[لامارا]

//// البارت العاشر ////
عجـاف_القلـوب ..
الكاتبـة_شمـس ..

بعض الأحيان تتوهم أنك وصلت إلى طريق مسدود ,,
لا تعد أدراجك !
دق الباب بيدك ,,
لعل الذي خلف الباب أصم لا يسمع ,,
دق الباب مره أخرى !
لعل حامل المفتاح ذهب إلى السوق ولم يعد بعد ,,
دق الباب مره ثالثه ومره عاشره !
ثم حاول أن تدفعه برفق ,,
كل باب مغلق لابد أن ينفتح (اصبر ولا تيأس)

عندما تشعر أنك أوشكت على الضياع إبحث عن نفسك !
سوف تكتشف أنك موجود ,,
وأنه من المستحيل أن تضيع وفي قلبك إيــمانٌ بالله ,،
وفي رأسك عقل يحاول أن يجعل من الفشل نجاحاً ومن الهزيمة نصراً ,,

ياقوت .. لا خية اني اصلا عندي اثاث بس استقر اجيبه
مرت حمزة .. ها يعني تشوفين مكان غير هذا وترحين موووو؟؟
صفنت بوجهة وماعرفت شأحجي ؟؟

ام يوسف .. شتحجين انتي فاطمة .. ياقوت اذا متشيلها الگاع انشيلها ع راسنا ..
واشرتلها واخذتها ..

درة .. ماما هذي خاله تگلي اذا وسختوا اموتكم ..
ياقوت ميخالف ماما ..
حيدر .. يمة احنه معدان .. شو عبودي يگول علينا معدان ووسخين راح توسخون بيتنا ..
امير .. لاتضوج ولك ولاتبجي انت رجال .. الي يگلك هيج جنك ماسمعت وغلس ..
لاتصير مثل النسوان تنقهر ..

ضحكت وگعدتهم داير مدايري ..
شوفوا ماما .. هاي منطقه جديدة علينا وناسها ماتعرفنا خليكم دوووم نضيفين وحلوين ومؤدبين حتى ميگولون عليكم معدان ..
لاتتعاركون عيب وخاصه انت حيدر ..
اريدكم تدرسون وتنجحون وطلعون اشطر الجهال ..

علي .. بس احنه وين راح ندرس ماعدنا مدرسة ..
ياقوت .. اووووف خلونا نستقر واني احجي وي الشيخ .
دخلت ام يوسف ..
-لاتشيلين هم عمي الشيخ گال الابو يوسف ..
يشوفلهم مدرسة الجهال هي مختلطة ولد وبنات بس كلش زينة بالعروبة ..
منطقه راقيه وحلوة ..
بس بقت تشوفين معارفج هناك حتى يكملون اوراقهم
ويدزوهن ..
انتي عندج مستمسكاتهم مووو .
-اي عندي بالجنط ..

عاينت على جهالي وگالت. ياقوت لاتاخذين على خاطرج من فاطمة هي هيج طبعها ..
ولاتوصلين للحجية لو عمي ..
ياقوت .. لا خية مااوصل هي هم حقها بيتها واثاثها واحنه اجينه وگعدنا بي ..

ام يوسف .. عيني ام امير كلنا گاعدين بحلال الشيخ مو حلال واحد ..
وانت بنت اخته وحلاله حلالج ..
لاتصيرين ضعيفه ترى الناس تستغل الضعيف ..

ياقوت .. جا خية قابل اتكاون اني هنا اريد اعيش واعيش جهالي ..
حتى گلت اشوف الشيخ يشوفلي شغله خو مااگعد هيج بلا شغل ..

ام يوسف .. شنو هذا الحجي ام امير اذا سمع الحجي يتخبل ..
ماعدنا مرة تشتغل هنا ..
رجالنا مسؤوله علينا ..
وانتي بعد منا وبينا ..
ويله خلينا نكمل شغلنا بسرعه الايام هواي ونسولف ..

