[لامارا]

#الكاتبة_نهى_الحسون
#قضية_لم_الشمل
#البارت الثاني

مساء الانوار والخير والمحبة والتعاون عليكم احبتي
((يااااااااااااا بناتي ويا خواتي يااااا خالاتي. يااااا اخواني المتابعين بطلب من المتابعين اكثر من رسالة وصلتني عالخاص
يكولون ست نهى عفية الي قاري القصة قبل
لا يعلقون بأحداث القصة حتى لا يحرك عليهم الاحداث ))
اما انا عني ما راح يفرق عندي اذا تكلمتوا او لا
لان الكل يعرف انا عندما اسرد القصة سوف تكونون معي على ارض متحركة غير مستقرة ولا يسعكم
الا متابعة القراءة وكأنما تقرؤنها اول مرة
وشكراً


كان وجه رانيا مخطوف لونه وبساعتها عرفت ان هذا اليوم ما راح يعدي على خير
وساعتها انقلب عيد رأس السنة من اجواء احتفال وفرح الى اجواء نار وغضب وكابوس
ورانية انهارت وحرگت الدنيا ولمت
ملابسها وطلعت زعلانة واخذت وياها جلال
كانت هاي الليلة اسود ليلة بحياتي مصيبة ووكعت على راسي وبعد ما رانيا تركت البيت وطلعت زعلانة
رحت وية ام سهير الي تنتظرني حتى اروح وياها كانت خايفة على بنتها
وصلنا للمستشفى الي بيها سهير
ووقعت على مسؤليتي حتى يجرون عملية
ما انتظرت الى ان تخلص العملية وتولد راسا طلعت من المستشفى اريد الحك على رانيا عند اهلها حتى افهمها كلشي
بس مع الاسف طلعلي اخوها كان كلش معصب وكال ماعندك مرة يمنا وصار يغلط ويتجاوز
مجاوبته وكلت حقهم يعصبون لان هاي اخته والي سويته انا ما ينسكت عليه
كلت خلي اتركهم بلكي يهدؤن واعرف افهمهم وصرت اعض ايدي من الندم شلون طلعت الامور من ايدي من دون ما احسب حساب لهذا اليوم الي تعرف بي رانية
يوم ثاني الصبح كعدت من النوم على صوت النقال يرن وكان المتصل ام سهير تطلب مني الحضور للمستشفى حتى اوقع على بيان الولادة
رحت للمستشفى وامها كانت منتظرتني بالاستعلامات
راسا اخذتني لمكتب الموظفة
انطيتها بطاقتي الشخصية حتى تاخذ المعلومات منها وتملي بيان الولادة
واني كنت بحالة غريبة متوتر ومخبوص ما اعرف ليش كل هذا صار وياية
كل شي انقلب ضدي وانا ما متعود تصير الاشياء غصب عني
سحبت جيكارة من الباكيت اريد ادخن احس بروحي صدري عليه حجر
بس الموظفة طلبت مني اوقع على البيان اطلع ادخن خارج الغرفة
طلعت وتركت ام سهير عندها هي الي تكمل المعلومات الباقية
سمعتها سألت
.. شنو اسم المولود
جاوبتها ام سهير.. نور
كتبت الاسم
واني وكفت انتظرها برة على جهة واني عقلي مشتت
وكل شوية اباوع لساعتي بأستعجال اريد بس اخلص من الاجراءات حتى اروح اشوف رانيا بلكي هسة هدأت واكعد اتفاهم وياها خايف تسافر للموصل وتتركني لان اهلها رجعوا للموصل وحتى اخوها كان بوقتها يريد يرجع
بعدما خلصت الاجراءات وطلعت ام سهير من عند الموظفة وانطتني هويتي
طلعت فلوس من جيبي وحطيتهم بيد ام سهير
.. خالة خلي هذا المبلغ جوة ايدكم اخاف تحتاجون شي
وان شاء الله اني ابقى على تواصل وياكم
درت وجهي اريد اطلع
صاحتني ام سهير وكالت
.. متدخل تشوف سهير وتتحمدلها عالسلامة
هي بحاجتك البارحة طول الليل وهي تصيح بأسمك
كان من غير اللائق ارفض طلبها رحت دخلت على سهير كانت تعبانة ووجهها اصفر شاحب من اثر الولادة
كان يمها طفل صغير بالكماط
.. الحمدلله على سلامتج ومبروك ما اجاج
همست بضعف مصاحب للأمل
.. مؤيد انت اجيت كنت اعرف انت راح تجي
عفية كلي انت اجيت حتى تبقى وياي
امها طلعت وتركتنا لوحدنا
من سمعت كلامها حسيت بروحي نذل متحملت ابقى كرهت روحي ورطت بنات العالم وما وفيت لأي وحدة بيهن لاهن مرتاحات وياي ولا انا الي كدرت ارتاح وياهن
يعني ما اكدر اعيش لا وياهن ولا اكدر اعيش بدونهن
صدك معادلة صعبة شكلها هاي حوبة زهرة المسكينة
طالت حياتي
درت وجهي ما اريد اعشمها واخليها تبني امل
وجاوبتها
راح اتفق وية المحامي يرتبلج مصرف انتي والطفل
سهير بصوت مكسور
.. يعني شنو افهم من كلامك راح تتركنا
.. سهير انا من البداية فهمتج شنو شروطي
ولا تتوقعين ان ولادة الطفل راح يغير شي من قراري ويكدر ويرجعنا سوية لبعضنا اني احب رانيا وانتي تعرفين هالشي زين
باوعت عليها كعدت تجمع بقايا كبرياءها المكسور
.. انت من شنو مخلوق
شنو هالقساوة الي تملكها
صدمتي بيك خلتني اعض ايدي من الندم كل يوم
على كل لحظة ضيعتها من حياتي وياك طلعت انسان ما تستاهل حبي لك
قاطعت كلامها
.. ما الومج على كلامج انا هم متندم على الي سويته بيج وبرانية بس لتخافين انا صحيح ما ارجع وياج
بس بالمقابل ما راح اقصر وياكم انتي وابني راح اجريلكم مصرف شهري وعندج رقمي اذا تحتاجين اي شي تكدرين تتصلين
سكتت ومجاوبتني نظرات عيونها بيهم خذلان وكره وشي ثاني مجهول ما عرفته انتبهت على حركاتها
قربت الولد وضمته حيل لحضنها
وكأنما تخاف اخذه منها
.. ما اسمحلك تاخذه........
