[فيتامين سي]

( الجنوب )
قالت بحده : سلمى اعطيني مفتاح بيتي الي موجود عندش

أم ياسر بقلق : نوفه تعوذي من إبليس
وشلون تأخذيها معش كذا تدرين الحين ياسر بيعصب ويمكن توقع بينه وبين أبوه زود

نوفه أخذت عباية شدن وقربت منها وساعدتها تلبس : ماعليه فيهم الآثنين ضحيت في بنتي بما فيه الكفاية بسبتهم ... الله لا جابه يوم كانت من نصيب ولدش

نور قربت من شدن وهمست لها قبل تطلع : شدن حرام ياسر وش ذنبه تخلينه والله بيزعل منش

شدن وهي مجروحه : خلي أمل تنفعه

نور عضت شفتها : آكثر وحده انتِ عارفة
وضع ياسر لا تزيديها عليه حرام والله يحبش

شدن عضت شفتها لو يحبها صدق ماتركها وراح مع أبوه ..كان سوى المستحيل مثل عادته ..قدر يسوي اشياء كثيره وقدر يكسر كلمة أبوه ...وشلون بذا الموضوع وقف عاجز ..إلا هو راضي عنه
مسكت بأمها وهي تدور الآمان اللي فقدته
ومدام أمها معاها ...ماراح تعيش تحت رحمة مبارك ولده ...
أول مادخلوا بيتهم حست بسعاده بقلبها اخيراً رجعت للمكان اللي حلمت ترجع له بس سعادتها ناقصه بدونه
طالعت أمها اللي ترحب فيها ...رجعت صاحت : يمه .....
بسرعة ضمتها نوفه وهي تهمس لها: عيون امش
وش قلت لش لا توجعين قلبش بسبته وهو لو يبيش يرجع يدورش

شدن وهي تصيح بحضنها :مقدر يمه قلبي محروق
نوفه: شدن ياروح امش صياحش ذا كله مايفيد
وابعدتها شوي وهي تمسك وجهاا بيدينها وتمسح دموعها :خليش ثقيله مثلي وصدقيني ياسر بيتصرف
هزت رأسها بطفوله : صدق يمه تتوقعين ياسر يتصرف
نوفه وهي مغبونه على الحال الي وصلت لها بنتها
الله يسامحك يامبارك ماغير قهرت قلب ذي اليتيمه
قالت بمكابره : يالله امسحي وجهش وقدامي شوفي البيت وشلون حالته شافتها رجعت تصيح همست وش قلنا ياشدن رجعت رمت نفسها بحضنها ...
رجعت ابعدتها وهي تمسكها من كتوفها :اللحين تصحين ليش قلتش ساعديني بشغل البيت صح

شدن هزت رأسها بلاااا بدون ماتتتكلم ...
رجعت ضمتها وهي تسمي عليها وتهدي عليها ....


...
@
@
@

في مجلس أبو سعود
معصب حده ..طول الوقت ينتظر أبوه يقول عن وجود شدن معاه ..مثل ماقاله بالسيارة عشان مايسمع من غيره ..عنده أمل يغير رأيه يوم يدري .. ...
بس لا جالس يسمع ...طلبات أبو سعود ولا المهر اللي طلبه ..يقال بنته بنت أمير ....وهي كلها بنت مسفر ..واللي قهره أكثر ان أبوه جالس ..يتمم على طلباته ...

مافيه عاد يمسك نفسه قال وهو عارف ان يمكن أبوه يقوم ويثور فيه : يبه قبل تتمم على طلباته لازم يكون بالصورة ترى ياعم مسفر زوجتي باقي على ذمتي وبنتك لو ربي كتب تعتبر زوجة ثانية
وأنت من قبل قلت ماترضاها عشان كذا مابي نخدعك رضيت اهلاً وسهلاً وعلى عيني ورأسي مارضيت اسمنا عادنا على البر بقوم افلح من مجلسك وتنتهي السالفة

أبو سعود بعصبيه : وش اللي تقوله ياولد واي زوجة اللي باقي على ذمتك وهو يطالع أبو ياسر الللي قاله انه طلقها ...

طالع أبوه اللي يطالعه بعصبية : زوجتي بنت منصور اللي على ذمتي وهذ العلم وصلك وعاد عندك الخيار ...

