#ﺑﻨﺖ__ﺍﻟﻤﺆﻣﻦ
ﺷﻴﺦ ﺍﻟﺸﺒﺎﺏ ²
ﻣﻦ ﻛﺘﺎﺑﺎﺕ ﺯﻫﺮﺍﺀ ﺍﻟﻌﺮﺍﻗﻴﺔ
#بارت٧
ﻓﻲ ﻋﻴﻨﻴﻚ ﻏﻴﻢ ﺃﺳﻮﺩ
ﻭ ﺑﺪﺍﻳﺎﺕ ﺷﺘﺎﺀ !
- ﻧﺰﺍﺭ ﻗﺒﺎﻧﻲ
- ﺭﻭﺣﻲ ﻟﻐﺮﻓﺘﺞ ﺭﻭﺣﻲ ﻫﺴﺔ
ﺭﺣﺖ ﻟﻠﻐﺮﻓﺔ ﻭ ﺍﻋﻀﺎﻣﻲ ﺻﺎﺭﺕ ﺍﻃﻜﻄﻚ
ﻭﻳﺔ ﺑﻌﺾ
- ﺯﻳﻨﺐ ﺗﻌﺎﻟﻲ ﺍﺑﺴﺮﻋﺔ
ﺻﻮﺕ ﺍﺑﻮﻳﺔ !
ﻇﻠﻴﺖ ﻛﺎﻋﺪﻩ ﺑﻤﻜﺎﻧﻲ ﺍﺟﺘﻨﻲ ﻓﻜﺮﺓ ﻃﻔﻮﻟﻴﺔ ﺍﺧﺘﻞ ﺟﻮﺓ ﺍﻟﺴﺮﻳﺮ ﻟﻮ ﺩﺍﺧﻞ ﺍﻟﻜﻨﺘﻮﺭ
- ﺯﻳﻨﺐ ﺗﻌﺎﻟﻲ ﺑﺴﺮﻋﺔ
ﻻ ﻣﺎ ﻣﺎ ﺍﻃﻠﻊ ﺍﻟﻪ !
ﺳﻤﻌﺖ ﻛﻼﻣﻪ ﺑﺎﻟﻤﻤﺮ
- ﻧﺴﺮﻳﻦ ﺯﻳﻨﺐ ﻣﻮ ﻛﻠﺘﻲ ﺭﺟﻌﺖ ؟
ﻓﺘﺢ ﺍﻟﺒﺎﺏ ﻭﺍﻧﻲ ﺍﺭﺗﻌﺪﺕ ﺍﺑﺎﻭﻉ ﺍﻟﻪ ﺑﺨﻮﻑ ﻭ ﻭﺟﻪ ﻣﺒﻠﻮﻉ ﻭﻣﻼﻣﺢ ﺑﺎﻫﺘﻪ
- ﺷﻨﻮ ﻣﺎ ﺍﺳﻤﻌﻴﻦ
ﺍﺷﺒﻴﺞ ﻣﺮﻳﻀﺔ؟
ﺣﺮﻛﺖ ﺷﻔﺎﻳﻔﻲ ﻭﻣﺎ ﻃﻠﻊ ﺻﻮﺕ
- ﻛﻮﻣﻲ ﺑﻮﻳﺔ ! ﻧﻈﻔﻲ ﺍﻟﻄﻔﻠﺔ ﺗﻘﻴﺌﺖ ﻭ ﻓﻴﻀﺖ ﺍﻟﺴﻴﺎﺭﺓ
!-
- ﻛﻮﻣﻲ
- ﻫﺎ
ﻛﻤﺖ ﻭﺭﺍﻩ ﻭﺍﻧﻲ ﻣﻤﺼﺪﻛﺔ ﺍﻟﻲ ﺩﻳﺼﻴﺮ ﺑﺎﺑﺎ ﻏﺾ ﻧﻈﺮﺓ ﻋﻨﻲ؟
ﺷﻔﺖ ﺑﺘﻮﻝ ﻋﻠﻰ ﺍﻟﺪﺭﺝ ﻭﻣﻼﺑﺴﻬﺎ ﻛﻠﻬﺎ ﻗﻴﺊ ﻭﺗﻌﺒﺎﻧﻪ ...
ﺍﺧﺬﺗﻬﺎ ﺳﺒﺤﺘﻬﺎ ﻭﺑﺎﻟﻲ ﻳﻢ ﺑﺎﺑﺎ ﻭﺍﺑﻮﻫﺎ ﻭﺍﻟﺤﺴﺎﺏ
ﺍﻧﻲ ﺑﺎﻟﻲ ﺍﻛﻮﻝ ﺷﻮ ﻭﺟﻬﺔ ﻣﻜﺎﻥ ﻋﻠﻴﻪ ﻋﻼﻣﺎﺕ ﺍﻟﻐﻀﺐ ! ﻭﻛﺎﻝ ﺑﻮﻳﺔ ! ﻛﻠﻤﺘﻪ ﺍﻟﺤﻨﻴﻨﺔ ﻣﺎ ﺗﻄﻠﻊ ﺑﻮﻗﺖ ﺍﻟﻐﻀﺐ؟
ﺑﺘﻮﻝ - ﻻ ﺗﻠﺰﻣﻴﻨﻲ !
- ﻫﺎﺍﻧﺖ ﺍﻟﺜﺎﻧﻴﺔ ﺍﺷﻠﻮﻥ ﺍﻟﺒﺴﺞ ﺑﺎﻟﻄﺎﻗﺔ ﺍﻟﺸﻤﺴﻴﺔ ﻣﺜﻼ
ﻃﻠﻌﺖ ﻣﻦ ﺍﻟﺤﻤﺎﻡ ﻣﺸﻄﺖ ﺍﻟﻬﺎ ﻭﺍﺳﻤﻊ ﺍﺻﻮﺍﺗﻬﻢ ﺑﺎﻟﻬﻮﻝ
ﺻﺎﺣﺘﻠﻲ ﺍﻣﻲ ﺭﺣﺖ ﺍﻟﻬﺎ ﻟﻠﻐﺮﻓﺔ
ﻋﺒﻮﺩﻱ ﻛﺎﻋﺪ ﻳﺒﺠﻲ
ﺷﻠﺘﻪ
- ﻣﺎ ﻻﻣﺤﻴﺞ
- ﺻﺪﻙ
- ﺃﺑﻮﺝ ﻣﺎ ﺷﺎﻳﻔﺞ
ﺩﺧﻞ ﻏﻴﺮ ﻣﻼﺑﺴﺔ ﻣﺎ ﻣﺒﻴﻦ ﻋﻠﻴﻪ ﺷﻲ ﻃﺒﻴﻌﻲ ﺑﻌﺪ ﺭﺟﻞ ﺍﺧﺘﺞ ﻣﺎ ﺍﺩﺭﻱ ﻳﺎﻟﻤﻔﺠﻮﻋﺔ
- ﺍﻟﺤﻤﺪﻟﻠﻪ ﻳﺎﺭﺑﻲ
- ﻣﻦ ﻭﺻﻠﻮ ﻟﺮﺍﺱ ﺍﻟﺸﺎﺭﻉ ﺑﺘﻮﻝ ﻣﺘﻘﻴﺊ ﻋﻠﻰ ﺍﺑﻮﺝ ﻭ ﻇﻞ ﻣﺤﺘﺎﺭ ﺑﻴﻬﺎ ﻣﻦ ﻭﺻﻞ ﻟﻠﻔﺮﻉ
- ﺑﺘﻮﻝ ﺣﺒﻴﺒﺘﻲ
ﺃﺑﺘﺴﻤﺖ ﺑﺘﺄﻧﻴﺐ ﺿﻤﻴﺮ ﻷﻣﻲ
ﻭﻫﻲ ﺗﺨﻮﺯﺭ ﺑﻴﻪ ﻋﻠﻰ ﺳﺮﻳﺮﻫﺎ ﻣﻄﺮﻭﺣﺔ
ﻭﺣﻄﺖ ﺍﻳﺪﻫﺎ ﻋﻠﻰ ﺧﺪﻫﺎ
- ﺃﺳﻔﺔ
ﺍﻟﺼﻮﺕ ﺃﻗﻞ ﺻﺪﻯ ﻣﻦ ﺍﻥ ﻳﻮﺻﻠﻬﺎ
- ﺭﻭﺣﻲ ﻧﻜﻌﻲ ﺩﺟﺎﺝ ﺍﺑﻮﺝ ﺍﻛﻴﺪ ﺭﺍﺡ ﻳﺄﺧﺮ ﺭﺟﻞ ﺃﺧﺘﺞ ﻳﻤﻨﺎ ﻋﻠﻰ ﺍﻟﻐﺪﺓ
- ﻣﺎﻣﺎ ﺧﺎﻑ ﺷﺎﻳﻔﻨﻲ ﻫﻮ ﺷﺠﺎﺑﻪ
- ﺭﺍﻳﺢ ﻳﺰﻭﺭ ﺑﺘﻪ ﻭﻳﺠﻴﺒﻬﺎ ﺍﻟﻨﺎ ﺍﺑﻮﺝ ﺷﺎﻳﻔﺔ ﺑﺎﻟﺤﻀﺮﺓ ﻭﺟﺎﻱ ﻭﻳﺎﻩ
- ﻫﺎ ﻫﻴﺞ ﺍﻟﺴﺎﻟﻔﺔ
ﺍﺣﻨﻪ ﺑﺒﺪﺍﻳﺔ ﺍﻟﻔﺮﻉ ﺑﻴﺘﻨﺎ ﺭﺍﺑﻊ ﺑﻴﺖ ﻭ ﻣﻦ ﺩﺧﻠﺖ ﺍﻟﺴﻴﺎﺭﺓ ﺍﻻ ﺷﻔﺘﻬﺎ ﮔﻠﺒﻲ ﺳﺎﺡ ﻉ ﺑﺎﻟﻲ ﺷﺎﻓﻮﻧﻲ ﺑﺲ ﺑﺎﺑﺎ ﻣﺒﻴﻦ ﻣﺎ ﺷﺎﻳﻔﻨﻲ ﻷﻥ ﺍﺟﺎﻧﻲ ﻟﻠﻤﻄﺒﺦ ﻭﺍﻧﻲ ﺍﻃﺒﺦ ﻭﻃﺒﻴﻌﻲ ﻭﻋﺰﻡ ﻳﺎﺳﺮ ﻳﺠﻲ ﻳﻤﻨﺎ ﻣﻦ ﻳﺨﻠﺺ ﺑﺲ ﺍﻟﺨﻮﻑ ﻛﻠﻪ ﻣﻦ ﺍﻟﺴﻴﺪ ﻭ ﺑﻌﺪﻫﺎ ﺍﻟﺮﺟﻔﺔ ﮔﻠﺒﻲ ﻻ ﻳﺴﻮﻟﻒ ﻷﺑﻮﻳﺔ ﻭﻳﻄﻴﺢ ﺣﻈﻲ ﺍﺫﺍ ﺷﺎﻓﻨﻲ ﻭﺍﻛﻔﻪ ﻳﻢ ﺍﻟﺒﺎﺏ ﻭﺍﻟﻲ ﺍﺗﻘﺪﻡ ﺍﻟﻲ ﺑﺎﻟﺴﺎﺑﻖ ﻳﻤﻲ ﺍﻟﺘﻬﻴﺖ ﺍﻟﻈﻬﺮ ﺑﺘﻌﺰﻳﻞ ﺍﻟﻤﻄﺒﺦ ﻭﻉ ﺍﻟﻨﺺ ﻋﻔﺘﻪ ﻭﺍﺟﺖ ﺭﻗﻴﺔ ﺗﻜﻤﻞ ﻷﻥ ﻋﺒﻮﺩ ﻳﺒﺠﻲ ﻳﺮﻳﺪ ﻳﻨﺎﻡ
ﺍﻧﻲ ﺣﻤﺪﺕ ﺭﺑﻲ ﻋﺰﻣﻮ ﻳﺎﺳﺮ ﻭﺻﺎﺭ ﻏﺪﺓ ﺍﻟﺮﺟﺎﻝ ﻣﻨﻌﺰﻝ ﻋﻨﺎ ﻟﻮ ﺑﺲ ﻣﺤﻤﺪ ﻛﺎﻥ ﻛﻌﺪﻧﺎ ﺳﻮﺓ ﻭ ﺍﻧﻲ ﺑﺮﻭﺣﻲ ﺍﻧﻔﺎﺳﻲ ﺗﺮﺟﻒ ﻣﻨﻪ ﻣﻮ ﺍﻧﻮﺏ ﺍﻭﺍﺟﻬﻪ
ﺍﻧﻮﺏ ﻳﺎﺳﺮ ﻫﻢ ﺷﺎﻓﻪ ﺑﺎﻟﺤﺪﻳﻘﺔ ﻭﺍﻛﻒ ﻳﻤﻲ ﻳﺮﺑﻲ ﻟﻴﺶ ﻫﻴﺞ ﺍﻧﻲ ﺣﻈﻲ ﻫﺎﻱ ﺍﻟﺒﻨﺎﺕ ﺍﺷﻠﻮﻥ ﺗﺤﺐ ﻗﺒﻞ ﺍﻟﺰﻭﺍﺝ ﺍﻧﻲ ﺣﻈﻲ ﺑﺲ ﺑﺎﻟﻨﻴﺔ ﻭﻛﺎﺗﻤﺔ ﺑﮕﻠﺒﻲ ﻭﺍﺳﻤﻲ ﻣﺸﻬﻮﺭﺓ
ﺑﻌﺪ ﺍﻟﻈﻬﺮ ﺍﻧﻲ ﺍﺭﻳﺪ ﺍﻏﻔﻲ ﻋﻠﻰ ﻧﻮﻣﻪ ﻋﺒﻮﺩﻱ ...