نضفنا وكملنا وولدي وياي ويوسف هم يساعدنا ..
وسدن ودرة يلعبن يمنا ..
درة ارتاحت وي سدن بنت مرزا . هي صحيح ✔ اكبر منها بس حبتها ..
لان درة تتمنى عندها اخت تلعب وياها ومن شافت التوأم خافت تگول مقسومات بنص ..
ضحكتنا اني وام يوسف ..
سدن .. لا درة هذني توأم يتشابهن ..
درة .. وهم اسمهن يتشابه ..
سدن .. لا وحدة اسمها حوراء ووحدة زينب ..
درة .. جا شلون اعرف منو حوراء ومنو زينب ..
سدن .. وحدة عندها شامة بخدها ووحدة ماعندها ..
درة .. هااااا خلي اروح اشوفهن زين ..
سدن .. يله تعاي هههههه ..

يوسف .. ماما واخيرا سدن اندمجت وي احد ..
ام يوسف .. اي عندي سدن مو اجتماعية مثل يوسف
ياقوت .. خطية خاف لان وحدها وماعندكم بنات بعمرها
ام يوسف .. لا حوراء وزينب مو ذاك الفرق بينهم يمكن بگد درة لو اصغر ..
بالاول ابتدائي ..
وسدن بالرابع .. يعني فرق ثلاث سنوات بس شويه فاطمة صعبة بتربيتها ماتخليهم يلعبون او يوسخون او يختلطون محافظة حيل ..
ياقوت .. ياخية اذا مالطفل يلعب ويشوف بصغرة واذا وسخ المن نريد الادين ..
المهم اشوفهم يلعبون ومرتاحين ..
ام يوسف .. بعد كل شخص وتفكيرة ..

يله خلينا نروح البيتنا الشيخ والولد على جية خلي نحظر الغدا ..
دخلت البيت ..
ام مرزا .. هايمة البيت عجبج ..
ياقوت .. اي حجية عجبني ..
ام حمزا .. ولج يمة احنه هم مثل امهاتج گولي يمة لو خاله بكيفج بس مو حجية كبرتينا بساع بساع ..

ام مرزا .. ههههههه الله ينطيج الصحة دية شوكت تگولين كبرت ..
ام حمزة .. يادية بعدنا صغار جيف الجهال كبرت وتزوجت وكبرونا وياهم ..
ام مرزا .. اي غير لمن خشوا بالعمرين يله زوجناهم لو متزوجين من وكت جان هسا ولدهم بطولهم ..

صافنه على سوالفهن وضحكهن شلون متصافيات الله يخليهن ..
دخل الشيخ والولد گالوا السلام عليكم ..

طفرت من مكاني ..
الشيخ .. بوية لاتستحين اني هم ابوج وذوله اخوتج ..
نزع عباته وعگاله وگال ..
هاج بنيتي اخذيهن علگيهن بالغرفه البنات ملتهيات بالمطبخ ..
اخذتهن منه .. ورحت وديتهن اعاين على كنتورة منظم وغراضة مصفطه والعگل انواع والعبي الوان ..
اخذتلي صفنه عليهن اول مرة اشوف هيج رجال مرتب
حتى السبح معلگات ..

فزيت من صوت امير ..
يمة شعندج هنا ..
-جدك انطاني ملابسة اضمهن ..
-هاااا جان انطيتيهن الام يوسف ..
-شبيك يمة ماتشوفهن ملتهيات يله اطلعنا ..

امير .. جنت اسوي بايسكل يوسف بالطارمة لأن اني اعرف اصلح كلشي من اشتغلت وي ابو احمد ..
ودخلت وسمعت مرت خالي حمزة تحجي على امي ..
تگلها يجي بالخلاف يركب ع الجتاف ..
شوفيها شلون لوگيه اخذت ملابس عمي تدخلهن للغرفه

ام يوسف .. ولج حرام عليج ترى المرة فقيرة ..
ام حمزة .. خوفج من الفقيرة .. اول ماسمعت عن خالها وشيخ اجت تركض بيها ريحة فلوس ..
ام يوسف .. اشش ابنها اجة ..
مرت حمزة .. دضلي هيج لمن تاخذ رجلج . فوگاها حمرة بيضه وعيون زرگ ..
گلبي لاعب منها ..