قاطعت كلامها حبيت اطمنها
.. لتخافين ما راح اخذه منج هو مو بنية حتى اخذها منج
انتبهت عليها تباوعلي بصدمة يمكن بينها وبين نفسها حست بعد ماكو كلام ينكال بخصوص هذا الموضوع
انتظرت دقيقتين
كان الصمت سيد الموقف والظاهر صار لازم اروح سلمت عليها وطلعت
ومن بعدها التهيت بمشاكلي انا و رانية
فاجئتني من رفعت علية دعوة طلاق وانا بكل عناد رفضت اطلكها بس هي بقت مصرة
حاولت اضغط عليها واستخدمت كل وسيلة متاحة حتى اثر عليها
اخير شي
جربت استخدم ابني جلال حتى اضغط عليها
اتصلت عليها وكلتلها
.. خلي ببالج اذا طلكتج جلال يبقى عندي وراح تخسرين كل حقوقج
خليت كل هاي الشروط حتى اجبرها ترجعلي
بس هي كانت اكثر عناد تركت جلال عندي
وبأول اسبوع جلال اتمرض وانا هواي اسافر ودائما اتركه عند الخدامة او عند والدتي
بس امي كانت مرة كبيرة بالعمر
و اختي اسيا كانت متزوجة بالكوت هناك مستقرة هي وعائلتها واخوي المرحوم ابو ريم كان ملتهي بدراسة الدكتوراه ،وصادف كان متزوج جديد
وانت يابو سيف بعد تعرف انا ماعندي بس اخ واحد
ومن رجعت من السفر وشفت جلال بحاجة امه وصحته انتكست وعرفت بلحظتها انا
ما اكدر اربي طفل صغير وانا لوحدي مستحيل ما اكدر اترك شغلي واكابله واكعد
وقررت اتنازل واتصل على رانية وكلتلها على وضع جلال كالت
.. عرفت بيك ما راح تدبرها لان انت مو كفو مسؤولية
بيت وعائلة
.. رجعيلي وخلينا نفتح صفحة جديدة وكلشي ينحل
بس كان جوابها الرفض والصد جنت متوقع هذا ردها بس كلت احاول يمكن تحن وتقبل ترجعلي
جاوبتني
.. مستحيل ارجعلك لو اعرف حياتي تعتمد على هذا الشي
وحاولت وياها من درب ثاني يمكن يفيد
.. شوفي راح انطيج جلال يبقى عندج بس خلي ببالج
النفقة راح تكون فقط لجلال
كنت متمسك بتهديدي هذا لحد اخر لحظة
على أمل ان اضغط عليها حتى تستسلم وترجعلي
لكن صدمتني بموافقتها
.. خلي فلوسك الك حتى نفقة جلال ما اريدها صدكني ما اريد اي شي يذكرني بيك حتى لو كان هذا الشي فلوسك
وعرفت بوقتها انا خسرت رانية للأبد
واتنازلت عن جميع حقوقها هي وابنها بس بالمقابل طالبتني ان اتنازل عن حضانة جلال واوقع على ورقة تسمحلها بالسفر مع جلال لخارج العراق بأي وقت يعجبها تحسباً للظروف
اتذكر سألتها
.. ليش هذا الطلب شنو انتي ناوية تاخذين جلال وتسافرين للخارج
جاوبتني وكالت
.. بالحقيقة ما مقررة السفر لكن اذا قررت السفر
مستقبلاً فما اريد
ابقى اركض وراك حتى تنطيني موافقتك على سفر جلال وياي صدكني اني اريد اقطع اي صلة تربطني بيك واريد افض كل شي وياك حتى ما يكون عندي سبب يخليني التقي بيك
وبيوم شفتها بالمحكمة. وانا وقعت على شروطها
وقبل لا تطلع من المحكمة وكفت كدامي وحجت بقوة
.. انت واحد مغرور وتافه وحرامات هدرت احلى سنين حياتي مع واحد ما يقدر ولا يستاهل
كان المفروض ما اوافق بيك من يوم الي سمحتلك نفسك ان تطلگ مرتك الاولى وهي حامل بطفل
انا بهتت من كلامها معقولة كانت تعرف واني الي قضيت سنين زواجي وياها حريص ميوصلها خبر
..اي لتستغرب اني عرفت بأبنك بس عرفت بي متأخر مع الاسف
.. شلون عرفتي
.. الموظف الي كان عندك بالمكتب قبل لتسوي الشركه
من كنت تدز بيده الفلوس للبصرة اجاني هنا وكالي كل شي
سألتها .. وشنو هذا الي عرفتي
.. عرفت بكل شي عنك وعن ابنك الي ما شفته حتى من رحت وقعت على بيان ولادته مكلفت خاطرك تروح تشوفه وتطمن عليه بس تدري شنو
اهنيها لزوجتك الاولى هي كانت احسن مني بهواية
لان طردتك من حياتها وكملت طريقها من جديد وورفضت تاخذ منك اي مساعدة
واني الغبية كنت اتوقع من صار عدنا جلال
