[d3do3a]

الفصل التاسع والعشــرون ..]


في وقت مختــلف وزمــآن مختــلف ..]

في أحد الدول الأوربيـه , دخل لمصعد الفندق , ضغط على الدور 21 واتوجه بخطوات سريعه
لغرفتهم المشتــركه
فتح الباب : مآآآلـــك مآآلك _ دخل لغرفـة النوم _ انتا نااايم قووم قووم
مـآلك بعد اللحاف
فتح الاضاءه وجلس على السرير :سوويت مصيبـه
مآلك جلس : ايش سويت
ررفع حوآجبه واتوسعت عينه : والله مصيبه مالها حـل
مـآلك مرر يده على وجهه : يامن قلتلك لاتطلع من الفندق شوف الساعه كم
يامن : ايش اسوي نفسي اشوف شروق الشمس
مآلك رفع حآجبه وكأنه عارف ليش خـآرج
يامن بتبرير ثاني : تدري اليوم كملت 15 سنـه بعني المفروض انبسط
مآلك : هجدددني وقول ايش سار معـآك
يامن : انسرقت محفظتي وفيها كل بطايقي واليوم رحلتنآ ايش اسوي ايش اقول لأبويـآ ؟
مآلك بتعب واضح على ملامح وجهه من تصرفاته : تمززح يايامن
يامن : ابوس راسك _ جا يقرب منـه إلا مآلك دفه _ لاتزعل والله فجعوني كنت حفسخ ملابسي واديهم هيا عشان يسيبوني
مآلك : دحين ايش يهجد ابوك
يامن بتوتر واضح : انا اخاف منـه , حسوي اي شي تباه بس لايعرف
مآلك : كيف لايعرف .! تستهبل 4 ساعات وحتلقاه يدق على باب غرفتنآ نجهز الشنط
يامن : اتصرف انتا
مآلك : يامن طول عمري اتحمل نتايج غلطك خلاص انتا كبــرت قلتلك لاتطلع حتروح تعترفله وتتحمل ردة فعله
يامن بجديه : والله أخاف
مـآلك انسدح : ابويا لو بيده يقتلني بسبب أغلاطك اللي اتحملها كل مره واحطها فيـآ
يامن ماعلق , قام من على السرير
كآن يحوم بتوتر في الغرفـه
ماقدر ينـآم
يجلس على الكنبه
يقوم
يروح بااتجاه الشباك
يرجع يلعب بالكاسات
ينسدح على السرير
يجلــس على طرف السرير
مـآلك يطـآلع فيه كل شويـه , اتدلل كثير بسبب الكل يستر عليـه , حيحاول يقسى عليـه
الفرق بينهم 6 سنيــن
يغمض عينه ويرجـع يفتحها ويامن مازال صاحي
رتب شنطــه , وشنط مآلك حطها عند الباب وجلس
صحي مآلك لقى لبسـه جاهز على الكنبه , غير ملابسـه بدون مايتكلم مع يامن
دق ابوهم باب الغرفـه فتحله يامن ودخــل : يلا جاهزين
يامن اصابعه اتشابكت بتوتر, يضغط على صباع صباع وعيونه الرمـآديه طاغي عليها الرعب
مآلك جلس على الكنبه المنفرده , عيونه مانزلت من على يآمن , ضعف , قال بكل هدوء : سارتلي مشكله
سلطآن عقد حوآجبـه
مآلك : اخر الليل خرجت وانسرقت محفظتي فيها بطاقتي وبطاقة يامن
سلطـآن ماستوعب : خرجت من الفنــدق !!
مآلك : ايوا كآن نفسي اشوف شروق الشمس
يامن نظرة امتنان , خوف من ردة فعل ابووه
سلطـآن شتم شتم شتتتتتم , ومآلك ساكت ودا الشي كالعاده ينرفزه زيـآده
عبارات أعتـآد يسمعها
وخرج وقفل الباب , هجــم عليــه يامن وحضنــه
مآلك اترمى للخلف وسند ظهره على الكنبه: ااابعد
يامن : يخخخخي احبببك احببك _ بااس خده وكالعاده كشر مآلك _
مآلك : شووف خلاص يكفي طعااات ياايامن
يامن وقف بااستقامه وعدل بلوزتـه وهوا مبتسم : آخر مره اخر مره
مروى دخلت عليهم مفجوعه : ايش ســآير .!؟
يامن حكـآها
مروى سابت كل شي وقالت : كيف انسرقت عوروك ؟
يامن باأوفرر وهوا يحرك يده بالجو : يااابت صفختــهم بالقوه قدرو ياخدو شي منــي
مآلك وقف ومشي بينهم وقال : تلاقيـه كآن يبكي في الركنيـه
يامن طالع فيه بقهر : انا ماأبكي بجددد ضربت واحد فيهم
مآلك وقف قدآم المرايه المعلقه بالجدار ويرتب شعره : قلي كآن حيفسخ ملابسـه ويديهم هيا من الرعب
يامن: كذاب , عارفتني صح
مروى تطآلع باأخوها الصغير عارفين خلاص اسلوبـه : عارفتك عارفتك متأكده إنو دافعت عن نفسك بالدليل انه مآلك كالعاده اتهزء وانتا مو قادر تكون صريح وتقـول انا السبب
يامن رفع حاجبه بنرفزه : فيه فرق هوا عودني يدافع عني خلاص حيعيش طول عمره يدافع عني بس لما اكون لوحدي شي ثاني
مروى: كيف كدآ ..!!
يامن : نازل افطر
مروى وسعت عينها من الصدمـه !!!
خرج من الغرفـه
مآلك ببرود : اديـه جوه
مروى : متى حتبطل اسلوبك ؟
مآلك: خليـه عوآفي كلها كم شتيمه باآخذها
مروى : مايسير مآلك بابا بجد بدأ يكرهك وغير يامن شوف كيف اسلوبـه ساير يسوي المصيبه ويجري عليـك كل مره
مآلك : هوآ انا غريب , بيروح لأخوه خلاص على الأقل يكون تحت عيني لا أمي ولا ابويا دارين عنـه
مروى حركت راسـها بيأس : بجد وضعك صعب هيا شوف ردة فعل بابا دحيــن وبكل برود نازل يفطر ولو بابا شافـه حيروح يقول انا مالي ذنب السبب مآلك لاتزعل مني ماتعرف اسلوبـه
مآلك ابتسم : حقير اعرفـه ايش مزعلك إنتي؟! انا راضي
مروى رفعت يدها بتعب : الله يعين بابا عليـكم بجد متعاطفه معـآه
مآلك اختفت ابتسـآمتـه ورفع حاجبه باانزعـآج : على ايش متعاطفه معـآه ترى كلها في السنه نشوفو 3 شهور
مروى : عشان مشغول يعني لو فا
قاطعها :روحي يامروى ماليا نفس اسمع صوتك
رفعت حوآجبها الاثنين بصدمـه : مستتتتفز
دارت جسمها وخرجت وخطواتها تدل على قهرهها من جفاصتــه ..


[ حــآليــآ ] ...

حلقـة مفقـوده ..
جثث , كلام عدنـآن , ثقة عدنان وهدوءه برغم كل إللي سار

[ يـآمن شريك..؟ ]
[ يامن له علاقــه بالجثث ..؟]
[ يامن يبا ينتقم لأنه عرف موضوع ابويا ولا شريك عدنـآن .؟]
دقـآت قلبــه متسارعه وعيون حسآم الحآقده حتنهشــه وهوا يستنى الجوآب
قرب حسآم منـه , فوقه من كل افكاره لما نطق بااسلوب وعيـد : عدنان لو ضره والله لاأحرق بيته بللي فيـه
[ ولو أخوه الصغيــر .؟ حتى لو بعيـدين عن بعض , حتى لو انقطعت علاقتهم يفضل اخوه الصغير ومايتحمل أحد يأذيـه ! ]
مآلك باعد بين شفايـفه قال وهوآ مآزال يحمي يآمن : وضعه صعب , نقله لعيـآده بعيده
رفع حاجبـه حسآم بشك
ومـآلك كمل بثقـه : مايبى تترفع اي تقارير باسم فراس حيتعـآلج ويرجع
حسآم : فين ؟
مآلك : مارضي يديني تفاصيل , بس وراني صورته ماأنصحك تشوفها
حسآم ضغط على اسنـآنه وفكه برز
مآلك : عدنان ماحيسويلو شي , لو قدرت حخلي فراس يطمنك ويطمن اختـه
حسآم صدره يرتفع وينخفض : إيش سـرلو ؟
مآلك : ماعرفته من الصوره
قِسي بالعبـآره لسبب وآحد وظهر بعين حسام
مآلك : اهجد من ناحية عدنان لحد مايرجع فراس
حسام بااستهزاء : وبعدها المفروض نردله جميل اللي سواه فينـآ ؟
مالك : بعدها إنتا حٌر حاسبه بالطريقه اللي انتا تباها وحكون معاك إلا لو حتمشي بطريق العنـف
حسام : خلي شي في بآلك انا مستعد اخسر دنيتي عشان فراس وعيلته لو عدنان بيلعب علينـآ ححاسبه باأبشـع الطرق وماهمني وقتها تكون معايا ولا لأ
جنون حسام بعيــوننه
بنبرة صوتــه
بعروقه البارزه
حيقـدر مالك لمتى يكبح تمـرده
كل وآحد مــشي باإتجـآه
فتح مآلك باب الشقـه ودخل , وخرج حسـآم للشوارع تحتضنه اخر الليل ...
مشي بخطوات ثقيـله ووقف لما سمع صوتها تتكلم بالجوال بالغرفه المجاوره