امير .. ضجت من سمعتهن يحجن على اني واذا گلتلها تضوج ومااريد شي ينكد عليها فرحتها وراحتها ..
احسها ارتاحت من اجت لهنا ..
بس لازم اخلي عيني عليها مااعرف شني يسوولها واني مو يمها ..

ياقوت .. الشيخ فاتحني بموضوع الدوام مال جهالي ..
وانطيته رقم ابو احمد وخابرة واتفق وياه وگاله على الاثاث يدزة ..
ماقبل الشيخ وگاله مانريدة عدها بيت مأثث ..
بس اني ماقبلت ..
وگتله خلي يدزة الي بي ريحة امي وابوي ..
فالشيخ اتفق وياه يدزله سيارة حمل ينقل بيهن الغراض
بس ابو احمد گاله اذا من الفجر او بالليل احسن
لأن قاسم يحوم بالمنطقه وكم مرة جاي ومتعارك وياهم يريد يعرف مكانة ..
بس ابو احمد گاله هي ودعتنا وراحت بس ماندري وين ماقبلت تگول ..

حجيت وي ام احمد وسألتها على عمتي ..
گالت ماشافتها من يوم الرحتوا ..
بالي يمها ومااعرف اخبارها ..

مرت الايام والشيخ نقل جهالي وتكفل بكلشي ..
واجة الاثاث مالتي وگال راح نوديه بالمزرعه لأن هنا ماكو مكان ..
وماقبل اخليه بالمشتمل ..
گال تبقين گاعدة بي ومايتغير ..

جهالي فرحانين بالمدرسة ..
ودرة مكيفه لان وي سدن ..
ويوسف وامير متوسطتهم قريبة عليهم والله يسلمة مراعيهم ومايخلي شي يأذيهم ..
نفس جدة وابوه بطيبتهم وشخصيتهم ..

بيوم جان الشيخ عندة عزيمة ..
وصارت بسرعه وحايرين منو يطبخ ..
تحزمت وگتله بوية خطارك خطاري اني ..
الشيخ .. تدبريها
ياقوت .. افة عليك بوية جربني وشوف ..
طبخت اربع طليان ..
جان حمزة يذبحهن ويصلخهن واني اگطع واطبخ ..
وبديت اطبخ التمن ..
والبنات جوة يسون المرگ والزلاطات ..
اجت مرت حمزة وشافتنا اني وحمزة نشيل بالتمن ونبزل بي ..
تسودنت ..
-حمزة ماكو غيرك يساعدها شو من الصبح يمها لسا .
حمزة .. منا وادم صوتج مااهيسة يله جوة ..
نتر عليها ودخلها ..
وجان امير ويوسف يمنا ..
بس هي ضاجت ..
گتله هاهي خوية مااحتاج شي بعد انت روح اسبح وبدل
حمزة .. يوسف وامير ابقوا يمها لايگب البريمز عليها
راح وشويه واجت فاطمة ..

-باعي ياقوت اني ساكته الخاطر الشيخ والله اذا شفتج تصيحين رجلي يساعدج العب بيج لعب ..
اعرف عينج بالعالي وشفتي الفلوس بس الا رجلي فاهمة ..

تأشر بأديها عليه واني مستغربه منها ..
راح يوسف صاح امة ..
بس امير مااتحمل ..
-شوفي خاله عن كلشي اسكت بس عن اهانة امي مااسكت ..
لاعبالج ميتين ع الفلوس ..
ترى اگدر اشتغل وين ماجان واعيش امي واخوتي ..
امي مو من هاي السوالف لو تريد تتزوج اتزوجت ماناقصها شي بس هي تفكر بينا واني كبرت واگدر احميها واسندها ..
واذا ع المال فهي ماطالبه من واحد وسمعتي الشيخ گال الها حق عندة من امها يعني مامادة ايدها الواحد

هي سكتت ومافكت حلگها خافت الشيخ يسمع وام يوسف سحبتها ودخلتها ..
واني بقيت عيني على ابني ..
فدوة الگلبك يمة .. كبرت وتدافعلي ..

