[لامارا]

//// البارت الثالـث عشر ////
عجـاف_القلـوب ..
الكاتبـة_شمـس ..


هنـاك اشخاص تفتخر بوجودوهم في حياتك .. وهناك من تخجل ان تعترف انك عرفتهم يوماْ ...

دخلنا الديوانية...
على طريق النجف ..
واشوف بالعشر سيارات منتضراتنا ..
واولهم سيارة الشيخ !!
استغربت وحجيت وي يوسف ..
هاي مو سيارة الشيخ ..
يوسف .. اي والله هي .. مو بعيدة على جدي مستعد ياخذ موكب علمود يرفع راسك گبال عمامك ..
امير .. اني راسي مرفوع بي وحدة .. يكفي هو بنفسة جاي متصدر السيارات ..

وصلت يم سياراتة ..
فتح الباب ونزل ..
اتقربت وبست راسة ..
الشيخ .. البقية بحياتك وليدي
امير .. وحياتك الباقية بوية شجابك ..
الشيخ .. مصابك مصابنا وليدي شلون مااجي ..
راح الامي واخذ من خاطرها بالسيارة هو وخوالي ..
وگـال ..
يله اصعدوا خلي نلحگ ع الجنازة ..
ركبت سيارتي وحركنا ..
صدگ ساعتها حسيت راسي مرفوع واني اشوف نضرات ابوي وعمامي وتساؤلاتهم ويردون يعرفون منو ذوله ..

سيارتي تمشي ورى سيارة الشيخ ..
لحد ماوصلنا النجف ..
نزلنا هناك ..
اجو عمام ابوي وكباريتة عشيرتة ..
عرفوا الشيخ سلمو عليه وتشكروه الجيته وياهم ..
دخلوا بيبتي للمغيسل وامي راحت وياهم ..
واني واگف يم الشيخ ويوسف وعلي يمنا ..
اتقرب ابوي وقاسم ..
السلام عليكم ..
الشيخ .. وعليكم السلام ..
قاسم .. انت الشيخ مجبل موووو !!
سامع بيك بس ماشايفك !!
حاكم .. منين تعرف ولدي وشعندك وياهم ..
الشيخ .. منوووو ولدك ..
اذا تقصد على امير لو علي لو البقية فذولة ولدي وتربوا عندي بعد مااعرف اذا قصدك على غيرهم ..
حاكم .. يعني طول هاي الفترة انت ماخذهم وضامهم علينا .. وهاي عيبه بحق شيخ عشيرة ومعروف اذا سمعت العشاير ماترضاه ..
الشيخ .. شوف يبوي الوكت مو وكت عزا والميت اله حرمة .. بس ردي على حجيك ..
اني الشيخ مجبل وماارد واحد دخيل عندي .. لجن الي يجيني مهزوم من اهلة وناسه الطردوه وحاربوه ويردون يغصبوه على شي مايريدة مااطردة احميه واخليه بجناحي واذا انت محافظ عليهم وماطاردهم من بيتها الاخذته منها ماجانت عرفتني ولااجتني ..
حاكم .. انتتتتت… سحبة قاسم وگاله مو وكت هالحجي خلي تخلص الفاتحة ونتفاهم ..
امير .. بوية العن الشيطان وامشي ياحق تحجي بي ومنو ولدك الاخذوهم منك .. اذا تريد الصدگ اني ابوي وشيخي هو هالزلمة الواگف گبالك ..
رباني وعلمني وكبرني وسوة الماسويتة انت بصغرنا ..
الشيخ .. امير يبعد ابوي مو وكت هالحجي ..
الناس تعاين علينا والجنازة راح تطلع مو حلوة الناس تسمع حجينا ..

قاسم اخذ حاكم ومشوا ..
مرزا .. بوية لاتسكتلهم فوگ شينهم گوة عينهم ..
التفت علينا اني وعلي وگال ..
اعذروني خالي بس مااتحملت ..
امير .. لا خالي حقك .. فوگ هاي السنين كلها الماسألوا علينا ولاعرفوا طريقنا رغم هم السبب بطلعتنا ..
جايين يحاسبون هسـا ..