راح نكون اني وهو اغلى شي بحياتك بس مع الاسف كان لازم اعرف الي يبيع مرة يگدر يبيع الف مرة والنتيجة انت ما وفيت وياية ولا وية الي قبلي
وهسة اني راح اطلع من حياتك وتحلم اخليك تشوف طيفي
انت فلست من زوجتك الاولى وابنك وهسة راح تفلس مني ومن ابنك
والله اليعلم المسكينه الثالثة الي ولدت ومحد يدري بحالها هي وابنها
ووين راح يصفى بيهم الوكت والحال وشلون راح تكدر تربي الطفل لوحدها وهي ماعدها احد
وهاي اولادك صفو كل واحد بمكان عايش وحيد وية امه ماله سند بالحياة
والبركة بيك لانك انسان اناني وما تعرف قيمة النعمة الي انت عايش بيها
على فكرة النعمة مو بس المال
النعمة ان تكون عندك عائلة تحبك ترجعلها يومية اخر النهار ترتاح ببيتك وهم موجودين حولك
صدگني راح يجيك اليوم الي ينكسر بي غرورك وتكعد تتحسر عليهم
تتندم على الايام الي فرطت بيها واولادك بعيدين عنك
وبيومها لزمت ايد جلال بيدها وراحوا
وهذا كان اخر لقاء بيني وبين رانية
اما سهير من يوم الي تركتها بالمستشفى وانا بعد ما شفتها لان انشغلت بقضية طلاقي اني ورانيا وفاتت فترة تقريباً شهرين على اخر مرة شفتها رحت للشقة حتى اتطمن عليها
دكيت الباب ماكو رد استخدمت المفاتيح الاحتياط
دخلت للشقة سفتها مهوسة وماكلها التراب كانت مبينة مهجورة من فترة
استغربت وضع الشقه والسؤال سهير والطفل وين
تركت الشقة واتجهت مباشرة. لبيتهم القديم الي جانت ساكنة بي هي وامها
قبل لا نتزوج
وكلما اروح ادك الباب محد يطلعلي البيت فارغ ومرة شافتني جيرانهم كالت
انتقلوا لغير بيت وهذا البيت استأجره ناس غيرهم
فكرت اني وين ابقى ادور عليها. بنص بغداد
وانا عندي كومة شغل
ومن هذا اليوم سهير وابني فص ملح وذاب وما عرفت عنها اي خبر بالرغم دورت عليها بس الحقيقه
مو بصورة جدية يعني عفت الموضوع لهذا الحد
كنت متأكد هي من وحدها راح ترجع لان هي حالتهم ضعيفه
اكيد راح تحتاج فلوس او مساعدة مني بس هي ما رجعت ولا طلبت شي ومن عندها انقطعت اخبارها
ابو سيف .. والله يا مؤيد امرك عجيب بشنو جنت تفكر من اتخذت هيج قرارات بحياتك
ابتسم وكمل كلامه
.. واني البطران كل هاي السنين وانا احسدك على راحة بالك واكول بس مؤيد بينا يفتهم ما اتزوج وورط روحه بعائلة وزوجة واطفال وقضى حياته كلها سفر ونسة هنياله حر نفسه
طلعت انت داهية وانا ما اعرف
يعني لو اكعد اراجع كلامك الف مرة حتى اقنع عقلي ان الي مسوي كل هذا
هو نفسه صديقي مؤيد عقلي مراح يقتنع لو بعد الف سنة
مؤيد .. كل انسان له جانب مظلم بحياته
.. زين كلي شعجب ليش ما تعرف اماكن تواجدهم
يعني معقولة. طول هاي السنين محاولت
ولو مرة ان تتواصل وية اي واحد بيهم
.. ابو سيف انا بعد الي صار صفيت كل املاكي وطلعت خارج العراق. يعني مصارت فرصة ان اتواصل وبنفس الوقت انا ما كلفت نفسي وحاولت اتواصل وياهم انا اعرف بروحي مقصر وياهم وجاي متأخر
.. زين على الاقل كان اتواصلت حتى لو بس وية جلال
.. اي نعم انا فقط تواصلت وية رانيا حتى اشوف جلال مثلما اتعودت اشوفه بين فترة وفترة عن طريق المحامي يتم اللقاء وية ابني وهذا كله يعتمد على وقت فراغي حسب ظروف شغلي
مرة من المرات اتصلت على اهل رانية حتى اتفق وياهم على يوم اجي اشوف جلال طلعلي اخوها وكال رانيا سافرت للخارج واخذت جلال
.. يعني شلون تسافر خارج العراق بدون ما تنطيك خبر على الاقل تبلغك عن موعد سفرها مو تتركك تعرف بالصدفة
.. كلتلك قبل شوية اني اتنازلت عن حق حضانة جلال وانطيت الصلاحية المطلقة لرانيا ولها حق التصرف واتخاذ القرار بحق جلال
تكدر تكول طلعتها كانت هاي طريقة انتقامها مني
و اعترف انا كلش بحق اولادي وكل شي يصير بية عقاب نتيجة اهمالي لهم
