[لامارا]

#ابي_والغزلان
#للكاتبة Reem
#البارت السابع


من بعيد اشتاكلك والشوك نار
وكلبي ورقة وخايف عليه يحترك
انت باب الفرح وعيونك العيد
وفركتك وحشة مثل يوم الطبك
ليش صعبة وياك يجمعني الزمان
وليش سلهة ابسرعه لمن نفترك
انه من كتلك احبك مو حرام
كلمة كل احروفهه غيره وصدك
هي لو بيدي القضيه من زمان
جان حطيتك اله اعله العشك
طلعت وشفت سندس ماده راسها خزرتها طبت وسدت الباب اكيد سمعت كولشي واثناء طلعتنا وصل علي وزوجته هي شافتهم انعام وعيطي عيطه هزي المنطقه ولك علي الحك طة مد ايدة على امك
انداريت عليها هاي من كل عقلها ومااحس غير علي يلزمني من دشداشتي حيل ودك ضرب على وجهي حتى بدون ميفهم شى اعرف بيه منتظرها وخوش حجه صارت عياط البنات اخذ الدنيا
كوه كدرت الزم ايده وضربته گله على خشمه ردت بس اسيطر لان حيل اذاني من ضربته بكل قوتي على خشمة اختل توازنه
اني هم بلعسكريه والحروب شفت اشكال يعني اني هم مو طه القديم وتلازمنه هو يضرب واني هم اضرب
علي : ولك ساقط گلب تضرب امي
حجي طه : ولك ماضربتها بس لزمت ايدها
علي : اليوم لو اني لو انت
نهر : املخ بروحي واني اشوف ولد ابويه يتمالخون كدامي وبنص الشارع وامي تعيط وهاي نور حاضنه بتها وتبجي ونوريه تعيط على الناس لازم احد يدخل صرنا فرجه تالي وكت وبين الاخوه حاولت اذب روحي بينهم وجان يدفرني علي حيل بخاصرتي شاغت روحي وشافني طه شون كعدت بلكاع من الالم رفعت راسي واشوفه لازمي علي دك بوجهه وبطنه وعلى صدرة ويعيط ويكول
حجي طه : ولك منحط حقير هاي اختك شون تضربها وامك ماضربتها
جان تطلع سندس وتعيط بنص الشارع
سندس : الحكونا ياناس راح يكتلون رجلي ناس متخاف الله فوك ماباكوه يريدون يكتلوه
نهر : التم الجيران علينا وصارو بين علي وطه وكلها مستغربه ويحاولون يهدون الوضع وعلي يعيط ضرب امي اليوم اذبحه اليوم انعل شرفه
وناس مصدومه لان يعرفون اخلاق طه وادبه بس هم الناس عليها الظاهر والي كعد تشوفه انعام تعيط وتصيح لك اضربه تعدى على امك وعلي يعيط لك كله ولا امي
لحظات مخزيه بحق سمعه ابويه وسمعتنا
لزمو جماعه لعلي والجماعه الثانيه طة
حجي طه : اسمع لك اني ما اخاف ولو ماد ايدي عليها اكلك بس هاي مو تربيتي ولا اخلاقي تبقى امي ولو من هاي اللحظه لا اريد بعد اشوفها ولا تشوفني بس انت دومك عربانه تحركك بيدها
علي : وهسه اشوفك العربانه شيسوي
سندس : عوفهم ذوله ناس حراميه ميخافون الله فوك ماباكو ورثك
حجي طه : طبي جوه (بصوت عالي)
سندس : شطب واني اشوف الساقطات حركن الاول والتالي وفوكاها يردن تنكتل
حجي طه : گتلج طبي جوه لا ابتلي بيج
انعام : ولج زركه ام الشوارع بت الفكر احنا ساقطات لو انتي المشايفه اليوم احرك ابيج وانعل شيب الخلفج
نهر : وجان تجيت امي عليها تكول معركه احد ناس تضرب بناس هلمره العالم حارت متعرف تلزم طه وعلي لو سندس وانعام
سندس : شو تعالي خلي اطلع ضيم گلبي بيج وجان تملخها من شعرها وانعام تضرب بلنعال على جسم سندس وركض طه والناس تفاكك بيهن
نهر : باوعت طفر علي ليجوه ثواني وطلع بيدة سجينه عطت عيطه گلت راح اخويه عرفت علي مراح يفوتها على خير مو الناس التهت تفاكك انعام وسندس عافو علي وهو لكاها حجه وادخل للبيت وجايب السجينه وركض على طة
طة انتبه العيطه مالتي خلته يندار بس سرعه علي وحقدة جان اقوى من عيطتي وجان يضربه لطه
لطمت على وجهي واني اشوف اخويه وكع من طوله متفاجأ يمكن كولشي نتوقع بس متوصل للكتل حتى انعام وسندس وحده هدت الثانيه من شافن طه واكع وايد علي كلها دم
انعام : صخام الصخمك ولك شسويت
سندس : يمه رجلي راح يبووووووو راح طه
نهر : ركض علي اخذ سيارته وفلت والناس عاطت وحارت بطه اني متحملت المنظر وكعت من طولي على وجهي هاي هيه مات جعفر ولحكة طه وبيد منو بيد اخوه وكله من وره انعام
حجي طه : اعرف علي من زمان حاقد علية من زمن ابويه بس متوصل يضربني بلسجينه جانت الضربه بطني اريد الزم سندس هي وانعام خزونا كدام الناس نسوان تتمالخ من الروس باب البيت مكافي اني وعلي هلمرة هنه سمعت صوت نهر ورايه انداريت ومااشوف غير شى يطب بطني نار وكطعتني كعدت بلكاع مكدرت اجر النفس بس واعي داير مدايري بس مااكدر اكوم
ثواني وانشاليت ويركضون وحطوني بسياره وللمستشفى كله هذا واني واعي رغم لازم بطني واكو ولد لازمين ويايه حتى يوكف النزف بس اني لهسه مشايل عقلي شون اخويه اله گلب يضربني هيج وشويه وبدت عيوني تغوش ومحسيت بكولشي وراها
نهر : حسيت احد يذب مي علية فتحت عيني شفت نوريه فواك راسي وتبجي هاي هم ابتلت المسكينه
