[لامارا]

//// البارت الخامس عشر ////
عجـاف_القلـوب ..
الكاتبـة_شمـس ..

رجعنا البيت الشيخ وويانا حاكم وقاسم وقيصر..
دخلهم يوسف للبراني واني رحت البيتنا ..
تلگتني امي ..
ها يمة بشر شصار ..
امير .. وين درة ..
ياقوت .. نايمة تعبت من الشغل هستوها نامت شتريد منها ..اني يمك
بس ماگلتلي شسويتوا وشگال ابوك وعمك ..
امير .. گعديها يمة اريدها بشغله ..
ياقوت .. شتريد منها احجي وجهك مايتفسر بس لا راح تنطي اختك الهم ..
ولك اموت ولااخلي بنتي تروحلهم .. ماتحجي شبيك ..
امير .. يمة شلون انطيها درة الهوا الي اتنفسة ..
بس لازم ناخذ رأيها ..
ياقوت .. ولك تحجي صدگ شتاخذ رأيها تگلها تردين ترحين لو لا ..
دخلوا علي وحيدر ..
-امير من كل عقلك تحجي بله درة وافقت تروح وابوك قنعها وقشمرها واخذها ..
امير .. اذا صار وگدر يقنعها معناها ماعرفت اربي ولاعرفت اختي كل هاي السنين ..
معناها تعبي راح بالخالي بلاش ..
ياقوت .. وشيفيد الندم اذا مشت بنتي وراحت وياهم اني هسا اگعدها واحجي وياها مااخليها تمشي ..
امير .. يمة بداعتي عندج ماتحجين وياها مااريد احد يضغط عليها گعديها تغسل وتلبس حجابها وتجي البيت الشيخ منتضريها ..
وانتو امشوا گدامي ..
يمة بعد مااحجي كلمة وحدة ماتحجين وياها ..
بس جيبيها وتعاي ..

درة .. نايمة وگعدتني امي. ..
امممم ها يمة والله تعبانه ..
ياقوت .. گومي خلي نروح البيت الشيخ اخوانج اجو خلي نشوف شسوو..
درة .. هسا يجون ونعرف ليش خايفه وضايجة
ياقوت .. گومي يمة ولاتشلعين گلبي ..
درة .. اي راح اگوم بس اغسل وجهي واجي وراج ..
ياقوت .. لا اني منتضرتج بسرعه ..
درة .. ترى يمة خوفتيني صاير شي اخواني بس لاتعاركوا وي ابوي وعمي شصار احجي ..
ياقوت .. درة شبيج موگتلح امشينا نفهم السالفه اني هم مثلج ماادري ..

گمت بسرعه غسلت ولبست حجابي ومشينا ..
دخلنا من باب المطبخ شفت البنات يصبن جاي ويوسف يمهن ياخذ الصينيه ..
صارت عيني بعينه اخذ صفنه طويله وجر حسرة ..
دخل للبراني ..
وبعدها طلع امير ..
ها درة يله تعاي ..
درة .. وين اجي غير خطار جوة ..
ياقوت .. اجي وياكم ..
امير .. لايمة انتي ابقي مااريدج تنغثين من شوفتهم ..
درة .. منو همة ؟؟
دخلت وشفت ابوي وعمي وقيصر والشيخ وخوالي ..
گام ابوي وفتح ذراعة ..

تعاي حبيبتي مشتاقلج واخذني بحضنة ..
حيدر .. شگد حيال خوش يمثل ..
امير .. اسكت لاتحجي ..
الشيخ .. اگعدي بويه هنا يمي واسمعيني ..
گعدت يم الشيخ وعيني على اخواني الي نضراتهم مافارگتني ومدري ليش احسهم مغثوثين ..
الشيخ .. ابوج وعمامج يردون ياخذوج يمهم واحنه گلنالهم مانتصرف اذا مانسألج ..
وانتي كبرتي وتگدرين تاخذين قرارج ومحد بينا يأثر عليج هاااا شگلتي بويه ..

بسرعه صارت عيني بعين امير .. دنگ وقبض اثنين اديه
بقيت اترقبهم واحد واحد بس محد خلى عينه بعيني ..
الا يوسف الي تجرأ وهز براسه معناها لا ..

