[لامارا]

//// البارت الحادي عشر ////
عجـاف_القلـوب ..
الكاتبـة_شمـس ..

عندما تشعر أنك أوشكت على الضياع إبحث عن نفسك ..
مـدخـــل ..
لا تنظر إلى الأوراق التي تغير لونها
وبهتت حروفها وتاهت سطورها بين الألم والوحشه
سوف تكتشف أن هذه السطور ليست أجمل ما كتبت
وأن هذه الأوراق ليست آخر ما سطرت ..
فهناك شيئ جميل مخبئ بين كل هذه الحروف ..
سيأتـي يوما ويبدأ بالضهـور !!

وصلنا للمزرعـة جانت ضلمـة ..
نزلنا والولد گاموا ينزلون الغراض وتسوگوا من الطريق مسواگ للبيت..

نزلت واتمشى قريب عليهم ..
اباوع على البيت والمزرعة ..
مرة عن مرة تصير احلى واحلى ..
اتذكر من نجي واحنه صغار وجنة كلنا نلعب سويه هنا ..
اني واخوانـي ويوسف وسدن وعبودي والتوأم ..
وحتى بنات خالتي منال ونضال واقبال ..
جنة مانفكر بس باللعب ..
وامهاتنا يخبزن ويطبخن وخوالي يشوون سمج ..
حياتنا كلش حلوة ..
بس هسـا كبرنا وتغيرت اهواي اشياء ..
فزيت من صفنتي على حضنت امير الي وگال شبيها الحلوة صافنه ..

ابتسمت اله وگتله ..
اموري تتذكر من جنة صغار ونجي نلعب هنا شگد حلوة ..
اسمع صوت يوسف ورانا ..
اي وشگد جنتي تشبعين وگعات وكل شويه متعورة ومهبطتنا عليج ..

حيدر .. يابوي شلون مخليتنا بأنذار وكل ساعه وگال امير ديروا بالكم على درة ..
لاتوگع درة ..

يوسف .. هههههه وكبرت درة وماخلصنا ..
باوعتله بحزن حسيتة اتراجع وگال اتشاقه ترى ..
ضجت وگلتلهم داخله ..
اكيد يلوم بيه لأن هسا همة هنا بسببي ..
دخلت صاحت امي ..
درة يمة تعاي ساعدني نسوي عشة ..

دخلت مرت ابو محمد الفلاح ..
هي ورجله وولدها بانين بنص المزرعه .. حتى يحميها من احنه ماهمة ..
الشيخ سامحلهم .. حتى يخلون بالهم ع المزرعه ويداروها ..

ام محمد .. شلونج خية ام امير ..
ياقوت .. هلا خية انتي شلونج ..
ام محمد .. والله ماصدگت من شفت السيارة واگفه بالباب صار فترة طويله مااجيتوا ..
ياقوت .. اي والله الولد ضايجين وگلنا نجي كم يوم هنا قبل مايبدي الدوام ..
ام محمد .. توها المزرعه نورت .. اي شي تحتاجيه دزي عليه اساعدج ..
والبيت اني كل يوم انضفه وامسحه مابي شي ..
تردين اطبخلج العشة ..
ياقوت .. ينطيج العافية خية .. اني ودرة هسا نسويه
ام محمد .. شلونج خاله درة كبرانة وصايرة مرة وحليانة اكثر صلوات على النبي ..

ابتسمت ..
شكرا خاله ..

ام محمد .. يله اني اروح ومثل ماگتلج اي شي تحتاجيه گولي ..
وها صدگ العصر خبزت خبز حار هسا ادزلكم وادري بي مو مثل خبزتج الطيبه ..
ياقوت .. يا على بختج خية كله نعمة الله وخبزج مايتخير عن خبزي هم اطيب بعد ..

دخلوا الولد يضحكون من برى وشكلهم ماضايجين ومشلعين من المزرعة شوية مخضر وفاكهة…
جا شمالي اني ضايجة والوم بروحي ..

امير .. هاج درة اغسليهن للعشا وعود الصبح نشلع اكثر هسا مانشوف زين ..

دخلوا لجوة واني وامي گعدنا نسوي العشا ..
كملنا وصحت حيدر ..
هاك السفرة افرشها الكم جوة ..

راح ورجع .. گال امير يگول كل احنه ناكل سويه مثل مامتعودين ويوسف مو غريب عنا ..

ضجت اني مامتعودة اكل يم احد ..
گلتلها يمة يصير اكل لفه هنا وحدي .

ياقوت .. ولج يمة تدرين بأخوج يحب اللمة ومايقبل كلمن ياكل بوحدة الا اذا جنة ببيت الشيخ ..

