[فيتامين سي]

الثاني

مسائكم عافية متابعيني الاعزاء

#تناهيد_امرأة

#بقلمـي_نشوى_السلطان ❤️

باب الحمام مفتوووح شويه ... صحت اكو احد اهنا... مديت ايدي دافتح الباب صار واحد كدامي... صارت ايده بأيدي واثنينه لازمين الباب ..
... رجال مااعرفه مخلي المنشفى على كتافة
ولابس فانيلة سوده بدون ردن وياهه بجامة ...ارتبكت ماعرف بعد شنو احجي ... بقيت ساكته وهو خازرني بعيونة

اثنينه سكتنه سحبت ايدي انة اريد احجي وجان يكول العفو تفضلي

بدون مايباوع بوجهي مشة .. وهو مندار .. ارتبكت وخفت
منو هذا ... بسرعه فتت للحمام وقفلت الباب عليه ...
انداريت وعيني عالباب على الشباك .. مدري شبيه
خايفه من كلشي .. علگت ملابسي ... وبديت اسبح ...
واني فكري بعيدددد محتارة شلون راح اكون نايمة يم انسان غريب
انتبه الجسمي ... وارجع استر نفسي بأيدي
ماعرف حسيت بخوف وقلق صرت اسبح بسرعه
كملت عالسريع لفيت نفسي بالمنشفى تنشقت وكملت لبست الهدوم
واني الف بشعري سمعت صوت سرور وهي تحجي

سرور .. وينها العروسة سبحت لااا تره راح يجي حسن يوديهم للصالون ...

بنين ... يا حسن منو هذا ... لفيت حجابي وطلعت ...
وعيوني تحرگني من الشامبو فتحت الباب ...

صارت كدامي سرور وياهه بنيه ...

سرور ... يلا عروستنا يلا خفي ايدج تريكتي لوولا

_بنين لا بس عادي مااريد اتاخرنا مو ...

الحجية لا خل تاكل لاحكات على المكياج ... تعاي تريكي بنيتي الريوك بالغرفة ...

سرور عمة الصالوووون شبيج ... اكلج اني ماراح اكدر اروح وياج
جتي مرت اخوية لمار راح تروح وياج ...

_ لمار ... مرحبا حبيبتي .. شلونج

_ بنين .. هلا حبيبتي الحمدلله

- لمار ماعليج منهم اني وياج نروح تريكي على مهلج واعتبريني هينه اختج الي ابالج كولي .عمري

بنين ... حياتي اشكرج

سرور ... يلا يلا لاحكات عالسوالف ركض كملي حتى تطلعون

لمار .. اي شبيج سرور هسه تكمل خلي البنية تشوف دربها ...

بنين طبينا للغرفة بسرعة لكيت زهرة كاعده كعدنا تريكنا وكملنا

زهرة ... ويامن نروح ضاري يودينا لو وسام

لمار .. لا حسن راح يودينه يله واكف بره

بنين .. منو حسن ..!

لمار .. زوجي حسن يصير اخوها لسرور

زهره مو كت شجره التعارف اركضضضضن كلشي ولا سهير

بنين .. ههههههه شبيكم يلا جايه ...

زهرة اني راح اخذ البدلة واطلع كدامكم

طلعو لبنات من باب المطبخ واني وراهم دامشي جنت لابسة
فستان طويل بيجي ...وحذاء عالي ... امشي واطگ باحذاء وخجلانه من اهل البيت ..

لكيت الحجية وياهه نسوان كاعدات بالمطبخ يقطعون لحم ...

وكفت سلمت عليهم ...

الحجية هلا بهالصباح هلا روحي يمه شوفي شغلج

اسمعهم يحجون يااا هي هاي والله تخبل جنها فص كلاص شلون حلوه ...

كتلها ... هلا بيج خاله اي ماشي طلعو البنات اني رايحة
طلعت للطارمة .. الشمس بعيوني گوه اشوف ...
باب البره مفتوح .. البنات صعدو بالسياره قبلي

انتبهت ذاااك يمكن الي لكيته بالحمام .. اي يمكن هو ...
شفته فتح باب السيارة وصعد بيها ...

زهرة ... بنووووون ولج اصعدي ...

بنين .. على صيحتها انداريت ... شفت ولد اشگراني صار بوجهي
بقيت ساكته اريد اسلم ...

ابتسملي بتسامة خفيفة وكال ... هلا شلونج

صاحت لمار من السيارة ... بنين هذا زوجي حسن الي راح يوصلنا

ابتسمت كلت العفو هلا بيك ..

حسن .. مبرووك مقدما

بنين شكرك خوية ...

فتحت باب السيارة وصعدت .. بالمقعد الخلف السايق
زهرة جانت بصفي .. ولمار ليگدام ..

مشينة بالسيارة ... حجيت بصوت ناصي كتلها زهرة وسام وين

حسن ... وسام راح عنده شغل محتاجة شي كوليلي..!

رفعت راسي .. عليه انصدمت شلون سمعني ... كتله لا شكرا بس انه داسأل هو وين

* لمار .. اليوم عدهم هوسة العرس خطية تلكي مخبووص خبص

بنين ... يااا زهرة نسيت التلفون بالغرفة ..

زهرة .. شلوون يصير خاف بالجنطة دوري زين

بنين ... دورت والله ماكووو ...

لمار .. شكو شبيكم ...

بنين .. هيج ماكو شي ...