طلعت الجنازة ومشينا دفناها وامي كتلت روحها عليها ..
بالگوة سحبتها من ترابها ..
جانت عيون ابوي وقاسم تريد تاكلنا ..
وخاصة لمن الشيخ سحب امي وباسها من راسها وصعدها للسيارة ..
تسودنو ..
صعدنا سياراتنا ومشينا ..
الشيخ گال اروح وياكم للفاتحة ..
بس اني ماقبلت ..
لأن اعرف ابوي وعمامي مايسكتون واخاف يجرحون الشيخ واني ماارضاله الاهانه ولااسكت عليها ..

گالت امي بالي يم اختكم خلونا نمشي قبلهم لهناك ..
طلعنا كلنا الشيخ والي وياه رجعوا للديوانية ..
واحنه مشينا لولايتنا يوسف ماقبل يعوفنا ..
بالطريق اخذنا لفات امي بسرعه يهبط ضغطها وماتتحمل الجوع ..

ياقوت .. خو اهلك ماحجوا شي وي الشيخ وضوجوه ..
امير .. يمة هذا الشيخ مجبل ماتعرفيه يضيگ خلگ ماينضاگ هلگة هههههه ..
ضحكنا كلنا ..
وصلنا البيت ابو احمد گبل ..
دخلنا للبراني .. احمد حضر الحمام دخلنا سبحنا وارتاحينا خالي مرزا جايبلنا جنطة ملابس محضرتهن خالتي ام يوسف ..
بدلنا وسولنا غدا اكلنا شويه لأن ماكلين بالطريق ..
اجت امي گالت يمة اخذنا وياك البيت جدك قبل لاتروح للفاتحة ..
ام احمد .. احسبوا حسابكم لليل تجون تباتون هنا عدنا ..
امير .. الله كريم نشوف ..

اخذت امي ودرة وخالتي ام احمد وديتهن البيت جدي ..
ووصيت امي ماتهتم ولاتدير بال للحجي ..
ومناك رحت للجامع يوسف وعلي وحيدر وابو احمد ماخذهم احمد بسيارتهم ..

درة ..
دخلنا البيت جدي .. اخر مرة دخلتله واني صغيرة اتذكر تفاصيل قليله بي ..
شفت بنات بالمطبخ اكو سلمن واكو وجهن ثگيل ..
حتى ناسيتهن ومااتذكرهن ..
بس الكل جان نفس السؤال ..
-انتي درة .. انتي درة ..
-ماشاء الله تخبل صايرة ..
-كبرانة ..
-هاي شوكت رجعوا ؟؟
-ووين جانت هي وولدها ؟؟
-وشوكت رجعوا ؟؟
احس راسي نصرع من كثر ماسمعت اسألتهم ..
انقبض گلبي ..
وهمست الامي الي جانت تنوح وتبجي اكثر من عماتي نفسهن ..
يمة اني ضجت ..
ياقوت .. فشله اسكتي ..
بس جانت وحدة گبالنة تخزر بينه يمها اثنين اطفال ..
عينها مانزلتها من علينا ..
سألت خالتي ام احمد گالت هاي مرت ابوج احلام وذوله ولدها ..
بقت عيني عليهم يعني ذوله اخوتي ..
بقيت اقارن بينها وبين امي ..
شنو شاف بيها وفضلها على امي ..
اشو امي رغم الكبر اكل من عمرها وشكلها ..
بس هي لسا حلوة والدليل النسوان كلهن يسولفن بجمالها ..
واذا ع الولد اخوتي ثلاثة واني الرابعه بعد شنو الي خلاه يعوف امي ويعوفنا علمودها ..
وهي حتى مامرتبة بس الفرق هاي تارسة روحها ذهب عبالك جايه الحفله مو فاتحة .. وولدها مو نضيفين وملابسهم وسخة اول مرة احقد على بشر هيج ..
صار المغرب وگامت كلها تصلي الوحشة البيبتي ..گمنا احنه الغرفه بيبتي ..
صلينا وكملنا وبقينا گاعدين واني تسولفلي على مكانها وبوفيتها المليانه ماعين وشلون جانت محافضة عليهن ..
دخلت احلام وجهالها ..
گعدتهم يمها وتصلي ..