ﺍﻧﺪﺍﺳﻴﺖ ﻋﻠﻰ ﺑﻄﻨﻲ ﻓﺘﺤﺖ ..
ﺻﺪﻳﻖ ﺻﺎﻋﺪ ﻋﻠﻴﻪ ﻭ ﺣﺎﻁ ﺭﺟﻠﻴﻪ ﻋﻠﻰ ﺟﻮﺍﻧﺒﻲ ﻭﻳﺮﺟﻊ ﻧﻔﺴﺔ ﻟﻠﺨﻠﻒ ﻭ ﻟﻜﺪﺍﻡ
ﺑﺼﻮﺕ ﻧﺺ ﻏﺎﻓﻲ
- ﻣﺴﻮﻳﻨﻲ ﻣﻄﻲ؟
ﻳﻀﺤﻚ
ﺳﺤﻠﺘﻪ ﻣﻦ ﺭﺍﺳﻪ ﻭﻧﻴﻤﺘﻪ ﻳﻤﻲ ﻭ ﻣﺎ ﻳﻜﻌﺪ ﺑﺲ ﻳﺘﺤﺮﻙ ﻣﻨﺎ ﻭﻣﻨﺎ .
ﻭ ﺍﺟﻪ ﺍﻟﺘﻮﻡ ﻣﺎﻟﺘﻪ ﻛﻤﻠﻬﺎ ﻓﻮﻙ ﺭﺍﺳﻲ
ﻣﻐﻤﻀﺔ ﻭﺍﺣﺲ ﺑﺄﺣﺪ ﻳﻔﺘﺢ ﺑﺠﻔﻮﻧﻲ
- ﺷﻨﻬﺎﻱ ﻭﺧﺮ
ﺻﺪﻳﻖ - ﻧﺎﻳﻤﺔ ؟ ﻋﺒﺎﻟﻲ ﻣﺎﻳﺘﻪ
- ﻣﺎﻳﺘﺔ ! ؟
- ﻗﺎﺳﻢ ﻳﻜﻮﻝ ﻣﺎﻣﺎ ﻏﻤﻀﺖ ﻭﻣﺎﻳﺘﺖ
- ﺻﺪﻳﻖ ﺍﻧﺖ ﻣﺘﺤﻠﻒ ﺑﻴﻪ ﺍﺭﻳﺪ ﺍﻧﺎﻡ
ﻣﺎ ﻣﻴﺘﻪ ﺑﺲ ﻣﻐﻤﻀﺔﻣﺘﺤﻤﻠﺔ ﺻﻌﺪﺗﻜﻢ ﻋﻠﻴﻪ ﻻﻥ ﺗﻌﺒﺎﻧﻪ
ﻛﻌﺪ ﻋﺒﺪ ﺍﻟﻠﻪ ﻣﻦ ﺍﺻﻮﺍﺗﻬﻢ
ﻛﻤﺖ ﺣﻄﻴﺘﻠﻪ ﺍﻟﻤﻤﺔ
- ﺍﺑﻮﻛﻢ ﺭﺍﺡ ؟
ﻣﺤﺪ ﺟﺎﻭﺑﻨﻲ ﻣﻠﺘﻬﻴﻦ ﻳﺼﻌﺪﻭﻥ ﻋﻠﻰ ﺳﺮﻳﺮ ﺭﻗﻴﺔ ﻭﻳﻄﻔﺮﻭﻥ ﻋﻠﻴﺔ
ﻛﻌﺪﺕ ﺍﻟﻌﺐ ﺑﺎﻟﺘﻠﻴﻔﻮﻥ ﺻﺎﺣﻠﻲ ﻣﺼﻄﻔﻰ
- ﺧﺎﻟﺔ ﺗﻌﺎﻟﻲ ﺟﺪﻱ ﻳﺼﻴﺢ
- ﺍﻱ ﺍﺟﻴﺖ
ﺍﺟﻴﺖ ﺍﻃﻠﻊ ﺳﺪﻟﻲ ﺍﻟﺒﺎﺏ ﻣﺼﻄﻔﻰ
ﻭﺻﺮﺕ ﺣﻴﻞ ﻗﺮﻳﺒﻪ ﻛﻔﺨﺖ ﺍﻧﻔﺎﺳﻲ ﺭﻳﺤﺔ ﺩﺧﺎﻥ
ﺭﺟﻌﺖ ﺧﻄﻮﺓ ﺧﺎﺯﺭﺗﻪ
ﻣﺎ ﺍﻧﺘﺒﻪ ﻫﻮ ﻟﻨﻈﺮﺍﺗﻲ
- ﻭﻳﻦ ﻃﺎﻟﻌﺔ ﻫﻴﺞ
ﺍﺑﻮﻳﺔ ﻳﻤﻪ ﻭﻫﻮ ﻳﺮﻳﺪ ﻳﺤﺠﻲ ﻭﻳﺎﺝ
ﺗﻄﺎﻳﺮﺕ ﺍﻻﻓﻜﺎﺭ ﺍﻟﻲ ﺑﺎﻟﻲ ﻭ ﺍﻟﺮﻫﺒﺔ ﺩﺧﻠﺖ ﮔﻠﺒﻲ ﺑﻠﻌﺖ ﺭﻳﻜﻲ ﺍﻟﻨﺸﻒ ﺑﺼﻌﻮﺑﺔ
- ﺍﺑﻮﻙ !!!
- ﺍﻱ
ﺭﺍﺡ ﻣﺼﻄﻔﻰ
ﻏﺎﻣﺖ ﻋﻴﻮﻧﻲ ﺑﻐﻼﻟﺔ ﻣﻦ ﺩﻣﻮﻉ ﺍﻟﺨﻮﻑ
ﻟﺒﺴﺖ ﺻﺎﻳﺔ ﻋﻠﻰ ﻣﻼﺑﺴﻲ ﻭ ﺣﺠﺎﺏ ﻟﻔﻴﺘﻪ ﺑﺎﻱ ﻃﺮﻳﻘﺔ ﻣﺎ ﺍﺫﻛﺮﻫﺎ . .
ﻭﻃﻠﻌﺖ ﺑﻌﻴﻮﻥ ﻻﻣﻌﺔ ﻗﺮﻳﺒﺔ ﺍﻟﺪﻣﻮﻉ ﻋﻠﻰ ﺿﻔﺎﻓﻬﺎ
ﻣﺮﺗﻀﻰ ﻛﺎﻋﺪ ﻳﻠﻌﺐ ﺑﺠﻬﺎﺯﺓ ﻭ ﻳﺎﺳﺮ ﺭﺍﻳﺢ
ﺍﺑﻮﻱ ﺑﺎﺑﺎ ﻛﺎﻋﺪ ﻭ ﺣﺎﻁ ﻋﻼﻭﻱ ﺑﺤﻀﻨﻪ ﻳﻠﻌﺐ ﺑﺘﻠﻴﻔﻮﻧﻪ ﻭﺑﺎﺑﺎ ﻳﺪﻭﺭ ﺑﺨﺮﺯﺍﺕ ﺍﻟﺴﺒﺤﺔ ﻭﻳﺤﺮﻙ ﺷﻔﺎﻳﻔﺔ
ﺍﻟﺴﻴﺪ ﻛﺎﻋﺪ ﻭﻣﻈﻠﻞ ﻋﻴﻮﻧﻪ ﺑﺄﻳﺪﻩ ﻭﺑﺘﻮﻝ ﻛﺎﻋﺪﻩ ﻳﻤﻪ ﻻﺯﻛﺔ ﻧﻔﺴﻬﺎ ﺑﻴﻪ ﻭﻣﺎﺧﺬﻩ ﻫﻢ ﺗﻠﻴﻔﻮﻥ ﺍﺑﻮﻫﺎ
ﺍﻧﻲ ﺍﻟﺠﻬﺎﻝ ﺍﺟﻮ ﻭﺭﺍﻳﻪ ﺟﻮﺓ ﺫﻳﺎﻟﻲ ﻳﺘﻌﺎﺭﻛﻮﻥ ﻣﺪﺭﻱ ﻳﻠﻌﺒﻮﻥ ﺻﺪﻳﻖ ﻭﺗﻘﻲ
ﺍﺭﻳﺪ ﺍﻧﻄﻖ ﺍﻋﻠﻦ ﻋﻦ ﻭﺟﻮﺩﻱ ﻟﺴﺎﻧﻲ ﺍﻟﺨﻮﻑ ﺷﻠﺔ ﻭﺗﻤﺎﺩﺓ ﺧﻮﻓﻲ ﺍﺗﻀﺢ ﻋﻠﻰ ﺍﺩﻳﺔ ﺍﻟﻲ ﺗﺮﺟﻒ ..
ﻭﺍﺧﻴﺮﺍ ﺭﻓﻊ ﺭﺍﺳﻪ ﻣﻦ ﺑﺎﺑﺎ
ﻛﺎﻟﻲ
- ﺯﻳﻨﺐ ﺍﻟﺴﻴﺪ ﻳﺮﻳﺪ ﻳﺤﺠﻲ ﺍﻭﻳﺎﺝ
ﺑﻠﻌﺖ ﺭﻳﻜﻲ ﻣﻦ ﻏﻴﺮ ﻣﺎ ﺍﺟﺎﻭﺏ
ﻣﺮﺗﻀﻰ
- ﺍﻛﻌﺪﻱ ﻟﻴﺶ ﻭﺍﻛﻔﺔ
ﻛﻌﺪﺕ ﻳﻢ ﻣﺮﺗﻀﻰ ﻭﻛﺮﺻﻨﻲ ﺣﻴﻞ ﺑﺰﻧﺪﻱ
ﺍﻟﺘﻔﺘﺖ ﻋﻠﻴﻪ ﺑﻌﻴﻮﻥ ﻣﺘﺴﻌﺔ ﻣﺘﺴﺄﻟﺔ؟
ﺷﺎﻭﺭﻧﻲ ﺗﻘﺮﻳﺒﺎ
- ﺍﺷﺒﻴﺞ ﺧﺎﻳﻔﺔ ﺭﺍﺡ ﺗﺒﺠﻴﻦ
ﻭﺿﺤﻚ !
ﺍﻟﺴﻴﺪ - ﻗﺎﺳﻢ ﺑﻮﻳﺔ ﺍﺧﺬ ﺍﺧﻮﺗﻚ ﻭ ﺭﻭﺡ ..
ﻃﻠﻌﻮ ﺍﻟﺠﻬﺎﻝ ﻭ ﺑﺎﻟﺘﻮﺍﺳﻴﻞ ﺍﻻ ﺑﺘﻪ ﻋﺎﻓﺘﻪ ﻭﺭﺍﺣﺖ ﻭﻳﻪ ﺍﺧﻮﺗﻬﺎ ﺍﻧﻲ ﻣﻦ ﻃﻠﻌﻮ ﺍﻟﺠﻬﺎﻝ ﺯﻫﻘﺖ ﺭﻭﺣﻲ ..
- ﺍﻟﻴﻮﻡ ﺻﺎﺭﺕ ﺷﻐﻠﺔ ﻧﺒﻬﺘﻨﻲ ﻟﻬﻮﺍﻱ ﺍﻣﻮﺭ
ﻭﻻﺣﻈﺘﻬﺎ ﺑﻄﺮﻳﻘﻨﺎ ﻣﻦ ﺃﺟﻴﺖ ﻟﺒﻴﺘﻜﻢ
ﺃﺳﺒﻠﺖ ﺟﻔﻮﻧﻲ
- ﺑﺘﻮﻝ ﺷﺨﺺ ﻣﺘﻮﺣﺪ ﺑﺼﻌﻮﺑﺔ ﺗﺘﺄﻟﻒ
ﻣﻦ ﺗﻌﺒﺖ ﺑﺎﻟﺰﻳﺎﺭﺓ ﻛﺎﻟﺖ ﻭﺩﻳﻨﻲ ﻟﺨﺎﻟﺔ ﺯﻳﻨﺐ
ﺿﺤﻚ ﻭﻛﺎﻝ ﺃﺑﺘﻠﻴﺘﻲ ﺑﻴﻬﻢ
- ﻣﺎ ﻳﻔﻴﺪ ﺍﺧﺬﻫﻢ ﻣﻨﺞ ﺻﺪﻳﻖ ﻭﺗﻘﻲ ﻳﻮﻡ
ﺍﻟﻴﻮﻡ ﺍﻟﺜﺎﻧﻲ ﻳﺼﺒﺤﻮﻥ ﻳﺒﺠﻮﻥ
ﺑﺲ ﻛﻠﺖ ﻃﺒﻴﻌﻲ ﺧﺎﻟﺘﻬﻢ ﺻﻮﺭﺗﻬﺎ ﺃﻗﺮﺏ ﺍﻟﻬﻢ ﻷﻣﻬﻢ
ﺑﺪﺃ ﮔﻠﺒﻲ ﺑﺎﻟﻨﺰﻑ ﻭ ﺍﻟﺨﻔﻖ ﺑﻄﺮﻳﻘﺔ ﺃﺫﺕ ﺻﺪﺭﻱ
ﺻﻮﺗﻪ ﺗﺤﺠﺮ ﻭ ﺻﺎﺭﺕ ﺛﻜﻴﻠﺔ ﺗﻘﻄﻌﺎﺗﻪ
- ﺍﻟﻮﻟﺪ ﺍﻛﻴﺪ ﻭﺿﻊ ﻣﺆﻗﺖ ﺑﺲ ﺑﺘﻮﻝ
ﺍﻧﺖ ﺍﻟﺸﺨﺺ ﺍﻟﻮﺣﻴﺪ ﺗﻄﻠﺒﺔ ﻣﻦ ﺗﺤﺘﺎﺟﺔ
ﺗﺪﺧﻞ ﺑﺎﺑﺎ ﻭﻛﺎﻝ
- ﻳﻤﻜﻦ ﻷﻥ ﺍﻛﻮ ﺷﺒﻪ ﻣﻦ ﺃﺧﺘﻬﺎ
ﺣﺘﻰ ﻧﺒﺮﺗﻬﺎ ﺑﻴﻬﺎ ﻗﺮﺏ ﻣﻦ ﺻﻮﺕ ﺍﻟﻤﺮﺣﻮﻣﺔ ..