درة .. يعني ابوي يريدني يمة نهائي لو زيارة ..
حاكم .. لا يمي وببيتي واعيشج ملكة هنا ببيت ابوج ومدللة ..
درة .. ومرتك تقبل ؟؟
حاكم .. هااا اي طبعا تقبل وبعدين هذا بيت ابوج مو بيت واحد ..
درة .. خوش اني موافقة اعيش وياك والعمر كله بس بشرط ..
رفع راسة امير وفتح عيونه مو الصدمة واخواني نفس الشي ..

امير .. ماصدگت اذني من سمعت درة گالت موافقه وحسيت گلبي وجعني واتمنيت تطعني بخنجر ولاتوافق ..
رغم جنت متأكد هي ماراح تعوفني وتعوف امي واخواني وتروح وياه ..

حاكم .. اي بوية گولي شتردين اني حاظر ..
درة .. ترجع البيت بأسم امي وتطلگ مرتك وتشمرها هي وولدها بالشارع ..
تقبل بهذا الشرط لو لا ..
حاكم .. بوية درة شلون تقبليها اخوانج صغار واشمرهم بالشارع انتي گلبج طيب وبريئة لاتخليهم يضغطون عليج ويقشمروج ويزرعون الحقد بگلبج ..
درة .. جا من طردتنا اني وامي واخواني واخذن بيتها ماگلت خطيه وصغار ووين يرحون ..
اني محد سولفلي ولاواحد خلاني احقد عليك بالعكس كلما اسألهم مايجاوبون ..
بس اني اتذكر كلش زين شلون طردتنا ومارحمتنا وحتى هذا الي اسمة عمي طمع بأمي وطردنا. .
شلون تريد اخون امي واخواني الي ربوني وتعبوا عليه واجي وياك ..
شنو الشفته منك واروح وياك ..
بحياتي مااتذكرت حنانك ولاخوفك عليه .. ولاكلمة بوية
جنت احجيها بيني وبين روحي حتى اسمعها ..
اني صح ماعندي ابوبس عندي اخوان رباني وخاصه امير صارلي اخو وابو بنفس الوكت.. من اوگع واگول اااخ الگيهم داير مدايري محاوطيني وحد يمسح دموعي وواحد يمسح ثيابي وواحد يطيب جرحي ..
وامي الي سهرت عليه وربتني وهملت روحها ولبستني ..
الي عندة هيج نعمة يعوفها ويروح وي الي تركوه من صغرة ..

اتقربت من اخواني الي عيونهم ترستها الدموع ..
وصرت بوسطهم وحضنتهم ..
روح بوية مودع بالله .. اذا بيوم احتاجيتني تلگيني لأن مااگدر اكرهك بس بنفس الوقت مااگدر انسى ضلمك واروح وياك ..

الشيخ .. اضن سمعتوا قرارها .. ومن كلامها عرفتوا هي مو صغيرة وتتأثر بالحجي .. ولو ماواعية وفاهمة ماحجت هيج حجايات اكبر من عمرها ..

حاكم .. اني ماراح اسكت واعوفج وراح ابقى وراج لحد ماتجين الي برضاتج ..
امير .. اعتقد سمعتوا شگالت وهسا بلا مطرود ومااريد اشوفكم بعد هنا ببيت الشيخ ..
ومثل ماگلت هسا اجة الدور ناخذ حقنا منكم ..
قيصر .. انت لو عندك غيرة مامخلي اختك بنص الغربة
امير .. روح بابا منا لااعلمك الغيرة شلون تصير .. ذولة الغربة اهلي وناسي وانتو الغربة بالتسبة النا ..

حيدر .. احمد ربك انت ببيت الشيخ لو بغير مكان جان علمتك الغيرة شلون تصير واخذ حگي وحگ اني واخوتي منكم مربع يله اطلع اطلللللع ..

اتقرب امير مني وباس راسي .. حبيبتي ودرتي هاي شوكت كبرتي وهيج تحجين اسمع ومامصدگ هاي انتي الي تحجين ..
درة .. شنو قصدك اني صغيرة وبعدين اني زعلانه منك معقوله تتصور اني اعوفكم وامشي وياهم ..
شلون هيج تفكرون بية ..
واگول امي ضايجة ومقهورة ..
ابد مااتوقعت هذا ظنكم بية ..
امير .. مستحيل افكر بيج غلط انتي تربات ايدي .. بس ردتج انتي تاخذين القرار بنفسج من غير ضغط ..
وتگدرين تگولين هذا اختبار ونجحتي بي معناها انتي كبرتي وبعد مااخاف عليج ..