نوريه : اكعدي فدوة اروحلج ولج اخوتج اطشرو واحد انهزم والثاني مضروب وامج ومرت اخوج بعدهن يتكافشن كومي ولج انفضحنا بلمنطقه
كوه جريت النفس وكومتني نوريه عيوني كوه افتحها باوعت سندس تعد وتصف وامي ذاك الفشار بلشارع والنسوان تفاكك بيهن واكو كم رجال واكفين على صفحه ميكدرون يدخلون لان عركة نسوان واجتي اشواق تركض والزمي سندس ونامي فوكاها ودك ضرب وحده لازمه شعر الثانيه وتملخ بيه دخيلك ياالله شسوي هسه ركضت اني ونوريه انفاكك بيهن ويه النسوان وانعام اتصيح اي ولج ربيها بت النعال تتعدى على تاج راسها
سندس : ماكو غيركم ولد نعال حرامية لو بيج خير مجان اخذتي ورث رجلي الله ينتقم منكم ولج ماتلج شاب وبعدج كويه الله يهدج
اشواق : لتحجين على امي بت الخبازه تاج راسج هي تموتين ومتعيشين بهذا البيت منلفي حيوانات بيه
نهر : دفعت اشواق حيل
اشواق : وخري اليوم اطلع القضى والمضى لج تمد ايدها على امج تعاي ويايه نصلخهت بشارع ونوديها مصلخة لأهلها
نهر : انجبي وطبي جوه وحيل ادفع بيها ونوريه ويايه نريد بس اندخلها وامي واكفه وبيدها عوده الماسحه تريد تضرب سندس بعد طبعاً اثنين نسوان عليها تكطعت لاضل شعر وجهه بس هي هم شرسه ملخت وجهه اشواق بأضافرها وامي كطعت شعرها
جوارينا اخذن سندس وطببنها للبيت واني ونوريه دخلنا اشواق وامي كوه ردت اسد الباب اتذكرت نور هاي وينها
باوعت خاتله وره الباب وحاضنه بتها وتبجي
تعالي نور ادخلي
نور : راح تموتني امج نهر شفتي شصار من ورايه
نهر : يمعوده ادخلي هسه مو وكتها وانتي شعليج كله البله من امي
نور : ابوس ايدج انطيني فلوس خلي اروح لأهلي ماعندي اصعد تكسي لو نفرات
نهر : تعالي ياعيني حتى اذا رحتي ابوج راح يرجعج
نور : ما اريد ارجع والله تموتني
نهر : اصعدي لغرفتج وقفلي الباب عليج واني بس اسكتهن اجيج لتخافين هسه امي ملتهيه عنج مو بحالج ونومي جنات مو حتى الطفله راح تموت من وراكم
نور : وطة شون
نهر : ادعيله اني گلبي نار علية ادعيله لخاطر هاي اليتيمه يرجع بتج تضيع بدونه تعالي
حجيت بهدوء وياها لان وضعها كولش يقهر بله شنو ذنبها هاي تخيلت نفسي بمكانها شجان صار
دخلتها وركض صعدتها بدون محد يشوفها لان امي واشواق ملتهيات يسبن ويغلطن ويردن يهدن بعد على سندس
تأكدت نور بغرفتها وقفلت الباب عليها نزلت اركض واعيط انتم متخافون الله حايرات بسندس وعايفات الولد دمه بطوله
انعام : شيصير قابل طبه مرض
نهر : كمت ابجي واحجي ليش يمه طبه مرض نسيتي هذا تربيتج نسيتي من اخذتي لحمه حمره وحطيتي على صدرج عوفج هو ابن ضرتج بس هو سنين يصيحلج يمه سنين مينام اله بحضنج يعني هذا كله ما هز گلبج من شفتي واكع والسجينه بطنه
انعام : كافي اسكتي وانجبي ولتدخلين
نهر : شون ما ادخل والكاتل والمكتول اخوتي وكله من وراج راح تضيعيهم اثنينهم واحد يسكن الكبور والثاني يعفن بلسجن شحصلتي هسه هااا شحصلتي
جان تضربني راشدي ودفعتني حيل
امشي ولي مني مبقت بس بزر بطني تعلمني شسوي
نهر : وضربتيني وبعدين ارتاحيتي يعني مصار اشهر من خسرنا اخويه وگلت هاي هيه راح ترجع حق اليتيم
انعام : ياحق ام حق
نهر : عبالج مااعرف شسويتي شفتج بعيني والله شفتج بعيني جان تلزمني من حلكي حيل وتفرك بيه أذتني حتى تسكتني لان نوريه واشواق واكفات جان تسحلني من كصيبتي شيغت روحي
انعام : شو تعالي
ودخلتني لغرفتها وسدت الباب
شفتي لج احجي
نهر : بيدها كصيبتي لافتها على ايدها ولازمتني منها على لحظةً تنشلع من راسي من قوه لزمتها
انعام : شفتي لج احجي
نهر : مشفت شى عوفيني عفيه جان تركعني على حلكي حيل حسيت شفتي انشكت وهي قبلها فركت حلكي كمت مااحس بيه من الالم
انعام : نصي حسج واحجيلي شفتي لا وروح ابويه ادفنج هنا اليوم واخليج العمر كله تتندمين
نهر : ماشفت ماشفت وبقت تضرب بيدها الثاني بوجهي راشديات تريد تعرف شفت واني اريد بس افك نفسي منها بس مااكدر لان كصيبتي بيدها
احجي
نهر : راح احجي والله بس عوفيني
انعام : احجي ادبسسز
نهر : ابجي واحجي والخوف مسيطر علية شفتج انتي وسكتت
انعام : وتالي اله احركچ يله تحجين
نهر : شفتج انتي وعلي تبصمون بابا على اوراق جنت اجيب الدوا اله اكعده حتى اشربه فتحت الباب على كيفي حتى خطيه ميفز لان ادري بيه نايم مديت راسي شفتكم مدنجين اثنينكم ركزت وشفت شون تبصمون اصبعه رجعت على كيف حتى لتشوفوني سمعتج تحجين ويه علي على المحامي وشون الاملاك كلها صارت بأسمج
صفنت بوجهي صفنه گلت هاي هيه راح تذبحني جان تكولي بصوت ناصي وكله قوة وتهديد