كتلني الجوع طلعت نستله واكل ..
جانت عيونهم تراقبني ..
طلعت نستلتين من الجنطة ..
اموري مشتريلي حلويات يدري بيه احبهن ..
انطيتهم هي بسرعه اگطعي صلاتج وشمريهن بوجهي
احلام .. هاج وديري بالج تتقربين الهم ولاتنطيهم شي ..
كبرتكم وجابتكم حتى تاخذون ثارها ..
ادري بيجن مو خاليات ..
ديري بالج توصلين الجهالي ..
استغربت من ردة فعلها وضجت ..
معقوله تتوقع انه ممكن آذيهم واخذ ثاري منهم ..
ذولي اطفال شمفهم ..
ام احمد .. خية على كيفج .. هي نستله ومسدودة قايل راشتها سم .
ترى اذا انتي هجولتي اطفال وطردتيهم لاعبالج كلها مثلج احلام .. اني شعليه ابوهم الي طردهم لو ماشافهم مجرمين ويأذون ماطردهم ..
ام احمد .. الله يهديج خية ولو بعد كل هاي السنين مااصن تنهدين ..
هي اخذي جهالج وگومي مااتحملت وجانت ترجف وهي تحجي وخايفه ..
صدگ مااتحملت وضحكت ..
خزرتني امي واستمرت تقرأ قرآن البيبيتي ..
اتعجب على صبر وهدوء امي اتجاه هيج بشر شلون گدرت تتحمل وتعيش وياهم ..

بقينا گاعدين بغرفة بيبيتي ..
واحس العيون كلها تريد تاكلنا .
عبالك گاعدين بجحر ذيابة على ساعة يهجمن علينا ..
ضحكت ام احمد وگالت ..
الولاية كلها هنا لاتخافين مايسون شي يطلعهن غلطانات گدام العالم ..
بس خوفج من هاي السكته خاف وراها بلاوي ..
بدوا يصبون العشا ..
گمت من مكاني بحجة اساعدهن ..
لأن رجلي موتتني من الگعدة ..
دخلت المطبخ ..
بدت نور تعرفني على اخواتها كلهن متزوجات وبنات عماتي الي اصلا ماسلمن ولاكلفن نفسهن يباعن عليه ..
-تردون اساعدكم ..
نور .. لاماعدنا شي هي الماعين يجيبوها مصبوبة من برة بس نصفطها بالهول ..
حجت بنية .. اگلجن هي هاي بنت عمجن حاكم ..
هدى بنت عمتي .. اي هي اخذتهم امهم وشردت مانعرف وين ..
نور .. هدى عيب ..
درة .. امي ماشردت بينا امي نقذتنا ..
ضحكت وحدة من بنات عمي قاسم ..
هههههه منين نقذتكم من حرب البسوس ..

اخذت نفس ردت احجي دخل قيصر وبيدة الماعين ..
-هاجن بسرعه واحسبن كم مرة جوة ..
شافني ابتسم ..
بقيت صافنه بوجهة .. گبر هذا شبي يتبسم ..
تركت المطبخ ورجعت يم امي. .
اول ماشافتني گالت ..
-وين رحتي لاتگومين من يمي ..
-حركت رجلي شويه احسهن ماتن من الگعدة ..

صبوا العشا ..
اجت نور گالت امير يريدج ..
گمت للمطبخ لأن هو واگف بالطارمة ..
واشوف البنات هوسة ع الشباك يباوعن ..
طلعت..
شفت يوسف وامير واگفين ..
هسا عرفت ليش متداحسات ع الشباك ..
وهمة يخبلون طالعين ..
غرت عليهم اثنينهم مااعرف ليش وبنفس الوقت فرحت لأن ذولة الاثنين يخصوني ..
ياااا عزة بله واحد اخوية ومن حقي اغار عليه بس يوسف ليش ضجت وغرت عليه وحسيته ملكي ..

حضنت امير وبسته ..
-ها درة وين امي يله خلينا نروح ..
-جوة صبوا العشا ..
-عشاهم الهم مانريدة احنة العلينا نأدي الواجب وخلص ..
صيحي امي يله وخلينا نروح ..
-اي هسة اشوفها ..