بس صدكني كان كل اعتقادي هم ما يحتاجوني
كنت اقنع نفسي ان حياتهم بدون وجودي يمهم احسن
خليهم يعيشون عند امهاتهم احرص عليهم من عندي
وبالمقابل صرت اكفر عن ذنوبي
ببنت اخوية اليتيمة
ابو سيف .. وانا اكول ليش علاقته ببنت اخوه ومتعلق بيها
اشوفك شلون تعاملها بدلال طلعت تشوف بيها البديل عن اولادك
.. ما اعرف ريم يمكن جتني نعمة من الله
صحيح كان خبر وفاة اخوية فاجعة بالنسبة لي
يعني تخيل في ليلة وضحاها جاني اتصال يكلولي البقية بحياتك اخوك الدكتور محمد توفى بحادث سيارة هو وزوجته
رجعت بسرعة للعراق امي منهارة ومرتفع ضغطها وكانت نايمة مستشفى
اختي اسيا واولادها بالبيت ووياهم ريم
وبعدما خلصت الفاتحة اتفاجئت امي تحملني مسؤلية تربية ورعاية بنت اخوية المرحوم
.. مؤيد بنت اخوك المرحوم امانة عندك صونها وديربالك عليها
وفعلا من يومها صارت جزء من حياتي
وسفرتها هي وامي وياية للخارج هناك شغلي وبيتي
وامي بقت تعتني بريم وانا بقيت مثل ما انا
شغل وسفر وعلاقات عابرة
بعد ما مريت بثلاث زواجات فاشلة
قررت مستحيل اربط نفسي بوحدة .. وصرت اعيش مثل الطير حر اي وقت يعجبني افرد جناحاتي واطير
.. زين شلون دبرت امورك وية بنت اخوك من توفت والدتك
.. كان عمر ريم ١٦ سنة من اتوفت امي الله يرحمها واحتاريت
شلون ابقيها لوحدها واحنا بالخارج
بس اختي اسيا عرضت علية هي تجي يمي بعد ما رجعنا للاردن وتبقى يم ريم
طبعا اني اعرف اختي ضاجت من حياتها برة وهي متعودة يكون عدها جيران وصديقات
بس دائما تحاول تحسسني ان هي تركت اولادها وجتي حتى تبقى يم ريم
هي فعلا نقذتني بقرارها بس بالمقابل اني نقذتها من حياة ممله وحدها هناك
انهى كلامه وكال
.. اخذنا الحديث ودخلنا بمواضيع ثانية
خلينا بالمهم انا دزيت عليك حتى اطلب منك ان تبحث عن مكان اولادي واتمنى من خلال هاي المعلومات البسيطه الي نطيتها لك ان تكدر تبحث عنهم
ابو سيف .. سهلة بسيطة هاي عوفها علية ان شاء الله ادور عليهم واعرف اماكن تواجدهم
.. بس لا تنسى اهم شي اريدك اذا عثرت عليهم تجمعلي عنهم معلومات طول هاي السنين شلون عاشوا وين سكنوا شنو مخلصين دراسات شنو شغلهم يعني بأختصار اريد اعرف عنهم كل صغيرة وكبيرة
.. صار تدلل هاي شغلتي وان شاء الله ربي يسهل
بعدها انتقل كلام عمو وية ابو سيف لأمور العمل
وانا تركتهم ورحت بعدني مصدومة وعقلي ما مستوعب الي سمعته قبل شوية
معقولة كانت حياة عمو مؤيد بهذا الشكل
كانت مشاعري غريبة بين المتفاجئة من الي سمعته وبين فرحانة ان عرفت عندي اولاد عم كان الفضول يلعب دوره بمشاعري اتمنى اشوفهم
ابتسمت واني مامصدكة يعني اني عندي اولاد عم مثل
صديقاتي من اسمعهم يحجون بأقاربهم كنت مرات حسدهم ان عندهم عائلة كبيرة عكسي كل عائلتي تتكون من عمو مؤيد وعمة اسيا اما الباقي فتربطنا بيهم قرابة بس من بعيد يعني علاقتنا مو قوية بيهم
في مكان اخر
مهيمن في عز الظهر والشمس الحارة فوك راسه
وهو يشتغل بهمة وية العمال يريد يشطب البيت
اجاه صوت صديقه
.. ها ابو الهمم بشر شنو شوكت تخلص
رفعت راسي وظللت عيوني بكف ايدي الخشنة المتقرحة من ورة خلطة الاسمنت اكلت ايدي
باوعت لصاحبي ورجعت اباوع للبيت كان فقط هيكل
.. والله ان شاء الله ما باقي شي واخلص
ابتسم صاحبي مستغرب
.. يا ما باقي شي بعد وراك حصبة وجدري
بعده البيت بحيله
.. بعد انت تعرف البير وغطاه انا ابني على كد فلوسي
واهم شي عندي اخلص اساسيات البيت من شبابيك وابواب وتأسيس البواري للماي
ان شاءالله من رب العالمين يرزقني اكمل نواقص البيت بالتدريج وعلى راحتي