انعام : الي شفتي تنسي واذا سمعت بيوم طالع حرف تعرفين شنو حرف شفتي السجينه الطبت بطن اخوج اخلي علي يطببها بگلبج واكلهم چلبه وماتت والف عذر اطلع اياج اسمع حرف تنسي اصلاً افتهمتي
نهر : رجفت منها حسيت امي عدها گلب تسويها اذا طه كدامها مدمه مهتمت وهي ربته شون واني افضحها واطلعها حراميه حطيت ايدي على حلكي واشر براسي اي افتهمت
جان تدفعني انطخت بلكنتور وكالت
انعام : ترحين هسه لهاي العرمه سندس وتسكتيها خلي تلزم لسانها لااطيح حظها وابيتها بلشارع لا عبالها البيت بأسم رجلها والله حتى رجلها اشتكي علية واكولهم يحجي على صدام واخلي محد يشوف طوله بعد واسربتها هي وجهالها بلشارع خلي تحترم نفسها وتسد بابها عليها حسها لهسه واصل للبيت بعدني عاقله متدري اذا اريد ادمر واحد شسوي بيه
نهر : دموعي موكفت واباوع بعينها وأشر براسي اي صار
انعام : اطلعي ولتتأخرين
نهر : ركضت على سندس واشهك من البجي اول مره اخاف من امي هيج محسيتها ام حسيتها شيطان بهيئه مرة
دخلت لكيت الباب مفتوح مال بيت طة والنسوان طلعن منه وبس سندس بقت دخلت شفتها واكفه على المرايه مال المغسله وتشوف وجهه شون ملخ من الراشديات والضرب وتفشر وتسب
باوعت على الجهال كاعدين سليل تباوع بلوجوه وحسام لازم اللعبه مالته وحاطها بحلكه ولايدرون شكو انيالكم كون ارجع بعمركم ولا هذا الضيم الي داشوفه
باوعت علية سندس
سندس : امشي اطلعي بره لا اكطع شكو نعال على راسج وراس اهلج
نهر : وجع صوتج صوت الدلالات كافي واسمعيني
سندس : شسمع كولي شراح تسوين يسندس بينا اذا ما افضحكم بلمنطقه واخلي اليسوه والمايسوه يسولف بيكم بس خلي يرجع هذا المكرود المادري مات عاش
نهر : جريتها من ايدها حيل دفعتي كتلها تعالي اكعدي واسمعيني زين وكافي الفضايح الصارت
سندس : مااكعد وامشي اطلعي بره
نهر : عطت بيها فز حسام وكام يبجي
دنجت علية وبسته لتخاف حبيبي هااك وانطيته اللعبه يرجع يحطها بحلكه سكت ويباوع بلوجوه
وسندس واكفه ورايه وتحرك رجلها من التوتر
انداريت عليها وكتلها اكعدي واسمعي كلامي وراها اطلع ومتشوفين وجهي
سندس : اسمعج واني واكفه فضيني
نهر : اني اعرف بيج لسان وكحه واعرف اتزوجتي طة لخاطر تعيشين بذاك البيت وتغيرين حياتج وكولشي ردتي مصار وهسه كاعده بهذا البيت الصغير وعندج اثنين جهال والثالث بطنج
سندس : اذا تدرين حامل شون تخلين امج واختج يضربوني
نهر : انتي هم مقصرتي كلجن ادورن مصلحتجن ولا وحده انتبهت اله شون واكع بلكاع والدم ترسه ترس حايرات بلسان الزفر والغلط بنات الشارع مو مثلكم
سندس : متكولين لأمج واختج هذا الحجي واخوج الناقص الضرب اخوه وفلت اذا ما اخلي يجيف بلسجن
نهر : تعرفين امي دزتلج حجي وكالت وعدت نص الكلام بقت فاكه عينها
سندس : متكدر تسوي شى
نهر : لا تكدر وشفتي اخويه ياعيني علية راح وخسرناه والله واحد مقدم بلاغ بيه نفس هذا البلاغ يجي لطه واحنا عندنا سوابق مباشره يصدكون
سندس : جاي تهدديني
نهر : تعرفين كولش زين اكثر وحده بلدنيا تحب اخوها هو اني وروحي من الدنيا هو اصلاً البقالي من الدنيا بس طة اني غاسله ايدي من اخوتي والله يعلم شون گلبي نار علية وامي لو اعرفها مو كد گلمتها ولا اجي واكول الج استري على بيتج واكعدي واسكتي تره امي گويه وبلفلوس كولشي تكدر تسوي واخويه لا حول ولا قوه ولا فلوس عنده يعني اسهل شى عدها ادوسه برجلها
سندس : شسوي خلي تسوي مااخاف منها
نهر : كلامها مهزوز تصطنع القوه اعرف بيها باوعت عليها بنفاذ صبر
اففف يمعوده بدون عناد وفكري بكلامي زين احنا لهسه مندري طة شصار مني واللع اعلم الايام الجايه شراح يصير خلي عقلج براسج لا حتى هذا البيت تخسري تره الكعد تسوي كله ماله لازمه لا امي راح تنطي حق طة ولا تساعده ولا اصلاً تحن علية ولا انتي بسوالفج هاي راح تحصلين شى منها راح تبقين بس تصيحين وتسوين مشاكل على الخالي بلاش كلشي بأسمها سندس تعرفين شنو معنى كولشي بأسمها يعني امسحي ايدج بلحايط واستري على نفسج وبيتج
سكتت وتباوع بوجهي لتباوعين مراح يفيدج وجهي باعي على جهالج وبيتج ورجلج وانسي هاي العائله ذوله حتى اذا ماتت انعام لتتوقعين اخوتي ينطوه شى لتنسين ذوله ولد انعام ولازم يطلعون عليها وشفتي علي شسوه حتى مهزله رمش ضرب اخون وفلت
سندس : وانتي ليش هيج تحجين على اهلج وكارهتهم
نهر : مو كرهه يبقون اهلي وامي بس طة بعزيه روحي واعرف اذا بقيتو بهذا الحال وبقيتي يوميه مشكله راح اخسره وانتي هم راح تخسرين الاول والتالي وفوكاها ترجعين لأمج وبرگبتج ٣ جهال منين تعيشيهم هي امج بطولج وحدج وزوجتج حتى بس تخلص من المسؤوليه مو عاد انتي وجهالج