قبلـها بدقـآيق دخلت الغرفه وبتكلم امهـآ ...]
: ماحــرجع والله ماحرجعلو ...ماما انا تفكيري مو زيـك ماحعيش طول عمري على رحمة رجآل , حقدر اعيش لوحدي حقدر اوفرله حياه طيبه
امها : الحرمه مالها غير بيت زوجها
: دا لما يكون رجآل طبيعي رجال بعقلـه , حرام عليكي كل ماأطالع فيه يلومني على موت بنتي تعبت ياماما تعبت منـه , أنا أم الفكره دي تقتلني كل يووم
: من حرقة قلبه يتكلم , والله جا يبكي واعتذرلي
قفـل باب الشقـه ودخل مـآلك سمع صوتها ووقــف ..
: ياألله ياماماااا لاتداافعي لاتداافعي ماأبااه انا ماأباه عشت بدونه وحقدر اكمل بدونه
: يسرى ابوكي كبر في السن خايف عليكي خايف يموت وتعيشي لوحدك
: يعني لو رجعني لعبدالله حيكون مرتآح ! دا رفع يده عليا مو مره ولا مرتيــن !!! استحملت وسكت لكن توصل لرايد لااا مرا لااا , ياقلبي عارفه دا مو كلامك خالتي بتحلفلك انو اتغير وهوا بيضغط عليكي ويتصل كل شويه لكن انا بنتك لما اقولك ماحيتغير يعني ماحيتغير
: اخوكي مقويكي عشان كدا مايرد علينـآ ؟
نزلت دموعها يسـرى وماعلقت
امها بصوت مهزوز : والله يايسرى ماعرف انا ازعل منك ولا منــه بتعاملونا معامله غريبـه بعد دا العمر , حتى لو قسيت عليكي بقراري تشردي وتشيلي ولدك !!!
: انا اسفه ياماما طول عمرك ماتقصري ومافي زيك والله ماخرجت إلا لأنو عارفه بابا ماحيقدر ياخد ولدي من عبدالله ماكنت ابا اثقل عليكم اساسا وجودي انا ورايد الفتره الاخيره متعب الكل لاتقولي لا مشاكلي ماتخلص انا ماسرت عارفه فين اروح بس مو مرتاحه حاسه اني عبئ على الكل عبئ على فراس على بابا على حنان حتى إنتي _ بكيت _ اوقفي معايا قدام عبدالله طلبتك دا طلبي الوحيد قوليلو بنتي ماتباك , شوفتي اخر مره قلتلو ماباك قال اخذتي روح بنتي وتبي تروحي انتي كمان ياماما كلامـه قاسي مايتنسي حرام اضيع عمري وعمر ولدي معـآه ..
أمها ضعفـت برغم جنون اللي حوليـها
قفلت منها ويسـرى بكيت مو على نفسـها على فرااس وولدها
كل المواضيع اتلمت على بعضها
الحيـآه قاسيـه
في الـخـآرج
" حاسه اني عبئ على الكل "
جملـه تصف الكثيــر
مروى , امـه , يامن , ابوه , رهف
كلهم يحطو راسـهم على المخده وهوا متأكد إنهم يكرهوه متأكد انومايتمنلولو اي لحظـة خير بحيـآته
حسـآم ماعنده احد
لكن مآلك عنده الكل ومحد فاهمـه , محد عارف اللي فيه اللي يحسـه
" أنا مو سيئ "
" انا اتعرضت لمواقف سيئه تعبتني وماخلتني اعرف اعبـر "
جملـه سهله لكن صعب نطقها , كتابتها , اوو حتى التلميح لها لأنها بتوصل بطريقه اسوء
بكآهآ عبـر عنـه
لحد ماخفت مسكت يده ,وطآحت المفاتيح على السيراميـك
اتوقـف صوت بكآها , فاق من اففكاره
مد يدو بااتجاه المفاتيح اخذها وهيا وخرجت وضمت يدها باارتباك تحت صدرها
خشمها احمر عيونها خدودها
شعرها نازل على الجنبين بشكل عشوائي
مآلك : مو قصدي أسمع كلامك
حس إنو المفروض يديها خبر قبل دخولــه , فهمت مقصده
قالت بصوت مهزوز : بيتـك إنتآ حٌر
" حاسه اني عبئ على الكل "
دا اللي سمعو من تعليقـها
بلعت ريقها وقالت : فين فراس ؟ _ رفعت يدها لجبينها ونزلتها _ والله مو عارفه اقولك فينو ولا كيفــو فهمني ايش بيسير
مآلك يحرك المفاتيح بين قبضة يده : حيتأخر يوم او يوميـن
رفعت حواجبها بصدمـه
مآلك : مآحكذب عليكي مهمآ كآن دا اخوكي ولكي حق تعرفي كل شي لكن حاليا هوا بيد شخص ثاني دا الإنسان مايبى يأذيـه وبنفس الوقت مايباه يرجع _ سكت للحظـآت وقال _هوا افضل مايرجع حاليآ لأنو كل شي متوتر
ملامحها ماتغيرت !
رمشت بصعوبـه
,احلام امهـآ دحين سارت منطقيـه !
اتوقـعو حياته الزوجيه اخذتـه منهم لكن واضح إنو قوة اكبر منه انتشلته من عآلمهم ومحد داري عنـه !
: ليش... مايكلمنآ .؟
: حيكلمكم لما يقدر
كلمات ثقيله تخرج منـها : صح إللي قـآله رايـد ؟ وصفه لفراس وتعذيبه؟
ماقدر يجـآوب
وفهمت صمتـه
رفعت يدها على صدرها , صدرها يرتفع وينخفض بطريقه سريعه
بتحاول تتمآسك
لكن مجرد التخيـل يكسرها , مجرد إنو تفكر لو ماجات لهنـآ محد فيهم كآن حيدري عنــه يقتلــها
جسمها من الداخل يتنافض ومأثر على كل حوآسها
مدت يدها لذراعه , قالت بترجي : الله يخليك خليني اشوفو
باارتباك واضح : حيرجع بس أديه وقت
حركت راسها بنفي : بس اطمن عليـه لو بيدك تسوي شي سويــه
صمتـه خلاها تحس إنو بيده حل
رفعت يدها التانيه ومسكت ذراعه قالت بترجي وشويه تبوس يده : امــآنـه والله مو قادره انام
جسمـه مصلب
رفع حاجبه وقال بهدوء مصطنـع : بكرا حشوف الوضع دحين الوقت متأخر
سحبت اياديها : يعني فيه أمل صح ؟
: مدري
ارتخت ملامحها وهوا جبر خاطرها بردة فعل سريعه : حخليكي تشوفيه بس ..
كآن بيقولها نـآمي
ماتعود يتكلم بدا الإسلوب
كآنت ثقيله على لسانه
يباها ترجع خطوه للخلف عشان يخف صوت انفاسها السريعه اللي موترتـه
بخوف : بس إيش ؟
رفع حوآجبه الإثنين : ولاشي .. بروح انام وبكرا يسير خير
: حستنآك
رخى عدسة عينه عن ملامجهآ : طيب
مشي من جمبها ودخل لغرفتــه ,قفل الباب
بدون تفكيــر اتوجه لحبـوبه
فترة الضعف , يكرهها لأنـه يدور على ملجأ بعين اي أحد
فتح العللبـه
اخد حبتيـن وكالعاده دا ملجأه الوحيـد اللي اختاره خلال سنيــن حياته كلـها
حبوبـه نجاتـه , هدوءه , راحتـه

,’.
مشي بعشوائيـه في الشوارع ..
حيرضخ لعدنان ..!
اللي عايشـه حاليا ماينوصف ...
رمى مـآلك حقيقة امه في وجهه لكن ماقدر ينفجر كبتــه وانفجر بدآخله
اذى نفسـه ماأذى احد عشان يحفاظ على حياة فراس.!
اللي بيسويه حاليا خارج حدود شخصيته طبـآيعه ودا الشي مخليـه مقيد ,مخنــوق , ضعيف
يمشي على الرصيـف فين اتجاهه مو مهــم
رجلـه اليسار توجعه بس كمل طريقه , وقف
طالع حوليـه في السيارات , الناس اللي بتمشي
الدنيـآ ماشيــه سواء فيه ولا بدونــه
وقفت سيـآره قدآمـه , طالع في صاحبـها : اطلــع
حسام رفع عدسـه عينه على السيارات اللي بتمشي : وايش اللي حيخليني اطلع !
: اسف صدقني غصبا عني
بلع ريقــه , حيطلب تبرير اكثر ؟
لا
مد يدو بااتجاه الباب فتحه ودخل
عبدالرحمن حرك السياره :ماقدر اقول لهمام لا انتا فاهمني
حسـآم : وصلت لمرحله اني افهم تصرفات الكل مالومتك ولا لومت همام كل وآحد عايش عشان نفسـه فلاتبرر
عبدالرحمن خنقـه صوت حسام : شوف وقفت معاك وسترت عليك في مواضيع همام لو يدري عنها انتا عارف ايش حيسوي فيـآ , بس اللي بتسويه مخوفنا كلنـآ
حسـآم : خايفين القضيه اللي لكم سنين تجرو وراها انهيها واقفلها برمشة عين ؟
عبدالرحمن : يخخخي لاتهرج زيي كدا وربي ماهمني عدنان تتوقع همام حيهتم بالقضيه اكثر منـك
ضحك
ماقدر مايضحك
ضحك ودموعه زادت بعينه : يااااشيخ اسككككت _ رفع يده حركها بجديه _ وربي وربي أني عشت عمري وانا كنت احسب همام الوحيد اللي عندي وربي من صدمتي في امي سرت مو قادر احزن على أي شي اخسره شوفت وجه ثاني له اكتشفت انو انا لوحدي اي شخص يحبك بعد امك وابوك دا حب مؤقت مع السنين يتغير يروح يختفي حتبقى لوحدك حتعيش لوحدك وحتموت لوحدك
عبدالرحمن عينه ع الطريـق : همآم قاسي يحيمك بطريقه قاسيه و
قاطعه : ويرميني بطريقه قاسيه , امس فكرت لو انا ولده بجد هل كآن خلاني اعيش دي الحيـآه ؟ المشكله إني عارف الجواب فاسارت كلمة إنتا ولدي ماتعنيلي
عبدالرحمن : علاقتكم غريبه طول عمري انا والشباب نصنفها بدا الشكل , الضغط اللي بتمر فيه دي الايام حيشوه اشياء كثير بعينك أبعد عنـه لو تبى لكن لاتشك في حبـه لك
حسام مرر يده على عينه قبل لاتنزل دموعه : ايش جابك
عبدالرحمن : متى ماتحتاجني اتصل عليـآ
حسام : ايش سوى همام ؟
عبدالرحمن : اتصل شتمني مو عارف ليش !
ضحك بصوت مخنوق : ههههههههه مايطلع هوا الغلطان ابدآ
عبدالرحمن : هههههه اساسا كنت بقوله ايش دخل أهلي _ طالع فيه _ ايش سويت انتا ياأهبل كسرت ام السُلم والله همام اتجنن قلي _ قلده _ كيييف كييييف كسره دا الولد يبا يقتلني دا يبا يجلطني محد حيموتني غيره
حسام : هههههه ... كم مره اقوله لاتجرب تكسرني حتجنن زيآده بس متوقع انو يحميني
يضحكه باأصوات هاديـه
عبدالرحمن اختفت ابتسامتـه : ايش اللي بتسويه ياحسـآم ؟ بعد سنين عمرنـآ دي كلها توقف قدامنا وتقول ابا اقتله وتبانا نتفرج عليـك !
حسـآم : قفل الموضوع
عبدالرحمن : جيتك لأني خوفت اسيبك واسمع بعدها خبر يفجعني
حسـآم ماعلق
عبدالرحمن : ماحجيب سيرة لهمام اني شوفتك , لكن لما قابلناك اول مره همام قللنا إنو إحنا ستر وغطى عليـك وحنحميـك للحظه اللي نسلم فيها عدنان وإحنا عند وعدنا فاخليك عند وعـدك
وقـف سيارتـه ... مانزل حسـآم
لحظـه صمت طويــله وبعدها حط يده على الباب وفتحـه

,.,
صبـآح يوم جديــد ..]

