[لامارا]

#قضية_لم_الشمل
#الكاتبة_نهى
#البارت السادس



مساء الانوار والخير عليكم يا احبتي المتابعين
نور
مثل كل يوم ببيت ام امير
ابدي يومي بالتنظيف وغسل الهدوم
بالحقيقة بيتهم ما يتعب نظيف لان ما عندهم اطفال يوسخون
اغلب شغلي يكون مع ام امير لان هي تحتاج احد يساعدها من تسبح
او تتحرك بالبيت ومن تريد تطلع للحديقة تتشمس
اما باقي ملحقات البيت فتكون تقريباً نظيفة بس يحتاجلها تهوية وتنظيف الغبار عنها
واول ما انظف ابدي بغرفة الحبيب
دخلت لغرفة امير وبديت انظفها واتذكرت هديته البارحة يمة فديته
لحد هسة گلبي يرجف كلما اتذكر شلون دخل للمطبخ وبيده كيس وكال
.. كنت طالع للمول واتذكرت سرى اختي وصتني على
شال لونه فيروزي واثناء ما كنت اشتري وكعت عيني على الملابس
تذكرتج جيتي على بالي وكلت خلي اشتري لنور خليها هي هم تفرح
اخذت منه الكيس واني احس بروحي راح اذوب من الخجل
لساني ثكل وانعقد حتى ما اعرف شنو اجاوبه
.. اااااشكراً استاذ
.. بطلي كلمة استاذ انتي صرتي وحدة من عدنا يعني
واكفة تصيحيني استاذ
ابتسمت بوجهه وبقيت بس ارمش بعيوني
فتحت الكيس وباوعت لداخلها هاي شنو فستان مال مناسبات وشال
رفعت راسي وسألته متفاجئة من اختياره لهاي الملابس وشنو مناسبة الهدية
كنت مستغربة وفرحانة بنفس الوقت وابتسمت واني اسأله
.. هاي وين البسهم
لمعت عيونه بفرح وكال
.. ان شاء الله عن قريب
راح تلبسيهم بمناسبة سعيدة تخصنا
يمة هو كال هيج وانا رحت وانصهرت
احتاريت وين اضم روحي وهو يباوع علية و خربان ضحك على شكلي
جاوبته واني ارجع الاغراض للكيس
.. تدري انت فاجئتني بهديتك وبكلامك هذا
ابتسم بفرحة وكال
.. منا ورايح اتعودي على المفاجئات
بس انتي ادعيلي ربي ينولني الي ببالي وساعتها راح اشبعج هدايا
رفعت ايدية اثنينهم ادعي له
.. يارب يحقق احلامك وينولك مرادك
.. اللهم امين
خلصت شغلي ورحت لغرفة الدكتورة سرى
كان تنظيفها شوية معقد
لان كتبها وتقاريرها وهوسة المكتبة مالتها متحب احد يلمسهم
تكول ما اريد احد يعدل هوسة المكتبة اخاف يخربط علية النظام ويضيع علية الاول والتالي
لذلك اني اتعلمت عليها صرت انظف كل شي بغرفتها من تنظيف سرير وملابس ومسح وتهوية
الا المكتب مستحيل اقتربله، خط احمر
بعدما خلصت
شغلي فوك ونزلت جوة للبيت وصار الوقت ظهر
ومريت على الهول واني شايلة بيدي سطل التنظيف
كانت ام امير كاعدة بالهول وتحجي بالنقال وية وحدة
اسمعها تكول
.. اي عيني البارحة حجيت وية امير عنها
وكلتله ماما امير والله البنية ذهب مصفى ويتيمة ما تتفوت
وتشوفها كدام عينك كل يوم شلون طيبة
سكتت شوية تسمع الطرف الثاني ورجعت كملت كلامها
.. على الاقل نعرفها ونعرف اخلاقها واني بيني وبينج
حسيت بيها هي هم شكلها مايلة لأمير
.. شنو شلون عرفت هي مبينة من نظرات عيونها
وكلامها وية امير ثبت صحة كلامي
وحتى انتبهت لأمير بدأ يتودد لها وتصرفاته هو الثاني هم تثبت اعجابه بيها بس انتي ادعي له ان شاءالله ربي يتمم عليه
كانت ام امير مستمر تحجي بالنقال
واندك الجرس انتبهت من سرحاني تركت سطل التنظيف ولبست شالي ورحت افتح الباب اكيد هاي الدكتورة سرى وصلت باوعت لساعة المطبخ واني طالعة افتح الباب اي هسة وقت وصولها
فتحت الباب واني مبتسمة
سرى.. هلوووووو نونة شلونج
.. هلا بيج دكتورتنا
دخلت سرى واتبعتها بنت خالها زهراء وياها بكلية الطب اتعودت كل يوم تنزل تسلم على خالتها وترجع لبيتهم القريب
زهراء.. هلوووو نونة شلونج