ﺧﻄﺖ ﺩﻣﻌﺔ ﺃﺛﺮ ﻣﻦ ﻣﺤﺠﺮ ﺍﻟﻌﻴﻦ ﻟﺘﺤﺖ ﺫﻗﻦ ﺍﻟﻮﺟﻪ ..
ﺣﻤﺤﻤﺖ ﺍﻻ ﻛﺪﺭﺕ ﺍﻧﻄﻖ ﻭﻫﻤﺴﺖ
- ﺧﻠﻴﻬﺎ ﻳﻤﻲ ﺑﺘﻮﻝ
ﻭﺑﻌﺪ ﺍﻟﺠﻬﺎﻝ ﺳﺠﻠﺘﻬﻢ ﺭﻭﺿﺔ ﻗﺮﻳﺒﺔ ﻋﻠﻴﻨﺎ ﺍﻧﺖ ﺧﻠﻴﻬﻢ ﻣﺎ ﻣﺄﺫﻳﻨﻲ ﺩﻭﺍﻡ ﻣﺜﻠﻲ ﺻﺪﻳﻖ ﻭﺗﻘﻲ ﻭﻫﻤﻪ ﺣﺒﺎﺑﻴﻦ
ﻃﻜﻬﺎ ﺿﺤﻜﺔ ﻣﺼﻄﻔﻰ
- ﺣﺒﺎﺑﻴﺶ ﻣﻮ ﺍﻟﺒﺎﺭﺣﻪ ﺻﺪﻳﻖ ﺟﺎﺏ ﺍﻟﺠﺪﺍﺣﻪ ﻭﺣﺮﻙ ﻋﻄﻮﺑﺞ
ﺿﺤﻜﺖ ﻣﺪﻧﻜﺔ ﻣﺴﺘﺤﻴﺔ ﻣﻦ ﻋﻄﻮﺑﻲ ﻭ ﺿﺤﻚ ﺍﻟﺴﻴﺪ ﻭﻛﺎﻝ
- ﺍﻳﺎ ﻣﺆﺫﻱ
ﺣﻴﻞ ﻣﺆﺫﻱ ﻫﺬﺍ ﺍﻟﻮﻟﺪ ﺣﺮﻙ
ﺍﺑﻮﻳﺔ - ﻏﻴﺮ ﺫﺍﻙ ﺍﻟﻴﻮﻡ ﻫﺪ ﻋﻠﻰ ﺧﺎﻟﺘﻪ ﺭﻗﻴﺔ ﺑﺎﻟﺴﻜﻴﻦ ﻻﻥ ﺑﺎﺳﺘﺔ
ﺻﺎﺭﻭ ﻳﻀﺤﻜﻮﻥ ﻭﻇﻠﻮ ﻳﺬﻛﺮﻭﻥ ﻭﻛﺎﺣﺔ ﺍﻻﻃﻔﺎﻝ .
ﻭﻫﺬﺍ ﻃﻠﻊ ﻣﻮﺿﻮﻋﺔ ﺍﻻﻃﻔﺎﻝ ﺍﻟﻠﻪ ﻳﺴﺎﻣﺤﻚ ﻃﻠﻌﺖ ﻣﺎ ﺷﺎﻳﻒ ﺷﻲ ﻭﺍﻧﻲ ﺍﻟﻲ ﺍﺟﻪ ﻳﻮﻛﻒ ﮔﻠﺒﻲ ﻭﺍﺩﻋﻲ
ﺗﻨﻔﺴﺖ ﺑﺄﺭﻳﺤﻴﺔ ..
ﻭﻃﻠﻊ ﺍﻟﺮﺟﺎﻝ ﺑﺲ ﻳﺒﺮﺭ ﺑﻘﺎﺀ ﺍﻻﻃﻔﺎﻝ ﻳﻤﻲ ﻭﻳﺘﻌﺬﺭ ﻣﻨﻲ .. ﻭ ﻣﺪﻯ ﺗﻌﻠﻖ ﺑﺘﻮﻝ ﺑﻴﻪ ﺍﻟﻲ ﺍﺳﺘﻐﺮﺑﺖ ﻣﻨﻪ ﻣﺎ ﺗﺒﻴﻦ ﻫﺬﺍ ﺍﻟﺸﻲ ﺍﺫﺍ ﺍﻟﻤﺴﻬﺎ ﺗﺘﻀﺎﻳﻖ ﻣﻨﻲ ﻭﺑﺲ ﺗﻘﻠﺪ ﻋﻠﻰ ﺍﻱ ﺷﻲ ﺍﻗﺪﻣﻪ ﺍﻟﻬﺎ ﻭﻣﺎ ﻳﻌﺠﺒﻬﺎ ﺷﻲ ، ﺍﺗﻐﺎﺿﻰ ﻋﻨﻬﺎ ﻛﻮﻧﻬﺎ ﻳﺘﻴﻤﺔ ﻭ ﺍﺗﺤﻤﻞ ﺩﻻﻟﻬﺎ ﮔﻠﺒﻲ ﻣﺎ ﻳﻨﻄﻴﻨﻲ ﺍﺯﺟﺮﻫﺎ ﺑﻌﻴﻨﻲ ﺍﺻﻴﺮ ﻓﺎﻃﻤﺔ ﺗﺼﺪﻧﻲ ﻋﻦ ﺃﻱ ﻋﺼﺒﻴﺔ ﺍﺗﺠﺎﻩ ﺍﻟﺒﻨﻴﺔ ﻛﺎﻧﺖ ﻣﺘﻌﻠﻘﺔ ﺑﻴﻬﺎ ﺍﻛﺜﺮ ﺷﻲ ﻛﻮﻧﻬﺎ ﺑﻨﺖ .
ﺑﺎﻟﻠﻴﻞ ﺍﻣﻲ ﺻﺎﺣﺘﻠﻲ
ﺭﺣﺖ ﺍﻟﻬﺎ
- ﺍﺩﺧﻠﻲ ﻭﺳﺪﻱ ﺍﻟﺒﺎﺏ
- ﺍﺷﻜﺪ ﺃﺧﺎﻑ ﻣﻦ ﻫﺎﻱ ﺍﻟﻜﻠﻤﺔ
- ﺍﺩﺧﻠﻲ ﺍﺩﺧﻠﻲ ﻫﻮ ﺍﻧﻲ ﺑﻌﺪ ﻳﻨﺨﺎﻑ ﻣﻨﻲ
- ﻳﻤﺔ ﺍﻧﻲ
- ﺍﺟﻴﺘﻲ ﺗﺮﻛﻀﻴﻦ ﺍﻟﺼﺒﺢ ﻳﻤﺔ ﺍﻟﺤﻜﻴﻨﻲ
ﻭ ﺷﻨﻮﺧﻠﺼﺖ ﺍﻟﺴﺎﻟﻔﺔ ﻣﺎ ﺭﺍﺡ ﺗﺒﺮﺭﻳﻦ ﺍﻟﻲ ﺷﻌﻨﺪﻩ ﻫﺬﺍ ﻭﺍﻛﻒ ﻭﻳﺎﺝ
ﻛﻌﺪﺕ ﻛﺪﺍﻣﻬﺎ ﻋﻠﻰ ﻃﺮﻑ ﺳﺮﻳﺮﻫﺎ
ﺳﻮﻟﻔﺖ ﺍﻟﻬﺎ ﺍﻻﻋﺠﺎﺏ ﺍﻟﻲ ﺑﻴﻨﺎ
- ﻟﻮ ﻫﻮ ﺧﻮﺵ ﺭﺟﺎﻝ ﺟﺎﻥ ﺍﺣﺘﺮﻡ ﺣﺮﻣﺔ ﺑﻴﻮﺕ ﺍﻟﻨﺎﺱ ﻭﻣﺎ ﻳﺤﺎﻭﻝ ﻳﺒﺎﻭﻉ ﻣﻦ ﺍﻟﺸﺒﺎﺑﻴﻚ
ﻣﺎ ﺍﻧﻄﻴﻨﺎﻩ ﺧﻠﺼﺖ ﺍﻟﺴﺎﻟﻔﺔ ﻳﺮﻭﺡ ﻳﺸﻮﻑ ﻧﺼﻴﺒﺔ
- ﻳﻤﺔ ﺍﻧﻲ ﺍﺷﻮﻓﻪ ﺧﻮﺵ ﺭﺟﺎﻝ ﻭﺟﻪ ﺳﻤﺢ ﻭﺍﻟﻠﻪ ﻣﻮ ﻣﺜﻞ ﻣﺎ ﻣﺘﺨﻴﻠﺔ
ﺳﺎﻟﻔﺔ ﺷﺮﺑﺔ ﻗﺪﻳﻤﺔ ﺣﻴﻞ
- ﻟﻮ ﺧﻮﺵ ﺭﺟﺎﻝ ﻳﺤﺘﺮﻣﻨﺎ ﻣﻦ ﺭﻓﻀﻨﺎﻩ ﻣﺎ ﻳﻮﻛﻔﺞ ﻳﻢ ﺑﺎﺑﺞ ﻫﺎﻱ ﺳﻮﺍﻳﺔ ﺷﺨﺺ ﺧﺎﻳﻒ ﻋﻠﻴﺞ؟ !
- ﻳﻮ ...
- ﺍﺵ ﺍﺷﺒﻴﺞ ﻭﻟﺞ ﻣﻌﻤﻴﺔ
ﺷﺘﺘﺮﺟﻴﻦ ﻣﻦ ﻭﺍﺣﺪ ﺩﺧﻞ ﻣﻨﻜﺮ ﻟﻤﻌﺪﺗﻪ
ﺑﺎﺟﺮ ﻋﻜﺒﺔ ﻳﺮﺟﻊ ﻳﺮﺍﻫﻖ ﺑﻌﻤﺮ ﺍﻻﺭﺑﻌﻴﻦ
- ﻻ ﻣﺎﻣﺎ ﻻ
- ﻓﺮﺿﺎً ﺭﺟﻊ
ﺗﺎﺧﺬﻳﻦ ﻭﺍﺣﺪ ﺑﻴﻪ ﺍﺣﺘﻤﺎﻻﺕ ﻭﻣﻴﻮﻝ ﻗﺪﻳﻢ ﻭﺍﻧﺖ ﺑﺖ ﺍﻻﺷﺮﺍﻑ
ﻭﺑﻌﺪﻳﻦ ﺍﻧﻲ ﻣﺎ ﻣﺮﺗﺎﺣﻪ ﺍﻟﻪ
ﻻ ﺷﻬﺎﺩﺓ ﻻ ﺛﻘﺎﻓﺔ ﺍﺷﻠﻮﻥ ﻳﺮﺑﻲ ﺍﻭﻻﺩﻩ؟
- ﻳﻤﺔ ﺍﻧﺘﻢ ﻛﻠﻜﻢ ﻛﻠﺶ ﺗﺘﺄﺛﺮﻭﻥ ﺑﺎﻟﺴﻴﺪ ﻟﻮ ﻣﺎﻫﻮ ﻣﺎ ﻛﺎﻥ ﺳﺄﻟﺘﻮ ﺍﺻﻼ ﻋﻨﻪ ﻛﺎﻥ ﺍﻛﺘﻔﻴﺘﻮ ﻫﻮ ﺍﺑﻦ ﺧﺎﻝ ﺷﻬﺪ
- ﺍﻟﺴﻴﺪ ﻣﺎ ﺿﺮﺏ ﺍﻳﺪ ﺍﺑﻮﺝ ﻳﺮﻓﺾ
- ﺑﺲ
ﺯﺟﺮﺗﻨﻲ ﻭﻛﺎﻟﺖ
- ﻫﻢ ﺭﺍﺡ ﺗﻌﺪﻳﻦ ﻭﺍﺻﻔﻴﻦ ﺍﻟﻲ ﻣﺜﻞ ﻣﺎ ﺳﻮﻳﺘﻲ ﻭﻳﻪ ﺍﺧﺘﺞ ﺍﻟﻠﻪ ﻳﺮﺣﻤﻬﺎ ﻟﺨﺎﻃﺮ ﻫﺬﺍ ﺧﻠﻴﻞ
ﺳﻜﺘﺖ ﻭﺍﺗﻌﺠﺒﺖ ﻣﺤﺘﺎﺭﺓ
- ﺍﺧﺘﺞ ﺳﻮﻟﻔﺖ ﺍﻟﻲ ،ﺷﺼﻴﺮ ﻭﻳﺎﻫﺎ ﺑﻨﻴﺘﻲ ﺗﺠﻴﻠﻲ ﺗﻠﺠﺄ ﺍﻟﻲ ﺗﺸﻜﻴﻠﻲ
ﺳﻮﻟﻔﺖ ﺍﻟﻲ ﺍﺷﻠﻮﻥ ﺍﺧﺘﻬﺎ ﺍﻟﺼﻐﻴﺮﺓ ﺍﺟﺎﻭﺯﺕ ﻋﻠﻴﻬﺎ
- ﻣﺎﻣﺎ ﺍﻧﻲ
- ﻣﺎ ﻃﻴﺒﺘﻲ ﺧﺎﻃﺮﻫﺎ
ﺃﻇﻠﻤﺖ ﻣﻼﻣﺤﻲ
- ﻫﻲ ﺍﻟﻲ ﺑﺎﺩﺭﺕ ﻭﻳﺎﺝ ﺑﻌﺪ ﺗﻄﺎﻭﻟﺞ ﻋﻠﻴﻬﺎ
ﻫﺰﻳﺖ ﺭﺍﺳﻲ ﻭﺑﺼﻮﺕ ﺑﺎﻛﻲ ﺟﺎﻭﺑﺖ
- ﻛﻨﺖ ﺿﺎﻳﺠﻪ ﻣﻦ ﺗﺪﺧﻞ ﺯﻭﺟﻬﺎ
ﺑﺲ ﺍﻛﻴﺪ ﻟﻮ ﻣﺎ ﻫﻲ ﻣﺒﺎﺩﺭﺓ ﺃﻧﻲ ﺃﺑﺎﺩﺭ ﺑﺲ ﻳﺼﻔﻰ ﺑﺎﻟﻲ
- ﺯﻭﺟﻬﺎ ﺍﺑﻮﺝ ﺍﻟﻲ ﻳﻤﺸﻴﻪ ﻣﻮ ﻫﻮ ﺍﻟﻲ ﻳﻤﺸﻴﻪ
ﺍﺑﻮﺝ ﺍﺫﺍ ﺭﺃﻱ ﻭﺍﺣﺪ ﻣﺎ ﻳﻌﺠﺒﺔ ﻣﺎ ﻳﻤﺸﻲ ﺑﻴﻪ ﻟﻮ ﺩﻫﺮ ﻳﻠﺢ ﻋﻠﻴﻪ
ﻛﻤﺖ ﺍﺑﺠﻲ ﻭﺍﻣﺴﺢ ﺑﺪﻣﻮﻋﻲ ﺑﺒﺎﻃﻦ ﻛﻔﻲ
- ﺟﺎﻧﺖ ﻣﺜﻞ ﺍﻟﻨﺴﻤﺔ ﺍﺧﺘﺞ ﺻﺪﻳﻘﺔ ﺍﻟﻲ .
