البارت 30
دخل وشاف شكلها الباكي والتعبان رفعت راسها وشافت فارس قدامها اول ما طالعته قالتها بكل تعب و انهيار
غادة: انا موافقه موافقه
ونزلت راسها على الطاولة وصارت تبكي بكل قوتها
فارس قرب منها وهو مستغرب من حالتها صار يمسح على ظهرها بكل حنيه
فارس: غادة شفيك ليه كل هالدموع اذا ما تبيني خلص بس لا تبكي ما اتحمل اشوفك بهالشكل
غادة رفعت راسها وطالعته: انا مقتنعه بقراري وابي اليوم الملكة و وما ابي عرس بروح معك
فارس فرح بكلامها لكن بنفس الوقت مستغرب من ردة فعلها السريعه ما توقع منها هالشي وبنفس الوقت هو مو جاهز وهاليومين مشغول بنقلته لبيت عمته والمواضيع الثانيه كل شي اختلط عنده وانه لازم يكلم عمته عن هالزواج قبل لا يصير أي شي
فارس: طيب لكن لازم اروح اتقدملك من عند اهلك عطيني العنوان واليوم بخلص كل شي ان شاءالله انتي لا تحاتي
غادة ابتسمت بعد ما حست انها مو رخيصه عنده وانه حاب يحسسها انها بنت عزيزه وغاليه ما يصير ياخذها من غير علم أهلها
فارس طلع تلفونه الي كان يرن شاف 5 اتصالات من فرح رجع اتصل عليها ردت عليها وكانت منهارة وتبكي
فارس: حبيبتي فرح شفيك اهدي وفهميني
فرح: تعال بسرعه تعال شفتهم والله شفتهم خارج تعال
فارس: من هم الي شفتيهم
فرح: بموت فارس أخاف يأذوني أخاف يرجعوا يعتدوا عليي أخاف يذبحوني ويحرقوني اكثر من قبل
فارس فهم عليها ومن الي تقصدهم وعباله انها تتوهم نفس قبل
فارس: انا لازم اطلع
غادة بخوف: خير شفيها فرح
فارس: مدري بروحلها وبتواصل معك بعدين انتي الحين روحي للبيت وانا بجي باليل لبيتكم
غادة: ان شاءالله
نص ساعه ما يدري كيف وصل بهالسرعه اول ما وقف شاف سعود وواحد واقف معاه عند البيت والواضح عليه مكسور وتعبان
فارس نزل من السيارة بغضب قفل الباب بكل قوته وتوجه ناحيتهم وضرب سعود فوجهه ورجع ضرب الشخص الثاني تركوه يفرغ غضبه فيهم
فارس: لكم وجه تقربوا من هالمكان بعد الي سويتوه والي صار انتوا ما تستحوا
سعود: خليني افهمك يا فارس
فارس: افهم شو وخروا عني وعن اختي ولا والله والله لاذبحك انت وياه وما يهمني بعدها الي يصير يصير
فرح بعد ما شافت الضرب والصوت العالي والمشادة الي بينهم لبست عباتها وتغطت ونزلت اول ما وصلت عندهم مسكت على يد فارس بكل قوتها
فرح: خلنا ندخل فارس هذول ناس قذرة لا توسخ ايديك فيهم
سعود : فرح حبيبتي شخبارك
فرح ما تدري من وين جتها الشجاعه
فرح: لا تنطق اسمي على لسانك وتوسخه ولا تقول حبيبتي
سعود: انا فهمت كل شي هو فهمني كل شي انا جاي معه عشان اعتذرلك
الشاب بدموع حسره: انا اعترفت بكل شي صار وخبرته انه مالك ذنب بالي صار ليلتها
فرح غمضت عيونها بكل قوتها وحست بقشعريره تسري بجسمها لما تذكرت كل شي صار والالم الي عانته والي حست فيه وكرامتها الي انهانت وشرفها الي راح وجسمها الي تشوه كل هذا رجعلها كل ذكرى أليمة ومؤلمه صارت
