[لامارا]

مساءاً محملاً بالخير والسعادة والتفائل
عليكم يا احبتي
شكراً لتعاونكم وتفاهمكم وتفاعلكم

#قضية_لم_الشمل
#البارت_الثالث
#الكاتبة_نهى_الحسون

صدمة وخوف وحيرة والم
شعور واحد اسوء من اللاخ
شهكت وكع الكلاص من بين ايدية وانكسر ولفت انتباه عمو
و اول مشاف شكلي كام من مكانه متفاجيء بوجودي وبشكلي
قطع كلامه وية ابو سيف وگال
.. لحظة ابو سيف شوية وارجع اتصل عليك خلي اشوف هاي المصيبة منين طلعتلي
انهى اتصاله وباوع علية
ومكدرت ابقى بمكاني رحت عليه
ودموعي غزت عيوني
هزيت راسي بعدم تصديق صرت احاجي نفسي بخوف لا مستحيل ما اصدك عمو مؤيد مريض بالسرطان
.. ريم!!! شكو شبيج
حجيت بصوت يرجف
.. عمو اني سمعت كولشي عفية عمو كولي الي سمعته
كذب وان انت ما بيك شي گلي انت مو مريض
غمض عيونه بعجز مكدر ينكر ولا يكدر يكول اي شي
يهون علية الخبر
رحت ركضت لحضنه مثل الطفلة خايفة على ابوها يروح منها بأي لحظة
خايفه ارجع احس باليتم مرة ثانية
احس كل عالمي انهار في ليلة وضحاها انگلب
صرت ابجي بين ايديه رفعت راسي اباوع لوجهه الشاحب
.. عفية عمو احجي كولي هذا حلم
لزم وجهي بين كفوف ايديه وكال بصوت واهن تعبان
.. عمو ريم هذا قضاء الله وقدره
ما اريد اشوفج تبجين
ترة صدگي دموعج تصعب علية الامور اريدج تصيرين قوية وتساعديني
.. عمو شلون تريد مني اصير قوية ومصدر قوتي
ديصارع الموت واني ما عندي علم
مسح على راسي وكعد يطمني
.. عمو ريم كولي يالله ترة
هذا انا بعدني واكف كدامج بس انتي ادعيلي
وان شاء الله بأقرب فرصة اكمل اموري والاجراءات
واسافر للعلاج وان شاء الله ارجع مثل قبل واحسن
حجيت بتوسل .. عمو تاخذني وياك وين ما تروح
ما تتركني لوحدي. اني بدونك اضيع عفية لا تفكر تتركني يم عمة اسيا صدگني امو.......
حط ايده على حلكي وقطع كلامي
.. اششششش كافي مو وكته هذا الحجي
مسحي دموعج
.. عفية عمو اوعدني تاخذني وياك
جنت احجي وارجف احس انقلبت الادوار وصار عمو هو الي يهدي خوفي بدال ما اني اكعد اواسيه
بس غصب عني دموعي تنزل صرت انعي عمو وهو عايش حسيت عليه لمني لحضنه يطمني وكام يمسح على ظهري بكف ايده
مسحت دموعي وسألته
.. عمو سؤال
.. كولي شنو سؤال
.. انت ليش ما بلغتني بموضوع مرضك
اصلا انت ليش تضم عني اسرارك
.. سالفة مرضي مو شي مفرح واكعد ابشرج بي ما اكدر اشوف دموعج واكسر گلبج مثل هسة
حجيت من بين دموعي
.. زين واسرارك البقية ليش ضامهم عني هم تريد تحميني شنو عذرك
.. عن اي اسرار تحجين
.. عمو اني كبرت يعني الكدامك عمرها ١٩ سنة مو صغير واعرف الحياة شلون ماشية
في غض النظر بعض الاحيان اتصرف تصرفات طايشة وهذا نابع من حماس اللحظة
مو ناتج عن طفولة او عدم فهم تكدر تكول مغامرة
انا اعرف حدودي وشنو الي وشنو العلية انتظرتك انت تجي وتصارحني بموضوع عائلتك بس شكلك
ناوي تتركني للايام حتى تصدمني باسرارك مثلما انصدمت بذاك اليوم من سمعتك تحجي وية عمو ابو سيف عن زوجاتك واولادك الثلاثة
باوعت لعمو بهت لونه وانسحب منه الكلام
شكلي فاجئته ما كان متوقع اني اعرف