ياقوت .. يمة مو هيج عيب .. اعذرها ماتعرفني بعدهي
امير .. يمة رحمة الاهلج شلون ترضين تتهمج وتحجي عليج انتي مو مجدية عندهم ..
واذا جاي تشتغلين فمساعدة منج ..
ترى مو عبالج ماملاحظ شلون ذابين كلشي عليج من خبز وطبخ ..
بس لأن ادري بيج ماترتاحين اذا ماتشتغلين هالساكت

ياقوت .. كافي عيب لايسمعك واحد ..
امير .. ساكت يمة لأن مابيدي شي وعافني وراح جن زعل لو ضاج ..

امير .. مايهون عليه اشوف امي تتعب ومحد يقد تعبها
بمرور الايام شفت بيت الشيخ مايفرغ من المضايف والعزايم ..
وبكل عزيمة صاحوا ياقوت ..
ومحد يساعدها ..
اشوفها شلون تلزم ضهرها ..
الشيخ مالت الله مايقبل ويلعب جوله اذا شافها وحدها
بس امي مو من النوع التشكي وتگول تعبت .
وام يوسف ومرت خالي حمزة مو مال طبخ ثگيل جانوا قبل يجيبون طباخ يطبخلهم ..

رحت وفاتحت الشيخ بموضوع الشغل ..
وطلبت يشوفلي شغله ..
-ليش وليدي اكو شي ناقصكم ..
محتاجين شي الي يهمني تدرس انت ويوسف وترفعون راسنا ..
امير .. لاتخاف علية جدي اني اگدر ادرس واشتغل بس اني اريد اصرف على امي مني ..
الشيخ .. ليش مو اني انطيكم مصرف .
امير .. وماتقصر .. بس مااعرف احجي وجهين واجذب ..
اني من اشوف امي تتعب انقهر .
امي هواي تعبت بحياتها واريدها ترتاح

الشيخ . وشنو المتعبها هسا .
امير .. امي واعرفها يجدي .. هي اتعب روحها بروحها
ماتريد تبقى مديونة ..
انت تنطيها مصرفنا وتصرف علينا .. وهي تريد ترد جميلك بطبخها وشغلها بالعزايم ..
لاتزعل يجدي اني اعتبرك شيخي وجبيري بس هاي امي وجنتي ومايهون عليه اشوفها هيج ..
وهي فقيرة وماتحجي ولاتگول لا ..

صفن بيه الشيخ ووجهة مايتفسر ..
حسيته ضاج من حجي وجرئتي ..
اضن نسيت روحي وتماديت ..
صاح بصوت ..
مرزااااااا حمزةةةةة
اجوا للبراني .. ها شيخ خيرك ..

الشيخ .. ولكم اني طلعت مااشوف والشيخة ماتلوگلي
مرزا .. حاشاك بويه خير ..
الشيخ .. شايفين هذا الزلمة ..
عاينوا عليه واني صافن ..
اي هذا شبيكم ..
جنت امنيتي يصير عندي ولد هيج حسجة وحجاي ..
وحتى انتو مو مثلة ..
اعتمدتوا عليه ووحتى بقراراتكم وراي ماشيين ..
بس هذا الولد عجبني ..
حسسني الاول مرة بحياتي اني ظالم وماعرفت اتصرف
ولكم اني غلطت بحق ياقوت وماداري بروحي لمن نبهني هالولد ..
عاين عليه وگال ..
منا ورايح انت ويوسف اريدكم وياي بالدواوين
مرزا .. ودوامهم بويه
الشيخ .. بيوم الجمع من نجتمع يرحون ويانا اريد زلم اعتمد عليها توگف وياي ..