أبو سعود بعصبية وقهر طالع مبارك : وش ذا الكلام يقوله ولدك يامبارك هذا اتفاقنا من الأول

أبو ياسر وهو معصب حده من تصرف ياسر
قال وهو يتحلف فيه :والله يأبوسعود
حنا جاين وحنا نشري نسبكم ومانبي نفترق بسبب شيء انفرض علينا ولدي قدر الله زوجته حملت والحين صعب يخليها ..وغير كل شيء كان ناوي عليه
وحنا مستعدين لكل طلباتكم ومافي شيء بيقصر على بنتك ومن ناحية زوجتة الأولى لا تخاف
مالها إلا مسكن ومصرف بس هذا اللي عنده لها
....

ياسر قال وهن مقاطع كلام أبوه : لا والله يبه لها عدل بكل شيء وجهك نظره لأبو سعود مثل ماهو لبنتك ياعم بيكون لبنت منصور مثلها ..وهذا اللي عندي

قاطعه بحده : وش ذا الكلام يامبارك تسمع ولدك وش يقول وهذا وأنت قلت لي انه طلقها ومسفرها لأهل أمها ...وجيت وخطبت واللحين تقول حامل ولدك بعده يبي يعدل

ياسر وده يصفقه على كلامه وشوفة نفسه ..بس خايف من أبوه ...يكفي اللي بيصير له من اللي قاله ...بس ماقدر يمسك نفسه يوم ختم كلامه وقف بعصبيه : اي والله بعدل أنا رجال اخاف الله وباقي على زوجتي الأولى ...وطالع الجماعه اللي بالمجلس غلطت بشيء ياجماعه قولوا وله الحق لو غلطت

الكل هتف : لا والله ربي بيعاقبك لو ماصار هالشيء منك وأنت يامسفر خلك عاقل تبي تتم ذي الخطبه
ولا ماله داعي كثرة الحكي

رفع حاجب وطالع أبو سعود وهو يقول : سمعت بنفسك ماله داعي تكثر بالحكي

وقف وهو معصب وتوسط المجلس :يعز على ارد طلبكم ياجماعه بس بنتي قلتها من قبل ماتجي على ضره ولا هي بحمل مشاكل مع بنت منصور معروف بلسانها
ويالله ياجماعة الخير اقلطوو على العشاء وذي السالفة ماتت هنااااا

ياسر
لا لا لهنا مايقدر يصبر قرب منه وهو يمسكه من ياقة ثوبه: والله يابنت منصور تسوى بنتك ياقليل الخاتمة وشلون كذا تحكي عليها وأنت بوسط الرجاجيل ... بسرعة أبوه فز وبعد من الللي جالسين فكوو أبو سعود من يده ..
ياسر صرخ بقهر وهو مكتف : فكوني عليه


أبو ياسر بعصبيه : ياسر اسبقني للسياره وجهك نظره لأبو سعود والله مالك حق تجيب سيرة بنت منصور حنا جاين نخطب بنتك مالي داعي تغلط في بنتنا

طالع أبوه ماهو مصدق انه دافع عن شدن وقام بصفه توقع يمردغه قدامهم بذات بعد تهبيبه أول بالحكي وبعد بتطويل يده عليه ...الحين فعلاً عرف انه انفك من ذي السالفة بيطير من الفرحة
طالع أبوه وحبه على خشمه من سعادته انه دافع عنها : أنا بسبقك يبه للسيارة وطلع بسرعة وهوو ودها يختلي في أبو سعود ذا ويفرك بوجهه الأرض بس أبد ماعطوه فرصه ..بس بنفس الوقت ..سعادته ماتوصف انه انفك ... جلس ينتظر أبوه بالسيارة ...
كلها دقايق ...وشاف أبوه طالع وهو معصب
بسرعة نزل وسلم فوق رأسه بتوتر : يبه السموحه بس شوفة عينك رجآل شايب ولسانه طويل ..

أشر له يبعد عنه : ماهو بوقت المعاتب امش بس وطلع السياره وقفل الباب بعصبيه

ياسر عض شفته مايبيه يرجع البيت وهو معصب كذا وشدن تتأثر أكثر ...جاء بيتكلم بس سكت يوم صرخ عليه : ولا كلمة سواتك ماتنغفر هالمره

ياسر بتردد : يبه الله يهداك قلت لي بتقوله بس حسيت ان الموضوع بيتم وهو ماعنده خبر
وخفت لو يدري بعدين مثل ماقلت ويحوسنا تدري بطول لسانه وبيني وبينك يبه هالعائله مابي اناسبها من الأول وشفت وشلون قل أدبه ولا حشمنا ...
سكت مصدوم من رد أبوه

: أجل ندور غيره عشان نناسبهم ..