شكله ما عنده كلام يحجي وجهه صار ينطي الوان
خجل على تردد ارتبك
.. اكيد بعد الي عرفتي عن عمج اكيد صورتي اهتزت بنظرج
.. ما انكر اني اتفاجئت بالي عرفته عنك
بس صدكني ما اثر على مكانتك بگلبي ولا نقص مقدارك راح تبقى انت اعز واغلى انسان بحياتي بس اتمنيت انت تعرفني على عائلتك واولادك
ابتسم بوهن .. هو بالاول خلي الكاهم وقتها اخليج تتعرفين عليهم واحد واحد
.. زين وعمة اسيا تعرف بهذا كله مرضك واولادك وزوجاتك
.. اي عمتج اسيا تعرف بموضوع مرضي وزوجاتي
.. ليش كل هذا التأخير
.. جنت حاب اتحرك بالموضوع خطوة خطوة. بالاول اريد الكاهم وبعدين لازم امهدلهم وجودي بحياتهم اروح اشوفهم واقابلهم واطلب منهم الغفران
اعرف بحلمي حلم عاقر ما منه رجى
بس عسى ولعل ربي يحنن گلوبهم ولو بالشيء القليل
اباوع لوجه عمو نظرة الامل تغزوها
.. ان شاء الله راح يجي اليوم الي تلتقي بيهم وتنتهي الامور مثلما تتمنى
لان انت تبقى ابوهم
صرت اطمنه وارفع معنويات عمو بهذا الكلام لان لاحظ عليه بدة يتأمل خير وبدة وجهه يسترد لونه يرتاح
.....
جلال
ببيت خالي واولاد وبنات خالي الصغار داير ما دايري
فرحانين بعلاليك المسواك خطية كوم لحم عددهم ٧ اكبر واحد بيهم عمره ١٤ سنة واصغر واحد بيهم سنة ونص
دانة تعزل بالمسواك وظفايرها مكوشة جانت بعمر ١١ سنة
.. الله جلال عاشت ايدك انا احب الفواكه
جاوبتها وانا شايل ابن خالي الصغير حنوش
وابوس بخدوده
.. الف عافية عليكم اكلوا وادعولي ربي يرزقني
واشتري لكل واحد بيكم لبسة للعيد
اسراء .. ربي يرزقك وتفرحنا
عفية جلال انا اريد لعابة باربي يصير عندها شعر طويل
مصطفى اكبر واحد بأولاد خالي جان يدخل بعلاليك المسواك حطهم بالكاع
واجة وكف يمي
.. جلال عفية اخذني وياك اشتغل بالصناعية
حتى لو امسح جام السيارات
.. بعدك صغير لاحك على التعب خلص مدرستك واخذ شهادتك واني اسعى بيدي ورجلية حتى تتعين
لو اعرف احفرلك بالصخر لازم ادبرلك وظيفة
ام مصطفى زوجة خالي جانت تعزل بالمسواك هي والبنات
.. خالة جلال ربي ما يحرمنا من كرمك وويوسع رزقك ويباركلك بي
بس خالة ميصير كلما تستلم راتبك تصرفه علينا
هم بقيلك كم فلس لتفسك للايام السودة
اباوع عليهم
سبحان الله عائلة خالي عكس خالي
تصرفاتهم وطيبتهم هي الي مخليتني مستمر وياهم
عايش والا لو بقى الموضوع على خالي
جان انا من زمان تركت البيت وطلعت
دخل خالي علينا وهو معصب
.. واخيراً شرف استاذ جلال همزين شفنا ابن الخايبة
.. خال ماله داعي هالكلام الخشن
.. اكول انت شلون ترجع جماعتي
.. ها كلولك
.. شلون تفشلني كدامهم ادزهم عليك للورشة حتى تصلحلهم سياراتهم تكللهم ما اصلح حتى لو جايين من طرف خالي
.. اي اكيد ما اصلحلهم
.. لا تصلحلهم غصباً على الي خلفوك سامع
جاوبته بعناد بصوت عالي
.. لا ما اصلحلهم هي مو بالكوة ترة الورشة مو مالت الي خلفوني واكعد اصلحلهم ببلاش وجماعتك ما يدفعون فلوس يجون يصلحون ويدورون وجهم ويرحون والتكاليف كلها براسي والاسطى توفيق يكعد يخصمها من يوميتي تقبلها انت
.. شدعوة عاد هي شلون يومية الي يسمعك يكول يشتغل