ﻛﺴﺮﺗﻨﻲ ﺭﻭﺣﺘﻬﺎ ..
ﺳﺮﻫﺎ ﻳﻤﻲ ﻣﺎ ﻳﻮﻡ ﻃﻠﻌﺘﻪ ﻏﻴﺮ ﺍﻟﻴﻮﻡ
- ﺍﺫﺍ ﺍﻧﺖ ﺗﺪﺭﻳﻦ ﻟﻴﺶ ﻣﺎ ﻛﻠﺘﻲ ﺍﻟﻲ
ﺗﺪﺭﻳﻦ ﺑﺴﺎﻟﻔﻪ ﺍﻗﺼﺪ
- ﺳﺎﻟﻔﺔ ﺧﻠﻴﻞ ...
ﺍﻧﺘﻈﺮﺗﺞ ﺗﻴﺠﻴﻨﻲ ﻣﺜﻞ ﺍﺧﺘﺞ !
ﺷﻬﻜﺖ ﺍﻧﻔﺎﺳﻲ ﺑﻄﺎﻗﺔ ﺩﻣﻮﻉ ﻭ ﻃﻠﻌﺖ ﻣﻦ ﻳﻤﻬﺎ ..
ﺭﺍﻛﻀﺔ ﻟﻐﺮﻓﺘﻲ
ﺭﻗﻴﺔ - ﺯ ﺯﻳﻨﺐ . ﻳﺎﺳﺮ ﻳﺎﺳﺮ ﻣﺸﺘﺎﻕ ﺍﻟﻲ
ﻫﻮ ﻫﻮ ﺍﻟﻲ ﻛﺎﻝ ﻛﺎﻝ
ﻓﺘﺤﺖ ﻛﻨﺘﻮﺭﻱ ﻭ ﻃﻠﻌﺖ ﺍﻟﺼﻮﺭﺓ ﺍﻟﻲ ﺍﺧﺬﺗﻬﺎ ﻣﻦ ﺍﻟﺒﻮﻣﻬﺎ
ﺍﻧﻲ ﺑﺤﻀﻨﻬﺎ ﻭﻫﻲ ﺑﺒﺪﻟﺘﻬﺎ
ﻭﻛﻌﺪﺕ ﻋﻠﻰ ﺍﻻﺭﺽ ﺍﻧﺎﺷﻎ ﻭﺍﺗﺬﻛﺮ ﻛﻢ ﻣﺮﺓ ﺻﺎﺭ ﺑﻴﻨﺎ ﺯﻋﻞ ﻭﻫﻲ ﺍﻟﻲ ﺗﺘﻐﺎﺿﺔ ﻭﻛﺄﻥ ﺷﻲ ﻟﻢ ﻳﻜﻦ . ﺍﺯﻣﺎﺗﻲ ﺍﻧﻜﺴﺎﺭﺍﺗﻲ ﻛﺎﻥ ﺻﺪﺭﻫﺎ ﺣﺎﻳﻂ ﻳﺴﻨﺪﻧﻲ ﻣﻦ ﺍﻧﺤﻨﻲ ﻋﻠﻴﻪ ﻋﺎﻃﻔﺘﻬﺎ ﺗﻤﺤﻲ ﺑﻄﻴﺒﺔ ﺍﻵﻣﻲ
" ﺗﻌﺒﻨﻲ ﻏﻴﺎﺑﺞ
ﻟﻴﺶ ﻋﻔﺘﻴﻨﻲ ﺗﻌﺎﻟﻲ ﻭﻟﻮ ﻃﻴﻒ
ﺻﻮﺭﺗﺞ ﺍﻻﺧﻴﺮﺓ ﻟﻬﺴﺔ ﻣﺤﻔﻮﺭﺓ ﺑﻌﻴﻮﻧﻲ ﻭﺍﻧﺖ ﻣﻮﺩﻋﺔ ﺑﺠﺮﻭﺡ ﺑﺨﺪﺝ
ﺩﺧﻠﺖ ﺑﺘﻮﻝ
ﻭﺑﺄﻣﺮ ﻃﻠﺒﺖ
- ﺧﺎﻟﺔ ﺍﺭﻳﺪ ﻣﻮﺯﺓ
ﺭﻓﻌﺖ ﺭﺍﺳﻲ ﺍﻟﻬﺎ ﻭﺍﻛﻔﻪ ﻛﺪﺍﻣﻲ
ﻛﻤﺖ ﻭ ﺟﺮﻳﺘﻬﺎ ﻭ ﺿﻤﻴﺘﻬﺎ ﺑﻴﻦ ﺍﺩﻳﻪ ﻭﺻﺪﺭﻱ ﺍﺷﻢ ﺑﻴﻬﺎ ﺭﻳﺤﺔ ﺍﻣﻬﺎ
- ﻛﺎﻓﻲ ﻛﺎﻓﻲ
ﻳﻼ ﻛﺎﻓﻲ ﺻﺮﺗﻲ ﺭﻗﻴﺔ
،
ﻣﺜﻞ ﻛﻞ ﻣﺮﺓ ﻣﻦ ﺧﻠﺼﺖ ﻋﻄﻠﺔ ﻧﻬﺎﻳﺔ ﺍﻻﺳﺒﻮﻉ ﻗﺎﺳﻢ ﻭﻣﺼﻄﻔﻰ ﺭﺍﺣﻮﺍ ﻟﺒﻴﺖ ﺟﺪﻫﻢ ﺍﻟﺜﺎﻧﻲ ﻭﺍﺑﻮﻫﻢ ﻭﻳﺎﻫﻢ ﺑﺒﻴﺖ ﺃﻫﻠﺔ ﻣﻘﻴﻢ ﻋﺠﺒﻲ ؟ ﺑﻴﺘﻪ ﻛﺒﻴﺮ ﺗﺎﺭﻛﻪ !
ﺻﺪﻳﻖ ﻭﺗﻘﻲ ﺣﺎﻭﻝ ﺍﺑﻮﻫﻢ ﻳﻀﻤﻬﻢ ﻭﻳﻪ ﺍﺧﻮﺗﻬﻢ ﺑﺲ ﺟﺎﺑﺖ ﻧﺘﻴﺠﺔ ﻋﻜﺴﻴﺔ ﻭﻳﺎﻫﻢ ﺻﺎﺭﻭ ﻋﻨﻴﻔﻴﻦ ﺑﺒﻴﺖ ﺟﺪﻫﻢ ﻏﻴﺮ ﻣﺘﺄﻟﻔﻴﻦ ﻭﻳﺎﻫﻢ، ﺭﺟﻌﺘﻬﻢ ﺍﻧﻲ ﺍﻟﻲ ﻭ ﺳﺠﻠﺘﻬﻢ ﺭﻭﺿﺔ ﻭ ﺑﺘﻮﻝ ﻣﺎ ﺗﻘﺒﻞ ﺗﺮﻭﺡ ﻟﺒﻴﺖ ﺟﺪﻫﺎ ﺗﺒﻘﻰ ﻳﻢ ﺍﻣﻲ ﻣﻦ ﺍﺭﻭﺡ ﻫﻲ ﻣﺎ ﺩﺍﻭﻣﺖ ﺍﻟﺴﻨﺔ ﺍﻳﺪﻫﺎ ﺍﻟﻴﻤﻨﻰ ﺑﻌﺪﻫﺎ ﻋﻠﻰ ﺍﻟﻌﻼﺝ ﺍﻟﻄﺒﻴﻌﻲ ﻭ ﻋﺒﻮﺩﻱ ﺍﺍﺍﻩ ﻳﺎ ﻋﺒﻮﺩﻱ ﺍﺧﻠﻴﻪ ﻳﻢ ﺭﻗﻴﺔ ﺑﺲ ﻧﺎﺭ ﺍﻇﻞ ﻋﻠﻴﻪ ﻭﺍﺟﻴﻪ ﺑﻠﻬﻔﺔ ﺍﻟﻪ ...
ﻟﺤﺪ ﻣﺎ ﺭﻗﻴﺔ ﺁﻥ ﺁﻭﺍﻥ ﺭﻭﺣﺘﻬﺎ ﻟﺒﻴﺘﻬﺎ ﻛﻤﻞ ...
︎▪ ﺭﻗﻴﺔ
( ﻣﻼﺣﻈﺔ ﺣﺪﻳﺚ ﺍﻟﻨﻔﺲ ﺭﻗﻴﺔ ﻣﺎ ﺗﻌﻴﺪ ﺑﺎﻟﻜﻠﻤﺎﺕ )
ﺯﻳﻨﺐ ﺗﻜﻮﻱ ﺑﺸﻌﺮﻱ ﻭﺍﻧﻲ ﺍﺗﻮﺟﻊ ﺷﻌﺮﻱ ﻃﻮﻻﻥ ...
- ﺁﻱ ﺁﻱ ﺣﺒﺎﺑﺔ ﺣﺒﺎﺑﺔ ﻋﻠﻰ ﻛﻴﻒ ﺍﺳﺤﺒﻲ ﺃﺳﺤﺒﻲ
- ﺍﺵ ﺗﺘﻜﺮﻇﻤﻴﻦ ﻭﺍﺑﻨﺞ ﻳﺪﻓﺮ ﺑﻴﻪ ﻳﺪﺍﻓﻊ ﺍﻟﺞ ﻫﻮ ﺑﺲ ﻫﺬﺍ ﺍﻟﻲ ﻣﺤﺼﻠﺘﻪ ﻣﻨﻜﻢ ﺍﻧﻲ
ﻭﺧﺮ ﻭﻟﻚ ﻻ ﺍﺟﻮﻱ ﺍﻣﻚ
ﺍﻣﻲ - ﻋﺒﺎﻟﺔ ﺗﺄﺫﻳﻦ ﺑﺄﻣﻪ ﻷﻥ ﺗﺘﺄﻭﻩ
ﺍﻣﻲ ﻛﺎﻋﺪﺓ ﻛﺮﺳﻴﻬﺎ ﻭﺗﺒﺎﻭﻉ ﺍﻟﻨﺎ ..