اتبسمت وماصدگت الشيخ ماضاج مني وفوگاها جازاني وراح يدخلني وياه مضايف ودواوين ..
بحياتي ماشايفهن ولاطالع بمضيف وجمعة زلم ..
بس الوكت والدنيا علمتني اشكال ..

امي من سمعت فرحت وگالت اول مرة احس برفعة راس ..
حيدر وعلي يردون يرحون وضاجوا ..
وگلتلهم من تكبرون اخذكم وياي ..

كل جمعه جنا نروح وي الشيخ ونلبس دشاديش ..
الى ان كملنا مدارس ونجحنا ..
وصرنا العطله كلها نطلع ونمشي وي الشيخ بكل مكان حتى خارج المحافظات ..
وامي منعها تطبخ وگالهم ياقوت حالها من حالجن هنا
لا تعاملنها جنها تشتغل عندجن تراجن عايشات بنص خيرها ..

هذا الحجي خلى قيمة الامي ..
الي حبتها الناس كلها واولهم الحجية ام مرزا الي استغنت عن الكل وماتشور بس امي ..
صحيح ماخلت حياتها من المشاكل ومن مرت خالي حمزة الي جانت تتهمها وتغار على رجلها منها ..
رغم خوالي اثنينهم يحسبوها بحسبة اختهم ومايگلولها الا خوية ..
وهذا الشي ضوجها اكثر ..
بس الحمد لله اكو من جان يردها ومايخلي امي تتأذى لو تسمع حجي ..
لجن امي اعرفها شلون تكبت بگلبها وماتطلع حرگتها الاحد ..

مرت السنين وكبرنا بسرعة ماجنت متصور يجي هاليوم واشوف نفسي شخص گدر يوگف على حيله ويشتغل ومايحتاز الاحد ..
مايحتاج لا ابو ولا عم المافكروا حتى يعرفون اذا جنا عايشين لو ميتين ..
بس بيبتي امي مرات تخابر خالة ام احمد وتسأل عليها وگالتلها الحجيه عمتج صحتها بالنازل ..
وكم مرة رحت شفتها وطاردتها مرت عمي وبعد ماراحت

الشيخ جان مثالي الاعلى ..
رباني وعلمنـى سوالف الدواوين والفنجان والدله ..
وصرت بكل مكان يروح اني وياه ..
وماقصرت لابدراستي ولا بشغلي..
لأن الشيخ من بعد مارفصت اخذ فلوس منه مصرف النا .. من حصة امي سوالي ورشة تصليح سيارات
وبيع قطع الغيار وجنت اشتغل وجانوا يصيحولي المهندس ..
لأن محد يوگع على علة السيارة غيري ..
وافصخها تفصيخ وارجعها اجدد من قبل ..
جان طموحي يصير عندي شركة لو ورشة كبيرة ومعرض للسيارات ..
وحتى اخواني علمتهم ع الشغله ..
بس مااثگل عليهم لأن يدرسون ..
اني ويوسف صرنا اكثر من الاخوة ..
جان الشيخ يعتمد علينا بكلشي ..
ويگول انتو واحد يمنتي وواحد يسرتي ..
وماتفارگنا ابد ..
الا بالجامعه ..
اني رحت هندسة ..
وهو جان طموحة قانون ..
لسـا اتذكر من نجحنا من السادس ..
شلون سوالنا الشيخ حفله سد الشارع سد بيها وجاب مطرب وذبح ذبايح ..
ويگلهم هاي فرحـة احفادي الكبار ..
مافرقني بيوم عن يوسف وعبودي .. بس عبودي علاقتي بي موشي ..
ومايختلط ويانا ..
وعندة نوع من الغيرة ..
ومرات يگول المعدان صارت بروسنا وكبرت ..
جان اگدر اوگفه عند حدة ..
بس الخاطر الشيخ وخوالي اسكت لأن زنين وياي ويحترمونـي ..