بالذهب هو كلك خلك صبي يشتغل بورشة سيارات عطلانة
بس انت مو وجه نعمة كم مرة اكلك
عوف الي بيدك وتعال اشتغل وية صاحبي ناجي
يحصل خير من الله
ابتسمت.. خال ترة صاحبك ناجي يريد يشغلني بملهى الم الفلوس من جوة الراقصات
انت شلون ترضاها علية
.. اي وشكو بيها الشغل مو عيب
هسة هذا شحجي وياه
.. يعني احلفك بالله انت تقبلها رجال طول بعرض تالي عمري اشتغل هاي الشغلة
حتى ماي بوجهي ما يبقى
بعدين اذا انت هيج عاجبك الشغل متروح انت
تشتغل بمكاني بدال ماكاعد بس تتأمر
زمخ بية ولطمني براشدي على خدي سمعت شهكت مرت خالي وبناتها
وحنوش صار يبجي
وخالي كام يتوعدلي بقيت واكف كدامه راص على اسناني
كوة اتمالكت اعصابي ما اهد عليه واردله الراشدي اضعاف ما اكدر اهينه كدام عائلته صعبة
.. لك جلال والله ثم والله اعيد تربيتك من اول وجديد مو تشوفني ساكت عليك عبالك ما اكدرلك
وتكعد تتجاوز حدودك وياي شوف واسمعني زين واتذكرني عدل
ترة انا بعدني بحيلي ومن احطك براسي ظلوعك اخسفهم جوة صدرك مثل ماجنت اسوي بيك قبل شنو نسيت
لاتشوف نفسك كبرت واشتغلت وطلعلك السان
صدكني ادوسك جوة رجي مثل الحشرة
انطى المقسوم وطلع برة البيت وهو معصب نعرف كلش زين
بعدين تالي الليل يرجعلنا سكران مفول
احس النار صعدت لراسي من القهر
طلعت من البيت ورحت كعدت برة بالشارع يم باب البيت
طلعتلي جيكارة من الباكيت وكعدت ادخن اريد ابرد نار صدري بنار تكوي
صرت اطفي النار بالنار
دك نقالي وجان المتصل سلوان
رديت
.. الو هلا سلوان.
اي تعال انا بالبيت موجود كاعد بالباب
جيب وياك كلاصين جاي
بيت اهل سلوان بنفس المنطقة مال بيت خالي
جانت منطقة شعبية بسيطة
انفتح باب بيت خالي وطلعت اسراء وبيدها لفة
اقتربت مني ومدت اللفة الي
وكالت .. جلال هاي امي سوتها الك وتكول خلي يتعشى
.. رجعيها ما اشتهي اكل
اسراء بصوت ناعم طفولي .. عفية جلال لاتزعل من بابا الله يخليك لا تتركنا
احنا نحبك اذا انت تروح الدنيا تصير مو حلوة
غمضت عيوني بصبر استغفر الله يا الله
مديت ايدي واخذت اللفة منها
باوعت عليها شلون تعتذر مني عن تصرف ابوها غير الحياة متنافضة
.. هو اني عليمن متحمل خالي واستهتاره وياية غير هذا كله علمودكم
انتوا نقطة ضعفي وسبب كعدتي بهذا البيت
.. الله يخليك النا وما يحرمنا من حنانك
ابتسمت بوجهها حتى اطمنها وصرت اكل باللفة انتبهت لروحي حيل جوعان
دخلت جوة للبيت واجة سلوان وكعد يمي بالباب متعودين كل يوم بيهيج وكت احنا نكعد لو يم باب بيتنا لو يم باب بيتهم نتسامر ونسولف ومرات نكعد نلعب طاولي
سلوان.. اكول جلال صدك قبل لا انسى اتصل علية
الاسطى توفيق وكال باجر انت وجلال ومثنى اريدكم تجوني من الفجر ضروري
.. ما عرفته شيريد من عدنا
.. يكول راح ارسلكم للقاعدة العسكرية مالت الجيش علمود تصلحون سياراتهم العسكرية عندهم عطلات وكال الكم يومية ثلاث اضعاف
.. اي هذا الشغل المعدل
.. فگال جهزوا نفسكم حتى تتوكلون على الله من الصبح
.. صار اني عني ما عندي شي بس انطي خبر لبيت خالي خاف اتأخر عليهم
......
