[فيتامين سي]

(يوم زواج ابتسام )

شمسه طلعت من الغرفة وأنا اضحك على توتر ابتسام ..رحت لجناحي ...زفرت بضيق ليت عواد موجود ...آه روحته ذي المره وجعت قلبي حيل ...وحزنت عليه ...راح وهو وده يحضر زواج أخته ....أخذت شور سريع
وطلعت وأنا انشف شعري ...شفت عواد موجود بالغرفة وقفت مصدومه ...وبعدها صرخت بفرحه :والله توني ارتجي شوفتك

قرب مني وهو مبتسم :وشلونس وشلون بعد حبيبة أبوها

شمسه صدق صدق فرحت من قلبي بشوفته
عضيت شفتي وأنا منحرجه ...حدي منه قلت : بخير ماعليك وشلونك أنت وقولي وشلون رخصوك والله فقدت الأمل تحضر

جلس على السرير وزفر بتعب: الحمدلله الله سهلها آه مطبق يومين وراء بعض مانمت

شمسه بحزن عليه : طيب نام لك شوي

عواد هز رأسه بلااا: مع بسام حد ينام اقسم بالله كرهني عمري ليتني ماقلت له استقبلني بالمطار

شمسه بضحكه :والله نفس المعاناة أختك معيشتني فيها بس الحمدلله على صبرنا الليلة بنفك

عواد ابتسم لها : ماظنتي ذي اللاشكال الخلاص منهم سهل والمعاناة قدامنا

شمسه تذكرت قبل يمشي هذيك الليلة كنت متضايقه حدي وهو مسافر وبذات وهو زعلان مني بس تطمنت يوم قال وهو يودعني : ترى كلمتس اوجعتني بس مافي وقت للزعل ومسامحتس عليها تطمني بس لو ربي كتب لنا الشوفه برجع اعاقبتس عليها ولسانتس ذا بقصه

طالعته بتردد ماتبي تذكره بس ماتقدر ترتاح إلا تعرف انه راضي عنها ..صح أعتذرت منه بالجوال وقت ماكان تدق تطمن عليه بس تحسه يكملها
وهو مستعجل او ماهو فاضي من الوضع اللي هم فيه ( دعواتكم لجنودنا الله ينصرهم يارب )
همست : آسفه


قاطعها وقال وهو يحط يده على شفتها يمنعه تكمل : تصدقين وش عيبي اني ماقدر ازعل منتس
وهذا اللي مقويتس شوي ومفلت لسانتس

شمسه وقفت وهزت رأسها وقالت بدلع : بنتك هي السبب مخليه اعصابي منفلته وماتخليني افرق مين قدامي

عواد زفر بقهر : وهذا أنا متحمل عشانها بس
إلا اولدي وبأخذ حقي كله من عيونتس

شمسه : لا وقتها تتقوى شوكتنا ونجتمع عليك ونصير حزب وأنت ماقدرت على وحده تقدر على ثنتين

عواد عض شفته : اخخخخ يقويني الله عليكم وبعدين مطمن يقولون البنت حبيبة أبوها وبتكون بصفي اففف شموس متى تولدين تأخرتي واجد والله

شمسه فتحت عينها بصدمه ورفعت يدها تحسب له : باقي 3 شهور وقلدت صوته تأخرتي بكيفي هوو
ولا عليها يحلف اني تأخرت

أخذ منشفته وهو يضحك على نفسه ...متشوق لبنته وده ...يشوفها بسرعة قدامه ....طالعها قبل يدخل الحمام : وشلونها أختس

شمسه بحزن عليها : كسرها حسبي الله عليه
ماغير ساكته ولا بغرفتها ...
@
@
@
( بيت أبو محمد )
اصايل
طلعت من غرفتي على اصوات خواتي ... فتحت عيني بصدمه وأنا اشوفهم ماسكين في بعض
وكل وحده ماسكه بشوشة الثانية ...قربت منهم وأنا افك بينهم بس وين ضعت بينهم بذات وهم اطول مني ...انقهرت يوم قالت أم لسان : ترى متعبه نفستس على الفاضي شوشتها بيدي