ﻣﺸﺘﺮﻳﺘﻠﻲ ﺯﻳﻨﺐ ﺛﻮﺏ ﻧﻴﻠﻲ ﻭ ﺣﻄﺘﻠﻲ ﻣﻜﻴﺎﺝ ﺧﻔﻴﻒ ﻭ ﻟﺒﺴﺖ ﺑﻮﺷﻴﺘﻲ ﻭﻃﻠﻌﺖ ﻣﺎﺧﺬﻩ ﻋﻠﻲ ﺑﺄﻳﺪ ﻭﺑﺠﻨﻄﻪ ﺻﻐﻴﺮ ﺑﺎﻻﻳﺪ ﺍﻟﺜﺎﻧﻴﺔ ﺍﻟﻜﺒﺎﺭ ﻭﺩﻳﺘﻬﻦ ﻗﺒﻞ ﻳﻮﻡ
ﻳﺎﺳﺮ ﻛﺎﻋﺪ ﻭﻳﻪ ﻣﺮﺗﻀﻰ ﻳﻨﺘﻈﺮﻧﻲ ﺍﺧﺬﻧﻲ ﻭﺭﺣﻨﺎ ﻟﺒﻴﺘﻨﺎ ﻛﺎﻧﺖ ﺍﻟﺪﻧﻴﺎ ﻟﻴﻞ ﻭﻣﺎ ﺟﺎﺏ ﺍﺧﺘﻪ، ﺑﺎﺟﺮ ﺍﻟﺼﺒﺢ ﻳﺠﻴﺒﻬﺎ
ﺗﻨﺤﺲ ﻋﻠﻲ ﻣﻦ ﻃﻠﻌﻨﺎ ﻭﻇﻞ ﻳﺒﺠﻲ
- ﻳﺎﺳﺮ ﺭﻭﺣﻲ ﻟﻠﻐﺮﻓﺔ ﻧﻴﻤﻪ
ﺑﺪﻟﺖ ﺍﻟﻪ ﻭ ﺑﺪﻟﺖ ﺍﻟﺜﻮﺏ ﺑﺜﻮﺏ ﻧﻮﻡ ﻣﻠﻮﻥ ﻛﺮﻳﻤﻲ ﻓﺎﺗﺢ ﺳﺘﻦ ﺑﺼﺪﺭ ﻛﻴﺒﻮﺭ
ﻋﻼﻭﻱ ﻇﻞ ﻳﻠﻌﺐ ﺑﺸﻌﺮﻱ
- ﻛﺎﻓﻲ ﻛﺎﻓﻲ ﻛﻄﻌﺘﻪ ﻛﻄﻌﺘﻪ
- ﻭﻟﻚ ﻋﻮﻑ ﺷﻌﺮ ﺍﻣﻚ ..
ﺷﻔﺘﻪ ﺩﺧﻞ ﺍﺧﺬ ﻣﻼﺑﺲ ﻭﻃﻠﻊ ﻟﺒﺮﺓ ..
ﺭﺟﻌﻠﻲ ﺑﺴﻴﺖ ﺑﻴﺘﻲ
ﺷﺎﻝ ﻋﻠﻲ ﺍﻟﻨﺎﻡ ﺣﻄﺔ ﻋﻠﻰ ﻓﺮﺍﺷﻪ ﺑﺎﻻﺭﺽ .
ﺍﻧﻲ ﺭﺣﺖ ﺍﻋﺪﻝ ﺷﻌﺮﻱ ﻭﺍﻋﻴﺪ ﺗﻤﺸﻴﻄﻪ ..
ﺣﻀﻨﻲ ﻳﺎﺳﺮ ﻣﻦ ﺧﻠﻒ ﻻﺯﻡ ﺧﺼﺮﻱ
- ﻋﻮﺩﺓ ﻣﻴﻤﻮﻧﺔ
- ﺷﻨﻮ ﺷﻨﻮ ﻳﻌﻨﻲ ﻣﻴﻤﻮﻧﻪ ﻫﺎ ﻫﺎ
ﺃﺑﺘﺴﻢ ﻭﻫﻮ ﺩﺍﺭﻧﻲ ﻋﻠﻴﻪ ﻭﻫﻮ ﻳﺤﻂ ﺷﻌﺮﻱ ﻭﺭﺓ ﻇﻬﺮﻱ ﻭﻳﺒﺎﻭﻉ ﻟﻮﺟﻬﻲ ﺟﺎﻭﺏ
- ﻳﻌﻨﻲ ﺍﻟﻄﻴﺒﺔ ﺍﻟﻤﺒﺎﺭﻛﺔ
- ﻫﺎ ﻫﺎ ﻓﻬﻤﺖ ﻓﻬﻤﺖ
- ﺑﺎﺑﺎ ﺑﺎﺑﺎ ﺿﺎﻳﺞ ﺿﺎﻳﺞ ﺗﺮﻯ
ﻷﻥ ﻷﻥ ﻋﻔﺘﻪ ﻋﻔﺘﻪ
ﻻﻥ ﻳﺤﺒﻨﻲ ﻭ ﻭ ﺗﻌﻠﻖ ﺗﻌﻠﻖ ﺑﻴﻪ ﻭ ﻭ ﻭ ﻋﻠﻲ
ﻛﻠﺖ ﻫﻴﺞ ﻷﻥ ﻣﺎﻣﺎ ﻛﺎﻟﺖ ﺍﻟﻲ ﻭ ﻭﺻﺘﻨﻲ ﺍﺑﺮﺭ ﺳﺒﺐ ﻋﺪﻡ ﻭﺟﻮﺩ ﺑﺎﺑﺎ ﺍﻟﻴﻮﻡ ﻫﻮ ﺻﺪﻙ ﺿﺎﻳﺞ ﻭﺍﻟﺼﺒﺢ ﻛﺎﻝ ﺍﻟﻲ ﻳﺠﻲ ﻳﻮﻡ ﻭﻳﺎﺧﺬﺝ ﺣﺘﻰ ﻣﻦ ﺣﻴﻨﺎ ﺍﺫﺍ ﺭﺟﻌﺘﻲ ﺑﻌﺪ ﻣﺎ ﺍﻛﺪﺭ ﺍﺟﺒﺮﻩ
ﻭﺗﻌﻮﺩﺕ ﻋﻠﻰ ﻛﻌﺪﺗﺞ ﻳﻤﻨﺎ ﺑﺎﻟﻲ ﻣﺮﺍﺡ ﻳﺮﺗﺎﺡ ﻭﺍﻧﺖ ﺑﻌﻴﺪﻩ ﻋﻨﻲ
ﺣﻀﻨﻲ ﻳﺎﺳﺮ ...
ﻭﺍﻧﻲ ﺍﺷﻢ ﺑﻴﻪ ﺭﻳﺤﺔ ﺣﻨﻴﻨﻪ ﻣﺜﻞ ﺑﺎﺑﺎ ﻟﺰﻣﺘﻪ ﻣﻦ ﻓﺎﻧﻴﻠﺘﻪ ﺣﻴﻞ
︎▪ ﻳﺎﺳﺮ
- ﺧﻼﻓﺞ ﺭﺯﻗﻲ ﻗﻞ ﺣﺘﻰ ﻧﻔﺴﻴﺘﻲ ﺩﻭﻣﻬﺎ ﻣﺘﻜﺄﺑﻪ ﻣﺼﺎﻳﺐ ﻭﺣﻠﺖ ﻋﻠﻴﺔ ﻣﻦ ﺷﻴﻠﺘﻲ ﻣﻦ ﺍﻟﻤﺸﺨﺎﺏ ﻭﺍﻧﻬﺠﺎﻡ ﺑﻴﺘﻲ ﻭﺍﻫﻮﺍﻱ ﺳﻮﺍﻟﻒ ﻣﻦ ﻋﻔﺘﻴﻨﻲ ﺻﺎﺭﺕ
- ﺍﻧﻲ ﺍﻧﻲ ﺷﻌﻠﻴﻪ ﺷﻌﻠﻴﻪ
- ﺍﻧﺖ ﺣﺒﺔ ﺑﺮﻛﺔ
ﻣﺎ ﺟﺬﺏ ﺍﺑﻮﺝ ﻣﻦ ﻟﻘﺒﺞ ﺑﺮﻛﺔ ﺗﺤﻞ ﻭﻳﻦ ﻣﺎ ﺭﺍﺣﺖ
ﺧﺮﺯﺓ ﺭﺯﻕ ﻭﻋﺎﻓﻴﺔ ﻋﻠﻰ ﺷﻜﻞ ﻣﺮﺓ
- ﻣﺎ ﻣﺎ ﻓﻬﻤﺖ ﺷﻨﻮ ﺥ ﺧﺮﺯﺓ
- ﺍﻧﻲ ﺍﻛﻠﺞ ﻣﻌﻨﺎﻫﺎ
ﺣﻄﻴﺖ ﺍﻳﺪﻱ ﻋﻠﻰ ﻣﺘﻨﻬﺎ ﻭ ﺭﺣﻨﺎ ﻟﻠﺴﺮﻳﺮ ﻛﻌﺪﺗﻬﺎ ﺑﺤﻀﻨﻲ ﻭﺷﻌﺮﻫﺎ ﺍﻟﻤﺴﺪﻝ ﻋﻠﻰ ﻇﻬﺮﻫﺎ ﻃﺎﺥ ﺑﺼﺪﺭﻱ
- ﺭﺟﻌﺖ ﻭﺭﺟﻌﺖ ﺍﻻﺳﺌﻠﺔ ﻭﺍﻻﺟﻮﺑﺔ
- ﺑﻌﺪ ﻣﺎ ﻣﺎ ﺃﺳﺎﻝ ﻻ ﻻ ﺍﺿﻮﺝ ﺍﺿﻮﺝ
- ﻻ ﺍﻧﺖ ﺃﺳﺄﻟﻴﻦ ﻭﺍﻧﻲ ﻣﺠﺒﻮﺭ ﺍﺟﺎﻭﺏ
- ﻟﻴﺶ ﻟﻴﺶ ﻣﺠﺒﻮﺭ ﻣﺠﺒﻮﺭ ﺍﻧﻲ ﻣﺎ ﻣﺎ ﺍﺿﺮﺑﻚ !
- ﻫﻬﻬﻬﻬﻬﻪ ، ﺣﻼﺗﺞ ﺃﻃﻜﻴﻨﻲ ،
ﻣﺠﺒﻮﺭ ﻷﻧﺞ ﺑﺘﻲ
ﺍﻧﻪ ﺗﻌﻬﺪﺕ ﻷﺑﻮﺝ
- ﺍﻧﺖ ﺍﻧﺖ ﺭﺍﺡ ﺭﺍﺡ ﺗﺮﺟﻊ ﻣﺮﺗﻚ ﻣﺮﺗﻚ ﺫﻳﺞ ﻣﻮ ﻣﻮ
- ﻭﻳﻦ ﺍﺭﺟﻌﻬﺎ ﻫﻲ ﺑﻌﺼﻤﺘﻲ
- ﻷﻫﻠﻪ ﺑﻌﺪ ﺭﺟﻌﺖ ﺍﻧﻲ ﺍﻧﻲ ﺷﺴﻮﻱ ﺑﻴﻬﺎ ﺑﻴﻬﺎ
- ﻫﺎﺍﺍ
ﺑﺎﻭﻋﺖ ﺍﻟﻬﺎ ﻣﺘﻔﺎﺟﺄﺓ
ﺑﺎﻋﺪﺕ ﺣﻮﺍﺟﺒﻬﺎ ﻭﻛﺎﻟﺖ ﺑﺒﺮﺍﺀﺓ
- ﻣﺎ ﺍﺭﻳﺪﻫﺎ ﺍﻧﻲ ﺍﻧﻲ ﺍﻏﺎﺭ ﻣﻨﻬﺎ
- ﺍﻫﺎ
- ﻳﺎ ﻋﺰﺓ
- ﺷﻜﻮ ﺭﻗﻴﺔ
- ﺍﻧﻲ ﻛﻠﺖ ﺍﻟﻚ
ﺍﻧﻲ ﺍﻧﻲ ﺍﻏﺎﺭ ﺍﻏﺎﺭ
ﺯﻳﻨﺐ ﺯﻳﻨﺐ ﻭﺻﺘﻨﻲ ﻣﺎ ﺍﻛﻮﻝ ﻣﺎ ﺍﻛﻮﻝ
ﻳﺎ
ﻋﻀﺖ ﺍﺻﺒﻌﻬﺎ ﻭﺍﻧﻪ ﺻﺎﻓﻦ ﺍﻋﻠﻴﻬﺎ ﺣﻴﻞ ﻣﺸﺘﺎﻕ ﻟﺮﻭﺣﻬﺎ ﺍﻟﻄﻴﺒﺔ ﻭﻟﻌﺎﻟﻤﻬﺎ ﺍﻟﺒﺮﻳﺊ
ﺣﺒﻲ ﺍﻟﻬﺎ ﻣﻮﺷﻮﻡ ﺑﺼﺪﺭﻱ ﺣﺐ ﻓﻮﻙ ﺍﻟﺸﻬﻮﺍﺕ ﻭﺍﻟﻤﺼﺎﻟﺢ ﺍﻟﺠﺴﺪﻳﺔ ﻛﻨﺖ ﺑﺲ ﺍﺭﻳﺪﻫﺎ ﺑﺤﻴﺎﺗﻲ ﺍﺿﺎﻓﺔ ﻣﻬﻤﺔ ﺟﻨﻬﺎ ﺟﺰﺀ ﻣﻦ ﻋﺎﺋﻠﺘﻲ ﺍﻻﺻﻠﻴﺔ ﺟﻨﻬﺎ ﺑﺖ ﻣﺨﻠﻔﻬﺎ ،ﺩﻣﻲ ﻳﺮﻑ ﺍﻟﻬﺎ ﻭﻳﺮﺃﻑ ﺍﻋﻠﻴﻬﺎ
،
ﺛﺎﻧﻲ ﻳﻮﻡ ﺟﺒﺖ ﺍﺧﺘﻲ ﻳﻤﻬﺎ ﻫﻲ ﻭﺷﻬﺪ ﻣﻘﺮﺑﻬﺎ ﻣﻦ ﺑﻴﺖ ﺭﺟﻠﻬﺎ
ﺷﻬﺪ ﻣﺘﻐﻴﺮﺓ ﺣﻴﻞ ﻭﺍﺣﺲ ﺍﻟﺤﻤﻞ ﻳﺴﺤﺐ ﻣﻦ ﻃﺎﻗﺘﻬﺎ ،ﻭﺿﻌﻴﻔﺔ ﺑﺪﻥ ﻭﺣﺎﻝ
ﻭﺑﺪﺕ ﺳﻮﺍﻟﻒ ﻣﻦ ﻧﻮﻉ ﺧﺎﺹ ﺍﺻﻴﺮ
ﻏﻴﺮﺓ ﻣﻦ ﺍﻟﻄﺮﻓﻴﻦ
ﻳﺎﺳﻤﻴﻦ ﺗﺤﺴﺐ ﻣﺮﺍﻋﺎﺗﻲ ﻟﺮﻗﻴﺔ ﺣﺐ ﻗﻮﻱ
ﻭﻫﻮ ﺍﻟﺤﻘﻴﻘﺔ ﺍﻧﻪ ﺍﺣﺐ ﻳﺎﺳﻤﻴﻦ ﻭﻗﻮﺗﻬﺎ ﺍﺣﺒﻬﺎ ﻛﻤﺮﺓ ﻣﺮﺗﻲ ﺍﺧﺬ ﺑﺮﺍﻳﻬﺎ ﻣﺘﻌﻤﻠﺔ ﺗﻌﺮﻑ ﺗﺒﺮﺩ ﮔﻠﺒﻲ ﻣﻦ ﻣﻬﻤﻮﻡ ﺟﺰﺀ ﻣﻬﻢ ﺑﺤﻴﺎﺗﻲ
ﻭ ﺭﻗﻴﺔ ﻛﺠﺰﺀ ﻣﺴﺆﻭﻝ ﻋﻨﻪ ﻭﻣﻦ ﺩﻣﻲ ﻫﻲ ﻭﻋﻠﻲ ﻧﻔﺴﻲ ﻭﺍﺭﻳﺪﻫﻢ ﻳﻤﻲ ﻟﻠﺪﻭﻡ
ﻣﺸﻴﺖ ﺍﻟﺤﻴﺎﺓ ﻣﺮﺓ ﺍﺻﺪ ﻭﻣﺮﺓ ﺍﺭﺩ ﻭ ﻣﺮﺍﺕ ﺍﺗﻐﺎﺿﻰ
︎▪ ﺯﻳﻨﺐ
ﺳﻮﻳﻨﺎ ﺧﻂ ﻭﻟﻤﻴﻨﺎ ﺑﻨﺎﺕ ﻭﺍﻟﻲ ﺳﻮﻩ ﻫﺎﻱ ﺍﻟﻔﻜﺮﺓ ﺧﻂ ﺧﺎﺹ ﺑﻴﻨﺎ ﻧﻮﺭ ﻭﻟﻤﺘﻨﺎ ﻛﻴﺔ ..