مهيمن
بصوت عالي
.. على كيفك وية الغراض لا تكسرهم من تنزلهم
ام مهيمن .. يمة مهيمن كافي على كيفك وية العمال كضيتها علينا بس صياح هسة شنو افتهمنا
.. يمة ما جاي تشوفيهم شلون يدوسون بالمصارين ببرودهم
احجي وية امي وادخل لااغراض احطهم بالطارمه
باوعت لحوراء اختي طلعت حتى تسحب الكاونتر لداخل البيت
جان باب الشارع مفتوح وهي جانت لابسة بس شال ودشداشة مال بيت
عطت بيها .. حوراااااااء فوتي جوة منا عمال
خطية هي كمزت من مكانها وركضت دخلت جوة للبيت
باوعت لامي .. يمة رحمة على موتاج لتخلين البنات يطلعون برة
خلي يخلصون العمال نقل الغراض
وسدوا الباب وكعدوا رتبوا البيت على راحتكم
امي جايبة وياها فيلق كامل من بنات خالي حتى يساعدونها هي وحوراء
لان اليوم انتقلنا للبيت الجديد
كملت نقل اغراض البيت والحمدلله كانت الاغراض قليلة مو اهواي
حاسبت العمال بالباب وصحت لأمي
.. ام مهيمن تعاي
اجتي امي ووكفت يمي تعدل بحجابها
.. ها يمة امر
.. ما يأمر عليج ظالم يمة انا خلصت نقل الاغراض
وهسة انتي والبنات سدوا الباب عليكم وشوفوا شغلكم
بس رحمة على والديج وصيهن صوتهن لا يطلع برة يمنا جوارين قريبين
ادري بيهن من يلتمن يظل صوتهن يلعلع مثل الدجاجة من تبيض
ينسون نفسهن بالسوالف
اتوجهت للدراجة يالله انا رايح للسوك. اذا تحتاجين شي اتصلي علية
.. روح يمة اتوكل على الله ربي يفتحها بوجهك
شغلت الدراجة ورحت وبالشارع والساعة صادف وقت طلعة موظفين وطلاب مدارس وصايرة لخة وازدحام
والحمدلله انا دراجة واكدر اراوغ بيها بين السيارات
واقود الدراجة وببالي حسبة المحل يحتاج راس مال
حتى اكدر اشتري بضاعة ومحتار شلون ادبر
الفلوس فكرت بخوالي بس شوية استصعبتها
اتداين منهم وهمة مصارلهم هواي من انطوا حصة امي من الورث
مصارلهم شهرين
صعبة هسة اجيهم واطلب منهم يداينوني
غركان بالتفكير وبنص الازدحام وجان تجيني ردمة قوية من خلف الدراجة
وما احس الا وانا والدراجة انگلبنا اتگلب بالگاع وما اشوف نفسي الا وانا جوة سيارة عالية هي لحظات مو اكثر بس من الهبطة والمفاجئة ما اعرف شصار بية اسمع اصوات هورنات السيارة
والناس تصيح وانا ما اعرف بروحي منو اكثر شي فزعني جرح راسي الي بدء ينزف دم مدري خرعة الموقف ومكاني المطروح جوة تاير السيارة
.......