سندس : تعبت من الفگر نهر تعبت من القله تعبت من التفكير والحساب قبل ما اشتري شى تعبت اشوف الناس شتاكل وشتشرب وشتلبس وشون عايشين ببيوت تخبل واني حصره علية اللبسه الزينه
من اجه اخوج گلت راح اعيش واطلع من ضيم امي وضيگة الحال تالي رجعت لضيم اقوى
نهر : هاي قسمتج شسوين
سندس : وليش ما اغيرها ليش اعيش هيج بشنو امج واختج ومرت علي احسن مني يجوز شكلهن احلى بس اني هم الفگر تاعبني الخير يخير نهر لو عندي فلوس ارتب واصبخ واداري روحي والله يطلع شگلي احلى بس من وين مكان ما اخذ الفلوس اصبغ بيهن اجيب اكل الي وللجهال
نهر : هواي نسوان مثلج تره مو بس انتي بالالاف وبلعكس اكو اتعب منج وحتى شغل اشتغلن بس حتى يعيشن اهلهن وجهالهن عدا هسه الارامل شگد والايتام شگد وگلهن يركضن على العيشه واكو حتى بيوت وسگف ماعدهن ليش بس تباوعين على عدهم
سندس : وليش ما اباوع حتى النظر ممنوع الله اكبر
نهر : مو ممنوع بس يتعبج ويخليج طول عمرج تعيسه ارضي بلقاسمة ربج الج حتى تعيشين مرتاحه ولتنسين هسه برگبتج اثنين جهال والثالث بلطريق
سندس : چنچ امي من تحچي ماعدها بس ارضي ومد رجلج على گد غطاج لعبتوها لروحي
نهر : لان كلام العقل هذا تره اذا صار شى محد يخسر بس انتي انتبهي على ذوله طيور الذهب الي الله رزقج بيهم
سندس : وهسه المطلوب شنو
نهر : انتبهي على بيتج وعوفي انعام وعوفي ذاك البيت كله بكل الي بيه تره بس اتعبين نفسج على الخالي بلاش ومتحصلين منهم غير المصايب
سندس : وطة شون منو ياخذله حقه
نهر : خلي بس يكوم بلسلامه وهو يقرر الي يريده
سندس : وشون نعرف شصار هسه
نهر : مااعرف بلكت الله يرجع واحد من المنطقه ويطمنا خلي اكوم اروح بلكت يجي سلام وادزه على جيرانه ادعيله احسن ما باقيه تتكافشين ويه الرايح والجاي
طلعت من سندس ورجعت للبيت لكيت امي حاطه رجل على رجل وكاعده على الكرويته (القنفه) واشواق يمها تفرك برجلها فتت بدون مااحجي
انعام : هااا كتيلها
نهر : اي
انعام : وشگالت بت الفگر
نهر : مكالت بس مبين اقتنعت
انعام : واذا متقتنع اني اعرف شون اخليها تبوس الرجلين حتى بس ارضى عليها
نهر : هسه شون بأخويه منو يطمنا عنه
انعام : قصدج علي
نهر : علي شنو اصلاً هذا واحد ميخاف الله وميستحي ولو ابويه عايش جان حط طلقه براسه وذبه للجلاب على سوايته هايه
انعام : انجبي لج ترحيت انتي وطه فدوة اله قابل شسوه غير دافع عن امه انتي غاسله ايدي منج تربيه سز ميغزر بيج تعبي كد متصير شغله وطابكه ويه ذاك الاغم ولا تكول عدها اخوه غيره
نهر : يااخوه وهو هان علية وضربه والله اعلم يعيش يموت بس وروح ابويه اذا صار شى ب طة اني ابلغ عليها
جان ادنج وتركعني بشحاطتها بس ما اجت بيه وعاطت
انعام : امشي لغرفتج لا اجي ادوس على راسج فوكاها لسانها شطوله بعيني خلي تخلص هاي الشغله اذا ما اربيج من جديد مااتسمى انعام
نهر : عفتها وصعدت فوك لان ميفيد الحجي وياها بلعكس كعد تحقد بلزايد
دخلت ابجي والنار تاكل بيه وگلبي نار علية شون ياربي اخويه بين الحياه والموت وذني حايرات بروحهن وبلطلايب والعركات منو يوديني علية سمعت صوت باب غرفه سلام معقوله هو هنا مسحت عيوني وركضت فتحت الباب صار بوجهي يمسح بوجهه
نهر : هاي انت هنا
سلام : لا خيالي شكو تعيطين وصوتج عالي
نهر : انت تعرف قبل شويه الدنيا احتركت واخوتك تعاركو وعلي ضرب طة بسجين وانهزم يتثاوب ويحجي
سلام : اي وشكو
نهر : لك انت بعدك نايم ركز ويايه
سلام : افتهمت وجع لتعيطين وطبهم مرض اني شنو همه مخابيل ويتعاركون على سوالف تعبانه ادخل روحي ليش
نهر : لطمت على صدري انت صدك تحجي لك ذوله اخوتك واحد يمكن يموت والثاني ينسجن وانت ولا انهزيت شنو من بشر انت
سلام : سمعي نهر اني لحد يدخل بيه انسوني لا اتعارك علمود واحد ولايهمني احد طز بيكم گلكم اهم شى نفسي وجيبي والتردو سوه
نهر : مع الاسف عليك عبالي بيك خير ورجال طلعت المره احسن منك هاي سندس التحجون عليها اسبع منك جان يلزم ايدي ويلويها
اااخ ايدي عوفها حقير
سلام : اذا تجاوزتي بعد لسانج اكصه
نهر : عوفني صاير رجال براسي لو بيك حظ جان نزلت وفاككت اخوتك مو خاتل مثل الفار
سلام : طبهم مرض وكتلج مالي دخل بيكم يله ولي
دفعني ونزل
عرفت هذا هم مابيه خير ليش هيج هاي خلفتك يابه بس اثنين بيهم خير واحد سكن الكبور والثاني الله اعلم شصار بيه هسه دخلت ابجي بلغرفه ماعندي غيرهم وادعي يرجع بخير