گعدنا نتعشة..
وصار يوسف گبالي ..
مالة الله هو ابد مارفع عينة وجان ياكل ويسولف وي الولد عادي ..
بس مااعرف ليش اني استحي واخجل منة الهاي الدرجة
بينما من جنة صغار حتى نتعارك ونلعب سويه ..
مااعرف ليش هيج تغيرت من كبرنا ..

ياقوت .. شبيج يمة ماتاكلين بيج شي شو احسج مالج خلگ ..

امير .. درة شبيج حبيبتي شي يوجعج ..
حيدر .. شبيها الاميرة بس اكيد حاسة بتأنيب الضمير ههههه ..
علي .. مو كلشي ضحك حيدر ولاتضوجها بحجيك هذا ..
امير .. حبيبتي اذا صدگ مثل ماگال حيدر مااريدج تضوجين انتي مالج ذنب اذا همة عار وماعندهم غيرة
والي يرشن بمي نرشة بتيزاب بعلـي ..

يوسف .. يابة عليمن تضوج اصلا تونسنا ولعبنا اكشجن صارلنا ماصارفين هيج طاقة يمكن من جنة صغار ..

وبداو يسولفون شلون شبعوهم كتل وشلون بالمركز يهددون لأن الضابط طلعهم ..
وگلبوا السالفه الضحك وخلوني اضحك وياهم ..

اباوعلهم واضحك ربي مايحرمنـي منهم ومن لمتهم ..
من اني صغيرة وهمة هيج اذا شافوني ضايجة يحلولون بكل الطرق يضحكوني ..
دللوني بس بحكمة. وعقل ..
جانوا ينصحوني ويرشدوني اذا خطأت بس بطريقه الخوف والحرص ..
مو التنبيه والتقليل من شأني ..

ياقوت .. الله يحفظكم يمة. ويستر عليكم ونبقون عيج گلب على گلب ..
امير .. امين يمة امين ..

كملنا عشة وشلت الماعين اغسلهن ..
والولد كلمن شال شغله وكملنا بسرعه ..

همة طلعوا الدومنه يلعبون ..
واني وامي دخلنا للغرفه نرتب ملابسنا ..

كملنا وگعدنا ع الجرباية ..
احسها اخذت حسرة واستغفرت الله ..
وجانت مخليه سبحتها وتسبح ..

درة .. يمة شبيج شو اشوفج ضايجة ..
ياقوت .. مابيه يمة بس بالي يم بيبيتج .. خالتج ام احمد تگول حالتها موشي زينة وخايفه عليها ..
ولج يمة صار شگد ماشيفتها وگلبي يطفطف عليها..
واخاف تروح واني بعيدة عنها .
من طلعنا من الولاية جانت توصي وتگلي لاتنسيني خليني اشوفج قبل لااموت ..
واني الله شاهد عليه اذا ناسيتها ..
بالي وفكري يمها دووم ..

درة .. يمة احنه ليش طلعنا من الولاية وعفنا بيبيتي وابوي واهلنا هناك ..
اني اتذكر اشياء .. واعرف ابوي وعمي ومرته جانوا مايحبونه بس مااعرف سبب طلعتنا شني ..

ياقوت .. اووووف يمة شلج بهالسؤال ..
خلي الدفاتر القديمة مسدودة لاتفتحيها وتهيجين جروحي ..
درة .. يمة اني مو صغيرة وكبرت ومن حقي اعرف عمامي شسوو حتى شردتينا منهم بسواد الليل ..

ياقوت .. بعدج طريه يمة وماتتحملين السوالف ..
يجي يوم اسولفلج كلشي اي جا غير انتي بنتي ووحدتي بس هسا ييمة بعدج طريه وهستوج شبيتي ..
مااريد اعكر خلگج بهاي السوالف ..

امير .. منو الي مگر خلگة وشبيها درة اليوم ماعاجبتني
درة .. لا حبيبي مابيه بس امي مشتاقه البيبيتي خطيه مريضه ..
وجبناها سوالف على قبل وماقبلت تسولفلي تخاف على خلگي يتعكر ليش اني مو كبرت وصرت افتهم ليش تعاملوني وجني صغيرة بعدني ..

امير .. ومنو گال صغيرة بس حبيبتي انسي الماضي ..
حتى ماتفكرين وتضوجين ..
واني مثل امي هم مااريد درتنا تتعكر ..
گرصني من خدودي ..

درة .. لاامير مو كبرت ..
امير .. ولج لو تصيرين 100 سنة عمرج بنضري تبقين المدللة مالتنا والدلوعة ..