ﺻﺤﻴﺢ ﺍﺗﺄﺧﺮ ﺑﺎﻟﺮﺟﻌﺔ ﻻﻥ ﻳﻔﺮ ﺍﻛﺜﺮ ﻣﻦ ﺣﻲ ﺑﺲ ﺍﻓﻀﻠﻲ ﻭﺍﻣﻦ .. ﻭﺑﺎﺑﺎ ﻛﻞ ﻣﺎ ﺍﻛﺒﺮ ﺍﺣﺴﺔ ﻳﺮﻓﻊ ﻋﻨﻲ ﻗﻴﻮﺩ
ﻣﺮﺍﺕ ﺑﺎﻟﺴﺘﺔ ﺍﺩﺧﻞ ﺍﻟﺒﻴﺖ ﺍﺫﺍ ﻃﻠﻌﻨﺎ ﻣﺘﺄﺧﺮﻳﻦ ﻭﻣﺮﺍﺕ ﺑﺎﻟﺨﻤﺴﺔ ﻭﻫﻠﻴﺎﻡ ﺑﺎﻻﺭﺑﻌﺔ ﺍﻓﻮﺕ ﻧﺺ ﺍﻟﻤﺤﺎﺿﺮﺓ ﺍﻻﺧﻴﺮﺓ ﻣﺎ ﺍﺭﻳﺪ ﺃﺗﺄﺧﺮ ﻋﻠﻰ ﺍﻻﻃﻔﺎﻝ ﻭﺍﻣﻲ ﻭﺣﺪﻫﺎ ...
ﻭﻛﻞ ﻋﺼﺮﻳﺔ ﺍﻧﺰﻝ ﺑﻴﻬﺎ ﺧﻠﻴﻞ ﻭﺍﻛﻔﻠﻲ ﻳﻢ ﺑﻴﻦ ﻳﺎﺳﺮ ﺑﻴﻮﻡ ﺭﺣﺖ ﻭﻳﺔ ﻣﺮﺗﻀﻰ ﻟﻠﺪﻭﺍﻡ ﺍﺑﻮ ﺍﻟﺨﻂ ﺍﻋﺘﺬﺭ ﻋﻄﻞ ﺑﺴﻴﺎﺭﺗﻪ ﺑﺎﻟﻜﻮﺓ ﺍﺟﺎﻧﻲ ﻻﻥ ﺑﺎﻝ١ ﺍﻟﻈﻬﺮ ﻫﻮ ﺑﺎﻟﺪﻭﺍﻡ ﺧﻄﻴﺔ
ﻭﺑﺎﻟﺮﺟﻌﺔ ﺧﺎﺑﺮﺗﻬﻢ ﻗﺒﻞ ﻣﺎ ﺍﻃﻠﻊ ﺑﻮﻗﺖ ..
ﻛﺎﻟﻮ ﺭﺍﺡ ﻳﺠﻲ ﺍﺑﻮ ﻣﺼﻄﻔﻰ ﻳﺎﺧﺬﺝ ﻣﺮﺗﻀﻰ ﻃﺎﻟﻊ ﻭﻳﻪ ﻣﺮﺗﻪ .. ﻭﺍﺑﻮ ﻣﺼﻄﻔﻰ ﻳﻤﻨﺎ ﻳﺸﻮﻑ ﺟﻬﺎﻟﺔ
ﺗﻀﺎﻳﻘﺖ ﻣﻦ ﺍﻟﻤﻮﻗﻒ ﺑﺲ ﺷﺴﻮﻱ ﺑﺎﺑﺎ ﺍﺷﻮﻛﺖ ﻳﺠﻴﺐ ﺳﻴﺎﺭﺓ ﺑﺪﻝ ﺍﻟﻲ ﺑﺎﻋﻬﺎ ﻣﺎ ﺍﺩﺭﻱ
ﺗﻔﺄﺟﺎﺕ ﻣﻦ ﺟﺎﻱ ﻭﻳﺎﻩ ﻋﺒﺪ ﺍﻟﻠﻪ ﻭ ﺻﺪﻳﻖ ﻭﻗﺎﺳﻢ ﻭﻳﺎﻩ
ﺳﻠﻤﺖ ﻭﺻﻌﺪﺕ ﺑﺎﻟﺨﻠﻒ
ﻭﻃﻠﻌﺖ ﻋﺒﻮﺩﻱ ﻣﻦ ﺍﻟﻬﺰﺍﺯ ﻣﺎﻟﺘﻪ ﻭﺣﻄﻴﺘﻪ ﺑﺤﻈﻨﻲ ﺍﻻﻋﺒﺔ ...
ﺍﻟﺴﻴﺪ ﻛﺎﻝ
- ﻇﻞ ﻳﺒﺠﻲ ﻭﺑﺲ ﺍﻣﺞ ﻭﺍﺑﻮﺝ ﺑﺎﻟﺒﻴﺖ ﻳﺘﻌﺐ ﺍﻣﺞ ﻓﺠﺒﺘﻪ ﻭﻳﺎﻱ ..
- ﺍﻓﻜﺮ ﺍﺣﻄﺔ ﺑﺤﻀﺎﻧﺔ
ﺑﺲ ﺍﻧﻲ ﻣﺎ ﺍﻋﺮﻑ ﻣﻜﺎﻥ ﻛﻮﻥ ﺍﻣﻦ ﻭ ﺛﻘﺔ
- ﻣﺪﻳﺮﺓ ﺭﻭﺿﺔ ﺍﻟﻮﻟﺪ ﺗﺮﺓ ﺍﻋﺮﻓﻬﺎ ﻣﻌﺮﻓﺔ ﺷﺨﺼﻴﺔ ﻭﺯﻣﻴﻠﺘﻲ ( ﺍﻡ ﻣﺤﻤﻮﺩ ) ﺍﺻﻴﺮ ﺍﺧﺘﻬﺎ ﻭ ﺛﻘﺔ ﻭﺑﻴﻬﺎ ﺣﻀﺎﻧﻪ ﺗﺮﺓ ﻭﺣﺘﻰ ﺑﻴﻬﺎ ﺩﻭﺍﻡ ﻣﺴﺎﺋﻲ ..
ﺍﻧﻲ ﻭﻳﺎﻙ ﺑﻬﺎﻱ ﺍﻟﻔﻜﺮﺓ
- ﺧﻮﺵ ﻫﺎﻱ ﻫﻲ ﻣﺪﺍﻡ ﺍﻧﺖ ﺍﺗﻌﺮﻓﻴﻬﻢ ﺧﻞ ﺃﺳﺠﻠﺔ
- ﺑﺲ ﻋﺒﻮﺩ ﻣﻮ ﻣﺘﺄﻟﻒ ﺧﺎﻑ ﻣﺎ ﻳﺘﻌﻮﺩ
ﻋﻠﻴﻬﻢ ..
- ﺑﻠﻜﺖ ﻳﺘﻌﻮﺩ
- ﺍﻟﻠﻪ ﻛﺮﻳﻢ
ﺍﻧﺘﻬﻰ ﺍﻟﻜﻼﻡ ﺑﻴﻨﺎ ..
ﺑﻬﺎﻱ ﺍﻻﺟﻮﺍﺀ ﺍﻟﺨﺮﻳﻔﻴﺔ ﺷﻤﺲ ﺍﻝ٤ ﺍﻟﻌﺼﺮ ﺗﺨﻔﻒ ﺃﺷﻌﺘﻬﺎ ﻋﻠﻴﻨﺎ ﻭ ﺍﻟﻨﺎﺱ ﻣﺎ ﺗﻨﻘﻄﻊ ﻣﻦ ﺍﻻﻧﺘﺸﺎﺭ ﺑﻜﻞ ﻣﻜﺎﻥ ﻭﻛﻠﻌﺎﺩﺓ ﻓﻜﺮﺕ ﺑﺨﻠﻴﻞ ﺍﻛﻴﺪ ﻣﺜﻞ ﻛﻞ ﻳﻮﻡ ﺭﺍﺡ ﻳﺘﺤﺪﺍﻧﻲ، ﻭﻳﻮﻛﻒ ﻳﻢ ﺑﺎﺏ ﺑﻴﺖ ﻳﺎﺳﺮ ﺑﺤﺠﺔ ﻳﺮﻭﺡ ﻭﻳﺎﻩ ﻟﻠﺸﻐﻞ ﻭ ﻫﻮ ﺫﺍﻙ ﻭﻳﻨﻪ ﻣﺒﻴﻦ ﺟﺎﻱ ﺑﺲ ﺣﺘﻰ ﻳﻠﻤﺤﻨﻲ ﺍﻧﺰﻝ ﻣﻦ ﺍﻟﻜﻴﺔ ، ﺍﺍﻭﻩ ﺍﻟﻴﻮﻡ ﻣﺎﻛﻮ ﻛﻴﺔ
ﻭﺍﻧﻲ ﺻﺎﻋﺪﻩ ﻭﻳﺔ ﺍﻛﺜﺮ ﺷﺨﺺ ﻳﻜﺮﻩ ﺧﻠﻴﻞ
ﻭﺻﻠﻨﺎ ﻟﻔﺮﻋﻨﺎ ﻭ ﺩﺧﻠﻨﺎ ﻭﺷﻔﺘﻪ ﻭﺍﻛﻒ ﻭﻳﺎﺳﺮ ﻃﻠﻊ
ﺗﻮﻩ ﻣﻦ ﺑﻴﺘﻪ ﻭ ﺍﻧﻲ ﻣﺮﻳﺖ ﻣﻦ ﻳﻢ ﺧﻠﻴﻞ ﺑﺴﻴﺎﺭﺓ ﺍﻟﺴﻴﺪ .
ﻭﻃﻔﻞ ﺑﺤﻈﻨﻲ ﻭ ﺻﺪﻳﻖ ﺑﺎﻟﺼﺪﺭ ﻧﺎﻳﻢ ﺑﻴﻦ ﻣﺎ ﺍﺑﻮﻩ ﻳﺼﺤﻲ ﺑﻴﻪ
ﺍﻧﻲ ﻓﺘﺤﺖ ﺍﻟﺒﺎﺏ ﺍﻟﻲ ﻛﺪﺍﻡ ﺧﻠﻴﻞ ﻭﻛﻔﺘﻨﺎ ﻭﻟﻤﺤﺘﻪ ﻣﺴﺘﻨﻜﺮ ﺭﺟﻮﻋﻲ ..