عض شفته هذا إلا ماحسب حسابه
زفر بقهر : يبه حالياً ماهو مستعد

قاطعه بصرخه : أكيد مانت مستعد مدام البزر لاعبه بعقلك لعب حسبي الله عليها ودي اعرف وشلون بس لعبت بحسبتك وخلتك كذا .... لدرجة ضربت الرجآل بوسط مجلسه بسبتها ولا حشمت عمره ...

ياسر بدون حس : احبها لا تنقد علي بس سكتتت يوم ابوه صرخ : وقف بسرعة الله لايبارك فيك ياللي ماتسحتي
كتم ضحكته على تحلطم أبوه : وشلون انزلك بالشارع

صرخ بعصبيه : ماهو بشغلك

ياسر : يبه

قاطعه بقهر : نزلتي نزلني بسرعة وأنا بدبر عمري

ياسر برفض : لا والله ماهو منزلك ارتاح يوم شافه سكت وماعلق أول موصلوا البيت على طول
نزل وهو شارد من أبوه خايف منه .بس ارتاح يوم شافه راح لبيت الشعر ...وهو يهاوش ..دخل الصالة وكان أمه وخواته موجودين ...طالع جهة غرفته وهو وده يطير لها ويبشرها ...وجه نظره لأمه اللي القلق واضح عليها : أبوك ماهو معك وينه وايش صار معاكم بشر

ياسر جلس قريب من أمه ومسك يدها ورفعها لشفته وباسهاااا : تطمني انفكيت من أمل وأبوهاااا الله يأخذه وهو لسانه الزفر ..

أم ياسر بصدمة وهي تحط يدها على صدرها وعينها من الباب خايفه من زوجها لا يجي ويذبحه : وش صار

ياسر عض شفته وهو يطالع جهة الباب الرئسي ينتظر أبوه متى يدخل يهاوشه : والله يمه يادوب أقول ان شدن على ذمتي هب فينا ..يقال ميتين على بنته وبعدها كنت بعطيه المقسوم بس جماعته وأبوي وقفووا بوجهي الله يسامحهم وخلوها بنفسي ..

قاطعته بخوف : كنت بتضربه ياسر انجنيت كبر أبوك
ياسر رفع كتوفه بدون مبالاة : أنا عندي مبدأ اللي يغلط علي يتكفخ .. حتى لهو كبر جدي


بقلق صفقت على وجهااا وهي تسمع كلامه : بلشتنا مع أبوك الله يسامحك بس

ياسر بقلق : الله أعلم وش يصيرر الحين راح لبيت الشعر وجالس فيه بس بعدها مدري على وشهوو ناوي ...

وقفت بقلق : قلت لي في بيت الشعرر ولا جاء وراك للحين خليني ارووح له

مسك يدها وهو خايف عليها : لا يمه خليه وأنا اعرف اتفاهم معاه وقف واتجهه لغرفته

قالت بخبث وهي تشوفه معطيهم ظهره :شدن راحت مع عمتي

طالعها بصدمه ورجع طالع أمه : اللي تقوله حور صدق

أم ياسر طالعت حور بعتب : ايه يمه البنت منهاره حدها وجت نوفه وقالت بتاخذها شافت وجه قلب من العصبيه قالت تهدي عليه : يمه في بيت عمتك نوفه هني ماهو بيت خالك تطمن

حس بشوية رآحه يوم دري انهم في بيت عمته
بسرعة طلع وهو معصب ومقهور وشلون تروح كذا
بدون مايدري ..اتجهه للباب الفاصل دفه يوم حصله مفتوح
ودخل وهو ينادي بصوته كله عليها ...

شدن
كانت ملتهيه تنظف مع أمها ...وكان ودها تنسى شوي وتسوي مثل ماقالت لها أمها ..وتخليه يحس بفقدها ..يوم تثقل عليه
أول ماسمعت صوته طيحت المنفصه ..من يدها بدون شعور ..وقربت من أمها ... خايفه منه ومن رد فعله ...يوم عرف انها تركت البيت ..بدون مايدري بس تطمنت يوم
شافته دخل وطالعها بعتب رد السلام

نوفه بزعل : عليكم السلام تفضل
تفضل وهي تنظف له المكان معليش البيت مغبرر
تدري لنا مده منه ...

ياسر وهو عينه من شدن اللي رابطه على شعرهاااااا وشكلها نكته من فوق لتحت غبار .. رفع حاجب وقال :يعني يانوفه انتِ كذا كل ماجيتي تسحبين زوجتي وراش علامش حاقده علي كذا

نوفه بعتب :والله قلت ماهو فاضي الليلة قلت أخذ بنتي عندي ونخلي لك الجووو مع الي تبيها ورايح متعني لها ..

