[لامارا]

//// البارت الثامن عشر ////
عجـاف_القلـوب ..
الكاتبـة_شمـس ..

الشيخ .. اگعدوا ولاواحد يطلع بيكم اخاف هذا كمين وتنغدرون ..
قرر يطلع بنفسة رغم الكل عارض ..
بس ماراد يضحي بأحد ..
فتح باب المطبخ وشاف طابوگة ملفوف بيها ورقة ..
فتحها ..
مكتوب .. دمكم مهدور .. عدنا ثار ولازم ناخذة ..
مرزا .. بوية شنو هذا ومنو الي يتجرأ ويدز هيج ..
الشيخ .. شتحجي انت بوية البلد سابت وياهو العندة حساب ولو صغير راح ياخذة لأن يعرف ماكو عقاب ولاحكم ..
حمزة ..وهسا شنسوي ..
الشيخ .. مايصير الا الي الله كاتبة وكلمن حد يومة ..
اهم شي تفرغون البيت من النسوان مااريد وحدة هنا وتتأذة ..
امير .. الصبح اخذهن البيتنا كلهن وانت هم وياهم روح بوية ..
الشيخ .. تريدهم يگولون الشيخ خاف وشردت ..
مرزا .. بوية مو وكتها احنه بينا حيل واذا صار شي نشرد ماينخاف علينا ..
الشيخ .. لاتحاول ادري بروحي كبرت بس مو عاجز انه ادافع عن بيتي وعايلتي ..
اسمعوا اگلكم ..
كلكم ترحون البيت ياقوت باجر وبس اني ومرزا وحمزة نبقى هنا ..
امير .. اني مااعوفك لو للموت ..
يوسف ..ولااني ..
الشيخ .. بوية لاتعاندون اريدكم هناك يم امهاتكم واخواتكم ..
امير .. هناك علي وحيدر وعبودي يبقون ..
مرت حمزة .. حمزة اني اخذني وجهالي الاهلي مابايعه روحي ..
حمزة .. فاطمة وينة وين اهلج هسا .. عود روحي باجر البيت ياقوت وبعدين نشوف صرفه واوديج مااگدر هسا اخذكم ..

الشيخ .. يله بوية روحوا ناموا وانت امير لاتطلعون هسا باتوا هنا الشارع ليل ومو امان ..
امير .. يمة ادخلي انتي ودرة ناموا جوة واني ويوسف راح نصعد للسطح ..
الشيخ .. اخذوا بطانيات وسلاح وياكم ..
وانتن لاتوصلن يم الشبابيك لاتجيجن تايهة ..

امير .. اخذت يوسف وصعدنا .
بقينا نراقب من السطح لايجي احد ..
شوية وشفنا طيارة امريكيه فوگانا تفتر ع البيوت ..
بسرعة تغطينا وضمينا الاسلحة لانبين ..

درة .. بقى بالي يم يوسف وامير فوگ وخايفه عليهم ..
حاجيت سدن .. گالت امشي نسويلهم جاي بالترمز ونصعدة ..
ردنا نصعد صاح بينا الشيخ ..
وين موليات .. مو گلت لاتطلعن ..
سدن .. جدو سوينا جاي الامير ويوسف خطيه ..
الشيخ .. عوفيه هنا هسا اصيح عبد الله ياخذة ..

صاح عبدالله اخذة وصعد واحنه رجعنا للغرفه والكل جان گاعد ومايجينا نوم ..
ام يوسف .. سدن يمة لمي ملابسج وكتبج بالجنط مو هناك وتگولين نسيت حاجة محد فارغ ..

گعدنا اني وسدن نلم بملابسها وكتبها ..
امير اني ويوسف كلمن ماخذ طرف وگاعدين نراقب ..
وعيونة تترقب الشارع بخنسة ..
ومانشوف الا صوت ورانا….. صاح بببع احنة جنا صافنين فزينا على صوتة ..
عبدالله .. هههههههه والله يربي فوگاها مسوين ارواحتهم سبع البرمبة وهم من صوتي فزوا وخافوا ..
يوسف .. انجب ولك عمت عينة الي يخاف .. لو بيك حظ جان اجيت ويانا مو خاتل جوة يم النسوان ..
عبد الله .. مخلي الرجوله الك ..
امير .. انت ماخفت على روحك لو رامين عليك ..
عبدالله .. دعرفوا الزموا السلاح يلة ترمون ..
يوسف .. انزل ولك لا هسا اروايك شلون نرمي ..
هز ايدة ونزل ..
اني ويوسف واحد باوع للثاني وضحكنا على روحنا ..
امير .. ولك هذا عليمن طالع ماتگلي شمايكبر عقله يصغر ..
صعدوا حيدر وعلي بقوا شوية ونزلتهم ماخليتهم ..