ﺍﻟﺴﻴﺪ ﻭﻛﻒ ﺳﻠﻢ ﻋﻠﻰ ﻳﺎﺳﺮ ﺑﻴﻦ ﻣﺎ ﺍﻧﻲ ﺍﺧﺬﺕ ﻏﺮﺍﺿﻲ ﻣﻦ ﺍﻟﺴﻴﺎﺭﺓ ﻭﻋﺒﺪﻟﻠﻪ ﻣﺨﺮﺑﻂ ﻋﺒﺎﺗﻲ ﺗﺨﺮﺑﻂ
ﺳﻠﻢ ﺳﻼﻡ ﻗﻮﻱ ﻋﻠﻰ ﻳﺎﺳﺮ ﻭﺳﻼﻡ ﻋﺎﺑﺮ ﻋﻠﻰ ﺧﻠﻴﻞ ﻭﺍﻟﺘﻔﺘﺖ ﻋﻠﻴﻪ
- ﺟﻴﺒﻴﻪ
ﺍﺧﺬ ﻣﻨﻲ ﺍﻟﻄﻔﻞ
ﻓﻬﺖ ﺭﺟﻠﻴﻪ ﺑﺎﻟﻤﺸﻲ ﻭ ﺃﻧﻜﺴﺎﺭ ﻭﺣﺴﺮﺓ ﻧﻈﺮﺓ ﺧﻠﻴﻞ ﻋﻄﻠﺖ ﻓﻜﺮﻱ
ﻭﻋﺒﺪ ﺍﻟﻠﻪ ﺑﺠﻰ
ﻭﻛﺎﻝ ﺑﻮﺿﻮﺡ
- ﻣﺎﻣﺔ ﻣﺎﻣﺔ
ﻣﺎﺩ ﺍﺩﻳﺔ ﺍﻟﻲ
ﺍﻟﺴﻴﺪ - ﺍﺩﺧﻠﻲ ﻳﻼ
ﺻﻐﻴﺖ ﺍﻟﻪ ﻣﺜﻞ ﻣﺎ ﺍﺻﻐﻲ ﻷﺑﻮﻳﺔ ﻳﺨﻮﻑ ﻭﻋﺎﻧﻲ ﻋﻠﻰ ﺣﺎﻟﻲ ﻭﻣﺸﻴﺖ ﺷﺒﻪ ﻣﻬﺮﻭﻟﺔ ﺩﺍﺧﻠﺔ ﺑﻴﺘﻨﺎ ﻭﻗﺎﺳﻢ ﻭ ﺻﺪﻳﻖ ﻭﺭﺍﻳﺔ
ﻇﻠﻴﺖ ﺍﺩﺭﺩﻡ ﺑﮕﻠﺒﻲ ﻋﻠﻰ ﻣﺮﺗﻀﻰ ﻳﻌﻨﻲ ﻳﺪﺭﻱ ﺍﻟﻴﻮﻡ ﺍﻧﻲ ﻣﻌﺘﻤﺪﻩ ﻋﻠﻴﻪ ﺣﺒﻜﺖ ﻳﻄﻠﻊ ﻣﺮﺗﻪ ﺍﻟﻴﻮﻡ ...
ﺧﺎﺑﺮﺗﻨﻲ ﺭﻗﻴﺔ ﺿﺎﻳﺠﻪ ﺍﺗﻜﻮﻝ ﻳﺎﺳﺮ ﻳﻢ ﻳﺎﺳﻤﻴﻦ ﺍﻟﻴﻮﻡ ...
ﺑﻴﻮﻡ ﺍﻟﺠﻤﻌﺔ ﺍﻟﻌﺼﺮﻳﺔ ﺍﺟﺖ ﺍﻡ ﻣﺤﻤﺪ ﻭ ﺍﺣﻨﻪ ﻋﻠﻰ ﻋﻠﻢ ﻣﺴﺒﻖ ..
ﺩﺧﻠﻨﺎﻫﺎ ﻟﻸﺳﺘﻘﺒﺎﻝ ﻭﺍﻣﻲ ﻛﺎﻋﺪﻩ ﺑﻴﻪ ﺗﻨﺘﻈﺮﻫﺎ ﻣّﺪﺩ ﻋﻠﻰ ﺍﻟﻘﻨﻔﺔ ﻭ ﻣﻐﻄﻴﺘﻬﺎ ﻟﻨﺼﻬﺎ ﺑﺸﺮﺷﻒ
ﺍﻟﻌﻠﻮﻳﺔ ﺍﻡ ﺗﺤﺴﻴﻦ ﺳﻠﻤﺖ ﻋﻠﻰ ﺍﻣﻲ ﻭﺍﻣﻲ ﺗﻌﺬﺭﺕ ﻣﻨﻬﺎ ﻣﺎ ﺗﻜﺪﺭ ﺗﻮﻛﻒ ﻭ ﺗﻌﺬﺭﺕ ﻻﻥ ﻣﺎ ﻛﺪﺭﺕ ﻫﻲ ﺗﺮﻭﺡ ﺍﻟﻬﺎ- ﻭﺍﻟﻠﻪ ﻳﺎ ﻋﻠﻮﻳﺔ ﺣﻴﻞ ﺧﺠﻼﻧﻪ ﻣﻨﺞ
ﺍﻟﻤﻔﺮﻭﺽ ﺍﻧﻲ ﺍﻟﻲ ﺍﺟﻴﻜﻢ ﻭﺍﻧﺖ ﺟﺎﻳﺔ ﻣﻦ ﺳﻔﺮ ﻭ ﺍﺗﺤﻤﺪ ﻟﺴﻼﻣﺔ ﺍﻡ ﺭﺍﻣﻲ ( ﺑﺘﻬﺎ ﻭﺍﺧﺖ ﻣﺤﻤﺪ )
- ﻗﺎﺑﻞ ﻏﺮﺑﺔ ﺍﻟﻌﺘﺐ ﻣﺮﻓﻮﻉ ﺑﻴﻨﺎ ﻭﺍﻧﻲ ﺍﺩﺭﻱ ﺑﻮﺿﻌﺞ ﺍﻟﺼﺤﻲ ﻻ ﺗﻬﺘﻤﻴﻦ
- ﺭﻭﺣﺞ ﻃﻴﺒﺔ ﻋﻠﻮﻳﺔ
- ﺍﻧﺖ ﺷﺨﺒﺎﺭ ﺻﺤﺘﺞ ﻫﺎﻱ ﻫﻴﺞ ﺩﻭﻡ
ﻧﺎﻳﻤﺔ
- ﺍﻱ ﻭﺍﻟﻠﻪ ﻟﻮ ﻧﺎﻳﻤﻪ ﻟﻮ ﻣﺪﺩﺓ ﻣﺎ ﺍﻛﺪﺭ ﺍﻟﻤﻬﻦ
- ﺍﻟﻠﻪ ﻳﻜﻮﻥ ﺑﺎﻟﻌﻮﻥ ﺍﻟﻜﻌﺪﺓ ﻣﺎ ﺗﺮﺍﺩ
- ﺷﺴﻮﻱ ﺭﺍﺣﺖ ﻭ ﺍﺧﺬﺕ ﺻﺤﺘﻲ ﻭﻳﺎﻫﺎ .
ﺩﻣﻌﺖ ﺍﻣﻲ ﻭ ﺍﻟﻤﺮﺓ ﻇﻠﺖ ﺗﻮﺍﺳﻲ ﺑﻴﻬﺎ ..
ﺍﻧﻲ ﺭﺣﺖ ﺟﺒﺖ ﻇﻴﺎﻓﺔ ﺻﻴﻨﻴﺔ ﺑﻴﻬﺎ ﻛﻼﺹ ﻣﺎﻱ ﻭ ﺻﺤﻦ ﻓﻮﺍﻛﻪ ﻭﺻﺤﻦ ﺣﻠﻮﻳﺎﺕ ﻭ ﻋﺼﻴﺮ ﺑﺮﺗﻘﺎﻝ ﻃﺒﻴﻌﻲ
- ﺷﻨﻮ ﻫﺎﻱ ﺍﻟﺰﺣﻤﺔ
ﺍﻣﻲ - ﻗﺎﺑﻞ ﺷﺤﺎﻃﻴﻦ ﺍﺣﻨﻪ ..
- ﻫﺎﻱ ﻣﻨﻮ ﻳﺎﻛﻠﻪ ﺍﻧﻲ ﺷﻜﻞ ﻋﻨﺪﻱ ﺍﻟﺴﻜﺮ ﻳﺎ ﺍﻡ ﻋﻠﻲ ﻭﺍﻟﺼﺤﺔ ﻣﺎ ﺍﺳﺎﻋﺪ ..
ﺭﺣﺖ ﺟﺒﺖ ﺍﻟﻬﺎ ﻋﺒﻮﺩﻱ ﻭﻏﻴﻢ ﺻﺎﻳﺮ ﺷﻮ ﻳﺴﺘﻐﺮﺑﻬﺎ ﻻﻥ ﻗﻠﻴﻞ ﻳﻮﺩﻭﻩ ﻟﻬﻨﺎﻙ ﻭﻋﻰ ﻋﻠﻴﻪ ﺍﺧﺬﺗﻪ ﺑﻌﻤﺮ ﺍﻝ٥ ﺍﺷﻬﺮ ﻭﻫﺴﺔ ٩ ﺍﺷﻬﺮ ﻋﻤﺮﺓ
ﺑﻨﻬﺎﻳﺔ ﺍﻟﺰﻳﺎﺭﺓ
- ﻭﺍﻟﻠﻪ ﻳﺎ ﺍﻡ ﻋﻠﻲ ﺣﻴﺮﺓ ﻫﺎﻻﻳﺘﺎﻡ ﻇﺎﻟﻴﻦ ﺑﺎﻟﺒﻴﻮﺕ
ﻭﺍﻧﻲ ﺍﺗﺮﺧﺼﺖ ﻣﻦ ﺍﻫﻞ ﻣﺮﺕ ﺍﺑﻨﻲ ﺍﻟﻠﻪ ﻳﺮﺣﻤﻬﺎ
ﺗﻘﺼﺪ ﺍﺑﻨﻬﺎ ﺍﻟﻮﺳﻄﺎﻧﻲ ﻭﻛﺎﻟﺖ ﺍﻻﺳﺒﻮﻉ ﺍﻟﺠﺎﻱ ﻳﻌﻘﺪ ﺍﺭﻳﺪ ﺍﻟﻤﺔ ﺑﺒﻴﺘﻬﺎ
- ﺧﻮﺵ ﺍﺳﻮﻳﻦ ﻫﺬﺍ ﺍﻟﺼﺢ ﺍﻟﺮﺟﺎﻝ ﻣﻦ ﻏﻴﺮ ﻣﺮﺓ ﻳﻄﺸﺮ ﺷﻤﻠﺔ ﻫﻮ ﻭﺍﻃﻔﺎﻟﻪ
ﻭﺍﻧﻲ ﺍﻛﻮﻟﻬﺎ ﺍﻟﺞ ﺍﻟﺴﻴﺪ ﺍﺑﻮ ﻣﺼﻄﻔﻰ ﻫﻢ ﺩﻭﺭﻳﻠﺔ ﺑﺖ ﺣﻼﻝ ﺍﺗﻜﻮﻥ ﻛﺒﻴﺮﺓ ﻭ ﻭﺍﻋﻴﺔ
ﺗﺮﺍﻋﻲ ﺍﻳﺘﺎﻣﻪ ﻭﻣﺮﺧﻮﺻﺔ ﻣﻮ ﺍﻻ ﺍﺩﻭﺭ ﺳﻨﺘﻬﺎ
- ﻭﺍﻟﻠﻪ ﺟﻨﺞ ﺑﮕﻠﺒﻲ ﺑﺲ ﺍﺍﺍﺥ ﻣﻨﻪ ﻳﻜﻮﻝ ﻣﺎ ﺍﺯﻭﺝ ﻭﻻ ﺍﻛﺪﺭ ﺍﻓﺘﺢ ﺑﻴﺖ ﺑﻌﺪ
- ﺧﻄﻴﺔ
- ﺍﻱ ﻭﺍﻟﻠﻪ ﻣﻦ ﻳﻮﻡ ﻣﺎ ﺭﺍﺣﺖ ﺍﻟﻤﺮﺣﻮﻣﺔ ﻭﻫﻮ ﻳﻤﻨﺎ ﺑﻴﺘﻪ ﻣﺎ ﻳﺮﻭﺡ ﺍﻟﻪ
- ﺍﺷﻮﻳﺔ ﺍﻧﻄﻴﻪ ﻭﻛﺖ ﻭﻫﻮ ﻳﺠﻴﺞ ﻳﻄﺎﻟﺐ ﺑﻤﺮﺓ
- ﺍﻟﻠﻪ ﻛﺮﻳﻢ
ﺑﺘﻮﻝ ﻛﺎﻋﺪﻩ ﻳﻤﻲ ﻭﺗﻠﻌﺐ ﺑﺎﻻﻳﺒﺎﺩ
ﺑﺎﻭﻋﺖ ﺍﻟﻬﺎ ﺟﺪﺗﻬﺎ
- ﻣﺎ ﺗﺠﻴﻦ ﺍﺑﻮﺳﺞ ﺑﻴﺒﻲ
ﻫﺰﺕ ﺑﺮﺍﺳﻬﺎ ﺑﻼ ﺑﺘﻮﻝ
- ﺍﻟﻌﻠﻮﻳﺔ ( ﺑﺘﻮﻝ ) ﺯﻳﻦ ﻣﺘﻌﻠﻘﺔ ﺑﻴﺞ
ﺍﺑﺘﺴﻤﺖ ﻣﺎ ﺗﺪﺭﻱ ﺑﻴﻬﺎ ﺍﺷﻜﺪ ﺷﺎﻟﻌﺔ ﻛﻠﺒﻲ ﻭﻣﺮﺑﻴﺔ ﻋﻠﺔ ﺑﺴﻠﻮﻛﻬﺎ .
ﺍﻡ ﺗﺤﺴﻴﻦ - ﻳﺤﺒﻮﻥ ﺧﺎﻟﺘﻬﻢ ﺍﻭﻻﺩ ﻣﺤﻤﺪ
- ﻟﻌﺪ ﺧﺎﻟﺘﻬﻢ ﻭﺍﻟﺪﻡ ﻳﺤﻦ
ﺍﻟﻌﻠﻮﻳﺔ - ﺍﻟﻠﻪ ﻳﺴﻬﻞ ﺍﻟﻠﻪ ﻳﺴﻬﻞ !
