[لامارا]

ابي والغزلان
للكاتبة Reem
البارت الاربعون
(بارت طويل لعيونكم )


من سئلوني صح گالوا انطوك جروح ؟؟
لا گلت للشماتة انطوني عيديه
شايف من تجيك الطعنة من أحباب
هيچ جروحك تحس بيها روحيه
تصور تبتدي تشتاگ للچتال
اذا چف التطعنك بيها حنيه
سليل : فدوه امشي اترجاك وباوعت بعينه اتوسل بيهم واشهك صفن بوجهي ومسح عيني بيده جان يكول
سجاد : جيبي غراضج وامشي لبيتج
نهر : اخذها وروح فدوه
سليل : دخلت ركض للغرفه لكيت البنات كاعدات وبعيونهن الف سؤال وحيره خاصه ريم المصدومه ركضت رشا عليه
رشا .. راح تروحين
سليل : مو سمعتي شكالت
رشا .. مو كتلج لتعوفينا
سليل : موبيدي والله شفتي شصار واني معايفتكم اجي والله اذا ابقى راح تاخذكم وتأذيكم
رشا .. اني راح اطلع عليها
سليل : جان اجرها وين رايحه لطلعين ابد اكعدي وسكتي لتزيدين الطين بله هسه تتخبل بلزايد
رشا .. لعد نخليج تعوفينا هي وين عارفتنا كل كم شهر تجي تسويلها مصيبه وتروح
والله حتى كرهت اليوم الي تزورنا بيه
سليل : فدوه اسكتي وخلي اروح وبعدين نشوف شلون واني قريبه مو بعيده
ريم : شنو اتزوجتي عمو شون يصير
سليل : تقربت من ريم الي احسها ضايعه ومتعرف تفكر
ريمو حبيبي رشا راح تفهمج اعرف يجوز بعدج صغيره ومراح تفهمين بس اعرفج ذكيه وراح تستوعبين الي كعد يصير
ريم : لتروحين وتعوفينا شون اكدر بدونج بلبيت شون اكعد اصبح مااجي ابوسج واشاقه وياج واضوجج وبعدين اجي اراضيج سليل لترحين
سليل : سنين اتوسل بيج كولي سليل تكولين ما ثلل احلى واسهل وهسه نطقتي
ريم : ابقي وبعد مااكول ثلل ابد بس ابقي
سليل : حضنتها حيل وسحبت رشا هم لحضني واباوع غزوله واكفه على صفحه ودمعه بعيونها اشرت الها بيدي تعالي غزولتي اجت تركض وهم حضنتها وبست كل وحده منهن
سليل : راجعه لتخافون ديرو بالكم على نفسكم وعلى عمه ولتضوجوها وخاصه انتي ريم صيري عاقله واسمعي الكلام
رشا .. يله لتتأخرين امشي نساعدج
سليل : اخذ كم شغله واذا طول الوضع اجي اخذهم كلهم
حطيت كم قطعه ملابس والشغلات الضروريه وطلعت
لكيت سجاد واكف بلكراج يدخن وصاير بارود وماما كاعده حاطه رجل على رجل وتهز بيهم من التوتر اما عمه نهر دموعها عشره عشره حضنتها جان تشاورني
نهر : ماما ديري بالج على نفسج
سليل : لتخافين
سندس : فضنها
سليل : باوعت عليها وبصوت كله الم واحس اريد اعيط من القهر بس لزمت نفسي وكتلها
حرامات انتي امي
سندس : امشي اطلعي بره واذا اجيتي هنا اكسرها لرجلك ماطول كسرتي كلامي ولويتي ايدي وضيعتي تعبي انتي مو بنتي
سليل : ابتسمت بأستهزاء وكتلها ومنو كال اني بنتج اني نهر
سندس : امشي لا اكطعج هسه
سمعت سجاد عيطت سندس شمر الجكاره وطب وباوع عليه وكال يله
سليل : احس روحي تريد تطلع شون اعوف خواتي وعمتي بقيت واكفه ودموعي تنزل جان يجرني من ايدي
سجاد : امشي واشر بأيده بوجهه ماما وكال الها
تسوه عمرج مكدرتي تسوين الردتي ومراح اخليج بيوم تسوين وعناد بيج
يله وسحبني وطلعنا وعفنا ماما تغلط وتسب بعلو حسها
طلعنا من البيت ونتمشى بلشارع جان يندار عليه وكال امسحي عيونج منا الناس لينتبهون
اخذت طرف الشال الحاطته على راسي ومسحت عيوني بس گلبي يبجي والله بدون توقف ورم من القهر
اخذ العلاكه البيدي وشالها وبقيت امشي بصفه ومدنجه
عبرنا الشارع شقته قريبه بعد شارعين عنا على الشارع العام
وصلنا للعماره وصعد واني وراه
دخلت للشقه
سجاد : تعالي شبيج واكفه بلباب
سليل : تقربت وكعدت على القنفه جان مسوي تغير بيها مغير التخم والميز مال التلفزيون وحاط ميز صغير كدام التخم الشقه نظيفه مرتبه صح اكو كم شغله محطوطه بشكل هوسه بس نظيفه والكاع تلمع
بقيت مرتبكه ومااعرف شراح يصير وشنو حالي والى متى ابقى هنا
سمعت صوت باب اتوقع فتح باب البالكون مال غرفه النوم يجوز يدخن
بقيت على كعدتي بلربع الساعه وافرك بيدي من التوتر
شويه وشفته طلع من الغرفه واجه كعد بصفي اني مشاعري خوف وقلق واريد ابجي من الصار كله بس اخاف يعيط لهذا حاصره القهره بگلبي
جره نفس وبدا يحجي بهدوء
سجاد : ادري بيج خايفه ومقهوره بس مابيدنا شى هسه شفتي امج شون هوست وتمنيتج انتي ونهر تصيرن اقوى وتكسرون كلامها وتجي حتى نهر ويايه اعرف بيها متتحمل خواتج ثاني يوم ترجعهن بس ااخ كله من وره نهر مسمعت كلام
سليل : احجي ومخنوكه كوه يطلع الحجي مني
عمه تخاف على البنات من خليل وابنه تكول شون اخليهن بيت رجال غريب وشفت حجيها صّـْْ(☑)ـْْحّ منعرف ذوله شنو خلي عمه بلبيت على راس خواتي أمن بس اني هسه بالي يمك
سجاد : يمي
سليل : اي يعني راح تتقيد بوجودي
سجاد : وليش اتقيد اني اصلاً اكثر الاوقات بره واذا على النومه انتي تنامين بلغرفه واني هنا بلهول
سليل : لا عفيه اني انام هنا مااريد اخرب وضعك ومكانك
سجاد : اسكتي ولتناقشين
سليل : عمو عفيه عوفني براحتي انام هنا
سجاد : اسمعيني سليل اني مااعرف شكد انتي باقيه هنا وشون راح يصير التعامل بينا بس اريد كم نقطه تحطيها بالج
اول شى الكلمة الاكولها متناقشيني بيها يعني نوم تنامين بلغرفه وانتهى وغراضج حطيهن هناك ثاني شى شايفه باب الشقه
سليل : اي شبيه
سجاد :راح اقفله عليج من اطلع لان اخاف يصير شى
سليل : شيصير يعني