.. هلووو زهورة
.. عيني عاااااشت ايدج على الكليجة ماما وبابا اكلوها
وسألوني عليها منين هاي الكليجة
وطبعاً كلتلهم عليج
.. الف عافية اذا تردون اسويلكم بعد وجبة
سحبتها سرى من ايدها تدخلها لداخل البيت
سرى.. نونة عوفج منها هاي وحدة جوعية لا تنطيها مجال خلي الكليجة بس الي
دخلوا للبيت وراحت سلمت على خالتها مثل كل يوم واني التهيت اشوف شغلي بالمطبخ بديت احمي الاكل
وبعد خمس دقايق طلعت زهراء وسرى سدت وراها
الباب اتعودت على هالمنظر بين فترة وفترة زهراء تنزل تسلم على خالتها
وكلما اشوفهن اتذكر ايام الكلية واحن لها
صبيتلهم غدا فاجئتني ام امير بطلبها
وكالت
.. خالة نور تعالي كعدي اتغدي ويانا
باوعتلها مستغربة
.. لا اني بعدين اكل انتوا اخذوا راحتكم
سرى.. اكول بلا دلع شو صبيلج اكل وتعالي اكلي ويانة عالواهس
رحت طلعت ماعون وصبيتلي وكعدت وياهم على ميز الطعام
وبديت اكل وسرى تسولف لامها على كليتها والوضع
وكالت زهراء بنت خالتي اتقدملها واحد بالكلية
وام امير .. ومنو هذا
سرى.. بالحقيقة لا اني ولا هي نعرفه للولد بس كان مبين من شكله شاب محترم
كانت سرى تحجي ودخل امير احلامي
سلم علينا وباس راس امه
واني بسرعة كمت من مكاني حتى اصبله غدا لان هو متعود اول ما يوصل يبدل ملابسه ويتغدا
دفعت الكرسي حتى انهض من مكاني
بس وقفني صوته
.. رجعي كعدي بمكانج كملي اكلج انا هسة ابدل ملابسي واصب لنفسي اكل
.. لا عادي اني ما عندي شي
.. كعدي كملي اكلج متشوفين روحج صايرة جنج
عصفور صغير ياعيني انتي لازم تاكلين
حتى يرهم عليج الفستان
دنكت راسي يمة كلامه هواي علية انا گلبي مو حمل هيج عسل والله اخاف يرتفع عندي السكر من حلاوة كلماته وياي
بعدما خلصنا الغدة صعد امير فوك لغرفته حتى ينام وسرى نفس الشي وخالة ام امير بقت تشرب جاي ما بعد وجبة الغدة هاي القاعدة عندها ثابتة
كانت تشرب جاي يمي بالمطبخ واني اغسل الصحون
.. حبيبتي نور عفية باجر تعالي من وقت
.. شنو خالة عندج عزيمة
.. لا خالة بس اريدج تطلعين الاستقبال والهول وتنظفيهم تنظيف زين لان عن قريب عندنا مناسبة فرح
انتفض گلبي بين ظلوعي
.. راح نفرح بمنو ان شاء الله
.. عن قريب راح تعرفين خليها مفاجئة الج
من تصير راح تكونين اول وحدة تعرف اكيد
فما اوصيج اريدج تجهزين نفسج من هسة
اريد كون كلشي جاهز لان ما بقى شي على فرحتنا
هي كالت هاي الكلمات وانا صرت مثل الطير الي فردوا جناحه وكالوله طير انت حر
........
جلال
كنت اشتغل واحوم بالورشة انتظر على نار وصول الاسطى
وسلوان يشتغل وعينه علية
واول ما وصل الاسطى گبل رحت عليه
شافني وابتسم
.. هلا والله بجلال قربان شخبارك
.. بخير استاذي ما دامك بخير
.. والله ان شاء الله بخير ومنا ورايح اتوقع مني كل الخير
.. اي استاذي على طاري الخير مو شكلك نسيت
تكللنا شي مهم عن الصار
.. وشنو هالشي المهم
.. اسأل نفسك
اقترب سلوان من يمنا وكال
.. استاذي البارحة من كلتلنا راح ترحون لمعسكر
وتصلحون سيارات اشو ما شفنا اي شي من الي كلت عليه
ومنو هذولي الناس الي رحنا عندهم
ابتسم الاسطى .. هسة انتوا شنو دخلكم بيهم تريدون تتعرفون عليهم راح تناسبوهم
رزق وجايكم بعد ضباط او مو ضباط هاي شي مو مهم
اهم شي عندي انتوا عجبتوا ابو بهاء
سألته.. بشنو عجبناه ليش هو احنا شنو سويناحتى نعجبه
لايكون عبالك صدكنا قصة التصليح
باينه مثل عين الشمس كلها كلاوات وكذب
ماشفنا اي عطل بالسيارات
والبارحة كضيناها كلها نغسلها ونلمعها لان ماعدنا شي نسوي