باوع الامي واخذ حسرة وگالها لاتضوجين يم امير خلي تخلص هالشدة واني بيدي اخذج تشوفينها ..
كبرنا بعد ومانخاف من شي ..
والمفروض هم الي يخافون مو احنه ..
لأن عدنا حق عندهم ولارم ناخذة ..

ياقوت .. لايمة انت لاتروح اني امشي الوحدي اخاف عليك ..
امير .. افه عليج ياام امير .. لسة ماعرفتي ابنج شني ..
اذا همة جانوا ثعالب وبمكرهم شردونا ..
فآني هسـا ذيـب واعلم ع الناس مايعلمون عليـة ..
ياقوت .. الله يحرسك وليدي ويحفظك الي ..

درة .. امي وامير يسولفون وجان امير ذكي ومايحجي بالصريح كلامة كله الغاز اعرفة مايريدني اعرف شي لااضوج وانقهر ..
بس شوكت يفهمون اني كبرت من حقي اعرف ابوي وعمامي شسوو ..
ادري بأبوي ظالم وجان يضرب امي وطردنا وجاب مرة للبيت ..
بس هواي اشياء ذاكرتي نستها وصارت هوامش ..
اريد اعرف حتى ماافكر بأبوي ..
من اشوف خالوا مرزا وخالوا حمزة من يعاملون سدن والتوأم مااضوج ..
ولاانقهر لأن اني بعيدة عن ابوي ..
ادري بيهم ماقصروا عني ويعاملوني مثل بناتهم وامير هو ابوي مو اخوي واخواني والنعم منهم ..
بس ليس للاب وحنانه ..
اعرف محد يفهمني بس من حقي اعرف ليش انهزمنا وليش محد يعرف مكانه ..
يمكن ابوي لو يعرف مكانه جان حن گلبه علينا واجة شافنا ..
كل هذي التساؤلات مرن عليه بلحظة ..

گعدت الصبح على اصوات اخواني ..
گمت رتبت فراشي ورحت للمطبخ ..
-صباح الخير يمة
-هلا يمة هسا احنه الظهر
-صدگ جا ليش ماگعدتيني ..
-ماعندي شي بنيتي سويت ريوگ للولد ..
وهالتشوفيهم طلعوا من الصبح للگاع وفرحانين ..

درة .. اي سمعتهم همة اذا اجو لهنا ينسون ارواحتهم ..
دخل امير ..
ياهلا بأميرتنا واخيرا گعدتي ..
-ههههههه هلا بيك اموري لو ماصوتكم هم مااگعد ..
امير .. هنا جنه من صدگ .. تدرين يمة شأريد ..
ياقوت .. شنو يمة
امير ..
اريد ابني بيت بحصتنا مال گاع شتگولين ونگعد هنا ..
ياقوت .. جا اني امنيتي يمة بس انتو ومدارسكم شلون ومحلك شلون ..
امير .. عود منا الذاك الوكت اشتري سيارة وهاي الديوانية مو بعيدة ..
شنريد نروح ..
درة .. وشلون اني اتعودت هناك وسدن شلون افارگهة ..
اتقرب مني وهمسلي ..
اذا على سدن عود اجيبنها الج هنا بعد شنو حجتج ..
ياقوت .. شتسوي تجيبها يمة ..
درة .. هاااا يمة مو ابنج الظاهر مخلي عينة ع سدن ويريد يجيلها جنه الج ..
ياقوت .. يايمة ومنو يگول ينطوها لاتفاشلني وي بيت الشيخ ..
امير .. وشناقصني يمة وافشلج اني .. شهادتي والسنة اخذها وعندي ورشة وان شاء الله اطور شغلي وحتى معرض افتح والشيخ يحبني هو وخالي مرزا ويردون خاطري بعد ليش ماينطون ..
ياقوت .. يمة البنيه صغيرة وانت ناسي خالك حمزة جان يصيح سدن العبودي وابن عمها اولى بيها ..
امير .. يمة بربج صغيرتيش .. السنة الجاي تدخل جامعه
وانتي تقارنين عبودي بيه ..
عبدالله درساته ماممكملها ومخلصها رسوب .. وحتى مستقبل ماعندة ..
ياقوت .. والله يمة ماادري دسد السالفه هسا وخلونا بالمصيبه هاي المانعرف شوكت تخلص ..
امير .. مصيبتيش يمة. همة اللازم يخافون تعدوا على عرضنا خاف عبالج احنه والشيخ خايفين منهم ونهزمنا لا والله موش احنه الي نخاف ..
بس الشيخ عندة غاية وبعدنا عن الديوانية يريد يستوهم على نار هادية ..