سجاد : مااريد اطلعين انتي وحدج واخاف عليج لان وكت هوايه اطلع والعماره اكثرها عزابيه خلي اشوف الوضع اذا طول اغير الشقه
سليل : ماشي
سجاد : واي شى تردي كولي لتستحين واخذي راحتج بكولشي الشقه شقتج
سليل : شكراً
سجاد : تعرفين مااحب هاي الكلمة
سليل : دنجت وكتله هسه شسوي
سجاد : شسوين سوي اني طالع
سليل : وين اخاف وحدي
سجاد : لازم تتعلمين اني ورايه شغل والتزامات لازم تتعلمين على المكان لحد متفض هاي الشغله
سليل : ان شاء الله
سجاد : يمج كولشي بلثلاجه واني من ارجع اجيب عشه ويايه
سليل : اسوي اني
سجاد : لا ميحتاج ارتاحي
سليل : عافني وطلع وسمعت قفل الباب
فتحت عيوني وحدي بلشقه حطيت ايدي على وجهي وبجيت اتذكر منظر خواتي ودموع عمه وقهرها
بقيت هوايه ابجي لحد محسيت عيوني ورمن كمت من مكاني غسلت باوعت ماطول سجاد ماكو طلعت اخذت غراضي وسبحت وكعدت مشطت شعري وظفرته
زين هسه شسوي والله ضوجة كمت افتر بلشقه فتحت باب غرفته دخلت افتر ويه كل خطوه گلبي يدك دكات ناعمه وهادئه مديت ايدي على المشط مالته اتلمسه وعلى عطره سحبته وقربته من خشمي وجريت نفس منه احس دخل روحي غمضت واتخيل حضنه اااااااه ياسجاد لو تعرف ابسط شى بيك احبه
رجعت العطر وبديت افتر بلغرفه فتحت كنتوره باوعت والله مرتب احسن من كنتوري صاير بلدفرات عدا مرات الكه هدوم ريم ورشاعندي تلمست قمصانه وتيشيرتات وابتسم ممصدكه المسهم سديت باب الكنتور وباوعت على فراشه جانت جربايه خشبيه ام نفرين بس مو جبيره تقربت منها وتمددت حطيت وجهي على المخده مالته وغمضت وشميتها بهدوء اتخيل شلون نايم وانفاسه وريحته الي بلفراش اخذتني لغير عالم حسيت بقربه مني وتخيلت من جان يشيلني من كثر ممرتاحه وممصدكه نايمه بفراشه بدت تهدا نفسي وغفيت نمت نومه صار سنين منايمه بهيج بعمق نمت ساعات طويله
فتحت عيني طفرت اتذكرت اني بلشقه وحدي والغرفه ظلمه طلعت اركض مرعوبه جان يصير بوجهي
سجاد : شبيج سليل
سليل : جريت نفس خفت لان ظلمه ساعه بيش هسه
سجاد : بلوحده بليل
سليل : شنو حيييل شكد نمت
سجاد : رجعت ولكيتج نايمه عفتج ترتاحين حتى على الاكل مكعدتج كلت شوكت متكعدين تاكلين
سليل : بس لو مكعدني
سجاد : لا جنتي نايمه بعمق ورايحه بسابع نومه
سليل : بكلبي اكول يعني دخل شافني معناها
سجاد : الاكل بلفون مال الطباخ اذا تردين حمي واكلي لتبقين جوعانه
سليل : وانت
سجاد : اكلت وراح انام
سليل : ماشي طبيت للمطبخ باوعت نظيف ومرتب عدا كوب مال جاي محطوط على صفحه فتحت الفرن وباوعت لفه همبركر جبيره طلعتها دافيه مو مال احميها
كعدت اكل بلمطبخ مااريد اطلع واضوجه اخاف نام كملت اكل وغسلت بلسنك
وطلعت على كيفي لكيته نايم على القنفه وحاط مخده جوه راسه يدخن وصافن على السكف ونايم بلبجامه والفانيلا السودا
سليل : تصبح على خير عمو
سجا وانتي من اهل الخير
اخذت علاكتي جانت بلكاع ودخلتها للغرفه واخذت منها فرشه الاسنان فرشت ورجعت دخلت للغرفه وتمددت بجربايته اااخ ياليل اني بلا شى ماانامك مو عاد هسه وفوكاها اني وياه بمكان وحدنا فدوه ياگلبي ارحمني ليش هيج تنبض بقوه
بقيت اتگلب اريد انام ماكو
كمت من الفراش وفتحت باب الغرفه كلت بلكت كاعد طلعت باوعت ساعه ٣ ونص الصبح
تقربت بهدوء لكيته غافي كعدت على الطبله الي كبال القنفه النايم عليها واباوع عليه واحجي بگلبي
شون اتعامل وياك شون راح اكدر اعيش وياك بيت واحد بدون مااغلط وافضح مشاعري اذا انت تجي ساعه انتهي وتبقى عيوني تفتر وراك شلون اذا عايشين سوه
تقربت اكثر قربت وجهي لوجهه حسيت انفاسه اطخ بوجهي غمضت وحسيتهم ااااه ياانفاسك ليش هيج احبك ليش احس كولشي بيه يرجف عليك
ثواني وتحرك وانكلت على الجهه الثانيه وكفت من الخوف وركض للغرفه
دخلت وسديت الباب واتنفس سريع من الخوف بله لو فاتح عيونه شكول اله لازم مااسويها بعد
رجعت لفراشه وحضنت المخده وغمضت ولهسه انفاسه الدافيه احسها وغفيت
كعدت على صوت ركعت الباب وقفلها
كمت ركض عرفت طلع باوعت حاط على الطبله جبن عرب وصمون رفعت راسي شفتها ساعه ٩ الصبح حتى متريك ويايه
دخلت للمطبخ الجاي حار مبين متريك لا وفوكاها غاسل الكلاص مالته
رحت للحمام غسلت ورجعت للمطبخ تريكت ورتبت كولشي ورايه مااريد اسوي هوسه
باوعت على الشقه نظيفه ممحتاجه تنظيف بس ميخالف انطفها وين اروح اخلصها شغل وجان تندك الباب واني نشف دمي من الخوف حتى مكلت منو وشويه واسمع صوت عمه نهر ركضت للباب ماما
نهر : حبيبتي افتحي الباب هاي اني
سليل : عمو قافل الباب من بره
نهر : شنو ليش قافلها
سليل : مااعرف
نهر : شويه واجي
رحت مفوره على سجاد للمحل شنو يقفل الباب عليها
وصلت قريب المحل لان هوسه ورياجيل اشرت لعمران شافني وصاح لسجاد اجه
سجاد : هاا نهر خير صار شى
نهر : بله شكلت لروحك من قفلت الباب عليها
سجاد : ليش رحتي للشقه
نهر : غير اشوفها مكتلي ليش قافل الباب عليها بله صار قدر وانت ماكو شلون بله تموت وانت متدري
سجاد : قابل شصار لان العماره اكثرها عزابيه وشباب صاعده نازله قفلت الباب
نهر : تكدر تطلب منها هي تقفله من جوه ومتفتحه لأحد مو تقفله انت
سجاد : ماكو فرق
نهر : لا اكو سجاد لتنسى هاي سليل انت ربيتها على ايدك يعني مستحيل تسوه شى موزين ولا تكسرلك كلمة