.. وانت ليش هشكل مستعجل عليه
.. يا اخي مو طلعت روحي اريد بس استقر متشوف امي واختي بصفحة ببيت خالي وانا بصفحة هنا ابات تبهذلت
.. والله انت مشتري تعب الحال لروحك خوالك الله رازقهم متروح تطلب منهم
يداينونك دين مابيه شي كم فلس تمشي بيهم امورك
.. رحميم اكلك هاي شحال لوما انت متربي وياي وتعرف طبيعة الوالدة شنو
.. اي والله صدگت انا اشهد على عزة نفسها لأمك وتعففها. امك عجيبة ماكو مرة مثلها تتحمل هالعيشة
وتدوس على نفسها
والله ابوي دائماً يحجي بيها يكول كضت طول عمرها كله تداري بأيتامها
حاربت الحياة بأيدها وسنونها في سبيل تعيشهم ومتقصر وياهم وكبرتهم وهي تجاهد
.. اسكت لا تذكرنا بأيام الكفاح
وبسبب عزة نفس الوالدة وتعففها خلت خوالي
ياخذوني وياهم للشغل حتى اشتغل وياهم عامل
.. اي واتذكر من جنا نشتغل عندهم عمال انت ينطونك يوميتك اكثر من عدنا
ابتسم مهيمن وغمض عيونه .. هذا كله حتى ما يحسسون امي
ان هم جاي يتصدقون عليها
جنت صغير بوكتها ما افتهم شنو القضية تالي من كبرت واتعلمت وانتبهت لأمي ما يوم مدت ايدها لأحد وكالت انا محتاجة. كلما يسألونها عن حالها تجاوب
وهي مبتسمة الحمدلله بخير
لذلك من كبرت ووعيت عرفت هم بالاصل مامحتاجين عمال وانا مشغليني
زيادة خير لخاطر امي والشي الي ما ترضاه امي على نفسها وكضت طول عمرها مرفوعة الراس
انا همين ما ارضاها على نفسي وماي وجهي عزيز علية مستحيل اقبل احد يتصدق علينا
.. اي بس زين تسوي سحبت نفسك من خوالك وفتحتلك بسطية لوحدك على الاقل كدرت تطور نفسك وحلالك انت حر التصرف بي عكسي انا استمريت اشتغل عندهم عامل وبقيت لحد هذا يومك اشتغل عامل ما اكدر اتحرك لا منا ولا منا
.. الحمدلله هاي كلها بفضل الله وامي وعزة نفسها
.. اي والله صدكت وشكلك انت ورثت هاي الصفة وضيف فوكاهم الراس اليابس من امك
.. ورثتها وكلي فخر
رحيم مسح على بطنه
.. اكول ابو الشباب جاي اشم ريحة اكل شنو الظاهر
الوالدة دازتلك اكل
.. اي وخير ياطير انت شكو. لايكون ناوي تاكل وياي
.. ولك خاب انا سامع يكولون ابوك جان كلش كريم
وما يرد احد. جا انت عليمن طالع هيج يابس
.. اها شكلك لزمتني من ايدي التوجعني وعرفت شلون
تكسر خاطري لزمتني بكرم المرحوم ابوية
خلاص تعال اتفضل اكل وياي
اشرتله على علاكة موجودة بالكاع يم السياج جان بيها حافظة اكل
.. روح اكل منها واقرة الفاتحة لابوي
راح وفتح الحافظة وفر ايده وكال
هسة الي يسمعك يكول عازمني على مفطح وانت شنو مبقي بالحافظة طاير ثلثين الاكل
.. اكول اكل وانت ساكت لا تخليني اخذه منك وانطيه
لصلبوخ واخليه ياكله شكله جوعان
جنت احجي واباوع على واحد من العمال ضخم
من اولاد منطقتنا يشتغل عمالة بالبيت
هذا شنو ننطيه ياكل وابد ما يكول شبعت
كعد ياكل ويثني على طبخ امي فعلاً امي نفسها بالطبخ
ماكو منه وكلمن اكل منه يشهد عليه وخوالي كلما تصير عندهم مناسبة عرس لو يردون يعزمون الشيوخ يدزون على امي هي تطبخ للعزيمة
لان مضروب بيها المثل
دك نقالي وجاوبت بأمل جنت موصي على شغلة وبلكي الله وتصير
.. هلا والله بالحجي ابو حيدر شلونك بشرني
ابتسمت بفرح
.. الف الحمدلله كول والله يعني وافق يبيع
والله حجي هذا جميلك دين بركبتي ما انسالك اياه طول عمري
ان شاء الله بأقرب فرصة اجيب فلوسي ونتكاتب
سلمت عليه وانهيت الاتصال وانا احس برحمة الله الواسعة شكل دعاء الوالدة مستجاب
يمكن طيبة امي وكرم ابوي الله يرحمه
بسببهم الله يرسل بطريقي اولاد الحلال يقضون حاجتي
عبد الرحمن .. ها بشر شنو الاخبار
التفتت عليه .. الف الحمدلله حصلت المحل قبلوا يبيعونه اااخ صدك لو كالوا ينسد باب بوجهك وينفتح الف باب رحمة ربك هاي