دخلت للمطبخ وهنة بعدهن مكومات يم الشباك ..
ونور تگلي امير محتاج شي ..
حسيتها تتقرب مني علمودة ..
دخلت صحت امي ..
گالت عيب من الناس نگوم وي صبة العشا ..
شوية ونطلع ..
رجعت اخبر امير مالگيتة بس يوسف موجود ..
-وين امير ..
-دخل يصيح علي وحيدر ..
-هاااا جا امي تگول شوية ونطلع عيب وي صبة العشا نگوم الناس تضل تحجي ..
-انتي شلونج هبطتينا عليج الصبح ..
-لا زينة بس لأن موقف اول مرة امر بي خفت ..
-بعدج طرية وناعمة ماتتحملين ..
-شتقصد ؟؟ ضجت من كلامة وعبالك اني صغيرة بنضرة

درت وجهي ردت ادخل.
صار بوجهي قيصر..
-شبيج درة اكو شي مضوجج وهذا شلون هيج واكفه وياه بالطارمة ..
-ههههه وانت شنو اعرفك تعرفني ..
-اني ابن عمج ..
-من شوكت هزيت ايدي ودخلت سمعت صوت يوسف التفتت ..
يوسف .. بابا روح العب بعيد بنتك عمك شنو ..
اذا انت ابن عمها بالاسم فأحنة متربين سوة وعلاقتي بيها اكثر منك ..
طلع امير فرحت گلت حينقذ الموقف ..
توقعت راح يتعاركون ..
امير .. شكو قيصر
قيصرر.. شلون تخلي اختك توگف وي هذا احنه ماعدنا بنية تحجي وي الغربة ..
امير .. منو الغريب .. يوسف اخوي ومتربين سوة واطمأن عليها يمة اكثر منك ..
قيصر .. ها هيج الحجي صار ..
هز ايدة يوسف ..
اتركة اتركة امير لاتدوخ نفسك وياه ..
قيصر .. شتقصد ولك ..
امير .. كافي قيصر احترم احنه ببيتك كلها يومين ورايحين لو ماتعرف اليطب بيتك تخليه على راسك حتى لو جان عدوك ..
قيصر .. هههههه مخلي تربات المضايف والشيوخ الك
امير .. والنعم .. افتخر الي رباني شيخ وابن شيوخ لجن ماحصلنا من تربات اهلنا غير الآآآه ..

حاكم .. هيج صارت يأمير .. لجن تربات الشيوخ احسن من عدنا ..

درة حسيت الشغله راح تكبر .. ركضت صحت اني وگلتلها خلينا نمشي راح يتعاركون ..
اجت امي وام احمد ..
وبنات عمي ماقصرن فضحنا فضيحة يم النسوان ..
وخبصن الجو ..
راح يتعاركون وراح يتعاركون ..
سهيله .. يمة ابني .. تسلطوا عليه ولد ياقوت ..
جايبتلنا سعالوا هاعرض جتافهم وتتباهى بيهم على اهلهم وعمامهم ..
ماخلت حجايه ماگالتها ..
اني من صغري اكرهها لأن جانت تگرص بيه من جنت صغيرة ..
ياقوت .. استهدي بالله يسهيله ولاتشعلين النار الي جابني عمتي .. بس تخلص فاتحتها مااعتب الولاية طول عمري ..
سهيلة .. اي شعندج تجين بعد اذا عايشة خدامة للشيوخ وتاكلين بخيرهم ..

درة .. امي بعمرها ماعاشت خدامة عند واحد .. عاشت بفلوسها وكرامتها وبشغل وكد امير وتعبه ..
سهيله .. والله وحجيتي يياقوت الصغيرة .. امج جانت خرسة انتي السانج شطوله ..
درة .. ورثتة اللسان من عمامي واهلي يله يمة امشينا ماابقى هنا بعد. .

ياقوت .. ولج شلون تطلعين السانج هيج شيگولون ماعرفت اربي ..
درة .. يمة شبيج همة منو يگولون . اشو همة كلهم نفس الطينه .. ماتشوفيهن شلون دارن عليج ..

ياقوت .. امشي گدامي يله ..
درة .. طلعنا وشفت اخواني واكفين منتضرين ..
امير .. يله يمة بسرعه ..