سجاد : هاي الهوسه كلها لان قفلت عليها الباب
نهر : لا بس اذكرك اذا نسيت
سجاد : هاج مفتاح الشقه وشويه واجي وراج
نهر : جيب اخذته وصعدت وفتحت الباب جنت مشتاقه الها اريد اخذها العمر كله بحضني
سليل : فتحت الباب وشفت عمه بوجهي ركضت بحضنها وابوس بيها حيل اشتاقيت الها مو عبالك البارحه عفتها عبالك عمر
نهر : شونج ماماتي
سليل : الْحٍمَدٍ للـّ? تعالي اكعدي
نهر : احجيلي شونه وضعج
سليل : ماكو شى وانتم والبنات ليش مجبتيهم وياج
نهر : خلي هلكم يوم اخاف امج تسوي ملعوبه
سليل : اباوع عمه ممرتاحه كتلها بيج شى ماما
نهر : والله يايمه اكو سؤال وماكل گلبي والليل منايمته
سليل : شنو
نهر : سجاد
سليل : شبيه
نهر : تقرب منج او صار شى
سليل : لا ماما شون تفكرين هيج
نهر : ولج شلون ماافكر واني الليل ماغمضت عيوني خفت تصيرين مرته صدك
سليل : دنجت وكتلها لتخافين ماكو شى واني نمت بلغرفه وهو بلهول ويعاملني ولا كأني موجوده والوضع كولش طبيعي واقل من الطبيعي
نهر : بنتي حافظي على نفسج
سليل : شبيج ماما فدوه ليش هيج تحجين ويايه
نهر : والله من خوفي عليج كتلج گبل واعيدها عليج سجاد ذهب وماكو منه بس ميصلح زوج الج اب اخ عم اي غيرها لا حافظي على نفسج للي يستاهلج ويخليج سعيده مو الي يتعبج
سليل : ليش هيج تحجين والله اموت قهر
نهر : يجي يوم وتكولين صدك كالت عمتي بس اسمعي كلامي لتلبسين براحتج كعدتج نومتج بأحساب لتنسين اكو شاب وياج بلشقه وخاصه انتي مرته وحلاله يعني يكدر يتقرب وكت ميريد لتصيرين مجرد لحظه بحياته يحصلها ويشمرها ولو اعرف سجاد ميسويها وماكو مثل نظافته بس هم ميمنع الحذر
سليل : كافي ماما ماله داعي كلامج عمو مو مال هيج سوالف
نهر : المصيبه خايفه منج مو منه
سليل : هاااا شون يعني
نهر : اخاف تضعفين وتحاولين تتقربين منه
سليل : مو لهاي الدرجه ماما عفيه بديت اضوج
نهر : الله يستر هاج
سليل : شنو هاي
نهر : سويتلكم فاصوليا بس طبكي التمن ادري بيج تعرفين تسوين غدا الكم
سليل : ليش ياماما متعبه نفسج من الصبح وكاعده وتعبانه
نهر : هو اني نمت اصلاً حتى اكعد كلت الهي روحي واطبخ الغدا احسن مااتخبل من التفكير
ويوميه بعد اجيبلج الغدا
سليل : ليش اني اطبخ
نهر : اعرف بيج تعرفين بس مو هوايه اني هم اعلمج واقويج بلطبخ
سليل : لشوكت ابقى هنا
نهر : والله ماادري امج قبل متطلع كالت بس توصل هنا راح اعرف وانفذ كلامي خلي هاي المده تهدا الخبله كون مصيبه تاخذها وتخلصنه اااخ شكد رجفتنا وأذتنا
الله لاينطيها
سليل : عفيه ماما ديري بالج على رشا اخاف تسوي شى وتاخذها مكاني
نهر : شحدها والله اطيح حظها
سليل : المهم هسه نبعد ماما عنها
نهر : الله كريم اروح للبيت خواتج عفتهن نايمات
سليل : بوسيلياهن
نهر : يوصل هاج ماما المفتاح وتعالي اقفلي ورايه
سليل : اقفلي ورجعي المفتاح لعمو
نهر : سمعي اياج تقبلين يقفل عليج الباب ويروح شنو حيوانه ويحبسها لو ميأمن بيج
سليل : شكو بيها ماما غير يخاف عليه
نهر : يخاف وحد وهيج تصرف وحد صار عليج شى شون اطلعين
سليل : قصدج احترك شنو الغريب گبل مو احتركت
نهر : ياستار ولج ماما اسمعي كلامي ولتفسرين الكلام غير
سليل : شسوي لازم اسمع كلامه مااريد مشاكل
نهر : ميخالف هم كوليله لتقفل الباب
اندكت الباب وكلت منو
سجاد : اني افتحي
فتحت الباب ودخل
هاا خاتونه شبيج جايه من الصلح هداده
نهر : والله مو هداده بس اخاف من الاقدار
سجاد : ماشي ابقي المفتاح بس ابد متفتح الباب غير الي والج سمعتيني
سليل : اي
نهر : اروح اني
سجاد : ريحه فاصوليا
نهر : والله خشم شون اشتميت
سجاد : غير الشقه كلها ريحه
سليل : اصبلك
سجاد : لا مجوعان قبل شويه تريكت
نهر : اروح مثل ما وصيتج ماما
سجاد : شوصيتي ياستار منج اياج تسمعين كلامها
سليل : ابتسمت وكتله لا مااسمع
نهر : هاا ولج
سليل : ههههه اشاقه وبستها وعافتني وراحت تمنيت اشوف خواتي ميته عليهن بس همه كالو مو هسه
وراها بيوم كعدت لكيته عايف نسخه من المفتاح وقافلها من بره علكته بسمار وعفته
مر شهر واني يم سجاد حياتنا ابرد من الثلج يمكن قبل يسولف ويايه يكعد يتعارك اي شى يصدر منه هسه ابد يجي وكت الاكل ياكل ويروح ومرات ياكل بلمحل ويرجع بليل يسبح وينام يمكن اذا يريد يحجي ويايه يسألني تردين شى حتى من ناكل سوه بدون حجي والله لحظات احس حتى النفس ممنوع
بيوم بديت اختنك لان لا طبه ولا طلعه وعمه تجي دقايق وتروح واشتاقيت لخواتي وكل مااكول اله اريد اروح اشوفهن يكول مو هسه وماكو حتى شغل اشتغله حتى ملابسه هو يغسلهم ميقبل اسوي شى وطفت الكهرباء وهي شقه وصغيره وبشهر الثامن نهايته آب وموت حر
حطيت الربطه على راسي ولابسه دشداشه مستوره وفتحت البالكون واكو كرسي حديد جريته وكعدت مغرب واكو نسمه هوا صح حاره بس احسن من جو الشقه صفنت على الشارع والسيارات لان شارع عام اباوع على الناس رايحه جايه والناس والعوائل والي يتمشى والي يتسوك هوسه والمنظر حلو بقيت بحدود ساعه صافنه حاطه ايدي على الستاره مال البالكون وصافنه
شويه انتبهت مو البالكون الي بصفي الثانيه بيها ولد شاب يروح ويجي اني شفته طبيت اركض
يعني غير غثيث ميشوفني كاعده الايبقى
طبيت وسديت الباب والبرده ونزعت الربطه وطبيت سبحت ماكو غيرها حتى يروح الحر