رفعت عيني وأنا اشوف يدينهم من فوق رأسي وهم ماسكين في بعض
قلت بقهر وأنا ابعد عنهم : اذبحو بعض قلعتكم
بس زودوها صرخت : والله لو ماتفكون بعض بعلم أبوي

ابتعدت وشوشتها طايرة : طيب قولي لها والله ماتقدر تأخذها وأنا اللي اخترتها قبلها

صرخت بعصبيه : ياشيخه الحين صارت لتس وأنا اللي مختارتها وبعدين وش غير رايتس فجأة يوم الزواج وتسذا تحطيني بالأمر الواقع عشان ماقدر اطلب عاد ولا اروح السوق

اصايل : طيب بالأصل لمين فيكم

كلهم بصوت واحد : حقتي

اصايل طالعتهم بقهر : وشلون يعني نفس المقاس
ونفس لون الفستان

بقهر قالت : ايه هذي أصغر مني بس وصلت لطولي الله يأخذها والكعب يمشي على فستاني وفستانها

اصايل قلت بحسره على نفسي وأنا حاسدتهم : الله يأخذكم ليتكم اعطيتوني من طولكم ذا وحده عمرها 15 والثانيه 14 وأنا عشرين سنه واقصر منكم

: ياحبيبتي اللحين ماهو وقت تحسرتس على قصرتس احكمي بينا شمسه تحترينا شوي ونروح للقاعة

اصايل بقهر : صدق جيل قليل أدب

طالعت أمي يوم دخلت وهي معصبه وبعد متوتره بس يوم انتبهت لشكل البنات رفعت يدها بتهديد :والله لو احلف الليلة ماحد يسري فيكم

صرخت معترضه : ياسلام بنت عمنا يمه وشلون مانروح وبقهر وهي ترفع جوالها بشوف شموس وصلت الكوفيره للقاعة ولا باقي ليتنا خليناها تجي هنا أفضل بدل الروحه للقاعة من اللحين

اصايل قلبي قرصني من شكل أمي ...شفت محمد جاي يركض ..وهو يقول : اصايل رجلتس جاء وأبوي قلطه المجلس

ايششش ...مصعب جاء ..طالعت أمي اللي قالت
: ماعليتس يمه أبوتس بصفتس ذي المره وماراح يردتس له مكسوره مثل العاده

توترت حدي وقفت وناولت أمي عادل
وقلت : لوطلب يشوف عادل خلي محمد يوديه ورحت لغرفتي جلست على السرير وقلبي يدق بسرعة خايفه حدي من اللي راح يصير ...طالعت جوالي ..لي اسبوع مطنشه كل وقت يدق ويرسل بس مارد بعض مرات أفكر اقفله وارتاح بس أخاف اي رد فعل قوي .. يعصبه ويحرمني ولدي ..وبعد الله يستر الليلة لا تكبر بينه وبين أبوي ..بذات وأنا عارفه وقاحته بالرد....آه ليتك ماجيت ...ذي المره الوضع غيرر ...
=========
====
{ بالمجلس }

حس بتوتر يحس مقابلة أبوها ماطمن ومارحب فيه مثل العادة .يحسه متغير حيل ...لا لا من بداية المقابله ماتبشر بالخير ..قال وهو قلقان من رده : ياعم أبي أشوف زوجتي

رد بحده : ماعندي زوجه لك

انصدم من رده وقال : وش ذا الكلام ياعم


أبو محمد بجمود : والله اللي وصلني انك مطلقها ومعاد لك حق بشوفتها واللي بينكم ولد واللحين تبي تشوف ولدك أبشر بعزك اللحين محمد يجيبه لك اما غيره ماعندي

مصعب عقد حواجبه كلامه عصبه بس مسك نفسه وقال : أنا جاي وقاصدك وعارف اني غلطان بحقها

قاطعها بزعل : توك تحس انك غلطت ليه مافكرت يوم أخذتها بذنب ولد خالتها وهي مالها يد وطلقتها وسرحتها من بيتك وعجزت حتى توصلها وجعتني حيل يامصعب وخيبت نظرتي فيك ويعلم الله بغلاتك وجميلك مانسته بس بنتي لا عاد تسأل وراها اللحين خذ ضيافتك وشوف ولدك لو تبي والله يستر عليك