فرح: بعد شو جاي تقول هالكلام بعد ما خليتني منبوذه من كل الناس بعد ما شوهتوا سمعتي عند كل الناس وشرفي الي دنستوه من يرده لي وسمعتي وجسمي الي احترق بسببكم وكل ألم وحسره وتعب حسيت فيهم من يرجعهم لي وفرح من يردها لفرح القديمه انتوا بإلي سويتوه ذبحتوني وانت صدقت كل شي انقال عني ولا سمعتني وطردتوني انا واخوي من البيت
فارس: الي صار مو شوي يكفي الحاله الي وصلتلها اختي بسببك انتي وياه الله لا يسامحكم
الشاب: الله يخليك سامحيني والله من يومها وانا كل يوم بمصيبه حتى لما تزوجت الولدين الي الله رزقني فيهم مشوهين وما يكملوا شهرين وتوفوا كله من الشي سويته فيك والمرض الي الله بلاني فيه بأعصابي
نزل على رجولها وهو يبكي : الله يخليك اترجاك سامحيني
فرح رفعت راسها لفوق وبعدت رجولها عنه
فرح رفعت اصبعها بتهدي: لا تفكر تقرب مني وتلمسني مر ثانيه واقولها وانا ادعي من كل قلبي الله لا يوفقك فحياتك انت وياه والله يراويكم الي سويتوه فيني فنفسكم
دخلت فرح ووراها فارس الي كان فرحان ومتأكد ان فرح تغيرت وصارت اقوى وتقدر تدافع عن نفسها والي صارلها خلاها تكون اقوى وما تسمح لاي احد يتعدا حدوده معها
دخلت للصاله وشالت الغطا عن راسها وجلست عالكرسي وهي تتنفس بسرعه وقلبها يدق بسرعه ودموعها تنساب على خدودها جلس جنبها من غير ما يتكلم رمت نفسه بحضنه وضمته بكل قوتها فارس صار يمسح على راسها وظهرها بحنيه
فارس: انا فخور فيك صرت اقوى وهالشي الي انا اريده وعاد باقي هالدموع الي ما ابيها تنزل على ناس ما تستاهل دموعك غاليه طيب الحين ركزي معي بقولك خبر بيشيل كل حزن بقلبك وكل ضيق وبتنسي الي كانوا معنا قبل شوي
فرح بعدت عن حضنه وطالعته
فارس: انا قابلت عمتي وطلبت ننقل عندهم البيت اليوم وحابه تشوفك وتجلس معك
فرح بفرح : صحيح هذا احلى خبر سمعته أخيرا بيكون عندنا اهل نحتمي فيهم ناس تحبنا وتخاف علينا وتدارينا ناس تكون سند وقوة لنا
فارس مسك ايدينها : وأخيرا الحمدلله اممم وفيه خبر ثاني بعد
فرح: سمعني اخبارك الحلوة الي مثل وجهك
فارس: انا اليوم بروح أتقدم لغادة
فرح طالعته باستغراب: مين غادة
فراس: غادة دكتورة غادة
فرح والدنيا مو سايعتها من الفرح لخبر زواج اخوها ومن انسانه كثير تحبها ووقفت معها بأصعب أيام حياتها وتعرف كل شي عن حياتهم
فرح: مدري كيف اعبر عن فرحتي الله يوفقك ويخليك لي وغادي طيبه تستاهلوا كل خير اثنينكم
فارس: الحين خلينا نجهز اغراضنا لان عمتي أصرت اليوم ننقل وبعد اليوم بنروح بيت اهل غادة وبمر عمتي تروحي معي وقبلها بأخذك نروح السوق ناخذ الشبكة وهدايا للعروس لان اليوم بنملك وبناخذها معنا
فرح: بسم الله ليش هالكثر مستعجل ما بتطير البنت موجوده
فارس : هذا طلبها
فرح: غريبه يالله ما علينا المهم انك قررت وانها موافقه باقي أهلها يمكن ما يوافقوا
فارس: بنشوف يالله الحين شدي الهمه
.................................................. ....................................