حضني وطلعنا الأمي الي عيونها حمر من البجي ..
شافتني فتحت اديها وحضنتني ..
وتبوس بية وتشمني من كل جهة بوجهي عبالك جنت غايبه عنها سنين ..

ام مرزا .. ولج فلك طرج يياقوت خبصتينا وتبجين وهاي البنية بحضنج مو گلنالج اولادج ترباتج ومايروح رباج بلاش ياقوت .. مو بيدي عمة .. من اسمع بطاريهم اتسودن نسيتي شگد عانيت منهم ..
امير .. هاهي كافي بعد هاي الرزاله مااضن يجون ويوصلون ..
وعرفوا محد ينطيهم الحگ بعد سواد وجوههم ..
واذا رجعوا اعرف شلون اتصرف وياهم ..

دخل الشيخ ..
ها يبعد ابوي شبيج مكدرة وتبجين ولج انتي عندج ذهب صافي من الويلاد للبت. .
بعد ليش خايفه وتبجين ..
مادام انتو هنا محد يدوسلكم على طرف .. لجن اني اگدر اخليلهم حد ..
بس مهما يكون ذوله اهل ولدج وماردت تطلع العيبه مني رادوا يفاشلونة گدام العشاير ..
تالي طلعوا همة بسواد وجوههم ..

ام حمزة .. اي والله حجي هاي نفس حجاية امير هم هيج گال .. شحصلوا هسا همة غير الفضيحة وسواد الوجه ..
امير .. ابوي وقاسم مايخطون خطوة اذا مابيها مصلحة الهم .. ولاتصدگون يطلعون خسرانين بسهوله ..
بس حساباتهم تغيرت ومامشت على مرامهم ..

ياقوت .. خليهم بعيدين عنا وكلشي مااريد منهم ..
امير .. مو ضعيف يمة ومااگدر اخذ حگي واتنازل الهم بس مو هسا وداعتج البيت اخذ اضعافه منهم ..

الشيخ .. هاهي يبوي سدوا السالفه وخلونا مرتاحين كلشي بوكته حلو ..
بوية مرزا وين حمزة اريد اوديه الشيخ…. يگله بالي صار حتى يخليلهم حد ..
مرزا .. اذا تريد اني اروح بويه حمزة ماهو عندة شغل ..
الشيخ .. خير شني هذا الشغل الي ماصدگ تطلع الوادم واختفى علمودة ..
مرزا .. عندة خطار بالبيت ومشغول وياهم ..
الشيخ .. ولك دوهنتني خطار شني شغل شني ماتحجي شنو هيج كبرت وبعد مااعرف شيصير ببيتي ..
ومرته وين ماسفتها اليوم ؟؟

مرزا .. اخوت مرتة يمة يسولفون ..
ام حمزة .. لاتدوخ روحك حجي هاي مرتة من فلك طرها السانها متبري منها ..
وحمزة مااتحمل ووداها الاهلها ..

الشيخ .. وشلون ماتگلولي .. وليش مزعلها .. معقوله مايتحمل مرة .. شني من زلمة هو اذا يطرد مرته من خلاف صغير ..
ام مرزا .. حجي الخلاف مايخصهم .. مو وكت هالحجي منا الجهال ..

ياقوت .. يله يمة خلونا نروح ..
الشيخ .. وين رايحة انتي من البيت مو غريبه .
امير .. لا بوية احنه اليوم تعبنا وانتو هم لازم ترتاحون ..
نروح نرتاح وننام من وكت باجر دوامات عدنا ..
الشيخ .. ها بدأ الدوام بيها الخير عليكم يبعد ابوي .. هيج واشوف تخرجكم واسويلكم احلى حفله ..
امير .. دايم يبوي ماتقصر ..
يله يمة ..
مع السلامة ..
في امان الله يبعد ابوي ..