جلال
يوم ثاني الصبح طلعنا انا وسلوان والولد مثنى
بعدما اخذنا المعلومات من الاسطى توفيق وشلون راح نوصل
.. اولادي سمعوني زين هذا التكسي راح ياخذكم ويوصلكم لهناك انا نطيته اجرته
ومناك راح تلكون سيارة عسكرية تنتظركم وهمة راح ينقلونكم وياخذوكم للمعسكر
جاوبته.. وشوكت نرجع اذا راد الله
.. احتمال تتأخرون لليل واذا اتأخرتوا كلش باتوا يمهم بالمعسكر ويوم ثاني الصبح رجعوا
.. زين ويوميتنا من يحاسبنا عليها انت لو همة
.. يوميتكم يمي لتخافون راح ادير بالي عليكم وادللكم
باليومية اخليها الكم دبل
اخذنا التعليمات وصعدنا بالتكسي
وصاح من ورانا
.. من توصلون اتصلوا علية طمنوني
.. صار استاذي
اخذنا التكسي وصار يتوغل بالشوارع وبدينا نبتعد من مركز المدينة وبدت التلال والطبيعة تحيط بينا
وتقريبا مشت بينا بيها ساعتين
والسايق يسولف ويانا ويسألنا
.. عمي شعجب رايحين لهناك
سلوان .. ليش شكو هناك
.. ماكو شي بس الطريق يخوف ومو امان
وانتوا شباب
سلوان التفت علية وكال
.. اكول جلال انا ما مرتاح لهاي الشغلة اشو الطريق طول
.. اي غير رايحين للمعسكر ايد يصير بعيد شتريد يخلولك المعسكر بقلب المدينة اكيد يصير خارج المدينة
.. الله يخليك يا خارج المدينة متشوف اللافتات احنا شكلنا راح نطلع خارج العراق بكبره
ابتسم ابو التكسي وكال
.. ههههه لتخاف وليدي بعدنا بالعراق بس هو هذا الطريق مزعج
مثنى طمنا
.. لتخافون شباب انا سامع بهذا المعسكر اخوي ملتحق بي و انا رايح حتى اشوفه
وصلنا يم لافتة زركة جبيرة
وكف التكسي وباوع علينا السايق وكال
.. عمي انا لهنا وتخلص مهمتي وياكم بعد ما اكدر اتوغل اكثر اخاف على عمري
سألته.. وليش متوصلنا هو شكو هنا
.. يابة شايف هذا الشارع
جان يحجي ويأشر على شارع فارغ مابي حتى طير
.. اي عمي شايفه
.. هذا الشارع يسمونه طريق الموت الي يعرفله
وحافظه ومتعود عليه يكدر يجتازه وانا صاحب عائلة
واولاد ما مستعد ايتمهم من هسة
.. زين السيارة العسكرية وين راح نلكاها
انتوا بس تمشون تقريباً كيلو متر راح يشوفوكم ويجون عليكم ياخذوكم
الاسطى توفيق منطيهم خبر ويعرفون بجيتكم
.. اها تمام
حطيت جنطتي على ظهري وفتحت الباب اريد انزل
لزمني سلوان من كتفي بخوف
.. شنو جلال اوكف لحظة وين نازل
شنو انت ما سمعت السايق شنو گال
مثنى.. يكول هذا الشارع اسمه طريق الموت
جلال.. اي هو اسمه طريق الموت بس مو معناها كل واحد يمشي بي لازم يموت
يعني مثل لعبة سكة الموت اسمها عربة الموت بس كلمن ركبها يرجع حلكه مشكوك من الضحك
شفت شلون
سلوان باوع للسايق .. بس احنا ما اتفقنا على هيج
الاسطى اتفق وياك تسلمنا للنقيب اشو لا اكو نقيب ولا سيارة عسكرية
.. والله هذا مو شغلي المفروض النقيب يكون هنا
يالله بوية اتوكلوا ومثل ما كال صاحبكم شكله هذا گلبه ميت شكله مقدم روحه قربان
ماكو شي يخوف لاتنسون ترة راح تحصلون يومية دسمة تعوضكم بدل خطورة
هو مجرد بس ذكر اليومية وقيمتها كفيل بدفعي حتى اروح
اجة على بالي اولاد خالي وبناته وامهم والعيد على الابواب وهاي الفلوس اجتي بوكتها
.. شباب انا عني رايح ترة احنا مو اول بشر يمشي بهذا الطريق امة محمد كلها تعبر وتوصل لذاك الصوب
والحافظ الله
سلوان.. لك جلال شكله هذا الاسطى توفيق مقدمنا كبش فداء ورسلنا على عمى وجهنا
ابتسمت.. اكلك اذا هم امي وابوي متنازلين عني من زمان
تريد الاسطى توفيق يحن علية
سلوان التفت للسايق
.. عمي اخذني وياك انا عني ما اروح ما بايع نفسي