عند سليمان كان الغضب واصل حده عنده
سليمان مسكها من شعرها ورماها على الأرض بكل قوته
سليمان: انا مو غبي وكم مره قلتلك لا تستغبيني انا موق لتلك من قبل سالفة الحمل والأطفال ما ابيها وانتي استغفلتيني
نزل على الأرض ومسكها من ايدها وهدى الي كانت تبكي وتتوجع من الضرب : انا اكره الناس الي تفتكرني غبي وتستغفلني وهالناس امحيها من حياتي واطلعها
هدى مسكت ايدها وهي تبوسها برجاء: الله يخليك لا والله مالي ذنب الله كتب ان هالحمل يصير موب ايدي
سليمان : تتذكري الكلام الي قلته لك قبل وكل شي نبهتك منه صار امي عرفت والحمل الي كنا متفقين انه ما نبي أطفال وحملتي شو بعد ناقص
هدى: والله اني احبك وما ابيك تطلقني
سليمان: من البداية كنت واضح معك وانتي الي بعتي راحتك واشتريتي عذابك انتي ط...
ما كمل كلمته وسمعوا الجرس
سليمان: راجعلك
فتح الباب وتفاجأ بوجود امه قدامه
سليمان: يمه
مهرة بعدته بايدها ومشت لداخل شافت هدى على الأرض وشكلها تعبانه ووجها مبين عليه الضرب وماسكه على بطنها
مهرة: شيل مرتك من الأرض ودخلها الغرفه وتعال بكلمك
سليمان سند هدى ودخلها للغرفه وسطحها عالسرير
سليمان: احمدي ربك ان امي جت ولا كان الحين طلقتك وافتكيت منك لكن كلامنا ما انتهى واكيد امي جت عشان تخليني اطلقك
طلع من الغرفه وهدى الي صارت تبكي بألم وقهر هالشي وهالمرحلة الي ما كانت تبي توصلها ما تبي تحس باليتم والوحده مرة ثانيه بعد ما صارت لها اسره وحياة ترجع مرة ثانيه لحالتها السابقه
طلع من الغرفه وجلس قدام امه وهو متوتر من الكلام الي ممكن تقوله له
مهرة: تحسب ان هذي رجولة انك تضرب بنت مسكينه مالها ذنب بكل لعبتك هذي الي دخلتها فيها وكذبت عليها بكل شي بمشاعرك و احاسيسك اتجاهها عبالك بنات الناس لعبه عندك خاف الله فيها عندك بنت وعند خوات ما تخاف انه يصيرلهم نفس ما سويت بهالمسكينه
سليمان كان يسمعلها وهو مقهور امه وقفت بصفها وهالشي الي ما كان حاسب حسابه
مهرة: وبعد ما حملت منك تسوي فيها هالشي وتضربها اسمعني زين من اليوم تأخذ اغراضك واغراضها وتنقلها عندي بالبيت تسكن معنا وتصير زوجتك قدام الكل ما فيه شي اسمه زواج سر والشركه تطلعها منها وتعيشها معززه مكرمه بالبيت انت غلطت وتحمل نتيجه غلطك مو هي بس تتحمل نتيجه الغلطة انت الجزء الأكبر الي المفروض تتحمل مسؤولية الي صار انا طالعه واذا فكرت تمد ايدك عليها مره ثانيه ما بسامحك طول عمري وباليل تكون عندي انت وهي
سليمان: ان شاءالله
.................................................. .................................