دخل حيدر .. يمة اجة عبودي يريدج ..
امير .. ابن حلال هسا امي ذكرته ههههه .. بس شعندة اجة خير ..

دخل وراه عبودي وعلي ويوسف ..
امير .. ها عبد الله صاير شي هناك ..
عبد الله .. لا بس الشيخ دزاني .. يگول جارتج ام احمد خابرت وتگول الحجية موزينة وتريد تشوفج ..

اباوع على امي وجهها اصفر وانگلبت احوالها ..
امير .. يمة شبيج اتهدي .
تعاي اگعدي .. درة جيبي ماي الامي ..
-يمة گالج مريضه مابيهة شي ..
گومي بدلي واخذج تشوفيها ونرجع قبل الليل ..

حيدر .. تحجي صدگ امير وين تاخذها ..
علي .. كل هاي السنين ماعرفوا شبينا مابينا وهسا تاخذ امي وتروح برجليك ..
امير .. هاي شبيكم اني مو زعطوط وتعلموني ..
وبعدين لويش خايفين منهم صرنا زلم وفن واحد يحجي ويانا ..
بيبتي جانت طيبه ويانا وواجب علينا نروح ونشوفها ..
درة .. اني اروح وي امي ..
امير .. لا ابقي هنا يم اخوانج .. بس اني وامي نروح واذا صار شي نخبركم ..

يوسف .. جا اروح اني وياكم كلشي يصير .. مااعوفك وحدك ..
اميرر.. كفو يخوي بس اخواني هنا امانتك عينك عليهم ماامن عليهم عند غيرك ..
يوسف .. هاهي روح ومودع بالله وامانتك بالحفظ والصون ..
عبد الله .. واني هم راح ابقى هنا ..
امير .. روح انت خاف الشبخ يحتازك ..

يله يمة گومي بدلي وحضري نفسج على ماابدل ..
درة .. طلعت ثوب حلو الامي وشحاطة جديدة ولبستها ولفيت الحجاب الها ..
اريد يشوفوها بأحلى صورة ..
وهي ماتقبل تگلي ولج اني وين وانتي تعدلين بيه ..
بالي يم عمتي لايصير بيها شي وماالحگ عليها ..

كملت وطلعنا من الغرفه وصارت عيني على امير طالع يخبل ..
لابس بنطرون جينز وقميص وسترة ..
ملابسه الجدد الي اشتراهن للجامعه باقيات بالسيارة وجن گلبه حاس راح يمشي بيهن العمامي ..

ام من شافته توصي بي يمة معليك بيهم شمايحجون ويسون احنه نشوف بيبيتك ونطلع ..
امير .. هاهي يمة لاتشيلين هم ..

امير اخذ امي وراح .. واحس گلبي انقبض .. مامتعودة ع فراگهم ..
وبالي يمهم اخاف عمامي يأذون امي لو امير لأن انهزمنا من الولاية ..

ودعناهم ودخلنا ..
عبد الله .. جوعان شنو غداكم درة ..
درة .. امي طابخة الغدا ماادري .. تردون اصبلكم غدا هسا ..
حيدر .. اي صبي وهسا اجي وياج اساعدج ..

دخلت حميت الاكل وحضرت المواعين واحس نفس وراي فزيت ..
واشوف عبد الله ..
-شبيج فزيتي هيج اني اخوف ..
-لا عليمن اخاف ..
-درة اذا كملنا غدا اريد احجي وياج ..
-شنو تحجي احجي هسا قابل هو سر ..
-لا مو سر يس موضوع خاص ..

يوسف .. وشنو هذا الموضوع الخاص .. خلينا نسمع ..
عبد الله .. مو يمك السالفه لاتدخل روحك ..
يوسف .. شوف ولك كلشي يخص درة يهمني فالاحسن تبطل سوالفك هاي وتتغدا وتروح للديوانية لاالشيخ يحتاجك ..

طلع عبد الله من المطبخ واني بين فرحانه وبين مصدومة من كلام يوسف من گاله تهمني ..
باوع عليه وگال ..
هذا لاتنطيه وجه .. وترى اني حجيت بمكانج لأن انتي امانة امير عندي ومثل اختي ..

هو گال هيج واحس ضربة قوية ع راسي ..
ضجت ودرت وجهي للگدر اصب التمن .
صحت حيدر تعال شي الماعين ..
يوسف .. مو اني يمج ماتگليلي شيل ..
درة .. لا شكرا هسا يجون اخواني يشيلون ..
ضحك وطلع ..