درة .. يمة وين امير مااجة ..
ياقوت .. لا مااجة بالورشة شتردين منه ..
درة .. مو وعدني ياخذني للسوگ نشتري ملابس جدد سدن اشترت وحوراء وزينب اشتروا بس اني ..

ياقوت .. اي يمة على بالة .. جا ماطلعتي وي سدن وخالتج ام يوسف واشتريتوا ..
درة .. مااطلع الا وي اموري حتى انزل وهو يدفع وعدني وگال من تصيرين بالاعداية ..
انتي اخذي الي ترديه واني ادفع ..

علي .. يابه واني عليه القرطاسية كلها مالتج بعد شتردين ..
درة .. يمة فدوة العلاوي .. وگرصت خدودة ..
علي .. بطلي ولج كبرنا وانتي بعدة عقلج صغير ..
درة .. اذا مااتدلل عليكم عليمن اتدلل ..
ضحك حيدر وگال .. حقج يابة تدللي كم اميرة عدنا هي وحدة ..

امي ضحكت وگالت الله يحفظكم ويخليكم دوم گلب على گلب ..
للعصر .. اجة اموري من الشغل ..
شافني متخوصرة بالباب ..
ضحك وگال ..
مانسي بعلي واصلا اني اريد اشتري ملابس هاي اخر سنة ولازم ارتب خلصت الجامعه واني مامحصل وحدة
درة .. اممممم عساس ماادري گلبك منو بي ..
خزرني وضحك .. اسكتي لاتفضحينا كافي ..

طلع حيدر من الغرفه يمشط ..
هلا بأموري الغالي .. مشتاقلك اخوي ..
امير .. هههههه لازم عندك شغله ..
حيدر .. حالي من حال درة هم اخيك اني وشاب واريد مصرف ..
امير .. انت لمن تدخل الجامعه يله يحقلك تتطلب .
هو علي بالجامعه مايطلب بگدك ..
اطلع اشتغل وياي وانطيك يوميتك ..
حيدر .. زين امشي وياكم اشيل العلاليگ واشتريلي كم قميص وياك ..
امير .. ههههه اي اذا اتحملت فرت درة بالسوگ وشلتلها العلاليگ الي تريدة اخذة وعلى حسابي ..

ياقوت .. هههههههه ولكم جا انتو والليل اذا تطلعون وي درة ماتدرون بيها اختيارها صعب وتفر السوگ كله يله ..
حيدر .. ادري والله بس شنسوي نتحمل ست درة حتى نحصل على غايتنا هههههه ..
درة .. ها هيج صارت موووو جا اذا راح حيدر اني مااروح
طفر من مكانه وحضني ويبوس بيه ويگلي اتشاقه وياج ليش كم جوهرة عدنا اقصد درة ويضحك ..

الحمد لله الي عوضني بهيج اخوة ..
من اني صغيرة لحد ماكبرت .. مايخلون الهوا يطخ شعرة مني ..
مدلليني دلال ..
جانت امي تنطيهم مصرف يرحون يشترولي بي ويجون من المدرسه كل واحد مشتريلي شغله ..
اما امير فهذا ابوي مو اخوي ..
حتى تعامله وياي مثل الاصدقاء ..
كلشي يصير اسولفله ومتعودين احنه ع الصراحة من صغرنا ..

للعصر طلعنا گال اشوف يوسف ياخذنا بسيارة خالي مرزا ..
من سمعت اسم يوسف ماعرفت شأحجي ..
صحيح ✔ احنه تربينا سويه بس من صغري استحي منه وماعندي اختلاط بي ..
رغم هو دوووم عدنا ويسهر وي الولد ..
بس امير مايقبل اگعد يمهم ..
ويگلي روحي للغرفه لو تاخذني امي ونروح البيت الشيخ يم سدن ..
علاقتي بيها اكثر من اخت ..
ابد ماتحسسني بشي ..
بعكس بنات خالو حمزة ..
دايما ينتقضن مني ..
بسبب مرت خالو حمزة ..
جانت دوووم تتعارك وي امي وتغار على خالوا منها ..
بس بيبياتي مايسكتن ويردنها ..
اما خاله ام يوسف فتخبل وتموت عليه ..