البارحة انا جانت ضايكة الدنيا بعيني لان شرطة التجاوزات فلشوا بسطيتي البارحة احس اندليت مكان گلبي من طشروا الغراض بالكاع
..الله يساعدك والله من يمي متت قهر عليك اباوعلك البارحة شطت للزرگة من وراهم
.. الحمدلله على كل حال ربك ياخذ منك شي وينطيك شي احسن وافضل للبشر
رن نقاله مرة الثانية
وكان المتصل امه
مهيمن .. هلة بالغالية
.. اي وصلني الاكل وعاشت ايدج ربي ما يحرمني من
طيبة گلبج ابشرج يمة صار المحل من نصيبنا
اسمع فرحة امي ودعواتها من الطرف
الثاني واضحك
.. تمام تردين اجيبلج وياي كونية طحين من ارجع صار تدللين بعد ما تأمرين على شي
وانا راجع
سكت لحظات يسمع لكلام امه وجاوبها
.. انا كلتلج يمة مستحيل اجي ابات ببيت خالي وبنات خالي يتقيدن بوجودي خليني انام هنا ببيتنا وماخذ راحتي وان شاء الله هانت ما بقى شي واخلص البيت وتنتقلون انتي وحوراء هنا يعني من هسة اكلج جهزي امورج احتمال هاليومين ننتقل بالبيت
يالله يالغالية انا لازم اروح ارجع للسوك لان تركت البسطية يم صاحبي واجيت لهنا حتى احاسب العمال واشوف الشغل شلون ماشي
يالله مع السلامة
نهيت الاتصال وية امي وانا ابتسم
التفتت لرحيم
.. يالله خوي انا رايح عينك عليهم الله يرضى عليك
خطية جبت رحيم وياي حتى يلحم الباب مالت المطبخ عنده مكينة لحيم ويعرف يلحم
.. روح اتوكل هاي انا جبت المكينة وياي وراح ابلش هسة
نفضت ملابسي وايدية من تراب البناء واتوجهت على دراجتي
وصلت للسوك متوجه للبسطية مالتي ولكيت ناس متجمعة سمعتهم يصيحون لزموه هذا حرامي
اخذني الفضول اشوف شكو شنو الصاير اتعودت على هذا المنظر بالسوك كل يوم نلزم حرامي من المتجولين
الي يبوك نقالات من الناس والي يسرق
غراض من المحلات والي يطك جيب واحد غافل
ويبوكه والي يبوك جنط النسوان وغيرها من الامور
الي نشوفها بالسوك
رحت اقتربت
بفضول اباوع اريد اعرف عليمن يصيحون حرامي
رحت بأتجاه الناس المتجمعة وشفت الرجال ابو سجاد لازم ولد صغير من اذنه املح اسمه لؤي بعمر ال٨سنوات
ابو سجاد .. ولك انت شنو سالفتك مااتوب
كم مرة الزمك تبوك من الدكان
باوعت على لؤي وانكسر خاطري عليه فرقت الناس المتجمعة من كدامي
رحت يمهم وسحبت الولد الصغير من ايده
لؤي .. والله عمي جوعان واريد اكل وعندي امي وخواتي ينتظروني اجيبلهم اكل والله خبزة ماعندنا بالبيت
جريت الولد وخليته وراية
مهيمن .. عمي لخاطري بس هالمرة سامحه والمرة الثانية اذا عادها و مد ايده وسرق انا بيدي اغسله الك
غسلة معدلة كون اكسر ايده اخلي يتوب يعتب برجليه بالسوك
.. شوف ولك هاي لخاطر مهيمن
راح اسامحك هلمرة
بس والله اذا اشوفك يم الدكان احرك الخلفوك
لزمت ايديه الصغيرة وسحبته وراي ورجعت بي لبسطيتي وكعدت بمكاني يم البسطية وكعدته كدامي على صندوق خشب قديم باوعت عليه وخزرته
.. انت وتاليتها وياك مو وعدتني ماراح تمد ايدك للحرام
لؤي-عمي والله دورت على شغل واتوسلت الهم ياهو الي اروحله اطلب منه يشغلني يگول امشي مانشغل زعاطيط والله طكتني الجوعة و اتوسلت بأبو سجاد
ينطيني ربع اشتري خبزة اسد جوعتي بس هو ماكو يسوي روحه ما يسمعني
باوع علية بعيونه الصغار
بقيت اباوع عليه وهو مستمر يحجي ويعددلي الاماكن الي قصدها حتى يشتغل صحيح هو كان صغير بالعمر لكن انتبهت عليه كان كلامه موزون عبالك ولد بعمر ال١٦ طبعاً الي يعيش ويتربى بالسوك يكبر اكبر من عمره كمل كلامه وانا اسمعه
.. عمي تدري شنو اتمنى
جريت حسره .. كول شنو تتمنى
.. اتمنى عندي فلوس اشتري بيها عربانة الله لو عندي عربانة جان ما احتاج احد اصير ملك زماني اشتغل بيها