احسة يتصرف وياي ببرود .. معقوله شايفني مثل اختة لو لأن اصغر منه بهواي ..
اي اكيد يشوفني زعطوطة.. اذا الكلية مليانة بنات بعد منو درة ويباوعلها ..

اوووه هاي شبيه اني ليش هيج تفكيري بيوسف تغيير ..
شلون افكر هيج وانزل راس اخواني الربوني وتعبوا عليه امي جانت تگول ..
البنية لازم تحب رجلها وبس ..
حرام تحب اي شخص وتسلمة گلبها ..
لأن الحب الشريف والطاهر حب المرة الرجلها ..

جان عقلي يسمع كلام امي وخوفها عليه.. وگلبي يرفرف من يشوف يوسف وماادري ليش ..

گعدوا تغدوا واني اكلت وحدي ..
لأن اضوج من نضرات عبودي ..
وامي ماهي عيب اگعد وياهم ..

امير .. اخذت سيارة خالي مرزا وطلعنا لولايتنا وهاي اول مرة راح ادخلها ..
اشوف اني مامرتاحة وجانت تقرأ ايات وخايفه ..
خوفها هذا ماگدرت افسرة ..
ان جان على جدتي .. لو على موقف ابوي وعمامي ..
اخذتلها لفة من الطريق وگلتلها اكليلج لگمة لاتوگعين وجهج اصفر ..
ياقوت . لا مااشتهي جيبلي بس ماي ..
امير .. اي هذا ماي بس بداعة امير عندج اكلي ..
ياقوت .. بعد حلفتني بالغالي .. اكل بس مو هسا

صعدت وحركت السيارة وخليتها على راحتها ماضغطت عليها ..
هي شويه وفتحت العلاگة وطلعت لفه انطتها الي وگالت مااكل اذا ماتاكل ..
وگامت تاكل بلفتها ..
اعرفها ماتگدر تخلف اذا حلفتها بيه ..
صحيح امي تحب اخواني وخاصه درة ..
بس اني اختلف عندها ..
تگلي انت ابوي واخوي وصديقي مو ابني ..
ومايوم خلفتلي كلمة اگولها ..
وهذا الي خلى عندي ثقة بكلشي اسويه بس مايوم عصيتها لو طلعت عن طورها ..

دخلنا الولاية واجة ببالي ذاك اليوم ..
الي طلعنا منه الفجر ..
ذاك اليوم الي انكسر بي خاطرنا وطلعنا تايهين ومانعرف مصيرنا ..
ماادري العن ذاك اليوم او احمد الله واشكرة بي ..
لأن لو ماطالعين جان بقينا نفس حالنا او يمكن اسوء ..
وماگدرت اوگف على رجلي واصير المهندس امير ..
اي اني ابن ياقوتة الخبازة ..
هذا اللقب الي اسمعه من جماعتي بالمدرسة وبالشارع ..
ابن الخبازة ..
باوعت الامي ..
هذي الخبازة نفسها الي ربتنا احسن تربية وسوتنا رجال الناس تحلف بأسمنا ..
الخبازة الي علمتنا الحلال وماتقبل الحرام يدخل بيتنا وببطنا ..
ضحت بسعادتها وبنفسها الاجلنا ..
اي اني ابن الخبازة وافتخر ..

وصلنا الشارعنا القديم ..
صحيح ✔ البيوت متغيرة بس الشارع نفسة والناس هي هي ماتغيرت ..
جن ذولة الجهال نفسهم احنة من جنا نلعب سويه بالباب
وجن هذا المحل نفسة الي نشتري منة ..
وجن ذاك انـي اشتغل بعمر الورد حتى اعيش اني واخواني ..
حسيت بخنگة عصرة گلبي ..
وسمعت شهگت امي الزرفت رويحتي وهي عينها من الشباك على ديرتها وناسها ..
وجن تحجي وي شوارعها وتگول ..

تفارگنه رغم ماردنه الفراگ ..
وتهجرنه وتركنه بيوت اهلنه ..
وصار الليل كلش مو حلو الليل ..
شحلاته الليل لو يرجع يلمنه ..
شنسى وذكريات هواي وياج ياديرة أهلنا ..

گالت اخذنا البيت خالتك ام احمد بالاول اريد اشوفهم ..
لفت السيارة ..
واحس الناس كلها عينها علينا ..
حقهم مايعرفونا ..
والسيارة تجيب العين .. جنت راكب مارسدس بداك الوكت ..
وبولايتنا ماكو هيج سيارات يعني مبين اني غريب عنهم ومو منهم ..