مصعب حس الموضوع كبير ومتعسر قال بتبرير : لا ماهو هذا سبب طلاقي لها

صرخ بقهر : أجل وشهوو يخليك تكسر قلب اصايل عارف بنتي من بين خواتها لسانها ماهي طويل ولا هي راعية مشاكل

مصعب لأول مره يحس نفسه ماهو قادر يرد قال وهو ناوي يرد كذبتها اللي ورطته مع أبوها وصعبت عليه رجعتها له :مشكله خاصه بيني وبينها ودخل الشيطان بينا وهي طلبت الطلاق بنفسها
وكبرتها بينا والمشكله تافهه وبعدها دقت على أختها عشان تجي لها لاني رفضت تطلع من بيتي
ويوم وصلت أختها ورجلها حلفت عليها ماتروح بدون شوري وطلعت وضربت بكلمتي الأرض وصار الطلاق بلحظة غضب مني واللحين جاي وأنا بردها
ومالها إلا يرضيها ويرضيك ياعم سكت يحس كلامه كله ملخبط وماهو متزن وبذات مع نظراته اللي يحسه مكذبه من وقت ماتكلم أول مره يحس بالعجز ذا دايم يقدر يطلع نفسه ويقلب الحق له بس ذي المره فعلاً كبرت منه ....

أبومحمد بصدمه من اللي قاله يحس عمره عجز مين يصدق فيهم :لا والله ماهو ذا العلم اللي وصلني اصايل قالت لي انك طلقتها بسبة المشكله اللي بينك وبين عبد العزيز

قاطعه مصعب : من جدك ياعم اطلق زوجتي عشان مشكله بيني وبين الكلب ذا إلا تكذب عليك ياعم ماتبي تقولك انها طالعه مع أختها بدون شوري تدري فيك ماترضى وبتردها لي

أبو محمد وقف : بروح أسالها وان طلعت تكذب والله معاد لك شوفه لها صدق وان بنتي كذوب بعرف وشلون اربيها

مصعب قال بسرعة وهو متوتر : خليها تجي هنا واسألها قدامي

أبو محمد بعصبيه : تخسى عاد تشوفها وأنت رامي عليها الطلاق

مصعب بقهر ياذا الطلاق اللي ذله بسبته : رديتها ياعم والله سألت شيخ وقال يجوز تردها بدون عقد مدام ماانقضت عدتها او تجيب شاهدين اهم شيء تكون بالعده وعاد أنت تأكد بنفسك اسأل اي شيخ توثق فيه ومايصير اللي تبيه وتحكم فيه

أبو محمد : ماهو بذي مشكلتنا الدين معروف وكلنا عارفين احكامه

مصعب عقد حواجبه جاي وهو واثق من وقفة أبوها بصفه مايدري انه كذا بيقلب عليه قال وهو يقوم يكوفنه لما يعض الأرض : أجل وشهوو

أبو محمد بحده :اعطيتك بنتي بدون رضاها وذي المره والله ماتطلع إلا برضاها من بيتي قالت تم ترجع معاك قالت لا والله تبطي تشوفها وأنا
أبو محمد ماتثنى كلمتي

مصعب كور يده بقهر ...لا لا هذا اللي مايبيه ...بس ماقدر يتكلم أو يعترض أول ماطلع من المجلس ...طالع محمد بطرف عينه ...شمق فيه وطلع وراء أبوه رفع حاجب بعد أنت زعلان لا لا متفقين علي كلهم ...اصوله وش قايله عني ...اخخ اشوفك بس ...بسرعة مسك جواله ودق عليها ماردت مثل العاده ...رسل لها وهو يتمنى تشوف رسالته قبل أبوها يكلمها أبوك جاي يشاورك برجعتك لي طلبتك توافقي وانتقمي مني على راحتك بس في بيتي تكفين لا يوصل انتقامك برفضك لي قدام أبوك )