واحمل بيها والله اشوف هواي ناس يحتاجون احد يحملهم غراض بالعربانة
ما اعرف اضحك على كلامه مدري انقهر
يعني ولد بعمره المفروض يحلم يحصل على لعبة
او يحلم يكمل دراسته مو يحلم يحصل عربانة
لزمت من كتفه
.. لايابة شتدفع وين بيك حيل تدفع عربانة
كلك على بعضك عمرك يجي ٨سنوات
غمضت عيوني بقلة حيلة حسيت بالمسؤولية أتجاه هذا الولد
احس صار من واجبي انتشله من الضياع
اي لأن السوك يخوف بي الزين وبي الشين وهذا اذا بقى هشكل راح يلتم على شلة عصابة تتبناه وتاليها يضيع ويروح بالرجلين
.. شوف لؤي تعال اشتغل عندي صبي تساعدني بالبسطية والك يومية هالمقسوم
واذا الله رزقني ووسعها علية ازيدلك اليومية
شفته طار من الفرح وكام وباسني من راسي
.. ربي يحفظك الي عمي ما كذب السانه من سماك ابو الهمم
ابتسمت على كلامه
خطية هالولد ذاك اليوم ابوه توفى بالانفجار
وماعندهم معيل الله يساعدهم
رجعت لشغلي وكعدت ارتب علب الحليب وعدلت البسطية وصرت ابيع لكم واحد من المشترية
ومثل كل يوم من اريد اعزل اسحب شوالات المواد الغذائية من حبوب وغيرها وياي واحملهن واضمها عند محل قريب علية
هم يبيعون حلويات بس الله يرضى عليهم سهلوا علية امري
خلوني اخزن السلعة يمهم بالتعزيلة
اي صدك اتذكرت امي وصتني كيس طحين بس راح اخذلهة كم كيلو خطية الوالدة عبالها عندي
سيارة بيك اب هي كلها على بعضها خلك دراجة
وفي نفس الوقت لكن في مكان اخر تحديداً في الموصل
جلال
اخ يابة انكسر ظهري
سلوان-ها خلصت تصليح السيارة لو بعدك
مسحت ايدية من زيت السيارات الاسود وباوعت عليه
.. شتشوف
.. اشوف واحد مدهن ويصلح سيارة
دفضها خلصت لو بعدك
.. تقريبا خلصت ما بقى شي ليش تسأل
التفتت واشر بنظراته لباب الورشة كانت وحدة واكفة بباب الورشة يم سيارتها
بس شفتها عرفتها گلبت عيوني بقلة صبر
واجيت احجي وية سلون حتى يصرفها لان هاي صارت تجي للورشة بحجة تصلح سيارتها
علمود تحجي وياي واعرف شنو تريد مني بالضبط بس انا اغلس عليها هي متشوف روحها مرة جبيرة
وبهاي الاثناء لفتتني حركة عصام ابن صاحب الورشة شلون اتحارش بيها
اتوجهت عليه وبعدته عنها
.. خير عصام سالمين خوماكو شي وين كاعدين
عصام .. شكو منو يمك
_ خلي عندك غيرة
دفعته من صدره
وهي رجعت للخلف وحجاية مني وحجاية منه
وشكله راد يراويها قوة عضلاته ويسترد كرامته
انطاني لطمة على عيني حسيت بيها انطفت
وبعدها صرنا انا وياه نتلاوة
وجان يجون الشباب وفرقونا عن بعضنا اسمعه كعد يهدد بية
ويكلي انت من اليوم مطرود من الورشة شوفلك غير ورشة تشغلك عندهم
.. خاب دكوم انت وشغلك عمي العيشة كافلها الله
وسلوان كام يدفع بية وطلعني من الورشة
جنت حيل معصب ومقهور بنفس الوقت
اتلمست فكي جان يوجعني
.. اااخ يابة الله يلعن بليسه شنو مو ايد حشى حديد
.. تستاهل يا اخي اكو واحد يسوي سوايتك
-. اي ما شفته شلون يتحرش بيها گدامنا
.. وانت شكو خال ولد عم بنية حتى تتدخل
.. وربي ماتحملت من شفته كعد يتحارش بيها وهو عباله نشوف ونسكت و ما نحجي
والله لان ابوه يصير ابو خبزتنا لازم نشوف وصخه ونغلس ونسكت عمي خلي يطير العيشة كافلها الله
.. لك جلال هاي ثاني مرة تنطرد من شغلك وانت شوفت عينك احنا بالگوة ندبر الشغل
.. اسكت ذكرتني بخالي شلون راح ارجع للبيت
وما بيدي اليومية مالتي والله يعرس علية
.. خرب بالحظ هو فوك ما الدنيا سودة
خالك جاي يكملها عليك بس شتسوي اتحمل نحاسة خالك احسن ما تنشمر بالشارع
دنكت راسي بحسرة واتذكرت حلاوة ايامي الماضية