جاي امشي وسمعت صوت صاحني ..
درة ..
التفتت وبقيت اتمعن بملامحة ..
منو هذا ..
بس داخلي رجف ومشاعري هاجت ..
هذا ابوي اي بس شصاير بي متغير حيل الكبر ماكل منه هواي وشعرة شايب ..
بقيت اباوع عليه ..
وهو مبتسم وفتح ذراعة الي ..
تعاي بوية .. كبرانة وصايرة مرة بس ذاك هو شكلج الي باقي ببالي ..
كلامة حرك شي بداخلي وردت ابجي ..
مو لأن مشتاقتله او اريدة بس لأن كل الي صار بينا من ايدة ..
خلانة نتيه بهاي الدنيا وحدنا ..
وهسا جاي يريدني احضني وابوسه وابادله نفس كلامة واشتاق اله ..
صارت عيني بعين اني اشرتلي اروح اله ..
اتقرب خطوة وارجع اثنين مااعرف ليش رجلي ماتحملني ولاتساعدني اخطي ..
وصلت يمة لزم وجهي بإيدة الخشنة ..
جانت خشنة وسودة مثل الجير ..
حاكم .. شلونج بوية مااشتاقيتي لأبوج ماسألتي عليه. .
نزلن دموعي ..
شلون اسأل عليك واني مااعرفك .. مااتذكر حنانك لو حبك ..
حاكم .. حجرت گلبج امج وخلتج تكرهيني مثل ماخلت اخوتج اعداء الي ..
درة .. امي بحياتها ماقبلت تسولفلي عنك لو ليش اخذتنا وطلعت ..
شگد سألت ومالگيت جواب ..
بس اني من اريد اتذكر مااتذكر بس المشاكل والضرب وشلون طردتنا وجبت مرة على امي ونسيتنا ..
هاي الي حجرت گلوبنا مو امي ..
حاكم .. الانسان مامعصوم عن الغلط .. وصح غلطت بس حتى لو ردت اصلح غلطي فأمكم اخذتكم عني وماانطتني فرصه ..
امكم الي حرمتني منكم ..

امير .. درة يله امشي . لايقشمرج بهذا حجية ..
حاكم .. لاتخلين واحد يغسل دماغج ويبعدج عن ابوج وعمامج واهلج ..
وهذا اخوج من الصغر جاحد وماعرفت اربيه ..
امير .. هههههه ليش هو انت جنت فارغ تربينا .. الي ربتنا هاي المرة الي گدامك ..
وكت ماانت حاير بمرتك ونزواتك .. هي ضيعت شبابها علينا وربتنا ..
هدت حيلها وتخبز للعالم حتى تعيشنا ..
جنت طفل والمثلي يلعب ويدرس اني افلفل سيارات واصلح وبالشمس والرايح والراد يتأمر عليه ..
لاتطلع نفسك نزيه كدامها ترى كبرت وصارت تعرف تميز بين اليصدگ واليجذب ..
يله يمة يلة درة اطلعن گدامي ..

طلع امير فاير من الغضب ..
جانت الكل واگفه ..
عمامي كلهم واولادهم ..
الكل يلوم بأمي لأن اخذتنا ..
بس ماحجت ولابررت ..
وماقبلت تخلي امير يحجي ..
وهذا الشي ضوجني ..
جانت تگدر تحجي وتگول السبب وتبرأ روحها ليش اختارت السكوت ماادري ..

وصلنا البيت ابو احمد. .
گال امير هسا نرجع مانبقى.
بيبيتي وراحت بعد شعدنا باقين ..
امي ماحجت ولانطقت من ساعة الرجعنا من بيت جدي ..
بس ابو احمد گال هسا دنيا الليل وانتو تعبانين ..
للصبح واطلعوا ..
امير .. لا الفجر نطلع ..

درة .. ساعدت ام احمد بالعشا واني اتذكر كلام ابوي شگد جنت اتمنى عندي ابو مثل سدن وحوراء وزينب وشلون يعاملوهن ويددلن عليهم ..
ولو اخوتي واني ماقصروا وياي ..
وخاصه امير جان اب واخ وصديق الي ..
بس من شفت ابوي ضجت ..
اتمنيت الزمن يرجع والوضع مختلف ..
واحنه عايشين بوسط امنا وابونا ..
وحياتنا حلوة مثل الناس ..

تعشينا ونمنا ..
گعدتني امي الفجر ..
صيلنا وطلعنا للمزرعة گبل ..
وامي وصت ام احمد تخابر بيت الشيخ وتخبرهم برجوعنا للمزرعه ..
يوسف جان يسوق ..
واني وامير بالصدر لان متكفي السيارة ..
وعلي وامي وحيدر بالورة ..
امير جان حاضني بيدة والجو بي برودة غطاني بسترتة
اخذت غفة ع كتفه ..
يمة احس بالأمان .. حسيت بقهر لأن حنيت الابوي الي ماسأل عني ..
ونسيت حنية هذا الملاك اليمي ..
وصلنا للمزرعة ..
گعدني امير ..
ها يحلوة شبعتي نوم خوش مخدة مو ويضحك.
درة .. ياحبيبي اكيد ايدك تعبت.
يوسف .. دگولي شلتيها الايدة المگرود مايحس بيهن بعد ..
امير .. ولك جوز منها هاي اميرتي اذا ادللها اني منو يدللها ..