ورجعنا واحنا ما افتهمنا كل شي
.. لك بابا جلال انت ليش تصير غبي
هذولي ناس الله ناعم عليهم من خيراته
وهذا ابو بهاء فهمني كال احتاج مصلحين يسوون ادامة للسيارات والمكائن
انتوا البارحة من رحتوا يمهم شفتوا اليات ومكائن
سلوان جاوبه .. اي شفنا هواي سكراب عندهم حتى شكلهم متناقض وية مكان وجودهم يعتي مزرعة تشبه الجنة وسيارات اخر موديل وكلها فخمة
وفجاءة تشوف سكراب وخردة خلف ساحة القصر استغربنا
الاسطى.. هسة انتوا ليش تسألون هاي رزق وجايكم
انتوا ليش ما تستغلون الفرصة
اي صدك ذكرتوني تعالوا اخذوا يوميتكم
كمل كلامه وهو يتوجه للمكتب مالته وكعد على الكرسي وطلع مفتاح من جيبه وفتح المجر وطلع رزمتين فلوس
وشمرهم عالمكتب بأتجاهنا وكال وهو مبتسم وعيونه تلمع بفخر المتفضل علينا
..هاي كل واحد بيكم رزمة
باوعنا انا وسلوان على الفلوس متعجبين
سألته.. هاي شنو الفلوس
جاوبني .. هاي يوميتكم مالت البارحة مو كلتلكم بس ترحون الكم يومية دبل
اخذنا الفلوس وحسبناها وصدك كانت اضعاف يوميتنا
.. يالله اخذوها وادعولي شفتوا شلون انا اتمنالكم الخير
سلوان بفرحة .. تسلم استاذي كلك خير وبركة
انا عني ما عندي اشكال اذا دزوا علينا مرة اللخ
لان كلبي اتطمن لهم شكلهم ناس طيبين
كان سلوان منطلق بالكلام وانا عيني على الاسطى
.. استاذي انت ما كلتلي هم شنو يردون من عدنا
اختفت ابتسامة الاسطى توفيق وباوع علية بجدية وكال
.. انت صاير هواي تسأل هسة انت شلك غرض انت اهم شي توصلك يوميتك كل يوم بعد مالك دخل بيهم هم منو ليش هيج يدفعون هذا مو شغلك
فلوسهم واحرار بيها عسى مايحركوها
سامع مو من حقك تسأل
.. لا من حقي اسأل عنهم وافتهم شنر الموضوع
لان مو انت الي مشيت على طريق الموت احنا الي مشينا وجازفنا بأرواحنا
نستحق واحد يفهمنا الموضوع شنو
لان احنا مو حيوانات ووتودينا على عمى وجهنا لطريق ولناس غربة ما نعرفهم
سكت .. شوف جلال كثرة اسألتك راح تكلفك هواية واولها باب رزقك وثق بالله انا لوما اتمنالكم الخير كان ما رسلتكم الهم وهمة ناس خيرة وانا سبق وان اتعاملت
وياهم فلا تخافون هذا انا كدامكم صاغ سليم
وكعد الاسطى توفيق يطمنا وبفهمنا شنو المطلوب من عدنا
الي افتهمته انه شغلنا وياهم حسب ماهم يطلبون
يعني تجي ايام ماعندهم تصليح سيارات
احتمال تصلحون مكاين والالات
حسب الحاجة هيج شي وبالحقيقة
انا كنت كلش محتاج
اليومية وخصوصا ان اليومية يمهم تصير اضعاف اليومية الي احصلها من الورشة لذلك انا وسلوان
بعدما تطمنا وافقنا على الشغل وياهم
وفعلاً الايام ثبتت
صحة كلام الاسطى توفيق
واول ما اخذت اليومية وخلصت شغلي بالورشة
مباشرتاً رحت للسوك
واشتريت ملابس لبيت خالي رند ورنين ودانة واسراء وحنوش ومصطفى واحمد كنت اشتري واتخيل فرحتهم واشتريت لي نقال حديث لمس وسلوان كان وياي اشترى لأمه محبس واشتراله نقال حديث
كنا كلش فرحانين
ورجعت للبيت صادف الوقت مغرب
واستقبلوني اولاد خالي كالعادة وطاروا من الفرح بملابس العيد وبدوا البنات يتعاركون على الغراض
انتبهت لخالي كان كاعد على صفحة وزوجته كانت كاعدة بصفه تطبطب على ظهر تواسيه وهو كان حاني راسه على صدره سمعت صوته كان يبجي بحرگة گلب
عقدت حواجبي وتركت الغراض من ايدي وصحت مصطفى مستغرب
.. مصطفى تعال
.. نعم جلال
اشرت بعيوني لمكان خالي
.. شكو شبي خالي يبجي شنو صاير
جاوبني بصوت متأثر.. مو اليوم قتلوا عمو ناجي صاحب بابا
.. شلون!!!! منو قتله ليش انقتل