.. تدري سلوان من اتزوجت امي وسافرت للخارج وية رجلها وتركتني عند جدتي لليوم ما شفت طعم الراحة جنت اتمنى الكة حنان امي عند خالي وعائلته بس من وين يجي الحنان وهو خالي مخلف فيلق كامل حشة مو عائلة معسكر
تدري من اشوفهم اتذكر فلم (افواه وارانب)
بيتهم كله جهال دگ دگ وين ماتروح تدوس على جاهل الله يخفظها زوجة خالي كل خميس وجمعة مخلفة واحد
خالي سايق تريلة (سيارة حمل بضائع ) وكوة مدبر الخبزة وهو مبقيني وياه بالبيت مو لسواد عيوني لا وانما علمود اساعده بالمصرف هم الله يساعده يالله يلحگ
كلما اتعارك وياه يعيرني بأبوي ويكلي ذبك علينا وسافر اتذكر اكثر من مرة حاولت ادور عن الرجال الي يسمونه ابوي بس كل مرة ادور بيها عليه يكلولي نفس الكلام مؤيد صفة املاكه وسافر للخارج حاولت اتواصل وياه اتمنيت اوكع على رقمه ما اريد شي منه غير بس اسأله
ليش خلفني وجابني للدنيا اذا هو مو حمل مسؤولية واولاد
قطع علية تفكيري كلام
سلوان ..لاتكعد تصفن روح اعتذر من الاسطى
خليه يرجعك للشغل بالورشة
جلال عامل يشتغل بورشة تصليح وتشحيم الالات واعادة تدوير المكاين الخاصة بالمعامل ومكائن السيارات
جلال بكبرياء .. وعنه لا شغلني ناره تاكل حطبه
شنو سلوان نسيت ترة انا جلال والف ورشة تتمنى اشتغل وياهم
.. اي اعرف بس مو كل الورش يخلوك تشتغل براحتك شنو نسيت المكينة والجهاز الجديد الي كاعد تشتغل عليهم لاتنسى ترة الاسطى توفيق هو الممول الوحيد لهذا شغلج لوما هو وافق يتحمل تكلفة المواد الي تطلبها منه جان ما تكدر تسوي او تبتكر اي الية من هذني الي سويتهن
صفنت بكلام سلوان كان كله صحيح انا بحاجة الاسطى
توفيق فعلاً لوما دعمه وورشته انا مستحيل اكدر اتحمل مبالغ الاجهزة
.. حرامات ما بقى شي وتخلص المكينة ليش تخرب شغلك الي تعبت عليه
مسحت وجهي بثنبن ايدية وانا افكر اختار كرامتي لو
حلمي منو بيهم اعز علية
جنا كاعدين برة الورشة انا وسلوان وجان اسمع صوت مرية تصيح بأسمي التفتت ولكيتها نفسها
صاحبة السيارة
.. استغفر الله اللهم صبرج ياروح
بالله هاي شحجي وياها ابتليت على عمري
بيوم صلحت سيارتها ووصلتها لبيتها
هاي ما ناوية تجيبها لبر ادري متشوف نفسها بكد امي
متستحي على روحها كاعدة تمثل دور الصبايا
.. كله منك انت صوجك منو گلك صير شهم وصاحب نخوة وية النسوان
ترة يفهمونها غلط بس انت ماكو ولا على بالك
ريم
مرت الايام اني اراقب عمو مؤيد من يوم عرفت
بأسرار عمو واني الفضول ذابحني اتمنى اصارحه واكله اني عرفت بكلشي وشنو السبب ما يكول عنهم
بس بنفس الوقت وبأثناء مراقبتي لعمو انتبهت عليه دياخذ علاج ويوم عن يوم وجهه يذبل اني نقطة ضعفي بالحياة هي عمو مؤيد.
اقتربت منه وسألته
.. عمو انت هواي دتاخذ علاج هذا الدوة مال شنو
انت مريض واني ما اعرف
جاوبني .. اي عمو عندي ضغط ولازم اخذ علاج
دك نقاله وكان المتصل عمو ابو سيف
باوع للنقال ورجع باوع علية
وكال حتى يصرفني
.. عمو ريم روحي جيبيلي كلاص ماي
عرفت المكالمة مهمة
اتوجهت للباب وهو
رد عالمتصل
بس رحت ركض جبت كلاص ماي من الثلاجة ووكفت يم الباب حتى الحك اسمع شنو يحجي
جنت الهث من السرعة
سمعته يكول
.. لا تشيل هم صفيت املاكي الي بالخارج كلهم ورجعت لهنا عفية ابو سيف استعجل ترة احس بروحي بعد ماظل عندي وكت بهالدنيا والمرض جاي ياكل بية اكل صارت ايامي معدودة
وهاي الكلمات الي كالها عمو عن مرضه هزت عالمي
وحسيت الكاع اهتزت من جواي مدري رجلية رجفت من اثر الخبر
وكع اكلاص الماي من ايدي وشهكت مرعوبة اريد استوعب الصدمة
.. لا مستحيل

ولكم مني اجمل تحية اتمنى لكم قراءة ممتعة
اختكم نهى الحسون
احبكم كومة احبكم. هوااااااااي

يتبع....