صحيت من نومهآ على رنـة جوالها رفعت جسمها بردة فعل سريعه
قصـــي
سحبت المخده بعدت الللحاف تدور على الصوت
واول مالمست الجوال
كل جنونها اتبخر ..
رقم غريب
حطت يدها على جبينها بتعب ردت بصوت كلو نوم : الو
: إيوا منال
شدت حوآجبها : بابا ؟
: كيفك وكيف امك
: تمام ,,! انتا كيفك .!
: انا ...انا متصل عليكي من جوال واحد ماعندي غير دقيقتين اسمعي يابنتي كلامي لايوصل لأمك طيب ؟
دقات قلبها اتسارعت : طيب ايش فيه ؟
: حاولي تدبريلي 5000 آلاف
: ليش ؟!
: سايرتلي هنـآ مشاكل ولازم اديهم فلوس انا ماعندي غيرك وصدقيني اخر اخر مره اطلب
رجعت شعرها المشعتر من فوضية النوم لورى : بابا عم عدنان قال إنك اخدت منـه 2000 قبل كم يوم ! ايش بتسوي انتا
رد باارتباك : آآآ .. ايوا .. هما طلبو يعني مو بيدي ,, لو ا
قاطعتـه : بتسوي شي غلط صح ؟
: ماعندي وقت اشرحلك دبريلي الفلوس يابنتي الله يخليكي انا حموت هنـآ
:من فين اجبلك.. بابا مو معقول الصرفيات ذي 5000 الاف ليش قولي ليش تباها
:الحياه هنا صعبه
منال : مو صعبه الا لو بتسوي شي غلط , في احد يقدر يجبلك اللي تباه صح؟
بردة فعل سريعه وواضح فيها كذبه : لااااا أقسم بللله مابحشش
سندت ظهرها على المخده واكتفت بالصمت
: بنتي ماعندي غيرك ولاتقولي لأمك بيني وبينك الموضوع
: ماحقدر اجبلك شي , مع سلامه يابابا
: اسسسمعي اسمعي لاتقفلي اسمعيني حقولك الصراحه
خفض صوته واتكلم باارتباك :هنا يبيعو بس باأغلى أنا انا اشتريت ولازم اسددهم , ماعندي فلوس والله ماعندي وخايف من ردة فعلهم
:والله ..حرام ..اللي بتسويه بجد حرام
: حبطل صدقيني حبطل بس خليني اسددهم
نفس موآل كل مره بس حاليا الفلوس اضعاف ... : ماعندي فلوس يابابا
: طيب اسمعي انا مستحي من عدنان روحيلو وقوليلو إنك محتـآجه مصاريف لكي ولأمك
وسعت عينها بصدمـــه !!!!!
قالت بصعوبـه : ماما ..جات
همس : لاتتأخري الله يخليكي
: مع سلامه
قفلـــت ..!
ونبضات قلبها سريعه , قدر يدبر جوال يتصل فيـه لكن مو عشان يسمع صوتــها
يباها تدبر فلوس مو عشان تصرف على نفسـها ويشوف احتياجاتها لا
كلـــه يدورحول " الحشيش "
فتحت الواتس برضو ماعلق ولا اتصل ..قامت من على السرير
مغبونـه من الإثنين
غيرت ملابسـها , خرجت للصـأله امها حطت اغراضها وسط شنطتها : على فين رايحه ؟
منال : المكتبه
: ايش بو وجهك كدا ؟
مشيت منال بااتجاه الباب سحبت جزمتها : ولاشي
لبست الجزمـه : انا خارجه
امها رفعت شنطتها على كتفـها : اعوذ بلله من الاسلوب ماقول غير اصبحنا واصبح الملك لله
منـآل خرجت حسام وبعدها موضوع ابوها خلاص اخلاقها قفلـت
نزلت لنص الدرج الدرج , رفعت جوالها واتصلت عليـه
كملت الدرجات بخطوات هاديــه
دق لحد مافصـل
خرجت من العمـآره , شافتــه جالس على درجات عمارته وبيده الجوال
رفعت جوالها اتصلت ثاني عليـه
جواله بيده يطـآلع بالشاشه بس مارد ..!
الحركـــه صدمتــها ...!
نزلت عدسة عينها على جوالها رفعته على اذنها تتأكد إنو بيرن
انو بيطـآلع بااسمها ومايبى يــرد
وانتهت المكــآلمه ونزل يده زفر بضيـق ماوصلها
رفع عدسـه عينه بااتجاه الشوارع
بس شافها طــآح قلبــه
قام بشويش
بينهم شــآرع
: لسى مامشيتي
دارت راسـها وشتت عينها عشان لاتشوف امها دموعها المحبوسه بعينها : أهو رايحه
مشيـو مع بعض
وهوا صنــم مكآنه من اول ماخرجت امـها
مـــوقف غبــي
يجــرح , يبا يبرر
مشي في الشارع الثاني بنفس اتجاهها
طالعت بااتجاهه وبعدها للأمام
كملت طريقها ...
افترقت عن أمها ,,بعد ماودعتها
وهوا مشي بخطوات متتتاليــه لها
ماوقفت مشي : منـــآل
كملت طريقــها
خطواتــه زادت لحد مامسك ذراعها وهيا سحبتها وقالت باانفعال: كوون قد حركتــك
حست بنظرات الناس ضمت يدها وقالت بصوت خافت وعينها تعبر عن قهرها : لاتكلمني
: تعالي نروح نجـلس
: وليش اجلس معاك ؟ لأني صٌدفتـآ شفتك وانتا تخصر مكالماتي
رجع راسـه للخلف وزفر بصوت مسموع ورجع طالع : بجد لاتصعبيها عليـآ
: مابى اصعبها قولي هنـآ يوم كآمل خاصرني ليش ؟ ولا اقول جاوبني ليش مرتين بتصل وماكلفت نفسك ترد
كآن بيعلق الا قالت : متضايق صح ؟
اختصرت كثير اجابات : عارفتني يامنـآل
حركت راسها باايجاب وقالت بصوت مهزوز : أجل انا دحين متضايقه لأنو بابا قرر يتصل عليا من السجن ويطلب مني مواضيع ماقدر عليـها _ رفعت حوآجبها الاثنين ونطقت الكلمـه بشويش _ بععععــد عن طريقي
جــرحها كآن واضح بلمعة عينها وصوتــها
مشيت وسابتـه , غمض عينه بتعب ولحـق وراها لما ماقدر يسيبها
ناداها وهيا تكمل طريقها بخطوات سريـعه
لحد ماجلست على كراسي انتظار الباصات وقف قبـآلها : حتطنشيني ؟
كأنه سراب
جلس على الكرسي اللي جمبـها : ماعرف ايش اقولك مافكرت سويت اللي اباه
علقت بدون ماتطالع فيه : طيب كويس المره الجيه رد عليا وقولي انا عايش بس مابى اكلمك
رفع حـآجبه
منـآل : راحتك فين ؟ روح وراها مو لازم تشرحلي
تحرك رجولها بقهــر , كلام من ورى قلبـها ...
ماسكتت
رجعت علقت وعادت جملته : وسويت اللي تباه ! ياألله لدي الدرجه اخيرا افتكيت ومشيت ورى هوآك وانا الهبله كل تفكيري لايكون سرلك شي لايكون اذيت نفسك احد اتعرضلك مانوومت من التفكير_ هرجت بشويش _ وبعدها بكل بساطه القاك تطـآلع برقمي وتطنشــه
: ماأقصد ابعدك او اطنشك كل شي اعيشه اكبر منـك خايف اجرك معايا بطريقي اخاف احد يأذيكي
طالعت فيه وقالت باأمر وخوف : أبعـــد طيب سيب دا الطريق
حرك راسـه بنفي بدون مايعلق
وصـل الباص ووقفـت : اجل استمر وطنشني لاتبتر الموضوع ابترني انا من حيـآتك وكمل طريقك
اتوجهت للبـآص ماقام من مكـآنه .. اكتفى انو يطـآلع فيها لحد ماختفت من نظره , دقايق ومشي الباص
حريقـه جوتــها , طريقته اسلوبـه , مزآجيته
تمسكه بموضوع نهايته موت وقتل وعنف
كل شي خانقها
امس انتظرت يوصلها خبـر سيئ عنـه والفكره رعبتها
رعبتها لدرجة مو عارفه تتعامل معـآه دحين
رعبتها لدرجة إنها عارفه لو سرلو شي انهيارها ماحيكون طبيعي
تحب وآحد مجنــون وماتبى تتركـه ..

