تالت أيام رمضان
زيادة ف المعارف و أهو اللي جاي أحسن من اللي واقف
صدق من قال ( إحذر ما تتمنى) أنا كنت بتمنى بابا يغير سنفونيته و بصراحه إتفاجئت بالتغيير لما طرقع كف جميل على قفايا شدني من حضن الملايكه طلعني من عز النوم قبل ما أدوق الرز بلبن اللي بيقولوا عليه:
- آآآآآآآآه... مين الــ...
- من غير غلط يا ....
قاطعته:
- مش قلت من غير غلط.
فتحت عين واحد أعاين الوضع و لما شفت وش بابا اللي أحمر من الطماطم (أكثر حمره من الطماطم... حته نحوي دي) قفلت عيني تاني... شدني من على السرير:
- آآآآآآه ليه كده يا بابا.
- ليه كده؟... مسجد النور مش كده؟
- هههه معلش يا حاج كان عندي معاد مهم.
- معاد مهم؟؟
- ايوه.
إتجمد الدم ف عروقي أول ما قال:
- فوق السطوح مش كده؟
- سطوح... سطوح إيه بس؟
مسك ايد المقشه و قبل ما ينزل بيها على ظهري نشنت على باب الأوضه و هووووووب بقيت ف الصاله... لفينا كم لفه حوالين السفره لغاية لما بابا هبط و وقف ينهج:
- أعمل فيك إييييييييييييه؟ أعمل فيك إيه؟
جت ماما جري و أخدت من بابا إيد المقشه:
- في إيه يا حاج؟ هدي نفسك بس ده إحنا ف صيام.
- قوليله يا ماما قوليله... عمالي يزعق من الصبح و يضرب و لا كأننا....
- اخررررررررس يا حيوان.
- بتقول حيوان؟... اللهم إني صائم.
ماما تبرقلي:
- اسكت إنت يا مرعي... اهدي يا حاج... اهدى و ريح نفسك بس.
- اريح نفسي إزي؟ قوليلي إزاي؟ الواد ده هيفضحني... هيجيلبنا الفضيحه يا نجاااااااااة.
- فضيحة؟؟؟؟!!! فضيحة إيه كفا الله الشر.
- الأستاذ خيري اللي ساكن قصادنا شافه واقف على السطوح و بيكلم مين؟
- مين يا حاج؟
- قدرية بنت أم قدرية.
شهقت و ضرب كفها على صدرها:
- هيه حصلت يا مرعي؟؟؟؟
- يا ماما دي كانت مطلعة صينية كنافة باعتاها للبنات.
- و هيه فين الصنيه دي يا ابني؟
قدرت لماما محاولتها اليائسه لانقاذ الموقف:
- أنا أكلتها و رجعت الصينية.
على غفلة هجم عليا بابا و مسكني من رقبتي:
- أكلتها ده انا اللي هاكلك باسناني... بقولك ايه قسماً عظماً لو سمعت إنك بتكلم البنت دي تاني لقطع خبرك و يلا إنجر قدامي طلع الزفت الخشب علشان أعمل عشة الفراخ لعمتك.
- و يعني هيه عدمت جوزها؟
- إحترم نفسك يا ولد.
ماما:
- معلش يا ضنايا اسمع الكلام و متناحيش... أبوك صايم.
بصوت واطي:
- صايم؟ ده حقه يلفله سندويتشين بعد اللي عمله.
طراااااااااااخ... آه يا قفايا:
- مقبولة منك يا حاج... يا صايم.
طرااااااااااخ:
- خلاص بقه إنت استحليتها يا بابا.
*************************
- الووووو... مي مي... إنت سامعني.
- .............
- مي مي أنا العدوي.
- ............
- ألووووووو إنت ياد يا ابن ....
- سامعك يا جزمه... من غير طولة لسان عاوز ايه؟
- عاوز ايه؟ إوعى تقولي إنك ناوي تلغي؟
- ألغي ايه؟
- جرى إيه يا مي مي إنت جالك فقدان ف الذاكره و لا إيه؟ إحنا مش نازلين النادي النهرده لو لغيت البنات هيقطعوك.
- مش أكتر ما أنا متقطع.
- بتقول إيه؟
- بقولك مش أكتر ما أنا متقطع...
- شكلك تقلت ف الفطار.
- لا وحياتك أبويه اللي تقل في الضرب.
- بطل شغل فوازير رمضان ده يا مي مي و قوم إلبس و اتشيك كده.
- بس أنا كل حته ف جسمي بتوجعني ابويه خلاني أطلع (شويه خشب) للسطوح و الشويه بتوعه دول كانو ييجوا على حمولتين ربع نقل.
- معلش قوم يا بطل بس إنت أول ما تشوف النادي و جمال النادي هتفوق و كل الأوجاع هتروح... يلا بقه.
- طيب إقفل... أما أقوم ألبس بسرعه قبل ما بابا يظهر و ساعتها من هخرج من باب البيت إلا على باب الجامع.