اصايل
من وقت مادق عرفت ...ان أبوي ردني له ...واللحين دق علي من وسط مجلس أبوي عشان يثبت لي ....ويقهرني انه أقوى مني ...
بس يوم قريت رسالته ...أبوي يشاورني ابتسمت بسخريه مصعب بغروره يطلبني ارجع له ...سبحانك يالله .... أول ماسمعت أبوي ينادي علي حطيت جوالي وطلعت له وقفت قدامه : سم يبه

أبو محمد وهو محتار وش يقولها : والله يا أبوك مدري مين اصدق فيكم يقول صارت بينكم مشكله وطلعتي دون شوره

قلبي وقف يوم قال طلعتي دون شوره يعني خبره بروحتي للزواج لا لا ماتوقعت منه هذي النذاله جيت ببرر بس سكت يوم قال :وعصيتي أمره ورحتي مع شمسه وعواد وهو عصب وطلقتس وأنتِ تقولين طلقتس بسبة عزيز ومعاد ادري مين فيكم الغلطان

حسيت براحه يوم كمل كلامه قلت بقهر رجع وكذب فيني وطلع نفسه ملاك مثل العادة قدام أبوي :يبه أنت اعطيتني كلمة ومعاد بتغصبني وطالعت أمي ابي استمد قوتي منها بس حسيتها متوتره أكثر مني ليت شمسه معي اللحين كان قدرت توقف بصفي

أبومحمد : وأنا عند كلمتي اللحين موافقه ترجعين له خير وبركه ماتبينه الله يستر عليه وربي يرزقتس باللي احسن منه

قلبي وجعني يوم قال أخر كلامه قلت وأنا ادوس على قلبي : مابيه يبه ورفعت نفسي وسلمت فوق رأسه الله يعزك مثل ماعزيتني


أبو محمد ضمها وقال بحسره عليها : آسف يبه
لو تسببت بقهرتس وطلع

انسحبت لغرفتها ...جلست على السرير وهي ماهي مصدقه ...يعني خلاص معاد به مصعب بحياتي ..
حسيت بدموعي تجمعت بعيوني ..مسحتها وأنا اهوي على وجهي ...لا اصايل خليتس قدها لو مره اثبتي لنفستس انتس قويه ...شافت أمها واقفه قدام الباب ...قربت منها وجلست جنبها ماقدرت تمسك نفسها عاد حاولت تكابر بس مافيها هي أضعف بكثيرر صاحت بحرقه وهي ترمي نفسها بحضنها ....
همست بغصه : ليه تصحين يمه أبوتس ذي المره رفع قدرتس قدامه وماقصر للحين ماهو مصدقه والله قلت لا يجرتس له جر بس الله حنن قلبه وهداه

زادت بصياحها مافي احد فاهم وجع فراقه عليها
ياناس هي مافارقت شخص عادي شخص ملك كل شيء فيها على كل عيوبه ..تفديه بروحها بس هالمره صدق جرحه لها كبير
=======
===

بالمجلس

أول مادخل قال :تفضل ضيافتك والله يستر عليك البنت ورفضتك وأنت خلك رجآل وجيب صك طلاقها من المحكمه عشان تثبت الطلاق وينتهي كل شيء والله يعوضك ويعوضها ب الاحسن

انصدم حده وهو يسمعه بعصبيه فز وصرخ : ماهو بكيفها

عقد حواجبه بحده وهو ناقد وقفته قدامه كذا وقف وقابله وبعصبيه : أجل بكيفك أنت اللي ماطلعت كفوو لبنتي حيف والله توقعت يوم اعطيت اعطيت رجآل ينشد فيه ماهو ارخمه

مصعب لا لا عصبيته بتجيبه وراء قفل عيونه بصبر وحاول يمسك اعصابه ويحاول يهدأ ويتحمل اي كلمة يرميها قال بصبر : صدقني ماعطيت إلا كفوو بس لحظة شيطان وتحصل

أبو محمد أشر للباب : أنتهى الكلام ونفذ اللي طلبته منك ولا تزودها ترى أنا رجآل مالي بالطويله