,.’
ساند ظهره على المخدات المرتفعه , مادد رجولـه على السرير , رفع كفـه اليسـآر
خياطه من الجانبيــن
دموعه محجره بعينــه
حاول يحــرك اصابــعه
تتحرك بطريقـه بطيئـه , بصعوبـه , باألم
رخى يده ورجع راسـه للخلف على المخدات , دموع حاره تنزل على خده
رفع كفـه للمره الثانيه
حٌلمــه انسلب منــه
ولد اختــه
زوجتــه ..!
طفلــه
عيونـه تدل على إنكسـآره , صدمتـه
انهـآر , بكي , نكر ,نكر , نكر
يامن وصفلـو موت صبـآ
قتل صبـآ
تعذيب صبـآ
صرخات رايـد في راسـه , نظرة رايد , انهيار يسرى يوم وفاة بنتـها
راسـه مو راضي يوقف عن التفكير
قلبـه يوجعه أكثر من جسمـه
جلس بصعوبـه على طرف السرير
نزل رجولـه
يطآلع حوليـه ومافي شي ثابـت
وقف ببشويش
مشي بخطوات مهزوزه اتجاه المرايه المعلوقـه بين الطوب الاحمر
طـآلع في وجهه
بدأ يخف لكن لأول مرا يشوف انعكاسـه
خمسـه دقايق مرت وهوا مـآزال واقف قدام المرآيـه
بدون روح , بدون حيـآه , بدون حلــم
انفتح الباب الحديدي لكن برضو مازال يطـآلع في انعكاسـه ...
يامن ابتسـم : آخيرآآ , الحمدالله على السلامـه

فراس دار جسمـه مشي بااتجاه السرير وجلس
يامن حط الأكل على الطاوله : معليش اعرف الكلام اللي سمعتـه مني كثير لكن مصيرك حتعرفه
سند اكواعه على ركبه ومسك راسـه
يامن : لكن مازالت الحقيقـه كلها مو واضحه لك
مارفع راسـه قال بصوت مبحـوح , يائس , محطم : ايش باقي .!
يامن : باقي تعرف مين السبب ورا دا كلو , باقي تعرف سبب وقوفي جمبك حاليا ..إذا مو مستعـد لكلامنا ارتاح وكٌل ولا حقين على الكلام
رفع راسـه : أتكلم
يامن بمماطلـه : لو تبى ترتـآح قـ
قاطعـه بصوت هادي حـآد : أتكـــلم
يامن بااسلوب درامي وتمثيل : اول شي دا الكلام يجرحني قبل لايجرحك لأنو في النهايه اخويـآ , لكن مآلك سلم ولد اختك لشـآدي مو بس كذا اختك بحضنه يطبطب عليـها وهوا السبب
ماكانت منـه اي ردة فعــل ..!
هوا بنفسه سلم رايد واختـه لمآلك ..!
اخته بحضن مــآلك !
رايد سلمـه مآلك ..!
حرك راسـه بنفي : مستحيل ..
يامن حرك راسه بتعاطف : انا مانقذتك إلا لأنو إنتا ضحية مآلك زيي .إللي سواه لك مايغتفر المشكله اقنع اختك انو شادي عـآيش عشان تقعد في بيتـه شوف نجاسته لفين وصلت ..مافي احد قادر يردعه وصدقني اختك عايشه باألم نفسي دحيـن حياخذ اللي يباه منـها ولما يكتفي حيرميـها زيي مارمى اللي قبلـها
فراس عاد كلمته بتثاقل : مستحيل ... ماأذيت احد ..انا ماأذيت احـد
يامن : ماعنده اسباب لأي شي يسويــه عايش عشان نفسـه جنونه يتحكم فيــه
فراس بارتباك : يسرى يسرى مستحيل تقعد عنـده
يامن : اخويا اعرفه وحيقنعها
فراس وقف , مشي برغم تعب جمسـه , يفكر بالتفاصيـل
يفكر بمـآك
بااسلوب مآلك
بغرابة مآلك
ببرود مآلك
بدخول مالك المفاجئ بينـهم
وجن جنــــونه , صرخخات هستريــه خرجت منــه
فراس دٌفن بدي اللحظـآت
فراس قتــل واتجسـده روح محرمـه
يامن وقــف لما فراس بدأ يرمي كل شي حولــه
يضرب راسـه
يصرخ وعروق وجهه ورقبتــه تبرز لحد مايحس انها حتتقطع
سلبو مشاعره احاسيسه , برائتـه طهارة روحـه
وأصبحت مشـآعره " تحت الصفــر "
جٌمــدت
,.’

جالس على طرف السرير , نـآم 10 ساعات والفضل كله لشي وآحد ..
يقدر رحيـن يرجع للفوضى ..
ماخرج من غرفتـه
اتصل على يـآمن بدون اي تفكيـر ..
وجـآلو صوتـو بكل ترحيب : أأأأووووه والله مو قادر اصدق , مآآآلك مآآآلك بجلالة قدره اتصل عليـآ
مآلك : ايش الرساله اللي ارسلتلي هيا امس ؟!
يامن : يعني على الاقل قول صباح الخير
مـآلك : يامن أخلص عليا واتكلم
يامن : وقتك ثمين كالعاده
مـآلك سكت وبعدها قال : عارف انو فيه التباس بالموضوع وابى افهمه منـك
يامن :اختار المكـآن وحتلقاني
حدده المكـآن وقفلـه , زفر باارتباك
اخوه مالـه بدا الطريــق
اخوه اتورط , اخوه بريئ
غير ملابسـه , خرج من غرفتـه لقااها نايمه في ركنيـه الكنبه
جالسه مميله جسمها على الخداديات وولدها حاتط راسه على فخذها
مارحمهم وجمبلهم مخدات او لحـآف ..!
وحاليا مو قادر يبادر بدي الخطوه بدون اي سبب
خرج بشويش عشان لايصحيهم دي الحسنه الوحيده اللي بدرت منـه
وآتوجـه للمطعم
طلب عصيـر
خمسه دقايق
عشره دقايق
ربع ساعه
مد يدوه بااتجاه جواله على الطاوله نور الشاشه يشوف الوقت ورجع سحب يده وعينه بااتجاه الباب
20 دقيقـه
30 دقيقه
سحب جواله واتصل عليـه : فينك ؟
يـآمن : قريب قريب بــ
وقبل لايكمل مـآلك قفل بوجهه ورمى جواله على الطاوله
يامن موقف سيارته برى ويسمع اغـآني
عارفـه يكره الإنتظـآر
دقيق في مواعيـده
رفع صوت الأغاني ,حالف يمين ماينزل إلا لما تخلص , غنى بصوت عــآلي واندمـآج :
Why'd you come, you knew you should have stayed
I tried to warn you just to stay away
And now they're outside ready to bust
It looks like you might be one of us
طفى سيارته ونزل وهوا يغني كلماتها برغم انتهائها
رمى سويتش السياره في الجو ووقف مسك السويتش ورجع يغننني
All my friends are heathens, take it slow
Wait for them to ask you who you know
رآآآآيـــق
الحياه ورديـه وحلوه بعينـه
فتح الباب وشاف اخوه ,شـآل نظارتـه الشمسيـه ومشي بااتجاهه
جلس
يامن مبتسـم
ومـآلك ملامحـه جديـه
قرب يامن بردة فعل سريعه للطاوله : غريبه مو عوآيدك احد يتأخر عليك وتستنآه
مآلك : مو وقت الإستهبـآل
يامن رفع حـآجبه : ها في ايش تبانا نتكلم ونكون جدييـن_ قال بنبرة غريبه بنظظرة غريبه _ ذا ملعبي ولأول مرا حسحبك فيـه
مـآلك حاول يتغـآضى عن اسلوبه , عارف هبـآلته : إيش قصدك بالرسـآله
يامن بدون اي تردد نطـق وعينه بعين اخوه : فراس تحت رحمــتي
مـآلك ولا حركه صدرت منـه
حتى الرمشـه كآنت ثقيله بدي اللحظـه
دقيقه مرت وباعد بين شفايفـه : كيف ! _ شد على حوآجبه من مجموعه الأسئله اللي مو عارف يصيغها _ ليش !_ غمض عينه ومرر يده على جبينه ونزلها وقال _ ايش دخلك بعدنان !
يامن مستمتـع
وميـن يقدر يخلي مـآلك يرتبـك بدي الطريقه .؟
لحظـه جميله
يامن همس : روحت وشوفت بعينك المجزره اللي سارت صح ؟
وقبل لايعلـق مآلك قال بفخر وهوا يأشر على نفسه : انا السبب , من مسافة بعيــد صوبت على شادي كنت اقدر اقتلـه بس _ رفع حوآجبه بنفي _ مارضيت خليته يشرد قدام عيني عشان اعيشـه اسوء ايام حيـآته قبل لايموت
نبضـآت قلب مآلك تتسارع
صوت اخوه بس مو راكب على ملامحـه ,على شكله الصغير , على برائة عيونه
نبرة اخوه لما يحاول يستقوي
كم غابــو عن بعـض .!
مـآلك شد على كلمه كلمـه : يامن ..مو ..وقت المزح
اختفت ابتسامة يامن : تتوقع إني امـزح ؟
مآلك : اعرف انو فيه شي غريب سار ,كيف وصلك فراس ماعرف لكـ
قاطعه يامن : انا بنفسي اخذته من بين يدهـم
مالك ماكان يبى يستوعب ! , نظرة عينه اتجاه يامن تعبر عن إحساسه
يامن مازال ذراعه فوق الطاوله : اقولك قصـه قصيره , قصه احتفظتها لنفسي لأنو يومتها اكتشفت إنو إنتا كل مره كنت تدافع عني لسبب وآحد , لأنك متعاطف معايا عارف انو سلطان مو ابويا فاقررت تحميني من غضبــه _ اشر على مـآلك _ فاكر يوم مارميت الحقيقه بوجهي _ ضيق على عيونه _ كم كآن عمري ؟ 19 سنــه ! ..بعد 19 سنـــه تجي تقول لأخوك جملـه زيي كذا بسبب شغاااله اهلك سفروها ! بسبب إني كنت خايف عليك وووقفت مع امي وقلتلها سفريها انا شايفها بتلهف فلوس مـآلك وصدقت من كلامهم إنها ساحرتك دا كآن الشي الوحيـد اللي سويته والمقـآبل ايش ؟
سكـــت
كآن يبى مـآلك يتذكر
يتذكر بشــآعة القائه للكلــمه
يتذكر بشاعة نظرة امــه وخوفها !
لأول مره بعد 6 سنيـــن يسيـر بينهــم عتب ..! لكن كل شي اتغير بطريقـه تفجـــع