للفجر .. ولمحت سيارة وگفت شوية يم بابنا ..
واحد بالصدر مد راسة ويياوع منا ومنا ..
شمر شي ع البيت وشخطت سيارتهم ..

صحت يوسف ضم راسك .. رميت وراهم مالحتهم ..
نزلنا راسنا بسرعة وركضنا للبيت ..
حسينا البيت انهز بينا ..

الشيخ .. منهو عرفتوهم ..
امير .. جن شايفه بس مااعرف وبسرعه شخطوا ومشوا لو زلم صدگ جان واجهوا ..
النسوان يتصارخن ..
ومرت خالي حمزة وگعت والتهوا بيها ..
شفت سدن ودرة يتباجن ..
مااتحملت ..
سحبتهن اثنينهن الصدري جانت درة على صدري وسدن وراها ماهان عليه الزمها بس گمت امسد ع راسها واهدي بيهن ..
اششششش لاتخافن كافي ماكو شي ..
صحت حيدر گتله خليك يم البنات ..
وفتحنا الباب وطلعنا ..
باب الشارع اعوج من الضربة ..
الشيخ .. رمانة صوتية هاهي .. ذولة غايتهم مو كلنا لو يردون جان ضربوا رمانة بنص بيتنا بس عندهم غاية ..

التمت الناس الصبح وكلها تتحمد النا بالسلامة ..
والعشيرة كلها انگلبت علينا ..
قرروا يبعدون الشيخ من المنطقه لان خاف هو المقصود وجندوا من العشيرة زلام تدافع ويانا ..
بوكتها كلمن يحمي بيته واهلة بذراعة ماكو واحد يدافعلة ولااكو شرطة تحميه ..
الشيخ ماقبل بس بعد ماشاف كلها مصرة وافق على عيونة ..
ويمشي ويوصي بينا ..
اخذنا النسوان كلهن البيتنا ..
وامي تبجي وتوصي بيه ..
واحنه الولد مسويها وجبات ناس تنام وناس تلزم حراسات ..
يومين وماكو شي هدوء ..
واحنة ملازمين الحراسة واسلحتنا على متونا بس بداخل البيت وبالسطح مانخلي واحد يحس بينا ..

يوسف .. رغم الي احنه بي وضرفنا .. كتلني الشوگ وحن گلبي ..
گتله امير اني رايح البيتكم اشوف امي وبيبياتي واجي مااتأخر ..
امير .. روح اخوي البيت بيتك وسلملي على امي وياك ووصي اخواني لايطلعون خليهم من الدوام للبيت گبل والبنات من تبدي امتحاناتهم احنه ناخذهن ونجيبهن ..