امي نزلت من السيارة من غير ماتحجي ودخلت جوة ..
امير .. حسيت بأمي ضايجة لأن طبعها من تضوج تسكت وماتحجي بعد ..
والقهرني اكثر درة ونضراتها الابوي ..
خفت تجي تحاسبني بيوم وتصدگة ..
وتگللنا ليش حرمتوني منه ..
اخاف بيوم تگول اريدة .
بس اعرفها ماتسويها هاي تربات ايدي وگلبها على گلبي وماتنكر تعبي ..

گلت للولد يدخلون الغراض ورحت ورى امي ..
هايمة شبيج .. شنو الي مضوجج ياام امير ..
ياقوت ..
تدري يمة من طلعنا الفجر .. رجعت ذيج الايام كلها گبالي وانعاد الزمن عليه ..
مثل مااخذتهم وشردت بذيج الظلمة .
اليوم هم ردت اخذكم واشرد ..
خايفه من اهلك مايسكتون ..
وخاصة بعد ماعرفوا احنه وين مكانه وعرفوا الشيخ هو الي جان حامينا ..
اكبر غلط سويتة اخذتهم للولاية من جديد ..

امير .. يمة لو جنة صغار حقج تخافين .. بس احنه كبرنا ونگدر نوگف بوجههم وفن واحد يفتح حلگة ويانا ..
ياقوت .. ولك يمة اني خايفه على درة ..
درة حساسة وبسرعه تصدگ .. وخايفه ابوك يلعب بعقلها وياخذها مني ..
امير .. اني وياج ..بس درة ترباتي واعرفها عقلها اكبر من عمرها ..
وماراح تصدگة ..

-وشنو الخايفين اصدگة ليش ماتحجولي كلشي وتريحوني ....
درة .. شفت امير راح ورى امي للغرفه . اخذتني رجلي الهم وبلا قصد سمعت كلامهم ..
ضجت من سمعت توقع امي بيه ..
انه ممكن اعوفهم وافضل ابوي وعمامي عليهم ..
تجرأت ودخلت سألتهم ..

امير .. ماكو شي نخاف منه .. بس احنه ماردنا نشيلج هم ونضوجج ..
درة .. طول عمرك تتعامل وياي وكأني جبيرة بالعمر ومثل الاصدقاء انت اقرب شخص الي وانت الي زرعت الثقه بيه ..
ليش بهاي الشغله تعتبرني صغيرة ومااتحمل ..
ياقوت .. شتردين اگلج ..
اگلج عمج طمع بيه وجبر ابوج يطلگني حتى يتزوجني ..
ومن طردتة ورفضته هددني بيكم اذا ماقبلت ياخذكم مني عرفتي هسا ليش اخذتكم وهجيت بذيج الليلة ..
ردت احافظ عليكم وعلى اخر شي بقى عندي كرامتي وشرفي وسمعتي الي راد عمج يشوهها بنص الولاية الي اكلت وجهي بس لأن جان يجي كل يوم ..
بس الله يرحم عمتي الي نقذتني وشجعتني اخذكم واشرد بيكم ..

درة .. اسمع وابجي مامصدگة اكو هيج انسانة بالنذالة والسفاله تخليه يحط عينه على مرت اخوه ويطلگها من رجلها وياخذها ..

-شلون يصير هيج غير حرام .. ابوي عايش شلون يصير يتزوجح هذا مايخاف الله ..

امير .. لا حبيبتي مو حرام ..
هذيج زوجة الاب تحرم ..
اما زوجة الاخ فمحلل الزواج بيها سواء كان الاخ متوفي او لا ..

بس بمجتمعنا مكروه ومامرغوب .. اذا كان الاخ عايش وزوجته تتزوج اخوه ..
لو كان ميت هالشي عادي ..

درة .. بس شلون يجبرها وشنو من بشر هذا وابوي ماحجة من سمع ووافق على هذا الشي ..