بين مسبحت ومشطت شعري اجت الوطنيه كيفت كولش وخاصه جان اكو اوركنديشن (تبريد) بلشقه وهي صغيره من يشتغل تبرد
فتحت الثلاجه اكو لحم مثروم كلت اسوي عشه مخلمه سلكت اللحم وحمسته وكملتها من بصل وطماطه بس اطك بيضه وتكمل طفيتها بين ميجي اكملها حتى ناكلها حاره
كعدت اتفرج على تيفي الشباب مسلسل مصري وصافنه عليه باوعت ساعه ٩ انفتح الباب وطب ابتسمت لان اجه بس اباوع واشوفه عيونه براسه ركع الباب اني كلت صارت مصيبه كمت من مكاني
وبدون اي كلام لزم ايدي حيل وعتها ويعيط وصاير نار
سجاد : شطلعج للبالكونه شون اطلعين
سليل : والله من الحر طفت الكهرباء وكتلني الحر
سجاد : اني مو مانعج من الطلعه
سليل : قابل وين رحت مطلعت بره الشقه والله مسويت شى بس كعدت اتفرج على الناس
سجاد : لو تموتين مطلعين ماطول كايلج مطلعين راسج متمدي من الشباك الفمره كتلج العماره بيها عزابيه ليش مسمعين الكلام
سليل : دمعت عيني وانقهرت وكتله تره والله سامعه كلامك
سجاد : وبيش طلعتي بهاي بجامتج
سليل : لا والله بلدشداشه وحتى حطيت ربطه على راسي
سجاد : حتى لو مجان لازم اطلعييين ويعيط بأعصاب
سليل : والله متوقعت هيج متقبل لو ادري مااطلع
سجاد : اذا وصلتي للبالكون بعد اكسرها رجلج سمعتي
سليل : اشرت براسي اي
بس اني هم تعبت
سجاد : شمسويلج وتعبتي وعاف ايدي
سليل : هي هاي ممسويلي كاعده مثل المسجون وحدي بين اربع حياطين حسره عليه الطلعه والحجي نسيته من كثر مكاعده وحدي
سجاد : هسه الي يسمعج يكول جنتي يوميه اطلعين
سليل : مااطلع بس خواتي يمي اضحك واشاقى وياهن والعصر كلها نكضي بلطرمه ناكل ونسولف او بلسطح نشتم هوا ونونس روحنا واني جم مره كتلك وديني والله مشتاقه الهن وگلبي طاك عليهن وانت متقبل
سجاد : يعني اذا مااطلعج لازم اطلعين وحدج
سليل : كعدت على القنفه وكمت ابجي هسه اني وين طالعه وبعد مااطلع
جان يكوم يعيط
اني مو كتلج لازعلى كولشي تبجين وتدرين من وره سوايتج اني شسويت
سليل : رفعت راسي وباوعت عليه شسويت
سجاد : اجاني
الولد الي بلشقه البصفي وسألني منو يمي عباله صاحبتي وجايبها وبسببج كتله هاي مرتي
سليل : باوعت عليه وكتله وهذا الصدك انت مكذبت
سجاد : ممجبور اكول وثاني شى انتي مو مرتي
سليل : احس ضغط على گلبي صار منا احبه ومنا تعبانه من الخنكه الي بيها ومنا هو لابسني لمده شهر كامل انهاريت اريد احجي كافي اكدر اسميها لحظه جنون عاشقه
كتله:
لا مرتك وبعقد رسمي
سجاد : تدرين كولش زين ليش تزوجتج بسبب الظروف وحتى احافظ عليج انتي مثل اختي وتبقين هيج اختي وبس
سليل : هو كال هيج لو بانزين ذب على النار الي بگلبي وكمت اعيط بوجهه
اني مو اختك افهمها اني مو هبه اني سليل سلييييييل
انت اسمك سجاد جلال واني سليل طه منين بعد اختك
سجاد : تخبلتي نصي صوتج لا افرك حلكج
سليل : تريد يله افركه اكتلني كطعني حتى ترتاح لا عبالك راح اتأذه ياما وياما اجت مصايب على راسي متعلمه واذا على الاذيه ماكو اكثر اذيه من الي كاعد احسه واني وياك بمكان واحد
سجاد : شنو قصدج
سليل : خلي اكولك شنو هنا واضرب على گلبي قوي واحجي بحركه گلب ودموعي تنزل تعرف شنو معنى تحب واحد وتعيش وياه بنفس المكان وممنوع عليك تتقرب منه تعرف شنو احساسي واني اشوف الانسان الاحبه عايشه وياه لمده اكثر من شهر وكلامي وياه ميتجاوز الثواني شلونج شمحتاجه وبس حتى بوجهي ميباوع ويتجنب يكعد يمي بمكان ويتهرب ساعات في سبيل ميشوفني تعرف شنو معنى اشتاق من تطلع وتبقى روحي تلوب عليك من ترجع واحسب دقيقه دقيقه على الساعه صافنه ومن اسمع صوت المفاتيح تفتح الباب شيصير بيه والله احس گلبي من ضلوعي يطلع تعرف اني احبك بقى يباوع بصدمه بوجهي ويبلع ريگه بصعوبه بس عيونه تنط شرار منها واني ولا مهتمه بس احجي وابجي
سجاد : تخبلتي شنو هذا الحجي شنو تحبيني
سليل : اي احبك وحتى لتكول تحبيني مثل اخوج وابوك وعمج وهاي الشغلات لا اني احبك وروحي بيك واحبك حب البنيه لحبيبها
كعد على القنفه وسحب جكاره وشغلها بس اباوع على ايده ترجف بقى يسحب نفس وره نفس ويباوع للكاع مدنج بدون اي گٌٰــلمة ورجله تهتز متوتر
نزلت بمستوى كعدته ولزمت رجله واباوع عليه وكتله بصوت كله الم وحب اني احبك سجاد حيل احبك باوع عليه وسحب نفس قوي ونفخه وكال انتي طفله ومتعرفين مصلحتج وهاي مراهقه لا تحبيني ولا بطيخ مجرد شغلات مال مراهقين وبس تكبرين تنسيها
سليل : اعرف راح تبقى تحاول تقنعني اني غلطانه وطفله ومن هاي السوالف بس لو تحجي العمر كله مااقتنع لان اني مو من يوم او يومين حبيتك صار سنه احبك سنه ليل ونهار صيف وشتا وكل وقت وكل لحظه افكر بيك
سجاد : بابا اسكتي انتي مكعد تعرفين شتحجين ياحب هذا لان شفتيني اهتم بيج واخاف عليج حسيتي بحب واني هم احبج بس كأختي انتي تعرفين فرق العمر شكد
سليل : اعرف وميهمني واصلاً مو هوايه
سجاد : سليل افتهمي هذا الي تحسي نكدر اسمه اعجاب مراهقه طفوله غباء اي شى المهم مو حب
سليل : وكفت على حيلي وكتله مو من حقك تقيم المشاعر الي بداخلي اني الاحسه اجيت وكتله الك جان يسحب ايدي وكعدني كدامه وشمر الجكاره بلنفاضه وكال بهدوء
سجاد : سليل بابا انتي بعدج مفاهمه الحياه وبعده عقلج صغير مو معناها اني دوم وياج وادافع عنج واساعدج لازم تحبيني ولتنسين قبل كم ساعه جنتي تصيحين عمو