*************************
لسه هنزل السلالم سمعت صوت البوابة و هيه بتتقفل... ده بابا... طلعت الدور التالت جري استخبيت على ما سمعته بيدخل الشقه و بيقفل الباب و ف ثانيتين كنت خارج... و أنا ف الشارع سمعت صوته:
- نزل امته يا نجاة؟ مش قلتلك متخليهوووش ينزل... لا حول و لا قوة إلا بالله.
رنيت على قدرية أول ما وصلت على أول الشارع:
- يوووووه فتحتي عليا ليه يا قدورة؟
- بقولك ايه مش هستناك على أول الشارع زي ما اتفقنا أحسن الاستاذ شرّي...
- هههههه قصدك خيري.
- ايوه هوه... أحسن يشوفنا... انا ف التاكسي دلوقتي هستناك قدام النادي...سلام
- طيب سلام
وقفت مع قدرية نستنى باقي الشله....الواد العدوي ده معاه حق أنا أول ما شميت نسايم النادي من بره حسيت بالطاقه بتدب فيا...بصيت ف الساعه... الساعه 8 الجماعه لسه مجوش ليه؟ ... ايوه شفتهم البت في في بتضحك مع كبّو و بتديه بالبونيه في كتفه (كأنها ماشيه مع كيس ملاكمه مش مع واحد) و جايدا ماشيه هاديه كإنها رايحه جنازة اما البت الهبله جي جي فتجري زي العيّل العبيط قدامهم و عماله تشاورلي بدراعاتها كأنها ناولة من الطياره...قدرية قعدت تضحك:
- هيه جي جي بتعمل كده ليه؟
- الظاهر إنها بتعمل تمارين بعد الفطار...
صرخت:
- بت يا جي جي اعقلي فضحتينا.
أول ما وصلوا عندنا بصتلي جي جي بنرفزة:
- بتزعقلي في الشارع و بعدين حد يكلم حد و بينهم و بين بعض تلاته متر.
- يا سلام ياختي واخده بالك من الأصول أوي و مشيتك اللي عامله زي مشية عتريس الأعور و الأهبل.
- مين عتريس الأعور الأهبل.
- إنتي مالك إنتي المهم إنه واحد أعور و أهبل.
جايدا:
- إنتم هتقضوها خناق؟
أنا:
- لا أنا بس بعلمها الصح... إزيكم يا بنات؟ إزيك يا في في خفي ايدك مع على كبّو الواد دراعه وقفت.
كبّو أخدني بالبوس و الأحضان:
- الله يباركلك يا ريس... واحشني ياض.
- و إنت أكتر... إزيك يا جايداً أختك عامله إيه دلوقتي؟
- كويسه الحمد لله.
- الحمد لله... عدووووي باشا.
هجم عليا بطريقته اللي عامله زي طريقة إنسان الغاب:
- حبييييييييييبي يا مي مي.
قدرية:
- إزيكم يا بنات؟
بصدمة و ف صوت واحد:
- قدرررررررررريه!!!
- ايوه قدرية يا أندال.
و قبل ما تفتح قناة الدرامى غيرت التردد:
- بما أننا إكتملنا يلا بينا ندخل... بلا تضييع وقت.
************************
قعدت قدرية تزن و تشتكي من ساعت ما الحارس اللي عالباب عمل مشكله معانا و مكانش **** يدخلها... فضلنا نجيبها يمين و شمال و هيه مصره على النكد... يا بنتي ما إنتي دخلتي خلاص...برضه شغاله على نغمة صعبت عليا نفسي و البنات شغالين زنب من تحت لتحت شويه يهدوا فيها و شويه يقولوها كلام يولعها "اشمعنى علق عليكي انتي يا قدورة"..."بصراحه مكانش ليه حق"..." إنتي لازم تعملي عضويه و تحطي الكرنيه ف عين الكبير"... بصيتلهم و بعدين بصيت للعدوي و كبّو اللي شاورولي بصمت إن الموضوع شكله مطول.
أنا قلت مش طالبه نكد لفيت بعنيا ف المكان مرتين لغايه ما رست عنيا على حتة بسكوته واقفه لواحدها بتبص في الموبايل كل شويه... ايه الرقه دي؟ يا ترى لما تتكلم بتكون رقيقه زي شكلها و لا بتقلب على قدوره... أخدت من العدوي قلمه:
- خمسه و جاي يا رجاله.
و مشيت نحيتها:
- يا آنسه.
اتلفتت ليا:
- أيوه.
مديت ايدي بالقلم:
- القلم ده وقع منك؟
بصتلي و بعدين بصت للقلم:
- لا ده مش بتاعي.
- بجد؟ طب سوري أصل أنا لقيته على الأرض و لما شفتك واقف محتاره كأنك بتدوري على حاجه افتكرته بتاعك.
- لا... ده أنا مستنيه صاحباتي إتأخروا عليا.
بصوت واطي:
- حد يتأخر على الغزال ده؟
- بتقول إيه؟ مش سماعاك.