يوسف .. صار خوية ..
مشيت وجن الطريق صار شطوله ..
دگيت الباب ماكو احد فتح .. ماردت ادگ الجرس اخاف يگعدون ..
سمعت سدن تصيح منووو ..
يوسف .. هذا اني افتحي ..
فتحت الباب ..
يوسف .. ليش الولد وين ..
سدن .. خطية نايمين لأن بالليل يسهرون والصبح علي يروح للدوام وحيدر يقرأ وعبدالله نايم هم ..
ودرة وين ..
سدن .. احم احم اي گول هيج من البداية ..
جاي علمودها .. جاي تقرا انت ناسي بعد يومين امتحاناتها تبدي ..
يوسف .. زين سويلي اي شي جوعان وبطريقج صيحيها ..
درة .. گاعدة اقرأ وبالي يم امير ويوسف .. صار يومين ماشايفيهم ..
واجت سدن تأشرلي ..
جانن حوراء وزينب وامهن نايمات ..
گمت ع كيفي وطلعت من الغرفه ..
دخلت المطبخ وشفت يوسف .. شهگت احس روحي ردت مو كم يوم ماشفتة جن سنين ..
ابتسم مثل عادتة بوجهي ..
دنگت والابتسامة تارسة وجهي ..
گتله .. امير شلونة ليش مايجي ..
يوسف .. يعني اشتاقتيله ..
درة .. ياااا شلون مااشتاقله هذا روحي ..
يوسف .. هنيال امير عمي .. ترى بديت اغار هاااا
درة .. الاحسن ماتغار منه لأن راح تتعب ..
يوسف.. هههههه اويلي يابة .. هو اني حاس راح اتعب بس الخاطرج يهون كل تعبي المهم بالاخير اثنينة بيت واحد وتجمعنا غرفة وحدة ..
هو يحجي واني ارتبكت مااعرف شأرد ..
سمعت صوت خاله فاطمة توترت ردت اطلع شفتها اجت سدن قبلها ووراها هي وسدن تخزر بيه ..
باعوتلي وباوعت اليوسف ..
-هذا يوسف هنا .. وعينها عليه ..
-اي عمة شلونج
-زينة بس شعجب جاي هسا بالضهرية .. وليش گاعد هنا -هذا وكت فراغي عمة ..
-هااااا وانتي مو عندج دراسة وامتحاناتجن عگب باجر ماترحين تقرين ..
سدن .. هو جنت اقرأ الضهرية بس لو مگعدة حوراء وزينب لأن فاتهن وكت هواي ..
ماعجبها حجي دارت وجهها وراحت ..
ويوسف طاگ من الضحك هو وسدن ..
يوسف .. اموت عليج ..
انصدمت وفتحت عيوني .. اشو هذا ماخذ راحته يم سدن
سدن .. اگلك سوفي ترى اني موجودة وياكم وبعدني بنية وشابه واستحي واخجل وعندي مشاعير واحاسيس ..
ضحكنا عليها… ..
يوسف .. ام مشاعير روحي من وجهي واخذي دورج بالمراقبة اريد غداي من ايد حبيبتي ..
درة .. لا عفية خليها يني توگف عيب لايجي احد وخاصة عبودي يبوووو اذا شافنة ..
يوسف طبگ حواجبه ..
بعد يتعرضلج ..
درة .. ها لا مالي علاقه بي ..
سدن .. اي… . قاطعتها يله خلينا نصب الغدا ..
اشرتلها تسكت لأن مااريدهم يتعاركون بسببي ..
عبودي عندة غاية بس اني اعرف شلون اردة وماانطيه مجال وهو لازم عليه سالفتنا اني ويوسف ويهدد بيها عباله اخاف ..
مايدري اذا طخت براسي اروح بنفسي اگول الامير ولااخليه يهددني ..
كملنا الغدا .. گال خلنة الي بصفر طاس اخذة مناك خاف واحد جوعان ..
خليناه اله ..
اشرلي اوصله للباب ..
بقت سدن بالمطبخ وطلعت وياه ..
يوسف .. درة اي شي تحتاجيه گولي لاتستحين مني امير صح مايقصر بس اريدج تخليلي مكانه عندج وتطلبين مني كلشي تحسسني انه انتي الي واني الج ..
درة .. مادامك بخير مااحتاج شي .. يكفيني حبك الي بعد شأطلب ..
يوسف .. وديري بالج على دراستج لاتخلين واحد يشغلج واني هم فترة الامتحانات راح ابتعد عنج حتى ماالهيج ..
درة .. يعني مااشوفك ابد ..
يوسف .. لا تشوفيني لان راح اوصلجن للمدرسة بيدي اريد اكون اخر شخص تشوفيه من توصلين ..
ابتسمت اله ..
يوسف .. يله اني اروح بعد مااوصي ..
درة .. سلملي على اموري ..
يوسف .. يوصل ..
مدري ليش اتمنيت يبقى اكثر احس گلبي نغزني ..
ردت اشبع منه ..
يوم عن يوم احس روحي تعلقت بي .. صرت مااشوف غيرة بعيني ..
دخلت صار گبالي عبودي ..
-هاااا وين جنتي ..
مااهتميت وردت ادخل المطبخ ..
-ودعتي .. يعني ماتبتي من الي قبلها ..
-عبد الله انت شتريد ..
-مااريدح تعيشين بأمل يوسف .. ترى يوسف مو الج ومستحيل ياخذج ..
-وانت شمدريك تعلم بالغيب .. يكفي انه حجة وي الشيخ بية ..
-لاتنسين حوراء محجوزة الة والكل راح يعارض زواجكم ..
-هاي سوالف ضحك ومال اطفال .. وبعدين انت هم گالوا سدن الك شو مايوم ذكرتها وردتها ..
-لا يابة هاي تفرق .. سدن تكبرني بأشهر ومغرورة مااريدها اني تعجبني الطويرات الصغار ..
-احترم نفسك لاوالله اروح للشيخ واگله بنفسي ..
ضحك بأستهزاء ودخل ..
دخلت ضايجة منه ..
سدن .. هذا شبي شيريد ..
درة .. تمادى هواي هذا شأسوي ..
سدن .. عوفيها وراي اني راح احجي وياه . هو يسوي هيج لأن جدي ماهو .. مو ردت اگول اليوسف بس انتي سكتيني ..
درة .. لا يمعودة وهم يتعاركون وتطلع بسببي ..
خلي تخلص الامتحانات وهاي الهوسة على خير واخلي يوسف يحجي وي امير حتى نرتاح ومايضل كل شوية مهددني ..