* حسن نسيتي تلفونج بالبيت ..

رفعت راسي عليه عيونه بعيوني بالمراية .. استغربت شكد مركز ويانة واذانه عدنا كلشي سمع ... هزيت راسي اي

* لمار .. يله ماعليه شي المهم انزلو تره وصلنا ..

* بنين البنات نزلو بين ما عدلت ملابسي وشلت الجنطة دانزل لكيت
حسن كدامي فاتح الباب .. رفعت راسي عليه ... شفته صافن بوجهي .. بسرعة نزلت .. بالشارع .. البنات ملتهين بالباب ينتظرون واني وياه بقينا يم السياره ...

***حسن اجيبلج التلفون ...

* بنين وانة امشي سمعته حجة بس مافهمت الي كاله اغتقد جاب طاري التلفون وكفت وكلت

نعم ...

لمار ... يلا بنين ...تعالي

* سكتت وعفته ومشيت طبيت للصالون ...

جان الصالون هوسة هواي بنات كاعدين ..واكثر من عروسة

سلمت وكعدنا .. بصفي لمار قربت راسها وكالت
... تره هاي مو سهير هاي العاملات

*بنين وليش وينها ام الصالون ..

لمار.. هي هيج تتأخر يلا تطلع ...

* بنين ها بس الساعه 11 الا ثلث وهاي شكد عرايس لعد انه شوكت راح تكملني ..

زهرة ... لااا احنا حازجين انت اول وحده ...

لمار ... هي هاي مشكلتها تتاخر يلا تطلع من الغرفة ..

بنين .. يلا شعدنا اول وتالي تطلع احنا مامستعجلين

لمار ... هههههه تريدين تنهزمين من وسام اليوم وين تروحين منه

بنين ... منو انه ..!

لمار اي انتي عجل منو غير انت عروستة ..

بنين .. ايتسمت كتله والله ولا ابالي ..

زهرة ... جتتتتتتتي سهيررر...

بنين ... انفتح الباب وطبت وحده شعرها رافته عالي وبيدها فنجان القهوى سلمت وكالت منو دورها ... صاحت على العاملة وكالت الها سرحيلها شعرها حتى اشتغللها...

* زهرة لج كوووومي هذا دورج ...

* كتله اصبري خاف عيب البنات جايين قبلي ... شفت ام الصالون كعدت عالميز وكالت منو بنين خلي تجي هنا افهم منها ...

رفعت راسي كتلها نعم ... كمت رحت مشيت كعدت مقابيلها ..

سالتني شنو تحبين تختارين تسريحة وعاجبج تصبغين شعرج لو لا

كتله لا عاجبني لون شعري الطبيعي احلى ..
كالت تمام ... ماعرف شكتبت بالورقة

صاحتني الي تساعد ام الصالون اسمه سندس كالت تفضلي اسويلج شعرج ..
كعدت عالكرسي وفتحو شعري بدت تسرح بي سندس

سندس ... اختاريتي تسريحية

بنين لا انه كلت الها على ذوقج ...

سندس .. تمام بس اذا عندج عدسات البسيهم من هسة لا يخرب مكياجج بعدين

بنين ... عدسات لااا انه ماعندي خليها على عيوني احلى

سندس ماشي

بنين ... بدو يشتغلون بشعري وبعدها بالشنا بالمكياج ،.

واتي مغمضة عيوني ... ودترسملي بيهن جان اسمع زهرة
تكول هذا حسن جة عالباب جاب تلفون بنين ...
فتحت عيني بسرررعة

_ سهير .. لااااا خربتي المكياج غمضي عيوني

_ فزيت بسرعه غمضت .. تذكرت لمن كال يم السياره تلفون مدي شنو انه هسه فهمت بس ليش راح جابه شبي هذا انه ماطلبت منه يجيبه

مر الوقت وكملت مكياجي وخذوني لغرفة تغيير الملابس ..
بدلت ملابسي ولبست البدلة ..
جانت حلوه تخبل .. اجتي لمار ساعدتني ... انداريت مراية ورايه
باوعت النفسي ... التسريحة عالية تخبل والمكياج
جانت عيوني مرسومه بالاسود السموكي والحمرة لون برونزي
وخدودي حلوووه طالعه ...واني لون بشرتي حنطية تميل للسمار

طبيت الكل صار يصلي على محمد ... واني فرررحانه وخجلانة بنفس الوقت ... رجعوني كعدوني عالكرسي ..
رتبولي الطرحة الطرحة ... وهيه تثبت بيها وانه صورة امي جتي كبالي... احس نفسي اختنكت ....

كملولي وكمت وعيوني متروسة دموع .. كعدت يم زهرة
جانت لمار يسوولها مكياج

وسام كل شوية يتصل يحاجي زهرة حتى يجون ياخذونا ..