وره ساعه سمعت صوت سياره علي طبكت يعني هذا من كل عقله جاي شون عين كويه
نزلت على بايات الدرج الاولى اسمع شيحجون
انعام : ها ولك يمعزه وين وليت
علي : افتر ومردت ارجع اله اعرف شصار
انعام : هي هاي سوايه بله لو ميت تخبلت
علي : مشفتي شسوه
انعام : بس مو تگتله خلاص بله مات
علي : طبه مرض
انعام : اي وانت تخلصها بلحبوس مو من امداك ولا بيك حظ حتى من ردتك تصير رجال راح تضيع نفسك
علي: غير مد ايده عليج شو سكتي مدها لو لا
انعام : هاا دفعني راد ياخذ نور وجنات ويروح لأهلها
علي : وانتي يمه تمشين وتصيحين ضربني واني اكول طة ميسويها بس كلت يجوز تخبل وغلط ومد ايده
انعام : هسه شون شنسوي يلثول
علي : مشيت وراهم وعرفت يامستشفى راحو وبقيت هناك لحد مشافني ابن ابوجواد جيرانه واجاني يركض عباله خايف على طه
وكال الجرح مو عميق بس لازم يبقى بلمستشفى يومين اخاف يلتهب او يصير شى
انعام : الْحٍمَدٍ للـّ? گلت بس لا يموت
علي : واذا بلغ علية شون
انعام : ميبلغ
علي : يمه هاي فرصته وفوكاها بشهاده المنطقه كلها يعني يسحلوني مثل الطلي للسجن
انعام : طبك مرض هسه مصرت سبع اله بلسجينه بس اني اعرفه مراح يشتكي وهسه تشوف بس كون هاي الكح.. سندس متاكل راسي وتغير رأيه اني اخذت احتياط دزيت تهديد الها اخاف تفكر تحط راسها براسنا
علي : نشوف وين نوريه
انعام : صيحلي نوريه ونور هاي نور اذا الزمها هسه اشرب من دمها كله من وراها
تعالن نوريه وينج
نزلت تركض هاا عمه
انعام : صيحي اختج
نزلت تركض وتبوس بيد انعام عمه اروحلج فدوة عوفيها لتروح تسوي شى بنفسها وبلطفله
انعام : حتى اطيح حظها هي بكيفها
نوريه : خليها تروح لبيت اهلي ترجع شو سلام ميريدها وهي هم
انعام : وجنات
نوريه : اني اربيها يمي فدوة علي احجي ويه امك والله اشيلها بعيوني الطفله واحنا لهسه ماعدنا
انعام : ونور وين تولي
نوريه : لبيت اهلي والطفله اعتبرها بنتي وحالها من حالنا
علي : يمه خليها تروح لتسوينا مشاكل مكافي الصار اخاف هلمره تشمر الطفله من السطح هاي شخطت ومبقى عقل براسها
انعام : ماشي بس صيحوها اليه اريدها تسمع هاي الكلمة
نزلت نور تفرك ايد بأيد من الخوف ولازمه ايد نوريه
وكفن على الدرج وانعام مقابيلهم
اسمعي لج راح تولين من بيتي ومطبين هنا تنسين هذا البيت وبتج راح تتربى يم نوريه اياج بيوم تكولين اريد بتي
نور : لا ما اكول بس رجعيني
انعام : وانتي نوريه الطفله يمج بس امها تحرم عليها حتى من ترحين لبيت اهلج تعوفيها هنا افتهمتي
نوريه : صار
وانتي امشي لمي ملابسج ومن اطلعين من هذا الباب اعتبري بتج ماتت
ركضت نور تلم بملابسها ماكو دقايق ونزلت تركض مثل الاسير وطلقو سراحه
نهر : باوعت على كولشي صار واكول لشوكت يستمر ظلمكم حتى الطفله ظلمتوها وحرمتوها من امها شراح تكولين لربج يوم
الْحٍمَدٍ للـّ? اطمنت على طة عايش بس منو يداري اخ ياخويه اخوتك اعدائك الك الله بهذا الوكت التعبان
حجي طه : فتحت عيني واني بلمستشفى وبطني توجعني وابن جيرانه يم راسي وسامي
سامي : ها حجي سلامات
حجي طه : ابلع ريك وتعبان واسولف الله يسلمك
سامي : جان متت لو ما رحمة ربك
حجي طه : وشصار هسه
سامي : مصار شى جرح وبمرور الايام يفوت بس اذا تريد تشتكي
حجي طه : لا مااريد بس طلعوني
سامي : لازم تنطي افادتك لان اعتداء
حجي طه : ماعندي شى احجي انضرب ومشفت الي ضربني
سامي : وهاي المنطقه الشافت كولشي
حجي طه : سد الموضوع ماطول عايش كولشي مااريد
سامي : شوكت تضل هيج لخاطر نبيك طيب ولك ذوله ذيابه
حجي طه : بس اني مو حيوان واعرف هذا اخويه طلعني منا سامي لازم اطلع
سامي : ميصير جرحك بعده
حجي طه : روح انطي خبر لبيتي
سامي : صار من ارجع ادز خبر
استسلمت للامر الواقع وبقيت مكدرت اشتكي كافي الفضايح بحق سمعه ابويه
ثاني يوم طلعت وسامي ويايه ولا عافني دمعت عيني لو جعفر هنا جان محتاجيت احد ويمكن مجان صار هذا الشى
دخلت للبيت استقبلتني سندس بلدموع
اول مره تسويها
سندس : الْحٍمَدٍ للـّ? على سلامتك بعدوينك كون
حجي طه : الله يسلمج ادخلي ولد بره
سندس : صار
بقو ولد المنطقه يمي ورادو يصالحوني اني وعلي لان اخوه اني رفضت وگلت كلمن بحالة بس توقعت علي يعتذر ينقهر طلع هو كايل اني مغلطان هو تعدى على امي وضربها هلمرة شوه صورتي كدام الناس بس گلت اني مضربتها كولشي مزيدت شگول وهمه اهلي والي يطلع اسرار بيته كدام الغربه ويفضح عرضه هذا مو رجال التزمت السكوت باوعت بوجه الناس اكو من صدكني لان يعرفني