دانيه كانت بغرفتها تراجع كل المحاضرات الي نسختها من زميلتها الي طافتها بالايام الي ما داومت فيها
دخلت عليها فاطمة
فاطمة: ممكن اجلس معك
دانيه كان مالها نفس تجلس معها ومو فاضتلها تحسها انسان فاضيه ومالها هدف بالحياه
دانيه: تفضلي
فاطمة جلست وطالعت الكتب الي قدامها: شكثرها هالاوراق عشان كذا انا طلعت من الجامعه ما حبيت اكمل يكفي سنوات المدرسه والمكده ما فيني بعد جامعه كم سنه وكرف بفضى لنفسي شوي وحياتي احس هالاشياء تأخذ من عمري ما ابي شبابي يضيع على هالاوراق
دانيه: اهاا يعني انتي الحين شايفه ان الدراس هشي تافه
فاطمة: اكيد بالنهايه ادري اني ما بتوظف واذا توظفت الوظيفه موجوده بشركة ابوي وانا ما ابي لا ادرس ولا اتوظف لان بالنهايه راح اتزوج وابغا اتفضى لزوجي وبيتي ونفسي شوي اروح صالون اروح اسوي شوبينج يعني كذا
دانيه بداخلها(يا ربي عالغباء والفضاوة ما الوم سارة لما كانت تكفخك وتطيح ضرب فيك من تفاهتك )
دانيه: طيب وبعدين
فاطمة: هذا والله الا شرأيك تقنعي سامر يطلعنا نتعشا لان كلمته وقال مو فاضي اليوم عنده شغل لوق راسه
دانيه: دام قال كذا يعني صحيح مشغول وانا نفس الشي مشغولهوراي مذاكره الاختبارات عالابواب
فاطمة: ما منك فايده عبالي بتتحمسي لفكره الطلعه والعشا وبتقنعي سامر
دانيه فتحت عيونها على وسعها من وقاحتها وقفت فالسرير وحطت ايدها بخصرها : لا والله الي ما منه فايده هو انتي والحين اطلعي من غرفتي بذاكر شغلتيني
فاطمة: تطرديني
دانيه: افهميها زي ما تفهميها
فاطمة: طيب ان ما علمت عليك سامر
دانيه: لاااه خوفتيني يعني جسمي صار يرجف من طاريه يالله عاد
فاطمه تنرفزت وعصبت وطلعت من الغرفه
دانيه جلست بقهر: يا ربي لا مو معقوله هالبنت مو طبيعيه ابد
.................................................. ........................
عند غادة الي كانت تتجهز دخلت عليها وجود وقفلت الباب وراها مسكتها من ايدها ولفتها ناحيتها
وجود: يا بنت انتي من متى تعرفي ناس نظيفه زي هذي
غادة: ليش مو انا مو قد المقام ولا اشرف هذا تشرف فيني شفتي كيف
وجود: هذا شكله مو صاحي زيك ولا ما كان تقدم لوحد مثلك ما عليه اهم شي اني بفتك منك لكن كل بشروطي وهالزواج ما راح يتم الا فيها
غادة خافت من كلامها خافت لا تفشلها وجود قدامهم
غادة: شقصدك
وجود: انزلي وبتعرفي كل شي
مهرة كانت جالسه هي وفرح ينتظروا غادة تنزل نزلت وجود ومعاها اروى
مهرة: ما شاءالله هذي غادة
وجود: لاااه وين هذي بنتي اروى غادة وين واروى وين بنتي الحمدلله جميله ما شاءالله عليها
مهرة سكتت عنها وفرح الي كتمت ضحكتها
نزلت غادة الي كانت لابسه فستان على جسمها ومبين انحناءات جسمها كان لتحت الركبه باللون الأسود وحاطه مكياج خفيف ومسويه شعرها ويفي اول ما شافتها مهرة انبهرت فيها وبرقتها وجمالها طالعت بأروى وفيها وشافت الفرق الشاسع بينهم اروى حلوة لكن مو بجمال غادة
غادة بسات راس مهرة وسلمكت عليها وسلمت على فرح
مهرة: مثل ما تعرفوا ان نحن نبي نملك اليوم لكن نبي موافقتكم انتوا أهلها ولازم ناخذ شوركم بالنهايه هذي بنتكم
وجود: انا موافقه لكن بشرط
مهرة: تفضلي نسمع شرطك
وجود بكل وقاحة: الفلوس الي كانت تعطيني إياها ما تنقطع مو عشان انها تزوجت تنسى فضلنا عليها والي سويناه لها من صغرها
مهرة استغربت من كلامها وجرأتها ووقاحتها وغادة الي نزلت راسها بحيا وعرفت مهرة ليش غادة طلبت انها اليوم تملك وتروح معهم من العيشه الي عايشتنها معهم والظاهر انها مو مرتاحه
مهرة: احنا موافقين
وجود حطت رجل على رجل: طيب دام كذا يالله خلونا نملك ونخلص
مهرة: فرح اتصلي فأخوك خلينا نخلص ونروح قبل ما يرتفع ضغطي من هالمره
فرح: ان شاءالله
تفاعلكم وارائكم الجميله تهمني
|