ياديرة اهلنا مالج علينا لـــوم ..
لومـي ع الي سعى بفرگانــا ..

وصلنا البيت ابو احمد ..
اول مانزلت امي وصارت عينها على بيتنا القديم بيت ابوها وامها الصفى الغيرها ..
نزلن دموعها ..
قفلت باب السيارة واجيت يمها ..
حضنتها الصدري وگلتلها ..
كافي ياام امير ربج مايضيعها ..
خليهم يشبعون بي بس صدگي مايتهنون ..
وداعتج الا ابنيلج احلى منه واخليج ملكة بي ..

مسحت دموعها وگالت ..
ولك يمة صار سنين شو ماشفت شي وهالمتهنين وگاعدين بي وياقوت الي اتعذبت ..
امير .. مو انتي العلمتينا انه الله يمهل ومايهمل ..
اني تعلمت الصبر منج يمة ..
ياقوت .. اعذرني وليدي بس ماهان عليه اطب بعد كل هاي السنين وتصير عيني على بيت ابوي وماتحترگ روحي ..

دگينا الباب ..
طلع احمد .. كبران بس نفس شكله .. ماعرفني بس عرف اني بسرعه ..
-خاله ام امير .. ياهلا ومرحبا .. صح كبرانة بس ذاك شكلج وعيونج نفسهن ..
امير .. ولك ماتستحي واگف گبالي وتتغزل بأمي ..
احمد .. منو انت بس لاامير .. خرررب ولك هاي شصاير ولاعرفتك ..
تحاضنا اثنينا ..
احمد .. ايباه والله الدنيا تركض ذاك اليوم طلعتوا منا ..
ياقوت .. كل من اعمارنا هذا يمة .. امك وينها وشلونها ..
احمد .. ادخلوا ادخلوا البيت بيتكم ..

دخل گدامنا ويصيح .. يمة يمة تعاي شوفي منو اجانه ..
طلعت ام احمد ..
بس شافت امي نزلت دموعها ..
-ياخية ولج والله گلبي نغزني من صاح احمد لبالك يعلم انتي الجايتنا ..
تحاضنن ويبجن ووحدة تشكي للثانية اشتياگهن ووحشتهن جانت فعلا نعم الجارة والاخت الامي ..

شافتني گالتلها هذا الاسمير امير مو ..
ضحكت گلتلها اي خاله شلونج ..
-يبعد خالتك تعال الحضني عود كبرت وتستحي اشبگك ولك انت وليدي وحالك من حال احمد ..
دخلنا لجوة واصرت تسوي غدا ..
ياقوت .. لاخية مشكورة اكلنا بالطريق اني اجيت اشوف عمتي وامشي بس ماانطاني گلبي ماامر عليج ..

گعد ابو احمد جان نايم ..
رحب بينا وحضني واحس دمعته رادت تنزل ..
الدمعه الماشفتها يوم بعين ابوي ..
سولفتله عن شكلي وكله بفضله لأن هو العلمني الصنعه ابو احمد .. لا وليدي لاتگول بفضلك هذا من فضل الله وذكائك ..
انت جنت ذكي وتتعلم بسرعه حتى اسأل خالتك شگلتلها
گلت هذا الولد اله مستقبل جبير لأن عندة اصرار وعزيمة ماشايفها عند واحد ..
والحمد لله هسا راح تكمل وتصير مهندس وماضيعت تعبك وتعب امك ..
احمد .. اذا فتحت ورشة ومعرض مو تنسا اخوك ..
اخيك طلعني من هاي الولاية الابوي حابسنا بيها ويضحك
امير .. ان شاء الله اصلا افرح نشتغل سوة انت هم تعرف بالصنعه وع الاقل شخص مني وبية واثق بي ..
ابو احمد .. خلي الله يفتحها وتحقق حلمك وساعتها نحجي بالسالفه ان شاء الله..
ام احمد .. وشمدريكم ما كلنا نشيل لهناك ونرتاح ..
ياقوت .. يوم المنى وتصيرين يمي وترجع ايامنا سوة ..
ام احمد .. والله الكاسر ظهري البنات هنا يبقن وحدهن
ياقوت .. غير متزوجات وببيوتهن ..
ام احمد .. يبقى بالي يمهن وخاصه بتول عيالها شالعين گلبها واخاف عليها تبقى وحدها ..

امير .. امي وام احمد بدت سوالفهن ووحدة تشكي للثانية واني وابو احمد واحمد نسولف وحدنا ..
تالي انتبهت ع الوكت وگلنلها يله يمة ورانا طريق ..