اليوم ثلاثاء دزيت على سامي انطيته عنوان محسن لازم يجيني حتى ياخذ الاوراق الصحيه مالتي يقدمها بلكت يمددون الاجازه
بس اني هم بالي يمها باجر الاربعاء وموعدي وياها شون اني ردت اروح انهي كولشي شنو ذنبها تتعلق بواحد ما وراه امل
سندس : شبيك صافن
حجي طه : سلامتج
سندس : انت ليش مشتكيت وطيحت حظهم
حجي طه : خليهم الهم الله صعب احطهم بلسجن
سندس : اني توقعت هيج لان دومك تتنازل عن حقك مو اول مره تتهزم ومتواجه
حجي طه : اي اني جبان ارتاحيتي
سندس : لشوكت متكولي والله موتتني بقهري راح اموت من وراك
حجي طه : كومي شوفي الجهال اخاف يلعبون ويأذون نفسهم
شويه واندكت الباب وطب محسن
محسن : هاي شنو سلامتك
حجي طه : كعد بصفي وكتله الله يسلمك
محسن : ولك هذا كله من وره الكليچه وصار هيج بيك لو مسويتلك جدر دولمه وين الكاك بالانعاش
حجي طه : اشش فضحتنا الله يفضحك وياگليجه أبو بطن
محسن : يابه منريد ام التمر اذا هيج خلي تحط بيهن سمسم هم راضين
حجي طه : مو وكتك ولك
محسن : هذا بدايه الحب يخلي الواحد طاير وبعدين طب يوكع على راسه بس يمكن انت وكعت على بطنك مابيك حيل اطير
حجي طه : محسن اسمعني وعوف الشقه هاي الاوراق تقدمها للجنه الطبيه حتى يمددون الاجازه مالتي واريد منك تروح تشوف صبا
محسن : ياصبا
حجي طه : هو اني اعرف جم وحده
محسن : قصدك ام العيون السود
حجي طه : اني ادري اليوم راح ابات بلشارع لو يمك
محسن : اذا مو كد الحب المن تحب اذا مو گله مشاكل وتاكل جم دفره على جم جلاق على جم راشدي وتفلتين لتوضيح الرؤيه ميتسمى حب
حجي طه : يمعود روح الها وكول مااكدر اجي مريض واني من اشوفها مره ثانيه افهمها
محسن : زين اكول الها انضربت سجين
حجي طه : طفرت من مكاني اااخ خرب لك لا كول فلاونزا او صار عنده ظرف
محسن : تدري اذا عرفت بيك انضربت سجين احتمال اتجيبلك ورد وتصير فاتن حمامه وانت عمر الشريف وتمثلون احلى قصه حب وعلية اغاني الفلم
حجي طه :متسكت كوم لك وجيب الاوراق كلشي مااريد منك ولتروح باجر
محسن : لالا سكتت
حجي طه : هسه شون احجي شو ساكت
محسن : خـرب حظي البازه مو گتلي اسكت راح تجلطني وتنومني يمك
لك هاي منوو
حجي طه : تعالي بابا سليل تعالي سلمي على عمو
اجت تمشي مدبدبه وشعرها منا كصيبه ومنا الثانيه والسنون مطشرات والخدود تفاح تخبل
محسن : شالها ويبوس بيها ولك عندك هيج خلفه يلجكم
حجي طه : غير طالعه علية شوفها تخبل
محسن : هاي اخذها لأبني
حجي طه : اكبر من ابنك
محسن : عادي مابيها شى فرق بسيط حجزتها من هسه بقى يبوس بيها وهي تدفع بيه
حجي طه : عوفها اختنكت
محسن : اروح اني ورايه شغل وهم لازم استعد ورايه موعد غرامي
حجي طه : لك لتروح اكعد واسكت
محسن : هههههه والله وكت وشفت الحجي يغار جان يدنج على طه ويحجي على كيفه شنو رأيك هسه اكول لمرتك واطلعك بلدفرات اقلها اوفر عليك فلوس الكراوي وهم امشيك لان مابيك حيل
حجي طه : روح لا اني ادفرك
محسن : هم بيه بله حجي راضي شون مااشوف ام عيون السود تشبه ام غانم وتكملون مسلسل تحت موس الحلاق تسوون ثنائي يخبل
حجي طه : وانت عبوسي
محسن : اخبل موو
حجي طه : ههههه لك لتضحكني وامشي روح وارجعلي وره متحجي وياها
محسن : اذا مرجعت معناها عجبتني واتزوجتها
حجي طه : جان يشمر عليه كلاص المي وذاك طلع يضحك
حجي طه : كاعد على نار والوب هسه يجي هذا تأخر شويه واندكت الباب صحت على سندس فتحته وطبت
حجي طه : ها بشر
محسن : شبشر اسكت وخليها
حجي طه : شصار وكعت گلبي
محسن : غير اجتي بدون گليجه ورزلتها ماعدها اداب الضيافه
حجي طه : من صخم الله وجهك واني وكع گلبي عبالي صار شى ادا ب الضيافه بلشارع
محسن : اخوك هم ماسكت اول مشفتها كتلها انتي صبا
كالت اي وتبلعم باوعت ايدها فارغه كتلها متستحين مجايبه لا كيك ولا كليجه هسه على الاقل خفيفي بس عجين هم راضين خطيه دمعت وخافت وبقت متعرف شنو تحجي
حجي طه : هو صوجي اني المطي الي دزيتك الها
محسن : تالي كتلها اشاقه وياج اني اخوج محسن صديق طه وهو تعبان بس لو شوفها شون فزت وخافت عليك اويلي يلحب خلاني اتذكر ايام قبل مااتزوج وجنت على علاقه ويه المره
حجي طه : هسه عوفنا من هذا الحجي وشصار بعد
محسن : فهمتها ودزت سلام بيدك وكتلها اذا الله قسم الكم تتشاوفون بعد ١٠ ايام وانطيتها الموعد
حجي طه : وانت بكيفك وشمدريك التحق بعد ١٠ ايام يجوز اكثر
محسن : اكثر بدل وروح الها وشوفها المن بعد خابصنا اقلها هم تشوفها قبل الالتحاق وبيومها
حجي طه : اني اريد اشوفها حتى انهي كولشي
محسن : ليش ولك
حجي طه : البنيه صغيره ومالها ذنب ومتدري بيه متزوج