مآلك : ماكنت عارف ..إنك تسمع ..كـ
قاطعه يامن : ماكنت مهتــم يومتها إنتا اتجننت وقفت قدآمك اباك تسحب كلامك لكن نطقتها مرة ثانيـه _ ملامحـه طغى عليها الضعف _ ذاك اليوم خرجت انا من البيت ماعرفت فين اروح , استنيتك استنيتك تتصل عليا بس ماتصلت ,كنت اهبل وانتا عارف انا ماينفع احد يسيبني لوحدي ماينفع احد يخليني اخرج من البيت وانا معصب كنت استنآآآك تتصل استنى امي ولا مروى بس محد كلمني
مـآلك اتوقـع ذا نهاية كلامـه لكن القصـه مانتهت
يامن مرر يده على خشمه : تخيل تسمع خبر زي كذا ومحد يفكر يبررلك , _ نطق كلماته بطريقه سريـعه , مرعبه , مهزوزه _ مشيت بسرعه بسيارتي ,نص الطريق مو شايفه من كثر ماكنت منهار وفجأه _ رفع حواجبه وصوته ارتخى _ صدمت بوآحد _ ارتخى صوته اكثر _ نزلت من السياره , لقيته ميت ! , مات بنفس الللحظـه , اتصلت عليك , اتصلت وانتا مارديت ,خوفت انسجن خوفت انحبس وحسيت إنو انتو حتسيبوني كلكم اكتشفت إني وحيـد بذيك اللحظـه , سحبت جثته وخبيتها , خوفت _ مرر لسانه على شفايفه _ خوفت برضو , عشت لحظـآت رعب لوحدي , قُلت قٌلت لو قطعت جسمـه ودفنت كل جزء في مكـآن محد حيعرف
هنـآآآآآآآآآآ عرف انو اخوه مايككككذب وهوا سبب ذيك المجزره
عينــه وهوا يحكي تعبر عن جنــونه
جسم مــآلك يتناااافض
يتنااافض حراره تسري بجسمــه
يامن طالع حوليـه استنى احد الرجال يمشي وكمل : حكون حٌر لو محد عـرف , محد حيفهم إنو انا ماكنت اقصد محد حيصلح غلطتي ولا يرجع الوقت لورى هوآ مـآت وانا حاولت اغطي عن جريمتي لأني بريئ , بس بذاك الوقت كآن ضميري حيموتني , كنت كارهك وكاره سلطان مالقيت غير خآلي حكيته وخرجني برا البلد , قتلت بعدها بسنـه شخص ثاني لأني كنت ادافع عن نفسي لكن لما مات _ رفع اكتافه _ حسيت اني بلعبـه كيف اغطي عن جريمتي واكون اذكى من اللي حوليـآ , سرت مستمتع بدي التفاصيـل , سرت اافكر كيف اقتل مره ثآنيه وثالثه ورابعه لحد ماتورطت مع عصابه واضطريت ألجأ لنفس الإنسان واكتشفت إنو احنا بنفس المركب
سكت
الصدمه طاغيه على وجه مـآلك
يامن نطق بشويش : بداية دي القصـه كلماتك " إنتا ... ولد ..محمــود " ماكتفيت بعد ذا كلو , قررت ترسل الحقيقه لزوجتك وانتا عارف انها كارهتك ومين المتضرر .انا ! , ليش عشان تبى تلهف ورث سلطان لوحدك
مـآلك راسـه ثقيـل
مو قادر يعبـر
يتكلم
اعترافات مجنــونه من شخص مو خــآيف من شي !
من شخص ماكان كذا في يوم !
فين اخوه ,
طيب لو رد على اتصاله زمـآن كان اختلف شي ؟
لو ماتكلم من الاساس كآن ماتغير شي وحيفضل يامن اللي يدور عليـه وقت المصيبـه !
الدموع تتجمع بعين مآلك وعينه مانزلت من على يامن , كل اللي قدر يقولـه : يامن ...قولي الحقيقـه ..في احد ..في احد ضاغط عليـك . بيهددك ؟ حوقف ..حوقف معاك
يامن : مو محتاج احد ...صاحبك يحتاجك اكثر مني
موعـآرف يعبر
رجفة جسمــه اللي يحاول يتملكها تعبر عن إنو ماااافي بدي الدنيــآ احد يقدر يجي مكــآنه او مكـآن مروى
رفع اياديه على الطاوله وضغط عليها قال بجنون : سيب عدنان , وحعينلك محـآمي يخرجـ
قاطعـه : ماجيت اطلب مساعدتك _ رفع حاجبه بتحدي _ انا اعشق واستمتع بكل لحظـه حاليا اعيشها
مـآلك ضاغط على اياديـه وحابس الدم من شدتها : غلط ..غلط اللي بتسويـه
يامن : عارف ليش قلتلك ذا الكلام ؟
ماعلق
يامن : ابى اشوف حتتجرأ تدمرني للمره الثالثه ولا حتنسحب
مـآلك : انتا بتدمر نفسـك
يامن حرك راسـه بنفي : لا .. انتو السبب .. أمي ..إنتا ...ابويا ..كلكم كلكم
مآلك : يامن فيه ناس بتنظلم عدنان مجرم _ قال وكأنه ماسمع ولا كلمه قالها _ إنتا مو زيـو
يامن : اعرف..انا اسوء منـه ..من بعد اليوم انا اللي حكون في طريقـك ..صاحبك بين يدي لسبب وآحد , حخليه يوقف قدآمك واوريـك آثار كلمتك ليومك دا تأثيرها . حخليك تفكر الف مره بكل كلمـه تنطقها وكيف تنطقها وايش تتتتسوي بعد ماتنطقها ..مو أنا اللي حآخذ روحـك صاحبك بنفسـه حيوقف قدآمك ويسلب النور من عينك - همس بجنون _ عارف ايش اسوء شي بالموت إنك تتعذب وصوتك يسمعه وآحد يستمتع فيه _ رجع ظهره على الكرسي _ صدقني انا حستمتع بصوتك
ووقف وانسحب من المكـآن

مـآلك
كيف يتحرك .؟
الصدمـه شاله جســده كآآآآمل
يبا يصـــرخ عليـه , يحبسـه يسوي اي شي لكن مايخليه يمشي ويخرج ..!
جسمه خانه بدي اللحظـآت
بسبب جملـه , بسبب موقف ,, خٌلق وحش يقتل ومايهتم !
كيف يعبــر , كيف يحضنه , كيف يقولـه انا خــآيف عليــك انا ماأرضى عليـــك , أنا ححميــك
ضغط بكفـه على الطـآوله
وقف بصعوبـه
مشي وهوا مو شايف طريقـه
جا واحد قدامه , كلمـه , اشرله على الطاوله
مو قادر يفهم كلامـه
صوته بعيـد برغم قٌربه
كلام يامن اعلى بكثيييير من أي صوت حاليا
عاد الرجال كلامـه مره ومرتيــن واستوعب انو يبـآ الحساب
خرج محفظتـه اداه فلوس بشكل عشوائي ومشي
ناداه الرجال يبا يردلـه الباقي لكن خــرج
سـآعه مرت وهوا بسيارته
ماشغلها
ولا صدرت اي ردة فعل منـه
جمـــود خـآرجي , إنهيـآر داخلي

’,,.
جـآلسه في المكتبـه الكتاب مفتوح لكن بالها جدآ بعيـد
ايش حتسوي مع ابوها ؟!
,
قفلت الكتاب , خرجت من الكتبـه
اتصلت على عدنـآن ..
رجعت شعرها باارتبـآك ورى اذنها :ألو ..عم عدنان ..كيفك .. تمام الحمدالله ..كنت بكلمك بموضوع انتا فاضي ..لا لا عادي بالجوال..._ وجهها طغى عليه الاحمرار - مابى اخذ من وقتك كثير ..تسلم ...طيب ..مع سلامه
قفلت وزفرت بتوتــر
كانت تبى تهرج بالجوال بس عزمها على بيته
مشيت وملامحها زادت اكتئاب تكره جمعات البيوت تكره تزور احد
ايش يعني لو اتكلمو بالجوال وانتهى الموضوع ب 3 دقايق ..: مستفـــز
18 دقيقـه ووصلت لبيته , دقت الجرس , دخلت لغرفة الضيوف
زوجته جالسه معاها
واولاده الصغار يلعبـو حولين الطاوله ,دخل عدنان سلمت عليـه
وابتسمت باارتباك
عدنان حرك يده على فخذه : فهد
فهد جري بااتجاهه وقبل لايوصله فادي دفـه : انا حجي
عدنان ضحك بصوت عاااااااااااالي جدآ عــآلي
منال ابتسمت باارتباك
وقفه الإثنين عنده وكل واحد يدف الثاني
وعدنان ضحكته تزيــد بطريقه مبالغ فيها
منال مررت يدها على رقبتها وزادت ابتسامتها لما عينه جات عليها وقال بفخر : والله الاولاد احلى شي بدي الدنيا
منال : الله يخليهم لك
عدنان صفق بااياديه : يلا يلا اخرجو برى خلوني اتكلم مع الحلوه منال
منال رسميـآ اليوم كرهتــه وكرهت اسلوبـه
ملامح وجهها توجعها من كثر الابتسامه المتصنعه
فهد وفادي باسـه اياديه وخرجو عيون امهم وراهم وبعدها طالعت في منـآل : معليش ازعجناكي
منال حركت راسها بنفي : لا عادي _ اتكلمت باارتباك واضح _ انا ماحقدر اطول فاحدخل بالموضوع على طول
: اتفضلي
منال : اتمنى لو بابا كلمك مره ثانيه وطلب فلوس _ سكتت وقلبها يدق بسرعه حست بصعوبـه بنطقها وجهها طغي عليه الاحمرار باعدت بين شفايفها وبصوت خافت _ لاتديـه
عدنان رفع حوآجبه الاثنين بصدمه من طلبها
منال زاد ارتباكها : ماأتمنى ولا أحب اتكلم في مساوئ بابا قدام احد لكن مضطره عشان ابا مصلحته
عدنان مازال مستمع
منال : بابا بيصرف الفلوس كلها على _ سكتت وبعدها قالت _ فاهمني ؟
حرك راسه باايجـآب
منال ماقدرت تكمل وعينها بعينه رخت عينها بااتجاه الارض واتكلمت : حيجبلك كل مره مبرر , ماحتحس إلا بعد فتره لكن ماحيفيد وقتها ,حاليا بنسبه له انتا أمله الوحيد وانا عارفه انك بتديه بحسن نيـه , انا اتمنى انو بابا يتغير وماحيتغير دام الفلوس بتجي بيده متى مايحتاجها
عدنان : يابنتي دي مسأله قناعه دام ابوكي مسجون ولسى يحاول يدبر فلوس فمعناته طريقه طويل
منال : اعرف اكيد ماحيتركه في يوم ولا يومين حديه وقته الفلوس غلط تكون بيده دي الفتره لأنه مازال ضعيف مازال مقتنع انو دا الشي راحتـه
عدنان شد على حوآجبه : معليش بس اسئلك سؤال خاص شويه
منال رفعت عدسة عينها عليـه وحركت راسها
عدنان : متى عرفتي انو ابوكي ماشي بدا الطريق
منال انصدمت من سؤاله !
باعدت بين شفايفها وقالت بكذب: قبل 4 سنيــن يمكن
عدنان : واضح انك بتتصرفي بعقلانيـه ابوكي انسان طيب ويستاهل انو بنتـه توقف جمبـه وتحاول تنقذه طلبك اعتبريه نفذ