يوسف .. بعد ماشفت حبيبتي روحي ردت الي.. اخذت الاكل ورحت للبيت ..
شفت سيارتين مرن يم الباب فترن وبعدين شخطن ..
وواحد بيهم اشرلي بطريقة استفزازية ..
ركضت ردت اعرف رقم السيارة مالحگت ..
دخلت للبيت سولفت للولد. .
امير گال .. ماشفت شكلهم ..
يوسف .. شكلهم مو غريب عليه شايفهم بس وين ؟؟
امير .. اني هم احس روحي شايفهم ..
مقداد .. معقوله خاف من اهلك امير ..
امير .. لا يابة ذولاك جبنة مو مال هيج .. بس ماادري كلشي يصير ..
المهم خلونا حذرين والليلة لازم وراهم شي هالاجوا هسا احتمال يجسون نبض ..

اكلنا لگمة وكملنا ..
يوسف .. امير صدگ دزولك سلام ..
ضحك .. درتي موووو شلونها مشتاقلها ..
يوسف .. جاي تقرا عگب باجر امتحانها ..
امير .. وامي شلونها والولد ..
يوسف .. ماشفت احد كلهت نايمة بس سدن ودرة گاعدات ..
امير .. هاااا يعني زينات اثنينهن مووو ..
يوسف .. لا زينات الحمد لله ..

امير .. من جاب طاري سدن رف گلبي .. صح مااحجي ولاابين مشاعري بس من اشوفها ترد روحي ..
جنت اسرق نضراتي الها من بعيد واحفظ كل حركة بيها وحتى طريقه حجيها مرسومة ببالي ..
ومن تضحك تخلي ايدها على حلگها ومن تتوتر لو تضوج تبقى تفرك بأصابعها ويصيرن حمر ..
كلشي بيها حافطة حتى دگات گلبها ونبضاته ..
يوسف .. اميررررر وين صافن لازم عاشگ ..
امير .. هنيال الي يعشگ ويحب ليش هو اكو احلى من هيج نعمة ..
يوسف .. اي بالقرآن .. وخاصة اذا حب طاهر وتدري بي يصير حلالك ..
امير .. اي بعلي وخاصه اذا مترباية گبال عينك وتعرف اطباعها كلها ..
يوسف .. امير ماادري ليش احسك تلمح الشي ..
امير .. لا ولك شلمح غير انت تحجي واني اسايرك ..
يوسف .. للحظة حسيتة يقصدني بكلامة او يريد يجرجرني بالحجي ..
ردت احجي وسكتت ..
امير .. ها يوسف شبيك شو مو على بعضك ..
يوسف .. لا ماكو شي .. خلينا ننام ساعة نرتاح بالليل ورانا سهر ..

نمنا وگعدنا بالليل لگينا الولد شاعلين المنقله ويشوون ..
امير .. هاي شني اليوم فحم وشوي ..
خالي مرزا .. الولد اشتهوا دجاج ع الفحم ..
صارلنا كم يوم بقلق وتوتر خلونا نغير جو شوية ..
يوسف .. اي بس لازم اثنين يبقون فوگ يراقبون مايصير هيج الضهر شفتهم ..
اووووووه تذكرت ..
امير .. شكو ..
يوسف .. تذكرت وين شفتهم ومنو ..
حمزة .. منوووو احجي ..
يوسف .. الي تحارشوا بالبنات بالكورنيش وضربناهم واشتكوا علينا والشيخ فضها ..
امير .. اي بعلي همة خاصه هذا ابو كفشة واني اگول وين شايفه ..
يوسف .. انذااال يراويني وجهة عود يهدد وماخايف لو زلمة جان اخذ ثارة بذاك الوكت مو هسة لمن الوضع ساب ..
مرزا .. انتو ابقوا هنا وخلو بالكم ..
بوية مقداد انت والولد اصعدوا فوگ ..
وامير ويوسف والبقية ابقوا هنا بالحديقه ..
وحمزة خلي بالك ع الولد مو تعوفهم ..
اني اروح للشيخ مااتأخر بس لازم انطيه علم حتى يدز طارش العشيرتة ويعرفون احنه كشفناهم وي شي يصر همة المسؤولين ..