طلعنا العصر للسوگ ..
صعدت السيارة ويانا سدن اجت لأن اريد اخذ رئيها بالاختيار ..
گلت السلام عليكم ..
باوع عليه بالمراية وگال ..
شلونج درة .. كبرانة وصرتي بالاعدادية ..
اخجل احجي وياه ..
ابتسمت ابتسامة خفيفه ..
واختفت من شفت امير ..
سدن حاسة عليه وتگرص بيه ..
ماادري الشخص الوحيد من اشوفه احس حرارة تصعد بجسمي ..
خجل واعجاب ..
او يمكن لأن يذكرني بأمير ..
حبي الامير خلاني احب يوسف واحترمة ..
مشاعر عندي مخربطة ومو واضحة ..
بس جنت اعتبرة مثل اخوية ومرات اگله خوية ..
بس هو يضحك ويگلي ..
ترى اني مااكل شبيج تخافين مني ..
جان خالو حمزة دايما يگول يوسف الحوراء مو يگولون اخطب البنتك ولا تخطب الابنك ..
فيگول امير ويوسف البناتي ..
بس خاله فاطمة تضوج وماتريد امير ..
رغم اعرف مشاعر امير وين متجهة ..

بس سدن ثولة وماتحس بي هههههه ..
من وصلنا للسوگ خبلناهم ع گد ماافترينا ..
وامير حبيبي ماخلاني بعازة شي ..
ويوسف يگله انت شورطتني وجبتني وياك ويضحكون علينا ..
تالي گال امشوا نروح نشتري لفات نگعد بالكورنيش ..
قليل مانطلع جنا فرحنا وماصدگنا ..
وحيدر خبلنا شيطان كل الي يشوفها يگول هاي الي ..
جانت عينة زايغه ..

گاعد نتمشى اني وسدن يم الشط والولد ورانا ..
اجو اثنين ولد ..
مروا من يمنا ..
اكو واحد ذب حجايه عليه وگال عيون لو خرز زرگ .
محد سمع بس يوسف ..
اجة يمي وعيونه تجدح نار ..
-شگالج هذا ..
-ماسمعت ..
-احجي شگال ..
سكتت وخفت احجي ..
ركض وراه وسحله وبيومها تعاركوا وكبرت السالفه ..
واجت النجدة واخذتهم كلهم ..
اني وسدن تخبلنا ..
يوسف وامير گالوا الابو النجدة ..
ويانا بنات ع الاقل خلي واحد من عدنا يوصلهن ..
بس هذا عاند ..
ويوسف وامير اتخبلوا ..
حيدر گاله اني الضربتهم مو همة ويوسف يگله لا اني وامير يگله اني مو همة ..
تالي صاح بيهم ابو النجدة وگال اليوسف اخذهن انت وامشي وعود جيب واحد من اهلك للمركز يلمهم مناك ..
ماقبل يوسف يعوف اخواني ..
بس امير غمزلة وگال اخذ البنات وروح منا بسرعه ..
اخذنا يوسف وطول الطريق متخبل ويضرب ع الستيرن ..

بقيت الوم بروحي لان نزلتهم للسوگ والحيت عليهم
هسا شأگول الامي واذا سمع الشيخ شيگول ..