.. ما اعرف بس بابا يكول جماعة مجهولة
رحت كعدت كدام خالي وسلمت
.. البقاء لله خالي الله يرحمه كلمن يموت بيومه
رفع راسه وعيونه حمر لأول مرة بحياتي اشوف خالي متأثر
.. لك جلال هذا ظلعي انت ما تعرف ناجي شنو بالنسبة الي هذا صديق العمر
.. الله يرحمه
زين ماعرفتوا منو الي ورة مقتله
جاوبني بقهر .. والله ما اعرف منو بس هاي صار فترة نازل موديل اكو جماعة مجهولة دتصفي اصحاب الملاهي والبارات ومحلات الشرب وناجي المسكين شكله وصله الدور بالتصفية وقتلوه الملاعين الله لا يوفقهم
.. خال ما دام هيج صار الوضع معناها انت هم لازم تاخذ حذرك وتدير بالك هاي الايام لا تقترب على ذيج الاماكن
باوع علية بقلة حيلة وماجاوبني
عرف شنو كنت اقصد
اريده يقطع الشرب ويلتفت لعائلته
هو صحيح يشرب بس يحاول ما يقصر على عائلته
يحبهم بس الشرب عنده ادمان ولع مو بيده
وهالشي لابد وان يأثر على عائلته اكيد راح يضرهم حتى لو كان يحبهم ويهتم بيهم
الحب وحده مايفيد
ورة ساعتين كامت ام مصطفى وصبتلنا غدا
وكعدنا كلنا على فرد صينية انا والاولاد والبنات وخالي وزوجته
اتذكرت نقالي الجديد ورحت طلعته من العلبة
وشوفته الهم وفرحوا بي
.. تعالوا مادام كلنا مجتمعين خلي ناخذ صورة
واخذنا صورة كلنا سوية كانت الوجه ضاحكة بشقاوة
بس خالي كان يباوع للكامرة وعيونه بيهم ذبول الحزن
تعشينا وبعدها التموا الجهال داير ما دايري
حتى اخذلهم صور وكانت اغلب الصور من نصيب
رنين ورند وحنوش
اما اسراء ودانة فأخذوا صورتين وهن كوة لازمات ضحتهن وكل مرة تطلع بالصورة حلكهم مكور من الضحك
ومصطفى المراهق الجديد الي يريد يمثل الرجولة امام الكامرة واحمد الي يسوي الحركات البهلوانية
اما حنوش ابو خدود فهذا مترأس القائمة كان شكله وخدوده يسوون واهس للعض والصور وانا استغليت
فرصة التصوير وصارت الصورة عليه بعضة
اطك صور واعض بي وهو شكله مثل البزونة تحب خناگها
...........
مهيمن
بديت شغلي بالمحل بعدما مولني الحجي
اشتريت البضاعة رتبتها بمكانها
سويت دفاتر حسابات نظامية بكل الي اشتريته والمصاريف الي دفعاتها
وبالجهة الثانية كل شغلة تنباع تسجل وعلى صفحة الربح بكل شغله انباعت
من زارني ابو حيدر تعجب بترتيب المحل والدفاتر المضبوطة
الحجي.. ما شاء الله مهيمن انت صدك سبع
اهم شي بالتجارة هي دفاتر الحسابات المضبوطه الي تخليك تعرف شنو الك وشنو عليك
وشكد صرفت وشكد ربحت
الله يبارك بيك كدرت تنظم امور المحل وتبدي شغل سليم ومرتب خلال ايام
رغم بعدك جديد على السوك
.. تسلم حجي لاتنسى يكولون ابن الوز عوام
وانا عندي الوالد الله يرحمه والخوال كلهم عقليتهم تجارية
.. والنعم منهم خوالك اهل نخوة واصل واسمهم بالسوك دوم مرفوع
رجعت لبيتنا ولكيت امي جامعة العشيرة ببيتنا
امي صاحبة كرم.. من غير اي شي كان رزقها محدود
وهي تعزم مو نوب هسة بعدما الله فتحها علينا
خطية بنت ديوان مو بيدها الكرم يمشي بدمها
ما يمر اسبوع علينا اذا ما تعزم خوالي وعوائلهم
دخلت للبيت والجهال الصغار استقبلوني من راس الشارع اجة مهيمن اجة ابو الهمة
دخلت للبيت ولكيت امي مشمرة ذراعها وواكفة عالطباخ
بنات خوالي شافوني وركضن دخلن جوة يلبسن حجاباتهن ونسوان خوالي كعدن يسلمن علية
رحت بست امي من راسها
.. يوم ابشرج قدمتلي وقدمتلج عالحج
بلكي الله ويطلع اسمنا بالقرعة حتى اخذج نحج بيت الله الحرام
لمعت عيونها بفخر وفرحة بين النسوان وباستني من كتفي لان هي قصيرة بالنسبة لي توصل لكتفي