طلعنا واسمع الشيخ يگول .. وهسا فهموني ليش مرت حمزة زعلت وليش ياقوت وجهة انغث من جبنا هالطاري ..

اخذت امي واخوتي لأن ماردت واحد يعرف ..
وماردت احرج بيت الشيخ ..
صدگ اجة الوكت الي لازم نبني ونطلع ..
سوت امي عشا وجاي نتعشا ..
وگلتلها يمة وين تردين العرصة نشتريها
ياقوت .. بكيفك يمة بس كون موبعيدة عن بيت الشيخ
حيدر .. هذا حجي جديد شو ماادري ؟؟
درة… هههههه جا اني ادري قبلك ..
علي .. وهل يخفى القمر عليج . انتي الكل بالكل هنا
درة .. احم احم .. اصلا من تتزوجون اني اصير العمة مو امي واحكمكم حكم هههههه
امير .. تمونين يالغاليه ليش كم درة عدنا ..
حيدر .. بس مرتي خطيه على كيغج وياها بالشغل ..
علي .. واني هم مروتج مالي خلگ كل يوم مشكله وتتكافشن من الروس ..
ياقوت .. هههههه والله عندكم سوالف هسا دخلصوا جامعاتكم وازوجكم كلكم سوة ..
حيدر .. لا زوجي امير وعلي سوة اني بعدني ماشفت شي بحياتي حرام تسجنيني من وكت .
امير .. هههههه اني اصلا ماازوجك اذا ماتعقل

جاي نسولف وندگت الباب ..
فتح حيدر ..
دخل الشيخ ..
هايابة شلونكم ..
امير .. هلا بوية تفضل تعشا ويانا ..
الشيخ .. دايمة وليدي اتعشيت الحمد لله ..
اجيت اخذ من خاطر امك اذا احد غاثها بحجايه اريدها تمسحها بيه ..
ياقوت .. دايم بوية عساك سالم شلون انغث منكم وانتو اهلي ..
الشيخ .. اعرف الي صار من وراي .. بس سبق وان گتلج وهسا اگلج ..
انتي ماگاعدة ببيت واحد .. انتي گاعدة ببيت خالج ..
وتاكلين من خيرج وكد ابنج ..
ماكو واحد الة فضل عليج ..
امير .. بوية ماانريدك غير طيب وتبقى خيمة علينا ..
بس اني قررت اشوف عرصه قريبه منا وابنيها ونشيل ..
الشيخ .. اذا انت تگدر تعوفنا اني مااگدر اعوفكم ..
ليش تشلع گلبي يبعد ابوي ..
شلون انام وارتاح وانتو مو يمي وگبال عيني ..
امير .. على عيونا بعلي بس احنه كبرنا والبيت هذا صغير علينا .. واني راح اشوف مكان قريب عليكم حتى مانبعد وراح نبقى يمكم وشوكت ماتريدنا تلگانا ..
الشيخ .. اذا هيج الموضوع .. هذا حگكم وانتو كبرتوا بس خليني اني اساعدكم واشوفلكم عرصة زينة من معارفي ..
امير .. تشوفلنا عرصه اي بس فلوسها احنه ندفعها ..
الشيخ .. لاتخليني اگوم اطيح حظك ولك ليش هو اكو فرق بين الابو وابنة ولاتنسا اني مادافع شي من جيبي هاي فلوس امك مال محصول والگيعان الي لامهن الكم اجة الوكت تستلموهن وتبنون وتستقرون بيهن ..

بقينا كلنا صافنين بوجهة ..
-شبيكم صافنين .. اني اتعمدت ماطلعتهن ولاانطيتهن الامكم لأن جنتوا صغار وهسا كبرتوا وتعرفون تتصرفون ..
اشتري عرصه وابنيها .. لو تريد تاخذ xxxxي واساعدك والفلوس افتح بيهن المشروع الي ببالك ..

الشيخ يحجي واني مامصدگ واخيرا راح تنفتح بوجهنا واسوي كل الي جنت احلم بي ..
رحمتك ربي ..

الشيخ .. يله اني اعوفكم براحتكم وانت امير شوف باجر نروح تشوف العرصات ..
حتى اسحب الفلوس من المصرف وتتصرف بيهن ..
حتى ارتاح وينزاح الحمل عني ..
سنين واني خايف اموت وماموفي حقكم ..