سليل : بس اني من سنه گلبي يكولك سجاد
نفخ بنفاذ صبر وكال
سجاد : الله مطولج ياروح شون اقنعج اني مااريد اجرحج واقهرج
سليل : اعرف متحبني
سجاد : لا احبج بس اختي بنتي اي شى غير الي بالج
سليل : واني مطالبه شى منك بس ردتك تعرف مشاعري
سجاد : ولازم هاي المشاعر تنتهي
سليل : مو بكيفك گلبي واني حره بيه جان يوكف ورجع يعيط وكف ويأشر بيده
سجاد : شنو مو بكيفك ولج منين جايبه هاي الجرئه انتي الفقيره الي تبجين من كلمة شنو هاي الجساره وفوكاها متستحين وتحجين بوجهي ولا ذره مستحه دوم اعرفج تخجلين من خيالج شجاج هسه تخبلتي
سليل : وكفت وصرت بوجهي ولزمت قميصه من صدره اي تخبلت واحبك واريدك جان يضربني راشدي بكل قوه وعاط انجبي طايحه الحظ واياج اسمعج تحجين هيج شى بعد
وخرت ايدي ودفعته وركضت للغرفه هنا شون الواحد وصحاني
شمرت نفسي على الجربايه وطكيت بجي مااعرف ابجي لان غلطت من اعترفت بمشاعري جان المفروض مااتصرف هيج لو ابجي لان ضربني واستهان بأحساسي
بقيت اشهك بقهر صعب ياربي الحب من طرف واحد صعب يأذي ويكطع الگلب
بقيت على نومتي يمكن ٣ ساعات ابجي ونمت من التعب حتى اكل مأكلت وماادري هو اكل او لا
فتحت عيني صبح بس مااعرف بيش الساعه لازم احط ساعه بلغرفه حتى اعرف من اكعد وانام كمت بس متردده اطلع مقهوره قهره احس الي يكولي شونج ابجي
فتحت الباب وطلعت على كيف ملكيت احد باوعت ساعه ١١ الصبح ولكيت صمون محطوط عرفت متريك وطالع
حتى اكل مااكدر اكل ونفسي تلعب وحيل مقهوره ومن كثر ماانهضمت وانقهرت احسها نزلت بمعدتي وتوجعني حيل
طبيت للمطبخ لكيت عشا البارحه بلثلاجه نفسه مماد ايده
حتى هو مماكل رحت غسلت اباوع بلمرايه عيوني وارمه وجهي بيه خطوط حمره مال ضربته لزمتها بقهر وحاولت ابردها حطيت شويه ثلج بلكت يروح الحمار وراها
حميت الجاي وحطيت حليب وشربت كوه شربت شويه وعفته
تذكرت الصار كله ورجعت راسي ااااااه شگد متأذايه منو يحس بيه منو راح يفهمني
شويه واندكت الباب
تقربت وصحت منو
نهر : افتحي ماما اني
سليل : فتحت الباب وجان اشمر نفسي بحضنها واشهك جنت حيل محتاجه حضنها
نهر : اسم الله شبيج امي
شو تعالي وسديت الباب واخذت سليل وكعدنا
شنو هذا حالج شبيج
سليل : وبديت اسولف كولشي الها
وهي بس صافنه
نهر : هذا الخفت منه وحذرتج وما سمعتي كلامي
سليل : ماما اخذيني وياج عفيه ما اريد ابقى هنا
نهر : لو بيدي اصلاً مجان خليتج تباتين يوم واحد بس امج كل كم يوم تمر تشوف شكو وتطلع
سليل : هيج الرفيقه سندس متفرغه النا وين جانت ذيج السنين مو تجي ايام بالاشهر منشوفها ودوم تكول مشغوله وشغل وماعندي وكت لو هسه تفرغت النا لان شغله بيها أذيه
نهر : شنسوي ياامي هذا حظنا من الدنيا لو جان الامر بيدي والله اخليها تحلم تشوفكم بس كدامج اصلاً من تجي حلكي ماافكه شتحجي وشتكول اسكت وما اتناقش وياها اخاف تطردني وتاخذ البنات اني مااهتم اجي هنا بس مااكدر يوم أمن على خواتج يمها
سليل : ادري لو ما هيج ولازمتنا من ايدنا التوجعنا مستحيل اعوفج واعوف خواتي بس هي لاعبتها صح
نهر : عوفج من هذا الكلام الي هسه مدوخني شون كدرتي تحجين هيج ويه سجاد
سليل : ماادري دنجت مقهوره جان ترفع راسي بيدها
نهر : شبيج حبيبتي
سليل : گلبي يوجعني مقهوره لدرجه حتى الهوا الي اتنفسه يجرح بصدري مااعرف راح تفهميني لو لا
نهر : تدرين اني اكثر وحده بلدنيا فاهمتج لان جربت الحب واذيته صح القصه والوضع يختلف بس عن تجربه وبعد هاي السنين اكولج محد يستاهل تأذين گلبج علموده تضحين وتحبين واتعبين وتالي تجازين بخذلان اني خايفه لا تنكسرين كسره اكبر من هاي
سليل : شنو الاكبر وهو محاس بيه شيصير بعد اكثر واني اكوله احبك واريدك يضربني
نهر : اني مااقبل يمد ايده عليج بس انتي هم غلطانه ميصير تنسين وضعج وتنسين انتي بنيه ولازم تصيرين ثكيله وهادئه واكثر مستحه مو تنسين تربيتج واخلاقج وتنزلين نفسج لهاي الدرجه تحبين على عيني وراسي بس مو مال ترحين انتي تعترفين اله شبقى بعد عبالج يحبج من تتصرفين هيج بلعكس انتي نزلتي من نظره
لتنسين نفسج سليل تصرفج البارحه اكبر عيب وغلط اني مااريد ازيد تعبج وقهرتج بس هذا الواقع البنيه شكد متصير ثكيله ورزنه ومؤدبه وتستحي كل ما الرجال ينعجب بيها انتي هذا مو طبعج صدمتيني من كلتي هيج سويت يمكن اتوقعها من اي احد بس منج لا
سليل : اعرف غلطت وجانت لحظه صعبه وكسرت نفسي كدامه بس مو بيدي من الخنكه والضغط الي اني بيه حجيت
نهر : ارجعي سليل الهادئه الطيبه الي ادنج من المستحه هذا مو ثوبج حبيبتي الجرئه والخفيه مو اخلاقج
سليل : شسوي هسه ما اكدر حتى اباوع بوجهه
نهر : اني مااكدر ادخل بلموضوع لان راح تكبر وتصير محلوه بحقج اكثر هسه ارجعي تعاملي طبيعي وياه
سليل : شلون مااكدر
نهر : لا تكدرين حاولي
سليل : الله كريم باستني عمه وطلعت باوعت العلاكه الي تجيبها يوميه فتحت الجدر لكيت تبسي بقه بس اسوي تمن
حطيته على الطباخ وبديت انظف ذبيت حيلي كله بلتنظيف ما اريد افكر مااريد اتخيل شصار البارحه شغلت راديو الهي بيه نفسي ويه الشغل