- لا لا مفيش حاجه... طب بقولك بدام همه إتأخروا عليكي بدل ما تقفي لوحدك تيجي أعرفك على شلتي.
بعد تردد:
- أوك.
مشت معايا لمكان ما الكتيبه بتاعتي واقف و ف طريقنا قلتلها:
- م الحق أنا ما إتشرفتش بإسمك.
- جنا.
- عاشت الأسامي يا جنا.
- ميرسي... و إنت؟
- مي مي.
ابتسمت:
- اسمك ظريف.
- متشكر.... ادينا وصلنا...أعرفكم يا جماعة.
اول ما البنات أخدوا بالهم من البنت وقفوا على حيلهم و بصوا بكل تحفز:
- أعرفكم جنا... جي جي... في في... جايدا... و ده العدوي...كبّو.
- نايس تو ميت يو.
قدرية مصمصت شفايفها قمت زغدتها بكوعي...اتلمي و متعلقيش، جايدا اللي مشرفانا مدت ايدها و سلمت عليها:
- فرصه سعيدة يا جميل.
- أنا أسعد.
بعد السلامات رجعت قدرية لنغمتها و هيه بتبص على البوابة بحقد كأنها مركبة ليزر ف عينيها و ناوية تسيّح الحارس... واضح إنها مش ناوية تنساله اللي عمله معاها على البوابة.
كانت جنا كل شويه تبص ف الساعه فقلتلها:
- ها؟ لسه مفيش أخبار عن أصحابك؟
كشرت... بس حتة تكشيرة... و الله عسلية...عسسسسسسسسليّه:
- لا... محدش فيهم طلبني.
- طب بقولك ما تيجي نطلع نشوفهم على البوابة.
- أوك.
جي جي و في في و قدرية بصوت واحد:
- إنت رايح فين يا مي مي؟
- طالع عند البوابة و بعدين جاي.
قدرية برخامة:
- على فكرة يا مي مي شعرك منكوش خالص... روح الحمام اظبطه.
لسه همد ايدي على شعري قالتلي جنا:
- بالعكس ده شعرك حلو أوي.
زغرتلها قدرية بس الحمد لله البنت مأخدتش بالها... ابتسمت:
- و من غير جل على فكره.
العدوي ضحك و بصلي " إنت هتستظرف.. متضيعش فرصتك مع البت"
بصيتله " إش فهمك إنت... إتفرح على عمك"
- يعني التسريحه اللي انت عاملها دي من غير جل؟
كبّو:
- ايوه اصل علبة الجل بتاعته خلــ...
- ههههههه بطل خفافه يا كبّو...ايوه من غير جل... كريم بس... اصلي مش بحط جل ف رمضان.
كنت متوقع إنها تكشر عن أنيابها زي بنات المدرسه و تقولي اييييييييه الاستظراف ده بس دي بقه بصتلي برقه... يالهوي على دي بصه:
- ليه؟ مش بتحط جل ف رمضان؟
- أصله... أصله بيفطر.
البت بربشت بعينيها كأنها مش فاهمه.
ميلت على كبو و العدوي:
- بصوا بقه يا شباب معاكو ربنا.
لفيت للبنت و قلتلها:
- يلا بينا...بصي بقه هقولك ازاي بيفطر... اثبتت دراسات علميه اخيره ان الجل.....
بعدنا و أنا حاسس إن في حرقان في ضهري من نظرات البنات... ده لو النظرات بتقتل كنت وقعت و أنا بطرش دم.
بعد ساعة تليفوني رن:
- ألو ايوه يا عدوي.
- إنت فين يا إبني... أنا زهقاااااااااااان؟
- أنا مع جنا و شلتها.
- كده يا واطي تبعنها؟
- و انا اعملك ايه إذا كان قدوره مصممه تضرب اليوم لو كنت اعرف إنها هتعمل كده مكنتش جبتها.... بقولك ايه روح البنات و تعاله تاني انت و كبّو.
- اروح البنات؟ طب اقولهم ايه؟
- قولهم مي مي باباه تعب فروح.
- طب و لو قدورة عرفت إن ده مش صحيح أطلع أنا كذاب؟ هيه جارتكم و ممكن تعرف.
- لا متخافش حصل منكش النهرده هيخلي قدورة متتصلش بينا لفترة.
شاورتلي جنا من بعيد فشارورتلها..جاي:
- يلا بقه يا عدوي سلام.
قفلت التليفون و رحت لجنا و صاحباتها البساكيت (جمع بسكوته) و يلا بقه.....
زيادة ف المعارف و أهو اللي جاي أحسن من اللي واقف
أشوفكم بكره
و خدوا بالكم و لو هتخرجوا متخرجوش مع ناس نكد
و لو حصل متخلوش حاجه توقفكم و لا تضرب الخروجه
إقلبوهم و أعملو زيي
زياااااااده ف المعارف... و إقلبوا اللي كان معاكو واقف. |