احس امي مترددة تروح البيت جدي وباقية تسولف وي ام احمد حتى تنسى لو تشغلني ..
ياقوت .. ها اي يمة گايمة ..
ابو احمد .. خلونا نروح وياكم .
امير .. اذا خايف علينا عمي لاتشيل هم اني مو ذاك الصغير الي انهزم من ولايتة قبل كم سنة لأن ماگدر يدافع عن امة واخوانه ..
ابو احمد .. والنعم منك وليدي ..
ام احمد .. جا اني اروح وياكم لأن گلبي يطفطف ع الحجية اريد اطمن عليها ..

سلمت عليهم وطلعنا ..
وصلنا يم باب البيت نزلتنا ..
انفتحت الباب وطلع المضمد وقيصر ..
كبران وصاير ضخم ..
بقت عينة ع السيارة وعلينا ..
شاف امي عرفها وگال ..
-انتي مووووو ..
امي ماحجت وياه وگبل دخلت ..
حسيتها مو ذيج الامي الضعيفه وتخاف ..
دخلت وراها ام احمد ..
گال انت امير مو ..
-اي امير ..
-وين رحتوا وشعندكم اجيتوا هسا ..
-اجينة نشوف بيبتي ورايحين .. سويلي طريق وياك ..

قيصر .. اوگف هسا اجي ..
سمعت صوت عياط وامي تگلها ماجاية علمودج اجيت اشوف عمتي ..
دفعت قيصر بسرعة ودخلت ..
ومن غير مااحسب حساب حرمة بيت لو العيب ..
من سمعت صوت امي تسودنت ..
وقيصر يصيح هاااا وين ..
شفت امي بباب المطبخ .. وسهيله لازمة الباب وتگلها مو انگلعتي شجابج ..
لو شميتي بيها ريحة موت واجيتي ع الورث ..

امير .. اوگفي يمة لاتحجين ..
رفعت راسي على سهيله .. اسمعي احنه جايين نشوف بيبتي ونطلع مانريد لاهوسة ولامشاكل ..
سهيله ..وانت منو ..
امير .. اني امير ماعرفتيني ..
سهيله .. والله صايرين احوال .. وشي ثاني هستوكم ذكرتوها من اخذتكم امكم والله العالم وين راحت ..
ماسألتوا ولاحجيتوا وابوك وعمك دوروا عليكم لمن ملوا ..
امير .. لاتخلينا نفتح الدفاتر القديمة انتي تعرفين كلش زين ليش اخذتنا امي وشردت لو عبالج مااتذكر ترى كلشي صار بأمي وسويتوه مطبوع بذاكرتي ..
قيصر .. وانت اي تهددنا لو شنو ..

درت وجهي عليه .. لاجاي اهدد ولااتفگ خلي امي تشوف بيبتي ونروح بهدوء ..
قيصر .. يمة خليهم يفوتون ..
وخرت سهيله ودخلت امي وام احمد وراها ..
گتله سويلي طريق ..
قيصر .. فوت ماكو احد ..
دخلت وراهن ..
الغرفة جدي ..
البيت نفسة ماتغير حتى الحياطين نفسهن وكبرن مثل ماكبرنا ..
بس صاير بارد واظلم ..

ياقوت .. من دخلت وشفت عمتي نايمة وصايرة جلد وعظم تسودنت ودموعي ينزلن وحدهن ..
فززنها شهگاتي ..
عاينت عليه وبالگوة تاخذ نفس وتحجي ..
ولج ياقوت هاي انتي ..
ريحتج شميتها قبل ماافتح عيني ..
يمة خفت اموت ومااشوفج ..
-عمة اروحلج فدوة اسم اللخ عليج لاتگولين هيج ..
-ولج كبرتي وبعدهي دموعج مانشفن ماتگليلي شوكت ينشفن ..
-اذا عليج مايبجن عساهن لابجن بعد ..

امير .. اتقربت عليها وبست راسها واديها.
الحجية .. يمة امير انت مووو .. يابعد اهلي وطوايفي ولك فدوة الاسمك صاير رجال وهيبه ..
امير .. شلونج بيبي ماتستاهلين المرض .. عندج العافيه ان شاء الله..

جانت عينها منا ومنا ..
-ولج ياقوت وينها درة واولادج الثانين وينهم ..
ياقوت .. بقوا هناك ماجبتهم ..
الحجية .. ليش مو. اريد اشوفهم قبل لاالله ياخذ امانتة ..
ياقوت .. اسم الله عليج عمة لاتحجين هيج ..
الحجية .. يمة طلابة هو العمر كم دوب .. موشفتج هاهي خليني اموت وابري ذمتي ..