انتظرنا اشويه كملت لمار ... وره عشر دقائق كملنا

صارت صوت الهرونات وكالو البنات هاي زفتكم لو زفتنه

زهرة ... لاااا هاي اهلي جوي ... يلا تهيررررن خل نمشي

انفتح الباب وطبت الحجية ... تهلهل ... وبيدها شال ابيض
كالت هذا خلو على كتافها لان الزلم كلها برة

خلو على صدري وكتفي ...وطلعونا اني والبنات ...
لمار ويايه ويايه ووكأنها اخت ماعافتني .. ساعدتني وطلعنا للباب
وسام اتلكاني اول واحد واكف ... صرت مقابيلة ابتسملي وهمس
ماشاء الله دنكت راسي .. كادني واخذني للسياره .. رفعت راسي
الشارع ملياااااان سيارات واهل المنطقة كلها بره تباوع علينا
الاطفال التموو .. اني فرحانه من شفت نفسي عروس والكل فرحان
بية وبنفس الوقت مقهورة ماكو احد من اهلي ويايه .. جنت اتمنى اي شخص من اهلي يكون موجود على الاقل مقابيلهم لكن للاسف
الشارع للاخير مليان سيارات .. صعدوني بالسيارة ومشينة
السايق محمد والحجية ليكدام واني وسرور ووسام لليورة ..
محمد شغل المسجل .. جانت اغنية (.. شهر كامل عليه المار وانت ولا خبر منك .. )

طلع ايده من الجام اشر للسيارات بأيديه وراينه ...
مشينا واني بس ساكته وسام يحاجيني واني احس جسمي يرجف
حسيت الدنيا صارت تذب ثلج .. برددددانة ...

وسام ... على كيفك محمد لا تكلبنااا شبيك

_ محمد مو هذا حسن ديكسر علينا يريد يطلعني ...

وسام .. اهو محمد مايجوز من سوالفه

سرور هسة فووووك مافرحان ديلا شبيكم ...

الحجية ... عزة عالماتلك هذا منو اليمشي سريع لا يندعم

محمد.. عوفي يمه اني اعمل دبرته .. هههههه

وسام .. هذا شجاه تخبل اليوم .. شبي

بنين ... ماعرف ليش ماارتاحيت اله حسيت امره غريب ..
جان طول الوقت يصير قريب من سيارتنا ويباوع النا ويبتسم
رجعت بيني وبين نفسي استغفرت الله كلت حرام علية يمكن هو هيج طبعه

اخذونا للمصور ... طبكو السياررات ... كالو يلا انزلو ... مد ايده وسام ديفتح الباب جان شخص اخر يفتحة قبلة ..

كال دقيقة وين نازلين ...

رفعت راسي اي هذا نفسه صوته الي سمعته باللبيت ...
انتبهت عليه ايييي هوا ... زين منو هذا.

اسمعه ايكول محد ينزل اطلع بوجهك عالبيت

وساام .. يمعود خل ناخذ صور ..

_ رجع جاوبه الاستديو مليااااان والشارع مليان انت شنو منزلها فرجة للعالم .. محد ينزل

وسام .. ها شلون لا يمعود عالسريع نصعد

* رجع جاوبه كاله اي بس خلي شي على وجهه ...
عافنا ومشه ..جان لابس دشداشة بيضة وياهه يشمغ احمر
لافة على راسة .. اريد اسأل منو هذا .. استحيت رغم جان ودي اعرف منو هو .. شال وسام الطرحة وخلاهه على وجهيي
مد ايده لف صدري زين وكال يلا حبيبي انزلي ..
نزل هو ومدلي ايده ونزلتني وياه سرور

طبينه للمصور جان مكتوب ليفوك استديو توب ...

طبينا اخذنا صور والهوسة بره والجوبي بالشارع ..
طلعت اباوع للجوبي يخبل ... نزلت اول درجة واني مدنكة ..
صار مقابيلي نفس الشخص الي اجانة للسياره
جان واكف مرتجي عالباب ومبتسم صعدنا للسيارات كلنا
وطلعا للبيت ...مشينه مسافة شوي بالسيارة وصلنا
لنفس المنطقة ... للبيت .. جان الباب مفتوح دخلو السيارة جوه
وطبينا ... الحديقة مليانه ناس .. نزلوني ورجعو غطوني بالطرحة
ودخلوني عالبيت ... دافوت ركضت كدامي لمار .. طبت جابت القرأن ... تلكتني بباب الاستقبال شايله بيدها القرأن رفعته عالي ... فوك راسي كالت فوتي وسمي بسم الله ...

ابتسمت انة .. وسام لازمني كتلها بسم الله وطبيت ..

طببونا بالهلال والهوسات شايف خير ومستاهلها ...
اخذوني للصالة ... كعدوني وكعد هو بصفي ...

*وسام ... شووو جيبي هذا كطي خل يولي ...

سحب االشال من صدري وشمره بصفة ...

صفنت .. شنووو يعني ( گطة )

صاح على زهره وهي تهوس وتصفك ويا البنات ..

كال الها هاج اگضبي هذا ... انطاهه الشال بيدها ..

صفنت شديحجون شنو گطة شنو اگضبي ... واني صافنه

صار الكل مقابيلي كووووومة نسوان واطفال ...
مدي الكاع تبلعني ماعرف شبيه خجلللللت ارتبكت ماكدر ارفع راسي .. واني مدنكة .. جتي مره جبيره بالعمر تمشي على العكازة
تريد ادنك عليه حتى تسلم .. وكفت انه .. لزمتها من ايدها
بوستني من راسي وكالت ... يمه وسام البنية بنتنا ماريد بيوم تقهرها
ماوصيك عليها بعد جدتتك

وسام ... انتي وياهه بالكلب جده استريحي .. كام الحيلة بوسها وكعدها بصفي من الجهه الثانية ..
جانت اديها كلها مدگدگة وشم امهات قبل .. وجهه ابيض احمر
طويله ضخمة .. اندارت عليه وكالت يمه اريدج هالشهر حبلة
مو تكولين ماكتيلي ...