[ في المــآضي ]

لابسـه بجامـه صغرت عليـها الاكمام مرتفعه , بنطلونها مرتفع
عيونها طاغي عليـها النوم , مشيت بااتجاه المطبخ أخذت كيس كبيـر وخرجت للصـآله تلٌم القوارير والورق
جلست جمبه وهوا نايم مررت يدها على الارض حالت تنفض فتات السجاير اللي يلف فيها
نادته بصوت راخي : بابا , قوم , ماما حتزعل منـك
فتح عينه بعد لحظات ابتسم : صباح الخير
منال بهمس : ادخل نام في الغرفـه شويه حتصحى
رفع جسمه العلوي مرر يده على ذراعها : الله يرضى عليـكي
لمت اغراضـه نزلت الكيس زي ماعلمها للشارع ورمتـه في الحاويـه وطلعت للشقـه
دخلت لغرفتها
دا الشي الوحيـد اللي مبسوطه فيـه سولها غرفه خاصه فيـها
وسـآر عمرها 13 سنــه وكملت 5 سنيــن وهيا كل يوم تقول بكرا بابا حيتغيــر ...


[ حــآليــآ ]

مشيت بااتجاه باب البيت وهما يودعوها
عيلــه غريبـه , رجٌل غريب
مابين اسلوبه المسفتز لكن جدآ طيب , يحرج الوآحد ..
فتحت باب الحديقه ورفعت حوآجبها بصدمـه وهوا رجع للخلف ومرر يده على خشمـه
عيونه محمـره , خشمـه محمر قال باارتباك : ايش جابك !
ضممت يدها باارتباك تحت صدرها : جيت ازر عم عنان
: يعني ماشيه خلاص
طالعتله بنظره وكأنها تقوله ايش رايك !!
:ههههه معليش _ بعد عن طريقـها _ صدفه حلوه برضو
ابتسمتلـه ,مشيت , نزلت من الرصيـف ,قال بصوت عالي : ماعندك سياره ؟
دارت جسمـها رفعت جوالها :دحين حلب
قفل باب الحديقـه وجا بااتجاهها : تعالي اوصلك
بردة فعل سريعه : لا لا روح لخـآلك انا
قاطعها يامن : ماكنت ابا شي منـه طفشان ومو عارف فين اروح
منال ماتعرف ترفض , ماتعرف تقول لا , ماتحب احد يعرض عليها كدا مره لأأنها حتوافق
منال : بجد ماله داعي
شارلها على السياره : اعتبريني اوبر ايش حفرق
منال اتوترت , قصي اترسم قدآمها بدي اللحظـه : حتعب نفسك على الفاضي رو
قاطعها : ايش دخلك فيا انا انبسط بالمشاوير
منال ماعلقت وهوا بنظرة ترجي : يلا يااشيخه
منال بصوت خافت : طيب
ابتسم اشرلها على سيارته الرياضيـه : تعالي
مشيت بتوتر اتجاه السياره فتحت الباب الخلفي وهوا قال : نععععععععم !!!! خخخخير اعتبريني اوبر بس مو لدي الدرجه
ضحكت : مابى اركب قدام
: حآكلك يعني _ قفل بابها _ امشي وبلا لكـآعه
شمقت : بجد بديت اندم
ركبت طالعت في المناديل اللي بينهم , قال بااستهبال : واضح إنك مزكم
رفع حوآجبه ونزلها بكذب : جدآآآ
حطت شنطتها بتوتر في حضنها
يامن حرك السياره : ماتحسي انو الصدف لها معنى
منال : بدأنا
يامن : هههههههههههه انا احب افكر بالتفاصيل _ طالع فيها وقال بثقه _ اتجاوزت مرحلة الإعجاب فيكي
منال انصدمت وهوا ضحك : ماعرفنالك
منال : لا كويس يعني _ سكتت بااحراج _
يامن : انا تجيني هبقاات كل بعد فتره مدري ايش ابى من حياتي يعني حتى لو اديتيي ووجه هيا مسأله وقت وابدأ امل وادور وحده عكس شخصيتك
منال : مصيرك تطفش
يامن : اعوذ بلله فاولي خيـر
منال : هههههههههههه الاستقرار حلو
يامن غمزلها: طيب نحاول تاني
منال كشرت : سيبني في حـآلي
يامن عينه في الطريق : عشان برضو المتعصب اللي في الكآفي
كأنه صفخها كــف : ايت متعصب !
يامن : على العموم ماليا صلاح انا سحبت نفسي من يوم ماحسيت اني طرف ثالث _ بااستهزاء _ قلت يواد ايش لك باللغوصـه الله يهني سعيد بسعيده
منال بتوتر : حللت واستنتجت وانسحبت كله من راســك ماشاءاللهه
يامن : تبيني ارجع ؟
منال : لااا مو دا اللي اقصده يعني مدري ايش بتخرف انتا
يامن اكتفى بنظره لها ضحك بدون تعليق
وجهها مال للإحمرار : بجد مافي شي
يامن : طيب اانا ماأفهم
رفعت حوآجبها الاثنين بصدمـه : بجددد بقولك
يامن : هههههههه طيب بكيفك حياتك مايحتاج تبرريلي
ضمت اياديها تحت صدرهاا : احسن برضو
يامن : مع إني ماتخيلك مع وآحد زيـو انتي وحده كيوت ولطيفه وهوا _ رفع حاجبه _ مشكلجججي مكتوب على جبينه انا مشكلجي ايش وداكي ل
قاطعتــه : بطططل تفسر على كيفك قلتلك مافي شي زميل عمل دا حده
يامن عاد جملـته : طيب انا ماأفهــم
ضحكت بتوتر بخوف : قفل الموضوع مستفزني
يامن : إنكار الحقيقـه يولد دايما ذا الإحساس
: انا غلطانه ركبت اساسا
يامن : هههههههههههههه خلاص خلاص
دق جوالـها خرجته من الشنطه واتغير للون وجهها ودقات قلبـها
دايما اوقاتــه غلط ..او اوقات يامن غلط او حظها زفت مااااتدري بس محطوطه في موقف سيئ
ادتو مشغول
فتحت الواتس
كتبلها " متى راجعه "
تحاول تكبت انفاسها " ليش ؟"
" ابى اشوفك "
منال " ليش "
" لازم اسباب "
منال" حاليا إيوا "
" وحشتيني "
منال " كذاب "
" تشكي بدا الشي ؟ "
منال " بعد اللي سويته اليوم ايوا "
" يعني ماتبي تجي ؟ "
منال " مابى انسان يكون مؤقت بحياتي مابى اعيش احاسيس ومشاعر مؤقته "
" لمتى تبيني معاكي؟ "
انصدمت من سؤاله
رفعت يدها على خصلت شعرها ورجعتها ورى اذنهاا
فزت لما يامن شغل اغاني بصوت عالي : فجععتتتني
يامن : ههههههه معلليش
ابتسمت ورجعت تطـآلع في الشاشه كتبت " الموضوع راجعلك انا مو مهم ايش احس صح ؟ "
حسام " سبحان الله تخصص لف مواضيع "
منال زمت شفايفها وارسلت ضحكه " ههههه طيب انتا فين ؟ "
حسام " حفتح دحين الكافي "
منال " طيب بقولك شي بس لاتزعل "
حسـآم " ايش فيه ! "
منال " انا قريب "
حسام " طيب ايش اللي يزعل في الوضوع "
منال" لقيت يامن في طريقي وبيوصلني للبيت "
قرأ الكلام وماعلق
30 ثانيه وكتب " عجبتني الصدفه الغريبه "
منال بااستفزاز " سبحان الله نفس تعليقه "
قلبت الجوال
خافت من رده
وبنفس الوقت تبى تضحك طالعت في يامن ولقته يطالع فيها وبعدها في الطريق : إنتو البنات ملامح وجههكم تتكلم والله فهمت نص الحوار اللي بتكتبيه
ماعرفت ايش تعلق عليه قالت باندفاع : فجأه الزكمـه اختفت !
ماحيخرج خسران بحقاره رد : انتي مٌسكن مفعولك سريع
سحبت الجوال وشتت عينها عنـه : ماحعلق
يامن : هههههههههههه
فتحت المحادثه " لاتدخلي الحي ولو تبي تدخلي اتحملي اللي يسير "
اترعبـت
ماعلقت
تطنشــه ؟
تقهره وتخليـه يوصلها للبيت
بس خايفه من ردة فعله وتسير فضيحه عند الكل
سكتت لثواني وبعدها قالتله : وقفني عند ذاك المطعم
يامن : جيعانه ؟
منال :إيوا بشتري غدى ليا ولماما شويه ترجع من الدوام
يامن : تتمام حستناكي
منال : لا لا خلاص البيت قريب ماله داعي وبعدين حروح اساسا اشتري كدا غرض فاخلاص
يامن عارف انها بتصرفـه : طيب اللي يريحك
منال ابتسمتلو :والله بجد تعبت نفسك على الفاضي
يامن : ترى انا طول يومي الفلف ماعندي اي هرجه وكلها كم يوم ومسافر يعني حتى الصدفه ماحتجمعنا ثاني
منال : ان شاءلله نتقابل وانتا مستقر وعندك اطفـآل ومن قوة الصدمه ماأعرفك
يامن : ههههههههه ايش المستقبل الاسود ذا حتعرفي انو احد خاطفني وقتها
منال : مافي اي امل يعني
يامن وقف السياره قدام المطعم : أمل اباها كم يوم وخذيها _ قبل لاتعلق اتكلم وهوا يضحك _ انا اسفففف والله خالي مأثر عليا بنكتـه السخيفه هههههههه
منال : هههههههه حمدالله انك عارف
يامن : هههههههه ماتمنيت ينتهي يومنـآ على ذا الشي
منال : ححاول اتناسى الموضوع
يامن: اكون شاكر لكي
منال حطت يدها على الباب : ههههه الله يديك العافيه
يامن : الله يعافيكي .
نزلت من السياره ومشي في نفس اللحظـه , ماحتاجت تتوجه للمطعم مشيت بااتجاه الكآفي
متخيــله وجه حسـآم حاليا , مو متردده ولا ندمانه على حركتـها
وصلت للكافي , دقت الباب وفتحـه ,قفلـه
وقفـه قبال بعض
ضمت يدها تحت صدرها بتوتر
ملامحـه تدل إنو ماسك نفسه بالقوه : دا عقـآب يعني !
منال : لا لو ماكلمتني ماكان عرفت
رفع حاجبه من اسلوبها الغريب
وهيا زاد توترها لكن مازالت محافظه على مظهرها الخارجي
بتحذير : منــآل انا مو ناقصــك
منال : انتا قد طلبت مني ابعد عن اي شي يضايقك ومستعده اسوي دا الشي لكن لما اتأكد إنو إنتا كمان شلت الفكره السخيفه اللي براسك
حسام : اهاا ودي الطريقه المناسبه عشان تخليني اشيلها صح ؟
منال : لا انا عايشه حياتي طبيعي , بس مو ضامنه بكرا حلقاك ولا لا فاماحبعد عن اي احد بدون سبب
قرب خطوه منها : ايش بك تهرجي كذا
منال : اسئل نفسك
مانزلت عينها بعينـه
حسام بااسلوب حـآد : وربي مو ناااقص لعباطة حركـآتك لو
قاطعته بقهر : إنتا اللي ايش بك تهرج كذا انا مو جدار ماأحس تجي تحضني وتاني يوم تقولي تعبان من الدنيا وبكل سهوله اسمع لكلامك واقدر حياتك ومايكون ليا ردة فعل إذا انتا بايع الدنيا وماهمك احد انا ماحسيب لايامن ولا كرم وحسوي اي شي يخطر في بالي , ماحخليك تستغلني وتستغل مشاعري وحبي الغبي للليك واصحى في يوم ادور عليك زيي امس وماألقاك
دارت جسمــها واتوجهت للباب , فكت الباب مانفتح , نزلت يدها بااتجاه المفاتيـح
يدها ترجــــف
بسبب جنـآنه سايره تعبر كثير وتنفجر كثير
حاولت تفتح الباب بس مانفتح
بكيـت مكـآنها
مابعدت عن الباب ولا سابت المفاتيـح
غمض عينه بتعب وفتحـها
بكاها مايقدر يسمـعه
مايقدر يتخيل انها مع يامن ولا ذا كرم اللي خياله نسج شكلـه من غير مايشوفـه
قرب منها
مسك ذراعها ولفها له : لاتبكي
رخت عينها للأسفل
حسـآم مرر يده على خدها : انا اهبل والله أهبل تعبان من الدنيـآ وانا عارف انو لو جيتك كل شي يهون وابعد عنـك , اجيب الشقى لنفسي وانا عارف فين راحتي
طالعت فيه وعيونها كلها دموع
جرتـــه بكلمــه لحضنها : لاتسيبني
مالقى تعليــق
نطقتها من قلبـها , وانسحب بدون إراده اتجاهها
3 دقـآيق وهوا حاضنها وهيا تبكي لحد ماهدت بعدها عنـه وقال : ايش هرجة ابـوكي ..؟
جلست ,حكته كل شي , قالتله رحت لعدنان , كان مستمع وبس وعينو عليـها , رفع يدها وباسها
وقال بعباره ثلجت قلبها : حكون جمبـك _ رفع حواجبه وكأنه يطمنها _ طيب ؟
حركت راسها ياايجاب : ومتى انا حوقف جمبك ؟
سكت للحظـآت وبعدها قال : حجيكي في يوم وحتعرفي انو كل شي انتهى
: قولي وعـد إنــك حتجيني
: وعـد
دي المره هيا الي مسكت يده وسحبتها بااتجاهها , ماطالعت فيه ,خدودها مالت للإحمرار وتلعب بيده بدون ماتجي عينها بعينه
ابتســــم غصبا عنــه بعز كل شي يعيشــه ابتسم لحركتــها
شي نـآعم يتحرك على كفـه تلعب بااصابعه , تحرك الإسوره اللي بيده ,
تضغط على كفـه ويحس انها بتحتويه كلـه مو بس كفـه
نطق بصوت خافت : أحبــك