محسن :الشرع حلل اربعه
حجي طه : والي مثلي حتى الشرع حرم عليهم الزواج بس شسوي گلبي دك الها والشده الاني بيها مقصدت شى مو شريف بس اني هم بشر وتأثرت
محسن : الله يعينك بس الله تكدر تتزوجها وتخلي وحده فوك والثانيه جوه شكو بيها
حجي طه : حتى مرتي تشمر صبا من فوك بنفس اليوم
محسن : اذا تعرف مرتك هيج كويه وانت مابيك خير تحب المن ورطت البنيه
حجي طه : صوج هذا دك الها ويأشر على گلبه لك من اشوفها اريد اخرب اعرك واتلعثم بلكلام واريد بس اباوع بعيونها
محسن : حبيتها يحجي
حجي طه : حبيت يمحسن وطاح حظي ومابيدي شى قليل الحيله اني
محسن : اذا هيج ومابيك اي امل الشوفه الجايه انهي كولشى طه تره البنيه تحبك
حجي طه : شمدريك
محسن : من وجهه عرفت رادت تبجي لان عرفت بيك تعبان اني اعرف اقرا النسوان زين وهاي البنيه واكعه وكعه بلحب بس الله اليدري بيها
حجي طه : بس اشوفها افهمها كولشي
محسن : اروح اني لمرتي لتبيتني بلترك يم كواني الطحين صار يومين افتر وعايفها
حجي طه : روح الله وياك تسلم مقصرت
مرت الايام وسندس يوميه تكعد يمي وتحجي براسي تريد اشتكي كتلها ميفيد بعد سقط حقي بس ميفيد
نهر اجتني يوم واحد وبقت تبجي بحضني مطولت غير ١٠ دقايق وراحت اعرف ميقبلون تجي
بديت اتحرك وصحتي صارت احسن وكمت اتحرك واروح واجي ويطيب جرحي
بس القلق ماكلني شگول الها شون افاتحها
وخلصت العشر ايام واني كل ليله اسهر احظر كلام الها حتى متزعل مني
بدلت الصبح اباوع على حالي امشط واكشخ والعطر تكول عريس هو اني رايح انهي كولشي قبل ميبدي المن خابص روحي بعد
وصلت للمكان وجان ساعه ٧ ونص الصبح
انتظر وماكو شوي وشفتها تمشي ونبض گلبي قوي شبيك طة اثكل شجاك وتبتسم نفس ابتسامتها الكل مره اشوفها وگلبي يركص عليها وصلت قريب مني باوعت عليها شگد مشتاقلج لخاطر الله
صبا : صباح الخير والحمدلله على سلامتك
حجي طه : صباح العافيه الله يسلمج
صبا : تفضل
حجي طه : هاي شنو
صبا : علاكه الك والثانيه لصاحبك مردت يرزلني لان مجايبه شى ويايه
حجي طه : الله يطيح حظك يمحسن فشلتنا
صبا : هههههه لا بلعكس خوش ولد وحقه هو مكال شى بس كال من ادزين بعد دزي حصتي لان طه يضمه جوه راسه وميخليني اكل تكول حاط دعاء للحفظ والسلامه مو گليجه
حجي طه : والله جذاب كله هو ياكله
صبا : هههههه عادي مليون عافيه بلعكس فرحت لان حبيتوهاوهاي حصته وكله هم سويت خفيفي المهم ميحجي بعد علية
حجي طه : شحده اكص لساني بقينا واحد يباوع بوجهه الثاني ويبتسم نسيت كل الحجي تعالي نكعد
صبا : يله
حجي طه : تمشينا بأتجاه الزوراء وجان اكو مصاطب كعدنا عليها ونسولف جان اغلب كلامنا على سوالف محسن لو اهلها لو سوالف الجبهه نسيت الوكت وياها ونسيت حتى ليش ردت اشوفها ومكدرت اكول الها كولشي حضرته خلال ١٠ ايام الفاتت
صبا : تأخرت اني لازم اروح
حجي طه : وكفت كتلها اكعدي بس ثواني
صبا : كعدت
حجي طه : اكو شغله لازم تعرفيها
صبا : شنو
حجي طه : اريد تطلع اني متزوج مطلعت صفنت بوجهه وهي كل شويه تنزل عينها من الخجل وتنتظر احجي
مشفت نفسي غير اكول الها صبا اني احبج
سكتت وبس عيونه احس اكو فرحه بيهم
حجي طه : اني شون حبيتج وليش ما ادري خلصت عمري مامفتهم شى منه ومن اول يوم شفتج واكفه وتبجين حركتي گلبي يجوز استعجلت ومتعرفين كولشي عني بس اريد تفهمين شى بأن انتي اول حب بعمري
احجي ليش ساكته ضجتي مني
صبا : اروح اني
وكامت مفهمت شنو ردت فعلها بس بقت تمشي وامشي وراها اوكفي بس احجي وياج
صبا : اندارت وكالت اله شوكت تلتحق
حجي طه : باجر
صبا : نتشاوف باجر
حجي طه : مصدكت من كالت هيج احس الدنيا واخيرا. ضحكتلي نسيت حالي وضعي وكولشي رجعت الطريق كله اغني من الفرحه لحد مرجعت الواقع وهم تندمت لا منهيت كولشي هلمره عمقت العلاقه اكثر اني شبيه ماعندي كلمة وياها بس اشوفها اغير كل قراراتي
سندس : شوف صافن ومره تضحك ومره ادلغم شجاك الضربه أثرت
حجي طه : سندس
سندس : هااا
حجي طه : انتي تحبيني
سندس : شنو
حجي طه : جاوبيني تحبيني
سندس : قابل اكرهك
حجي طه : مو هذا قصدي يعني تحبيني حب حب
سندس : انت مبين فارغ وماعندك شغل وعمل واني تعبانه والجهال شالعين گلبي
حجي طه : تعالي وين رايحه هو شسألتج وهيج تخبلتي
سندس : احسن متفكر بلحب فكر شراح نتزقنب وانت هاي العطله كولشي مشتغلت منين تجيب مصرف
حجي طه : اداينت من سامي واني انطي بعدين اخذيهم من جيبي
سندس : همزين تذكرت
حجي طه : مجاوبتيني
سندس : غير ابوجهالي اكيد احبك
حجي طه : بعيد عن الجهال وهاي السوالف