* صفنت عليه وانداريت اريد اعرف تحجي ويايه لو ويامن

كتلها ويايه تحجين ...

ضحك وسام بصوت عالس كال الها جده ان شاءالله ماتمر السنة والا
وليدي بيدج ...

الحجية ... اييييي بعد جدتك ان شاءالله ... اكوول يمه خاف تريدين تروحين للحمام ... صاحت يولن وديتنها للحمام

* دقيقه لا ليش اروح احجي صوت الديجي عالي

كالت يلا ودنها اسستعجلن ...

جتي لمار كالت ها بنونه تريدين تروحين للحمام

قربت راسها عليه ... كتله لمار منو كال والله ماريد اروح اصلا استحي اطلع

لمار ... دكومي اليوم الحجية تخبصج خبص بعد شيخلصج

وسام كام كال اروح اشوف ربعي واجي ...

طلع والحجية بصفي اطك بعصاتها وخازرتني .. كالت يله شو مارحتي ..

كتله اي هسة .. كمت بسرعه امشي واتعثر بالبدلة ولمار تضحك عليه ... اخذذتني للممر. شوي خفت الهوسة ..
كتلها لمار هاي شكو شبيهم ويا الحمام

لمار .. باعي هاي جدتهم مثل الشيخ بالبيت وكلمتها لازم ماتصير اثنين انتي شتكولج نفذي ههههههه

ها زين وهسه شسووري

* لمار طبي للحمام يعني شتسوووين .. ههههههه

بنين ... ماشي راح افوت بس عفية تلفوني عد زهره شوفي وينه دخابز خالاتي هسه اتصلو عليه ...

لمار هسه ززهره ملتهية بالركص هيه واللشلة عالموم راح ادوره وارجعلج

بنين .. ماشي بس باتتاخرين تره انة استحي...

لمار .. دقااايق وارجع ...

بنين راحت لمار واني بقيت يم الباب وحدي .. بالممر ومقابيلي طفل يخبل .. يطلع عمره سنه شايل مميته ويمشي ... صرت اكزكز عليه مدي اموته بوووسات ...انداريت دافوت للحمام ...

وجان اشوف بالممر من بعيدد هو نفسه ااشخص ماشافني هو بس اني شفته شايل بيده صندوگ ماي ويصيح عليهم الماي الشرب ليششش حاررر ...

بهالاثناء هو عبر واجت لمار كالت تلفونج مخلص شحن راح يشحنو

طبيتي للحمام ...

بنين .. هااا لا بس ماريد اروح ...

لمار عجل امشي فوتي واذا كالت نكول راحت ههههههه

بنين ... ههههههه ماشي يله ...اخذتني ددانمشي .. وجان اتكول
لمار تعاي شوفي العرس بره ... اخذتني للغرفه الثانية ...

كتلها غرفة منو هاي ...

لمار .. غرفة سرور ... طبينا وسدت الباب وراهه .. كتلها هم زين جبتيني هنا .. خل اشوووف مكياجي خما مخربط ...

وكفت عالمراية داباوع النفسي ولمار راحت للشباك فتحت الستارة تباوع للناس الي بره ..

لمار ... تعااااااي بنونه شوفي شوفي ...

بنين شنوو .. مشيت سريع رحت يمها

لمار ... دشوووفي الجوووبي شكد حلووو

بنين ... الله يخببببل شكد حلو ... هاي شنوووو الله

لمار .. هذا حسن الي ديلعب الجوووبي شوفي ثاني واحد ...

بنين ... اي اعرفه غير الي وصلنا

لمار .. اييي عفيه هو زوجي

بس هاي شنو يخبل يركصووون

لمار .. شبيج ليش يمكم مايلعبون جوبي

* بنين لا يهوسون اي بس انه ماشايفه الجوبي اول مره اشرفه

لمار.. لا يمنه اختصاص جوبي حتى احنا البنات نلعب جوبي ههههه

بنين ... سؤال ابو دشداشة البيضة الي لازم راس الجوبي وبيده سبحة منو هذا ....

لمار... ياهوووو

بنين شبيج هذا الي بيده سبحة سودة .... !

يتبـع ... ❤️ ارفعولي المنشور لطفآ❤️

تعديل للبنات تحياتتنا للاخت سندس الكوافيرة الي جانت تساعد سهير وهي الي سوت شعر بنين ومن خلال القصة كدرت سندس تتعرف على بنين هههههههه شلون صدفة