بالله هذا مخبل واهله بايعينه
ابتسمت سلوان رابي وياي من الصغر ويعرف كلشي عن حياتي واجتي كلمته عالجرح
اباوع للولد مثنى بقى واكف متردد يجي وياي لو يرجع وياهم
سلمت عليهم بطرف ايدي بأشارة حركة السلام العالمية
.. يالله شباب اسلم عليكم انا رايح
مشيت واسمع صوت سلوان الخايف ضل يصيح علية حتى ارجع
.. لك جلال انت صدك مخبل مو عاقل
انا الله بلاني بيك بلوة
وخطيت على اول خطوات بطريق الموت
سمعت الرجال ابو التكسي صاح من وراي وهو يضحك
.. جلاااااااااال قربان يا رجال روح في امان الله
جنت مستمر بالمشي ومنطيهم ظهري ورفعت ايدي بحركة الوداع
جنت امشي وجنطتي الصغيرة على ظهري واراقب الطريق كدامي اشو ماكو اي اثر
بس السماء والطارق
اظلل عيوني بكف ايدي صارت الشمس عالية
بيها نص ساعة امشي
لحظات من التفكير بالخيارات وجان اسمع صوت واحد يركض ويصيح من وراي التفتت
وجان اشوف صديقي سلوان يهرول ويأشرلي
اتوقفت بمكاني وهزيت راسي اضحك على شكله ووجهه جان احمر ابيض
وصل يمي وهو يلهث لزمته من كتفه
صاحبي واعرفه كلش زين ما راح يكدر يعوفني لوحدي
سلوان .. والله العظيم اذا اموت من وراك عشيرتك احركها مو تكول ما كال سلوان
.. الله كريم هسة انت موت وعود راويني شلون تحرك عشيرتي
كملنا طريقنا وسلوان على طول الطريق يدردم
سألته على مثنى كال ما قبل يجي خاف على روحه جبان
رفعت حاجبي اذكره بكلامه وية السايق
.. ومنو كال قبل شوية عمي اخذني وياك انا ما بايع روحي
سلوان .. هذا عقل سلوان اما هسة الي جاي يمشي يمك
گلب سلوان وداعتك
كلبي ما انطاني اعوف جلال قربان لوحده
اريد اشوفك شلون تموت حتى اخذلك صورة تذكارية
صرنا نمشي ونسولف وهناااااااك وجان نشووف !!!!!
........
مهيمن
لحظات بين فاقد الوعي وبين اسمع اصوات الناس
بديت شوية استوعب حالتي كم واحد اجة وساعدني اكوم
.. ها بيك حيل تكوم
اشرتله براسي اي اكدر
شكلي من الهبطة الساني ثگل
نهضت من الكاع وسمعت شرطي المرور يحجي وية
صاحب السيارة يكله
.. ترة انت الغلطان
وبديت استوعب وضعي واتماسك وبدت علامات الغضب اريد شوف منو هذا الي دعمني يا اعمى
لفتني كلام صاحب السيارة جاوب المرور بعصبية
.. لا ما غلطان هو شمر روحه جوة سيارتي
باوع علية من فوك ليجوة مثل يعاين الشخص الي كدامه
بنظرة تكبر وكمل كلامه وية الشرطي
يعني هي مبينة هيج نماذج كاموا يسترزقون بهيج سوالف بعد تعرف شغل الشحادة
يشمرون روحهم كدام السيارات وتعال
يا ابو السيارة ادفع تعويضات واكعد افصلهم
هو جان يحجي وية شرطي المرور ويباوع علية بنظرات احتقار
بس انا وية كل كلمة احس بالنار صارت تسعر بگلبي
ومن ورة الغضب ما اعرف منين اجاني الحيل
هديت عليه اريد بس الزمه افرغ حركة گلبي كل شي ما اريد
بس كون اغير خارطة وجهه الحقير وامسح من عيونه نظرة التكبر
هي لحظات ما حسوا الا وانا. زانك الولد من ياخته
ومنومه بالكاع انطيته كله براسه وهو مبين عليه بزر دلال بسرعة سنح جوة ايدي جماعته هدوا عليه
رفسات على خاصرتي
بس انا وين صار الشاب الفايخ هو حصتي ما همتني ضرباتهم بكد ما حرصت ان اندمه على اليوم الي
اتجاوز علية
صياح رياجيل ومدافع وانا على نفس وضعي محد كدر يخلص الشاب من جوة ايدي
وجان تجي سيارة مفرزة شرطة.
وتلمنا انا والشباب واخذونا دفع وصياح يحطونا بفرد سيارة وجان ياخذونا لمركز الشرطة
فجاءة وعيت على وضعي واتذكرت امي واختي
والبيت وشلون منو يبلغهم هسة امي تنجلط من تسمع بالصار
........