باوعت لنسوان خوالي وبناتهم وكالت
.. يايمة مهيمن ربي يحفظك لي ويفرحني بيك
بس يمة بالاول خلي ازوجك وبعدين نفكر نروح للحج
.. هذا نذر قاطعه على نفسي اول ما الله يفتحها بوجهي ويرزقني اخذج للحج
دخلت حوراء ولازمة بيدها ايد جدتي ودتمشيها بالبيت على كيف
جدتي مرة كبيرة بالعمر نظرها ضعيف
شافتني وعقدت حواجبها وكالت
.. ولكم هذا ياهو الزلمة يكول عامود كهربة
خطية نظرها ضعف جدا متشوف عدل
امي كالت.. يمة هذا وليدي مهيمن
اقترب جدتي مني وصارت تركز بوجهي وكالت
.. ولج زهرة هذا صاير يشبه ابوه العار عيناً
عقدت حواجبي مستغرب حز بخاطري كلامها
باوعت لأمي فتحت حلكها ورجعت سدته دارت وجها
على كدورة الطبخ وكالت بصوت عالي
.. الله يرحمة ويطيب روحه الجنة
وغيرت الموضوع وكالت
.. يمة مهيمن الله يرضى عليك ما تروح تصيح خوالك كلهم الغدا جاهز
.. ليش همة وين
.. همة مجتمعين بييت خالك حسن
طلعت من البيت
الحلو ببيوت خوالي واحد قريب عاللاخ وبيتنا يصير اخر بيت بيهم قريب عالشارع
رحت اصيحهم وانا عقلي مشغول بحجاية جدتي
اول مرة اسمع واحد يحجي عن ابوي بكلمة شينة
انا يزيدني فخر من اسمع خوالي او امي تگلي صاير تشبه ابوك عيناً
وكلام جدتي عن ابوي الله يرحمه ضوجني
اتذكر من كنت صغير اشتغل عامل عند خوالي
كان خالي حسن من يعصب علية بالشغل يسبني ويسب ابوي وبعدها يرجع يكلي
لاتزعل مني كنت بساعة غضب
هو طبعه هشكل حتى وية اولاده اذا اتعصب بالشغل يظل يسبهم لسابع جد يعني بأختصار حتى يغلط على روحه
بس انا استهضم من احد يسب ابوي الله يرحمه
لان الميت ما يجوز شتمه
......
نور
رجعت لبيت خالتي والدنيا ما سايعتني من الفرح
ام امير بأخر فترة هواي تلمحلي كل شوية تدعيلي بأبن الحلال
كثرت دعواتها من هذا النوع كانت كل كلماتها تثني على تربيتي وهالشي جديد علي
.. الله يرضى عليج يا طيبة
او
..رحمة الله بطن الي حملتج على هاي الاخلاق
يارب افرح بيج واشوفج عروسة
.. ويفرحني بعزيز گلبي بيوم اشوفه عريس
وافرح ببنيتي سرى
كان كل كلامها يبشر بخير
وصلت لمنطقتنا واتصلت على اسيل صديقتي وسألتها
.. اكول اسولة انتي بالبيت لو طالعة
.. لعد تمام فتحيلي الباب انا قريبة على بيتكم
عندي الكم خبر الابشدة
وصلت لبيتهم ولكيتها منتظرتني بالباب
حضنتني وسلمت عليها وعلى امها
ام اسيل.. هلا بسورها ونورها
حضنتها بلهفة .. خالة باركيلي راح انخطب
واسيل بس سمعت هاي الكلمات هلهلت بفرحة وبصوت عالي
.. كلللللللللللللووووووووش
ام اسيل .. لج اسيل الله يقطع بليسج فضحتينا
خلينا نفتهم بالاول شنو السالفة
لزمت ايدي ودخلتني للبيت
واسيل تمشي ورانا تهوس بفرحة
.. زوجناها وخلصنا منها وبقيت اني الاصغر منها
كعدنا بالهول وعيوني من الفرح تدمع
ام اسيل .. اي احجيلنا منو هذا سعيد الحظ الي راح يتقدملج
التفتت لاسيل اريدها تحجي خجلت لان موضوع حبي لأمير كان سر بيني وبين اسيل
اسيل .. شوفي ما محفوظة السلامة
الاخت نورة مثلما تعرفين تشتغل عند بيت الدكتور امير
وخلال العشرة والسنين بيت اهل امير الي هي امه واخته انعجبوا بأخلاق ورقة نور وطبعا شي اكيد الاستاذ امير وقع بحب وردتنا من غير كلام
كنت اضحك ودموع الفرح مالية عيوني
اجتي وكعدت يمي وحضنتني وكالت
.. يعني افتهم من دموعج ان صار الي كنا نحلم بي
هزيت راسي بالموافقة
وهمست بخجل.. اي وام امير كالت خالة جهزي نفسج
ما بقى شي على فرحتنا
اسيل كمزت من مكانها .. شلوووون مابقى شي
وتحجيها هيج بكل برود