سندس : اوي اكوم اكمل شغلي
حجي طه : عافتني وكامت زين ليش متحبني صح اني مو رجال رومانسي بس ممقصر وياها حتى متحمل لسانها الطويل وصياحها طول اليوم وتجاوزها كل هذا واكول يجي يوم وتنعدل
حضرت غراضي وصار الصبح بست الجهال وطلعت وشفتها واكفه مثل الورده بنص صحراء وردة جوريه ريحتها اتمنى اشمها وابعدها عن عيون الناس
تقربت منها وسلمنا
ديري بالج على نفسج
صبا : وانتم هم عفيه
حجي طه : اروح تأخرت
صبا : طة
حجي طه : عيوونه
صبا : اني احبك
حجي طه : وكعت الجنطه من ايدي ممصدك السمعته عيدي شگلتي
صبا : تروح وترجع بلسلامة
حجي طه : مااتحرك منا اله تعيديها
دنجت خجلانه وكالت احبك ردت اعيط بنص الكراج ممصدك تحبني
صبا : ارجعلي ولتتأخر
حجي طه : راجعلج ياعيون طه
اول مره التحق والضحكة شاكه حلكي من الفرحه لو بيدي حتى الامر ابوسه والفرقه كلها واول واحد استقبلني محسن ابو راس البله
هاك وتكول مكلت شى
محسن : هله بلمعدله والله وفادت الرزاله بيها ولك هاي علاكه شكبرها
حجي طه : غير انت داك اليتيمه يمها
محسن : هاي البنيه من كثر متسوي گليجه بعد بلعيد متسوي وتقدم صمون مال جيش لعبنه روحها بكل روحه لازم تسوي
شو ساكت طه حجي ولك حجي راضي
حجي طه : وجع كل شويه وكال حجي راضي
محسن :اكو واحد عمره ٢٧ سنه ويصيحوله حجي
حجي طه : اي اني
محسن : من تكبر اصيحلك بيبي للتغير ملينا
كولي ليش هيج ضاحك جنك جاهل جايبين اله ملابس العيد وحاطين الجواريب والحذاء جوه راسه يخاف ينباكن
حجي طه : اسكت مو مال شقه لو تعرف شصار
محسن : هسه تكولي لو اروح للامر اكول هذا جاسوس وعميل لأيران واخليهم يسوك تشريب اصفر للوحده كلها
حجي طه : اكعد اسولف الك
محسن : لعد خبصتنا واني متزوج وحرام علية واني حضرت السجاده والعرقجين من التقوى والايمان وبدي اعيط
حجي طه : مكدرت حبيتها
محسن : وتاليها
حجي طه : ما اعرف وخايف حيل لا اخسرها حطيت روحي بجبهه وروح ابويه اقوى من هاي الجبهه الحارب بيها
محسن : شوف وضعك وفكر ولتضيع كولشي الحب حلو بس تذكر اجاك بلوقت الضائع وكولشي يجي بعد وكته يفقد قيمته وخسائره اكبر من فوائدة
حجي طه : لتخوفني
محسن : اني احبك لهذا هيج احجي وياك انتبه قبل متفقدگلبك وعقلك وياها وانت ممرتب وضعك واهم شى كون هي تقبل بهذا الوضع
حجي طه : رجعت طفيتني
محسن : لصالحك ياخويه مبين اللعبه انگلبت وراح اطيح على راسك
بقيت طول الايام افكر ومرت الاشهر وكمت اشوف صبا خلال اجازتي اكثر من مرتين مكدرت اكول الها على وضعي كل ما اقرر عيونها وسوالفها وضعفي وحبي الها يخليني اتراجع وابطل وهي بدت الدوام مرحله ثانيه وشهر بعد شهر اتعلق بيها اكثر وروحي تموت بيها اكثر
ومر على علاقتنا اشهر بدون حتى مااطرق لموضوع زواجي واصلاً جان ممبين علية متزوج غلطت الشاطر بألف واني غلطتي بعمري كله لو كايل الها گلشي مجان صارت هاي الكارثه
شهر الواحد ١٩٨٦ نزلت وشفتها ومثل كل مره صار حجينا كله عن الحب بس منتجاوز قبل حتى الحب اله حدود نحب بس حب نظيف قررت بنفسي لازم اقنع صبا بوضعي واحاول اشوفلي شغل اي شى حتى اكدر اخطبها الي ريحني امها متقبل تتزوج اله تتخرج يعني اقل شى بعد سنتين گلت بلكت وضعي يتحسن بس على الاقل هي تدري بوضعي سندس متغير وضعها بس بدت تهمل بيتها بسبب حملها وامها تساعدها وشالت ايدها مني تماماً حتى ملابسي اني اغسلهم وكمت مااهتم عادي
بيوم نازل اجازه وجانت سندس تلوب وصايره نار يومين تريد تشرب من دم الجهال گلت يجوز لان مبقى شى واطب بشهرها واعصاب عفتها سمعتها تتبسبس ويه جوارينا انوار وصار كم مره اشوفهن خاتلات ويسولفن اكول نسوان وبينهن
بس من تروح انوار هاي تگب نار شبيهه خبلتني اسألها حتى بوجهي متباوع
جنت نايم الظهرطه بعد يومين التحق گلت شويه ارتاح وخليت سليل وحسام بحضني ونمت واندكت الباب قوي شكو طفرت من مكاني اباوع سندس ماكو صحت بلبيت هاي ماكو لبست ملابسي وفتحت الباب طلعت ام سندس تلهث
حجي طه : ها حجيه شصار شبيج گلبج يريد يوكف
ام سندس : يمه الحك مرتك راح تعزينا وتصخمنا ويه الوادم
حجي طه : شكو احجي
ام سندس : مرتك اجت اخذت فلوس مني وكالت اليوم اهجم بيت وحده ساقطه تفتر على رجلي اله اشهرها بلمنطقه
وحطت العبايه على راسها واريد الحك عليها مالحكت يمه اركض وراها
حجي طه : ياوحده ومنو هاي هسه كاعد من النوم ومهبوط مااخذ عقلي الحجي بالاول
جان تكول
ام سندس : وحده انت على اساس تشوفها كل متنزل وماادري منو مدليها بيت البنيه وراحت اطيح حظها
حجي طه : صبا راحت لصبا.....


يتبع ..