,.’
[ في المـآضي ]
[ قبــل انفجـآر مآلك بحقيقـة يامن بـ 4 سـآعات ]
جالس في غرفه , ساند ظهره على الكنبه , مرجع راسه للخلف
اضائه جدآ خافتـه
دق الباب مرتيـن ودخل بعد إذن مالك : فينــ _ وقبل لايكمل الكلمه شافـه _ ايش النور دا افـتحه كله
من غيرمايغير وضعيته قال : لا راسي مصدع مو قادر افتح عيني
قفل الباب وزفر بضيـق : خلاص اعتبرها راحت باإرادتها
: خالي عدنان رجـآ
قاطعه : كم مره اقولك قولي عدنان
جلس جمبـه وضرب على فخذه : ها ايش بك
: رجعلي ألم الأعصاب ثاني اباك تجبلي الحبوب
عدنان : وترجع لإدمانك ثاني إحنا ماصدقنا تبعد عنها
مآلك : ماحدمن ابا بس الألم يفك مو قادر اتحمله
عدنان : حتسوي العمليه وانتهينا
مـآلك : ماحسوي عملياات , الحبوب بتريحني
عدنان : الحبوب تاخذها وقت الألم اللي ماتقدر تنام منـه مو من أي صداع من اي مشكله تستخدمها
مـآلك بصوت مرهق: طيب انا حاليا تعبان , جبلي هيا دحين وحفكر بالعمليـه بس خليني دحين ارتـآح
عدنان عينه اتحركت على مـآلك قال بقلة صبـر : حشوف نهايتك حرسلك هيا شوية مع السواق _ وقف _ حنزل لأمك

[ حـآليـآ ]

وقف عند باب شقتـه , اكثر مكـآن يرتآح لما يدخله وحاليا اثقل مكــآن يتمنى يدخلـه
غمض عينه يضبط انفـآسه
فتح الباب ,ودخــل
مشي الممر دخل للصـآله وعينه جات عليـها وهيا نـآيمه واضح انها تعبانه
شد على حواجبه وطالع يمين ويسار , ولدها مو موجود !
مشي خطوه خطوتين ثلاثه اربعه وسمع صوت قربعه من غرفتـه
دخل بهجوميـه
جالس في الارض وحبوبه مشعتره والعلبه بيده
فز رايد لما قال مالك : ااايش بتسسسوي
طاحت العلبه من يده
جا مالك لحده , لم الحبوب بتوتر, دخلها في العلبـه
ملامحـه لوحدها رعبت رايـد سحب جسمه للخلف من غير مايوقفووقف لما مـآلك طالع فيه وقال بحده : اخذت منها ؟
مارد عليـه
: بقوووولك اخذت منها , حطيت في فمك !؟
رايد حرك راسـه بالنفي بكل رعب
مالك مرر يده على ذقنه ونفث بتوتر , يصدقه ! وبعدها يسرله شي ! هوا ناقص مشاكل
رمى علبه الحبوب على السرير ورجع طالع فيه: ماحصرخ عليـك قولي اخذت
وقبل لايكمـل فتح فمـه وبكي بكل صوته
هنا مـآلك اترعب
صوت بكاه مو بتدريج مره وحده يترفع لأعلى مستوى وكأنه اجرم في حقـه
: خلاص صدقتك _ شد على اسنانه وقال بقهر لما استمر بالبكى _ بقوولك اسكت
سمع صوت يسـرى المفجوع تدور على ولدها : رااايد ...راااايد
مـآلك رفع صباعه بتهديد لكن كلامه ماكان فيه اي تهديد : خلاص حديك اللي تباه بس اسسسكت
يسرى جات عند باب الغرفـه وماقدرت تدخل لكن عينها على رايـد : ايش فيييه !!
مالك اشر عليـه بقلة صبـر : ادخلي خذيـه
دخلت بخطوات متتاليه اتجاه رايد نزلت لحده وجات ترفعه إلا دفاها بيده ورجله
يسـرى بصوت مصدوم : قولي مين زعلك _ مازال يبكي _ حبيبي ايش بك
مدت يدها بتمسكه ,ضربها على ذراعها : رااايد !
رايد عينه على مـآلك لكن وجه كلامـه لأمـه : مآحبك
يسرى طالعت بااتجاه نظره ورجعت تكلمـه : ايش سويتلك ؟
دفها برجله برغم مالمستـه ومازالت عينه على مآلك: اكككرهك
: رايد خلاص بتعورني , لوماتباني امسكك قوم بنفسك تعال برا
بكــي ,غمضت عينها بتعب ورجعت فتحتها وقالت : قولي ايش تبى
مدت يدها وضربها بقوه قالت بقلة صبــر : رااايد اتتكلم معاايا وبطل تمد يدك
اترفعت عدسة عينـه على مآلك ورجع نزلها
مـآلك يتأمل حركـآته ..! محاولات يسـرى , نظرات رايد
عارف انو كلامـه موجه له , عارف انو الضرب كمان مو لأمـه بس هيا الوحيـده اللي يقدر يعبـر عندهـآ