عزززة وين نلحك لج معناها ماعندنا وقت حتى نجهزج ورانا كومة شغل
ام اسيل.. اي ياعيني غير ينطونا موعد حتى نعرف راسنا من رجلينا
.. خالة انا اهم شي عندي اصير زوجة امير والباقي
كله لاحكين عليه
اسيل.. شوف حظي شلون تحجي لج حبيبتي ماما دتقصد شوكت نلحك نوديج صالون ونجهزج ترة وراح حصبة وجدري يعني يادوب نلحك على الاقل حفافة ترتيب وجه وشعر ونطلع سوق
اهوو وتعالي لازم تبلغين خالتج حتى تجهز امورها
.. لا خالتي خليها بالاخير كلش من يردون يجون يخطبون يالله ابلغها بالخبر حتى ما يطلعولي عكوسيات
ويسون مشاكل وياي
ام اسيل .. اي هم صدك بس انتي ابدي جهزي نفسج من وراهم من غير ما ينتبهون
اسيل لزمت نقالها وكالت
.. لعد خلي اتصل على الصالون اشوفهم مفتحين لو لا حتى احجزلج موعد وياهم علمود نبلش بالتحضيرات
ام اسيل .. اي وضروري نطلع للسوق حتى نشتري ملابس اكلج شنو رأيج باجر تاخذين اجازة من بيت ام امير ونطلع للسوك نكمل تجهيز شغلاتج
.. لا مو باجر اخذ اجازة لان باجر همة محتاجيني نكمل تجهيزات البيت احم احم ومثلما تعرفون البيت كله على ايدي فيحتاجوني حتى اكعد ارتب وياهم
فخلوها عكب باجر اخذ منهم اجازة يومين
حتى اجيب الفلوس ونطلع للسوك براحتنا
ام اسيل.. خالة نور امانة اذا تحتاجين فلوس كولي ترة عندي جوة ايدي كم فلس
.. لا خالة تسلمين ربي ما يحرمني من حنانج وعطفج
بس اني مجمعة كم فلس ضامتهم لهيج ايام
اعجبج بهيج امور
.. والله سباعية خلي بعض الناس يسمعون بلكي يتعلمون يحرصون ويجمعون
اسيل تگلب عيونها .. ماما والله بطلت اجمع فلوسي
لان صارت بية خوفة من ايام العيدية من كنت اجمعها واضمها عندج
وتالي من اكلج انطيني فلوسي تكليلي
( انتي صدك ما تستحين جاية تطالبيني بكم فلس
ياما وياما صرفنا عليج
لج ما يغزر بيج هذا الصرف الي اصرفه عليج ملابس واحذية وجنط جاية على كم فلس مجمعته تحاسبيني عليه )
ام اسيل .. شوف هاي مصدكة نفسها وتسمي العيدية تجميع عمي الحمدلله ما تصرفين علينا كان ظلينا بالضيم و متنا جوع لان كل شوية مذكرتنا بفلوس العيدية
كانت اسيل وامها يتناكرون واني اضحك على شكلهم
للحظة اتمنيت وجود ماما وبابا الله يرحمهم بهيج يوم حتى اشاركهم فرحتي
........
ريم
بعدما بشرنا عمو ابو سيف بخبر عثوره على عناوين اولاد عمو مؤيد عمو قرر يرجع للعراق
.. شنو عمو شلون نرجع للعراق وانت بعدك مامكمل جلساتك الكميائية
باوع للدكتور الي كان واكف وراي وكال
.. دكتور رحمة لوالديك فهمها لبنت اخوية عن وضعي الصحي
اباوع للدكتور مسح جسر خشمه وكعد يحم حم وكال
.. بالحقيقة يا انسة ريم
الحاج مؤيد صار فيه يخرج من المستشفيي امتى ما بدوا لان جسموا صار ما بيحتاچ للجلسات الكيميائيي
وبعدما طمني الدكتور على صحة عمو وطلع
من الغرفة عمو باوع علية وگال
.. وهسة ارتاحتي من اتطمني لو بعد عندج اسئلة
ابتسمت بفرح ورحت حضنته
.. والله ياعمو لو تعرف انا شكد مشتاقة ارجع للعراق
يمكن اكثر منك
.. اي والله ماكو احلى من ريحة هوى بلادي
حال بلدنا مثل ام مهضومة تنزف تعبانة وبنفس الوقت تبقى تبتسم بوجه اطفالها وهذولي الاطفال يبقون يحبون امهم رغم مرضها ما يتغير حبها بگلبهم شعرة
ابتسمت على كلام عمو ذكرتني بكلمات اغنية كنت اسمعها دائما بس ما كنت ادرك معنى كلماتها
.. جنة .. جنة ..والله يا وطنا
وعمو كمل كلمات الاغنية بحنان وصوت تعبان
.. ياوطن ياحبيب .. يابو تراب الطيب
حتى نارك .. جنة .. والله حتى نارك جنة
............