تناهيد امرأه البارت 3

#تناهيد #إمراة
بقلمي #نشوى السلطان
بنين ... سؤال ابو دشداشة البيضة الي لازم راس الجوبي وبيده سبحة منو هذا ....
لمار... ياهوووو
بنين شبيج هذا الي بيده سبحة سودة .... !
* لمار ... هاااا هذا ضاري شبيج اكو وحده ماتعرف حماهه
بنين .. ها لا والله انه شفته قبل هالمره بس استحيت اسأل
لمار .. اي هذا اخو الوسام ... شوفي شلون يلعب هلا برجاال الجوبي هلا ...
بنين الله كون هسه انه بنصهم ...
لمار .. لازم تريدين تموتين يولي ههههه
بنين ... لا انه ادري وحتى عدنا نفسكم عيب انه ادخل بنص الزلم
لكن الدبجة حبيتهاااا
لمار .. شوفي ضاري عاف الجوبي .. وراح كعد بعيد
بمين ... ها وليش يعني..!
هو هيج طبعه موزين كام ولعب وياهم ...هاالسوالف انطيها الحسن تعرفين هذا حسن تزوجته عن حب حاربت الدنيا كلها لأجله
* ها ياعيني ... خطيه ربي يسعدكم
* لمار ويسعدج حياتي ... كون يجي الطفل الي يمله علينا البيت
لمار امين ان شاءالله حبيبتي ... اكلج مو جن اتأجرنا عيييب ماطلع هذا حمام هههههههه صارلنا شكد
لمار .. اي يلا شو احنه نسينه نفسنا ههههه
اخذتني لمار وطبينا لغرفة الخطار ... اول مافتت صار مقابيلي وسام .. اجة گادني ورجعنا كعدنا بنفس مكانه
.. زهرة والبنات جانو يركصون .. والهوسة والاطفال وياهم واكفين ... انه رغم بوسط هوسة جبيرة لكن احس نفسي وحيده لان ماكو اهلي وياية ..،
اللي كاعدات النسوان كلهن يتشاورن وكأن كائن غريب ودخل بينهم .. عينهم عليه وماعرف شيحجون صوت الديجي عالي
مر الوقت وصارت الدنيا لليل .. انتبهت للساعة ... 7 الا ربع
الكل ملتهي بالعشى ... ديتعشون ...
التلفون انطيتهم الي دخلولي رمز النت ...
طبيت بسرعة للواتساب ... هبة اخر ظهور منذ 30 دقيقة
كتبت الها ... هباوي اني بخير بعد شوية يزفونا للغرفة
كولي الخالاتي اني اشكرهم على وكفتهم وياية
كوليلهم ا بوسط اهلي لان الناس طبيبن وتلكوني وفرحانين بية
ضغطت ارسال .وخليت التلفون يمي ...
الديجي طفو صار هدووووء والكل ديتعشى تقريبا كملو
اجتي لمار كالت ... اصبلج عشى ..انتي بلية غده

بنين لا عود بعدين انه آكل

الحجية ... اسندي كلبج يمه شنو بعدين جيبولها چفنا ( صحن كبير )
خلوها كبالها ...
بنين .. شنو چفنا ... لا دقيقة لمار
لمار ... هههههه قصدها ماعون ثريد جبير يصير ... دليمية
عليها لحم وتمن ...
بنين ... شنو لا عفية ماريد هسة انوب اني ولبدلة وماعون الثريد بحضني لا اجليهاااا
الحجية ... شنو شو تاكلين هسه امشي لا تكفين كبالي امشي يلمار صبيلها خل تاكل مشوار انوب انزفهم يلا
لمار ... دنكت عليه كالت راح اصبلج عشى وخلي بغرفتج واخليلج فواكة شتكولين ..
بنين لا بس فاكهة كلشي ماريد ...
لمار.. ماعليج اني ارتب العشى واجيج ،
بنين .. داكلب بالجهاز ... وصلتني رسالة من وسام ...
كاتبلي تهيري راح يزفونا .. بدون ماارد طفيت التلفون وخليته بصفي ... كمت اباوع بالوجوه وافرك بأديه ... ارتبكت
عيني عليهم يشيلون بالاكل ومخبوصين .. وانه عيني عالباب
شفت لمياء ماعرف شنو بيدها طبت للغرفة وتطلع
انه بيا حال وهاي توديلي اكل .. لملمو الاكل وشالو السفر
ورجعو شغلوا الديجي ...الف الصلاة والسلام عليك يارسول الله محمد ... ورجعو البنات للركص والهوسات ..
واني اطرافي احسها مثلجة ... دخل ضاري بالممل اباوع عليه بصف للدرج ... ماعرف شحجة ويا امه وعماته وطلع ...
جتي تمشي مريه وهي مبتسمه ... طفت الديجي .. صاحت يبنات
راح يجون يزفوهم ... اللبسن تسترن ...
الحجيه ... منهو الي يفوت خل نزفها اول فال
جاوبتها خالتي ام وسام .. اي كال ضاري فوتوها واحنا نجيب وسام وراهه ...
الحجية عجل طفنا الهذا وخل نوديها
جتي لمار كالت يلا كومي حياتي ... رفت راسي عليه كتله للغرفك مو
لمار ...،ههههههه اي شبيج يلا كومي ...
جتي ام وسام والحجيه والبنات كادوني بصفكة وهلاهل وهوسة
وياهم عمتها يهوسون ... شايف خير ومستاهلها
يهوسون واني امشي واتعثر مدري بالبدلة مدري ارتباك
طبيت الغرفتي تخبل حلوه .. والعطر تارس المكان ...
الغرفه باااااردة ثلج كعدوني عالجربايه
الحجية ... اصبرن اول فال ودنها للحمام ...
انداريت على لمار كتلها شبيكم ويا الحمام ...

لمار ... هي تروح ماعليكم ... امشو اطلعو ...