حاول يضغط عليهم بعادل : أجل بأخذ ولدي

أبو محمد :خذه ماحد رادك بس يكمل عمره اللي محدد له ويخير بينكم يبيك ولا يبي أمه بتسوي مشاكل وتطول لسانك عادي فيه اللي يردك ويالله لا تضيع وقتي وراي مشاوير بقضيها

مصعب مصدوم فيه حاول يصغط عليهم بعادل بس لا رده صدمه ...وبعد طردته له من بيته يحس باهانه ....ذله ذا الشايب و ماطلع هين
بس كله منها ...لو اختصرتها عليه ورجعت له
وماكبرتها بينهم ...كان ما انذا كذا من أبوها
طلع معصب حده ... شاف محمد بطريقه قال بعصبيه : جيب عادل بسرعة

محمد بعصبيه : تخسى تأخذه

مصعب عصب حده اللحين هو ناقص ذا النتفه بعد قال وهو وده يصفقه قرب منه بتهديد : بسرعه جيبه

محمد بخوف منه ابتعد وقال بقلق : لا عشان تأخذه معك

أبو محمد وهو واقف قدام باب المجلس
: روح يامحمد جيبه له

مصعب وقف ينتظره بقهر يحس شوي ويحرق عليهم البيت ...بس لا لا مايبي يغلط زود عنده أمل يرجع الشايب بصفه ..بس يخلي الامور تركد شوي أول ماشاف ولده ابتسم بدون شعور قرب منه وأخذه من يد محمد همس له وهو يبوسه : فقدتك يبه

محمد بسرعة قال : اصايل تقول لا يطول معاك

مصعب انقهر حده من كلامها طنش محمد ورجع يبوس ولده وناوله لمحمد وطلع وهو معصب ...فيه يأخذه
ولا يفكر بكلامهم كلهم بس ...تعوذ من إبليس ومايبي يصعبها أكثر بتهوره ... ركب السيارة وضرب الدركسون بقهر أنا كذا تسوين فيني
طيب ترجعين لي بس ...فتح جواله وارسل لها ( بترجعين لي غصب عنك وعن أبوك ) رمى الجوال بقهر وهو يصرخ هين يا اصايل

بالغرفة
من وقت ما حمودي ...أخذ عادل ....وأنا قلبي يدق بخوف متوتره... حدي خايفه ينتقم ..مني فيه خليت أمي تطلع ...وبسرعة وقفت جنب الدريشه بعدت شوي الستاره بحيث مايشوفني وطالعته ..شفته يبوس عادل وبعدها اعطاه لمحمد تطمنت ..شوي ...وبسرعة طلع واضح من مشيته انه واصله معاه ...ودي كنت أشوفه أكثر ...الله أعلم ايش يفكر فيه حالياً ...مصعب مايستسلم كذا ...وراه بلا أكيد ...طالعت جوالي يوم نور برساله
بسرعة نطيت له فتحها وشفت كلامه عضيت شفتي وقلت بغصه ...ليه مو راضي تفهم ذي المره غير ....وجهت نظري للباب فرحت يوم شفت سميرة وعيالها قربت منها وضميتها وأنا مشتاقه لها
: ياعمري وحشتيني حيل

سميره : وأنتِ بعد مصدقت والويكند يجي واجي اشوفك نزلت رأسها بحزن من بعد سجن وافي ماحب اطلع كثير استحي كل وقت اقول لأهل رجلي وصلوني ...

اصايل عضيت شفتي بحزن : الله كريم قادر يفرحك بخروجه

سميره زفرت بضيق : آه حكموا عليه سنتين الحمدلله والكميه بسيطه اللي انظلم فيها حسبي الله على اخوياه اللي ورطوه آه ياصايل احس اليوم يمر علي سنه على اللي يسويه فينا بس كنت احس بسند واي شيء اطلبه وأنا مرتاحه اللحين استحي كل وقت أكلم خالتي تكلم أحد من أخوانه يجيب اغراض للبيت وللعيال دموعها نزلت مسحتها وهي تشوف دموع اصايل بعيونها : قولي يالله عسى النفس تفرح كثر ماعانت ياصايل
وقومي نجلس مع أمي لو قابلنا بعض كذا والله بنقلبها مناحه وقالت وهي تغير الموضوع الليلة زواج ابتسام الله يسعدها