جلال
مر اسبوع على شغلنا انا وسلوان وية ابو بهاء
وصرنا ناخذ يوميتنا من عنده مو من الاسطى توفيق
وبنفس الوقت كنا مستمرين بشغلنا
بورشة الاسطى لان بالحقيقة هو صاحب عملنا
وله الفضل بتعرفنا على هذولي الناس
وطول هاي المدة كنت لازلت مستمر اشتغل على الجهاز المتكون من الية بسيطة تتركب وية المحركات
ويزيد من سرعتها للدرجة القصوى
سلوان يسألني .. يا اخي انكسر ظهرك على هالجهاز
والمشكله كلما اشوف حجمه الصغير يزيد احباطي
كنت كاعد بنهاية الورشة بالكاع اركب بالجهاز ومركز بدقة تنظيمه
رفعت راسي باوعت عليه ومسحت العرق
.. شايف هذا الجهاز الما عاجبك
اذا ركبته وية محرك اي سيارة حتى لو قديمة رايحة مابيها حيل تمشي
راح تشوفها تنطلق بسرعه تنافس السيارات الحديثه
يعني المتعارف عليه ان هاي التقنية تتوفر فقط
بأفخم السيارات واضخم المحركات وانا
اذا راد الله وتمت المهمة راح اكدر بخلال هذا الجهاز
ودمجه وية محرك السيارة راح يزيد من قوة عزم المحرك وبالتالي ينتج السرعة القصوى
يعني اذا نجح هذا الجهاز راح تكون ضربة قوية لك مو بعيد حتى يدزون علينا بالخارج حتى نعلمهم شلون يصنعون مثله
اااااخ بس كون ينجح
كنت اشتغل بأجتهاد وبنفس الوقت سلوان يساعدني
بتمويلي بالقطع النادرة والحساب طبعاً على الاسطى توفيق
كنت حافظ مخطط الجهاز كله بدفتر سري وهذا الدفتر فقط عندي محد يعرف بي
سلوان .. والله هذا شغلنا لو بدول الخارج كان
بنظرة وحدة راسا يتبنون اختراعك
ويدعمونك. بس مع الاسف احنا بالعراق
محد له خلك يهتم بالشباب مواهبهم
مثنى .. فالحين بس يدعمون مواهب الشباب الغنائية
سمعتلك فد يوم علنوا او ذاعوا بالتلفزيون عن مسابقة اختراعات
او مواهب وافكار الشباب
او برنامج مسابقات المنافسة بين المدارس
للتحدي بين الاذكاء مثل دول الخارج
.. لا والله ما سامع
كانوا يشتغلون بسيارات الورشة
وانا كارص على صفحة لوحدي اشتغل عالجهاز
وبنفس الوقت اسمع كلامهم
مثنى وسلوان الوحيدين الهم الحق يشوفون شغلي من اشتغل
لان هم مايعرفون شنو اساسيات عملي
يعني مثنى لو انطيته الجهاز بيده ماراح يعرف طريقة تركيبه وتشغيله
اما سلوان فهو الوحيد الي كنت اشرحله
طريقة عمل منضومة الجهاز ولكن بنفس الوقت ميعرف الجهاز شلون يتصنع
واليوم بعد طول عناء وسهر ليالي وشغل وتجارب لمدة ثلاث سنوات
خلص وصار بالشكل الي اني راسمه ببالي
اليوم انا وسلوان ومثنى راح نربط
الجهاز بالمحرك
مثنى كان مجهز السيارة وسلوان محضر العدة
وبلشنا نركب الجهاز وضعي كان اشبه بوضع دكتور اعصاب يجري عملية جراحية دقيقة وحساسة
لمريض ونسبة النجاح تعتمد على مدى مهارة الجراح هذا حالي وية تركيب الجهاز واستمرت عملية التركيب خمس ساعات متواصله
كنت فقط استريح اشرب ماي وارجع اكمل
ربط اسلاك الجهاز بالمحرك
بعدما انتهينا من ربط الجهاز اخذنا السيارة بساحة الصناعية
وركبت السيارة القديمة وشغلتها امام عيون مثنى وسلوان. وجان تنطلق السيارة وينتج عنها صوت يدل على قوة محرك السيارة القديمة كان وضع السيارة عينا يشبه رجل عجوز كبير بالعمر ويحطوله گلب شاب عشريني
هذا كان حال السيارة شغلت السيارة وانطلقت بيها بأقصى سرعة وهاي كانت اول تجربة الي اطبقها على ارض الواقع
حسيت انا ملك وقفت السيارة بنهاية الطريق ونزلت منها
رفعت ايدية اثنينهم بعلامة نصر وصحت بصوت عالي
.. جلاااااااااااااااااااااال قربااااااان
اجوي سلوان ومثنى وعيونهم بيها الفرح
حضني سلوان .. ولك عمي صدك سبع
واخيرا نجحت شنو راح تسمي اختراعك
.. راح اسميه جلال قربان
مثنى.. والله تستاهل يا جلال كل خير
لان هواي تعبت عليه
حضنتهم اثنهنم على الجانبين وصرنا نمشي بتجاه الورشة
.. طبعاً ما راح انسى وكفتكم وياي وراح يلوحكم من الخير نصيب
بعدها رجعنا شلنا الجهاز من المحرك
ورحت خبيته جوة بالسرداب يم السكراب القديم
هو كان مثل المخزن
اتصلت على الاسطى توفيق وبشرته بالخبر
وهو طار من الفرح وگال
.. وبهاي المناسبة اخذلك اجازة حتى ترتاح وبعدها تعال علمود نحتفل بفخرنا
.......
ريم وبعد اسبوع من الانتظار
رجعنا للعراق وعمو بدة شوية يرتاح خطية كل شخص يحن لبيته خصوصاً اذا كان مريض يحس بيته عبالك حضن دافي يخفف عنه المه ويحسسه بالامان
هشكل كان حال عمو مثل الطفل ورجع لحضن امه
واول ما وصلنا للبيت عمو مباشرتاً اتصل على ابو سيف
مؤيد.. شوف ابو سيف هسة بوجهك تجيني وتجيب الملفات وياك بعد ما عندي صبر حتى اعرف الاخبار
بعدها غلق النقال وباوع علية وگال
عمو تعالي ساعديني خلي ابدل ملابسي قبل لا يجي ابو سيف
جان يحجي وعيونه تلمع
دخلت علينا عمة اسيا بأثناء مكنت اساعد عمو
باوعت علينا بشك وكالت
.. ليش احس بينكم اسرار ضاميها عني
ومتردون اعرف بيها
..
