعم
طلعنه احنة كولنه وخوالي وبيت خالتي
تعشينيه بالمطعم خوالي جانو كل واحد بيت وحد
بس بصف بيت جدو جان بيت جدو بالكراده
عاد مرت الأيام واني اروح كل فتره لبيت جدو كوة
لان همة جانو يخابروني يكولون جدج وحبوبتج
همة يكولوها هاي الكلمة يعني بيبي يريدون
يشوفونج ومن جانو يتمرضون هم اروح
ومن صير عدهم مناسبة لازم اروح بالقوة والإجبار
من ماما اروح تكول علمود ليحجون عليج
من جنت اروح جنة بليل ننجمع بالديوان عدهم عمامي
واهاليتهم وعماتي واهاليتهن
اسمعهم يكولون كل واحد وحدة بت اخونه احمد النه
ما تطلع للغريب وجانو ولد عمي يباوعولي
واحد من ولد عمي جان يصيحيلي الشكرة
ما ارد عليه .
جانو متكبرة ومغرورة عادي شيكولون خلي يكولون
ميهموني وأكثر من مرة يفتحون ويايه موضوع
الحجاب واترك لبس البنطرون واني اجاوبهم
بالرفض كيفي وكت ميعجبني عود البسه اما
بالنسبه للبنطرون هذا الشي راجع اليه
انوب تعلمت سياقه وأخذت اجازه سوق تخبلو وولد عمي
كامو يحجون عليه شلون تجين لبيتنه ولعدنه تسوقين سياره
وبيهم يجون لبغداد يأخذوني واني ما اقبل
ومن اروح يوكفولي بمكان بعيد عن القريه
علمود يأخذوني للبيت واني ما اقبل واعاند ما اروح وياهم
وضل اسوق لحد ما اوصل للبيت
جانت ماما دائما تروح ويايه ابد متعوفني وحدي اروح
لان الطريق طويل من بغداد للجنوب من اتعب هيه تسوق بدالي لحد ما ارتاح جنه اني وياها مثل الصديقات مو بنت وامها
هيه تاخذ رايي واني هم كذلك بكلشيت حتى طلعاتنه سوه
بيوم جنه كاعدين دك التلفون مالتي باوعت رقم عمي
فتحت خط بعد السلام كال
حبوبتج مريضة ومو زينه وتكول خلي زمرد تجي
اريد اشوفها خاف اموت كتله انشالله عمو
هاليومين انشالله اجي
رد بساع كال لا تتأخرين باجر من الصبح اطلعي
من بغداد وتعاي تعجبت هاي اول مره يكول الا اليوم
من اكوللهم هالاسبوع عادي ميعارضون بعدين كلت خاف
بيبي صدك مواته وعلمود هذا الشي
بعدين رد كال امج هم تجي وياج
كتله اَي اكيد كال هله بيها يله باجر ننتضرج
عود تعاي كتله انشالله سديته منه وسولفت
لماما كالت عود باجر نروح
ثاني يوم طلعنه من الصبح جان ماما بالطريق تكول
شو ابد ممرتاحة وأحس كلبي يوجعني
كتلها اسم الله عليج ماما حبيبتي
تريدين نرجع كالت لا كملي
لا يكومون يحجون
|