راح خالي مرزا واحنة التهينا بالعشا تعشينا وكملنا گلتلهم يله يولد اتطشروا كلمن المكانة ولاتعوفوه مدام هذولة هددوا معناها جايين الليلة ..
حمزة .. امير هسا بعد وكت اذا يردون يسووها النص الليل حتى الكل نايم ..
امير .. خالي ذولة هتلية ويغدرون سووها كم مرة بتوالي الليل وقصدهم يوهمونا .
يوسف .. اي صحيح لو صدگ يخافون ماطلعوا بوجهي الظهر ..
حمزة .. لاتكبروها يمعودين اخذوا حجايتي .. انتو خليكم بمكانكم واني اروح للبيتكم شوية واجي بس اشوف امي والبنات اشتاقيتلهم.

راح خالي حمزة ..
والولد فوگ ..
واني ويوسف والبقية نفتر بالحديقة ..
سمعنا شخطة سيارات ..
مقداد من فوگ صاح ..
امير اهجم ..
سحبنا اقسام بعدنا ماضغطنا ع الزناد .. واجانه الرمي من كل جهة صار الرمي مالة والي ..
مانعرف ياجهة ترمي ..
گلت للولد اتراجعوا لورة ..
واني صعدت لفوگ ..
مقداد يصيح ويگلي نزل راسك ..
واني اضرب بلا وعي ..
الحيطان زرفوها تزرف ..
گمت اوجه سلاحي على سياراتهم ..
واصيح على يوسف والولد يدخلون ..
لو ذولاك بايعين روحهم ..
بس يوسف عاند وبقى ..
كلنا نصيح يوسف وماكو ..
من صوت الرمي واحد مايسمع صوت الثاني ..
لمحت ابو كفشة ..
صعد ع الحايط واني ضربتة وحدة مااعرف وين طاحت بس رجع يزحف للسيارة
يمكن صارت برجلة ..
لأن اول ماخلة رجله ع الحايط راد يصعد ضربتة. .
العتاد راح يخلص عدنا والانذال حاسبين حسابهم ..
المشكله لا اكو ناس تطلع ولا جار ولا شرطة ..
تايهة ودليلها الله ..
صار صياح بينهم ويمكن عندهم مصاويب لأن احنة مسيطرين من فوگ نرمي ..
ركبوا سياراتهم .. ومشوا ..
اخذنا نفس وگعدنا على حيلنا بالسطح ..
تذكرت يوسف ..
گلتلهم يوسف ماصعد وينة ..
طفرت وركض نزلت للبيت سويت الطريق خطوتين ..
واصيح يوسف يوسف ..
اباوع للجام كلة مكسر مال المطبخ والاستقبال والحيطان مزرفه ..
وصوت يوسف يحجي بثگل ورى المطبخ ..
ركضت اله واشوفه سابح بدمة وگوة يحجي وياخذ نفس ..
گمت اصيح والطم على راسي ..
يابوية ولكم شوفولنا سيارة بسرعه ..
يوسف خوية اتحمل .. اروحلك فدوة تحمل .. ولك ليش بقيت مو گتلك ادخل ادخل ..
ريتني اني بمكانك سابح بدمي ولادمك ..
نزعت الغترة الي لافها على راسي ..
واريد اوگف النزيف مااعرف وين ومنين ..
بهاي الاثناء اجت الشرطة ..
وبدت الناس تطلع وتشوف شكو ..
خليته على ظهري ومقداد ساندة ..
واخذنا واني اصيح افتحولي سيارة بسرعه افتحوا ..
اجة جارنا جاب سيارتة خليناه بيها ..
والشرطة تحجي ويانا وتگول لازم نعرف الي صار انتضروا ..
صحت بوجهة ..
توخر لو افلش وجهك .. ولك بالساعه يرمون علينا وهجموا البيت على راسنا وين جنتوا ..
هسا جاي تستفسر واخوي يموت وخر عن وجهي دفعته وصعدت واني دموعي تجري ..
ولكم هذا اخوي .. وعضيدي الماجابتة امي ..
وبينا سوية ع الحلوة والمرة ..
اطباعة اعرفة ويعرف اطباعي يفهمني من النضرة ..
شلون اعيش اذا صار عليه شي ..
يربي احفظة وانطيه من عمري على عمرة ..

بقلمي_الكاتبة_شمس
يتبع ..