ريم
حياتي على المحك احس الزمن عندي اتوقف
جنت امشي واتحرك مثل المخدرة مرض عمو قلب عندي الموازين
كانت مخاوفي محتلة كل افكاري
وصرت اراجع تصرفات عمو وياي باخر فترة
حرصه المفاجيء على مستقبلي واصراره على التزامي بدراستي وغيرها من الامور الي جانت كلها رسائل منه
حتى اكون مسؤلة عن حياتي شكله كان يهيئني
شلون ادير حياتي من بعده
لالالا ربي دخيلك احفظ عمو من كل شر وطول بعمره
اتكونت غصة بين ثنايا ظلوعي حاولت اكتمها
اول مرة بحياتي اخاف على احد و احس بهذا الشعور الي يعصر الگلب
هاي الفترة عمو حاول يدبرلي واسطة حتى يدخلني
بس مع الاسف هالمرة ما فادت الواسطة شكلي راح اعيد السنة
جان كل يوم يعدي علية واني اراقب عمو
وافتر وراه مثل ضله بدون ما يحس علية
هدوئي لفت انتباه الكل
عبرت من يم غرفة عمة اسيا
جان باب غرفتها مفتوح
باوعت جانت ناطيتني طهرها وتحجي بالنقال
اسمعها تكول
.. لك ماما نائل انت ليش متسمع الكلام وترجع للعراق
لك سمعت خالك صفة املاكه وجمعهم هنا بالنك
دتعال صير جوة ايد خالك هسة هو بعازة. احد يساعده
بلكي ينولك من خيره شي
سكتت لحظات ونوب رجعت كملت كلامها
.. اي حبيبي ريم الك متصير لغيرك بس انا اريدك تجي يم خالك هسة هو ديصارع الموت وما باقي على موته شي دتعال وثبت موقف مشرف كدام خالك
حتى نضرب عصفورين بحجر واحد
بقيت واكفة مصدومة من تصرف عمة اسيا وهي ليش هيج متأكدة من موافقة عمو وموافقتي عالزواج من ابنها والله لو يكطعوني وصل الا اني مخبلة. ومو بعقلي
واتزوجه
اني من غير كلشي اتخبل منها هي وابنها ونوب
اسمعها تكعد تخطط شلون تستغلني
ولو هي معروفة بالجشع لا مو جديدة عليها ياما استغلت طيبة عمو مؤيد حتى
يدعم مشاريع اولادها بالخارج ويمولهم
بس شكلها راسمة لبعيد ياربي شكد طماعة هاي الانسانة
زين هي ليش مالية ايدها ان عمو يموت
زاد خوفي على عمو وعلى مستقبلي واحتاريت شنو
اسوي
لا بس هذا الشي الي سمعته ما ينسكت عليه اني
لازم اروح اكول لعمو مؤيد على السمعته
رحت لغرفته ما لكيته
عقدت حواجبي هاي شنو قبل شوية شفته دخل للغرفة
رحت دخلت للمطبخ ادور عليه لكيت خالة ام فلاح دتسوي كهوة
.. احول خالة مشايفة عمو وين
.. عمج بالاستقبال يم ابو سيف
.. ها يعني ابو سيف هنا
معناها جايب اخبار عن اولاد عمو
اتوجهت للباب صاحتني
.. خالة ريمة اخذي وياج صينية القهوة
اخذتها من عندها واتوجهت للاستقبال
دكيت الباب ودخلت
سلمت عليهم شكله عمو ابو سيف ستوه واصل لان جانوا يتبادلون السلام
قدمتلهم الگهوة وعيوني تراقبهم
ابو سيف .. بشرني شلون صحتك
.. والله على حطت ايدك نفس وضعي كا اتغيرت
.. بس هزلان ترة على فكرة انا كملت اجراءات السفر
واتصلت على مستشفى الجامعة الامريكية بلبان
وخلصت كل ترتيبات الحجوزات
بقى بس اخذ جوازك انت وام مؤمل جان يقصد على عمة اسيا
حتى افيزهم
ما سمعته ذكر اسمي
واني اجة گلبي يوكف من الخوف
رحت كبل لعمو مؤيد حجيت بتوسل
.. عمو اسافر وياك
دخلت عمة اسيا وسلمت على ابو سيف وكعدت
واني كملت كلامي اترجاه
.. عفية عمو خليه ياخذ جوازي
.. لا عمو ريم انتي تبقين هنا عندج امتحانات
.. عمو انت تعرف كلش زين اني ما داخلة بكلوريا
ليش تريد تبعدني عنك
غمض عيونه بصبر