وصلنا ونزل يوسف گال ادخلن للبيت گدامي واني رايح للشيخ ..
دخلنا خايفين ومانعرف شنحجي ..
ياقوت .. ها يمة اجيتن ششتريتن شو اديجن فارغات ..
ام مرزا ..
ولجن شمالجن تخورستن احجن الولد وين صايرلهم شي
ياقوت .. يمة ولدي ولج وين اخوتج احجي ..
سدن .. اخذتهم النجدة !!
ام مرزا .. ليش ..
سولفت سدن كلشي .. وامي تخبلت وتبجي ..
فاطمة .. عليمن تبجين كلة من ورى بنتج .. بنيه عيونها زرگ وماخذة الولد وتفتر بيها شتردين محد يباوعلها وشمدريهم ذوله اخوتها ..
ام يوسف .. شبيج فاطمة غير سدن وياها قابل وحدها راحت واخوتهن يمهن شبيها اذا طلعوا .
فاطمة .. لابيها شي .. الصوج بأمها مخليتها بكيفها ومدللتها هسا اني بناتي مااخليهن يطلعن للباب انتي مدري شلون مأمنة البنتج وياها ..
بس هي هاي التربية بلا ابو ..
بقت تحجي وتهين وامي فقيرة ماتحجي ولاتدافع تستحي ..
مااتحملت .. وگلتلها كافي خاله اني صح ماعندي ابو بس عندي ام واخوان ربوني احسن تربية ..
نزلن دموعي وبجيت ..
عفتهن وگمت صاحت امي وراي گلتلها رايحة البيتنا ..
طلعت من البيت والدنيا غروب ..
انفتحت الباب وانضربت بشخص ..
واني مدنگة ..
لزمني .. شبيج منو وياج ..
رفعت راسي هذا يوسف .. ارتبكت مسحت دموعي ..
-ماكو شي ..
-شو باعي عليه ارفعي راسج يحجي بعصبيه ..
وداعتج مايبقون ساعه وحدة ..
اجيبهم وارجعهم الج لاتبجين ..
دخل حاجة امي واخذ جناسيهم وراح ..
من ساعتها واني احس گلبي بدأ يدگ الة ..
بس كانت مشاعر خفية ..
مايعرف بيها بس گلبي حتى عقلي خافية عنه هالمشاعر خفت يتضارب وي عقلي ويرفضه ..
جنت متأكدة انه يوسف حلم بالنسبة الي ..
هو ابن شيوخ ..
واني بنت حاكم الشمرنا اني واخواني وامي ومن غير مايسأل علينا ..
اسمنا هربانين ومانعرف مصيرنا شنو اذا بيوم عمامي وابوي لگونا ..

گاعدة بالبيت وحدي ضايجة على اخواني وابجي ..
دخلت امي تركض ..
گومي بسرعه حضري غراضنا ..
درة .. شكو يمة ..
ياقوت .. الشيخ گال نروح للمزرعه ..
درة .. ليش ؟؟
ياقوت .. ماادري گال لمي غراضج واخذي الولد ورحوا لهناك ..
اجو اخواني حضنتهم وابجي هاي اول مرة يبتعدون عني مااتحملت اتخيل بعدهم عني ..
امير گال مااروح الاي مكان رجعي الهدوم ..
دخل الشيخ ووراه خوالي ويوسف ..
-امير يبعد ابوي .. انت وليدي وادريك زلمة وماتخاف من تهديد شويه مزعطة وعربنجيه ..
بس اني الي اخاف عليك وگلبي ياذيني اذا صابكم شي ..
وهذا يوسف هم راح يمشي وياكم ..
يله تزهبوا بسرعه واطلعوا بسواد الليل ..
وبين ماتهدأ الامور اجيبكم..
وبعد ماامي توسلت وبسوته يله وافق لأن امير مايحب يرضخ الواحد ..
اخذنا ملابسنا وطلعنا للمزرعه ..
وجانت عيوني على يوسف ماادري ليش فرحت لأن راح ويانا ..
رغم كل الي صار وبعدنا عن بيت الشيخ والدوامات قربت بس مدام احبابي وياي جان الامر هين بالنسبه الي ..
رغم صعوبته على امير ويوسف الي اخذوا الطريق كله متعصبين ويتوعدون ..
في هذه المرحلة ابتدأت مشاعري بالضهور رغم رفض عقلي لهـا .. الا ان هناك مشاعر لايمكن رفضها وإخفائها مهما حاولنا جاهدين ..



بقلمـي_الكاتبـة_شمس
يتبع……..