الحجية ... يمه ااخاف تعتازين شي دكي الباب اني ادز البنوات اليوم بايته هين عدكم .. اريد البشاره
بنين ... ها بشاره شنو ...!
لمار ... دمشووو راح يجون الزم اطلعو...
بنين لمار تلفوني وين جيبي....
لمار ... اي هسة جايه ...
طلعو البنات وسدو الباب وراهم بقيت وحدي بالغرفك ..
باوعت ياربي هذا التبريد منين يطفة الدنيا ثلج
اسمعهم يهوسون ....ويضحكون همه وسام ...
وسام .. يولو الي يجي يدك الباب انعل والديه ..هههه شو فارجوني
اسمعهم يكلوله .. يول جهازك لا تغلقة ديربالك
يجاوبهم ... فارجوووني يلا جدامي ...
بننين ... هو يحاجيهم واني اذني يهم بس ميته خوف ...
انفتح الباب وطب وسام فات وسد الباب رراه .. رفعت راسي عليه باوعت واني خجلانه ابتسملي ويقفل بالباب
جان يندك الباب .. لمار هاي اي هيه
لمار... بنونه تلفونج يمعوده...
وسام ... لا بربج دروحي فارجيني وياهم....
بنين .. لا عفية جيب التلفون انه كتلها جيبي اخاف اهلي يتصلون احد...
وسام... راح اجيبه بس الجهاز ينغلق وبعدين افتحي ... فتح الباب واخذ التلفون منها ورجع قفلة... اجة يمشي وهو بيده التلفون ... انطانياه وكال منين يطفى هذا ...
اخذته منه كتله هسه اني اطفي... طفيته وخليته بصفي ...
وسام ... شنو ماتعشيه... ،
لا انه مااكدر اكل بعدين كلت اكل...
.. يعني هسه موجوعانه حبيبي..،
* لا مالي نفس اكل...داحجي اجة تقرب عليه كعد بصفي...
همس فرحانه ...
سكتت مارديت بس بقيت مدنكة راسي..
* شبي حبيبي ليش ماتحجين..؟
* لا مابية شي...
* زين هسه ليش صاده غادي.. منطيتني كفاج...
مد ايده سحبني عليه... انه هنا كلبي احسه انتهى كتلة
اني اريد انام تعبانه ..

وسام ... تنامين !!!!
اي
عجل العرس هذا المن هي نوم هذا يولي..!
يحجي ويضحك ... انه هنا احس واحد خانكني خوف وخجل وارتباك .. عيوني دمعت ماعرف شصار بية.. اتذكرت امي ماتحملت بجيت شفت نفسي بغربة ...
وسام .. لاتبجين ..حبيبي شبيج اني هين هسه بحسبه اهلج
اني الي تريدي يجرالج بس لا تنقهرين صدكي ماراح اغثج بيوم
اخذني الصدره ... ماعرف احساس غريب سحبت نفسي رجع سحبني .. واخذني اله ...سحب الطرحة من راسي... ورجع صار يفتح بشعري.... وانه رجليه احسهم قالب ثلج خايفه وارجف ...
هوا جان لطيف وطيب ويايه بأسلوبه كدر يقنعني وسلمت نفسي اله
❤️ ومرت الايام ... الي هي اجمل ايام حياتي ..
وسام كلش حباب وطيب وداخلة نقي عوضني عن الحرمان عن الظلم الي شفته عن كلشي واجهته بحياتي الفاتت ..
واهله طيبين وجبابين ... مر على زواجنا خمس شهور
والله فرحنا بحملي دخلت بالشهر الرابع .. وسام يشتغل تكسي
على طريق بغداد سامراء ...
بدت بطني تكبر واحساس الامومة يخبل جنت اتمنى امي عايشة وتشوفني راح اصير ام ...
ف بيوم من الايام .. قبل ماانام بالليل .. وسام بالليل كال الصبح اطلع للشغل ..،باجر روحي شوفي جنس الطفل ..
اذا ولد حتى تصير فرحاتي فرحتين
* بنين ... لا ليش مو بنية حتى تشبه امها ...
وسام ... لا ليش مو وليد( ولد ) يطلع على ابو .. اني اريد وليد اول طفل وبعدها جيبلي 7 بنات ماكو مشكله
بنين ... بعدك على نفس الاسم الي اختاريته..!
اي ومايتغير ان شاءالله اذا وليد ( ولد) نسمي ..عبدالله
واذا بنية الله كريم نلكالها اسم ...
بنين ... ماشي بس كول ولد مو وليد .. كلساع عبالي تريد تسمي وليد ههههههه
وسام ... ها وكت صرتي تعيبين على لهجتنا مو جنتي تحبيها
بنين ... ههههههه والله احبها بس اشاقه وياك ...
وسام .. عجل طفي الانارة وتعاي بسدي نامي اريد اشوف وليدي شلون يتحرك ...
بنين... باجر تطلع للشغل ...
وسام .. اي عجل شلون عندي اجرة لازم اطلع اشتغل حتى اسري مستقبل النا والعبودي
بنين .... ان شاءالله يلا خلي اكوم مدام وراك كعده ...
كمت طفيت الاناره وجيت نمت على ايده ... اخذني الحظنة
نومني ...نمت ...
كعدت ساعه .. 5 ونص الصبح على صوت الاذان ...
فزيت لكيت وسام كاعد وصافن بوجهيي...
* كتله حبيبي شبيك خمو مريض... رفعت نفسي من الفراش وكعدت
* وسام ... لا والله شو ماكدرت انام... كلساع اكعد اخاف يروح عليه الوكت واني نايم ... راح اكوم اصلي يلا كومي ..
بنين .. يلا انه هم اصلي وياك .. كمت توضينا وصلينا ..
بعد ماكدرت انام كمت سويتله ريوك .. جان الجو بااارد ثلج
امشي بالبيت وملفلفة نفسي بستره وسام ...
اتريك وسام وكمل ... شاف الساعه صارت 6 الا ربع
كال راح اطلع ... فتح المحفظة وطلع فلوس ...
حسب كال هاي 100 العصر روحي لدكتور انتي وامي لو اخذ وحده من البنات ...
بنين ... ليش غير انت توديني...
وسام.. اني شوفة عينج بس الجمعه كاعد ماكدر اوديج
اني اليوم اريد ارجع فرحان تبشريني ..
بالوليدددد قصدك هههههه
هههههه ولد اوليد عادي المهم فرحيني محتاج فرحة منج ..
* الله كريم حبيبي تروح وترجع بلسلامة ...
* طبي جوه بارده عليج ...
اتقرب وباسني وطلع ... سديت الباب وراه
وطبيت للغرفتي .. البيت هدووووء تلفلفت بالفراش ونمت ...
كعدت الصبح ساعة 10 ونص .. على صياح ضاري..
كمت مثل المخبلة ياستار شبي ... لبست حجابي وطلعت..
لكيت الكل مجموعين بالمطبخ ... وكفت يم الباب ضاري منطيني ظهرة . وسرور تصيح ومحمد يكللها بطلي شك الف مره كتلج اني ماعندي شي
سرور... هاي الافلام عبرها على غيري وعلاقاتك القديمة تريد تقنعني الي اتصلت متوهمه ...
ضاري... اشششش حسج كافي الناس راح تسمع عيب
كافي كل جم يوم هوستكم تره مصختوها والله
ينين سرور .. ماتدري ضاري وراهه من سمعت صوته سكتت وكفت يم الباب انه سويت صوت كحيت حتى احسسهم انه جيت
اندار ضاري وسوالي مجال...
فتت للمطبخ وكفت بصف عمتي حجيت بصوت ناصي كتلها وسام مااجة..؟