جانت تحجي وبالگوة تاخذ نفس ..
گالت يمة .. خاف اموت الكم حصة بهذا البيت حصة ابوج لان هذا بيت جدج مو بين عمج ..
وحصة بالگاع الجبيرة ..
امير .. بيبي لاتحجين مو وكت هالحجي ارتاحي ..
سهيله .. شترتاح هو انتو جايين ع الورث عرفتها والله ..
وانتي عمة رجليج ع الگبر وبالج يم ياقوت وولدها ..

ياقوت .. سهيله ولي من وجهي ولج بيش مفاوله الها كبرتي بس سمج نفسة باقي ماتغير ..
سهيله .. والله وطلع السانج يياقوت وين ذيج الخوينسة بس اي مستقويه بابنج هذا وسيارتة الباب الله العالم شيشتغل ..
ياقوت .. كافي سهيله رحمة لأهلج ماجاية اتعارك وعمتي مريضه ماتشوفيها ..
الحجية .. عوفيها يمة عوفيها ماتشوفيني ادعي ارتاح واخلص بس كون تفكني من السانها ودرمتها ..
امير .. عماتي وين ليش مايجن يراعنها ..
نور .. عماتي يجن بالليل يراعنها يباتن يمها لان بيبتي ماتگدر تگوم ..

امير .. انتبهت عليها يمكن هاي نور وحدة من بنات عمي قاسم ..
گالت .. شلونك امير صاير كبير وحليان ماعرفتك ..
امير .. هلا خيتي الحمد لله ..
قيصر .. روحي للمطبخ وخزرها ..

الحجية .. ياقوت اريدج يمي بأخر ايامي لاتعوفيني ..
ياقوت .. امنيتي عمة اخدمج بعيوني بس مناك جهالي وتدرين بالوضع ..
الحجية .. جيبيهم وتعاي لاتحرميني منهم هاي طلبتي منج ..
امير .. باوعت اني الي وماعرفت شأحجي وياها لو ارد ..
وجنها تريد تبقى وخايفه من ردي ..
جان بودي اگلها ابقي يمة .. بس اخاف عليها من سم عماتي وسهيله والحرب الي يشننها عليها ..

امير .. بيبي ترحين ويانا واحنه هناك نباريج وامي يمج وماتعوفج ..
بعدني ماكملت ..
وسمعت صوت وراي ..
منهو انت ووين تريد تاخذها ..
درت وجهي وشفت عمي قاسم ..
ماانتبهت شحجى ..
بس صارت عينـي عليه وعلى شيباته الاكلن سواد شعرة
وملامح وجهة الي تغيرن وبانت خطوط الكبر ..
شكلة وحالة متغيير ..
للحظة حن گلبي ونسيت كلشي ..
بس نسيت ابو طبع مايغير طبعه ..

حاكم .. اوگف يقاسم ..
لزم عمي قاسم ..
-انت ياهو منهم امير مو ..
-اي اني يابة .
-اني مو ابوك ولااعرفك وماعندي ولد ..
انتو ميتين بالنسبة الي ..
شعندك هنا وشجابك ..
ابتسمت وگتله .. مااتغيرت ولااتغير طبعك گلبك وقساوته نفسهن ..
گلتلها يلة يمة امشينا…
قاسم .. ياقوت وياك ياقوت هنا ..
دفعني ودخل للغرفـة ..
وابوي وراه دخل ..
اول ماشاف امي وراد يهجم عليها ..
ولج منتضر هذا اليوم من زمان .. وي منو شردتي واخذتي ولدي وياج ..
منو الي لعب بعقلج وسودتي وجوهنا وياه ..

لزمت ودفعته على عمي قاسم ..
هوووب مااسمحلك .. اذا جان مالها احد قبل وتلطشون بيها .. هسا اني موجود واكسر ذراعة اليگرب عليها ..
وانت منو وتحجي بشرف امي وعرضها ..
لاتخلينا نفتح الماضي ..
لأن اذا انفتحن اوراق الماضي تطلعون انتو الخسرانين وذيج الساعة اخذ حقوقنا الراحت منكم ..
احترموا وضع بيبيتي هسا ..
بس ها لاتضنون اسكت عن حقي وانساه ..
يجي يوم ونگعد ونتحاسب !!

حاكم.. شتقصد ولك ؟؟
امير .. اسأل عمي وهو يجاوبك ؟؟
حاكم .. شكو يقاسم شيقصد هذا .. ماتحجي شبيك تلعثمت ؟؟
بقلمـي_الكاتبة_شمس

يتبع………