ياسر بزعل من كلامها ومايبي شدن تصدق فيه : الله يهبها في وجهي لو كنت رايح وأنا قاصد ومتعني ماغير تدرين بالظروف
نوفه طالعته بتعب : ولووو ماتقهر بنتي


وش مسلط عمته عليه اليوم وجه نظره لشدن اللي تطالعه بزعل : بنتش ذي ماقدر اجيب على رأسها مره كذا انكتب علي اجلس ماقابلها طول عمري وابتسم يوم شاف وجهه عمته وشدن مصدومين ضحك وهو يشوف شدن جايه يمه وهي تنط بفرحه قدامه : تقولها صادق

مسكها وقال بفرحه أكثر من فرحتها : اي والله اني صادق

شدن للحين ماهي مصدقه : وشلون

ياسر : وشلون عاد كل مافي الموضوع صرفتهم بس تصريقه قويه شوي وضحك وهو يتذكر وشلون رفع الشايب بيده وغمز لها تدرين بزوجك بطل ومايرده شيء

شدن رجعت نطت بفرحة وهي تصرخ :يسسسسسسس والله انك بطل وكفووو

ابتسم وهمس لها وعينه من عمته : بشويش ولدنا لا يطيح ومسك ضحكته وهو يشوف صدمتها بالحكي الي قاله

شدن فتحت عينه بصدمه باقي ذا مصدق للحين كذبته
بس مسكت فيه وهي تبي تتأكد : ياسر صدق يعني خلاص مافي أمل وشلون قولي بالتفصيل
تعال تعال أجلس خليني أعرف وش سويت يابطل

ياسر هز رأسه وهو مبتسم بستفزاز : ايه مافي أمل بس يمكن فيه غيرها ..بس مسكها بسرعة يوم شافها ابتعدت عنه : والله اسف
ومد يده وسحب الربطه من على شعرها وهو يضحك على شكلهااااااا

شدن تحس نفسها بحلم وشلون بلحظه صارت كذا بقمة سعادتها يارب لك الحمد فرحانه حدها يالله يعني خلاص ياسر لها بلحالها ومعاد في حد بيشاركها فيه ماتدري وشلون تعبر عن فرحتها ....بس قلبها وجعها يوم أمها قالت
: أبوك بيسكت

ياسر عض شفته بقهر أبد ماهو وقت كلام عمته بذات مع فرحة شدن :ماعليه أبوي علي .. عرفت اخارج نفسي من أبو سعود ماراح يصعبون على الباقي .. المهم الحين يالله اوصلش لبيتش قبل خالي يزعل ويدق على أبوي ويرجع يحط علي وعلى مرتي وحنا السبب ومن هالكلام ترى ودنا نعيش كذا لو يومين مرتاحين من مشاكلكم وهو يشبك يده بيدها

شدن وهي تشاركه بستهباله : اي والله شكلهم يغارون منا ياسررر ناشبين لنا

ياسر ضحك بقوه وهو يشوف صدمة عمته من كلامهم : وش رأيش نرجع نهج ونخليهم يأكلون بنفسهم من الغيرة

نوفه وهي للحين قلقانه بسرعة مسكت يد شدن وسحبتها يمها : تسهل الليلة بنتي بتبات عندي وخالك عاقل ولا هوو خفيف عشان يشكيني عند أخوي

شدن طالعت أمها مصدومة من حكيها بس يوم شافتها تحذرها بعيونها قالت بتردد : ايوه بجلس مع أمي الليله

ياسر صغر عيونه بقهر ذي ماتفهم يعني وهو يبي يحط أبوه بالأمر الواقع تقوم تبعد عشان أبوه يحصلها فرصه عليهم .تكتف بزعل : يعني شلون ...

نوفه وهي ودها تربيه عشان تخليه يعرف وشلون يحافط عليها وبعد تبي تعرفهم كلهم قيمة بنتها.. عشان مافي أحد يفكر يتطاول عليها ويشوفنها.. رخيصه يكفي الي صار بسبتهم ..

: يعني تسهل وقت مابنتي بترضى ترجع لك
تعال ...وأشرت للباب يالله خلينا نكمل شغلنا ..شوفة عينك البيت يقلب يضرب ...من مبطي عنه ...