الحجية .. لا يمه خابر يكول للعصر يلا اطلع...
بنين ... ها ان شاءالله خير... طبيت امشي فتت للممر ...
ضاري اسمعه يحاجي محمد ايكله كافي عيب يوميه سالفه مرتى اذا مامقصره وياك شلك بهالسوالف ...
سرور طبت الغرفتها وسدت الباب ..
انه غسلت وجهي ورجعت للمطبخ .. كتلها عمه وسام كال روحي لدكتور اليوم .. بس انه اشوف نأجلها
ليش يمه تأجليها
* والله ماعرف بس اشوف مشكله عدكم مو مال اطلع
* ضاري .. مشكله عدنا مو عدكم ... انتي واحد من اهل البيت
ليش دوم تبعدين نفسج انتي موغريبة..
انداريت هو ورايه خجلت وكمت وكفت كتله لا انه موهذا قصدي بالعكس انتم اهلي
ضاري... اعرف موقصدج بس اني ماريد تحسبين نفسج غريبة
وخابرني وسام كال اخذ بنين لدكتور تهيرو العصر اوصلكم
بنين ... ان شاءالله مشكور ...
ضاري... على شنو يابه
بنين ... لان راح توديني
ضاري... ههههههه ماشي يابه العفووو ... المهم اني اطلع عندي شغل اكول حجية هذا محمد بس يحجي كلام خابريني اني اعمل دبرته ...
الحجية .. لا تطلع من تطلع يتجاتلون
ضاري ... لا مايسوي شي حاجيته ...
الحجية الله وياك ... شوفي هاي كل مره لمو ضاري يلمون علينا العالم .. هاي السانها طويل ترادد ماتسكت اكللها يمه ماعنده شي تكول لا كبل عنده .. مفجوعتل البين شعلينا بكبل احنا ولد اليوم
بس مايفيدد
بنين ... خطيه خاله جوز تغار عليه ميخالف مصيرها تسكت
الحجية .. تنغار من شنو يايمه شو مكابلها ليل نهار العنده شي يكضبله غير درب ... هاي كل ماتشوف بنت حتى لو بالتلفزيون تنغار منها ...
بنين ... الله يهديهم خاله ... اكوم اسوي وياج الغده
الحجية .. ماتنوشين شي عوفي احنا نسوي اكعدي تريكي
بنين .. خاله والله انه نفسي تلعب الصبح من الحمد كلشي مااكدر اكل
الحجية .. مايرهم يجي الجاهل مگروف افاده من الجوع اكلي يمه
بنين ... زهره وين نايمه
الحجية مو تدرين بيها تنبل مال نوم كعدديها الوجه اليكيشر