@
@
@

بالإستراحه

عادل بقلق :مدري وش صار مع مصعب قايل بيروح للديره بيرد مرته

منيف : الأخ راح وهو واثق ان أبوها بصفه

عادل : وهذا الي مطمنا كلنا ان أبو محمد يحب مصعب

منيف : وأنت وش دخلك عشان تطمن هز رأسه حاشر نفسك بكل شيء أستغفر الله

عادل بقهر : ياغبي تراها لها دور كبير بحياة مصعب غيرت فيه اشياء كثيره وطلعته شوي من حالته

منيف : اللحين من جدك خويك تغير لا والله إلا زادت شياطينه والضعيفه ابتلت فيه لو أنا مكانها والله مارد له ذا مايتعاشر

عادل بدأ يعصب : منيف حبيبي قلت لي الليله وراك دوام يالله وش مجلسك

منيف بخبث : أنتظر مصعب شوي بشمت فيه

عادل رفع حاجب : من جدك مصدق انه بيجي هنا

منيف : اي والله لآنه بيرجع عزابي وقول منيف ماقال

عادل عقد حواجبه بقلق من كلامه : فال الله ولا فالك ياشيخ الله يهدي سرهم ويجمع بينهم

منيف : اقول ياجدتي حصه أنت وهو الدعوات انقلع اطلب لنا عشاء قبل اروح
وخليني اكلم مصعب أشوف وش صار معاه قلعوه ولا رحبووو فيه

عادل بخبث : اتحداك تدق عليه

منيف رفع جواله وقال بتحدي : والله

عادل : اي والله

منيف يسب نفسه على تهوره قال وهو يتمنى يرجع بكلامه: ياخي لا تحداني

عادل ابتسم وهو يبي ينتقم منه : إلا بتحداك يالله دق اشوف

منيف بلع ريقه ودق رقمه وقال بتوتر : ادعى بس يرد علي

عادل بسخريه : لا تطمن بيرد عليك تدري فيه يحترمك

منيف بهمس : امحق احترام طالع عادل وهو يشوف ابتسامة الخبث على وجههههه أول ماسمع صوت مصعب الحاد : خيرر ايش تبي

ابعد جواله شوي وقال بهمس : ياكفي الشر

عادل أشر له يكمل ...

منيف رجع قرب جواله وقال بتوتر : لا بس جيب لنا ولدك مشتاقين له مره

مصعب بعصبيه صرخ : وشهوله تشتاق له وأنت ماشفته

منيف طالع عادل وعض شفته متفشل وقال :ياخي نحبه مدامه ولدك ونشتاق له حتى لو ماشفناه بس ماقدر يكمل كلامه من تقفيل الخط بوجهه
حط عينه بعين عادل اللي ماسك ضحكته
قال بسرعة وهو يحاول مايوضح انه قفل :ترى بتجيبه ولا كيفك ماراح نموت وراء ولدك
أكيد مقرود مثلك وقليل أدب
ونزل الجوال وهو يمثل انه يقفل بوجهه
انقهر حده وهو يسمع ...صوت ضحك عادل العالي رفع حاحب وقال وهو باقي مستمر بالتمثيل الفاشل : يستاهل خويك يبي له العين الحمراء ياخي عجزنا نصبر عليه وهو يحدنا الله يسامحه ويخلينا نغلط عليه غصب

عادل مافيه يسكت بيموت من الضحك قال وهو يضحك : باقي مستمر بكذبك

منيف بقهر صرخ : يجعلك ماتصدق وطلع وهو يسبه ويسب مصعب

@
@
@
رجع البيت
وهو معصب على الآخر .ماهو مصدق اللي صار معاه ...شاف أبوه جالس بالصالة ..يحسه انصدم من وجوده بس رسم ..على وجهه ابتسامه كلها سخريه وقال وهو يرمي نفسه على الكنبة المنفرده :ودي اعزيك بس الي ماتت ماتستاهل حتى الدعاء لها بالرحمه وأشر على قلبه رفض يحزن عليها ورفع يده ماهو بيدي