عمو مؤيد ابتسم وكال
.. مثل شنو هاي الاسرار الي احنا ضاميها عليج وليش نضمها عنج
.. ما اعرف اسأل نفسك اشو كثرت كعداتك وية بنت اخوك واشوفكم دائما تتهامسون ومن ادخل عليكم تسكتون والاخت هنا صايرة هادئة مو من عوايدها
.. شكلج اسيا كبرتي وصار عقلج يخيلج اشياء مصايرة انتي متوهمة كل ما في الموضوع بنت اخوي صارت بنية حبابة شكلي كسرت خاطرها وبطلت
شغب وعفرتة
جاوبته واني ابتسم .. يعني على هذا كلامك اني صاحبة مشاكل ومسببتلك قلق
.. اي والله عمو انتي متدرين شلون يكون شعوري من اسمع بيج مسوية مصيبة احس بروحي داخل بأنذار
بس ما اكول غير الله يساعد الي تكونين من نصيبه
اسيا .. قصدك على عريس الغفلة الي راح يتورط بيها
مؤيد.. اسيا انتبهي لكلامج مو بعيد يكون عريس الغفلة الي دتحجين عنه هو ابنج نائل
اباوع عليها من صار الكلام بأبنها
راسا بدلت اقوالها
.. لا ابني نائل رجال مثقف وواعي ماكو احسن منه
واكيد راح يكدر
يستوعبها لريم ويتفهمها وبنفس الوقت راح يغير بيها هواي اشياء وطبعاً راح يكون هذا التغيير نحو الافضل ولمصلحتها ومن حسن حظها اذا كانت من نصيب ابني
باوعت عليها وگلبي يفور
مصدكة روحها اني اتزوج ابنها والله لو تموت
يكفي امه اسيا وهذا اكبر عيوبه
وهذا سبب كلش كافي يخليني ما اطيق فكرة زواجي منه
قطع علينا الكلام صوت الجرس
وعمو كال .. احتمال وصل ابو سيف اسيا روحي فتحي الباب ودخليه بالاستقبال بين ما اجهز نفسي
............
جلال
يوم ثاني ما انطاني گلبي اخذ اجازة واكعد بالبيت وارتاح وانا كلي حماس ولهفة
احس حتى النوم طار من عيني
يوم ثاني اتصلت على سلوان من الفجر وسحبته من الفراش بالكوة
طلع لي سلوان من بيتهم فاتح عيونه وحدة ووحدة
من اثر النوم حجة بصوت نعسان
.. جلال انت والله مخبل لك روح ارجع نام اليوم عدنا عطلة شنو نسيت
.. لا ما نسيت بس ما جايني نوم لاحكين عالنوم
يالله بدل وتعال وياي
اتثاوب وحك راسه وهو يدردم علية
.. الله بلاني بيك بلوة
دخل للبيت وكعدت يم عتبة بابهم انتظره لزمت
غصن نبات يابس وصرت اخطط على تراب الارض احلامي
رسمت دائرة وكتبت عليها عائلة خالي اكيد هذا الجهاز
راح اجني من وراه الملايين
اول شي اسوي اشتري بيت كبير لبيت خالي بي حديقة
حتى رند ورنين وحنوش يلعبون بيها
وثاني شي اسوي نفتح انا وسلوان ومثنى ورشة خاصة بينا لتصليح السيارات
جنت ارسم واخطط وجان تهب نسمة هوى باردة
وتحرك التراب وتخفي معالم المخطط
طلع سلوان وهو يتأفأف بضجر
.. وين انهزم منك يا جلال يمكن حتى بيوم عرسي
الكاك تكطع ليلة عرسي وتكلي تعال سلوان محتاجك
.. شعندي غيرك يا صاح
بعد فترة وصلنا للورشة ولكينا الاسطى توفيق ويمه رجال اثنين الظاهر عندهم تصليح
شافني وابستم وكال
.. ها اشو اجيتوا مو انطيتكم اليوم عطلة
ابتسمت وكلت
.. تصدك استاذي ما كدرت انام ولا خذت عيني الراحة
كلت اجي واراويك شلون يشتغل الجهاز
كال .. خلاص ما دامك اجيت هاي هي
روح جهز المحرك بين من احاسب الشباب
دخلنا للورشة ورحت خلف السكراب ورفعت غطاء السرداب ونزلت جوة ورحت على مكان الي خفيت بي
الجهاز
بعدت الغطا وبعدها انصدمت صدمة عمري



يتبع
اتمنى لكم قراءة ممتعة
احبكم كومة احبكم طوخ
مع تحيات اختكم نهى الحسون