ياقوت .. ابوج شمرنا من حياته اول ماتزوج واخذ بيت اهلي مني ..
وهددني اذا طلبت حقوقي ياخذكم مني ..
يعني عبالج هيج انسان راح يصدگني اذا گتله اخوك يريد يتزوجني لو يهتم اصلا ..
لو عبالج عمج راح يخاف ويستكن وينسى السالفه ..
اذا هي عمتي ماگدرت عليه تردين حاكم الي تقشمر بكم فلس وطلگني مايقشمرة بكم فلس ويخليه يتزوجني ..
يمكن بيدة يجيب السيد ويعقدلنا ..

درة .. كافي كافي يمة اسكتي شنو ذوله .. ادري بيهم ضالمين وضلموج وضلمونا بس ماتوقعت هيج انذال ..
حضنت امي وبست راسها وايديها وطلبت تسامحني. .
درة .. يمة اعذريني اذا جنت اضغط عليج بهذا الموضوع وازيد همج ..
الله يحبني انطاني ام مثلج .. وهمزين طلعتي بينا مناك
لو باقية وراضخة الهم جان ماسامحناج ..
ياقوت .. الي عندها ولد مثلكم شتريد من الدنيا بعد ..
صحيح انضلمت وتعبت اني وياكم بس الله عطاياه جبيرة فتحها علينا وخلى الشيخ بطريقنا ..

امير .. والنعم بالله .. يله ست درة عوفي امي ترتاح شويه وگومي خلي نسوي ريوگ ترى جعنا ..

سوينا ريوگ وتريگنا ..
والولد طلعوا للمزرعة ..
بديت اني وامي بالغدا ..
للظهر يله رجعوا ..
صبينا الغدا ..
سمعنا الباب اندگت ..
والشيخ كح ..
طفرنا من مكانا ..
امير .. هلا بوية نورت المزرعة ..
الشيخ .. منورة بيكم يبعد ابوي ..
ياقوت .. هلا بوية تعال تفضل هسا صبينا الغدا ..
الشيخ .. اي والله عشتي .. تعال يوسف يابة اخذ عباتي مني اني برة وشميت ريحة التمن والسبيناغ ..
دخل خالي مرزا وراه ..
سلم وگعد ويانا ..
باوع عليه وگال .. سدن خبصتني تريد تجي وياي علمودج وگلتلها احنه راح نجيبهم عليمن بعد تجين ..
درة .. اي خالو اشتاقيتلها حيل ..
امير .. وين نرجع ليش السالفه فضت ..
الشيخ .. يبوي هاي الناس همها الفلوس ..
من گاومتهم وماسكتت عنهم تراجعوا واستكنوا ..
وگلتلهم ولدكم داسوا على عرضنا والمفروض احنه اصحاب الحق موش انتو ..
والا همة طلبوا فلوس يله يتراجعون ..
وخليتهم يكتبون تعهد مايتعرضون الكم ..
يوسف .. وسكتوا ..
الشيخ .. وشحدة اليحجي .. والله الي يمسكم جن امة ماولدتة .. ولاعبالكم من دزيتكم لهنا خايف منهم ..
لا يبوي ..
دزيتكم لأن ادري ينخاف منكم مو منهم ..
لجن اذا اتجمعتوا تكتلون العشيرة كلها ..
من شفت وجه الولد مسويه خرايط گلت اذا بقيتهم ينهون عليه بعد هههههه ..
مرزا .. ههههههه سباع والله وماينخاف عليهم ..
امير .. يعني راح نرجع ..
يوسف .. اي يابة الدوام اجة بعد ماينفع نبقى هنا ولو الجو هنا حلو ويفتح النفس ..
درة ..من حجة يوسف ولمح استحيت . گدام اخوتي والشيخ وهو يحجي ويباوع عليه ..
مااعرف غايتة شني ..
الشيخ .. يله كافي حجي النعمة مصبرة ..

تغدينا وكملنا ولمينا الماعين اني وامي وكملنا وطلعنا سيارتين للديوانية ..
ولاعبالك كم يوم بقينا بالمزرعة عبالك سنين ..
اشتاقيت السدن حيل ..
والداوم مابقاله شي لازم نتحظر ..
سدن السنة سادس خطية وبكلوريا وراح تلتهي عني .