أبو مصعب كان مرتاح منه يوم هو مبتعد الفتره اللي راحت ...واللحين رجع بس عشان يشمت فيه
عارف برجعته ...رفع يده بتعب : مصعب والله تعبان ياليت تروح لغرفتك وتخليني

مصعب عقد حواجبه وهو يشوف وجهه أبوه فعلاً واضح عليه التعب بدون شعور وقف قرب منه وبقلق : وش تحس فيه

أبو مصعب وهو يفتح ازرار ياقة ثوبه وينسد رأسه على الكنبه : مافيني شيء روح لغرفتك واتركني

مصعب بخوف : يبه قولي وش فيه ولا اقولك يلا اوديك للمستشفى

أبو مصعب وهو يحس ريقه ناشف : مافيني شيء بس شكل سكري وضغطي مرتفع شوي مثل العادة ارتاح شوي واطيب

مصعب جلس جنبه وحط يده على كتفه : ننروح ونطمن وبسرعة صرخ نانوو جيبي مويه


أبو مصعب طالعه مستغرب قال : أول مره تقلق علي
شافه ابتعد عنه وملاحمه تحولت لقساوة فجأة وكأنه تذكر حقده عليه كمل بوجع : مصعب ماندري وش اللي بقي بالعمر يكفي خلاص يوم شاف ملامحه باقي على ماهي وقف وابتعد وراح لغرفته ..وقبل يدخل طالعه وقال :مافي أحد تسبب بحقدك علي غير أمك الله يسامحها ..وتسببت بعدك عني

مصعب بسرعة ابتعد وطلع لفوق وهو معصب وشلون يقول عن أمه كذا ...أمه ماعمرها كانت السبب بالعكس تبي من يحميها من الظلم اللي شافته ...بس ماحب يغلط عليه وهو حاس بتعبه
على انه قهره بس ماقدر يخليه هوو تعبان رجع نزل وهو يدوره بعيونه ...راح جهة غرفته ..وقف وهو متردد يدخل أو لا ...بس ابتعد وطلع من البيت
وهو يحس بروحه بتطلع منه ...مايدري من وين يحصلها تعب خلاص ...

@
@
@
في القاعة
بعد ما المصوره أخذت لها كم صوره مع بسام وطلعت
طالعته بخجل بس انصدمت يوم قال : الله شكلتس بالفستان ذكرني بالبنات الصغار زمان يوم العيد
وهم يجمعون بالحلاوة وماغير يحطون بشنطهم

حست بقهر وفشله بنفس الوقت وشوي وتصيح
رفع وجها بيده وقال : افاااا لايكون زعلتي والله كان حلوين بذات اللي كان عليه كذا شيء يلمع

معاد فيها تتحمل صرخت بقهر : خلاص كافي

بسام عقد حواجبه : ايش فيه

عضت شفتها بعده يسأل صدق مايستحي
قالت بقهر : سلامتك خلاص روح ابي المصوره تأخذ لي صور مع أهلي

بسام هز رأسه برفض : لا يالله ننزف ونسري تأخرنا

ابتسام فتحت عينها بصدمه : بسام بدري باقي ساعة كامله على موعد الزفه

بسام ابتسم : طيب لا تزعلي مني والله شكلك حلوو
والحمدلله وأنا من نصيبك

كشرت بقهر حتى كلامه ماهو مصفف مثل الناس قالت بصبر وهي تصحح له : قصدك أنا من نصيبيك

بسام رفع حاجب : يقال تعدلين لي الحين وكشر بقرف اذبحتس تطلع اخلاقتس خايسه مثل اخوتس
نفسي أعرف بس مين عزمه لزواجي عشان يضرب مشوار من الحد الجنوبي لهنا

أبتسام انصدمت من أولها يبي يذبحها وبعد يحش بأخوها لا لا معاد فيها تتحمل خلاص دموعها بتنزل ومكياجها بيخرب


بسام شاف عيونها مغرقه دموع قال بسرعة وهو يضحك : والله امزح معاك بس يقال اطيح الميانه معتس من أول يوم عشان ماتستحين مني
وكذا نأخذ ونعطي مع بعض واحنا مرتاحين