[ في المـآضي ]
عمر مـآلك 7سنــوات ..]
في حديقـة منزلهم آندي شايله العـآبه وجزمتـه وتمشي وراه وهيا متبهدلـه
وقف عند طـآولة امـه , تتصفح مجله وقدامها كوب الشاهي : ألعبي معايا
نهال قلبت الصفحه بدون ماتطالع فيه وقالت : اندي ماعندها شي روحلها
مالك : ماتعرف تتكلم وطفشت منها
نهال : علمها ياقلبي وبعدين بتلعب معاها العبه بدون كلام
مالك ضرب برجله : ماابى العب معاها اصلا
نهال بنظرة حاده : مااالك بطل اسلوبك الغبي قلت انقلللع وروح اجلس معاها
وصلت اندي عنده وقالت اسمـه بطريقه غلط : مَلِك
مـآلك طالع فيـها وكأنه صرخة امــه يقدر يطـلعها على دي بس قال بقهر : إسمممي مآآآلك ماتفهممي انتي
ملامحها مالت للتعب لأنها مو فاهمه ليش بيصــرخ مشي من قدامها بااتجاه البيت
وهيا تمشي وراه تطيح العابه من يدها وتشيلها وترجع تكمل طريقــها بتعيش ايام متعبه عشان تحاول تتواصل معاه
طلعت للدور العلوي وصلها صوت بابـه ينقفل بكل قوه
اتوجهت لغرفته دقت الباب وفتحتــه واول مادخلت رماها بالمكعبات : اطططلعي من غرفتي
طاحت الالعاب من يدها ورفعت يدها تحمي وجهها من المكعبات الكبيره
جلس على سريره وهيا مازالت واقفـه , يتنفس بطريقه سريعه , ملامحه كلها حقـد وعصبيـه
لمت المكعبات , العابه ... جات لعنده جلست في الارض عند رجوله ولبسته جزمتـه
وقفت وهوا مايطالع فيـهـآ , بعمر ولدها , ماتفهمهم لغتهم لكن شايفـه بعينها كيف يبى أمـه وابوه والكل يبعده
لغة الاطفـآل تبان بحركات جسمهم بعيونهم ...
غصـه خنقتها , خافت ولدها احد يقصر بحقه وهيا بعيـده عنه
اخذت ورقه وقلـم وجات لعنده رسمت وجه مـآلك وهوا معصب جلست في الارض ومازال هوا على السرير قالت بطريقه مكسـره : why .. you ..all ..the time like this
كشـرت وكأنها تقلده
طالع في الصوره المرسومه
رسمها كركتيرات كوميديه , شكله غبي
ابتسامه خفاها لكن كانت واضحه بعينه قلها بردة فعل سريعه : i'm not like this
وقفت مسكت يده : come
جابته لحد المرايـه : look
كآن مكشر طالع في المرآيه وسحب يده منها , مشي بااتجاه السرير اخد رسمتها من الأرض
دقايق وهوا يتفرج عليها سحب القلم , قوس رسمة شفايفـه للأسفل واداها الرسمه بدون مايعــلق


[ حــآليـآ ]

المفروض ماكان يرفع صوتـه عليـه , ولايفجعه بدي الطريقـه
حاول يستوعب نفسيتـه وفضوله الطفولي
يسرى مابين الشيين تحاول تتكلم بهدوء وفي لحظـه تبدأ تشد على كلامها وبنظرة منـه تلين
حاول يستوعب اخوه ايش خلى دا الطفـل يشوف ويسمع
يسرى مازالت تحـآول
كلام يامن , شكل رايـد بين علف الحيوانات , اشكال الرجال المرمين في الارض , منظر رايد وهوا يلف يده حولين رقبتـه
اسلوب يآمن , نظرات يامن , اعترافات يامن
ضيق على عيونه من صداع افكاره وبكى رايـد
موقف وآحد " إنتا ... ولد ..محمــود "
لو مـآكآن سار ذاك اليوم يمكن ماترتب عليـه ذا كله !!!
رفع يده ودخلها تحت النظاره وضغط على عيونه , سحب يده وقال وهوا يشرد من تأنيب ضميره : رايــد
صوتـه سكتــه ووقفت محاولات يسرى
مـآلك بااسلوب بعيـد كل البعد عن اسلوبـه : فيه ..ملعب ..قريب ..تحب تلعب كوره ؟
عيونه متعلقه على مـآلك بس ماعلق
مـآلك بااختناق زفر وحاول يكون طبيعي : لو تبى تروح قوم اللبس جزمتك
صمت ل 20 ثانيه
دموعه على خده عينه اتنقلت على امـه وقال بهمس : فين ..جزمتي
يسرى مسكت بالقوه ضحكتـها , اشرت على برى : عند الباب
مسح دموعه وقلها : أنا احبك
ضحكت وحركت راسها بتعب : وانا كمان احبك
قام وخرج من الغرفه وهيا وقفت واتنفست بصوت مسموع : شكرا !
مـآلك بحركه مزعجه اداها ظهره واتوجه للكومدينه ورد بعدم اهتمام : طيب
طيب !!!
مافهمت !
لأول مره تسمع دا الرد لكمـة شكرا!!
انسحبت من الغرفه واتوجهت لولدها
مالك قفل على نفسه الباب وولدها متحمس برا
غير بلوزتـه , لبس جزمتـه : شويه حبيبي
جلس رايد على الكنبه ويحرك رجولـه وهيا دخلت للحمام اتجهزت بكل الأحوال حتخرجه بعد حمـآسه
لبست تيشيرت ابيـض على الجينز , رتبت شعرها , حوآجبها
خرجت اتوجهت للصـآله وانفتح باب غرفـة مآلك
كآن يحتاج يجلس لدقـآيق لوحده وغير ملابسـه وخرجلهم ثاني
اسلوب الحوار معدوم بينـهم
مشاعرها حاسه انها ثقيله حاسه المفروض انها ترفض اللي بيسويه
لكن فيه شي بيخليها تتغاضى كالعاده عن ذا الإحساس لما ولدها يبا الشي
وقتها كالعاده تبلع غصتها وتقبل مساعدات اهلها , الناس
انفتح باب الشقـه ورايد رفع اياديه بااتجاه امـه
ماعارضت شالتـه وخبى وجهه في كتفـها
خرجو من العمـآره , اشرلها مالك : بالسياره ولا عادي تمشي
طالعت بسيارته , حركت راسها بنفي : لا عادي امشي
مشيـو طول الطريـق وهيا شايله رايـد
حاولت تغريه انو يطـآلع لكن مافي شي خلاص يرفع راسـه
لحد ماوصلـه للملعب ارض اسفنجيـه للأطفـآل ملعبين ومرمى بحجم صغير
ملعب ثالث لكرة السله برضو للأطفـآل
سمع أصوات الصغار
بعد راسه بت\ريد لحد ماشاف المكان
عينه تنتقل يمين ويسار
مابتسم
متوتر
حاولت تنزله للأرض شد يده حولين رقبتها : ابا اتفرج عليهم
يسرى : ماتبى تلعب ؟
حرك راسـه بنفي
اتوترت من توتر ولدها
ايادديها تمر على جسمه وبتحاول بس تخليه يرتاح : انا جمبك
: مابى
يسرى : طيب _ مشيت بااتجاه الكرسي الخشبيه جلست وهوا على رجولها سند ظهره على جسم امه رفع يدها ومسكها وقدر يتفرج براحه _
مـآلك جلس بااحد الكراسي البعيـده عنهم
بـآله مو معـآه
نص ساعه مرت واستوعب إنو رايـد لسى جالس
عشره دقايق بين الصراع اللي جوتـه, قوم سوي شي , مالي صلاح , ايش ذنبه يتعقد بسبب اهلي ! , انا مالي ذنب , كيف مالي ذنب والبدايه عدنان ودحين يامن مكملها !
قام من مكـآنه مشي بااتجاهه ملامحه جديه
اترفعت عدسة عينهم على مـآلك , مد يدو مـآلك: تعال العب
حرك راسه ورى بعض بالنفي
مـآلك : في الملعب الفاضي محد يحلعب معاك
طالع في الملعب الفاضي , قدر يغريـه بسهوله
مد اياديه الاثنين يعني شيلني
شاله بدون مايرفض مشي بااتجاه الملعب الفاضي , اخذ من السله كوره واتوجه للمرمى : يلا انزل العاب
يطالع في الكوره بالارض , يبا ينزل , يبا يلعب لكن دقات قلبه مسموعه
خوفه واضح
مـآلك ثاني مره يتعاطف معـآه قال بااسلوب هادي : انا حمسك يدك وانتا العب
رايد طالع فيه قال بصوت مهزوز : اخـ آف
مآلك : انا معاك
رايد مازال ماسكه قال بسؤال : انتا قوي ؟
مـآلك تنح وبعدها ضحك : إيوا انا قوي
رايد خفت مسكت يده حولين رقبته نزله مالك للأرض بس ماتركله مجال رايد لما مسك يده وقال باأمر : خليك هنـآ
: كيف حتلعب
رايد بدون مايعلق , شات الكوره للمرمى ومشي وهوا ساحب مـآلك بااتجاه المرمى , اخذ الكوره ورجع سحبـه لورى ووقف ثاني بيرمي الكوره
مـآلك حاول يقنعه : حجلس في الكرسي اللي هنـآ شوفو قريب
رايد : خلاص مابى العب
مـآلك سكت لثواني وبعدها قال بتنآزل : طيب حوقف هنـآ بس انتا تروح تجيب الكوره وانا قدامك
رايد عجبه الإقتراح حرك راسـه باايجآب
رمى الكورة بقوه
راح لوحده جابها ورجع لمـآلك مسك يده ضرب الكوره
سابـه وراح يجيب الكوره رجع مسك يد مـآلك ضرب الكوره وعلى دا الحال
ومو فاهم مـآلك ليش بيمسك يده كل مايرجع ..!!
بس كآنت لحظـه خار عن المألوف لشخصيته لحياتـه إنو يتعامل مع طفـل دا بحد ذآتـه شي غريب
يسرىكل تفكيرها ليش ماجاب سيرة فراس
ليش لطيف مع ولدها , فراس سرلو شي ومو عارف يصارحهم !

’,.
في مصنـع الألعـآب ..]
اصوات مزعجه , خطوات متتاليـه , خرج المفاتيح من جيبـه فتح الباب
نزل الدرج
فتح الباب الثاني وفراس طـآلع فيـه
نظره مجنـونه ككاسيـه ملامحـه
يامن رفع حاجبـه :اتأخرت عليـك ؟
فراس ضاغط على فكـه , عروق جبينـه بارززه قال بقلة صبـر : خرجني من هنـآ
يامن جلس على الكرسي : حخرجك لكن عندي بشـآره لك
ماعلـق انتظره يكمـل
يامن : مسكنـآ سلمـآن وعندي حليـن ياأسلمو للشرطه او اسلمـو لك
فراس : سلمـآن !
يامن : ايش بك متفاجئ انا لو ابا شخص حجيبو من تحت الأرض وذا قتل مرتك يعني يهمني اعرف قرارك قبل قراري في ذا الموضوع
يطـآلع في يامن وبــآله بعيـــد
بكى صبـآ , ابتسامة صبـآ , ترجي صبـآ , تعب صبـآ , حمل صبـآ , وعده لها
روح محــرمه نطق بكلمـآت بدون وعيـه : حقتله بنفسي , محد حيلمسه غيري

نهــآية الفصــل ..]