وصلنا تلگتنا خاله ام يوسف والحجيات اثنين ..
عزن امي واخذن من خاطرها ..
والحلو بيهن لابسات اسود وي امي حزنانات ..
امي ماقبلت وگالت الخاله ام يوسف ع الاقل انتي نزعي بس هي اصرت تبقى لابسه للأربعين ..
وگالتلها اني حبيت عمتج على سوالفج وانقهرت لان ماتت وصلتيلها الوحشة ..
بيومها الشيخ طالب يسوُن عشا الروح بيبتي ..
امي مااتحملت وبجت وگامت باست الشيخ ..
لأن هي هناك بالمزرعة وگالت الامير بس نوصل جيب مسواگ اسوي ثواب البيبتك ..

گعدت سدن من شافتني ماصدگت وحضنتني ..
عبالك سنين متفارگين ..
اجت مرت خالي حمزة لابسة الوان ومخليه مكياج طوخ من غير عادتها ..
وكأنه تريد تغيض امي ..
امي صح ماحجت بس مبين عليها ضاجت لأن حتى ماگالتلها البقية بحياتج ..

ام مرزا .. ولج فاطمة شو اليوم خاطة وجهج وين تردين
فاطمة .. هنا عمة وين اريد حرام ارتب نفسي الزوجي
ام حمزة .. رتبي روحج بغرفتج مو هنا والله الشيخ اذا شافج شيخلصج شو زايحة الاحترام انتي ..
فاطمة .. شبيج عمة ترزليني گدام الناس كبرنا وبناتنا بطولنا وانتو ماتحترمونا ..
ام حمزة .. منهي الناس ولج شو ماتعرفين تحجين .
ومو هاي مرت مرزا وياج شو ماتجيب الحجي الروحها
اذا تعرفين كبرتي وبناتج بطولج احترمي الواجب وقدريه
لاعزتيها بعزاها ولاسلمتي عليها .
فاطمة .. اي عزاها هي اني شني وبعدين حمزة ميحب الاسود يتكأب ماادري شلون مرزا قابل على مرته تلبس مو حتى مايصلح ..
ياقوت .. خية ماگايله الاحد يلبس العزا عزاي ونعم الله ع الي يشاركني بي ..
اترخص اني عمة اروح البيتي اسبح واغير هدومي واجي اساعد ام يوسف ..

لليل اجن بنات خالي كلهن ورجولتهن عازمهن الشيخ وبناتهن ..
صبينا سفرة للنسوان وسفرة للزلم ..
واحنه البنات بلشنا بالماعين والمطبخ تنضيف بعد العشا خالاتي كل وحدة جابن دشداشة سودة الي والامي ..
واني اصلا ماعندي جابولي من بتول بالفاتحة ..
وامي گالت ماتلبسين للاربعين وتنزعين عندج دوام وبعدج صغيرة مايصلح على اخوانج ..

امير .. كملت شغل ورجعت للبيت تعبان شفت اخواني امي جاي يحضرون بالسفرة ..
بعدنا مامتغدين ..
اجة يوسف ..
گال امير الشيخ يريدك بسرعه بالديوان ..
ذبيت خاشوگتي وگمت ..
رادوا يجون اخوتي وياي گلتلهم لا انتو ابقوا تغدوا اشوف الشيخ شيريد وارجع ..
رحت شفت الشيخ يمة خوالي وزلم معگلة ..
سلمت وگعدت ..
الشيخ جان مبين عليه ضايج بس مايضهر هذا الشي ..
لكن اني اعرفه من يضوج ..
التفتت عليه وگالي ..
امير يبعد ابوي هاي الزلم والاجاويد من طرفكم ..
جايين وجيبين طارش وياهم من شيخكم وعمامك واهلك
امير .. خير وشنو هالطارش ..
الشيخ .. يردون ننجمع ويگاومونا لان جنة ضاميكم عنهم كل هاي السنين ..
ومخلين طرف ثالث بينا يحكم من عشيرة…..
امير .. اني ماعندي عمام وشيوخ .. انت شيخي وجبيري والي تآمر بي اني حاظر ..
امشي واني واخوتي بظهرك ماعدنا شي نخاف مته ونهابة ..
ابتسم الشيخ وخوالي ..
الشيخ .. هاهي حددوا المكان والزمان ودزولنه طارش .

بقلمي_الكاتبة_شمس
يتبع .…