كلنا حجينا .. اسم الله عليك ..
گمت بست راسة واني دموعة تجري من الفرحة ..
من اجينا لسا ماعرفنا شگد عدنا عند الشيخ ولاطالبنا بشي ..
بس من شفت المبلغ ماصدگت وحسيت روحي بحلم لدرجة حسيت انه الشيخ ضايف من عندة عليهن حتى يبرئ ذمته ..

ثاني يوم وصلت البنات للدوام ..
يدامون بأعدادية العروبة ..
درة جانت مامصدگة صارت بالاعدادية وكبرت ..
بس عيوني جانت تراقب سدن ..
ثگلها يعجبني ورزانتها ..
وهذا الي مخليني مطمأن على درة وياها ..
وبعدها رحت وي الشيخ نشوف العرصات ..
عجبتني وحدة 350 متر قاسمها عرصتين يريد يبيعهن بس اني اخذتها كلها وموقعها حلو .. بس مو نفس منطقه الشيخ لكن قريبة عليها ماتبعد هواي عنها ..
كل الي شفناهن صغار ومساحتهن 200 ونازل ..
واني تفكيري للمستقبل ..
اريد اني واخواتي وجهالنا كلنا ببيت واحد وامي بنصنا اريد اعوضهم عن العائله الي جانو يتمنوها ..
من صغري امنيتي نعيش سويه مثل بيت الشيخ. .
امي فرحت من سمعت ..
ثاني يوم تكاتبنا ودفعت الفلوس ..
اخذت امي واخواني الها تعجبوا من شافوها وبدوا يخططون ..
كل واحد يريد غرفته هيج شكل ..
جنت فرحان واني اسمعهم وبأذن الله مااقصر عنهم ..
..الفلوس الي مجمعهن راح ابني الاساس واخذ xxxxي ..
واذا عزت اخذ من الفلوس الي بقن من حصة اني وحلمي احققة اول وتالي بس تخلص هاي السنة ..
من فرحتي ولهفتي ماگدرت انتضر شفت مهندس شاطر ورسم خريطة حلوة ونفس حلم اخواني ..
غرفتين جوة الامي ودرة ..
والطابق الفوگ نفس الجوة بس ثلاث غرف مو اثنين ..
واهم شي الحديقه امي مشتهيتها من زمان ..

اني دوام وجامعتي بالكوفه اضطريت امشي ..
بس سلمت كلشي بيد يوسف والشيخ هم الي يشرفون ع البناء ..
اخوتي هم وصيتهم ..
اني ماجنت ابات بالاقسام اخلص الكلية وارجع ..
سيارة الشيخ عندي ..

مرت اشهر والبنيان شبه اكتمل بفضل الشيخ الي سهل معامله الxxxx ..
بس النواعم البقت هواي لبخ وصبغ والارضيه والكهربائيات هاي كلها وبعد هواي نواقص ..
وعدت امي للصيف تگعد بي ولازم اوفي بوعدي ..
بس الاوضاع بالعراق ماتطمن ..
وموزينة حيل ..
والي خايفين منه صار ..
بيوم من الايام ومن الفجر واحنه نايمين وسمعنا الغارة تطافرنا كلنا ..
الشيخ نبه محد يطلع ..
فتحنا الاخبار ..
شفنا اعلان الحرب ..
تأثرنا حيل وضجنا ..
الشيخ .. يبعد ابوي اسمعوني .. الوضع تخربط مدارس وكليات ماكو هالتشوفون الوضع ..
وهالمرة حاسها غير كل مرة ..
الي اريدة منكم ..
تلمون غراضكم على كيفكم ..
وباجر من الفجر نطلع للمزرعه ..
تاخذون النسوان والبنات هنا امن ..
ام مرزا .. وانت حجي ماتروح ..
الشيخ .. اني ومرزا وحمزة نبقى هنا ..
امير .. اذا بقيت بوية كل احنه وياك مانعوفك ..
الشيخ .. شگلت اني يبعد ابوي مو گلت لاتعاندون اني مااريد الناس تگول الشيخ مجيل شرد من اول غارة ..
راح ابقى هنا واساند محافطتي ..
واذا الوضع تخربط كلش اني اجي وراكم مااعوفكم ..
ام يوسف .. جا اني ابقى يمكم منو يطبخ هنا ..
الشيخ .. لا انتي روحي وي امهاتج وياقوت ..
حمزة يروح يجيب مرتة يمنا ..
حمزة .. بس بوية ..
الشيخ .. صار كم شهر معاقبها والوضع هسا يختلف روح جيب مرتك وام جهالك وخليها يمك ..
هاي دنيا مانعرف نموت لو نعدل ..