شدن عضت شفتها يوم طالعها بعتب وبعدها يوم اعطاهم ظهره بدون مايتكلم تحسه زعل بس صح كلام أمها لازم تثقل شوي .. وبعد مافيها اليوم ترجع تخاف من أبوه يسمعها كم كلمة وبذات وهو معصب بعد اللي صار ...
وأفضل شيء تبعد شوي ...هذي الفتره حتى أبوه يهجد عنهم ... بسرعه لحقته : ياسر
طالعها بدون مايتكلم

قربت منه وهمست : آسفه

بزعل: هذا الوعد اللي بينا وش حنا متفقين عليه هااا ولا مسرع نسيتي يوم شفتي عمتي نوفه هذا انتِ ياشدن ماراح تتغيرين بس أنا استاهل ..واللحين خلي عمتي نوفه تنفعش ..وطلع وهو معصبب ..مسك نفسه بالعافية مايبي يغلط بعمته ...وشلون تمنعه من زوجته وبعد وشلون شدن ترضى تخليه وهو جالس يتحمل كل شيء من أبوه عشانها .... وبعد جاي يمها فرحان عشان يبشرها تقوم تسوي معاه كذا .... اول مادخل بيتهم شاف أبوه جالس مع أمه وخواته همس يالله صبرني ...

طالعه بسخرية وهوو يشوفه جاي بدونها على ان أمه مخبرته انه رايح يجيب شدن : ياحيف عمتك والبزر مشو كلمتهم عليك

ياسر اللهم طولك ياروح : يبه كل مافي السالفة تبي تجلس الليلة عند عمتي تدري كم لهم من بعض

صرخ بقهر : قلعتك والله مدام راضي تمشي وراء شورهم مثل الخروف وشلون ترضى تبات بعيده عنك

ياسر مافهم أبوه أبد الحين يهاوشه ليه شدن مارضت تجي معه يالله بس عض شفته بتوتر يوم قال : وبعد وشلون تكسر كلمتي قدام الجماعه وتفشلني يوم قمت بتضرب أبو سعود حتى عشاء ماقدرت اتعشى معاهم بعد اللي صار سودت وجهي

نور همست لحور : احس ان ابوي مقهور على العشاء الله يهداك ياسر كان اجلت حتى يتعشى أبوي يمكن عصبيته تكون اهون ... عن كذا

حور بقهر : ياشينش صدق انش غثيثه مثل خويتش
الله يأخذها كل مشكله طايح فيها أخوي بسبتها

نور بقهر : يمه قلبش على أخوش مره الحين تقلعي بس وخليني اشوف وشلون يويسر يحلها

حور صغرت عيونها : ايه عشان تنقليها لحبيبة قلبش

نور رفعت حواجبها وهي تقهرها : ايه

حور مقهوره حدها يعني ايش السالفه خربت ومعاد ياسر بيتزوج لا مستحيل بخبث وهي تطالع ياسر : يبه خلاص أبو سعود رفض فيه مليون يشرون نسبنا
واقهر أبو سعود وروح اخطب لياسر وخلى بنته على قلبه تجلس

ياسر طالعها بعصبيه وصرخ : يازفته مالك دخل فاهمه وقرب منها وهو ناوي عليها بس وقف يوم ابوه صرخ بعصبيه : يالله هاا حط على أختك
وهي ماقالت غير الصدق فيه مليون يشرون نسبنا
وبقهر أبوسعود وبخليه يعرف مين خسر

ياسر وش ذي المصيبه الثانية بعد ...صرخ بعصبيه : يبه عشان تقهره اروح اخطب عند غيره
والله يبه ذي المره أقولها لك ماراح امشي بشورك

أبو ياسر : أجل تعصاني عشانها

ياسر جاء بيتكلم أمه وقفت بوجهه و هي تطالع حور بعصبيه :يمه روح غرفتك وهمست له ماعليك والله لا اربيها لك أنت بس روح الحين تكفى لا تكبر بينك وبين أبوك أكثر تراه حاقد عليك حده
وتطمن أنا بحاول فيه يصرف نظر بس أنت ابعد اللحين ...


ياسر ابتعد وهو يتحلف بحور والله لا يربيها ويخليها تثمن كلامها ناقص عشان تولعها زيادة .. ب

نور بقهر ضربتها على كتفها : ماعمري شفت أخبث منش

حور صرخت : يبه شوف نور

أبو ياسر بحده : أقول تقلعي عن وجهي ذي الساعة
ولعاد اسمعش تدخلين بعلوم مالش بها فاهمه واللحين الله فكش من يده لاني موجود ولا والله كان ذبحش
أم ياسر بعصبيه : والله إنها تستاهل ...

نور ابتسمت بتشفي وهي تشوف صدمة حور وقفت وهي تقول : ربي أخذ حق شدن وياسر منش ...
ربي مايرضى بخراب البيوت