نظفت الشقه كلها طلعتها تلمع حتى الغراض النظيفه رجعت لمعتها غسلت ملابسي وشريتهم بلحمام حتى يذبون المي مالتهم وراها اشرهم على المشر الي هو حاطه بداخل الشقه طبكت التمن وعفته يتهدر ويكمل على نار ناصيه ودخلت سبحت ومن طلعت ضفرت شعري وكعدت باوعت ساعه ٣ الظهرزومااجه هو جان ساعه ٢ يجي معناها مراح يتغدى اني هم ضجت اكثر ما اني ضايجه وما اكلت بقيت اليوم كله بس اتفرج على التلفزيون لحد الليل كولشي مااسوي ومن تطفى الكهرباء ابقى اهفي بلمهفه وماافتح شباك
ما اريد مشكله جديده
باوعت ساعه ١٠ انفتحت الباب كعدت عدل باوع عليه وكال السلام عليكم
وعليكم السلام شمر المفتاح ودخل للغرفه واخذ ملابس ودخل يسبح واني كاعده طلع ينشف بشعره كتله
سليل : تتعشى
سجاد : تعشيت
سليل : زين كمت وكتله تصبح على خير
سجاد : وانت تعشيتي
سليل : اي ومشيت ادخل للغرفه سمعته يكول
سجاد : وانتي من اهل الخير
دخلت وسديت الباب وتمددت والدمعه بعيني ودوخه لازمتني لان من غدا البارحه
شويه واندكت الباب
كعدت عدل وكتله تفضل
فتح الباب ودخل كال
سجاد : ليش مماكله
سليل : اكلت
سجاد : عشا البارحه على حطته والصمون نفسه والغدا ملازمته اصلاً شون بعد اكلتي ليش الكذب
سليل : مجوعانه
سجاد : من غدا البارحه ومجوعانه
سليل : اي مجوعانه لو هاي هم جبر لازم اكل
سجاد : احجي عدل كمتي حتى متحترمين لتشوفين ساكت على سالفه البارحه
سليل : ضرب وضربتني رزاله ورزلتني بعد شتريد تسوي وعفيه مااريد اي مشكله هسه والله مو حمل مشكله اريد انام
سجاد : نامي
طلع وركع الباب بيومها منمت اصلاً للصبح يله غفيت
مرت ٤ ايام هذا حالنا واحد ميحجي ويه الثاني على كد السلام اكلي كولش قليل حسيت بتعب وكمت هوايه ادوخ وكل شويه اريد اوكع وبيوم اشتغل بس الهي نفسي جنت امسح الغرفه وفاتحه الشباك شويه تتهوى الغرفه اني بطبعي امسح الكاع بيدي وصله واستلم الشقه كلها مسح بيدي جنت امسح جوه الشباك
رفعت راسي ومحسيت بعد بشى لحد مافتحت عيني والكه نفسي بحضنه ويضرب بوجهي بيده
سجاد : تسمعيني سليل
سليل : اشرت براسي اي ومكدرت افتح عيني حيل حسيته شالني وحطني على الجربايه ويدور بغراضي على عبايه مجنت جايبه ويايه
سجاد : وين عباتج
سليل : حجيت كوه مجايبتها
سجاد : لازم اخذج للمستشفى
سليل : لا
سجاد : دمج مغرك الدنيا
سليل : احس بألم براسي مو طبيعي فتحت كوه عيني اريد استوعب الي يصير باوعت عليه شفته مخبوص ويرجف
سجاد : هاج حطي هذا الشال على جتفج وامشي للمستشفى
سليل : مااروح مابيه شى لزم راسي وعاط شون مابيج وشوفني ايده اشون متروسه دم
سجاد : تكدرين تكومين لواشيلج
سليل : لا اكدر اكوم جان يمد ايده لزمتها وكوه اتحرك اني الدوخه موتتني وخطوه خطوه وصلت للدرج وردت اوكع شالني ونزلني صار ولد كبالنا
خيرك سجاد
سجاد : زوجتي مضروبه براسها وشبه فاقده
سليل : اني مغمضه وجهي بصدره بس من سمعت كال زوجتي احس گلبي نبض بقوه
ردت ابقى هيج اتحمل الالم والدوخه بس ليبعدني من حضنه
الولد مبين عنده سياره لان ركض نزلني من حضنه ودخلني للسياره وكعدت واعيه بس بصعوبه افتح عيني
نزلنا اتمشى ودخلنا للمستشفى الطبيب كال
يمعود سهله على كيفك خبصت المستشفى اني كلت مضروبه طلقه
سجاد : دكتور رجعت لكيتها غركانه بدمها شون مااغبص الدنيا
هي بشنو مضروبه
سجاد : ماادري بس مبين بحافه الشباك لان جواه لكيتها متمدده
الضربه مو مال خياط لان عباره عن زرف براسها بس عميق هو سبب النزف كله
اتسمعيني بنتي
سليل : اشرت براسي اي
الدكتور : جيد بله افتحي عيونج
وبديت افتح عيوني واحركها مثل ميكولي اخر شى طلب تحليل من كتله جنت دايخه
عقمولي الجرح وشدوه داير مداير وجهي حتى ينضغط عليه ويتوقف النزف وطلع التحليل فقر دم
انطى لسجاد مجموعه ادويه وتوصيه بالاكل الزين اني ممركزه وياه لان اريد بس ارجع احس بنعس
طلعنا من المستشفى ورجعنا واسمع سجاد
يتشكر من الولد صعدت كوه ودخلني بلفراش
سجاد : شوي واجيج راح ورجع وره نص ساعه جايب وياه معلاك شوي وزلاطه وكرفس واجه كعد يمي على الجربايه وبصينيه صغيره حطهم كدامي
سجاد : يله اكلي
سليل : مجوعانه
سجاد : اريد افتهم الي دتسوي شنو معناه
سليل : شمسويه
سجاد : ليش تأذين نفسج
سليل : ممأذيه
سجاد : من متاكلين تأذين نفسج ومن تشتغلين وانتي دايخه هم تأذين نفسج ولج احس كاشي الشقه راح ينشلع من المسح
سليل : ممتقصده أذي نفسي وثاني شى وين اروح التهي بلشغل
سجاد : يله اكلي بداعت طه
سليل : كعدت اكل وكوه ابلع اللكمه وهو راح وجاب وصله ومسح الدم من الكاع ردت امسحه مقبل كملت ورجع شال الاكل من كدامي واخذت العلاج الي انطاني الطبيب وتمددت
سجاد : محتاجه شى
سليل : سلامتك
سجاد : تصبحين على خير
سليل : وانت من اهله وجان يكول بهدوء
لتخوفيني بعد عليج
سليل : اشرت براسي اي وعافني وطلع كمت كل كلمة يكولها افسرها الف تفسير حتى لو مو بقصد احسب الها حساب نمت من اثر المسكنات كعدت على اصوات مشتاقتلهم بكد الدنيا وبوسات بخدي فتحت عيني
والكه رشا وريم وغزل حضنتهم ممصدكه كدامي
رشا .. هااا ثلل يكولون متعاركه وفاشخه ٥
سليل : شون اجيتو
ريم : عمو سجاد جابنا اشتاقيتلج ثلل والله مرات ابجي لان مااشوفج
حضنتهم حيل وردت ابجي من كثر ممشتاقه الهم
غزل : شوكت ترجعين
سليل : ان شاء الله ارجع ولج حليانه وكبرانه