.. اعرف ما داخلة بكلوريا بس وصلني خبر اكيد ان الدخول هالسنة راح يكون شامل
ولازم تبقين تدرسين بكلوريا فلا تضيعيين تعبي اهتمي بدراستج وبمستقبلج لخاطري
اسيا.. اي صحيح انتي لازم تبقين هنا وراح اوصي بنت خالة امي خالة فليحة مرية جبيرة متكول شي
تجي تبقى يمج بين ما نرجع
فاحسن شي تنتبهين على دراستج
واخوية اني اسافر وياه وادير بالي عليه ميحتاج انتي تسافرين وابني نائل يجي هناك يدير باله على خاله
باوعت عليها بغيض اتذكرت كلامها التزمت الصمت مجاوبتها وجود عمو ابو سيف هنا هو السبب الي يخلني اسكت وما احجي الي سمعته قبل شوية
عمو مؤيد اضاف على كلامها
.. الله يرضى عليج ريم لا تعبيني بعنادج
هزيت راسي بخوف وجزع اذا راح عمو وية اسيا وابنها معناها كل كلام عمة اسيا راح يتحقق
بجيت بكل جزع وخوف
.. عفية عمو ابوس ايدك اخذني وياك لا تتوقع مني اكدر ادرس او امتحن واني بالي يمك
اسيا.. عاد انتي شلون جنتي شاطرة وهسة متكدرين تدرسين هاي خوش حجة حتى تغطين على فشلج
باوعت عليها .. عمة اترجاج لتتدخلين
ورجعت التفتت باوعت لعمو
.. عفية عمو الله يخليك اخذني وياك لتتركني هنا اموت من الخوف من التفكير بيك
باوع علية بعطف وكال
.. زين شلون ومستقبلج
.. عمو انت مستقبلي لتتوقع مني ينطيني گلبي اكعد ادرس وكأنما شيئاً لم يكن
غمض عيونه وكال
..شلون بيج والله حيرتيني وياج لا اكدر اخذج وياي وبنفس الوقت ما اكدر اعوفج وانا اعرف بيج راح تكلبيها مناحة كليلي شنو الحل
.. عمو الحل بسيط تاخذني وياك لان ما عندك خيار ثاني اذا تركتني ما راح اضمنلك روحي شنو اسوي
باوعلي بأستسلام وكال
.. امري لله ماعندي غير حل
التفت على ابو سيف وكله
.. ابو سيف اخذ جواز ريم وياك حتى تفيزه ريم تسافر وياي
ابو سيف.. صار تدلل ست ريم
جهزي جوازج حتى اخذه وياي من اطلع
احس هدأت نبضات گلبي باوعت لنظرات عمة اسيا
كامت تجدح من الغيض
عمو مؤيد .. ادري بيها هاي مخبلة راح تظل تنك وتتوسل ومراح تتركني ارتاح الا من اخذها وياي
.. كلتلك عمو من البداية اني راح ابقى وياك مثل ظلك صعب تتخلص مني
ابتسم بتعب وكال.. وهو انت ثبتي كلش صعبة اتخلص منج
اسيا.. ومثل كل مرة الخاتونة تمشي كلامها عليك وتسوي الي براسها
سكتت مجاوبتها بس عمو جاوبها
.. شعندي غيرها حبيبة عمها
اقتربت عليه وبست راسه
.. ربي يخليك الي وما يحرمني منك
قاطعنا كلام عمو ابو سيف
.. هسة خلونا بالمهم انا ما اجيت بس علمود الجوازات
انا جاي على موضوع كلش مهم
عمو سأله.. بخصوص شنو هذا الموضوع
.. بخصوص اولادك
.. اي
حثه عالكلام
اباوع لابوسيف فتح جنطته تصير مثل حجم الكتاب
وطلع منها اوراق وكال
.. مؤيد انت طلبت مني ان اجمع معلومات عن اولادك
وانا اول شي سويته حتى الكة مكاناتهم رحت على
دائرة النفوس الي صدرت منها بيانات الولادة حتى من عندها اكدر انطلق
لكن بأثناء البحث جاي اتفاجئت بشغلة كلش مهمة انت جنت غافل عنها ما اعرف او تم خداعك
مؤيد بصوت مبهوت .. شنو هاي الشغلة
.. الشغلة ان ابنك الثالث نور مؤيد
مو مثل ما جنا متوقعين ولد
نور طلعت بنية يعني كل هاي السنين عندك بنية مو ولد
اباوع لعمو نهض من مكانه مصدوم
.. بنية !!! يعني ن. و ر بنية
انخطف لون وجهه واختل توازنه واغمى عليه في ركضت عليه
.. لااااا عموووو!!!!!!!!!


يتبع.....