مافيها تتكلم بتصيح أشرت له يطلع قرب منها وهمس : والله آسف ومبروك علينا حنا الآثنين
وياسعدي يوم كنتي من نصيبي

========
====

جلست جنب خواتها وهي تحط يدها على ظهرها بتعب ...طالعت أختها يوم همست لها : شموس بقولتس شيء من أول ودي أقوله لتس بس خفت تعصبين وتسوين مشاكل مع أبوي والسالفة تكبر وأبوي يمنعنا مانحضر الزواج

شمسه تحس قلبها طاح من الخوف قالت بقلق : ايش فيه

بلعت ريقها بتوتر :رجل اصايل جاء

شمسه بعصبيه قاطعتها : توتس تتكلمين

: قلت لتس كنت خايفه

بقلق : اصايل رجعت معاه

: مدري هو وصل وحنا طلعنا لبيتس

شمسه حست بقلق ...قالت بقهر : الله يسامحتس بس نكدتي علي ...الله يستر من أبوي ماتخيل ترجع له منذله بعد اللي سواه فيها ولا تمنى بنفس الوقت أختها بيتها يخرب ...بس ماتبيها ترجع له ..إلا يعرف قيمتها ماهو أبوها.. يرخصها له ويرجع يغلط ويدمر أختها على الآخر ...شافت خالتها تأشر لها راحت وهي تقرب منها : سمي

أم عواد :ابتسام تبيتس ارسلت الخدامه تدورتس
ومدري وين راحت تدورتس ذي المفهيه

هزيت رأسي : ابشري بروح اشوفها اتجهت لغرفة العروسه وأنا قلقانه على اصايل دخلت شفتها طالعتي و شوي وتصيح قلت بقهر : بسوم والله تعبت منتس وش فيه بعد

ابتسام وهي واقفه قدام المرايه : مدري الفستان ماعحبني

شمسه بصدمه : لا لا صدق انهبلتي توتس تتكلمني باقي نص ساعة على الزفه بشك لا يكون بسام قايل شيء

ابتسام بقهر وهي تذكر كلام بسام : بعد ماكملنا تصوير قهرني تخيلي وش يقول أول ماشاف فستاني قال ذكره بالبنات الصغار يوم يلبسونه للعيد وفي الأخير يوم شافني بصيح قال انه يمزح وهو صدق شكل فستاني مو حلوو ويفشل مابي انزف فيه واتفشل من صديقاتي وأهله

شمسه لا لا هنا أنا انجلطت صدق قلت بقهر : والله ياذا البسام يبي له تربيه وقته الحين وأنت على طول ياغبيه تصدقين هذا عقله فاصل ومنتهي
كان قلتي له احسن من ذوقك الخايس كل مره ترسل صورة فستان اخيس من اللي قبله

ابتسام : مقدرت اقوله تسذا

شمسه : ايه خليه يتريق فيتس وانتِ بس تصيحين وربي انتِ واصوله يبي لكم تدريس في الرد
ماغير دموعكم سابقتكم

ابتسام : مالي نفس انزف

شمسه بعصبيه : والله ودي ادق على عواد واخليه يربيه ويحرمه منتس الليله عشان يثمن كلامه عليتس عديم الذوق

ابتسام بسرعة وهي ماتبي مشاكل : لا لا يقول يمزح

شمسه عضت شفتها بقهر : صدق نسخه من بعض يابنات العم اجلسو بها أجل قلعتكم الثنتين

وطلعت معصبه ... جلست شوي اهدي على نفسي آه احسني عصبت على ابتسام ورجلها وعصبيتي ورد فعلي كان مبالغ فيه كله والله بسبب قلقي على اصايل أخذت جوالي وابتعدت شوي عشان اقدر اسمعها ... ودقيت رقمها ...ماردت ...دقيت على خالتي ...بس طمنتني يوم قالت انها موجوده وسميره بعد موجوده ...آه الحمدلله أخيراً أبوي حس ...ماقدرت تأخذ كل التفاصيل من الصوت العالي ... الي حولها ....