غزل : ماما ارجعي ويانه
سليل : غير مره ارجع
رشا .. يله اروح اسويلكم ريوك
سليل : ليش ساعه بيش هسه
رشا .. عشره الا ربع اذا عمو جابنا سحل من الفراش حتى نصبح عليك وناكل سوه
سليل : وعمه وينها
رشا .. بقت خفر بلبيت اخاف ماما سندس تجي اذا هي هاي الفتره صايره مقيمه عدنا كل شوي وكامزه كالت تبقى اخاف تجي تغطي علينا وتكولها نايمات
ومن نرجع تجيج
سليل : خوما تضايقكم
رشا .. خلي نتريك واسولفلج شسويت
راحت تسوي ريوك وحضرت كولشي سجاد جايب بيض وكيمر عرب وصمون حار عايفه بلمطبخ وعافنا وحدنا جنت كاعده بين خواتي مثل الكاعده بلجنه حيل مشتاقه الهن وجيتهن بوكتها
اخذتني رشا وغسلت وجهي ورگبتي وشعري اطرافه لان بيه دم بس حاولت متوصل المي للجرح وغسلت جسمي كله وبدلت ملابسي كلهن بدون ماادنج او اسوي مجهود حتى لا ادوخ حبيبتي كبرانه وصايره شاطره
وضفرت شعري على كيفها وكعدنا نتريك وبدت تسولف الصار
رشا .. جنت كاعده اشتغل وماما وعمه كاعدات وتعرفين امج تحير شذب حجي شو هاي سكتت وجان تكول لعمه
سندس : رشا كبرانه هم صايره مره
نهر : جوزي منها مكافي ذيج هججتيها
سندس : مالج دخل انتي ولتنسين اني هنا واصله منج وتأشر على خشمها بس اضوج اطردج
نهر : انتي من يامله لخاطر ربج كل متجين تعيطين وتسويلج مشكله وترحين وتردين بناتج يحبنج هنه اصلاً شافن منج بس المصايب واخر شى بعدتي اختهن عنهن
سندس : بله اسكتي ولتخرطين براسي وعوفيني ويه رشا
نهر : مااعوفج احجي كدامي
سندس : ولج نهر لتحطين راسج براسي
نهر : من انهجم راسج كون
سندس : بله متولين تعالي ماما رشا
اجيت وكعدت بصفها
كامت تلعب بشعري
ماما شلونج بلمدرسه
رشا .. بعد وكت غير عطله هسه
سندس : رحتي ثالث وصرتي مره
رشا .. اي ادري وبعدين
سندس : شنو قصدج
رشا .. ماما شتردين مني عفيه بدون هاي الحنيه الزايده
سندس : اعرف بيج عقلج جبير وذكيه واكيد راح تفتهمين كلامي
نهر : عوفيها سندس كومي ماما رشا
رشا .. لا عمه خلي افهم ماما شتريد مني
سندس : نهر اذا حجيتي حجايه ثانيه العب بيج طوبه اسكتي
رشا .. اسمع كملي
سندس : بنتي ابن عمج خليل ولد شاب وحلو وامكانيته زينه حتى سياره عنده وخير من الله فلوس واملاك ويريد بنيه حًلوه وصغيره شون انتي يعني قسمه ذهب مستحيل تلكين مثلها وفوك كل هذا اذا تزوجتو يجوز تعيشين يمي بلبيت الجبير واطلعين من قفص الدجاج العايشه بيه صيري سباعيه مو مثل اختج الفگر راحت ذبت نفسها بتهلكه حتى متتزوجه لتضيعون تعبي وتخطيطي كل هاي الاشهر والله نصير بلسما اذا تزوجتي ابن خليل
رشا .. مااريد
سندس : لج امي والله تتندمين بعمرج تزوجت بس معرفت اختار وهاي تاليها كتلني القهر الفگر وقله الحال وضيعت شبابي على الفارغ اريدج تعيشين احسن عيشه وحتى خواتج تكدرين تساعديهن
نهر : مو على اساس طه اخذج بت وزير وعشتي بلفكر والله تحجين الاخرس
سندس : مالج علاقه بعمتج الرعنه ركزي ويايه انتي اذكى من اختج وطالعه عليه ادري بيج ولج حطي ايدج بيدي واعيشج ملكه وعوفي هذا الضيم كله واقبلي ومن باجر اسويلج احلى عرس والله تكومين تمشين وتصيحين عاشت ايدج ماما على هاي القسمه الزينه
رشا .. بس الولد ما اعرفه
سندس : وره الزواج تعرفي اهم شى تقبلين بلزواج لج امي اكلها خير من الله والف بنيه تتمناه ومعودت اخلي وحده منجن اله ذيج الثوله مشت وره ذاك التافهه النافخ روحه على الفكر بقيتي انتي لازم تسمعين كلامي وتشيلين سوالف الناس التعبانه المتوكل خبز سوالف عمتج
رشا .. شوفي ماما زواج اني مااتزوج هاي من الاخير
سندس : انتن ليش تعاندني وتخلني اسوي شى مااحبه
رشا : اسمعيني زين اخاف عبالج تسوين مثل مسويتي بسليل اني هاي الشغلات متأثر بيه اني مو سليل الفقيره ولا عمه الي تخاف تطرديها ومتحمله كولشي اني ميهمني بشر حتى خواتي حتى عمتي محد يهمني ابيع الكل يعني تحبسين عمو او عمه اطرديها او تأذيها خواتي تبعديهن عني كلهم ميهموني ولا يهزون شعره مني لو يموتون كدامي مااهتم اني اهم شى عندي نفسي واذا طردتيني اروح يم سليل يعني لتحاولين ويايه مثل سليل زواج مااتزوج
سندس : ايا گلبه هيج صارت
رشا .. واكثر واذا تردين هسه الم ملابسي والحك سليل واخاف تحاولين تزوجيني غصب تفكرين بطريقه ثانيه لتعبين نفسج عندي قابليه حتى انهزم واصخم وجهج لو اكو لأبن رجلج مزوجيني علمود فلوسك وامي غصبتني
سندس : هاي تربيتج نهر والنعم منها
رشا .. هستوج كلتي طالعه عليه لازم متستغربين
سندس : والله حرامات حبلت بيجن وتعبت وخلفتجن بس للاذيه وخلصت حياتي بلفكر من وراجن امده هيج خلفه طايح حظها طبجن مرض خيسن هنا بهاي العيشه الزفره
جان تغمني وتطلع
انداريت على عمه لكيت دمعتها بطرف عينها ومصدومه من كلامي وجهه اصفر
تقربت منها ونزلت بست ايدها وكتلها افديج بروحي واصير جوه تراب رجلج انتي وخواتي انتم كل حياتي بس جنت متوقعه تفتر عليه خاصه من صارت شغله سليل وهاي الايام كلها افكر شكول الها اذا فتحت الموضوع ويايه وحتى تمرنت بلساعات على المرايه حتى ابين قويه كدامها ومااخربط بلكلام او امتمت انتم كل حياتي عمه وسليل امي وريم وغزل عيوني بدونكم اموت واذا لمسكم الهوا واذاكم اتخبل مو عاد تأذيكم بس ماعندي غير حل حتى افلت من اذيتها بله سليل تزوجت عمو اني شون افلت هم اتزوجه شطلعت هاي ماخذنا مقاوله