ﺍﺗﺮﺧﺼﺖ ﻭﺍﻣﻲ ﻋﺰﻣﺘﻬﺎ ﻋﻠﻰ ﺍﻟﻌﺸﺎ ﺍﺗﻌﺬﺭﺕ ﺍﺗﺼﻠﺖ ﺍﺑﺄﺑﻨﻬﺎ ﺍﺟﺎﻫﺎ ﻭﻛﺎﻣﺖ
ﺍﻟﺤﺠﻴﺔ ﻣﻦ ﻧﻮﻉ ﺍﻟﻌﻠﻮﻳﺎﺕ ﺍﻟﺒﻴﻀﺎﺕ ﺍﻟﻲ ﻳﺘﻀﺢ ﻋﻠﻴﻬﻦ ﺍﻟﺤﻜﻤﺔ ﻭﺍﻟﺮﺟﻮﺡ ﻭﺟﻬﺎ ﻣﻠﻴﺎﻥ ﺗﺠﺎﻋﻴﺪ ﻭﻟﺒﻘﺔ ﺣﻴﻞ ﻫﻲ ﻣﺸﺮﻓﺔ ﺗﺮﺑﻮﻳﺔ ﺳﺎﺑﻘﺔ ﻋﻤﺮﻫﺎ ﻣﺘﻮﺳﻂ ﺍﻟﺴﺘﻴﻦ ﺍﺫﺍ ﻣﻮ ﺍﻛﺜﺮ
ﻧﻈﺮﺍﺗﻬﺎ ﺍﻟﻲ ﺑﻴﻬﻦ ﺍﺑﺘﺴﺎﻣﺔ ﺭﺑﻜﺘﻨﻲ ﻣﻦ ﻭﺻﻠﺘﻬﺎ ﻟﻠﺒﺎﺏ
- ﺣﻴﻞ ﺑﻴﺞ ﻟﻤﺤﺔ ﻣﻦ ﺍﻟﻤﺮﺣﻮﻣﺔ
ﺍﺑﺘﺴﻤﺖ ﺑﺤﺰﻥ ﺍﻟﻬﺎ ﻭﻫﻲ ﻇﻠﺖ ﻟﻠﺤﻈﺔ ﺗﺒﺎﻭﻉ ﻟﻮﺟﻬﻲ ﻭ ﺭﺑﺘﺖ ﻋﻠﻰ ﻣﺘﻨﻲ
- ﺍﻟﺞ ﺍﺟﺮ ﻭﺛﻮﺍﺏ ﻋﻠﻰ ﺭﻋﺎﻳﺔ ﻫﺎﻻﻳﺘﺎﻡ
ﺣﺘﻰ ﻭﺟﻬﺞ ﻧﻮﺭﺍﻧﻲ !
ﻃﻠﻌﺖ ﻭ ﺍﻧﻲ ﺭﺣﺖ ﻟﻠﻤﺮﺍﻳﺔ ﺑﺲ ﺍﺑﺎﻭﻉ ﻟﺨﻠﻘﺘﻲ ﺍﺩﻭﺭ ﻋﻠﻰ ﺍﻟﻨﻮﺭ !
ﻭﺑﻴﻮﻡ ﺭﺟﻌﺖ ﻟﻠﺒﻴﺖ ﻭﻟﻜﻴﺖ ﺍﻣﻲ ﻣﺘﻜﺪﺭﺓ
- ﻣﺎﻣﺎ ﺍﺷﺒﻴﺞ
- ﺍﺍﻭﻑ ﺍﺧﻮﺝ ﻃﻠﻌﺖ ﻣﺮﺗﻪ ﻣﺮﻳﻀﺔ ﺣﻴﻞ ﻳﻄﺎﺭﺩ ﺑﻴﻬﺎ ﺑﻴﻦ ﺍﻻﻃﺒﺎﺀ ﻭﻣﺎ ﻳﻜﻮﻝ ﺍﻟﻨﺎ
- ﻟﻴﺶ ﻭﺍﺷﻮﻛﺖ
- ﺻﺎﺭﻟﻬﺎ ﺍﻫﻮﺍﻱ ﻛﻞ ﻳﻮﻡ ﻃﺒﻴﺒﺔ
ﺑﺲ ﻣﺎ ﻳﻜﻮﻝ ﻣﺎ ﻳﺮﻳﺪ ﻳﻜﺪﺭ ﺧﺎﻃﺮﻧﺎ ﻭﻳﻘﻠﻘﻨﺎ
- ﺧﻄﻴﺔ ﺿﺠﺖ ﻋﻠﻴﻪ ﻭﺍﻧﻲ ﺍﻛﻮﻝ ﻛﺜﺮﺕ ﺭﻭﺣﺎﺗﻪ ﺍﻟﻬﻢ
،
ﺍﺗﺼﻠﺖ ﺑﺮﻗﻴﺔ ﺭﺯﻟﺘﻬﺎ ﻛﺎﻟﺖ ﻫﻮ ﻭﺻﺎﻧﻲ ﻳﻜﻮﻝ ﺯﻳﻨﺐ ﻭﺍﻣﻲ ﻣﺎ ﻋﺎﻳﺰﺍﺕ ﻫﻢ
- ﻟﻌﺪ ﺷﻮ ﺍﻣﺞ ﺩﺭﺕ ﺍﺷﻠﻮﻥ
- ﺍﻧﻲ ﻛﻠﺖ ﺍﻟﻬﺎ ﺍﻟﻬﺎ ﻓﻠﺘﺖ ﺣﺠﻲ ﺣﺠﻲ ﻭ ﺧﻠﺘﻨﻲ ﺍﻋﺘﺮﻑ ﺍﻋﺘﺮﻑ
- ﻟﻴﺶ ﻫﻠﺪﺭﺟﻪ ﺻﺤﺘﻬﺎ ﻣﻮ ﺯﻳﻨﺔ
- ﻣﺎ ﺍﺩﺭﻱ ﻣﺎ ﺍﺩﺭﻱ ﺑﺲ ﻫﻲ ﻫﻲ ﻣﺮﻳﻀﺔ
ﺑﻌﺪ ﻳﻮﻣﻴﻦ ﺭﺟﻌﺖ ﻛﺎﻟﻌﺎﺩﻩ ﻣﻦ ﺍﻟﺪﻭﺍﻡ ﺍﻣﺮ ﺑﺎﻟﺤﻀﺎﻧﻪ ﺑﺎﻟﺨﻂ ﻣﺎﻟﺘﻲ ﺍﺧﺬﻩ ﻭﺍﺭﻭﺡ ﻟﺒﻴﺘﻨﺎ ﺍﻟﻌﺼﺮ ..
ﺷﻔﺖ ﺳﻴﺎﺭﺓ ﻣﺮﺗﻀﻰ ﻭﺍﻛﻔﻪ ﺑﺒﻴﺖ ﻳﺎﺳﺮ ﻧﺰﻟﺖ ﻭﺷﻔﺖ ﻣﺮﺗﻀﻰ ﻭﻳﺎﺳﺮ ﻳﻤﺸﻮﻥ ﺑﻴﻬﺎ ﺩﺧﻠﻮﻫﺎ ﻟﻠﺴﻴﺎﺭﺓ
ﺭﺣﺖ ﻟﻤﺮﺗﻀﻰ
- ﺷﻜﻮ ﻣﺮﺗﻀﻰ
- ﻣﺎ ﺍﺩﺭﻱ ﻳﻤﻜﻦ ﺍﻟﻄﻔﻞ ﻫﻢ ﺭﺍﺡ
ﺟﺎﻥ ﺿﺎﻳﺞ ﺣﻴﻞ ..
ﻭﺭﺓ ﻭﻗﺖ ﺧﺎﺑﺮﺕ ﻛﺎﻝ ﺍﻱ ﻣﺴﻘﻄﺔ ﻭﺿﺠﺖ ﻋﻠﻴﻪ ﺣﻴﻞ ...
،
ﺍﻧﻔﺠﺮﺕ ﻭﻋﺼﺒﺖ ﻣﻦ ﺷﻔﺖ ﺑﻐﺮﻓﺔ ﻣﻘﺘﺪﻯ ﺑﺎﻛﻴﺖ ﺟﻜﺎﻳﺮ ﺍﻧﺘﻈﺮﺗﻪ ﻳﺠﻲ ﻟﻠﻴﻞ ، ﺻﻌﺪﺕ ﻟﻐﺮﻓﺘﻪ ﻭﺷﻤﺮﺕ ﺍﻟﺒﺎﻛﻴﺖ ﻋﻠﻴﻪ
- ﻫﺎﻙ ﻫﺬﺍ ﻣﺎﻟﺘﻚ
ﻧﺰ ﻣﻦ ﺣﺮﻛﺘﻲ
- ﺷﻨﻮ ﻫﺎﻱ
- ﺳﻮﺍﻟﻔﻚ ﺍﻟﺘﻌﺒﺎﻧﻪ ﻏﻴﺮ
- ﺍﺭﻭﺡ ﺍﻭﻧﺲ ﺑﺎﺑﺎ ﺑﻬﺬﺍ ﺍﻟﺨﺒﺮ
- ﻻ ﺍﻭﻛﻔﻲ
ﻭﻛﻔﻨﻲ ﻳﺘﻮﺳﻞ ﻣﺎ ﺍﻛﻮﻝ
ﻣﻦ ﻳﺄﺱ ﻣﻨﻲ ﻭﺷﺎﻓﻨﻲ ﺭﺣﺖ ﻟﻠﺪﺭﺝ
- ﻭﺍﻟﻠﻪ ﻣﺎ ﺍﺩﺧﻦ ﻣﻮ ﻣﺎﻟﺘﻲ ﺍﻟﺒﺎﺭﺣﻪ ﻳﻤﻜﻦ ﻧﺴﺎﻩ ﻳﻤﻲ ﻣﺼﻄﻔﻰ
ﺍﻟﺘﻔﺘﺖ ﻋﻠﻴﻪ
- ﺟﻨﺖ ﻭﺍﺛﻘﻪ ﻫﻮ ﻣﻮ ﺍﻧﺖ
ﺍﺍﺍﺥ ﺑﻠﻐﻪ ﺍﻧﻲ ﻋﺮﻓﺖ
ﺛﺎﻧﻲ ﻳﻮﻡ ﺍﻟﻌﺼﺮ ﺍﺟﻪ ﻳﺘﻮﺳﻞ ﻣﺎ ﺍﻛﻮﻝ ﻻﺣﺪ
ﻟﺰﻣﺘﻪ ﻣﻦ ﻃﺮﻑ ﻳﺎﺧﺘﻪ
- ﻭﻟﻚ ﺍﻧﺖ ﻛﻞ ﻋﻤﺮﻙ ١٦ ﺳﻨﺔ
ﻟﻴﺶ ﻫﺎﻱ ﺍﻟﻌﺎﺩﺓ ﺍﻟﻤﻀﺮﺓ ﺣﺘﻰ ﻣﺤﻠﻮ ﺷﻜﻠﻬﺎ ﻋﻠﻴﻚ
- ﻭﺍﻟﻠﻪ ﻗﻠﻴﻞ ﻭﺍﻛﺪﺭ ﺍﺑﻄﻞ ﻭﺍﻟﻠﻪ
- ﺗﻮﻋﺪﻧﻲ ﻣﺼﻄﻔﻰ
- ﻭﻋﺪ ﻭﺍﻟﻠﻪ
- ﻭﻋﺪ ﺭﺟﺎﻝ
- ﺍﻱ ﻭﺍﻟﻠﻪ
ﻫﺰﻳﺖ ﺭﺍﺳﻲ ﺑﺮﺿﺎ ﻭﻋﻔﺘﻪ ﻳﺮﻭﺡ ..
ﻣﺮﻥ ﺷﻬﺮﻳﻦ ..
ﻛﻨﺖ ﺍﻧﻈﻒ ﺑﺎﻟﺒﻴﺖ ﻭﺻﻌﺪﺕ ﻟﻐﺮﻓﺔ ﻣﻘﺘﺪﻯ
ﺻﺎﺭﺕ ﻛﺪﺍﻣﻲ ﻏﺮﻓﺔ ﺷﻬﺪ ﻛﻠﺖ ﺧﻞ ﺍﺩﺧﻞ ﻋﻠﻴﻬﺎ
ﺍﺩﺭﻱ ﺑﻤﺮﺗﻀﻰ ﻃﺎﻟﻊ ﻟﻬﺬﺍ ﻣﺪﻳﺖ ﺭﺍﺳﻲ ﻛﺎﻟﻌﺎﺩﻩ ..
ﺷﻬﺪ - ﻳﻌﻨﻲ ﻫﺴﺔ ﻳﺴﻮﻥ ﻣﻬﺮ ﻟﻮ ﻻ
ﺩﺧﻠﺖ ﻭﻫﻲ ﺷﺎﻓﺘﻨﻲ
ﺧﻠﺼﺖ ﻣﻜﺎﻟﻤﺔ
- ﺍﻱ ﻋﻴﻨﻲ ﻋﺪﻛﻢ ﺣﻔﻠﺔ ﻣﻨﻮ ﺭﺍﺡ ﻳﻌﺮﺱ ﻫﺎ ﻫﺎ ﺑﺲ ﻻ ﻛﻮﺛﺮ
ﺿﺤﻜﺖ
- ﻻ
- ﻟﻌﺪ ﺷﻨﻮ
ﺍﻧﻄﺮﺣﺖ ﻋﻠﻰ ﺳﺮﻳﺮﻫﺎ ﻳﻤﻬﺎ
- ﺯﻳﻨﺐ ﺑﺎﺟﺮ ﻣﻬﺮ ﺧﻠﻴﻞ !!!
ﻳﺘﺒﻊ
|