مرزا .. جا اروح وياهم باجر اوصلهم واجيب كم صندوگ من المحاصيل واجي تفيدنا هنا منو يگول اكو سوگ هنا ..
درة .. بدينا نلم غراضنا ضجت حيل لأن راح نعوف بيتنا ومدرستي ..
بس الي مريح گلبي اخواني وامي ويوسف يمي هناك ..
طلعنا من الفجر والغارات ماسكتت ..
وكل شوية مرعوبين ..
خالو مرزا الطريق كلة يوصي بالولد مايطلعون عن المزرعة ..
وصلنا للمزرعة ونزلنا الغراض ..
ورتبناهن ..
الغرف مو هواي ..
فكل مجموعة بغرفه والولد بالمضيف الخارجي گعدوا ..
للعصر كلها تجمعت اجن خالاتي كلهن منال ونضال واقبال وجهالهن ..
رغم لمة حلوة وانجمعنا بس بالنا يم الشيخ وهذا الي مضوج الولد ..
امير ويوسف لازمين الوضع كله ..
والبقية يفترون حراسات ..
البيت خنگة صار من الجهال والهوسة ..
طلعت وجان المغرب اتمشى شوية ..
وشفت خيال وراي طفرت ..
وگمت اصيح بسرعه سد حلگي شبيج فضحتينا ..
من سمعت صوته هدات ..
سحب ايدة . شعندج طالعه مو كلنا لاتطلعن ..
درة .. اختنگت بربك ادخل جوة وشوف الهوسة ..
يوسف .. ميخالف لازم نتحمل شدة وتگضي ..
درة .. صح هنا حلوة ومجموعين كلنا بس اشتاقيت للديوانية وبيتنا ..
يوسف .. بالعكس اني عندي هنا احلى قبل ماجنت اشوفج هواي ..هسا كل يوم وكل لحظة گبالي ..
درة .. ماافتهمت ..
يوسف .. درة اني احبج ..
درة .. شنو هالحجي اني رايحة ..
سحبني من ايدي .. درة لاتصيرين زعطوطة .. انتي كبرتي واني مو نيتي العب عليج اريدج مرتي وحلالي بس صارحتج هسا لأن مااتحمل بعد اريدح تعرفين نيتي اتجاهج ..
من يوم الي اجة ابوج وراد ياخذ خفت ترحين وياه واخسرج ..
لهذا هزيتلج براسي وطلبت منج ماترحين ..
درة .. بس اني بقبت علمود اخواني وامي ..
يوسف .. المهم بقيتي .. درة لاتفهميني غلط اني متردد افاتحج لان انتي اخت امير ومااريد اخون ثقتة ..
وهالحجي اريدة يبقى بينا الى ان تخلص هالشدة ولمن تتأكدين من مشاعرج ..
وصدگي اذا گلتي مااريدك انسحب من حياتج ومااضوجج .
هو يحجي واني احس وجهي صار جمر . مااعرف شصارلي ادية جمدن من الخجل .
حسيت واحد شافنا ومشا ..
خفت عفتة ورجعت للبيت اركض. .
ارتطمت بعبد الله ..
-على كيفج شبيج جن شايفه جني . اكو شي صاير ..
درة .. ماكو شي وخر خليني اعبر ..
عفتة ودخلت للغرفه وگلبي يدگ حيل ومامصدگة الي سمعته ..
معقوله يوسف يحبني .. اني اكيد بحلم .
يوسف الي يعتبرني مثل اخته وماحسسني بيوم بشي زين ليش هسا گالي وشمعنى اختار هيج وكت ..
حسبة تاخذني وحسبة تجيبني ..
دخلت سدن ..
ارتاحيت من شفتها جنت محتاجة احد احجيله ..


بقلمي_الكاتبة_شمس
يتبع .…