نهر : ابتسمت وردت ابجي وحضنتها حيل
ولج ميصير يجمع بين الخوات يعني ميصير يتزوج اختين
رشا .. هااج فوكاها يله اتزوج سعدون المخبل
نهر : هههههه كبرتي يابت طه وصرتي قويه وتوكفين وتاخذين حقج
رشا .. شعبالج عمه اعجبج بهيج سوالف
نهر : انتي نسخه من سندس بقوتها ولسانها بس داخلج وگلبج وروحج طه وكاعد كدامي الْحٍمَدٍ للـّ? ماطلعت ولا وحده على امجن بالاخلاق
رشا .. ماما صنعت بلعراق قطعه وحده وعزلو المعمل
نهر : هههههههه تعالي بحضني
رشا .. لتزعلين مني فدوه
نهر : ماكو امي تزعل من بناتها
رشا .. يله يااحلى عمه بلدنيا نروح نكمل الغدا الله عليج اريد تمن احمر جوعانه انفتحت نفسيتي على الاكل خلصت من الرفيقه سندس لو بيدي هسه اشد وصله واركص
نهر : احلى تمن اسويلج وتعالي اعلمج شون يصير
سليل : والله ذكيه شون اجت بالج
رشا .. والله ايام افكر حتى نوم ماانام وهلمره انتي ماكو يمي اجت ساعات اريد اجيج ركض من كثر ممشتاقه الج وخفت لتسوي بيه مثلج وكعدت اخطط واحفظ الكلام
سليل : والله اني دمعت الله يساعد عمه شون تحملت تسمعه
رشا .. ماعندي غير حل
سليل : والله وبطله ولج اني صدك امج
رشا .. واغلى والله وحضنتها حيل
ريم : اني هم اريد حضن مو بس رشا
سليل : ههههه تعالي وحضنت حتى غزل الصافنه بوجهنا
مرت ٣ ساعات وخلصناها ضحك وشقى جنت طايره بيهن حتى الم راسي ناسيته واكلت كومه وياهن
وراها اجت عمه وحياتي انتهت من شافتني تبوس بكل راسي ومبقت غير دقايق اخذت البنات وراحت بس من اخذتهن تكول اخذت روحي حيل انقهرت بس مابيدنا شى
المهم شفتهن اخذت علاجي وتمددت اني احب نومه الظهر نمت كعدت على دكه الباب عرفت سجاد
سجاد : يله كومي راح يصير المغرب
سليل : ساعه بيش
سجاد : بلسبعه
باوعت بيده كلاص برتقال وجان يقدمه هاج اشربي
سليل : ليش تعبت نفسك
سجاد : ماكو تعب اشربي لازم فقر الدم يروح ونقص فيتامينات هم عندج سكراب طلعتي
سليل : ههههه لا مابيه شى
كاعد على الجربايه بصفي كتله شكراً لان جبت البنات
سجاد : مو كتلج مااحبها كلمة شكراً
سليل :باوعت بوجهه وكتله اني مااكدر بعد اصيحلك عمو
سجاد : ليش
سليل : دنجت وكتلك مااكدر وخلص
سجاد : صيحي بلي تردي بس تنسين ذاك اليوم كله والي كلتي كله تشيلي من عقلج
سليل : لتخاف شلته كله وانت هسه عم وصديق واخويه الجبير وبس
سجاد : عفيه هيج اريدج
محتاجه شى راح ارجع لشغلي
سليل : لا شكراً
وطلع واحجي بداخلي تبقى حبيبي تبقى اول واحد نبض گلبي اله بس بعد ما ارخص نفسي كافي الصار ذاك اليوم
ثاني يوم جمعه وكاعد لكيته يدك بلبالكون
سليل : شسوي
سجاد : راح اسيج البالكونه بسيم حتى ميبين وهم تكدرين تكعدين براحتج وراح اجيبلك زرع هنا
سليل : يعني تدخل شمس
سجاد : مو سيم ناعم لا زين ويعبر هوا وشمس وتكدرين تشوفين بره بس المهم الي قريب علينا ميشوفج زين
سليل : ياريت احب اكعد بيها
سجاد : تكدرين تسوين جاي حتى اكمل لو بعدج دايخه
سليل : لا الْحٍمَدٍ للـّ? صرت زينه ورحت سويت الجاي وكعدت يمه من يشتغل وبيومها كمل البالكون وغسلناها كولش كيفت بيها
وراح جاب سنادين زرع اشكال وكال بعد ذني مسؤوليتج اتلهي بيهن
خلال اسبوع سويتها جنه كراسي اثنين وطبله صغيره وداير مداير زرع وهي جبيره يعني الكعده بيها تسوه الشقه كلها
صارت سلوتي وحتى هو مرات يحب يكعد بيها ويدخن بس من هو بيها اتقصد مااكعد يمه يعني انگلبت الادوار اني كمت اتجنب نكعد سوه مده طويله
فكيت الشاش وصار راسي زين
اجت المدارس واجت عمه جايبتلي اشكال غراض طلع هو منطيها فلوس تتسوك مال السنه الجديده وهم طلبت غراض وشغلات بذاك البيت تجيبهم اليه
خواتي اجوني مره ثانيه هم كم ساعه وراحن
بديت اتأقلم على حياتي بلشقه
هلسنه اني خامس اعدادي جان المفروض سادس بس مع الاسف تركت بس يله كولشي قسمه
حياتي وياه هادئه احاول اتجنبه شكد مااكدر وبعد ٣ ايام المدرسه
جنت كاعده بعد الليل اكيد ماانامه تمددت وغمضت عيوني ردت بس اغفى راح تصير ساعه ٤ الصبح ومنايمه حسيت الباب انفتح بهدوء
بقيت مغمضه عيوني ونايمه على ايدي اليمنى احس بحركات رجله يمشي بهدوء ويتقرب شوي شوي لحد موصل يمي و كعد بموازات نومتي وقرب وجهه وجان احس بأنفاسه الدافيه تلامس وجهي اااااه نفس الي سويته قبل مده بس هلمره احس دمي وكف احس جسمي وكل مسامه بيه تكزبر لان هو قرب وجهه من وجهي ردت افتح عيوني بس خفت يطلع حلم لو يطفر ويطلع عذر يكسر هاي المشاعر الي احسها بدت تتقرب الانفاس اكثر حسيت راح يلامس وجهي اسمع صوت انفاسه وشون يجر النفس بهدوء ثواني بس حسيته تعادل العمر كله
جان يوخر ردت اكوله لتروح عفيه فتحت عيني على كيف لكيته فتح الباب وطلع
السواه دمرني رغم ملمسني بس حسيته ليش هيج سوه اذا اني اخت اله ليش اجه ودخل غرفتي وهو اصلاً ميدخل اله يدك الباب وليش بنص الليل وهذا السواه شنو معناه اخاف ردت ارجع اتزن خرب كل الموازين ورجع اعصار گلبي

يتبع ...

صـباح الـ🥀ـورد والهنا بسبب انقطاع النت ولان البارت جاهز نشرته هسه واذا اكو نت بليل ينزل بارت ثاني لان راح ابدأ بكتابته واذا ماكو نت شوكت ميجي انزله
رِّبًـــ♡̨ـــٍْيٌٓ يحفظكم
تحياتي لًلًـّــ💎ــجٌٓمٍَُٓيِّعَْٓ