بنين ... ههههههه خليها خاله مدلله عد اهلها شتريدين انه اسوي بدالها دانحجي. وطبت سرور
سرور ... عمه اني اليوم اروح الاهلي اذا مافتح الرمز وخلاني اشوف الرسائل
الحجية ... فجعج البين الرمز شنو النوب
بنين ... استهو بالرحمن سرو حياتي ماتسوه تعاي انة وياج اليوم نطلع لدكتور ومناك للسوك
سرور ... والله ماطلع اذا مافتح الرمز
الحجية ... غير يحجن شنو هذا النوب
سرور... عمة الرمز مال المهجوم التلفون ...
بنين .. امشي تعالي عوفي الحجي ... اخذتها وطلعت انه وياهه للطارمة كعدنا بالحديقه ... الجو بارد بس مو هوايه
كتلها .. اسمعي انتي ليش تكبريها ياعمري .. اذا تحسين عنده شي حاجي بالسياسة لا تكبريها وتخلين الكل تسمع موحلوه بحقكم
سرور... ولج مايفيددد يامه حجيت
بنين ... ميخالف هسه انت شلون عرفتي بنيه هو رقن غريب حوز صدك متوهمه
سرور... ماكدر ولج اني ماتحمل يباوع الوحده بالشارع انوب يحاجيهن..
* اعرف والله حقج الغيره صعبة بس بالهداوه ياعمري
عوفي اهلج لا تسمعيهم شي بينج وبينه حلي .. ماشي
سرور ... الله كريم ....
بنين ... لعد كومي نكمل شغلنا انه وياج ونلتهي .. بين مايجي وسام بالي يمه شو اليوم راح يتأخر
سرور لا نوبات يتاخر عادي حسب الاجره ...
بنين ... ان شاء الله يرجع بالسلامة ... كومي كومي خاله وحدها
اخذتها وطبينا للبيت كملنا شغلنا وغسلت الملابس صار العصر واذن اتحظرنا وكملنا . ووسام خابرني كال بعد نص ساعة اطلع ...
صارت ساعه 3 ونص طلعت لكيت عمتي تلبس بالجوايب
كالت كلت السرور تحجزلج يم اسراء الجميلي لان ازدحام عليها
ماشي اني كملت ماعندي شي ...
الحجية .. شوفي ضاري وين.. خلي يجي يودينه
بنين ... السياره واكفه بره بس مادري بي وين ...
الحجية .. دروحي يمه دكي عليه الباب بين ماصلي العصر
بنين ...صفنت والله انه استحي شلون هسه .. عمتي مدت السجاده كامت تصلي وكل شويه اصيح الله اكبر ... المعنى كومي دوري

طلعت امشي لكيته واكف يم المغسلة باللممر ... مغسل ايديه وديلبس بالساعه ...
حجيت بصوت ناصي واني خجلانه كتله .. عمه تكول نمشي
* اي خلي اتهير ..
بنين .. هي مكمله دتصلي
ضاري عجل جايكم اطلعي جدامي عالسياره ...
بنين ... اي هسه ... عفته انه وطلعت امشي للطارمة .. وره شويه اجة هو شايل التلفون يخابر ماعرف ويامن ... صعد بالسياره وعمتي بعدها .. جوه كتله دقيقه تجي عمه ... هزلي راسه اي
شويه وجتي عمتي تمشي .. كال اصعدي يلا ..
صعدت الحجيه ليكدام واني ليوره .. مشينه شويه ونفسي لعبت من ريحة السياره ... هو شافني مخليه ايديه على خشمي ..
باوعلي بالمرايه كال ها افتح الجامه ..!
هزيت راسي اي واني اريد اتقيئ فتح الجامه هو وخفف سرعة السياره كال استشقي هوى هسة شو تخفين
الحجية .. والله عجبتي عليجن انتن بنوات عالوكت والله احبل واجيب محد يدري بيه .. اجيب من هين . واطلع اشجر التنور ...
ضاري ... هههههههه يمه انتن حديد گبل ...
انه اضحك على سوالفها .. وبنفس الوقت لابيه روحي ماعرف شبيه بس اريد انزل
وصلنا للعياده كال انزلو اني اكمل شغلي وارجع الكم بعدين
فتحت الباب ونزلت ... باوعلي بالمرايه كال شلونج هسه اجيبلج دوه
بنين ... شرتله بيدي ماكدر احجي كتله لا ... نزلت اني وعمتي وطبينا للعياده وهو راح ....
العياده جان درج عااااالي بالكوه صعدت خطيه الحجية ..
كعدنا بالعياده شويه تحسنت من نزلت من السياره .. العياده مليانه نسوان ... عمتي كعدت تسولف وياهن جابتها من الستينات ههههه
اني طلعت التلفون اتصلت بوسام ... انطاني رفض ودزلي رساله شويه واخابرج ... قريتها وضميته بالجنطة
شويه وصاحت السكرتيره .. بنين عواد ...
كتلها نعم ...
كالت ادفعي الكشفية وتفضلي ... كمت دفعت وطبيت انه والحجية
سلمت وكعدت كدامي مريه عالسديه دتاخذ الها سونر
وانه بمكاني اسمع دكات طفلها تكللها هاي ايده وهاي رجليه
يمةةةة من يمي طرت لزمت بطني فدوووه االابني حبيبي شوكت يجي وافرح وسام بي ...
نزلت المريه واني صعدت بمكانها ... جت الحجيه لزمت الجنطه
وكفت يمي ...
كالت الدكتور ها حبيبي حامل انت كتلها اي وجايه اشرف صحة الطفل وجنسه اذا يبين
الدكتورة ان شاء الله حبيبتي ... بدت تفحصني وخلت الجهاز
اني گلبي يدك وعيني عالشاشه ...
ابتسمت الدكتوره وكالت ... وكح مايثبت
الحجية ... ها يمه وليد لو بنية
الدكتوره ... جايكم ولد ان شاءالله ...
يتبع ... اعتذر جداااااا جداااا عن التأخير ... والله مالحكت
بعد هذا البارت راح تبدي حياة بنيييييين ... انتظروني
اغلب التعليقات تطالب بصورة مقاربة للابطال
ان شاءالله اليوم لو باجر انزل الكم
توقعاتكم ..
عود غلسي علو الاخطا لان بدون ماراجعت البارت نشرت 😭